We, mi sa ferteri wan tori. Na wan bigisma ben ferteri mi a tori disi di mi ben de wan pikin fu seibi yari. Na
wan moi pisten kba. Ma mi no fergiti en ete, bika a tori disi ben leri mi wan sani.
A ben de so, dati wan frow nanga wan man ben libi. A frow ben nen Alma èn a man ben nen Albert. Alma nanga
Albert ben de tu poti sma. Te mi taki poti dan na poti srefi. A oso pe den tu sma disi ben tan, ben de wan bigi
owru patu. Na so yu ben kan kari en. Ma mi e denki taki a ben de wan owru bari. Ma a bigisma ben kari en wan patu.
Na drape den sma ben libi.
So, masra Albert ben go ala dei go uku. Na san a ben fanga na dati den ben e nyan. Bikasi den no ben abi no wan
tra sani fu nyan. Te a no ben fanga noti, dan den no ben abi noti fu nyan. Na so wan dei masra Albert ben go uku
baka, a go sidon na sei a watra. Dan ai prakseri efu na so pinapina a sa tan en heri libi langa. Ala dei a ben
musu go uku, èn a ben abi wan enkri ukutiki nomo.
Ma wan dei di a sidon na sei liba e prakseri en libi, a firi taki wan sani e hari en uku tiki. A prakseri: "Ai,
mi feni wan sani." Dan a bigin hari. Ma a sani ben hebi. Dan a prakseri taki: "Ai, disi na wan bigi fisi
san mi e hari dyaso." A poti wan futu go na fesi nanga wan go na baka, dan a bigin hari.
Di a hari bun tranga a si wan moi pikin fisi na a aka. Dan a prakseri taki: "Fa so wan fisi kan hebi so?"
Ma di a luku moro bun, a si taki a fisi no ben de wan lawlaw fisi. A ben de wan gowtu fisi. Dan a man bigin prisiri
fu di a fanga wan gowtu fisi. O moro a ben luku a fisi, o moro a fisi e moi.
Na luku ai luku a fisi, ne a yere wan sten aksi taki: "Fu sanede yu e luku mi so?"
Dan Albert taki: "San! Yu e taki?"
A fisi piki taki: "Iya, mi e taki."
Dan Albert aksi taki: "Fa a du kon dati yu e taki?"
A fisi taki: "Mi no kan taigi yu fa dati du kon. Ma efu yu wani mi kan yepi yu. Bikasi ala dei mi e si yu
e kon uku dyaso. Tide yu kan aksi mi wan sani, dan te yu go na oso yu sa si en. Ma yu mu trowe mi go baka na ini
a watra."
Albert taki: "Ai, mi sa trowe yu go baka na ini a watra."
A fisi aksi en: "Dan san yu wani dan?"
Albert taki: "We yere, mi wani wan moi oso pe mi nanga mi frow kan tan na ini. En a oso mus abi nyanyan nanga
dringi."
A fisi piki en taki: "A bun, te yu go na oso yu sa si taki den sani de."
Dan Albert opo, a no uku moro. A go na oso fu go luku efu a sani psa trutru. A waka esesi go na oso. A miti wantu
mati fu en na pasi di ben wani ori en nanga tori. Ma a no arki den srefi bikasi a ben wani si san psa na en oso.
Di a doro na oso a skreki. Bikasi pe a patu ben de fosi, now wan moi oso tnapu. Dan a go na ini a oso. A si en
frow na ini a oso. Nyanyan ben de, dringi ben de. A frow lon kon na en masra, a brasa en dan a bigin fu taki: "Albert,
fa a du kon dati a sani disi psa?" Dan Albert bigin ferteri en frow fu a fisi. Den ben breiti sote taki den
bigin dansi na ini a oso. Den nyan te leki den bere kon furu.
Dan di den kba nyan Alma kari Albert. A taki: "A moro betre efu yu go baka na a fisi. Yu sa man kari en baka?"
Albert piki taki: "Ai, mi sa man kari en. A ben taki te mi abi en fanowdu mi kan kari en. Mi ben fergiti fu
taigi yu dati."
Dan frow Alma taki: "Aksi en wan moro bigi oso nanga wan ijskasi nanga wan gasfornuis nanga ala sani san musu
de na ini wan oso. En aksi en wan tu gowtu sani tu."
Masra Albert taki: "A bun, mi sa aksi en. Ma tide mi no man go moro bikasi a lati kba. Tamara mi sa go."
Na so den sribi na ini a moi oso. Di dei opo Alma wiki Albert fu go na a fisi. Dan so Albert opo go na a fisi.
Di a doro, a aksi a fisi ala sani san a frow ben wani. Dan a fisi taki dati a kan go na oso, ala sani san a aksi
a sa kisi. A lon go na oso fu si efu trutru den sani sa de na oso.
Di a doro na oso a si taki ala sani san a ben aksi a fisi ben de. A frow ben weri moi gowtu sani. Ma den sani no
ben sari en. A ben wani moro sani. A taigi en masra: "Yere, tamara te yu e go na a fisi yu musu aksi en wan
wagi. Taigi en ooktu dati mi wani wan moro bigi oso leki wan kownu-oso. En mi wawan no sa man krin a oso dati.
We, meki a gi mi wan tu knekti fu du den wroko gi mi. Mi mus gersi wan kownufrow èn yu mus gersi wan kownu."
A man no ben lobi a tori, a taki: "Yere, a moro betre wi tan so. A libi bun so."
A frow taki: "No, mi no wani tan so. Mi si taki yu na wan don man. Mi taki go wantron na a fisi. Yu no breiti
dati yu feni wan fisi di kan gi yu ala sani san yu wani? Opo go esesi na a fisi."
Albert ben frede gi en frow, a no ben wani a frow kisi atibron nanga en. Na so a go na a fisi. A aksi a fisi ala
sani san a frow ben wani. Dan a fisi taki: "Mi sa du disi ooktu gi yu, bikasi yu ben du mi wan bigi bun di
yu ben fringi mi go baka na ini a watra. Yu kan go na oso. Ala sani san yu aksi mi, mi sa du gi yu."
Di a man go na oso a si ala sani di a ben aksi a fisi. A skreki fu si en frow na tapu wan kownusturu nanga wan
kroon na tapu en ede. A ben gersi wan kownufrow. Furu sma ben de na ini a oso e wroko. Albert nanga Alma ben gudu
sote. Ala sani ben de na ini a oso. A man ben breiti fu si fa en frow ben prisiri. A frow ben lafu heri dei, èn
someni leisi ini wan dei a ben weri tra krosi.
Dan a frow kari a man, a taki: "Yere, a fisi na wan bun fisi. Ala sani san wi aksi en ai gi unu. Wi kon gudu
trutru. Ala sma e luku unu. Mi breiti fa yu ben fanga a fisi bikasi a puru unu na ini a poti libi. Luku fa mi kon
moi. Yere, du wan laste sani. Go na a fisi dan yu e taigi en dati wi breiti nanga ala den sani. Ma wi wani wan
laste sani. Wi wani dati den sma musu anbegi unu. Wi wani tron leki Gado, meki libisma boigi gi unu."
A man taki: "No, mi no wani aksi so wan sani. No wan sma no kan de leki Gado. Fa yu kan seni mi fu go aksi
so wan sani. Mi no o go."
A frow atibron nanga Albert. A bigin rigeri. A taki: "Fa yu don so? Yu don moro wan kaw. Mi taki mi wani de
leki Gado. Go esbiten na a fisi go aksi en."
We, fu di a man disi no lobi te en frow e kisi atibron, a go baka na a fisi. Di a doro a aksi a fisi ala sani san
a frow ben wani. A fisi taki: "Yere dya. Noiti mi ben denki yu ben sa aksi mi so wan sani. Ala sani san yu
ben aksi mi, mi gi yu. Mi ben sa wani fu yepi yu ala ten. Ma yu gi mi sari nanga a sani di yu aksi mi now. Mi no
kan gi yu a sani dati èn mi no abi prisiri nanga yu moro. Dati meki mi e teki ala sani baka di mi ben gi
yu. Go na yu oso dan yu sa si."
A man skreki sote. Dan a no si a fisi moro. A fisi gwe. A kari en, ma a no ben piki moro. Albert firi brokosaka.
Na so a drai go na oso baka.
Di a doro na oso a no si a kownu-oso moro. A si a owru bigi patu. Di a go na inisei a si a frow e krei na ondro
a patu. A taki: "Frow, yu si san psa? A fisi atibron nanga unu."
Dan a frow taki: "Fu sanede yu go aksi a fisi so wan sani?"
Ne Albert piki en: "Ma na yu seni mi!"
Dan a frow taki: "Dan yu no ben musu go!"
Ne den sma bigin kosi densrefi dan den bigin feti na ondro a patu. A wan e bari: "Na yu seni mi!" A trawan
e bari: "Dan yu no ben musu go!" Na so den ben meki trobi go doro.
We, a tori disi e leri unu taki un no musu haira na tapu grontapu sani. Bikasi te yu haira, yu wani sani di yu
no man kisi, dan a sa tyari problema gi yu. Te so fara a tori fu frow Alma nanga masra Albert.