Kodyo


Arkiman, wan dei wan pranasi driktoro ben go na en pranasi nanga boto. Driktoro, soleki a ben sori, ben de ini dipi prakseri. A no e taki soleki a gwenti nanga den botoman. Wantron nomo driktoro sori nanga en wan anu furu piren de ini a watra. Di den botoman luku den si wan titei piren. Yu sabi a fisi disi den kari watratigri. Ini feifi minuten piren kan nyan wan man te na en bonyo.
A presi pe a bakra e go tapu, no abi wan bun lanpresi. A wan presi pe driktoro kan go nanga en kruyara a wan presi pe den kapu opo na libakanti sodati wan enkri kruyara kan tan drape.
Driktoro taki: "Dyaso un no kan poti futu na watra fu koti abra. Mi no de langa ini Sranan. Soleki mi poti futu ini Sranan, wantron mi, mi frow nanga mi wan enkri umapikin go a boto. Un go libi ini wan katun-pranasi. Mi e go ferteri unu san pasa nanga mi."
A driktoro taki: "Wan ten ala sani ben go bun ini a pranasi. Mi leri taki a tongo fu den srafu sodati den ben kan ferstan san mi e taki èn mi ben kan ferstan san den srafu e taki. Wan bakadina di mi ben komoto a bakagron, mi si a mi frow fesi nanga en du wan sani pasa ini a pranasi di mi no sabi. Bakaten mi yere wan fu den bigi dagu, wan aboma tyari en go ondro watra.
Mi sari di mi yere so wan sani pasa. Ma di mi yere Kodyo, a waktiman, si di a aboma frekti a dagu, èn Kodyo no du wan sani fu yepi a dagu wansi a ben abi okasi, mi wraak di mi yere a fasi di Kodyo meki aboma teki a dagu. Mi kari Kodyo wan lafaard. Mi no ben sabi ete no wan enkri busnengre e kiri wan aboma te a no de fanowdu.
Di mi kari Kodyo wan lafaard, Kodyo no taki wan wortu. A baka wantu dei di a aboma swari a dagu, di mi kari Kodyo lafaard, mi ben go ini a foto. Mi ben o go drai frukfruku baka. A waran ini a foto sodati mi ben breiti di mi de baka ini mi pranasi. A futupasi fu go ini a pranasi ben de na abrasei fu a liba. Sodati nanga wan boto mi ben mu koti abra fu de ini mi pranasi.
Di mi ben de a watrasei pe mi ben musu koti abra fu go ini mi pranasi, mi si Kodyo e wroko a sei a liba. Soleki a sori Kodyo ben diki skropu. Ma leti a sei Kodyo ben tanapu mi umapikin di e luku a fasi di Kodyo e wroko. Di Kodyo si mi tanapu na abrasei, Kodyo bari: 'Odi, masra. M'e kon nanga boto.'
Kodyo drai fu teki a skopu di a ben e wroko. Fu no ferferi, mi e wakawaka te Kodyo kon nanga a boto. Mi tan tanapu sondro mi ben wani, mi e beifi sondro mi wani. Mi e broko sweti. Mi no sabi. Mi si ini a busbusi na abrasei fu a liba pe Kodyo e diki skropu, pe mi umapikin tanapu e luku a fasi di Kodyo e wroko, wan bigi reditigri de. A e kroipi safrisafri a tapu en bere ini a busbusi fu dyompo teki mi umapikin.
A ten di mi si a reditigri, a beest de krosbei fu Kodyo nanga mi umapikin. Mi de na abrasei fu a liba. Mi brudu e tron watra. Mi no kan du noti. Mi tanapu luku a fasi di wan tigri e go naki mi pikin sondro mi kan yepi.
Di mi kisi misrefi, mi bari: 'Kodyo! Kodyo!' Mi sori Kodyo nanga mi anu ini a busbusi. A srefi ten mi dyompo ini liba. Mi no wakti boto. Mi bigin koti a liba abra. Mi no brutu nanga piren di e monyo ini a liba.
A tigri de krosbei. A seti ensrefi fu dyompo teki a pikin. Ma a srefi ten di Kodyo luku ini a busbusi na en baka, a si a tigri di dyompo fu teki a pikin. Ma Kodyo, a waktiman di mi kari lafaard, di meki aboma teki mi dagu, fanga a tigri a tapu en borsu. Kodyo ben de wan nengre fu 45 yari. A tranga baldadig. Pe Kodyo tanapu a beni en futu ini a santi. Soleki a tigri skin miti nanga Kodyo, a brasa a tigri ori.
Now a tigri e pruberi ala fasi fu naki Kodyo. A tigri skin nanga Kodyo skin de wan, sodati a tigri no abi okasi èn krakti fu naki Kodyo. A tigri tu bakafutu de na gron, en ede de abra Kodyo skowru. A no kan drai beti Kodyo. En fesifutu nanga den gevaarlijke klauwen de a Kodyo mindribaka. Nanga wan klauw a tigri ben priti Kodyo borsu opo, a tra klauw e priti Kodyo mindribaka opo. A tigri no kan naki ma a ben ari en klauw nomonomo a Kodyo mindribaka.
A tigri si èn smeri brudu. A razend, a gevaarlijk. A tigri e rigeri so wan fasi. Kodyo tan tanapu. Ma Kodyo futu feni wan fasi, a tanapu soleki wan bulldozer. Kodyo e lasi furu brudu. Now Kodyo beni go pikinso a fesi. Ala spieren fu Kodyo ben span. Kodyo koiti ben kon deki leki bruinhart udu. Kodyo e sweti. A tan soleki a no ben abi bro moro.
A moro a tigri e ari en klauw a Kodyo mindribaka, a moro Kodyo e kwinsi a tigri neki tapu. Nanga en laatste krakti Kodyo opo a tigri puru en baka futu a gron. Den baka futu naki now a loktu. A tigri bari. Kodyo skin seki. A tan soleki Kodyo e beifi.
A ben de wan trutru feti, wan feti san yu no kan frigiti noiti: Libasma e feti nanga wan tigri: wan gevaarlijk busmeti, wan tigri di si èn smeri brudu, wan busmeti di brudu na en nyanyan.
Ala ten di Kodyo e feti nanga a tigri, a driktoro e swen koti abra fu go yepi Kodyo. A driktoro no prakseri den piren ini a watra, den piren di a frede moro dan sneki, den piren di e nyan wan man-agu ini wan minuut te na bonyo.
Kodyo lasi furu brudu. A no ben abi krakti moro fu ben ori a tigri. Ma ook a tigri no ben kan moro, bika nanga en laatste krakti a tigri naki nanga wan bakafutu na Kodyo skeenbeen. A tigri ari a heri skeenbeen fu Kodyo opo te na bonyo.
Di a driktoro kon a syoro, a lon go pe Kodyo de. A teki a skopu ma a ben lati. Kodyo nanga a tigri fadon. A tigri naki nanga en klauw a loktu. A drai a wan sei. A tigri dede. Kodyo didon a tapu en baka.
Driktoro taki: "Mi si Kodyo no e go tan a libi. Mi teki Kodyo ede, opo en sidon. A ten di mi e taki mi e krei: 'Kodyo, mi boi. Mi no abi wortu nofo fu taki yu tangi san yu du gi mi. Yu gi mi libi fu si mi pikin. Noiti mi ben sabi yu abi so wan krakti. Kodyo, mi ben kari yu lafaard di yu ben si aboma e teki mi dagu. Ma yu no ben kan yepi.' Kodyo no ben kan taki moro. Wan laf' fesi, Kodyo ede fadon. Kodyo dede soleki wan man.
Now fosi mi memre mi umapikin di a tigri ben o go naki. Mi luku, mi si a pikin sidon a tapu wan bangi di wan sma frigiti a libakanti, e prei nanga pikin krabu ini a tokotoko. A ten di Kodyo e feti nanga a tigri mi frow e suku a pikin. A frow no kan prakseri a pikin ben de a watrasei. Disi ben de Gado wroko. Bika te a frow ben go a watrasei, a ben o si di Kodyo e feti nanga a tigri. Te Kodyo si a frow, a kande a lasi ensrefi wan seconde, a lusu a tigri. A tigri ben kan drai naki a frow efu a pikin kiri.
Mi teki a pikin, mi go na oso. Bifo mi gwe mi teki mi jas tapu Kodyo fesi. Mi kari wrokoman teki Kodyo di dede. A srefi ten mi si mi frow. A e suku a pikin. A si mi sondro jas, mi krosi nanga brudu. Mi frow skreki, ma di a si mi nanga a pikin a no taki noti. A frow ferstan wan gevaarlijk sani psa.
Mi kari fo srafu, mi taigi den san psa a watrasei. Now fosi mi frow yere èn sabi san psa. Now den srafu no ben wani bribi san mi taki. Den frede fu go a watrasei. Den srafu frede. Mi taigi den srafu kari trawan. Mi e go kenki krosi. Te den kon, mi e go nanga den a watrasei. Mi meki den beri Kodyo a mindri a pranasi."
Arkiman, a stotu te dya. Un tan so.