Norman a Matrosi

Norman ben de wan yonkuman di ben gebore ini wan pikin dorpu fu Bakrakondre. A ben de wan tranga wrokoman. A ben wroko na ini den bigi maksin na sei watra. Ma ala leisi te a si fa den sipi e gwe dan a ben taki nanga ensrefi: "Mi no kan tron wan matrosi tu? Dan mi ben sa si furu kondre." So, ala dei Norman ben dren taki a ben tron wan matrosi.Dan wan dei wan kapten ben mus fu tyari wan lai gwe na wan tra kondre. A ben mu gwe a srefi dei dati. Ma now wan fu en matrosi ben kon siki. A kapten lon tyari a man esi go na datra. Di den doro na datra, dan datra taigi kapten dati a man no kan gwe, bika ai siki hebi. Efu a go tapu se a kan dede.
Kapten aksi datra efu a no kan du wan tra fasi sodati toku a man kan gwe nanga en. Bika a ben abi a man fanowdu. Ma datra no ben wani meki a man gwe. Dan so a kapten besroiti fu libi a man na baka.
Di kapten ben waka go baka na en sipi dan a kon boks nanga Norman. Kapten fadon na gron. Dan wantron so Norman hari en opo. A taki: "Pardon, papi, mi no man yepi! Ma noti no psa nanga papi?"
Kapten piki en: "No!"
Dan kapten bigin lafu. A luku Norman, dan a seki en anu, a taki: "Mi na kapten Gerrit Maas. Mi si taki yu stampu èn tranga. Now wan matrosi fu mi e siki hebi. Mi abi ete wan man fanowdu fu kan lusu gwe tide neti! Efu yu wani kon nanga mi, dan yu kan leri a matrosi wroko. Nownowde a de twarfu yuru brekten, dan yu mus go esi na oso fu go piki den sma fu yu taki yu o gwe tide nanga mi."
Dan Norman taki: "Kapten Gerrit, mi no abi trobi fu gwe nanga yu bika langaten mi ben wani du a wroko disi. Mi no abi mama nanga papa moro, sosrefi no wan famiri moro. Mi wawan e tan. Mi o lon go teki wantu sani fu mi na oso, dan mi o drai kon esi baka."
Norman lon go pe a ben tan na ini wan pikin broko oso, dan a teki alasani san a ben abi fanowdu. A pusu a doro tapu dan a lon go na kapten baka. Di Norman doro, dan kapten lon go seti den papira taki a kan tyari Norman tapu en sipi. Di den papira fu Norman ben seti kba, dan kapten kisi a boskopu taki a mus fu lusu gwe wantron bika bigi sekiwatra ben de fu kon tapu se. Fosi mindrineti kapten Gerrit ben musu fu doro na a tra foto kba.
Kapten go ini en sipi nanga Norman. A naki dyendyen. Dan so ala en wrokoman ben ferstan taki den bo gwe wantron so. Kapten taigi den man meki den hari a ankra kon na loktu èn lusu ala den tetei san ben ori a sipi na seisei. Den man opo den seiri, dan den lusu so esi den kan fu lampe. Norman ben sari. A ben tnapu e luku fa a ben gwe libi en dorpu. Safsafri a boto ben drifi e gwe na ini se te leki noti no ben de fu si moro na seisei. Baka wan pisten dan kapten tyari Norman na den wrokoman fu en, dan a meki ibriwan fu den seki Norman anu. Baka dati kapten meki a fesiman fu en bigin leri Norman a matrosi wroko.
Norman ben teki gwenti esi fu a wroko taki baka wan tu yuru a ben man du furu wroko ensrefi. Kapten ben meki den man opo ala den seiri now meki den ben kan doro esesi na a tra foto fosi mindrineti. Mofoneti baka di alamala ben nyan dan kapten ben go hari en baka na ini en kamra. Wantu man ben go sribi tu. Dan wantu ben prei karta èn wantu ben hori ai na tapu a boto. Norman ben tan na tapusei e taki tori nanga a sturman. Wan sani fu neigi yuru dan ala sani ben tiri. Soso den skwala nanga a bro fu a winti yu ben kan yere. Den ben abi ete dri yuru fanowdu fu ben kan doro na a tra foto.
Wan sani fu tin yuru a neti dan a bigi sekiwatra kon doro. A ben de wan hebi wan. Kapten lon kon na sodro nanga ala den man san ben go sribi tu. Ala man ben go tapu en presi. Dondru ben bari, faya ben koti. Den skwala ben kon hei leki wan oso taki watra ben kon na ini a boto. Ala den man ben wroko tranga fu puru a watra ini a boto fu a no sungu. Wan fru wan den man ben puru den seiri fu a hebi winti no ben priti den. Nanga bun furu muiti a sturman ben tyari na boto fu a no kanti.
Now a bigi seiri ben kon fromu na wan tetei. A mast ben suku fu broko tu. A winti ben bro moro hebi. Kapten no ben sabi san a mus du, bika a man san ben sabi kren bun ben tan na syoro. Dan efu a mast broko dan a boto ben kan kanti èn sungu. Norman lon go na kapten, a taki: "Kapten Gerrit, mi kan kren go. Yu no abi fu frede."
Baka wan pisten dan kapten meki Norman kren go puru na seiri, fu a mast no broko. Norman kren go. Nanga bun furu muiti a kon doro na loktu. Den man ben hori krakti gi en na gron. Den bigin lusu tetei gi en. Safsafri Norman anga tapu den tetei gwe go miti a seiri. A boto bigin anga go na wan sei. Nanga ala en krakti Norman hari a seiri kon na loktu dan a lusu a fromu na a tetei. Dan den man hari a seiri safri kon na gron dan den tai en. So a sipi ben kon tnapu leti-opo.
No langa na baka dan a bigi sekiwatra kon wai gwe. A winti ben kon kowru. Safsafri den man bigin opo wan tu seiri. Di Norman saka kon na gron den man ben meki prisiri nanga en. Den opo en na loktu, den saka en, dan den wasi en nanga biri. Den ben dansi èn bari lafu. Kapten Gerrit srefi ben de makandra nanga den. Den prisiri te leki den ben weri. Trawan fu den ben drungu e didon sribi na gron. Kapten ben go sribi baka na ondro. Dan so den seiri gwe te leki den kon doro tu yuru musdei na a tra foto. Di mamanten doro den puru a lai dan den teki tra lai fu go na wan tra foto.
Sofasi a ben go na ini a libi fu Norman taki a ben si furu foto nanga kondre. A ben kon sabi furu fu a libi tapu se tu. Ma wan dei di kapten ben friyari dan den man ben hori wan fesa gi en na syoro. Den man ben meki prisiri, den ben dansi èn den ben meki babari. Baka wan pisten dan kapten hori wan strei fu si suma ben kan kren moro esi go na tapu den tetei go na tapsei fu a mast. A sma di wini, bo kisi wan gowtumoni fu kapten. Siksi man ben poti densrefi fu ori a strei. Norman ben de wan fu den man tu. Fa kapten bro tapu en froiti na so den man ben bigin kren esesi. Ma fosi den ben wani pingi den ai dan Norman ben doro na tapsei kba. Norman ben breiti taki a ben wini a gowtumoni.Sondro den man ben sabi, dan furu tra sma di ben de na seisei ben luku fa a strei ben waka. Kapten Milton Jones fu wan ingrisi legreboto ben luku a strei tu. Dan wantron baka a strei, a lon go aksi kapten Gerrit efu Norman ben kan kon strei nanga den man fu en boto. Kapten Gerrit taki: "We, efu dati musu psa dan yu mu gi mi wan panti!"
Kapten Milton taki: "Efu a man fu yu wini, dan mi e pai yu wan hondru gowtumoni, ma a man fu yu e tan tapu mi boto. Ma efu wan man fu mi wini dan yu mu gi mi tutenti gowtu moni!"
Dan Kapten Gerrit taki: "Mi sa denki a tori disi, dan mi e kon piki yu baka. Sidon, mi e kon!"
Kapten Milton go sidon. Dan kapten Gerrit kari Norman kon na wan sei dan a taki: "Norman, a kapten dati kon aksi mi taki yu mus go ori wan strei nanga wan tu man fu en. Ma te yu wini dan yu mus tan tapu en boto."
Norman taki: "Ma Kapten, mi no wani libi yu. Yu sorgu so bun gi mi taki mi kan nyan èn dringi fu a wroko san mi e du tapu yu sipi. Kapten, seni a man gwe. No meki no wan kruderi nanga en."
Kapten sidon e prakseri bun san a mus du. Ai luku Norman nomo dan a taki: "Norman, mi sa mus fu teki a kruderi disi. Yu mus fu wini, bika mi no abi so furu moni moro fu pai mi wrokoman. Nowan fu den man sabi ete taki mi o seri mi boto te mi doro na wi kondre baka. Boiti dati den man fu mi e kon owru èn den wani tan nanga den frow now. So efu yu gwe now nanga kapten Milton dan yu sabi taki yu abi wan dei brede gi tamara. So bigin fu now mi e taki yu adyosi."Kapten brasa Norman dan a gi en tin gowtu moni. Norman ai ben lon watra, ma a taki: "Kapten, mi sa du san yu taigi mi!"
Norman figi en ai dan a go teki en bondru, dan en nanga kapten Gerrit waka go na kapten Milton. Kapten Gerrit taigi en taki ai teki a kruderi. Dan kapten Gerrit kari ala den man kon dan a taigi den taki: "Norman o hori wan strei nanga tra matrosi fu wan legreboto. Dan efu a wini, a no drai kon moro."
Ala den man ben bigin sari, den brasa Norman ori. Den seki en anu dan ini wan fu den ben gi en wan kado. Norman poti den na ini en bondru.
Nanga sari ini en ati a taki den mati fu en odi dan a gwe nanga kapten Gerrit èn kapten Milton na a legre boto. Tin man ben de ini a strei.
Den mati fu Norman ben tnapu luku tapu den boto fa Norman bo du a strei. Fa kapten Milton bro tapu en froiti, na so den man bigin kren. A strei ben de wan hebi strei bika a winti ben wai tranga. Ma nanga bun furu muiti dan toku Norman kon wini a strei. Kapten Gerrit seki Norman anu, a taki: "Yu ben de a moro bun matrosi san mi ben abi. Ma meki alasani waka bun gi yu. Un sa miti wan dei baka."
Kapten Milton gi Kapten Gerrit den hondru gowtumoni. Kapten Gerrit taki en odi dan a gwe. Baka wan tu yuru dan kapten Gerrit gwe libi a lanpe fu go na en eigi kondre. Norman ben sari ma a no ben man du tra fasi.
A wroko san a ben du tapu a srudati boto ben moro hebi. Ala sani ben go nanga yuru èn ala sani ben du na tapu a yoisti fasi. Ma tapu a boto disi yu ben abi wan loityi di ben abi wan bigi denki fu ensrefi. Bika en p'pa ben de wan bigiman ini a kondre. Sofasi nowan sma ben kan du en wan sani. A no ben wani taki wan tra sma ben taigi en san a mus du. Èn a ben grofu tu. Nowan man tapu a boto ben lobi en. Soso Norman wawan ben abi pikinso pasensi nanga en.
Wan neti di den ben de tapu se, dan a loityi ben go teki pikin winti na tapusei fu na boto. A heri presi ben tiri. Norman ben didon tapu en baka mindri wan tu seiri-saka e luku go na loktu. Baka wan syatu ten dan a loityi ben waka kon tuka nanga Norman. A taki: "San yu e du dya? Yu no mus de na ondrosei ini yu kamra e sribi?"
Norman taki: "Mi e waran tumsi èn mi no man sribi, dat meki mi kon didon dya."
Loityi skopu Norman na en futu, dan a taki nanga wan krasi sten: "Mi no wani yu tan dya. Yu mu go wanten na gron."
Norman lafu. A taki: "Loityi, yu bigi moro mi. Mi e lespeki yu nanga ala sakafasi. Ma yu no kan skopu mi na mi futu. Efu yu e atibron nanga yu srefi, yu no kan puru en tapu mi. Mi a no wan dagu di yu kan skopu oten yu wani."
Loityi now piri en ai. A taki: "Yu no de bun na yu ede boi. Na san mi taki tapu a boto dya, na dati yu mu du!"
Norman taki: "We, fu di yu abi makti tapu a boto dya, mi sa du san yu taki." Dan Norman saka go na gron.
Norman ben didon e prakseri san a loityi ben du nanga en dan a bigin luku den kado san a ben kisi fu den mati fu en. Baka wan afu yuru so dan a loityi waka kon ini a kamra pe Norman e sribi. A waka langalanga go na Norman bedi, dan a trowe ala den sani san ben de tapu a bedi kon na gron. Norman no piki en noti, a go piki den sani fu en na gron.
A matrosi san ben sribi ini a sem kamra dati no ben de ini a kamra na a ten di a loityi ben kon na inisei. Di a kon ini a kamra dan loityi aksi en: "Hè, pe yu ben de? Bika na a yuru disi ala man mus de na ini en bedi!"
A matrosi piki: "Mi ben go pisye."
Fa a kba taki so dan wante a loityi sibi en wan klap ini en fesi. A boi skreki. Loityi taki: "Yu e lei. Tamara mamanten aiti yuru mi wani si un tu na ini kapten kamra!"
A boi tnapu e luku a loityi. Loityi naki en wan klap baka. Dan a taki: "A bun. Dan tamara te yu e kon na kapten kamra dan yu e tyari mi tu blaka susu kon gi mi èn den mus brenki!"
Dan loityi waka gwe. A matrosi go sidon tapu en bedi e krei. A teki wan dolku ondro en kunsu dan a opo a doro fu go sutu a loityi. Fa a waka gwe dan Norman grabu en ori. A taki: "Mati, no du. Libi a man meki a waka bun!" Ma a matrosi bigin feti nanga Norman fu lusu en. Norman ori en mati anu pe a dolku ben de. Norman ben korkori en, ma a ben wani nomonomo fu go sutu a loityi.
Dan baka wan pisten dan loityi nanga kapten Milton lon kon nanga wan tu tra man san ben yere stampu ini a kamra. Ma fu Norman en onkoloku a dolku ben kon de na ini en anu. Den man puru den. Dan kapten teki a dolku ini Norman anu. Dan a loityi taki: "Mi sabi san den man disi ben wani du. Den ben wani kon kiri mi! Ma den lei. Mi skin den no man kon!"
Dan kapten Milton taki: "Norman, na dati yu ben wani du?"
Norman piki: "Nono!"
Dan a loityi taki leti ini Norman fesi taki: "Kapten, a man disi e lei! Mi sabi taki ai luru mi langaten kba. A ben de na tapusei e didon. Di mi seni en kon na gron en ati bron. En na a moro don man. En na wan pikin boi. A lesi. A bigi dan a don. A mus syen dati a de tapu so wan boto." Dan loityi taigi Norman taki: "Yu e du taki yu sabi ala sani, ma mi e taigi yu taki yu no sabi noti. Wan figifutu hei moro yu!"
Ala den man ben luku so ferwondru. Norman ai pusu kon na doro. En ai ben redi. A loityi ben lafu te na ini en fesi. Norman ai bigin lon watra. Kapten Milton hori en anu. A taki: "Norman, piki mi efu a tru taki un ben wani kiri a loityi?"
Norman e tnapu e luku a loityi tranga ini en ai. A no ben man taki. A ben suku fu taki ma a no ben man. Kapten Milton go taki safri ini en yesi taki: "Norman, taki. San psa? Mi o sorgu taki den no du noti nanga yu!"
A loityi ben tan e lafu Norman ini en fesi ete. Norman ben kuku fu atibron. A no ben taki noti. A loityi taki: "Kapten, te un doro na syoro, dan Norman no e kon tapu a boto disi moro. Un no kan wroko nanga man-nengre di bigi dan den don! Tamara un sa ori wan krutu, dan a pikin boi disi sa si omeni makti mi abi tapu a boto dya!"
Dan a loityi ben lafu Norman go doro ini en fesi. Dan Norman bondru ala en krakti kon na wan. A naki a loityi wan kofu na en seifesi, dati a loityi fadon flaw. Baka fo dei a loityi kisi ensrefi. A skreki di a kon sabi san ben psa nanga en. A kari wan krutu kon, dan a taki: "A matrosi Norman den mu hanga en nownowde, bika a naki wan ofisiri di lanti ben poti na en tapu. A gi a kondre syen. Dati meki mi e taki tak a mus anga tidetide! Bika ini lantibuku a skrifi tu taki te wan matrosi naki wan ofisiri, a man dati mus kisi hebi strafu."
Kapten Milton no ben kan du tra fasi, bika san lantibuku taki na dati musu psa. Dan a meki tu srudati go teki Norman. A loityi ben seti ala den papiri na fesi kba taki den anga Norman tapu sowan dei dan a meki kapten Milton naki wan stampu ondro a papira.
Den srudati go teki Norman tyari en go na tetei. Dan fosi den bo anga Norman dan kapten aksi en efu a no abi wan sani fu taki ete. Norman taki: "Tide mi e prisiri. Mi no e frede. Ma, mi mati, mi e libi unu. Un de bun gi unsrefi. Mi yuru kisi kba fu gwe. Ma loityi, mi ati no e bron nanga yu. Ma wan sani mi wani taigi yu, taki yu mus kenki yu maniri nanga yu prakseri. Dan yu o abi prisiri na ini yu libi!"
Baka den wortu disi dan den man anga Norman. Kapten lon go ini en kamra na ondrosei. A no ben man tnapu e luku fa Norman e anga na a tetei. Den tra matrosi ben krei, bika den ben sabi taki Norman ben de wan bun man nanga wan tranga wrokoman.
No langa na baka den man bigin yere kanun e sutu. Fosi den man ben kan go meki densrefi klari fu feti, wan feyantiboto sutu a heri boto fu den panya. No wan man ben tan abra. Soso kapten Milton ben feni okasi fu lowe. Fa dati du psa mi no sabi. Ma na en ben ferteri a tori disi.