A tori di mi e go ferteri now na wan tori di psa langa, langa, langa yari kba. Na wan tori di psa na sraf'ten.
Den sma fu now, den pikin fu now, den sabi a bigi oso na tapu uku fu Noorderkerkstraat nanga Lim A Postraat. EBS
den e kari en now. Dape yu e go fu pai faya. Ma fos'ten a ben de wan heri tra oso nanga wan langa ston stupu, nanga
trarkitrarki. Den ben kari en Yuda Oso. Na dape a tori psa san mi e go ferteri now.
Fos'ten Kawna ben abi furu, furu kofi nanga kakaw pranasi. Wantu fu den pranasi no de moro, wi e yere den nen soso.
Ma presi leki Montresoro, Peterzorg, Nieuwgrond, Alkmaar, Leliëndaal, Katwijk (Katweki leki fa den sma e taki),
ala den pranasi pranasi disi de ete.
Yu ben abi wantu sukru pranasi: Maryanborgu now; iya, Rust en Werk yu ben abi tu. Go pikinso moro fara, yu ben abi
Alliance. Nickerie ben abi Hasard, Waterloo. Alamala ben de bun bigi sukru pranasi. Now, wi abi soso Maryanborgu.
Èn dan Kawna ben abi furu srafu tu, bikasi furu wrokoman ben de fanowdu fu wroko kakaw nanga kofi.
We, a ben de so dat' den pranasi driktoro, eri wiki den de na wroko. Den luku fa a libi e go. Den mu aksi den basya
nanga den tra edeman fa den srafu e wroko. Soso den srafu di e wroko musu kisi pai. Den driktoro ben mu go luku
na ini den gron, efu ala sani ben waka bun.
Ibri pranasi ben abi en eigi srafu. Dati un sabi. Ma te satra bakadina, den sma no ben wroko kwetikweti moro. Satra
ben de afu dei wroko. Dan te brekten yuru den srafu ben kisi wan pikin pai. A no ben furu. Srefsrefi. Niets bijzonders.
Efu yu yere a moni yu sa skreki: wantu pikinsensi nomo. Moro furu den ben kisi nyanyan fu taki leti.
Te den ben pai den srafu, owktu den driktoro e pai den basya. Den e kari den man disi ofisiri. Yu ben abi basya,
en owktu yu ben abi bakra ofisiri. Den sma disi ben de na driktoro presi. Te den kaba pai den sma, den e meki klari
fu go na foto, fu go nyan prisiri drape.
Mi no si, ma den sma ferteri taki a ben de moi fu si na tapu liba. Bikasi ibri pranasi ben abi en eigi srafu. Èn
ibri pranasi ben abi en eigi krosi di ai weri.
Den srafu ben de leki wan sortu matrosi. Den ben e lo den bun bigi tentiboto kon na foto. A no spotu, a no yu dagu
fu yu lo boto kmoto na Katweki kon na foto. Ef' noso fu kmopo te na Maryanborgu fu lo boto. Ma den ben lo kon.
Brekten yuru den kmopo na den pranasi. Te den doro foto na bakadina kba, sontron neti yuru. Te den doro moimoi
den e go na wan koleisi.
A koleisi na a oso di mi ben taigi yu di didon so pe EBS de now. Den ben kari en Mis' Griki Koleisi. Un sabi san
na wan koleisi. Dati wani taki, pe den sma e go prei karta, dobbel, nanga dringi sopi. Te now dati de ete.
Ma disi ben de wan bigi koleisi, pe moro furu fu den bigi driktoro e go prei karta, bikasi den ben e poti furu
moni. Te den driktoro doro na syoro, den tentiboto e go na wan sei. Den srafu ben abi wan presi pe den ben kan
tan. Ma mi no sabi pe.
Te den man go na ini a oso, den bigin a kartaprei satra neti. Den prei, den e prei, eri neti te dei opo. Te mamanten,
den dringi wan pikin kofi, den nyan wan pikin sani, den prei baka. Den prei fu hebi moni, heri dei te brekten yuru,
bijna fu kisi bakadina. Dan fosi den tapu a prei, kmopo na a koleisi. Den srafu sabi a ten. So a yuru dati den
de klari nanga den boto. Den man e go baka na boto fu go na den pranasi baka.
We, wan satra neti di den man de baka fu prei karta, a kon wan pis' lati kba. Tra wan wini, tra wan e lasi, yu
sabi fa a sani e go. Sobun den e prei fu wan srafu. Efu wan man abi wan bun srafu, a taki: "A bun, mi no abi
moni, ma efu mi lasi, yu kan teki a srafu." Te den doro dan a srafu e yere taki a mu go na wan tra masra.
A so a ben e go.
Ma now wan neti leki fa mi taki, dan den man ben de na ini a faya fu a prei. Dan doro klop. Wan fu den man go luku,
a si wan man tnapu na mofodoro. A man taki: "Yèrè, mi yere un de wan club dyaso e prei karta.
Mi kan prei tu?" Den taki: "Ai, kon no."
A man kon na ini, a ben dungrudungru pikinso, bikasi na wan oli lampu ben leti nomo. A man kon sidon. Den luku
makandra. Bikasi te wan freimde sma kon prei, den prei fufuru nanga en. So den sabi taki den go feni wan man fu
den nyan sensi puru na en skin. So den meki ai gi makandra.
Ma den man disi te den prei a karta, den ben dringi hebi sopi, yaneifri nanga den sani dati. Ma a freimde man di
ben kon, a no ben wani dringi sopi. Den aksi en taki: "Man, yu no e naki wan bita dan? Yu no e naki wan bita?"
A taki: "No, mi e dringi soso pet'watra."
Hmm. Den lafu, den luku makandra. "Pet'watra".
Ma a presi ben abi wan bun bigi peti. Yu sabi a peti na mindri a prasi. Wan fu den taki: "A bun, mi sa go
teki wan pikin pet'watra gi yu." Dan a dringi wan grasi pet'watra.
Ma di den bigin prei, den prakseri taki: "Mm, a man sabi a prei, yèrè." Bikasi bijna ala
pot ai wini. Ala pot na en wawan e wini. Efu yu luku a moni na en sei, a moni e gro kon, a moni e gro kon so a
stapel e kon hei. Den man kon skreki. A yuru e lon, den no e wini moro. Na a man dati e wini nomo.
Ma dan wantron so, di wan fu den man bigin stafeer den karta, sekseki den karta, meki den kon bun, dan wan karta
fadon. A man di de na sei fu a man di ben e sekseki a karta, bukundu fu teki a karta. Ma wantron so a man fadon
flaw go na wan sei.
Ala sma kon skreki. A man fesi weti so leki wan laken. Den denki taki a dede kba. Den taki: "Go teki watra."
A embre di ben abi a pet'watra di a man ben dringi, a dati den teki, nati a man fesi. Den figi en fesi, den nati
en skin. So a man kisi ensrefi baka. Dan den alamala go sidon na a tafra baka. Ma a man di ben kon prei nanga den,
no ben de moro, a ben gwe. Den no si pe a go.
Ne wan fu den aksi en: "San psa? Fa yu firi? Yu no nyan? San psa? Yu dringi sopi, dan yu no nyan?"
A taki: "No, yu sabi san ben meki mi skreki so? Yu sabi nanga suma un prei karta dineti? Un ben prei nanga
Didibri. Di a karta fadon, dan mi si en futu. Na bokoboko futu a abi. So mi sabi taki nanga Didibri un prei. A
fu dati meki en wawan ben wini. Bikasi suma prei nanga Didibri, a sa lasi nomonomo. Was' na moni, was' na yu sili,
was' san, suma e prei nanga Didibri soso lasi a sa lasi."
Dan den man no prei moro na ini a koleisi dati. Den skreki sote dati den go na wan tra koleisi go prei. Ma den
no ben go prei moro na Mis' Griki Koleisi. Owktu den no ben prei te so lati neti moro, bikasi den frede taki Didibri
kan kon drape tu.
So den sma di e yere a tori disi mi e begi den: un no prei karta srefsrefi. Ma efu un e prei karta, un no prei
fu go bedrigi trawan. Bikasi na dati den man ben wani du. Den ben wani bedrigi a man di kon. Ma den no ben kan
du dati, bikasi den si taki Didibri ben tranga moro den alamala.
Te so fara a tori disi.
Tide mi e go ferteri un wan Gado tori. A tori disi, na wan bigisma ben ferteri en. Wi e kari en so: un abi wan
moi singi na ini a singi buku, a singi nen: `San Gado du a reti tru, alwasi ai lon watra.' We un yere, un arki.
Wan pisten langa kaba, wan famiri ben e libi na wan poti oso. Potisma den ben de. Nownow efu yu yere o diri den
kamra oso de, hè, bijna yu no man pai. Ma a ten dati yu ben kan yuru wan pikin oso feifi golu noso zeven
vijftig. We, na so a famiri disi ben abi wan papa, wan mama, nanga tu pikin, wan fu aiti yari nanga wan fu neigi
yari. Den pikin no ben de tumsi bigi. A sori leki den ben e libi switi nanga makandra.
Ma yu sabi switi na wan sani, te yu swari en yu no e tesi en moro. Bakra taki: "Lekker is maar een vinger
lang." Te a psa yu tongo, a doro na yu gorogoro, yu no e tesi a switi moro. Èn na so a de nanga a libi
tu. Den sma e libi poti fasi, ma tog den ben de koloku.
Ma wan dei a mama fu a famiri disi kon siki bun hebi. A siki so wan fasi dati di a kon opo pikinso, a no ben kan
kebroiki en anu, a no ben kan kebroiki en futu. A ben kon lan. Soso taki a ben kan taki. Ala sani ben mu du gi
en. Den ben mu poti nyanyan gi en na ini en mofo. Efu wan freifrei de na en tapu, wan sma mu naki en puru. Yu srefi
sabi a sani dati, san wani taki yu lan. Yu no man waka. Soso didon. Sma mu yepi yu, dan yu sidon na ini wan bigi
sturu. A so a sani ben de. Yu kan prakseri fa ala sma ben e sari.
Den pikin, den ben yepi den mama someni leki den kan. A papa no ben abi moni fu go yuru wan zuster. So na en srefi
ben de ala sani. A ben de koki, a ben de was'frow, a ben de zuster. A yepi den pikin fu den nyan, fu den kan go
na skoro. Dan ai kon, a abi fu yepi a frow. Yu srefi kan ferstan taki a libi no ben kan de prisiri, kwet'kweti.
Ma den ben de bribisma, so den ben e begi ala dei fu Masra sa lekti a hebi disi gi den. A no fa wi e prakseri Masra
e yere begi. A no te wi wani, Masra e yere begi. Ma te Masra feni en bun, èn a fasi di a feni en bun, na
so ai yere na wi. Èn na so a ben de nanga a tori disi tu. Wan dei Masra yere a begi fu den. Dan Masra kari
Dede, a taki: "Yere, mi e go seni yu go na grontapu na a famiri dati. Yu mu go, dan yu teki a papa."
Hm? Dede skreki. Noiti Gado no e meki fowtu. Ma disi leisi a prakseri taki: "Kande Gado ben wani taki meki
mi go teki a mama. Ma Gado taki meki mi go teki a papa. Ma mi sa du san Gado taki, yèrè."
Dede kon na grontapu, a go na a oso pe Gado seni en. San a si? A si fa a masra ben poti tu pisi brede gi den pikin
fu den go na skoro. Dan a feni wan pikin ten fu krin a frow. Bika yu srefi kan ferstan dati wan leti moni no ben
e kon.
Fruku mamanten, feifi yuru mamanten fosi den sma opo, dan a man disi ben e go na watrasei. Now na truck nanga bigi
wagi e tyari bana nanga den sani dati. Ma a ten dati na kruyara. Pasi no ben de. Den sma e kon nanga den kruyara,
den kon na watrasei pe wi e kari lijnsteiger. Ala sma sabi bakawowoyo. Dan den boto e kon nanga bana nanga kasaba,
nanga den sani leki apresina, gruntu, èn so moro fara.
Dan a man ben e gwe fruku. Fosi feifi yuru ai opo, a gwe na watrasei, dan a go luku pe den man e tyari den bosu
bana. Wanwan bana e fadon na pasi, wan kasaba e fadon na pasi, a so ai piki, ai go bori gi den sma.
Di den man di abi den boto si fa a man disi ben e du fu feni wan sani fu nyan, dan den aksi en taki: "We,
yu e piki den sani. Yu no wani kon yepi un wroko fu puru a lai?"
A taki: "Iya." Dan na so a ben kon feni wan pikin wroko na den boto. Ai syow bana. Dan a ben kisi pikinso
moro. Den gi en wantu sensi fu a kan bai wan stimofo.
Ma now Gado taki Dede mu kon teki a man. Dan a yuru di a go fu go teki a man, dan a si taki net a man ben krin
a frow, e wasi en, weri krin krosi gi en. Yu kan prakseri nanga furu muiti, bika a no ben abi no wan sma fu yepi
en. Dede seki en ede, a taki: "Èhè, mi no kan teki a man disi. Mi bribi taki dis' leisi Gado
fowtu." A go baka na Masra Gado, a taki: "Masra, suma yu ben seni mi fu go teki?"
Masra taki: "Mi taigi yu taki yu mu go teki a man."
Dede hari en skowru. Dati wani taki: "Mi no e ferstan Gado now, yèrè, ma mi sa go." A saka
go baka na grontapu. Dan disi leisi a si taki a man ben klari fu gi en frow nyanyan. Ai taki nanga en bika den
kan taki. A uma e taki en tangi taki: "Efu mi no ben abi yu, dan fa mi ben sa bigin dan? Tye, na Masra srefi
seni yu kon gi mi." A figi a frow mofo, gi en watra, piki piki den dot'sani. A ten dati den pikin kmopo na
skoro, den nyan tu. Dan a man go na wan pikin broko kukru, ai tyari den dot'sani go wasi.
Leti na mofo a kukru so, Dede naki en. A fadon nanga langa so. A frow de na ini a oso, a si fa en man fadon. A
bari, a bari sote. Den pikin srefi bigin bari. Den e krei.
We, mi nanga yu, wi a no Gado. Dan san un ben e go taki? Wi e taki: "Mmm. Dati na ogri-ati fu Dede fu kon
teki a man disi. Didyonsro a frow taki en man tangi taki: Èfu Masra no ben seni yu gi mi, fa mi bo du?'
Dan now Dede teki en. Fa dati kan dan?" Dan wi e go krutu nanga Gado. Dati na wi libisma.
Ma di den pikin e bari so, a frow e bari tu, dan net so, wan ifrow e kon psa. A weri en krosi krin moi netyes.
A tyari wan prasoro, a son ben hati. A sutu en ede go na ini a doro, dan a taki: "San de fu du dya? San wi
e bari so dan? San de fu du?"
A frow taki: "Mi Gado, frow. Ifrow, go luku gi mi. Mi bribi mi masra dede, bika a fadon, a no e opo moro.
Go luku gi mi san de."
Den pikin e bari, den tnapu na den papa sei. Di a frow doro, a taki: "Sari." A seki en ede, a taki: "Frow,
mi no abi no wan bun boskopu gi yu, yèrè. Yu masra dede. Mi no taki yu no mu sari. Mi no taki yu
no mu krei, ma wi e tan begi Gado. Gado e go yepi. Mi e go yepi yu du ala sani. Yu no man du noti. Mi e go kari
sma fu kon opo a dedeskin, mi e go beri a dede. Mi sabi taki yu no abi moni. Ala sani e go kon bun."
Èn na so a psa tu. A frow meki den beri a dede. Tumsi sari. A dame kari wan datra fu kon luku a frow. Datra
kon ondrosuku en. Datra taki: "We, a uma disi, a mu kon na ati-oso. Na oso mi no kan yepi en. A mu kon na
ati-oso, dan ala sani mi sa luku. Kande un kan du wan sani gi en." Den pikin no ben kan tan na oso den wawan.
A frow taki: "We, mi sa teki den pikin go na mi oso." A so a psa. Den pikin go na a frow oso. A frow
e sorgu bun gi den.
Tu tron na wan wiki den go luku den mama na ati-oso. Den si fa den mama e kon moi betre. A wan anu no saka helemaal,
ma a tra anu kon bun baka. A kan du wan pikin wroko. A kan waka waka. Ai fringi en futu pikinso, ma tog a kan waka.
A kon moi betre. A frow taki: "We yere, dan mi teki yu kon na mi oso tu. Yu kan yepi mi du wan pikin wroko
fa yu man nanga den pikin."
Fu meki a tori pikin syatu, den pikin gro kon, gro kon. Den ben leri bun na skoro. Te fu kba, a dame aksi a boi
taki: "We, san yu o tron dan?"
A taki: "We, ala yuru mi ben taigi mi papa taki mi wani tron datra. Bika efu mi ben de datra, dan mi ben e
go dresi mi mama. Dus mi wani tron datra."
A frow taki: "A bun, mi e go pai a stuka gi yu. Dan yu sa tron datra."
A meisye taki: "Èn mi taki mi wani tron skoro-ifrow."
A meisye tron skoro-ifrow. A boi tron datra. A so den libi tumsi koloku langa langa yari.
Dan di a kon so fara, dan Gado kari Dede. A taki: "Kon, mi o sori yu wan sani. Kon luku. Mi ben seni yu wan
dei fu go na a broko oso disi go teki a man. Mi ben si na yu fesi taki yu no ben feni en bun. Yu ben wani krutu
nanga mi, neleki fa den sma krutu. Ma yu si?"
Dede taki: "A tru, leki fa a singi taki."
Gado taki: "Bika luku, efu mi no ben puru a man na pasi, den bio tan nanga a pina libi fu den te leki a man
srefi bo kon swaki. Den no ben abi no wan sma. Ma di mi puru a man, dan a dame kon yepi. Ma a no a dame yepi, ma
na mi yepi.
Bikasi a dame ben de wan bribisma tu. Mamanten di a kmopo na oso, a abi wan pikin sensi, a saka en kindi, a begi
mi taki: `Masra Gado, mi abi wan pikin moni. Sori mi fa mi mu kebroiki a moni wan bun fasi. San mi mu du nanga
en?' We, luku. Yu si san a du nanga en? A pai datra, a beri a dede, a meki den pikin leri. A no moro bun leki te
a man ben tan na libi?"
Dan Dede taki: "Gado, yu abi leti. A so a de. San Gado du a reti tru, alwasi ai lon watra."
Te so fara.
A tori disi na fu sma di lobi yere tori. Mi e go ferteri wan pikin tori fu maskita. Un sabi fa maskita kan sutu
un èn fa a kan bari na ini sma yesi. Ma a no so nomo. Mi sa ferteri un fa dati du kon.
Langa langa yari kba, tu yongu sma ben seti libi. Den ben e libi tumsi koloku. Den no ben abi pikin ete. Ma a man
ben lobi a frow, a frow ben lobi a man. Ma yu sabi te den sani dati de, dan ala ten wan sani e kon na mindri fu
pori en. Èn na so dede ben kon na den mindri. Dede ben dyarusu fu di den sma ben lobi densrefi so. Dan dede
teki a frow. A frow dede.
Mi naf' taigi yu fa a man sari. A man sari sote. Heri dei, heri neti ai krei. A no wani beri a dede uma. Ala sma
e taigi en taki: "Ma yu mus fu beri a uma."
A taki: "Mi no e beri en."
Den taki: "We, dan yu no kan tan na a presi dya, bikasi te fu kba, no wan sma no e go man libi dya. Fa un
kan abi so wan dede sma na un mindri? A no sa de wan gosontu sani."
A man taki: "We, dan mi nanga mi dede wefi sa gwe na tapu liba." A teki wan boto, a domru a dede wefi.
Dan a go libi na tapu liba. A so wantu wiki kon psa. Fu taki leti, a ben sreka a dede so dati a dede ben kan ori.
Ma dan wan dei so, a si wan tra boto e kon. Èn na ini a boto dati wan granpapa ben sidon, wan granmasra
di ben abi furu ondrofeni. A granmasra aksi en taki: "Masra, mi si taki yu e sari. Yu ben sa wani a wefi baka?"
A taki: "Iya, mi granmasra."
Granmasra taki: "Ma mi ben sa gi yu a rai fu yu no teki en baka, yèrè. Libi en so. A betre yu
go na lanpresi baka, dan yu beri en."
A taki: "No, mi wani a uma baka. A ben de wan moi uma. A ben lobi mi. Mi srefi ben lobi en."
A granpapa taki: "Mi e warskow yu."
A taki: "No, noti no o psa. Yu kan meki a kon baka a libi?"
A granmasra taki: "Ai." A granmasra ben de wan koni man. Dan a taigi a man taki: "Gi mi yu finga
dya."
Yu sabi te yu go na datra fu go prik. Den e luku efu yu abi sukru, efu yu sali bun, nanga den sort'sortu sani dati.
We, na so a granmasra boro en finga nanga wan nanai. Dan wantron so wan dropu brudu kmopo na ini en finga. A granmasra
seki en finga meki a dropu brudu fadon na tapu a dedeskin fu a uma.
We, yu no bribi lei, yu no bribi tru. A uma kon baka na libi. A ben de net so moi leki fosi a dede. Ala tu ben
prisiri sote. Den brasa makandra. Ma dan den taki: "Yu sabi san, un no e go moro na syoro. Wi e tan libi na
tapu a liba."
A so a sani ben e go. Den ben de net so koloku leki fa den ben de fosi. Te den ben go na syoro fu bai sani fu nyan,
dan a man wawan e go. A uma ben tan ini a boto. Den e bori ini a boto, dan den go baka na mindri liba.
Ma wan dei so, di a man kmopo na wowyo nanga ala den sani di a bai, den gruntu nanga den meti, dan a man luku,
a taki: "Kande mi no e si bun. Mi no e si wan boto, ma mi e si tu boto. Sei a boto fu mi, wan tra boto de."
Èn futru, di a kon krosbei, a si taki wan tra boto ben de na sei den boto. Èn a uma taigi en taki:
"Yere, mi no lobi yu moro. Mi e go libi nanga a man disi now. Mi no wani yu moro."
A man kisi w n atibron. A taki: "Yu, yu kon na libi nanga mi brudu! Dan na disi na mi tangi, no?"
Dan now a uma atibron. A sutu ensrefi nanga wan nanai. Dan so leki fa a brudu ben kmoto na a man skin, na so a
kmoto na en skin tu. Ma di a ben wani trowe a dropu brudu -- sobun a ben wani gi a man en brudu baka, dan a brudu
no fadon na tapu a man, ma a fadon na ini a watra. Ma leki fa a brudu fadon na ini a watra, a so ensrefi tu fadon
na ini a watra.
A man srefi kon skreki. Ma san a si? Moro a uma e saka go na ondro, ai tron soso doti nanga asisi. Soleki fa un
kon na grontapu taki Gado meki unu fu doti, na so a frow kon tron. Now a dede trutru. A panya na ini a watra. A
tron doti. A tron asisi.
Dan a doti disi, bakaten a tron pikinpikin pikinpikin woron, den woron di yu e si na ini den watrabari. Na den
woron dati e tron maskita.
Dan now a man taki: "Ai, a granmasra ben warskow mi. A ben taigi mi taki: `A betre yu no teki a frow moro.'
Mi no ben wani yere. Ma now mi si taki a abi leti. Ma mi sa teki wan tra frow èn mi sa seti libi baka."
A so a psa. A trow nanga wan tra frow. A kon koloku baka nanga en frow nanga en pikin.
Dan now a dedeskin fu a frow, di tron soso doti nanga asisi, a tron woron di e meki maskita. We, den maskita di
e kmopo na ini den woron, a dati e bari na ini sma yesi èn den e sutu yu. Bikasi a hati a uma dati a man
atibron nanga en, fu taigi en taki: "Na mi dropu brudu meki yu kon na libi." Na so a wani meki libisma
mus firi pen tu. Dan ai sutu unu, dan ai bari na un yesi.
Te so fara.
© Copyright 2002 SIL. All rights reserved worldwide.