Fa Anansi Puru Monki na Nowtu

A anansitori disi e leri un fa un mu libi nanga makandra. A sani ben psa so. Yu sabi taki Tigri na wan bigi meti. Anansi na wan pikin meti. Monki na wan pikin meti tu. Ma yu sabi taki Monki kan meki bigi trobi kon, nanga aladi a no bigi.
Wan dei di den bus'meti ben sidon e taki tori, Monki taki: "A boi Tigri, ach, mi no wani yere noti fu en. A e skepi leki san. Tigri no warti neks. A bigi fu soso. Mi dati no frede fu Tigri, yèrè. Efu Tigri opo en bigi mofo leki a e go swari yu, yu sa frede. Ma no mi. Monki no! Mi e dyompo na Tigri baka lek' neks. Mi e rei en lek' fa mi wani."
Ma so leki fa a de na mindri libisma, so a de nanga den meti tu. Konkru de ala ten na ala sei. Wantu meti go ferteri Tigri san Monki taki, dati a e go rei Tigri.
Tigri ati bron, a bigin bari nanga en bigi stem: "Grrrrrrrrr! Na so Monki taki? A bun, mi o sori en. A kba fu libi. A no sa tan moro na ini a busi disi. No wan enkri monki no e tan moro na ini a busi. Mi sa kiri den alamala." Ma fa? Tigri go na en mati Anansi, go teki rai.
Anansi taki: "We, mi mati, yere. Yu sabi pe yu mu go? Mi no kan gi rai so bun. Yu mu go na Konkoni. A no langa di Konkoni kmopo na wan bun hei skoro, di den kari Universiteit. A kisi wan bun bigi papira. A abi a moro hei punt fu afkati. Konkoni tron afkati. A koni sref'srefi. Na en yu mu go. A o taigi yu san yu mu du. Ma, yu mu pai en wan pikin moni, bika yu sabi taki yu no kan kisi afkati wroko fu soso."
So Tigri go. A waka, a waka, a waka te a feni Konkoni. A ferteri en a tori. Konkoni taki: "We yere mi rai. Yu mu gi wan bun bigi fesa. Nyanyan nanga dringi mu de fu naki dagu. A mu furu. Yu mu kari ala meti. Seni karta go kari den taki Tigri e gi wan fesa. Alamala mu kon na a fesa. Dansi sa de tu, nanga moi poku.
Yu sabi sortu band yu mu yuru fu prei moi switi poku? A band fu Anansi. Ini a band fu Anansi yu abi Doksi, yu abi Kwakwa, yu abi Todo. Yu abi Fowru tu, nanga wantu trawan moro so leki Buriki. Efu den man dati kon, yu no abi fu lasi ati. So moi no de. Dan Anansi dati e naki a dron. Anansi na dronman.
A poku switi sref'srefi. Te a kon faya, dan yu waka saf'safri go na sodro. Yu e sroto a doro, ma a fensre dati mu tan opo, noso a o waran tumsi. Dan yu e opo na loiki na sodro. Drape yu e go si fa Monki lobi dansi! Te Monki e poko na ondro a loiki, dan a ten doro. Dan yu e dyompo, yu e grabu en. A no kan go no wan enkri presi."
Tigri taki: "Ai, dati na wan bun rai. Mi sa du lek' fa yu taki."
Tigri seni kari ala meti: sowan dei, sowan dei, bigi fesa o de. No wan sma mu tan na oso. Tigri taki: "Monki taigi unu taki mi, Tigri, mi na bigi fu soso! Mi kari en tu, meki mi kan dansi nanga en. Mi e go opo a dansi nanga en."
We a sani waka so tu. Di ala den meti kon, dan a band prei wan wals:
San y'e luku mi. San y'e waki mi.
M'ya no paarderij. M'ya no payasiman.
San y'e luku mi. San y'e waki mi.
M'ya no paarderij payasiman.
Ai! Den sma e swing, so wan moi wals. A baka dati wantu moi stuk prei ete.
Ma di a kon lati, den man drai anu. A poku kon faya, a kon hot. Den naki kawna now. Anansi e naki a dron dati en skin e lon watra.
Anansi bigin singi:

Monki luk' a sodro luk' a gron monki (2x)
Alwas' a doro sroto a fensre opo yu kan lon
Monki luk' a sodro luk' a gron mon -

Monki taki: "Dati wan lawlaw singi Anansi e singi, yèrè. Ma a singi gersi wan boskopu: Monki luku a sodro, luku a gron." A yuruten Monki opo en ai, a si Tigri na loiki. Tigri ben de so fu dyompo.
Monki taki: "Aaaaaa! Na dati Anansi ben wani taki nanga a singi. A taki a doro sroto ma a fensre opo, mi kan lon." Dan Monki lon psa a fensre.
Bri, bra, bru. Tigri naki ala dansiman na wan sei fu lon kisi Monki. Ma Monki ben de kba te na a moro hei taki fu a moro hei bon. Tigri no ben man kisi en, bika Tigri no man kren den sortu bon disi.
Dan Monki bigin dreigi: "Efu yu man, kren kon no!" Tigri no man.
Èn na so, te nanga a dei fu tide, Tigri nanga Monki na feyanti. Noiti noiti den sa kon bun baka. Te Monki si Tigri, a sa kren go na ini wan bon, bika Tigri wani kiri en.
Ma yu si Anansi ben de wan mati fu Monki. Dati meki a ben warskow en, a yepi puru en na nowtu. Na so a mus de nanga trutru mati.