Fred ben de a tweede boi fu en mama. A ben tapu siksi yari kba. En bigi brada ben nen Emil. Wan dei di a ben
waka na strati, a ben si wan swarfudosu. A skopu en wantu meter moro fara. A waka moro fara èn a skopu a
dosu baka. Dan a yere wan sten taki: "Teki a dosu." A teki a dosu èn a luku na ini. Dri dala ben
de na ini. Fred no ben sabi omeni moni ben de ini a dosu. So a waka langalanga go na oso.
Fred omu ben taki tori nanga en mama na mofodoro. Di Fred doro na oso a taki omu nanga en mama odi. Dan mama go
teki kowru watra gi omu na inisei. Di omu si taki Fred ben ori wan sani na ini en anu, a taki: "Boi, san yu
abi na ini yu anu?"
Fred piki: "We, mi feni wan dos'swarfu tapu strati."
Omu taki: "Kon meki mi si."
Fred gi omu a dosu. Di omu si den dri dala a taki: "Boi, yu no mus taigi no wan sma." Dan a bari gi mama:
"Wakti, mi e kon dyonsno."
Omu go langalanga na wenkri, dan a broko wan golu ini wan hondro koprosensi. Dan a poti en ini wan saka. Di a drai
kon baka na oso, a kari Fred kon dan a gi en a saka. Omu taki: "A kon moro furu, tog?"
Fred ben breiti. A piki: "Iya, omu." Dan a lon go na wenkri.
Ala leisi a ben go bai wan sensi sukrusani na omu sneisi.
A tra dei di a go na skoro a bai furu switi-sani, bika fosten ala sani ben bunkopu. Fred bigi brada no ben sabi
noti. Di a kon na oso, en omu ben sidon na mofodoro baka. A taki odi èn a psa go
na inisei. Mama ben poti nyanyan gi den boi klar'klari tapu a tafra. Di mama si dati Fred no teki en nyanyan, mama
taki: "Fred, san du yu? Her' dei mi e si fa yu e nyan lektongo. Pe yu feni moni fu bai lektongo dan?"
Fred ben poti en finga ini en mofo dan a luku en omu. Mama taki: "Puru yu finga fu yu mofo. Yu no e yere dati
mi e taki nanga yu? Pe yu feni moni?"
Omu ben sari Fred. Dan a taki: "We, esde a feni dri dala ini wan swarfudosu. So mi teki a moni dan mi broko
wan golu ini hondro koprosensi gi en."
Mama taki: "Baya, dan gi mi wan pikin sani fu yu tu." Omu gi mama dri golu. Dan mama taki: "Ai,
baya! Mi no ben abi no wan koprosensi moro. Dan tamara mi o bori wan switi pindasupu."
A tra dei Fred kisi vakantie. A go tan wan eri mun nanga en granmama. Fa a ben yepi granmama nanga seri stofu
sani, a ben kisi ala dei wan kwartyi. A ben leri fu en papa fu kibri en moni. So a ben kibri en moni. Baka vakantie
di a doro na oso, mama taki: "Mi boi Fred, baya, mi no abi no wan moni moro. Yu papa no gi mi moni ete. Granmama
no gi yu moni dan?"
Fred sutu en anu go ini en saka dan a langa ala a moni gi mama.
Mama taki: "Granti, mi boi." Dan mama gi Fred wan bigi guyaba san papa ben gi en. Di en bigi brada si
san mama du, a taki: "Mama, a no kan. Mama, luku o langa mi sidon na ini a kukru, toku mama no gi mi wan guyaba."
Mama taki: "We, efu yu ben gi mi moni, dan yu ben sa kisi ala sani fu mi tu."
Baka dati Emil ben kon nanga a prakseri fu kibri moni tu. Ma baka wan pisten a nyan ala en moni. Ma Fred ben
kibri en moni baka a ijskasi sei a gas batra. A ben poti soso kwartyi ini wan pikin tomatiblik. Ma fosi a ben poti
den kwartyi ini a blik, a ben go prei sei a ijskasi. Dan te no wan sma ben luku a ben trusu a moni ini a blik.
No wan sma ben sabi a kibripresi disi.
So wan dei wan sani ben psa nanga a ijskasi. Fred mama go teki wan man fu kon luku a kasi. A man luku na bakasei
pe a gas de. A si dati wan kabel ben lusu. Fa ai tai a kabel, a blik fu Fred kon fadon. A teki a blik èn
a seki en. Di a yere dati na moni ben sidon na ini, a poti a blik ini en tas. Di a kba tai a kabel, a leti a ijskasi.
A ben drai bun baka. So di mama yere a ijskasi e drai baka, a aksi a man: "San ben psa nanga a kasi?"
A man taki: "We, frow, na wan kabel ben lusu na bakasei."
Mama taki: "Dan omeni mi mus pai yu dan?"
A man piki: "Yu kan pai mi tin golu nomo."
Mama pai a man. So a man teki en tas dan a gwe. Dan mama go bori.
Di Fred kon na oso a poti en tas na ini en kamra. A kenki en krosi. Dan a go prei sei a kasi. Di a trusu en anu
go èn a no firi a blik a skreki. A waka go na en mama. A taki: "Mama, suma teki mi moni ini a tomatiblik?"
Mama taki: "Sortu moni?"
Fred piki: "A ben de bakasei fu a ijskasi."
Mama taki: "Wakti, mi boi. Wan man ben kon meki a ijskasi tide. Dan na en sa teki a moni."
Fred bigin krei. Dan a taki: "Mama, taigi mi suma na a man?"
Mama taki: "Boi, a man gwe kba. Yu no man du noti moro."
Wan eri pisten Fred ben krei. A ben prakseri suma na a man? Pe a man ben e tan? Ma noti ben kan yepi en.
Ma baka wan pisten Fred prakseri a spaarpot ondro a bedi fu en papa. Papa ben poti ala dei feifi kwartyi inisei.
A tra dei di no wan sma ben de na oso, Fred go teki a spaarpot. A ben hebi moi. Dan a drai a olo-sei kon na gron.
Dan a seksek' en bun. Di wan kwartyi fadon kmoto, a taki: "Na so, ai." Dan a go teki wan forku kon. A
trusu en go na ini a olo. Dan te wan kwartyi ben fasi na den tifi fu a forku, a ben hari en puru. So ala dei a
ben teki wan banku èn bai switi sani fu nyan. Ma en wawan ben nyan en sani.
Ma wan dei a ben sori Emil fa a ben puru den kwartyi ini a spaarpot. Ma Emil ben puru moro furu dan en. Fred ben
bari en fu a no puru so furu, noso papa bo kisi den. Dan Emil piki en taki: "Dan yu no ben mus sori mi."
Di papa doro na oso a firi dati a spaarpot ben lekti. En ati bron. A bari: "Suma teki mi moni ini a spaarpot?"
Emil taki: "Papa, na Fred."
Fa Fred ben wani lon gwe, papa grabu en ori. Dan papa bigin fon en nanga wan riem. Fred bari: "Papa, a sari.
Emil teki yu moni tu. Na mi ben sori en fa a ben mus teki yu moni."
Emil taki: "Papa, ai lei gi mi. Mi no sabi noti."
Papa taki: "Fu di yu sori en, dan yu sa kisi moro tu." So papa gi en wan bun steifi fonfon.
Dan papa waka go na Emil san ben sidon so tiri tapu wan bangi. Papa taki: "Mi sabi taki yu teki mi moni tu.
Ma fusanede yu mu lei taki yu no teki mi moni?"
Emil ben beifi. A taki: "Papa, mi no sa fufuru yu moni moro." Fa a kba taki so, papa gi en wan steifi
fonfon.
Dan papa taki: "Oen yere dya! Bigin tide mi e poti mi spaarpot tapu a ijskasi. No wan sma e puru wan kwartyi
ini en. Oen yere mi, boi!"
Emil nanga Fred piki: "Iya, papa."
Di mama kmoto fu wowoyo, a si dati Fred ben krei. A taki: "San psa nanga yu?"
A no piki mama. Papa taki: "Den boi e waka e fufufru mi moni ini mi spaarpot."
Mama taki: "Te un wani un kan du en baka. Dan mi o leri un wan moi sani. A no kan, tog. Dan te mi e poti switi
sani na ini a ijskasi, dan mi no sabi suma e teki den sani na ini a kasi tu."
Papa taki: "Yere dya, frow. Wi o poti wan sroto gi a ijskasi dan a sa kba. Oen no e kweki fufuruman ini a
oso dya."
Mama taki: "Iya, dati na wan bun sani."
Dan papa go bai wan sroto na wenkri dan a poti en wantron gi a ijskasi.
A tra dei di mama nanga papa ben go na wroko, Fred opo a kasi nanga wan skrufudraaier. A nyan wan paki kuku
fu en mama. Dan Fred sroto a ijskasi baka.
Di mama kmoto fu wroko, a ben bai switi sani. Dan di a luku na ini a kasi, a no ben si a paki kuku. A aksi: "Suma
teki a kuku dya?"
Emil taki: "Mama, yu poti wan sroto gi a kasi. Dan fa un kan go na ini a kasi? Kande na papa teki a sani."
Mama libi a sani. Wan heri pisten den switi sani fu mama ben gwe. Dan te a ben aksi suma ben teki en sani, dan
no wan sma ben sabi. Ma wan dei di mama kmoto fu wroko, a kari Fred kon. A taki: "Mi boi, mi lasi a sroto
fu a kasi. Now mi no man puru a stimofo ini a kasi. Dan fa w'o du? Noso dan na a doro un mus broko."
Dan Fred taki: "Mama, yu nafu span. Mi kan opo en gi yu." Fred teki en skrufudraaier dan a bigin wenweni
a sroto. Mama tnapu leti baka en e luku san ai du. Mama ben winsi taki a kasi ben kan opo. Fa Fred opo a kasi,
mama naki en wan klap nanga wan udu spun na en baka-ede. Fred drai luku en mama. Mama taki: "Oooo, na yu e
fufuru mi sani, no?"
Fa Fred e lon gwe, mama iti a spun na tapu en baka. Sensi a dei dati noiti moro a teki mama sani.
Wan leisi, tu wiki bifo maspasi bo de, Fred go na en granmama. A pisten dati a ben abi tinadri yari. A taki:
"Granmama, mi wani bai wan langa bruku gi maspasi. Ma mi no abi moni. Granmama abi tinafeifi golu gi mi?"
Granmama ben lobi en. So a taki: "Disi mi ben kibri someni langa gi yu. Tek' dya. Dan te yu go na oso taki
yu mama odi gi mi."
Fred taki: "Grantangi, oma. Mi sa gi en odi." Dan a waka gwe.
Di a kon na oso a taigi en mama dati oma seni taki en odi. Mama taki: "Ma Oma no seni no wan sani gi mi tu?"
Fred taki: "Nono, mama. A gi mi tinafeifi golu fu mi go bai wan langa bruku."
Mama taki: "Mi boi, yere dya. Mi no abi moni. Yu papa srefi no abi moni. Leni mi a moni fu yu, no?" Fred
luku en mama. Mama lafu nanga en. Dan Fred gi en mama a moni.
Di a mun tapu Fred go aksi en mama a moni san a ben leni en. Mama taki: "Yu boi, san psa nanga yu. Di yu ben
de baby, mi gi yu nyanyan. Mi sorgu yu te leki now. Dan san yu wani? We, mi no abi moni. Te mi abi dan mi sa gi
yu."
Fred krei te a no ben man moro, bika a no ben man go nyan maspasi na plein.