A ben de so taki wan dei mi mama ben bori okro. Dan mi mama e bori a okro, ai bori a okro. Dan now a taigi wan fu den pikin sisa fu mi fu bori a okro go doro. Dan mi kon wraak. Mi no wani du neks moro ini a oso. Mi go sidon na wan sei. Dan baka wan pisten mi yere: "Sam, luku. Mi o poti fu yu nanga Daniel na ini wan komtyi dya."
Dan mi taki: "No, no, no, no, no. Mi no wani, mi no wani." Bika mi denki taki Daniel e nyan esi moro mi. So te yu e poti a spun skoinsi ini a komtyi, yu e teki a meti fosi. Mi sidon, mi taki: "No, no, no, no, no." Dan mi bigin rigeri drape. Mi rigeri. Mi rigeri taki: "No, no, no, mi no wani!" Mi pusu mi sisa srefi.
Dan mi mama taki dati mi musu go na doro. Mi tan tnapu drape nomo. Mi wraak. Mi no go na doro, ma mi tnapu e luku fa mi sisa e puru a nyanyan. Dan mi go sidon leti ondro a cash and carry, pe a okro ben de tapu faya ete.
A cash and carry ben tnapu leti sei a ijskasi. Na tapu a ijskasi wan koba ben de. Èn fa a oso ben de fu udu, dan te wan sma ben waka psa, a ijskasi ben degedege.
Mi ben luku atibron fasi. Den trawan san ben de dape taki: "Yu tôf, yongu." Mi no ben lafu, ma mi ben luku atibron fasi nomo. Dan mi pikin sisa taki baka: "Mi poti fu yu nanga Daniel. Mi no abi bisi san yu wani taki."
Mi ati ben bron moro tranga. Mi ben tan sidon drape nomo. Wan birfrow pikin ben de insei tu. Dan leki fa a gwenti de taki te furu oso de ini wan dyari, dan den sma lobi fu libi makandra. Dan winsi birfrow pikin lon kon insei, yu no abi trobi, yu e nyan makandra nanga en. Dan a meisje, den pikin sisa nanga mi mama nanga mi papa ben de ini a oso. Owktu wan tanta fu mi ben kmopo fu Pelgrim Kondre kon. A ben sidon na insei tu.
Dan fa den ben wakawaka ini a oso a ijskasi bigin degedege. Dan mi yere: BAM! A koba fadon tapu a patu nanga okro. Dan a patu kanti fadon tapu mi bakasei. Mi dyompo opo. Mi bari! Mi bari! Mi ori mi bakasei. Mi bigin skuru en. Wantron ala sma lon kon luku san psa. Mi papa taki: "Yu no mu skuru en, yu no mu skuru en!" Bika te wan sani bron yu, yu no mu skuru en. We, mi no arki mi papa srefsrefi. Mi e skuru mi bakasei nomo.
Wan liba ben de krosibei fu wi. Dan mi papa taki: "Lon go dyompo ini a liba."
Fa mi ben wani lon gwe mi bigin prakseri taki: "Nanga a skin-ati san mi ben abi, dan ala sma e si taki mi lon go ini a watra." Mi taki: "No no no." Mi e skuru mi bakasei nomo. Dan mi mama lon go teki sopo kon, dan a lobi en gi mi bakasei. Toku dati no yepi. Dan wan fu den trawan go teki bana kon. Dan mi mama poti en gi mi bakasei. Dan dati yepi pikinso.
A ben de sonde, dan ala presi pe dresi ben seri, ben tapu. Dan mi mama taigi mi brada meki a tyari mi go na datra. Ma now san na a sani? Mi no ben man weri bruku bika a o plak, tog. So mi no tan drai langalanga moro, mi weri mi sisa yapon.
Ma fu go nanga a yapon na strati ben de wan sani gi mi. Ma toku mi ben musu fu go. Dan mi luku fosi pe den skoromati fu mi de. Di mi no si no wan fu den, dan mi nanga mi brada bigin waka gwe. Ma toku wan fu den mati fu mi kon si mi. A bari: "Ei, Sam weri wan yapon! Luku, luku, luku!" So den trawan ben kon si mi tu. Den dreigi mi, den dreigi mi. Ma den no ben sabi dati mi ben bron na mi bakasei. Dan mi nanga mi brada no du noti moro leki un bigin waka moro esi gwe.
Di un doro na datra-oso datra no ben de. Ma a oppasser ben de. Dan a aksi: "San un wani?"
Mi brada aksi: "Meneer, datra de?"
A oppasser taki: "Datra no de. Ma san mi kan du gi unu?"
Mi brada taki: "We, noti." Dan un drai baka go na oso. Mi no sori a oppasser san ben psa nanga mi, bika mi ben frede spoiti.
Di un doro na oso mi mama aksi un: "Fa a waka na datra?"
Mi brada taki: "Mama, a oppasser ben de. Ma datra no ben de."
Mi mama taki: "Yu taigi oppasser san psa dan?"
Mi brada taki: "No, mama."
Mi mama taki: "Ma yu ben kan taigi en! A bo yepi unu. Ma un no abi fu go moro bika a lati kba."
Dan mi go wasi nanga tranga. Mi bakasei ben bron mi ete. Dan di mi kba, mi mama ben boro den blaas pikinso pikinso. Mi ben denki taki den no bo gwe moro.
Munde mamanten mi mama tyari mi go na datra. Di mi go na datra, a aksi mi mama san du mi. Mi mama taigi en dati mi bron na mi bakasei nanga okrobrafu. Dan datra taki: "Mi boi, efu yu ben bron nanga oli un bo ori yu dya. Ma go na zuster, dan a sa yepi yu moro fara."
Zuster taigi mi meki mi saka mi bruku. Mi no ben wani saka mi bruku bika mi ben syen. Dan a taki: "Boi, sanede yu e syen?" Mi no piki en. Mi drai mi fesi. Dan syensyen mi saka mi bruku. Dan a zuster gi mi wan klem-spoiti. A hati! Mi firi en te na ini mi bonyo, dati mi bigin krei. Dan zuster poti dresi gi mi.
Baka wan tu leisi di mi go na datra, den soro kon betre. Ma te leki now mi abi a bronflaka ete.
Dan fu a heri okrobrafu san mi ben rigeri so, mi no feni notnoti fu nyan a dei dati moro. Den dagu fu a birti kon leki ala puru na gron. Dan mi sidon, mi prakseri taki: "Fu sanede mi ben mus rigeri so? Wan pikin lawlaw sani, mi meki a kon so bigi dati mi doro te na datra-oso." Mi prakseri taki wan tra leisi mi no e go rigeri so moro.
© Copyright 2002 SIL. All rights reserved worldwide.