Hugo

So wan dei Hugo ben sidon na dorosei e naki poku. Dan di a si taki en tanta Martha ben waka e kon, Hugo bigin bari krei. Hugo hori en bere èn a ben lolo na gron. En mama skreki. A lon go luku san psa nanga Hugo.
Mama taki: "Mi mama! Hugo san psa nanga yu!"
Hugo taki: "Mama, luku. Tanta Martha a kon. Mi bere no furu moro. Tanta o nyan ala a nyanyan." Mama ati bron. Dan a lon go teki a sibi. Ma bifo mama ben drai kon baka Hugo opo lon.
Di tanta kon na inisei, a aksi mama san psa nanga Hugo. Mama piki en taki: "We, a boi disi no abi maniri. Nownow mi kba bori. Mi kan poti pikinso nyanyan gi yu?"
Tanta piki: "Iya, baya. Sensi mamanten mi no nyan noti ete."
Di Hugo si taki mama gi tanta nyanyan, Hugo bari: "Mama, mi e dede. Angri e kiri mi."
Mama taki: "Efu mi kisi yu tide mi no sabi san o psa nanga yu." Dan mama poti nyanyan gi Hugo. Di Hugo kba nyan a go sribi. Dan di a wiki, tanta Martha ben gwe kba. Mama ben sribi. Hugo gwe go prei voetbal.
Di Hugo kon na oso a ben de mofoneti kba. Hugo go wasi moi. A weri krin krosi dan a go sidon nyan. Mama taki: "Hugo, te yu kba nyan dan yu mu go teki wan losi fowru gi mi na tanta Martha. Ma wan sani mi e begi yu. No tan te a lati."
Hugo piki: "Iya, mama. Mi no o kon lati."
Di Hugo kba nyan a teki pasi go na en tante. Di Hugo de tapu pasi kba, a taki nanga ensrefi: "Efu mi boro na a berpe, mi o doro esesi na tanta Martha. Ma efu mi waka lontu, dan mi o weri." Hugo no prakseri langa, a boro ini a berpe.
A ben dungru kba. Fosi yu teri tin, dan Hugo ben doro na tanta Martha. A taki odi. Dan Hugo taigi en tanta taki en mama seni teki a losi fowru. Tanta taki: "Mi boi, taigi yu mama taki mi no ben man losi a fowru moro. Ma tamara mi o losi en fruk'fruku, dan mi srefi o tyari en kon. Taigi en no meki a mandi mi."
Hugo taki: "A bun, tante. Mi o gwe."
Dan di Hugo e waka gwe dan a si wantu mati fu en. Den aksi Hugo: "Kon meki un go bai bami."
Hugo taki: "O fara wi o go bai en?"
Den taki: "Let' dyaso tapu a uku. A no fara. Wi o bai wan bami gi yu tu."
Hugo draidrai, a taki: "Meki un go esesi." Dan di den bai a bami den tan wan heri pisten e sidon luku teevee ini a warung. Di den kisi densrefi, a ben da twarfu yuru mindri neti kba. Hugo skreki. A taki: "Meki un gwe now. Mi mama o kiri mi!"
Den boi no ben wani gwe, ma toku nanga bun furu taktaki fu Hugo den waka gwe. Di den doro na a boro pasi pe a berpe ben de, wan fu den boi taki: "Mi no e waka dya. Mi o waka lontu."
Den trawan taki: "We, dan yu wawan o waka." Dan fa a berpe ben dungru den no ben man si so bun pe den ben waka. Den ben waka tapu den grebi. Dan na waka fa den ben waka, wan fu den fadon ini wan grebi-olo. Den yere taki wan sani fadon. Ma den waka go doro. Ma di den yere wan sma bigin bari: "Waaaai, un kon yepi mi," so den boi bai dia futu, den lon gwe.
Di den doro na tapu a bigi pasi den kon si taki Hugo no de. Den stop lon. Dan den bigin lafu taki wan fu den boi ben krei.
Ma nanga bun furu muiti Hugo kmoto ini a olo. Nanga tokotoko skin Hugo lon kmoto ini a berpe. Di Rendi san ben waka lontu, si taki wan sma ben lon kmopo fu a berpe, a koti a strati abra dan a bigin lon. Di den trawan si san e psa, den lafu Rendi. Rendi ben lon kon na a sei pe den trawan ben tnapu. Den grabu en hori. A bari: "Un lusu mi. Mi si takrusani!"
Den trawan dede nanga lafu. Den taki: "Na Hugo yu si." Dan Rendi kisi ensrefi èn a bigin lafu tu. Dan di Hugo doro, a no ben moi moro. Dan Rendi aksi en: "Hugo pe yu bami de?"
Hugo ben gagu fa a ben skreki. A taki: "Mi libi en ini a olo." Den boi lafu te den no man moro. So den tyari Hugo go na oso.
Hugo mama ben wakti en nanga wan bigi tiki na mofodoro. Di a si taki Hugo e kon nanga den boi en ati ben da na dyompo. Ala sortu sani mama ben denki. Di den doro na mofo doro, Rendi ben lafu te a no ben man moro. Den trawan srefi bigin lafu. Hugo mama luku san psa. Hugo ben tnapu luku en mama. En mama taki: "San e psa dya? Yu tnapu luku mi leki wan leigi awari dan den trawan a bari lafu. San psa?"
Hugo no man taki bika a freda taki en mama o naki en nanga a tiki. Ma wan fu den boi teki wan dek'ati dan a ferteri mama san psa. Mama srefi bigin bari lafu dati a ben kon bigin sari en boi. Ma leki fa un sabi taki bigisma taki: Tori switi, ma bari mus tapu.