Di Degee Welis ben sidon na ini vijfde klas a no ben wani go na skoro moro. A no ben denki fara èn heri
dei a ben sribi ini klas. So a no ben sabi furu. Dat meki fruk'fruku a bigin wroko leki syowman.
Baka wantu yari a teki wan frow èn a kisi wan boi nanga en. A boi ben nen Dennis. Degee frow ben sorgu bun
gi Dennis èn a ben abi ten gi en. Ma Degee no ben luku en na wan ai. Te a ben kmoto fu wroko, dan efu en
frow no poti en nyanyan klari tapu a tafra, dan a ben meki trobi nanga en. Wanwan leisi a ben go koiri nanga en
frow. Ma moro furu a ben go sidon taki tori nanga en mati te lati a neti. Dan te en frow ben aksi en pe a ben kmoto,
dan a ben kosi en.
So wantu yari kon pasa, Dennis ben sidon ini vijfde klas. A heri yari a wroko tranga èn a leri en les bun.
Degee no ben sabi srefi ini sortu klas Dennis ben sidon. Di skoro tapu, Dennis ben abra go na zesde klas. Di a
go na oso a poti en rapport ondro en matrasi. Dan a go ini en papa kamra. Di a opo a krosi kasi, a opo wan bigi
dosu pe soso buku ben de. Di a puru a derde buku a feni a rapport fu en papa di a ben sidon ini vijfde klas. Di
a luku na inisei a si soso redi cijfers. Dennis lafu: "Hahaha. Yongu, a no spotu don mi papa ben don, yèrè."
Dan a prakseri: "Mi o poti papa rapport tapu a tafra. Dan mi wani si san a o du." Soleki fa Dennis prakseri,
na so a du. Dan a go sidon leisi wan leisibuku na ini a foroisi.No langa na baka Degee kon na oso. Di a waka kon
na ini a foroisi a luku tapu a tafra èn a si D. Welis tapu a rapport. A teki a rapport dan a luku na inisei.
Di a si den redi cijfers a grabu Dennis ori. Dennis skreki. Dan Degee hari en rief puru, dan a taki: "Heri
yari mi wroko so tranga, dan toku yu no du noti?" A gi Dennis wan steifi fonfon, dati a ben broko sweti. Dan
a poti Dennis sidon baka ini a sturu èn a taki moro fara: "Te yu wani yu kan opo yu mofo." Dennis
ai ben lon watra.
Baka wan pisten mama kon doro oso. Di a waka kon na inisei a taki: "Degee, san du yu? Fa yu e broko sweti
so?"
Degee taki: "A no a keskesi boi fu mi tan sidon. Ne mi prit' en skin gi en."
Mama taki: "A no kan!" A aksi Dennis di ben krei ete: "Pe yu rapport de?"
Dennis no taki noti, ma a lon go teki en rapport ondro a matrasi, dan a langa en gi mama. Mama luku inisei. A taki:
"Degee, san du yu tide dan? Luku dya. A boi abra go na zesde klas."
Degee luku èn a si dati a ben tru. Dan a teki a rapport tapu a tafra èn a luku na inisei. A bari
wan bigi lafu. Mama nanga Dennis luku so ferwondru. Dan Degee grabu Dennis na en anu. Dennis bari: "Mama,
yepi!"
Degee taki: "Tan tiri boi! Mi no du yu noti. Yere dya, yu wani sori mi dati yu e leri bun moro mi?"
Dennis taki: "Iya, papa." Mama hari dipi bro. Degee ben e syen fa a ben fon en boi fu soso, ma toku a
aksi en boi pardon fu di a fon en fu soso.
Fu datede: "Te yu o meki wan spotu, yu mu wegi bun san yu o taki."