Henny nanga en fo pikin brada ben go nyan vakantie na den granmama. Henny ben
de wan tranga yesi boi. Ala leisi en granmama ben bari en te a ben go zomaar
ini a pomerakbon.
Wan dei en granmama ben wasi krosi. Dan a seni den boi go prei. Baka wan pisten
birfrow kon luku granmama. A taki: "Bigifrow, fa fu yu dan?"
Granmama taki: "Mi de heri bun. Dan fa ai go nanga yu dan?"
Birfrow taki: "We, ai go heri bun. Ma mi kon suku wantu pomerak."
Oma piki: "A bun." Dan a kari: "Henny, kon piki wantu pomerak
gi birfrow." Dan granmama gi Henny wan saka, èn a taki: "Birfrow,
wakti pikinso, mi o poti aleisi tapu faya."
Di granmama si dati a saka ben furu, a bari: "Henny, a sari. Yu kan saka
now."
Henny piki: "Wakti, granmama. Mi si ete wantu lepi wan." Dan a tai
en empi, èn a furu en empi nanga pomerak. Dan a saka. A poti den pomerak
san ben de ini en empi na ondri a bon, dan a tyari a saka gi en oma. Granmama
gi birfrow a saka, dan a tyari birfrow go na mofo a doro.
Dan Henny kren go baka ini a bon. Di den trawan kon na oso, den lon go teki
den pomerak san ben de na gron. Di Henny si taki den trawan teki en pomerak,
a taki: "Te mi saka, unu sa si san mi e du nanga unu!" Fa a taki a
sani dati, a fadon kon na gron, èn a naki en fesede na a bon tompu. Dan
so a kisi wan kundu na en fes'ede.
Den trawan bigin lafu en. Henny mandi èn a bigin lon baka den. Den lon
gwe nanga den pomerak go na granmama. Granmama broki wan wipi, dan a taki: "Te
yu wani yu kan naki den."
Henny taki: "Oma, ma den teki mi pomerak."
Granmama taki: "Den kisi yu moi. Yu gridi tumsi. Yu ben piki wantu kba,
ma toku yu wani moro. Yu no e kisi noti. Waka go wantron na inisei."
Henny taki: "Oma mi no e naki den moro." Dan a lon gwe.
Di granmama kba bori, a poti nyanyan gi den trawan. Dan a go wasi krosi ini
a was'oso. Di Henny dori oso, a yere fa granmama ben bosri den krosi, a kren
go safsafri ini a bon. Ma di wan fu en pikin brada si en, a lon go kari Oma.
Oma waka go na a bon. Dan a bari: "Mi mama, yu boi Henny. Saka kmoto fu
a bon. Na diya yesi yu abi, no?"
Henny saka wantron, èn taki: "Mmmmm, oma, yu switi yèrè?"
Oma bari: "Yu bitaaa." Di oma prakseri san a taigi Henny, a bigin
lafu dati Henny srefi bigin lafu tu. Oma taki: "Esi go nyan."
Baka di Henny kba nyan, a lon prei nanga den boi fu birfrow. No langa na baka
di oma kba wasi krosi, a go sribi. Dan Henny kon na oso. Di a si dati oma ben
sribi a kren go te na ede fu a bon. Dape wan marbonsu waswasigodi ben kibri
ondro wan bosu lepi pomerak. Fa Henny broko wan pomerak, den waswasi sutu en.
A bari: "Waaai, mama kon yepi mi," èn a saka esesi. A lon go
na oma.
Oma skreki ini en sribi. A aksi Henny: "San psa, san psa?"
Henny piki: "Waswasi sutu mi ini a bon."
Oma taki: "Yu si? Te mi e bari yu, yu no wani yere! Sani e miti yu. Go
wasi yu skin!"
Di a kba wasi, en fesi ben sweri èn a kisi korsu. Oma gi en krin krosi,
dan a tyari en go na datra na baka uku. Datra gi en wan spoiti nanga wantu perki
fu dringi te a ben kisi pijn.
Di den trawan kon na oso, dan fa den no si granmama, den bigin du a oso-wroko.
Den no ben sabi notnoti san ben psa nanga Henny. Di oma nanga Henny kon na oso,
Henny fosi pikin brada bari: "Un kon luku, Oma tyari wan sneisi kon!"
Den trawan lon kon luku èn den bigin bari lafu. Dan en tweede pikin brada
aksi en: "Henny, fa yu du kisi sneisi ai?"
Henny luku den pikin brada fu en, dan a taki: "Waswasi sutu mi. Ma unu
e taki dati mi na sneisi. A bun. Ma Oma, san yu e taki?"
Oma, san ben poti merki tapu faya, taki: "Yu e tan mi moi boi." Henny
lafu dan a gi oma wan brasa. Den trawan luku densrefi èn bigin lafu tu.