A Tori fu a Gudu Frow

Wan frow ben de. A ben hipsi, a ben moi èn a ben abi moni. Dati meki a ben abi bigimemre. A frow disi ben abi bigimemre dati te a ben waka na strati, a ben kari en gari gi ala sma. A no ben taki no wan sma odi. A no ben wani dati sma ben musu psa krosbei fu en.
A uma disi ben abi sma san ben wroko gi en, soleki krin en dyari, krin en oso nanga tra tra wroko. Ma a no ben wani srefsrefi dati den sma disi ben musu nyan na ini en kukru. Na baka gadri den ben musu nyan, bikasi a misi ben firi ensrefi tumsi hei fu den sma dati ben musu nyan na ini en kukru. Na so a uma disi ben libi.
Ma baka wan pisten, ten kon drai. A uma disi kon siki wan tranga siki. Ma soso fa a no ben wani abi sma fanowdu, meki esesi a go didon na at'oso. Ma a ben fergiti taki te wan sma didon na at'oso, a abi sma fanowdu, bikasi datra nanga zuster na libisma. Dan toku wi e si taki a uma disi ben abi sma fanowdu.
We, te wan sma de na at'oso, solanga a no kon betre den datra no e seni en go na oso. Ma, a misi disi no ben betre ete, dan a komoto fu at'oso. A komoto fu at'oso bikasi a no ben wani a yepi fu den sma na at'oso moro langa. Dati meki a ben kon siki moro hebi, dati nanga furu muiti a ben kan opo fu en bedi.
Doro a siki disi a ben pai furu moni na at'oso. Èn a no ben man du den wroko fu en moro. Dan so a no ben abi moni moro fu pai wrokoman noso fu bai nyanyan. Dan a bigin pina. Dat meki a ben abi fu go ferferi trawan. A bigin na den pikin nengre. A bigin kari den fu go na wenkri gi en.
Te nanga langa a ben abi fu aksi den bigisma, bikasi den pikin-nengre no ben man yepi en nanga ala sani. So a bigimemre fu en kon broko. Den sma kon taigi en san den ben prakseri fu en. Dan baka di den ben lekti den ati, dan den kon de bun nanga en. So meki a uma disi ben kon saka en skafu. A no ben abi bigimemre moro, bikasi den sma ben kon sori en taki bigimemre wani ondrow.
Fu taki leti, bigimemre na wan sani san wan sma no musu abi, bikasi yu no man ondrow en. Efu yu wani ondrow en, dan yu no musu abi no wan sma fanowdu. Èn dati no kan na tapu a grontapu disi. Gado meki wi fu de nanga makandra, yepi makandra, lobi makandra. Na so, efu yu abi bigimemre, dan yu no man gi trawan lobi. Ma, dan yu no musu fergiti dati yu abi trawan fanowdu. Gado meki wi alamala fu libi nanga makandra leki fa Gado wani.

A Tori fu a Gudu Man

Yu ben abi wan guduman nanga wan potiman. A potiman ben wroko gi a guduman. A guduman disi ben abi moro bigimemre moro leki a uma ini a fosi tori. A ben weri wan linga na ala finga fu en. Dati meki den ben kari en "Goldfinger." Ooktu a ben weri furu keti na en neki. Dan a ben waka nanga wan tas nanga ala sani na ini soleki: kan, preti, spun, nanga someni tra sani. A ben waka nanga ala den sani disi, bikasi efu a ben musu nyan noso dringi wan sani na strati, dan a ben kebroiki en eigi sani. Bikasi a ben firi ensrefi so hei, dati a no ben wani kebroiki no wan sani makandra nanga trawan.
Na so a ben de taki a guduman ben waka nanga a potiman, bikasi a potiman ben musu syow en tas. Dan te a potiman ben waka nanga en, dan a potiman ben musu waka dri meter fara fu en. Efu a potiman ben lasi ensrefi wan leisi, taki a waka krosbei fu en, dan a guduman ben bari en taki: "Mi no taigi yu taki yu musu waka dri meter fara fu mi? Yu yere mi?"
Dan a potiman ben piki en taki: "Iya, mi kownu." A potiman ben musu piki en so, bikasi na so wan fasi a ben kon na en dei brede.
We so, a guduman ben firi ensrefi so hei dati a ben wani dati ala sma ben musu dini en. A ben feni a potiman fu du dati, bikasi a potiman
ben abi moni fanowdu fu tan na libi. Na so, te den ben waka na strati, a guduman ben hei en borsu.
We, dan wan dei na waka den ben waka, dan a guduman ben hei en borsu baka. A yagi a potiman, a aksi en efu a no sabi taki a musu waka dri meter fara fu en.
Di den waka wan pisi, a potiman si wan sani na tapu a pasi. A ben de wan dede ede. Dan a potiman taki: "San yu e du dyaso, yu dede ede? San yu e du na tapu a dan pe libisma musu waka?"
Dan now, a guduman yere taki a potiman e taki nanga wan sani. Dan a drai go krosbei fu a potiman, dan a si taki a potiman e taki nanga wan dede ede. Dan a bigin arki san a potiman e taigi a dede ede. Dan di a potiman si taki a guduman kon moro krosbei fu en, dan a bigin taki: "Hai, yu dede ede! Wan dei yu ben de leki mi nanga a man disi. Ma tide, luku fa yu kon tan. Na so, ala sma sa kon tan wan dei. Efu yu gudu noso poti, hei noso lagi, moi noso takru, koni noso don. Wansi fa yu de, wansi sortu sma na yu, wansi san na yu, ala sma e kon tan so wan dei."
Dan di a guduman yere san a potiman e taigi a dede ede, dan a bigin waka go moro krosbei fu a potiman. A waka, a waka, te a doro krosbei fu a potiman. Dan di a doro krosbei fu a potiman, dan a aksi en taki: "San na disi?"
A potiman piki en: "Yu n'e si dati na wan dede ede?"
Dan a potiman taigi en taki: "We, yere. Yu si a dede ede disi? Unu no sabi srefsrefi suma na en. Yu no man si na a dede ede efu a ben gudu, efu a ben koni, efu a ben don, efu a ben pina, efu a ben hei, efu a ben lagi, efu a ben siki, efu a ben gesontu. Yu no man si dati na a ede. Na so wi alamala, te wi dede, wansi fa wi tan, wansi fa wi de, wan dei wi sa kon tan leki a dede ede disi."
O moro a potiman saka tori gi a guduman, o moro a guduman go krosbei fu a potiman. Dan di a potiman taki wan pisi, dan a guduman bigin taki: "Oooo, na so wi e go tan, no? Tye!" Te nanga langa a guduman bigin ori a potiman. Te nanga langa a guduman brasa a potiman ori na en anu. Na so den bigin waka gwe. Dan di den waka gwe, a guduman taigi a potiman taki: "We, mi brada, meki mi taigi yu wan sani. Fu kon teki now yu a no potiman moro. Mi nanga yu na wan. Wi sa nyan na wan tafra èn wi sa kebroiki preti nanga ala sani makandra. Guduwan nanga poti wan no sa de moro èn mi e taki yu grantangi fu di yu brokobroko a tori gi mi. Na so yu broko a bigimemre fu mi. Bikasi bigimemre wani ondrow."
So wi e si taki, a no bun fu abi bigimemre.

Sweri

A no de wan bun sani fu sweri. Sweri de wan kefalèk sani. Bijbelbuku e warskow unu fu a sani dati. Wan sma di lobi sweri musu luku bun.


A ben de so taki wan gudu uma ben de. A ben gudu dati a no ben sabi san a ben musu du nanga ala a moni fu en. Fu di a ben gudu so, meki a ben abi bigimemre. A ben gudu dati, son tron a no ben sabi san a ben musu nyan. Guduwan ben lobi fu go luku en. Dan te den ben go luku en, a ben du ala sortu sani nanga en moni, fu den ben kan si fa a gudu. Ooktu a ben gi den moni.
Ma gi den potiwan, a no ben abi ten. Den dati a no ben gi noti, bikasi den dati ben de potisma. Dat meki a no ben feni en fanowdu fu den ben si taki a gudu.
Dan so, a uma disi ben rigeri nanga moni, ben fringi nanga gowtu, nanga ala sortu sani. Efu yu ben go na ini en oso, yu ben kan si wan lo pisi pisi gowtu. Espresi a ben du dati, fu te wan sma ben kon na en oso, a sma dati ben kan si taki a gudu.
We, bikasi a ben abi den maniri dati, meki a ben taki bigitaki èn a ben lobi sweri. Wan dei, den wrokoman fu en ben kba koti padi. Dan wan poti uma go begi en pikinso. A potisma ben prakseri taki a ben sa fon a padi, dan a ben sa feni pikinso aleisi. Ma a gudumisi piki en taki: "Nono. Mi e trowe en na ini wan gotro, prefu mi gi yu en." Na so, a trowe a padi na ini wan gotro, prefu a gi a potisma.
Ma dan baka wan pisten, a padi san a ben trowe, bigin gro. Dan den potisma ben koti en, dan den ben prani en baka, te leki a ben kon nofo. Dan so den ben kon feni en fu nyan. Ma a ben gersi leki o moro den ben nyan fu en, o moro a ben gro.
We, na so a uma disi ben rigeri nanga moni. Heri dei a ben taki bigitaki èn furu tron a ben meki sweri. Te yu si wan dei a ben de na libakanti, bikasi a ben lobi fu go na libakanti. Drape wan lo gudu sma leki en ben de. Dan di a ben de na libakanti, a teki wan fu den gowtu linga san a ben weri na en finga, dan a ori a linga na loktu fu ala sma ben kan si a linga. Dan a bigin taki: "We luku, mi gudu dati mi no sabi san mi musu du moro. Fu tru, mi no sabi san mi musu du. Ma yu si a linga disi? Mi o trowe en na ini a liba. Dan a dei te a linga disi drai kon baka na mi oso, mi musu pina moro ala sma di de." Dan nanga a wortu dati, a trowe a linga na ini a liba. A linga fadon so: "Tyubun".
A frow kaka en borsu, a drai gwe. Ma, a sani san a ben taki tak' "Efu a linga kon baka, mi musu pina moro ala sma di de" na wan sweri a ben meki. A sori ala sma san a kan du. Na so a sani kon tan.
We so, a ben libi en gudu libi go moro fara. Dan wan dei, a ben de na oso, dan wan man ben psa di ben seri gronnyan soleki kasaba, patata,
nyamsi, napi, nanga ala den tra sani. A uma bai. Baka dati wan trawan kon psa nanga tomati, supuwiri, meti nanga ala sortu tra sani. A go bai. A ben abi moni, dati meki a ben bai fermorsu fasi.
Ma di a bo go na inisei, dan a yere: "Fisi, fisi, moi fisi." Dan a kari a man, dan a bai dri bigi fisi. Baka dati a go krin den fisi. Di a priti a wan fu den fisi bere opo, a si wan gowtu sani. Di a luku moro bun, a si taki na a linga di a ben trowe na ini a liba a dei di a ben meki a sweri taki: "A dei te a linga disi drai kon baka na mi oso, mi musu pina moro ala sma di de."
Di a si taki na a linga dati, a hori a fisi, a no ben man taki. Soso seki a ben seki en ede. Watra lon na en ai, bikasi a ben sweri èn a ben waka soleki fa a ben taki. Dati wani taki, a uma disi ben ferstan
taki a o pina moro ala sma. Na so a teki a linga, ma a no kebroiki en. A trowe a linga na ini a howpu taki san a ben taki, ben sa drai. Ma dati no ben psa èn a ben sabi taki a no bo psa.
Dat meki den fisi no ben switi gi en. No wan fu den sani di a ben bai ben switi gi en, bikasi a ben sabi san ben wakti en.
A misi bigin pina. A bigin lasi furu sani. Furu fu den sani fu en bigin seri. Dan en watra kon tapu. Den koti en faya. Den koti en telefon. Te nanga langa den dyari fu en kon seri. Ala den oso fu en nanga den pis'pisi gowtu kon seri, meki a kon poti. A frow kon poti dati den begiman srefi, san noiti a ben gi wan sani, ben gi en nyanyan.
A heri pina di a frow kon pina now, kon doro en eigi fowtu fu sweri so wan bigimemre sweri. A ben de so srefi taki te angri ben kiri en, den potisma san a no ben gi padi, na den ben gi en pikinso fu a srefi padi di a ben trowe.
So wi e si taki a no bun fu abi bigimemre, bikasi yu no man ondrow en. Èn bigimemre wani ondrow.