Arkiman, disi na a tori fu a fosten pranasi Rustenburg aan de boven Cottica. Wan pranasi-driktoro ben go onti
ma a no drai baka a ten di a taigi en famiri. Di masra Nicol no de a ten di a ben taki, a famiri ferstan Nicol
lasi ini a busi. A tra dei famiri, srudati nanga skowtu go suku masra Nicol.
Den no feni masra Nicol, sodati a famiri ini a pranasi seni boskopu gi famiri ini a foto taki Nicol lasi ini busi.
Ma a baka dri yuru di boskopu seni go ini a foto, masra Nicol feni a bun pasi, a go na en oso. Famiri ini a pranasi
ben breiti. Di ala sma kisi densrefi, Papa Nicol ferteri san pasa nanga en ini a busi.
Papa Nicol taki: "San mi e go ferteri a tru. Ef' mi lei mi pikin finga e go tron gowtu." A taki: "A
baka dri dei di mi lasi a bun pasi ini a busi, mi no ben kan tnapu moro a tapu mi futu. Mi mofo, mi mofobuba drei
solek' korku, a e priti. Mi tongo, mi anu, futu sweri. Mi no ben kan opo mi ai. Mi ben firi solek' wan hebi de
a tapu mi skowru. Ibri stap mi kindi e beni. Mi e de fu fadon. Fo dei pasa sondro mi nyan of feni watra fu nati
mi neki. Mi sabi te mi tan ete wantu dei so wan fasi, m'e go lasi mi ferstan, m'e go law.
Te mi go ini wan tra pasi, mi denki mi ben go komoto, ma mi ben go moro, moro dipi ini a busi. Neti m'e waka nomonomo.
Mi no kan ferwakti m'e go si libisma of komoto ini a busi. Nono, mi mu waka èn ben e waka te mi si a mindri
den bon wan pikin udufaya e leti. Mi tan tnapu, bika mi no ben kan bribi san mi e si. Te a tru, pe faya de, libisma
de tu. Pe libisma de, nyanyan de tu nanga watra.
Di mi de krosbei a faya mi de prisiri fasi. Ma mi swaki so wan fasi, mi fadon. Di mi kisi misrefi wan owru moeder
sidon a sei a faya. Solek' a sori a no a moeder wawan de. Bika a moeder ben de a mi sei ma a ben luku solek' a
ben ferwakti wan sma. A moeder e arki. Mi ben yere drei taki broko ondro wan sma futu of meti.
Nanga safri sten mi taki: 'Watra, watra, watra.' A moeder teki wan tiki, a gwe. No langa di a gwe a moeder kon
baka nanga wan krabasi kronto merki. Sondro taki wan wortu a moeder gi mi, mi dringi. Bakaten a moeder gi mi bakakasaba
nanga bus'froktu sondro taki nanga mi.
A dungru kaba ini a busi. Di mi nyan, dringi mi firi tra fasi. Now fosi mi si a moeder fesi. Mi taki: 'Moeder,
mi e taki yu grantangi.'
A moeder luku mi langa sondro a taki nanga mi. A moeder aksi mi: 'Bakra, yu lasi ini a busi?' Mi seki mi ede bika
mi no ben kan taki. Mi inineki e ati mi. A moeder taki: 'Masra, a busi a no presi fu bakra.'
Mi piki a moeder: 'Mi ben e onti. Na siksi dei mi lasi ini a busi, di mi tan sondro nyanyan nanga dringi.'
A moeder taki: 'Bakra, te mi manpikin kon, a go si yu. Ala bakra na en feyanti. Bakra, taigi mi yu nen.'
Di mi taigi a moeder, a prakseri langa. A moeder taki: 'Now mi sabi yu na a nyun driktoro fu a pranasi Rosborgu.'
A moeder e bedoel Rustenburg. 'Yu na wan bakra di no e mishandel srafu. Yu pranasi abi wan bun nen. Te mi manpikin
kon, a sabi yu, ala sani e go pasa bun. Kon nanga mi.'
Mi ben go nanga a moeder pe wan pikin kampu de. A meki so wan fasi, a dangra fu sabi taki wan kampu ben drape.
Di un de ini a kampu a moeder taki: 'Tan ini a kampu te mi manpikin kon. A no e go taki nanga yu.' A moeder gwe.
Mi ben e arki ef' mi ben e go yere taktaki. A lati. A busi tiri. Mi no de langa ini a kampu, a tan solek' wan sma
trapu a tapu wan drei taki. A srefi ten mi sabi wan sma de nanga a moeder. Bakaten mi yere wan mansma-sten. Mi
ben e arki ef' mi ben e go ferstan san den taki. Den taki wan tongo di mi no e ferstan. Mama nanga pikin taki langa.
Mi skin weri. Bifo mi denki mi sribi.
Olanga mi sribi mi no sabi. Di mi wiki, a moeder taki: 'Bakra, rostu yu skin, bro yu futu, bika yu abi wan langa,
fara èn takru pasi fu go pe yu kmoto. Mi manpikin si èn sabi yu. Yu nen meki yu de a libi. Tamara
mi manpikin e go meki klari. A baka seibi dei yu e go de baka ini yu pranasi.' A moeder gwe. Mi no frede moro.
Bakadina mi yere a sten fu a moeder nanga a manpikin di e taigi en mama wan sani di mi no ferstan. Bakaten a moeder
kon pe mi de. A taki: 'Bakra, m'e go seni yu gwe. Ma awansi san miti yu, suma e go aksi yu, no lasi yusrefi. No
taigi no wan sma pe a kampu disi de. Mi nanga mi manpikin e bribi taki yu no e go taki. Ma te yu taki, w'e go sabi
yu konkru. A koni un sabi. Dan a no e go moi gi yu. Awans' pe yu de, un e go kon teki yu. Dan yu e go winsi noiti
yu ben kon a grontapu. Yu e go fluku a dei di yu konkru. Yu ferstan san mi taki?'
Mi no ben kan piki a moeder, bika mi neki e ati mi, sodat' mi seki mi ede.
'Te yu de baka ini yu pranasi, taigi den tra bakra taki: weti nanga blaka, a wan Gado meki den. Blaka nanga weti
a pikin fu wan papa. Sanede a skin fu a blakawan e firi, e kisi langawipi?' Mi ben opo nanga muiti. Mi bosi a proiproi
anu fu a moeder.
A baka tu dei a moeder taki: 'Bakra, tamara mi manpikin e go tyari yu gwe. M'e go tapu yu ai nanga wan krosi, sodat'
yu no e go sabi a pasi fu drai baka.'
A tra dei a moeder tapu mi ai nanga wan duku. A manpikin fu a moeder tai wan deki busititei lontu mi bere. A ori
a busititei, a taki: 'Bakra, waka a mi baka. Yu mu arki pe yu e yere mi e waka. Solek' mi tnapu yu e go tnapu tu.
Te mi hari a titei tranga, dati wan' taki sidon a gron. No taki. No seki. Yu ferstan?'
Un komoto ini a kampu. Tu dei un ben de ini wan kruyara. Un kmoto ini a kruyara, un waka dri dei ini a busi. Wan
mofoneti a manpikin fu a moeder lusu a duku. Di mi ai teki gwenti a loktu un ben de ini busi ete. Mi ben de a sei
wan udufaya. A manpikin fu a moeder no de fu si ini a birti.
A tra mamanten mi ai tapu baka. Un ben waka a heri dei. Bakadina a tra dei, a manpikin fu a moeder tan tanapu.
A ben de a fosi tron sensi un de ini a busi di a pikin fu a moeder taki nanga mi. A taki: 'Bakra, tide yu e go
de ini yu pranasi, pe mi brada nanga sisa e kisi langawipi. Te yu de baka ini yu pranasi, taigi den tra bakra di
e go opo den anu naki wan brada ef' sisa, te a go ini busi, a no e go drai baka. Taigi den tra bakra taki: den
pranasi a den abi; busi a un abi. Un no e trobi den ini den pranasi, den no mu trobi unu ini un busi.'
Un waka ete wan yuru. Di a puru a duku mi ben de a seibusi pe mi ben sabi. Pe a manpikin fu a moeder go, noiti
mi sabi. A baka wan yuru mi ben de ini mi pranasi."
Dri wiki masra Nicol didon nanga korsu. Di a betre a go na wroko baka. Di a si wan srafu a memre a moeder nanga
en manpikin.
Arkiman a stotu te dya, te so fara.