A tori san mi e go taki now na di mi ben sa abi twarfu yari di mi ben meki wan kuku fadon ini wan asisibari.
Fosten a ben de so, te den sma ben e meki kuku dan te a kuku meki, yu e go losi en na bakri-oso.
A ben de so, a frow di ben kweki mi, mi ppe, ben lobi meki kuku èn a ben sabi meki kuku. Ma dan a kuku ben
meki ini wan prapi. Wan prapi na wan bigi komki fu klei di den ingi e meki. Te den meki en fu klei, den meki a
drei ini a son. Te a drei dan den e meki moimoi skrifi na en skin, dan den e seri en. Dan yu e teki a prapi nanga
wan driltiki. A driltiki na wan langa pisi udu san skafu moi lontu fu wan meter kande of drie kwart meter, dan
a ondrosei fu en bradi. Nanga dati yu e dril a kuku.
Yu broko yu eksi poti ini a prapi, dan yu e dril yu kuku. Te yu poti sukru, poti essence, ala sani gi en dan yu
e dril en te a kon deki moi. Te a kon deki moi dan yu e poti blon nanga botro. Dan yu e botro yu blik. Te yu du
dati dan yu e kanti a kuku go na ini a blik. Na so mi ppe ben e du en tu. A meki a kuku.
Ma fosten ala sma no ben abi wan onfu ini en oso. Fornuis no ben de so. Wawan gudu sma ben abi wan fornuis. So
te yu meki a kuku dan yu tyari en go losi na bakri-oso. Dape na bakri-oso den ben meki brede. Den ben abi wan bigi
onfu pe den e losi brede. Dan so srefi den ben e losi kuku tu, den ben e losi buskutu tu. Buskutu na te yu ben
abi wan lo owru brede, dan yu e tyari en go losi na bakri-oso meki a tron buskutu.
A onfu di den man ben abi na ini bakri-oso ben de wan sementi onfu. Èn fa yu ben hati a onfu dati? Yu ben
hati en nanga udu. Yu e poti wan lo udu ini a onfu, leti faya gi en, dan yu e meki ala den udu bron te den tron
krofaya. Dan te yu e puru ala a krofaya, dan eripi asisi e tan. Dan ini den bakri-oso den ben abi difrenti udu
bari pe den krabu a asisi poti. A so pe mi ben tyari a kuku go losi, a so den ben e du dape tu.
Yu e pai, efu na wan bigi blik, yu e pai moro leki kwarki, ma efu na wan mindri sortu blik dan yu e pai kwarki.
Bika a no kuku wawan den ben e losi, yèrè. Den ben e losi pom tu. Ala sortu sani den ben e losi.
Dus efu a blik ben bigi dan yu e pai moro diri fu en.
A so mi tyari a kuku go losi, a kuku losi moi. Ma mi ben e lobi fu taki tori. Dan fa mi ben e taki a tori dan mi
poti a kuku tapu a lanki fu wan fu den asisibari. Dan fa mi e taki a tori go taki a tori kon, a so mi lasi misrefi,
a kuku fadon go ini a bari nanga asisi. Ooo, mi skreki sote. Bika a kuku no ben bun moro. Fa yu e puru a asisi
dati fu a kuku? A yuru mi tyari a kuku go na oso, den fon mi srefsrefi. Bika mi ben meki a kuku pori.
Di mi ben e go na skoro ete un ben abi someni prisiri sani. Sranan ben de wan kolonie fu Bakra- kondre, so te
Koningin ben friyari dan un ben e go singi na pren. Ini a ten dati den ben kari en granman pren. Dan den pikin
fu den hei klas wawan ben go singi bika den pikin totitoti wan no ben man go singi. Ma den bigi wan, twarfu yari
nanga moro owru, dan den ben go na pren fu singi. Den leri singi. Kande wan tron noso tu of dri tron na wan wiki
den ben e leri den singi. Bika te yu e go singi na pren yu e go singi nanga srudati poku. Dati ben de wan fesa
srefsrefi bika na wan bigi grani dat yu kan go singi na pren. Wan bigi beeld fu Koningin Wilhelmina ben de na mindrisei
fu a pren, so wi tnapu lontu a beeld.
Ma den sma di ben kweki mi, den no ben abi someni moni. So di mi e go singi na pren den ben nai wan moi oranye
yapon gi mi. Ma mi no ben abi susu. Den go aksi wan sma wan susu gi mi, ma a susu ben bigi gi mi futu. Dan san
mi du? Mi sutu papira go ini a susu. Ma yu na pikinnengre, yu breiti dat yu kan go singi. Yu no abi trobi taki
sma e go lafu yu taki yu weri wan bigi susu. Yu no abi trobi bika yu wani go singi.
Dan a dei kon doro dat wi ben mus go singi. Mi weri a moi oranye yapon. Den kloru fu a fraga fu Bakrakondre na
redi, weti nanga blaw nanga wan lenti fu oranye, bika den kownu fu Bakrakondre nen Oranye. A fruku bakadina, dri
yuru bakadina, yu kmopo kba na oso tyari yu fraga. Ala sma e kisi wan moi fraga -- redi, weti, blaw fraga. Ala
pikin e gwe.
Te yu e doro na pren dan den e seti ala den pikin: derde klas, vierde klas, vijfde klas. Den bigi wan e tnapu a
baka, den moro pikin wan e tnapu na fesi. Dan un mus arki bun fa a poku e prei. Yu no kan singi somaar. Ala sma
e singi singi singi. Wansi fa a son faya, yu no e firi a son bika yu prisiri. Un yere wi e singi so:
In naam van Oranye doe open de poort,
Oranye boven, Oranye boven,
Leve de Koningin.
Dan wi e wai den fraga. Te un kaba singi dan granman e kon taki wan wortu, kon taki tangi fu di un singi. Èn
dan a taigi unu taki a seni wan telegram gi Koningin pe a taigi en taki a pipel fu Sranan seni frusteri en. Dan
te a kba yu kan tyari yu fraga gwe na oso.
A tamara fu en ala pikin e kisi switi sani na skoro. Ala sortu moi switi sani yu e kisi. Fosi un ben abi someni
sortu sukrusani: strafman sukru sani, kawston, kawlade. Aaa, te yu e nyan den sukrusani dati fosten, wansi den
seni yu go feifi kilometer a sukrusani no e kba, fa a sukrusani bigi.
Ala pikin e prisiri. Someni prei e prei na skoro prasi soleki streilon, dyompo na ini aleisisaka, dyompo nanga
tinkoko. Suma e wini e kisi wan prijs. Yu kan wini wan pisi switi sopo fu wasi yu skin; yu kan wini wan grasi fu
dringi watra; yu kan wini wan kankan. Ma yu kan wini wan prijs. So ala sma e meki muiti fu wini a prijs.
Dan a heri dei dati un no ben abi fu leri, soso meki prisiri. Bika ala pikin fu ala skoro ini Sranan ben e abi
fesa. Ma sensi un kisi srefidensi, basi ini eigi oso, konfriyari no e ori moro, bika wi kondre no de wan kolonie
fu Bakrakondre moro. Pikin no e go singi na pren fu firi konfriyari moro. Ma fosten a ben de wan bigi prisiri efu
yu ben kan go singi na pren.
A tori san mi e go ferteri now na di mi ben go na Livorno nanga mi sisa. Livorno ben de wan boiti fosi. Now
gotro no dape moro, kriki no dape moro. Ala presi kon moi. Yu sabi pe Livorno de? A de abra broki, abra highway,
leki yu wani go na Domborgu sei. Iya. Dape ben de soso busi fosi. Bethesda ben de na abra sei. Yu sabi Bethesda?
Yu yere fu Bethesda? Bethesda na pe den gwasisma, den kokobesma ben e tan. Fosi yu ben abi dya Mayella, Bethesda,
Chattillon; dri presi pe gwasisma ben e tan. Anitri ben abi Bethesda, lomsu ben abi Mayella, nanga lanti ben abi
Chattillon. Dape den ebi gwasisma ben e tan. A ben de abra liba fu Billiton. Dape na Livorno soso busi ben de.
Moro furu hindustani ben e libi dape. Na dape mi famiri ben e libi. A frow di ben kweki mi, en sisa ben e libi
dape. Dan wan kriki ben de na mofodoro fu den oso. Den sma no ben abi broki. Alasma, na wan planga den ben poti
abra a kriki. Wan langa planga. Dan yu e waka kon ini a dyari. Yu musu. Tra presi no ben de fu yu kon
ini a dyari. Èn a kriki ben bradi, yu no man dyompo. Yu e poti wan langa planga dan yu e kon ini a dyari.
Ma fisi ben lai bika a kriki ben dipi moi. Fosi fisi ben lai: kwikwi, walapa, ala den sortu fisi. Te yu go na boiti
a fosi sani san yu e go du, yu e go uku noso yu e go nyan tyen. Ala sma ben prani tyen. Na so un go, un go diki
woron. Te yu kaba diki woron dan yu leni wantu uku tiki, dan yu poti a woron na a aka, dan yu go tnapu uku. Na
so mi go tnapu a tapu a planga, mi sisa go tnapu a sei a kriki. A bun mi sisa no go tnapu a tapu a planga tu. Bika
mi sisa ben fatu. Efu dati ben fadon a ben dede. Dus mi tnapu a tapu a planga e uku. Yu sabi, efu wan fisi bigin
nyan ai dukrun a korku. A srefi ten dati mi hari. Mi hari so tranga taki a heri planga drai, mi fadon go ini a
kriki. Mi sisa no prakseri no wan momenti leki a dyompo kon. A bari. A hari mi puru. Iya, a hari mi puru. Den tra
famiri kon yepi tu. Den puru mi kmoto na a watra èn noti no ben pasa nanga mi. Ma dan prisiri no ben
de moro fu tan uku bika un ben skreki srefsrefi. Dan wante un kon na oso baka bika un krosi ben nati. Den sortu
sani dati ini yu libi yu no e fergiti den noiti moro.
A ben de so dat di mi ben pikin mi ben du someni ogri. Ala dei mi ben kisi fonfon. Ala dei den ben e fon mi.
Èn a ben de so dat ala dei mi ben mus go bai feifi sensi wiwiri tabaka. I sabi san na dati? Tabaka. Den
sma e lolo en dan den wasi den mofo nanga en. Tra wan e bron en. Yu e lolo en, dan yu leki pikinnengre yu mag leti
en èn smoko en, bron en meki a kan gi asisi. Dan wi e lobi dati want te yu e du dati dan yu e drungu. A
tabaka e meki yu drungu. Den sma ben e teki a asisi dan den poti en ini wan pikin preti. Den kiri a tabaka fosi
dan den wasi den mofo nanga en. Den taki dat den tifi e kon krin nanga a tabaka. Son sma e teki a soso asisi dan
den wasi den tifi. Tra wan e teki krofaya fu wasi den tifi.
Ma dan ala bakadina mi ben mus go bai feifi sensi wiwiri tabaka na omu sneisi na tapu uku. A omu sneisi a ben nen
Bigi Tifi. Den ben kari en Tifi bika en tifi ben bigi. Ma te yu doro dape a tapu uku yu e miti someni trawan pe
yu kan taki wan pikin tori. Owktu wan man ben de san e seri pinda, wan pa‚, wan owru yampaneisi. Ai sidon na fesi
a sneisi wenkri tapu a stupu e seri pinda.
Leti na fesi a sneisi wenkri wan worst wagi ben tnapu. I sabi, bludworst. Dan yu ben abi son man di no ben abi
wagi fu waka nanga a worst, ma den ben poti en ini wan embre. Dan den waka dan den bari: "Worst! Worst!"
Dan ala sma e lon kon bai bigi sensi efu feifi sensi. Now wi no abi bigi sensi moro. Bigi sensi dati na tu nanga
afu sensi. A ben meki fu kopro èn a ben bigi moro wan kwarki. A dati meki den kari en bigi sensi.
Dan yu ben abi wan man di ben abi wan wagi nanga wan dyendyen. A man ben nen A Nyie. Dan te yu go loi a dyendyen
gi en, dan a gi yu wan bigi pisi worst. Dan wan bakadina di mi go bai a wiwiri tabaka, dan mi go tnapu sei a wagi,
dan a aksi mi efu mi wani loi a dyendyen. Mi taki: "Iya."
Dan mi e bel, mi e bel, mi e bel, mi e bel. A so mi bel wan heri pisi ten. Ai kon dungru. Wante mi si a frow di
e kweki mi e kon. A ben de mi ppe. Mi skreki. A kon nanga wan tiki. A bigin fon mi. Mi wani lon ma mi no man, bika
fosten te den ben fon yu, yu no mag lon gwe. Yu mus tan tnapu. A fon mi go te na oso. Mi lasi a worst fu a bakadina
dati. A man no ben man gi mi a worst moro. A man srefi skreki. Mi sari sote, yèrè, fu a tori dati,
dat mi no kisi a pisi worst. Bika mi ben lostu a worst. Bludworst, mi ben lobi en srefsrefi.
A tori di mi wani ferteri now na di mi kren go ini wan bon a fosi leisi. Dati psa di mi ben abi tinadri yari.
Mi ben lobi nyan froktu. A froktu di nen kasyuma na wan bun bigi froktu. Te a froktu disi lepi bun a kon ros moi
èn a switi srefsrefi. A presi pe mi ben libi na ini Keisistrati, wan bigi kasyuma bon ben de. A bon ben
bigi srefsrefi èn a ben meki furu froktu. Te den froktu lepi den bigi leki wan nyunyun pikin ede. Dan te
den froktu lepi dan a frow pe mi ben libi ben e kari wan sma fu kon puru den froktu, bika a bon ben hei srefsrefi.
A ben de so tapu wan Bun Freida (Goede Vrijdag) ala sma ben go na kerki. Ala presi ben tiri. A dei dati ben de
fu go na kerki, efu yu ben tan na oso. Yu no ben mag wroko; pikinnengre no ben mag prei na prasi. Dan a dei dati
mi go na prasi. Mi iti mi ai go na loktu, dan mi si someni lepi kasyuma de na ini a bon. Mi drai lontu fu si efu
no wan sma no e luku mi. Di mi luku taki no wan sma no de na prasi, dan mi kren go ini a bon.
Di mi kren go ini a bon, dan yu ben abi na wan taki someni lepi kasyuma. Ma a taki dati ben de wan langa taki èn
a ben wroko leki wan kraka. Dan so mi tnapu, mi hari go te mi doro pe den kasyuma dati de. Fa mi wani broko wan
bigi kasyuma, a taki pe mi tnapu broko fadon. Mi skreki. Mi no fadon kon na gron, ma mi neki gwe go fasi ini a
taki di ben de leki wan kraka. Mi anu no abi no wan presi fu ori. Mi futu no abi no wan presi fu ori. Èn
mi no man bari, bika mi neki fasi ini a kraka.
Dan so mi tan, mi no sabi o langa. Ma dan pe mi ben libi wan granmisi ben e tan tu, wan owru frow. Dan a frow dati
ben kon trowe ptatabuba na prasi ini a dotikisi. Dan di a opo en ai luku, a si mi ini a bon so. Dan a bari: "Yepi,
yepi, yepi. Un kon yepi. Fine e dede!"
Dan di a frow bari so, sma lon kon. Wan man di ben e freiri nanga mi kweki-sisa ben kmopo na kerki. A ben weri
en weti paki nanga en weti susu ete. A man dati kren kon ini a bon so nanga en susu nanga en paki. Dan a pusu mi
na bakasei go na loktu, meki mi neki ben kan kmopo ini a kraka. A opo mi safrisafri, a saka mi kmopo na ini a bon.
Dati ben de wan sani. Ala sma ben e kosi taki: "Iya, yu ogri! Yu gridi! Fufuru ben e go kiri yu!" A so
a tori disi, mi no kan fergiti en noiti. Bika efu a man no ben kon, mi bo tan dape te mi dede.
© Copyright 2002 SIL. All rights reserved worldwide.