Kofimaka

Arkiman ini a foto, abra watra, awans' pe un de m'e bari un alamala odi. Disi na a tori fu tu edeman: edeman Kofimaka nanga edeman Duda. Den tu edeman e go feti te a wan kiri a trawan fu wan uma ede. We dan a tori disi span srefsrefi. Un kaka yesi, un arki.
Un yere of leisi fu den someni feti fu den srafu nanga bakra srudati fu den srafu ben kan obi den vrijheid. Un leisi of yere a fasi di den srafu ben libi ini den busi. Te furu trobi miti yu ini den echt bigi busi un yere fu Tombe, a moi uma di den Aucaaners seni gi edeman Boni, a rol di Tombe prei nanga Boni. Fosi someni difrenti negerstamen de ini Suriname di buku skrifi nanga someni difrenti stamen di buku no skrifi. Wan fu den stam disi ben de a stam fu den Duda. Efu sma fu a stam disi de ete ini Sranan no wan sma kan taki wan let' fasi. Fu Kuruntiers, Martuwariers un ben yere, ma fu den stamen disi furu buku no skrifi. Den afo fu den Kuruntiers nanga Martuwariers ben de srafu ini den pranasi di ben de fos'ten a Sranan liba. Bakaten den Kuruntiers nanga Martuwariers go set' libi ini opo Saramaka èn Coppename nanga Corantijn pe den tan yari langa yari yari langa. Wan enkri stam di drai baka ben de den Kuruntiers. A stam disi de te nanga tide ini a birti fu Coppename nanga Saramacca liba. A no de wan bigi stam.
Wan tra stam, den Dudas no e libi krosbei a foto. Den disi tan ini dipi busi. Den no e suku feti den no e suku trobi sodat' den tra stammen di e libi ini a birti no e trobi den Dudas. Solek' a sori den Kuruntiers nanga den Dudas ben de fosfosi wan stam, ma wan ten ben de di trobi ben de a den mindri. Den prati: a stam fu Kuruntiers prati nanga di fu den Dudas.
Den Kuruntiers abi solek' edeman Kofimaka nanga Duda. Duda nanga Kofimaka no e libi ini a srefi' kondre. Den de bun mati. Watra no e psa a den mindri. Pe Kofimaka de Duda de tu. San honderd man no kan du, prati Kofimaka nanga Duda, wan uma kan du. Wan uma prati den mati. Wan uma meki den mati feti makandra te a wan kiri a trawan.
A trobi fu Kofimaka nanga Duda, den tu mati de watra no e psa a den mindri, ben de so. Soleki mi taki a fesi, Kofimaka nanga Duda no e libi ini a sref' kondre. Wan dei edeman Kofimaka seni boskopu gi edeman Duda bika a wani taki nanga edeman Duda, sodati Duda ben mu go ini a kondre fu edeman Kofimaka. Di edeman Duda go ini a kondre fu mati Kofimaka, Duda si na uma fu edeman Kofimaka. Wantron edeman Duda prakseri èn firi tra fasi sodati edeman Duda prakseri no de moro na Kofimaka en mati ma na Kofimaka uma. Èn disi Kofimaka ferstan. Kofimaka kruderi nanga ensrefi te a de so fara fu gi Duda en mati a uma kado. Ma disi Duda no kan sabi. A uma fu Kofimaka di ferstan en masra mati wani en agri tu nanga den sani fu Kofimaka mati Duda taki a lobi en. Di edeman Duda sabi a uma fu en mati Kofimaka e gi yesi a ala sani ai taki, edeman Duda prakseri kiri edeman Kofimaka, en bun mati, sodat' Duda kan tya a uma fu Kofimaka go ini en kampu ini en kondre solek' en uma.
A baka wan wiki de edeman Duda kruseri nanga ensrefi kiri edeman Kofimaka fu teki en uma, Duda go wan neti ini a kondre pe edeman Kofimaka e libi. A waka kibri fasi go pe a kampu fu edeman Kofimaka de nanga a prakseri kiri edeman Kofimaka.
Den kampu e meki a ten dati bun hei fu gron sodat' nanga wan trapu den sma di e libi ini a kampu ben e go a tapu a sodro. A kampu fu edeman Kofimaka ben hei bijna twee meter fu gron. A flur ben de fu prasara de ben abi opening. A kampu opo ala sei sodat' ef' wan sam de ondro a kampu, a sma di de a tapu a sodro e si a sma. Ef' a de feanti a sma di de a sodro a kan sukukibripresi. A trapu di den e poti fu go a sodro den e puru te neti sodati di edeman Duda go pe edeman Kofimaka e libi nanga a prakseri kiri Kofimaka, Duda no ben kan go a tapu a sodro pe Kofimaka e sribi. Ma a mindri den prasara Duda e si Kofimaka skin. Nanga en lans a sutu Kofimaka a mindri a prasara. Di Kofimaka firi pen a drai Duda sutu baka. Ma Duda no de seker ef' a sutu Kofimaka wan fasi di e go meki a dede esesi, sodat' Duda teki en srapu kapmes fu gi Kofimaka a genade slag. Ma di edeman Duda wani sutu edeman kofimaka fu a derde tron edeman Kofimaka no de moro ini a kampu. Solek' den ferteri te edeman Kofimaka de ini nowtu a abi a koni gwe sondro sma si ef' sabi. Edeman Duda ben abi a bribi edeman Kofimaka e go dede esesi. Sodati edeman Duda go ini a kampu fu edeman Kofimaka. Bika a denki Kofimaka de ete ini a kampu. Ma preifu Duda si edeman Kofimaka a si na uma fu Kofimaka na uma di a lobi. Na uma taki: "Baya, edeman Kofimaka no de moro in a kampu. Pe a go, mi no sabi. Baya! Taigi mi, sanede i du sowan don sani fu wani kiri Kofimaka, mi masra, yu mati, fu ben kan teki mi? Kofimaka, mi masra yu mati, sabi yu lobi mi. A no de fanowdu fu ben wani kiri yu mati bika mi masra, yu mati, ben e go gi yu mi soleki kado, bika un de mati; watra no e psa a un mindri. Now, yu wani kiri Kofimaka yu mati, mi masra. Mi no sabi ef' Kofimaka mi masra, yu mati, dede of a de na libi."
Di edeman Duda yere san na uma taki a krei bika Duda ferstan ef' Kofimka dede dan ala sani tan so, ma ef' Kofimaka no dede dan a now fosi a strei e go de fu edeman Kofimaka nanga edeman Duda fu wan uma ede. Di den sma ini a kondre fu Kofimaka nanga ini a kondre fu Duda sabi san psa, den bigin feti feti makandra. Pe a wan famiri si tra famiri den feti te dede. Edeman Kofimaka di no dede ma kisi bun mankeri di Duda sut' en a mindri den prasara tan ini busi, dres' ensrefi nanga busi wiwiri te a kis' krakti baka. Now di Kofimaka betre ai go teki atibron fu a uma ede edeman Duda wani kir' en. Edeman Kofimaka waka dei langa ini a busi bika fu ben kan wraak en a tapu edeman Duda a ben mu abi wan bun èn aparti wapen. Kofimaka ben koti swampu abra. A no ben brutu nanga Kaiman nanga takru sneki. A waka dei langa sondro nyanyan ef' dringi te a de ini Parabusi, bika edeman kofimaka ben fufuru wan bigi zaag di den Para nengre e zaag den bigi blok udu tron planga. Edeman Kofimaka ben wani meki wan lans nanga a sa. Di edeman Kofimaka sabi a de ini Parabusi a waka kibri fasi. A abi geluk, a no waka wan dei a tuka nanga dri Paranengre di e san wan bigi blok sedre udu. Sondro frede Kofimaka go pe den Paranengre e wroko. Di den nengre si edeman Kofimaka den denki a wan lowesrafu bika edeman Kofimaka ben abi bigi edewiwiri, afro, langa barba a no ben wer' krosi, soso kamsa kamisa. Den Paranengre bari. Tu Paranengre lon. A wan Paranengre frede sowan fasi a no ben kanlon, a tan tnapu lek' wan ston popki. A nengre flaw, a fadon, a tan didon. Edeman Kofimaka opo a Paranengre poti a tap' en skowru, a teki a sa a go baka ini busi. Edeman Kofimaka go ananga a Paranengre ini en kondre, pe bakaten a Paranengre set' libi nanga wan uma fu a stam fu edeman kofimaka. Ma ini no wan enkri Dyuka kondre Paranengre bere de. Te a Paranengre ben de wan Para-uma dan fosi Para bere ben kan de ini wan Dyuka kondre. Di edeman Kofimaka de kosontu baka a go ini en kondre. Ma a no go na ini en kampu, a kibri ini a birti. Di a feni okasi a sen' taigi en famiri taki a kon bana. Ma den no mu taigi trasma a de a libi. Nanga furu furu muiti edeman Kofimaka meki nanga a sa di a teki fu den Paranengre wan lans. Now, di a lans klari kofimaka leri ensrefi trowe lans. Disi a du dri mun baka makandra sodat' te a trowe a lans a no e misi. Edeman Kofimaka sabi edeman Duda abi koti, abi obia a tapu ala wapens, sodat' no wan enkri wampen kan kiri Duda boiti wan lans di den no sabi wan bu fasi ete ini den kondre. Di Kofimaka sabi a kan trowe lans sondro a misi a bigin mek' klari fu a bigi feti fu en nanga edeman Duda. Edeman Kofimaka sreka dri dei, dri neti. Di a kisi pontu a vierde dei edeman Kofimaka teki a lans, a kmoto ini en kondre fu go ini a kondre fu edeman Duda. Di a de ini a kondre fu edeman Duda a kibri ini a bus' pasi pe a sabi edeman Duda, en doods vijand, e go psa fu go wasi ini a kriki soleki a gwenti du ala dei. A ben de wan moi mamanten. A kowru mamanten winti e wai switi, a son e schijn a mindri den bon ini a liba kanti. Edeman Duda ori wan wenkye anu. Edeman Duda taki: "Wenkye Akuba, tide e go de wan moi dei." A tan solek san edeman Duda taigi a wenkye ben de a marki a teken fu edeman kofimaka fu kmoto ini a busbusi, a go a mindri a pasi pe edeman Duda nanga akuba a wenkye de.
Kofimaka taki: "Yu Duda kwasi, tide a yu laatste dei." Pe edeman Duda tnapu a nati en kampsa. A no e seki bika a no kan bribi edeman Kofimaka, en doods fijand, tnapu na en fesi. A denki di a sutu Kofimaka noiti a yere fu Kofimaka moro. Kofimaka go ini busi go dede. Ma er' esi edeman Duda kis' ensrefi. Edeman Duda e waka ala ten nanga en kapmes. A teki en kapmes, a taki: "Kofi, yu no mu taki sowan fas' anga mi. Yu mu taki tide man miti man. I no mu denki mi na wan bus' meti ef' bus' fowru di yu kan kiri te yu si den."
Akuba, a wenkye di de nanga edeman Duda, skreki sowan fasi di a si edeman Kofimaka, a bari frede fasi sodat' edeman Duda las' ensrefi wan honderdste seconde. Dis' wan' taki Duda lasi en voorzichtigheid, a lasi en wachtzaamheid wan hoderdste seconde. Fu a ten disi edeman Kofimaka trowe en lans peil snel a trowe a lans di fasi na edeman Duda mindri baka. Edeman Duda bari: "Yu sutu mi a mi mindri baka? Disi a no a fasi di un bigisma leri unu feti, sutu trawan a den mindribaka." Edeman Kofimaka bari gi edeman Duda: "Ori yu tingi mofo. Go pe a kriki de bika wan don soko nengre e dede alaten soleki wan don soko nengre." Edeman Kofimaka waka miti edeman Duda, a feti nan-toman bigin. Edeman Duda lasi fur' brudu. Solek' a sori Duda e go lasi a feti bika solek' Duda e drai fu tapu den slagen den nake fu edeman Kfimaka a tan soleki a lans e go moro dipi ini Duda skin. Toku edeman Duda ori ensrefi. Ai pruberi go pe a kriki de bika Duda abi a bribi te a go pe a kriki de a kan teki ini en kruyara en feti obia, a kan wini edeman Kofimaka en doods fijand ete. A baka tin minuten feti Kofimaka nanga Duda e feti krosbei a kriki kanti. Edeman Duda no ben kan tanpu bun fasi moro a tapu en futu. A lans na en mindribaka tan leki wan yaya prin. Duda e brudu solek' wan kaw di den srakti. Duda fadon a tapu en baka ini a kriki. A no ben abi okasi teki ini en kruyara en feti obia. Ete Duda abi pikinso bribi watra e go yepi en, sodat' Duda tan ondro a watra. Ma a no kan tan so langa lek' fa a gwenti bika a no abi bro moro. A lasi furu brudu. A watra ini a kriki redi sodat' Kofimaka sabi pe Duda de. Kofimaka sabi Duda no kan tan langa moro ondro a watra. A tnapu klari nanga en kapmes e wakti Duda te a kon a tap' sei. Solek' Duda de fu si te na en neki, Kofimaka kapu Duda ede puru a tapu en neki. Piren ef' kaiman nyan a skin fu Duda, ma Kofimaka teki a ede fu Duda fu meki obia. edeman Kofimaka ben abi fanowdu someni dede ede bifo a kan meki a obia.
Eri esi dron naki ini a kondre. Edeman Kofimaka kiri edeman Duda, a tek' a ede fu Duda meki obia. Di den mansrafu ini a kondre fu Duda yere a fasi de den edeman dede, den wrak. Den wani go a baka Kofimaka. A feti fu den ini a kondre fu Kofimaka nanga den ini a kondre fu edeman Duda ori siksi wiki langa. Den kondreman fu edeman Duda ben moro furu dan den kondreman fu edeman Kofimaka sodat' Kofimaka sabi te a go so doro ete wan mun ala en kondreman e go dede. Kofimaka kruderi nanga ensrefi libi a kondre go nanga en volk na wan tra presi go seti wan nyun kondre. Kofimaka sabi a no ben kan go so maar na wan presi go seti wan nyun kondre. A mu aksi den moro krosbei edeman fu den krosbei kondre permisi fosi bifo a seti wan nyun kondre. Bifo edeman Kofimaka libi en kondre a seni kari Narina, wan mansrafu fu en stam. Kofimaka taigi Narina san a wani du, so dat' Narina mu go pruberi meki mati nanga den nengre di sroto freide kba. Narina ben mu wroko esesi èn nanga koni bika ibri seconde wani taki dede. Bika a kan psa te Narina drai baka nanga bun ef' takru boskopu a kan si ini en kondre soso dede srafu nanga bron kampu. Narina, boskopuman fu edeman Kofimaka, no frede a kfalek èn langa pasi. Di Narina de wan dei na pasi, a prakseri te a de ini a kondre fu den fri nengre ef' den go bribi san ai go taigi den. Narina go ini someni kondre go fufuru umasrafu gi tra kondre, sodat a frede den go sabi en, den go ori en, den go kiri en. Di Narina de ini Coppename busi, a si ini tokotoko futumarki fu dri srafu. A baka wan syatu ten Narina si dri mannen. A waka now kibri fasi fu den mannen no kan si en. Ma a no de solek' Narina ben prakseri, bika den dri srafu si Narina. A ben de dri Aucaaners. Narina sabi Aucaaners e libi ini a birti fu Dyuka kriki on de Tapanahonie. A wani go na den Aucaaners ma di a no de wan bigi stam Narina denki den Aucaaners no e go bribi san ai go taigi den. Now Narina ben wani go na den Martuwariers, wan tra stam sodat' Narina, a boskopuman fu edeman Kofimaka, kmoto ini Coppename a go ini Saramaka. Disi a du sondro nyan nanga dringi. Te a no ben kan moro a ben tan solek' a ben e go fadon, ai sidon ondro wan bon bro nanga en asan na en anu di a ben kroisi a tapu en borsu. Arkiman, san na asan? Asan a den yongu blad fu maripabon. Solek' wan srafu tyar' den blad fu a miripabon te ai go du boskopu, dan disi wani taki a man e go nanga freide, lievende bedoelingen, no suku trobi no suku feti. A mamanten di Narina ben de ini Saramaka busi fu go na den Martuwariers, dri uma kmoto ini den kampu fu ben go ini den kruyara fu ben go ini den gron di ben de wan afu yuru moro fara. Den uma e go makandra go yepi kwamba, wan fu den dri umasrafu, go prani solek' a gwenti de ini busikondre. Di den dri uma de na a lanpesi pe a gron fu kwamba de, den tai a kruyara teki san den go abi fanowdu go ini a bus' pasi fu go ini a gron fu kwamba. Den uma e tak'taki solek' ala uma te den de makandra. Den de now krosbei pe Narina, a boskopuman fu edeman Kofimaka, e dyonko. Di Narina, yere tak'taki a wiki. A si dri umasrafu tnapu na en fesi. Den uma skreki, den frede. Den tan tnapu. Di den uma kisi densrefi tu uma bari lon go pe den kruyara de gi ini a kruyara. A ten di den pari gwe den uma e bari. Ma Amba, a wan uma, tan tnapu lek' wan ston popki fu skreki nanga frede. Narina, a boskopuman fu edeman Kofimaka taki: "Uma, no frede. Mi n'e go tyari' yu gwe." Di Amba kisi ensrefi a bigin bari ini a busi. A echo fu a bari den yere yuru fara. Pikin fowru ini a birti opo frei. Pikin bus' meti di de ini a birti go ini den olo. Den uma di de a tap' a liba e gwe e yere a babari fu Amba den ferstan den sisa de ini bigi bigi nowtu. Ma a no ben de so, bika Narina no du a uma notnoti. A no fasi en srefsrefi. Di den tu uma ini den kruyara de ini den kondre, someni kondreman ben de na libakanti. Alamala yere a babari fu den uma na tap' liba so tu ini a busi. Di den uma go na syoro kisi den srefi den taigi den trawan san psa. Amba tan na baka. Den no sabi san psa nanga Amba, ef' a lowe nengre kiri Amba ef' a tyari' Amba gwe. Bruya ini a kondre. Den mansrafu bari wroko. Den poti kruyara na watra fu go na baka a lowe nengre di solek' den denki kiri of teki Amba. Narina, a boskopuman fu Kofimaka, no teki no fasi Amba. Narina ferstan den ben go suku en ini a busi. Den sabi a busi moro dan Narina sodat' Narina no tan moro langa ini a birti. A lon yuru yuru langa ini a busi te a de ini wan sabana pe honderden awarabon de. Narina no de seker ef' feanti de ini a birti. A kibri ini bus'busi e rostu. En skin weri. Sondro a wani a sribi. Di Narina wiki a kisi ensrefi. A dungru ini a sabana. A ferstan a neti e tapu. A no ben wani go moro fara bika a no sabi a busi. A tan ini a kapweri a sribi te na mamanten. Narina furu en tas mamanten nanga awara, a go baka ini a kapweri pe sribi te mindridei sondro brokude. A ten di Narina mu drai baka nanga bun of takru boskopu gi edeman Kofimaka ben de krosbei. Ete a no sabi pe a mu go. Someni dei psa. Narina no drai baka. Edeman Kofimaka nanga en kondreman denki feanti kiri Narina. Ma di den prakseri moro fara den sabi disi de wan sani di no kan, bika Narina sabi langa a de na pasi pe a sabi mati of feanti e libi, ai waka nanga asan, a fredesteken fu den bus'nengre. Solek' mati of feanti si na asan den sabi wantron a man disi no e kon fu feti ma ai kon fu frede, ai kon nanga bun boskopu. Ala a ten di edeman Kofimaka nanga en kondreman no sabi san e psa nanga Narina, a boskopuman fu Kofimaka e gwe nomonomo. Di a sabi feanti no de na en baka, a tap' futu a prakseri san a go du. A baka tu dei Narina ben de ini wan kondre di a no sabi. Noiti a kan denki wan kondre de ini a birti. Narina no ben kan drai baka bika tu boi si Narina. A sabi den tu boi e go taigi den bigisma den si wan lowe nengre krosbei a kondre. Wantron na edeman fu kondre e go bari wroko. Ala uma nanga man nanga pikin di ben de a dorosei go ini den kampu. Den mansrafu sreka e wakti. A baka wan yuru Narina ben de ini a kondre. Nanga aladi den si Narina nanga na tya asan ete den no ben de korostu. Den ben denki a kande wan spion, trawan de a baka kibri ini a busi. Nanga asan na en anu Narina go ini a kondre. Now fosi den ferstan a no de wan lowe nengre ma wan boskopuman. Solek' a gwenti de, Narina go pe a edeman de a taki odi. A edeman nanga den owru wan ben de makandra ini wan parti kampu. Narina taigi den san tyari en kon ini den kondre, a fasi de a kondre fu edeman Kofimaka bruya. Den wani foroisi. Edeman Kofimaka wani kmoto ini a kondre seti wan nyun kondre wan tra presi. A kon aksi permisi gi en edeman okasi fu seti wan nyun kondre ini a birti. Ala a ten di Narina de ini a tra kondre e taki nanga den edeman, Kofimaka en kondreman bruya. Den no sabi san den mu du. Den frede fu den kondreman fu edeman Duda. Narina tan dri dei ini a fremde kondre. Bigi krutu ori, den kruderi gi edeman Kofimaka nanga en kondreman okasi fu seti wan nyun kondre ini den birti. A kondre fu edeman Kofimaka no bigi. Now Narina mu go taigi Kofimaka san psa. Erfu dei erfu neti Narina waka ini a busi, a no sabi pe a de. A twarfu dei di a de baka ini en kondre a gi edeman Kofimaka a boskopu, a taigi en a fasi di a waka ini a busi fu go pe ai go seti a nyun kondre. Narina sribi fu a no wiki noiti moro. A Narina dede. A ben tumsi gi Narina. Bigi sari ini a kondre. Nanga a dede fu Narina edeman Kofimaka nanga en kondreman no ben kan foroisi. A baka fo wiki di edeman Kofimaka taigi en kondreman bigin meki klari fu go seti wan nyun kondre a ben de bigi alenten. Busi furu nanga watra. Den ben mu wakti sodat' ala nanga ala a ben de siksi mun a baka dede fu Narina, a boskopuman fu edeman Kofimaka, di Kofimaka nanga en kondreman ben go seti wan nyun Kondre ini wan farafara presi. Arkiman, dis' na tori fu edeman Kofimaka nanga edeman Duda. Un tan bun ala sei.