Yu sabi taki Anansi na wan koni meti. Yu sabi san wani taki 'koni'. A srapu! Efu yu no luku bun nanga en, a
e kiri yu nanga koni.
We, a ben de so taki ala ten Anansi ben abi problema. Ma now Anansi ben e pina srefsrefi. A no ben abi not'noti
fu gi den pikin. En nanga Ma Akuba sidon prakseri sote di den ben kaw den laste pisi bana. "San mi sa go du
now fu feni wan sani fu yu nanga den pikin kan nyan?"
Akuba taki: "Yu mus go suku wan sensi. Yu abi someni mati. Go aksi den wan pikin moni."
Anansi taki: "Ai, ma te yu leni moni, yu mu gi baka." Anansi sidon. A prakseri, a prakseri, a prakseri.
A poti en anu na en ede. A prakseri sote. A taki: "Ai, Akuba, mi feni en. Mi feni en. Mi e kon nanga moni."
Akuba taki: "Pe yu o feni? Na bangi yu o go broko?"
A taki: "No, mi no o go fufuru. Mi no o go broko bangi. Ma mi o feni moni." Anansi gwe. Baka wan pis'ten,
Anansi kon nanga nofo moni.
Akuba taki: "Pe yu feni den moni disi? Suma gi yu moni? Suma?"
A taki: "No aksi, no aksi. A dya. Teki moni go bai nyanyan. Go na wowoyo. Go bai gruntu nanga tra sani. Te
yu kon yu sa yere a tori."
Di Akuba kon na oso, dan Anansi ferteri en san a du.
San Anansi du? Anansi go na en fosi mati, dati na Mati Kakalaka. A naki a doro: Ko ko ko ko ko. A taki: "Mati
Kakalaka, baya, yu mati de na bigi bigi bigi nowtu nownow. No wan koprosensi. Not'noti de ini a kasi. Not'noti
de ini a portmoni. Not'noti de ini a patu. Mi no sabi fa mi e go gi den pikin nyanyan. Libi mi nanga Akuba. Un
kan tai un bere, ma den pikin mu si den nyanyan."
Mati Kakalaka taki: "Ai, dati tru."
Anansi taki: "Yu mu suku wan pikin sensi gi mi."
Kakalaka taki: "Yere, mi kan leni yu a sensi. Ma sowan dei, sowan dei mi o kon teki mi moni. Ma a no te mi
kon yu o kon taigi mi taki yu no abi."
Anansi taki: "Nono. Mi e go bigin wroko, bika nownow ksaba e luku fu lepi. Dan mi e gwe go seri. Dan yu mu
kon sowan dei." Dan Kakalaka gi Anansi a moni.
Anansi kmopo na Kakalaka, ma a no go na oso. A dyompo go na Fowru. Ko ko ko ko ko! A taki: "Aaa. Dati mi sabi,
baya. Mati Fowru, yu e krabu? Y'e piki woron na ini santi?"
Fowru taki: "Anansi, san tyari yu kon dya? Someni langa mi no miti nanga yu."
A taki: "Ai, baya. Pikin nowtu. Ma di mi sabi taki yu na mi bigi mati, dan mi kon aksi taki meki yu gi mi
wan pikin moni fu mi bai wan sani, bori pikin papa gi den pikin. Wans' un no nyan, ma wan pikin papa gi den pikin."
Fowru taki: "Ai, dati mi sa musu. Efu a ben de fu yu, kande mi no ben sa gi, ma fu den pikin. Ala ten mi e
sari den pikin. Ma yere, no meki un kisi trobi. Bika te yu leni wan sma moni, furu tron yu nanga en e por' mati,
noso wi e tron feyanti."
Anansi taki: "No, kba ba. Dat' no kan!" A taki moro fara: "Yere, sowan dei yu kan kon, kon teki
a moni. Yu kan kon, meki mi luku, yu e kon afu tin mamanten."
Anansi ben taigi Kakalaka taki a mu kon neigi yuru. So a taigi Fowru taki a mu kon afu tin. Den taki wan pikin
tori, dan Anansi gwe.
Anansi gwe nanga a di fu tu saka moni. Di a kmopo dape, a taki: "Pe mi sa go now? Ai, mi o go na mi mati Awari.
Awari no de so wan bun mati fu mi. Ma mi sabi fa mi o kisi en."
A go na Awari. A ferteri Awari a srefi tori san a taigi Kakalaka nanga Fowru, fa den ben e pina. Awari kon gi
a sensi. Anansi gi Awari a yuru di a mu kon teki a moni, pikinso moro lati leki den trawan.
Baka dati a hari go moro fara. A weri sote, a sidon na sei a pasi e bro. A taki: "Ma mi e go na Ba Tigri tu.
Tigri abi furu moni. Tigri abi furu nyanyan."
A taki: "Ba Tigri, yere. Yu na wan bun mati fu mi. So so so e psa nownow nanga mi. Yu mus fu puru mi na nowtu."
Tigri taki: "Ai, m'e ferstan. Mi mus fu leni yu sensi. Ma no kon plei mi. No kon meki skorku streik nanga
mi."
Anansi taki: "Nono, Ba Tigri, mi sa sorgu fu mi pai yu baka. Wan enkri futu fu yu kan naki mi kiri. Nono nono,
yu kan kon teki yu moni baka."
A gi Tigri a yuru pikinso moro lati leki den trawan fu kon teki a moni. Dan baka dati, Anansi go na Ontiman.
Ontiman no ben kon tumsi langa na oso. A ben sutu wan konkoni èn a ben e koti a buba puru.
Anansi taki: "Baya, a betre yu gi mi wan pisi fu a konkoni, bika na angri de nanga wi now."
Ontiman taki: "No, a konkoni disi seri kba. Ma san yu wani?"
Anansi taki: "Mi kon suku wan pikin sensi na yu, bika angri e kiri den pikin. Un no man bai noti."
Ontiman taki: "A bun. Mi sa leni yu. Ma sowan dei sowan dei mi mu kisi en baka."
Ma yere fa a sani waka moro fara. Di a dei doro fu den mati mu kisi den moni baka, ala sma kan prakseri dati Anansi
no abi a moni. A fosi mati di kon suku en moni na Kakalaka. A naki na sei a oso: Ko ko ko ko ko. "Anansi,
yu no de na oso? Kon, kon, kon. Mi kon fu teki mi moni."
Anansi taki: "Mi de let' dya. Fa mi sa gwe, dan? Mi sabi taki mi mu pai yu. Kon na ini, man. Kon na ini. Mi
si fa yu e sweti. A son faya. Kon. Kon dringi wan pikin krontowatra."
Kakalaka taki: "Ai, dati switi. Kon mi dringi pikin krontowatra, baya."
Anansi taki: "Dan te yu sidon, yu bro, dan wi e go du zaak."
Ma di Kakalaka sidon e dringi a krontowatra, a si Fowru e kon. A taki: "Anansi, mi dede. Mi bigi feyanti e
kon. Kibri mi, kibri mi. Pe mi sa go? Pe mi sa go? Pe, pe, pe?" Kakalaka e lon ala sei. A no sabi pe fu go.
Anansi taki safri: "Kakalaka, go na ondro bedi. Ma tan pi, yèrè."
Kakalaka taki: "Ai, no taki mi dya."
Fowru kon: Ko ko ko ko ko ko ko. Fowru kon suku en moni. Na so Anansi plei a sani.
Anansi taki: "Mati, kon sidon. Fosi un taki a moni zaak, kon dringi wan pikin krontowatra."
Fowru taki: "Ai, bika a pasi langa èn a son krasi. Mi sa dringi tu mofo."
Anansi taki: "Dan mi abi wan switi sani gi yu. Luku ondro a bedi. Pikin lekkers dape gi yu."
Fowru opo, a taki: "Ai, mi feni wan stimofo." Haam, haam, haam. A swari Kakalaka. Kakalaka no de moro.
Ma di Fowru nyan Kakalaka, a figi en mofo na gron, a taki: "A no Awari e kon drape? Anansi, fa yu kan du mi
dati dan?"
Anansi taki: "San? San mi du? Sowan switi sani mi gi yu."
Fowru taki: "Luku suma e kon!"
Anansi taki: "Es'esi go na baka oso. Go na baka oso es'esi! Yu no mu meki no wan enkri 'Ko ko ko', yèrè.
Yu no mu meki noti."
Awari doro, a taki: "Anansi, mi kon fu teki mi moni."
Anansi taki: "Yu o kisi yu moni. Ma dringi pikinso krontowatra. Mi puru wantu watrakronto. Mi o go seri den,
ma mi o gi yu wan, meki yu dringi."
Awari taki: "Ai, ai. A switi, yèrè. A switi."
Anansi taki: "Fosi mi gi yu a moni, mi abi wan switi sani gi yu na baka oso. Waka safri."
Di awari go na baka oso, a si Fowru. A wan dyompo a dyompo, a grabu Fowru, a beti en na en neki. A dringi ala
Fowru brudu te a kba.
So, now Awari kon na ini fu suku en moni. A taki: "San? Yere!" KAM KAM KAM. "San e waka e kon so
hebi so?" A taki: "Fa fu du? Anansi, es'esi mi sa go na tapu sodro. Tigri! Tigri! Mi dede, mi dede. A
e go nyan mi leki noti."
Anansi taki: "Fa mi sa meki Tigri nyan yu dan? Yu puru mi na nowtu. Go na tapu a krontobon. No taki noti.
Ori yu mofo."
Tigri kon. Tigri taki: "Mi si wan krabasi nanga krontowatra. Ma a no sari mi. Gi mi ete wan. A krontowatra
switi, yèrè." Tigri dringi.
Anansi taki: "Efu yu wani moro yu mu kren na ini a bon fu piki den. Yu sa man kren?"
Tigri taki: "Ai, mi man kren."
A bigin go safri na ini a bon. Tigri bigin leki en mofo so: "Mmmmmm. A switi, baya! A gersi mi e dringi en
kba." Ma now a feni Awari. Awari lon saka kmopo na a bon, ma Tigri fanga en. Dan Tigri nyan en.
Tigri taki: "Ma luku san e go miti mi! Now mi nyan Awari, dan Ontiman e kon nanga gon! Fa mi e go bigin?"
Anansi taki: "Pe mi o poti yu dan, Tigri? Yu no de so bigi. Yu na wan pikin tigri. Ma yere. Kren go moro hei
na ini a bon. Meki den wiwiri tapu yu. Ma no go soktu. No go knoru, bika mi sabi yu nanga yu bigi sten. So no
go meki noti."
A yuru di Ontiman kon, Ontiman dringi en krontowatra. Dan Anansi taki: "Yu e sweti. Go wasi yu fesi na ini
a tobo watra na ondro a krontobon." Di Ontiman wani wasi en fesi, a si Tigri prenki na ini a watra. A teki
en gon, a sutu: "Bemmmmm!" Tigri fadon dede na gron.
Anansi bari: "Ontiman, san yu du nanga a tigri fu Kownu? Den o poti yu na dungru-oso."
Ontiman skreki. A taki: "Anansi, no taigi no wan sma. Mi e gwe safri. Yu no abi fu pai a moni."
Na so Anansi no pai no wan fu den paiman. Anansi abi tumsi streik. Yu musu abi streik, ma yu no musu abi streik
fu a kon dati yu no pai sma.
Anansi e du bun, ma a sani disi ben de wan tumsi takru streik fu Anansi. Ai, wan dei Anansi sa kisi en pai. Yu
no prakseri so tu?
Ala sma e go piki taki: "Iya!"
Ma mi taigi yu a tori fu yu no go du leki fa Anansi du.