DAGU


Dagu abi bun libi ini en meester oso. A ben de wan bun ontidagu, wan bun waktidagu. Ma Dagu owru, a no abi tifi moro. A no kan beti fufuruman. A no abi sten moro. A no kan bari te vreemde sma de ini a birti. Dati meki a meester fu dagu kruderi nanga ensrefi sutu dagu kiri. Bika a no kan de so, dagu e kisi ala dei nyanyan, a no e wroko.
A ten dati Dagu nanga Tigri ben de mati. Di Dagu sabi san en meester wani du nanga en, a go taigi en mati Tigri a fasi di libisma abi takru maniri. Tigri prakseri langa, a taki: "Mat' Dagu, yu meester abi takru maniri. Disi na a paiman fu ala den yari di yu sorgu fu en pikin, en kweki. Yu meester no sabi san den e kari bun.
Yu meester denki a kan du nanga yu san a wani. Un e go sori en san wat is wat. Arki san un e go du nanga yu meester, zodat yu meester e go abi tra prakseri nanga yu.
So leki mi sabi ala dei yu meester nanga en frow e go wroko ini den gron. A frow e poti a pikin fu wan yari ini a kampu, krosbe pe den e wroko. Mi e go teki a pikin. Mi e go kibri a pikin ini busbusi. Yu mat' Dagu, so leki yu si mi e gwe nanga a pikin yu e bari lon a mi baka.
Mi e go lon ini kapweri pe mi e go libi a pikin. Yu e teki a pikin nanga yu mofo. Yu e tyari en go baka na en m'ma. Te yu du disi, a buru e go kenki prakseri, a no e go kiri yu moro.
A tra dei a buru teki so leki a gwenti en gronwroko sani fu wroko a gron. En frow teki a pikin na en seibere, nyansani na tapu en ede. Dagu go ini a gron tu.
So leki a frow gwenti, a poti a pikin ini wan tobo di meki fu wan bari di koti a tu pisi. Mat' Dagu didon. A si a tobo e luku a pikin. Buru nanga en frow e wroko ini a birti.
A baka wan yuru di a buru nanga en frow e wroko, den yere dagu bari aparti fasi. Buru nanga en frow ferstan wan sani psa efu dagu si sani di a no e si ala dei. Di a buru luku, a si wan tigri nanga a pikin na en mofo e gwe ini busi. Dagu de a baka Tigri. A buru nanga en frow skreki sowan fasi. Den e luku makandra. Di den kisi densrefi Tigri nanga a pikin no de moro fu si. Den yere farawe dagu e bari.
Now a buru no sabi san a mu du bika en frow flaw. San a buru mu du? Go a baka a tigri `en libi en frow? A no kan go suku a pikin `en libi a frow didon na a sosogron. A buru no yere a dagu e bari moro. A buru opo en frow nanga muiti poti en ini a kampu.
Tigri poti a pikin na gron ini busbusi. Tigri taki: "Mat' Dagu, go nanga a pikin na yu meester." Dagu teki a pikin ini en mofo, a go na en meester. Di a buru si a dagu nanga a pikin a bari sowan fasi. En frow di flaw skreki. A kisi ensrefi.
A dei dati a buru nanga en frow no wroko ini a gron moro. Den go a oso pe den ferteri san psa. Den prijse Dagu. Wantron a buru de tra fasi nanga Dagu. A no kiri Dagu moro.
Tu wiki psa. Wan mofoneti di Dagu de pe den agu fu a buru e tan, a si mati Tigri ini a birti. Di Tigri si Dagu Tigri taki safri: "Mat' Dagu bun e waka a bun baka. Mat' Dagu, tapu yu ai. Tamara neti mi e kon teki wan pikin agu."
Dagu luku Tigri ferwondru fasi. A taki: "Brada Tigri, disi a wan sani di mi no kan du. Mi a waktiman. Mi no kan tapu mi ai." Tigri denki Dagu e spotu. Sowan bun a du gi Dagu.
Dei langa Tigri no nyan. So leki Tigri taki a wani, a go ini a agu pen go teki wan pikin agu. Dagu bari. Tigri denki Dagu no sabi na en Tigri. Te Dagu sabi a Tigri en mati a no e go bari, so Tigri denki. Ma dagu no tan tiri. Dagu e bari sowan fasi.
A buru teki en gon bika a no sabi san de a dorosei meki Dagu e bari sowan fasi. Di Tigri si a buru nanga gon a wani lon. Ma a kugru fu a gon moro esi dan Tigri. A buru sutu. A broko Tigri kruktu bakafutu.
Sensi a neti dati Tigri broko mati nanga Dagu, bika Tigri opo Dagu luku dansi. Now Dagu opo Tigri luku feti.