Disi, arkiman, na a tori fu a kondre di den ben kari No-Meri-Mi Kondre. A ben de so. Wan neti di den srafu de
ini den kampu, den yere farawe dron e naki. Wan mansrafu di no ben kan sribi, yere dron e naki. A fruwondru. A
wani sabi pe a dron de, suma e naki a dron, sanede a dron e naki. Bika te dron e naki, dati wani taki na wan boskopu.
Ma a dron disi e naki wan tra fasi. A no boskopu. Na wan tra sani di a srafu no e ferstan.
A srafu teki en owru, a go na dorosei. A pranasi tiri. A pranasi dungru. Ma pe a kriki de, a srafu si wan bigi
udufaya e leti. A si someni srafu sidon lontu na udufaya. A mindri den srafu ben sidon Papa Fresi, wan owru srafu
fu vijfentachtig yari. A tan soleki wan sma taigi a srafu: "Go. Go a mindri den tra srafu. Go yere san den
e taki."
Di a srafu go a mindri den trawan, wan e ferteri fu No-Meri-Mi Kondre. Ma ibri tron te a srafu taki No-Meri-Mi
Kondre, ala srafu di lontu na udufaya e taki safri tu: "No-Meri-Mi Kondre, No-Meri-Mi Kondre." A tan
soleki den frede fu taki No-Meri-Mi Kondre. Den srafu e luku makandra, dan fosi den e taki: "No-Meri-Mi Kondre,
No-Meri-Mi Kondre".
Soleki den e ferteri, no wan sma kan taki wan leti fasi pe No-Meri-Mi Kondre ben de. Den e taki dati No-Meri-Mi
Kondre a wan kondre pe sma di go ini a kondre no e drai baka. A kondre abi sani di e gi frede. A kondre abi trefu;
a kondre abi kunu.
A tan soleki wan sten e taigi a srafu: "Sidon a mindri den tra srafu, go arki san den taki." Di a srafu
de a mindri den tra srafu, a sidon na sei a udufaya. A no sidon langa, a yere ibri srafu e taki wan sani san a
no e ferstan. Papa Fresi sidon a mindri den srafu soleki wan bigi bigi edeman. A e arki san den srafu e taki. Te
wan srafu taki a e luku Papa Fresi.
Di ala den srafu taki sani di a wan srafu no e ferstan, Papa Fresi opo en anu na loktu. Ala srafu tiri. Alamala
e luku ini a udufaya. A tan soleki den srafu e frigiti fu bro, den de ini wan span. A tan soleki den ben frede
wan sani di den no e si. Den frede so wan fasi alamala e dribi sidon moro krosbei makandra. Maskita e sutu den.
Den no dorfu naki den maskita kiri.
Te wan srafu si na udufaya e go dede, a e teki wan pisi udu trowe ini a faya. A tan soleki a span di ben de e broko.
Den srafu e taki go doro. Ma a wan srafu ben de a enkri srafu di no ben e taki. A no kan taki bika a no sabi san
den ben e taki. Di a aksi Papa Fresi efu a sabi pe No-Meri-Mi Kondre de, Papa Fresi drai en ede safrisafri, a luku
en ini en fesi. Ala srafu bigin taki safrisafri: "No-Meri-Mi Kondre, No-Meri-Mi Kondre, No-Meri-Mi Kondre."
A tan soleki den srafu e warskow makandra no kari, no taki: "No-Meri-Mi Kondre."
Ini a busi den srafu yere apintidron e naki. A srafu di ben wani poti udu ini a faya tan nanga na pisi udu ini
en anu. A pisi udu fadon sondro a srafu sabi. No wan srafu di sidon lontu na udufaya e seki, e taki. Alamala frede.
Farawe tigri e bari. Babun e bari. Krosbei freimusu e frei. Keskesi e bari krosbei a tapu den bon.
Papa Fresi seti en kamisa, a sidon, a taki: "Mi sabi pe No-Meri-Mi Kondre de. Un arki.
Di mi ben kan abi twintig of vijfentwintig yari, mi ben libi ini wan moi èn bigi kondre farawe fu Sranan.
A kondre na Afrika, mi mama nanga papa kondre. Wan dei someni weti sma nanga gon ben kon ini a kondre. Den weti
sma kiri ala bigisma ini a kondre. Den di den no kiri, uma nanga man nanga pikinnengre, den teki tya gwe. Un waka
bun langa. Un go ini wan bigi sipi. Un doro ini Sranan. Un prati pasi. Mi mama, papa, brada nanga sisa mi no si
noiti noiti moro.
Mi nanga someni trawan go wroko ini wan pranasi. Srafu e lowe go tan ini busi. Den bakra driktoro di ben wani den
srafu baka, seni suku. Di den srafu sabi srudati de na den baka, den go kibri wan presi pe no wan enkri bakra kan
go, pe ala lowe srafu e tan. Den lowe srafu seti wan kondre di den kari No-Meri-Mi Kondre.
Wan neti ala srafu fu a pranasi pe mi ben de, lowe go ini busi. A bongrobita driktoro nanga en skrifiman meki klari
fu go a baka den srafu. Driktoro teki den dri srafu di no ben gwe nanga den trawan. Wan fu den srafu di no ben
gwe nanga den trawan na mi, bika mi ben wroko ini a oso fu driktoro. Mi no ben abi okasi fu gwe. Skrifiman ben
de tu, so dati un ben de anga feifi: tu bakra, dri nengre.
Wan wiki un waka a den lowe srafu baka. Wi e si den lowe srafu marki, ma den srafu srefi un no e si. A tweede wiki
driktoro ben wani drai baka, ma un lasi a bun pasi. Un verdwaal ini a busi. A heri dei un waka. Un denki un ben
feni a bun pasi. Di neti tapu un ben sabi un de na a srefi presi pe un ben de mamanten.
Den tu bigi dagu di driktoro ben tyari nanga en fu yepi suku den lowe srafu, aboma teki wan, kaiman nyan wan. Di
a son go na ondro tinafeifi tron un no ben kan moro. Wi e go dede ini a busi. Tu dei a baka di un sabi un lasi
ini a busi no wan sma e taki moro. Un srafu ben e waka a baka. Te wi e taki safri, driktoro yere wi e taki, a e
bari unu fu tan tiri.
Driktoro wani kapu wan busititei di de na en pasi. Driktoro no kapu, a e arki. Skrifiman luku driktoro, driktoro
luku skrifiman. Un srafu di tyari bagasi fu driktoro nanga skrifiman, poti san un tya a gron. Un tu e arki. Farawe
un yere dron e naki. A moro owru srafu taki frede fasi: 'Brada, a dron di e naki na dededron fu No-Meri-Mi Kondre.'
Driktoro kon pe un srafu de, a taki: 'San na a didibri sani di e naki ini a busi?'
A owru srafu taki: 'Masra, un de now ini No-Meri-Mi Kondre. Na a dededron wi e yere.'
Skrifiman go na sei driktoro. Den tu bigin beifi. Now den yere a dron e naki moro krosbei, moro moro moro tranga.
Driktoro bari: 'Un drai baka! Un drai baka! Den didibri e kon. Un drai baka!'
Un bigin lon ini a busi. Now ala sei pe wi e lon go wi e yere dron e naki. Un lon, un fadon, un opo. Un koti swampu
abra. Un no prakseri kaiman ini den swampu. Un no prakseri den takru blaka sneki ini a swampu. Wi e lon nomo nomo
nomo. Driktoro no gwenti fatigeri. A no ben kan lon moro. A fadon. A no ben kan opo. Driktoro no ben abi bro moro.
Den dron tapu naki.
Den dron bigin naki baka. Now, ala sei ini a busi -- baka, fesi, rechts, links -- ala sei a heri dei dron naki.
Heri dei wi e lon ini a busi. Pe wi e lon go un srefi no sabi. Di neti tapu den dron ben naki wan presi. Neti skrifiman
ori wakti. Driktoro didon na soso gron ondro wan bon. Skrifiman weri, a no kan ori wakti. Skrifiman sribi, driktoro
sribi.
A tra mamanten driktoro wiki fruku. Driktoro bari: "Un srafu opo! Skrifiman no de!" A korku-ati fu skrifiman
didon a gron. Ten fu prakseri pe skrifiman go no ben de bika den dron e naki baka. Now atibron fasi: moro esi,
moro tranga. Driktoro nanga un dri srafu e lon ini a busi. A neti di pasa No-Meri-Mi Kondre teki skrifiman.
Now No-Meri-Mi Kondre e go teki driktoro, a man di te a drungu e skopu, e wipi den srafu. A dei a baka di skrifiman
verdwijn spoorloos ben de a moro takru dei gi driktoro. Neti tapu. Driktoro sidon a sei a udufaya nanga en ede
ini en anu. Neti driktoro no meki faya. Un dri srafu no ben frede bika un leri fu no frede No-Meri-Mi Kondre. Ma
di un de na un masra fesi, un srafu frede.
Driktoro sidon, a no kan sribi. A opo, a bigin waka e luku a mindri den bon, e sori kofu ala sei pe a yere dron
e naki. Heri neti dron naki. A tra mamanten driktoro no de. Suku, suku. Kari, kari. Driktoro no de. No-Meri-Mi
Kondre teki driktoro, a tweede bakra, a man di e mishandel srafu dei nanga neti.
Tu dei pasa di No-Meri-Mi Kondre nengre teki driktoro. Di mi wiki a tra mamanten, mi tai anu nanga futu. Den poti
duku ini mi mofo. Wan duku tapu mi ai. A tapoe wan draagbaar den tjari mi. Soleki a sori den waka feifi dei. A
zesde dei den lusu a duku. Di dei opo mi si mi ben de ini a birti fu a pranasi pe mi e tan. Den tu srafu, noiti
noiti moro mi sabi san pasa nanga den."
Papa Fresi ferteri a tori so wan fasi, a udufaya dede, den no sabi. Den no ben kan firi den maskita di e sutu den.
A ben lati di Papa Fresi nanga den tra srafu go ini den kampu. Di Papa Fresi go ini en amaka, a prakseri a fasi
di No-Meri-Mi Kondre teki driktoro nanga skrifiman.
Arkiman, a stotu te dya. Tan bun ala sei.