Arkiman ini a foto, abra watra, awans' pe un de, un kanti yesi, un arki.
Pe a skowtu-oso ben de a tapu a uku fu Crepi of Charlesburg nanga Kwattapasi, a skowtu-oso no de tide moro. Ma
pe a ben de, wan bigi boitipresi fu Masra Charles François Isaac de Crepi ben de. Masra Charles François
Isaak de Crepi ben geboren ini Flandria ini a yari 1708 èn dede ini Suriname ini 1755. Masra Charles de
Crepi ben trow nanga misi Maria Anna de la Bruna. A boitipresi den ben gi a nen fu Masra Charles de Crepi, sodati
ala sma e taki te nanga tide fu Crepi of Charlesburg. Tu nen fu wan presi.
Jacques de Crepi ben trow nanga misi Sarah Francine Hersbergen, wan zeer bekende nen ini Suriname. Ini juni fu
a yari 1722 mevrouw de Crepi-Hersbergen aksi èn kisi wan hypotheek fu vijftien duizend gulden a tapu a boitipresi.
A papa fu Charles nanga Jacques de Crepi ben de eigenaar fu a pranasi Vrijland aan de boven Suriname. Ini 1900
Vrijland ben de fu de erven J. de la Parra. Den ben wroko kakaw, bana, masusa, karu nanga aleisi.
Na a kaba fu owru Crepi... bika yu abi tu Crepi: wan nyun Crepi nanga wan owru Crepi. Disi wi e taki now. Na a
kaba fu owru Crepi, na a boktu fu go ini Nieuwe Charlesburg of Crepi, pe tide wan skoro de, ben de wan baldadig
bigi oso nanga wan boerderij fu a famiri de Crepi. Drape den ben kweki kaw, agu, krabita, doksi, doifi, fowru.
Ini Nieuwe Charlesburg pe tide a moi èn bigi wrokopresi fu masra Rudge de (mi n'e meki reclame sani gi masra
Rudge, yèrè baya), ben de wan baldadig bigi opo presi pe someni srafu fu a famiri de Crepi ben e
libi. Den ben e sorgu fu den kweki fu den meesteressen. A presi pe den srafu ben e libi, pe masra Rudge abi tide
en wroko presi, a wan skropurits. Drape den srafu ben e prani ala sortu gruntu gi den meesteres.
Tu umasrafu ben drape. Ala tu abi wan umapikin fu vijftien yari. Mama Smokopatu ben abi Pawtere. Mama Syat'futu
ben abi Amanda. Pawtere nanga Amanda, den de soleki tu sisa. Pe a wan de, a trawan de tu. Den ben gersi so wan
fasi, wan sma di no sabi e go denki a tu sisa of tweeling.
Di Pawtere nanga Amanda de bigisma, den meesteres wani den mu trow. Pawtere nanga Amanda gwenti sowan fasi sodati
den kruderi trow nanga tu yonkuman fu wan famiri: tu brada of tu neven. Den abi geluk. Tu brada: a wan ben abi
tweeëntwintig, a trawan vierentwintig yari. Di ala sani seti, Pawtere nanga Amanda trow ibri wan nanga wan
brada. Pawtere nanga Amanda go libi nanga den masra a den schoonmoeder oso, sodati toku nanga aladi den trow, den
ben si makandra. Wan sani den wani ete, a wan pikin.
A dei di Pawtere trow, a prani wan papayabon di a teki soleki en gado; di a e dini, di a e ambegi leki wan gado.
A e begi a papayabon fu a papayabon gi en wan pikin. A tapu a skropugron a papayabon e gro moi, a fatu. Ma den
pikin nanga den krabita di e waka lontu e go na a papayabon sodati bakaten a papyabon e tan na baka nanga gro.
Disi e gi Pawtere sari ini en ati.
Di Amanda si a fasi di Pawtere de, a taki: "Sisa, mi abi wan broko korspatu di no abi ondrosei moro. Mi e
go gi yu a korspatu meki a papayabon gro ini a korspatu sodati pikin nanga krabita no e go trobi yu papayabon moro."
Amanda gi Pawtere a broko korspatu. Sensi Pawtere poti a patu, pikin nanga krabita no e trobi a papayabon moro,
di e gro now soleki koro di kisi bun mest.
Pawtere ben abi a gwenti opo moro fruku dan wan sma a tapu a pranasi, e go nanga wan krabasi nanga watra pe a papayabon
de. A e kindi begi a gado fu a papayabon wan pikin. A e trowe watra ondro a papayabon, a e dringi pikinso watra
ini a krabasi. Pawtere abi a bribi a papayabon e go gi en wan pikin. Wan mamanten di Pawtere e begi a gado fu a
papayabon, Amanda go a dorosei a si Pawtere kindi, a e begi a fesi a papayabon. Amanda aksi Pawtere san a e du.
Pawtere taigi Amanda, a e begi a gado fu a papayabon, di na en gado, fu gi en wan pikin.
A dei di Pawtere broko a fosi lepi papaya, Amanda kisi wan umapikin di a kari Blakafiga. Soleki Blakafiga e gro
a papayabon fu Pawtere e gi froktu di Pawtere e seri. Ini a birti no wan enkri papayabon e gi someni bigi switi
papaya leki a di fu Pawtere. Pawtere e seri, a gudu. Ma nanga aladi Pawtere e begi a gado fu a papayabon fu wan
pikin, Amanda kisi wan pikin ma en no kisi pikin.
Now di Amanda si èn sabi Pawtere e kibri a moni di a e seri den papaya, a dyarusu, a wraak. A abi wan pikin
di e gro bun, ma a no abi moni. Pawtere no abi pikin ma a abi moni. Wan dei Amanda si di Pawtere e gwe nanga feifi
bigi lepi papaya fu go seri. Amanda wraak. A dyarusu so wan fasi, a prakseri fu broko Pawtere saka te na gron.
Heri dei a prakseri san a e go du nanga Pawtere. Neti a no kan sribi. Musudeimamanten a sabi san a e go du nanga
Pawtere.
A tra dei Amanda go na Pawtere, a taki: "Sisa, mi wani a broko korspatu di mi gi yu baka, tidetide, wantron
wantron."
Pawtere skreki. A taki: "Sisa, disi a wan sani di no kan. Mi no kan gi yu a patu sondro fu broko en moro fara.
Dan mi musu koti a papayabon."
"San yu e go du of wani du na yu zaak. Mi no abi bisi. Mi taki mi wani mi korspatu."
Amanda nanga Pawtere gro makandra, den bigi, teki masra. Now den abi vijfentwintig yari. Ma dyarusu tya prati.
A trobi ben de so bigi den go a basya go koti a trobi. A baka di basya yere fu Amanda dan fu Pawtere a fasi di
a seti, basya koti a trobi. Basya taigi Pawtere a mu koti na papayabon sodati a kan gi Amanda en korspatu baka
sondro a broko en.
Disi ben de wan hatelijke streik fu Amanda, bika a gi a trawan na korspatu èn efu a trawan mu gi en a korspatu
baka, a trawan mus koti na papayabon. En koti na papayabon wani taki a lasi ala papaya, a lasi seri, a no e go
seri en papaya moro. A disi Amanda ben wani.
San basya taki tan taki. Pawtere sari di a mu koti a papayabon di meki a gudu. Ma tra fasi no ben de. Pawtere koti
a papayabon, a gi Amanda a korspatu. A srefi ten Amanda teki a korspatu, di a naki broko. Pawtere no abi papayabon
moro. A no kan seri papaya moro, a no kan gudu moro.
A baka wan wiki di ala sma frigiti san pasa, Amanda nanga Pawtere de makandra soleki noiti kesekese de nanga den.
Ala a ten Blakafiga, a umapikin fu Amanda, e gro. A tapu feifi yari. A koprolinga di Pawtere gi Blakafiga di a
tapu wan yari de ete lontu a pikin neki. Dri dei a baka di Blakafiga tapu feifi yari, Pawtere go na Amanda prisiri
fasi. A taki: "Sisa, mi wani a linga di mi gi yu pikin, tidetide."
"Sisa, disi a wan sani di no kan. Mi no kan puru a linga moro na a pikin neki, bika a ede bigi moro a linga."
"Mi no wani sabi a fasi di yu e go puru a linga sondro a koti, ma mi wani mi linga baka."
Amanda, a mama fu Blakafiga krei, begi Pawtere no teki a linga baka. Ma Pawtere ori nomonomo; a wani en linga baka.
A trobi go a basya yesi, di seni kari Amanda nanga Pawtere. Dus un ferstan a tori bun.
Ala srafu e sari di Blakafiga e go dede so wan fasi. Bika basya kruderi, a ori krutu-oso pe den sma fu a presi
de. Den go makandra fu si a fasi di basya e go koti a pikin neki fu kan tek' a linga gi Pawtere. Ala umasrafu e
sari di Blakafiga e go dede so wan fasi. Furu umasrafu e taki, fu di Pawtere no abi pikin, datede a wani Amanda
pikin mu dede.
Di Pawtere yere san den tra uma taki, a go a piki den. A taki: "Di mi abi mi papayabon, a ben bigi na Amanda
ai. Amanda dyarusu a tapu mi papayabon. A ben wani en korspatu baka, sodati mi ben mu koti mi papayabon fu ben
kan gi en a korspatu. No wan sma taki san Amanda du nanga mi a no bun. Amanda no kan opo mi luku feti, mi opo Amanda
luku dansi. Basya, a mama nanga a pikin dya, dan yu du yu wroko soleki a fiti."
Basya teki Blakafiga, a pikin fu Amanda, a poti a pikin ede nanga neki a tapu wan bigi udu blok. Basya teki wan
srapu aksi. Basya luku lontu. Amanda, a mama fu a pikin, tanapu a basya leti-anu sei, Pawtere a basya kruktu-anu
sei sodati basya de a mindri a mama nanga a pikin. Soleki basya opo na aksi fu koti a pikin neki, Pawtere ori basya
anu. Pawtere taki: "Sisa Amanda, teki yu pikin go na yu kampu. Yu abi deki-ati. Mi no abi deki-ati."
A srefi ten Amanda fadon, a flaw. Den umasrafu di drape soktu. Di den go nanga Amanda ini en kampu. Di Amanda kisi
ensrefi Pawtere sidon na en sei. Den taki makandra soleki noiti noiti trobi de. Den libi yari langa sondro trobi.
Amanda kisi ete dri pikin, Pawtere dede sondro pikin.
Arkiman, dan a tori stotu te dya. Un tan bun ala sei.