Bruinendaal

Arkiman, disi na a fosten tori fu a pranasi di den kari Brendari noso Bruinendaal. Den fosten driktoro di ben kon ini Sranan e libi den frow ini Bakrakondre fu sen' teki den frow bakaten te a de wantu yari ini Sranan. Te a driktoro si a fasi de a libi e go, ibri tron te driktoro e skrifi en famiri ini Bakrakondre, driktoro e gi a frow bun pramisi ai skrifi en frow a fasi di a libi takru ini Sranan. Bika driktoro abi solek' oso bediende moi yongu wenkye srafu di e du ala wroko gi driktoro.
Ini a sukrupranasi Brendari noso Bruinendaal aan de beneden Commewiyne, a bakra driktoro abi solek' bedienden tu yongu wenkye srafu: Adyuba nanga Afi. Adyuba abi eenentwentig yari, Afi abi drieëntwentig yari. Den wenkye bigi stampu fu den yari. Driktoro no trow, a no abi frow ini oso sodat' Adyuba nanga Afi abi taki ini driktoro oso. En di driktoro no e gi tori Adyuba nanga Afi e meki den e broko. Ma, Arkiman, tu kaptein no kan tan ini wan sipi. Driktoro no wani koti sneki a mindri. Di Adyuba nanga Afi kisi trobi driktoro e meki Adyuba tan tu wiki, Afi tan tu wiki e meki driktoro bedi. Adyuba nanga Afi e wroko bun sodat' a dangra gi driktoro, a no sabi suma a mu seni gwe. Adyuba nanga Afi de dei nanga neti ini driktoro oso. Den na feanti, a wan no kan si a tra wan schaduw. A wan dyarusu a tap' a trawan. Neti a wan e luru a trawan ef'a no e go ini wan ferkerti sribi kamra.
Mun langa driktoro prei en komedi te Afi, a wan wenkye srafu, de ini verwachting fu driktoro. Di Adyuba sabi Afi de ini verwachting fu driktoro, a no wani tek' a syen, a no wani tek' a dreigi fu den trawan dat' Afi de na en tapu. A baka wan wiki Adyuba hanga ensrefi fu dyarusu.
Di Adyuba no de moro, Afi na misi ini driktoro oso. A baka someni mun Afi kis' wan pikin di driktoro kari Derek. Di Derek abi tin yari driktoro sen' Derek go na en famiri na Bakrakondre pe Derek tan te a abi achttien yari. Derek go baka ini Suriname na en p'pa nanga m'ma. Derek kleur no dungru. En ede wiwiri langa grati solek' tu bakra pikin. Driktoro lobi Derek solek' en ai na en ede. A ten di Derek de baka ini Suriname, driktoro no e go moro a fabriek so tu a bakagron. Spit nanga rumatiek e trobi driktoro moro furu te alen e kon. A baka someni mun di Derek de baka ini Suriname ini a pranasi, Derek go nanga skrif'man, di a wan doisri, nanga basya a bakagron nanga a miri-oso. Derek e leri ala sani. A doisri skrif'man fu a pranasi Bruinendaal e leri Derek ala san no bun. Apresina bon no e meki figa. Derek abi wakawaka ai nanga wakawaka anu solek' en p'pa. Ini a fabriek furu yongu umasrafu e wroko sodat' ibri mamanten te skrif'man nanga basya seti wroko, pikin masra Derek e go koiri ini a fabriek. Derek e rigeri nanga den srafu bika en na meester. Pikin Derek sabi ala sani moro den man di de yari langa ini a fabriek.
A bigi kapa nanga faya sukru e drai `en fu si den someni pikin yongu wenkye srafu ini a fabriek, masra Derek e kren na isritrapu go tap' te na tap'sei fu a kan si ala sei ini a fabriek. A isritrapu a wan kfalek presi bika ef' Derek mis' futu, ef' a trapu nati, a grati a no abi wan enkri koni Derek e go fadon ini a bigi kapa nanga faya sukru. Sodat' ibri tron te Derek tnapu a tap' a isritrapu a doisri skrif'man, di a wan didibri ini libisma skin, nanga basya e bari Derek: "No tnapu a tap' a isritrapu te alen e kon of te yu susu abi tokotoko".
Derek abi tranga-yesi. A tu yesi-olo, a bari e go ini a wan yesi-olo a bari e kmoto ini a tra yesi-olo. Derek no wani yere. Ai prei komedi a tap' a trapu.
Now a ben de bigi alen ten. Eri neti te musumamanten alen kon. A fesi a fabriek tokotoko a kfalek a fes'a fabriek. Derek kmoto nanga en prasoro na oso fu go ini a fabriek solek' a gwenti. Di a de a fes' a fabriek a grati a fadon ini a tokotoko. Den srafu di de na dorosei e wroko di si san psa den lafu. Derek wrak. A taigi basya fu wipi ala srafu di laf' en te bakadina. Nanga a nati tokotoko susu, krosi nanga wrak ini en ati Derek go ini a fabriek. Solek' a gwenti a go wantron a tap' a trapu go tnapu.
Skrif'man bari gi Derek: "Saka, saka. No tan tap' a trapu."
Derek ari en skowru, a go tnapu a tap' a trapu. Derek no tnapu wan minuut, a bradi driyfriem di de na bigi wiel fu drai na bigi kapa nanga sukru koti. A klap bari solek' wan kanun sutu. A driyfriem frekti Derek na en mindribere, a puru Derek na tap' a isritrapu a trowe Derek go fasi ini a bigi kapa nanga faya sukru.
Basya ini a fabriek bari fu stop a machine. Bifo a machine stop na feifi minuten psa. Derek fadon a mindri a kapa nanga faya sukru. A de te na en neki ini a faya sukru. Derek dede ini a kapa nanga faya sukru.
Na owru p'pa fu Derek dede siksi mun a baka Derek fu sari. Famiri ini Bakrakondre sari. A baka dede fu granmasra, famiri seri a pranasi Bruinendaal noso Brendari.

Arkiman, a stotu. Un kuneti ala sei.