(1. Mos. Kap. 1 & 2.)
Na da fosi-fosi bigin Gado meki hemel nanga grontapo. Ma grontapo ben de soso sondro wansani, en doengroe ben tapo da heeli gron, en da Jeje vo Gado de wai na tapo da watra.
En Gado taki: Krin moe kom! En da so krin kom. En Masra poeloe da krin na ini da doengroe, a platie dem; da krin a kali dei, ma da doengroe a kali neti. We da so sabatem kom, mamantem kom, a meki da fosi dei.
Dei broko, da dei di meki toe, Gado meki da bigi-bigi hemel-tenti, da firmamenti, a hopo span hem, tee a kom fassi na tapo.
Da dei di meki dri, Gado taki: Da watra, di sidom na da heeli gron, moe platie na grontapo; da dre gron moe de vo hem aparti, en da watra ageen moe de aparti toe! We dasani kom so. En da dre gron, dati Gado kali sjoro, ma da watra, dati a kali zee. En Gado si, dati de boen so. Na baka Gado taki: Gron moe meki grasi nanga wiwiri, nanga njanjam, di meki siri, nanga ala soortoe boom toe, di meki vroektoe! We dasani kom so, en Gado si, dati de boen so.
Da dei di meki fo, Masra Gado meki toe bigi letti hopo tee na tapo-sei, vo platie dei nanga neti, en vo dem marki dem dei nanga moen nanga jari, en vo dem skyn na heeli grontapo! We da so Gado meki dem toe bigi krin, a potti dem na tapo; da moro bigiwan, da zon, dati da vo skyn na dei; en da pikinwan, da moen, dati da vo skyn na neti. So srefi a meki foeloe star toe, ala da vo gi letti na grontapo.
Da dei, di meki feifi, Masra Gado meki bigibigi fisi, nanga ala tra soortoe meti, disi de liebi na ini watra, so srefi a meki ala soortoe fowloe, disi de flei na ondro hemel, a meki dem speli-speli, ibri speli habi hem aparti fasi. En Gado blesi dem, a taki: Oen moe meki pikien! Oen fisi moe kom foeloe na ini watra, en so srefi dem fowloe, dem moe kom foeloe na grontapo.
Da dei, di meki siksi, Gado meki ala dem meti, disi de waka na gron, bigiwan nanga pikinwan; a meki dem speli-speli, dem boesi-meti, nanga dem worom, disi de kruipi na gron, nanga ala tra liebi-meti, en ibri speli habi hem aparti fasi.
We na baka, di Gado meki ala tra sani kaba, da srefi dei, di meki siksi, Gado taki: We, noja meki wi meki liebi-soema, meki wi meki dem, vo dem geersi wi srefi, dem moe de masra vo dem fisi, di de na ini watra, en vo dem fowloe, di de flei na tapo, en vo ala meti, en vo heeli grontapo srefi! We Masra Gado meki toe soema, wan man nanga wan oeman. Fosi a meki da man-soema, en a kali hem Adam, dati taki doti. Bikasi wan piesi doti Gado teki, a meki wan bigi popiki, leki wan liebi-soema-skin, en dan a blo da liebi-liebi Gado-winti na ini da soema noso. We da so Adam ben kisi da liebi-soema-ziel vo hem.
So srefi Masra Gado meki wan mooi djari na Eden-kondre, a potti Adam na ini; dem kali da djari da Paradysi, vo di a ben de so wan toemoesi mooi djari wan switi plesi vo troe vo liebi dapee. En Gado ben meki foeloe boom gro na ini da djari, disi mooi, en disi ben meki ala soortoe switi vroektoe vo soema njam. So srefi toe wan riba ben de na da plesi, vo kouroe da gron nanga hem watra. En Gado Masra teki Adam, a potti hem na ini da djari na Eden-kondre, vo a loekoe hem.
We da so Masra Gado ben meki soema wan boen fasi, a meki hem so boen, vo a geersi hem srefi. Ma di Masra Gado si, taki, a no boen vo da soema, vo a tan so hem wawan, a taki: Meki mi meki wan oeman gi hem, disi moe liebi nanga hem, vo helpi hem.
We da so Masra Gado meki Adam fadom na wan tranga slibi, en di a de na ini da dipi slibi, Gado poeloe wan ribiki vo hem, a teki wan piesi meti, a tapo da horo baka. En dan Masra teki da ribiki, a wroko hem, meki a tron wan oeman; en di a tron wan oeman kaba, Gado teki hem, tjari go gi Adam. We di Adam kom si da oeman, a taki: Loekoe so wan soema! Hoefasi? Da boon vo hem, a no na mi srefi boon a komopo? So srefi da skin vo hem, a no na mi skin a komopo! We mi sa kali hem oeman, bikasi na man a komopo. Ma na baka-tem Adam kali hem wefi Eva, vo disi hem de da mama vo ala liebi-soema. En Gado blesi dem toe fosi soema, a trouw dem, a taki: We oen meki pikien, vo soema kom foeloe, heeli grontapo moe kom foeloe nanga soema! Alasani, disi de na grontapo, da vo oenoe, dem fisi nanga dem fowloe nanga ala tra meti moe onderdaniki oenoe, en ala njanjam, disi gron de meki en disi gro na tapo dem boom, da vo oenoe toe, vo oen njam!
We di Gado loekoe ala hem wroko, disi a ben meki, a si, taki, alasani de mooi en boen vo troe. En dem star ben pryze Gado, en ala dem Engel vo hem plisiri makandra. (Job. 38, v. 7).
We da so na ini vo siksi dei Gado ben doro da wroko, vo meki hemel nanga grontapo nanga ala trasani moro, en da dei, di meki sebi, a ruste hem srefi, a blesi da dei, a potti hem vo wan santa dei en vo wan gran dei vo Masra.
1. We da tori, hoefa Gado ben meki hemel nanga grontapo, dati meki wi kom membre wan woortoe vo Apostel Paulus, di a taki: Ala soema sabi, wan Gado de, bikasi Gado srefi ben meki dem kom sabi. Alwasi wi no kan si Gado srefi, hoe reti fasi a de habi, tog te mi de loekoe ala dem gran wroko vo hem, da vo taki, hoefa a ben meki hemel nanga grontapo, da dati de sori wi da Gado-tranga en da Gado-fasi vo hem, vo no wan soema kan taki: Mi no ben sabi. (Rom. 1, v. 19. 20.)
2. Da tori vo Njoe Testamenti de leri wi, a taki: Da pikien vo Gado, da wi Masra Jesus Kristus ben meki alasani, dasani disi wi hai kan si, nanga dasani, disi wi no kan si. (Koloss. 1, v. 16.) Ke Masra, da joe ben meki grontapo na fosi-fosi bigin, en dem hemel da wan wroko vo joe hanoe. (Ebr. 1, v. 10.)
3. Meki wi loekoe da heeli grontapo, nanga dem bergi, nanga dem riba, nanga da bigi zee, fa Masra Gado ben meki alasani so mooi! So srefi ala dem wiwiri toe, disi gron de meki, vo soema nanga meti kan njam! Meki wi loekoe na tapo, fa da zon mooi, nanga moen, nanga dem so meni star! Meki wi loekoe wi srefi toe, fa Gado gi wi wan ziel nanga wan skin nanga verstand, nanga ala-sani, di wi moe habi! Fa Gado ben meki so meni speli meti toe. So srefi wi moe membre dem santa Engel toe, di Gado ben meki, fa dem grani! We ala demsani no ben de fositem, ma Gado ben meki alasani. Ke fa Masra Gado tranga! Ala dem gran wroko de dangra wi vo troe!
4. Di Gado ben meki dem fosi soema, a ben meki dem so, vo dem moe geersi hem, da vo taki, a ben gi dem wan boen verstand, dem no ben habi ogri kweti-kweti, dem skin no ben kan dede. Ma poti! da boen fasi disia, dem lasi. En tog, tangi vo Gado, wi kan kisi hem baka, efi wi doe so, leki Paulus vermane wi, di a taki: Oen moe teki weri da njoe soema, disi Gado ben meki, vo a geersi hem srefi na ini geregtigheid en santafasi. (Efes. 4, v. 24.)
5. Da joeroe, di Adam nanga Eva ben de na ini da Paradysi jete, Gado srefi ben potti dati so, vo man nanga oeman moe liebi nanga makandra, en a ben blesi dem wan aparti blesi. We di Gado ben gi Adam wan oeman nomo, dati de sori wi krin-krin, Gado no wani, soema moe habi moro oeman, efi moro man, leki wan nomo. Da so wi Masra Jesus srefi ben leri wi toe. (Matth. 19, v. 4 tee 9.) We efi toe soema de liebi nanga makandra leki man nanga wefi, dem no moe liebi takroe nanga makandra, ma da liebi vo dem moe krin, en dem moe liebi switi nanga makandra.
6. Ala soema, disi de liebi na heeli grontapo, da vo dem toe fosi soema, Adam en Eva, dem alamal komopo. We da so Bakra nanga Ningre nanga Ingi nanga ala tra soema, alwasi na hoe kondre dem de liebi, en alwasi hoe nem dem habi, dem alamala de brara nanga sisa makandra.
7. Na ini vo siksi dei Gado ben doe ala hem wroko, ma di vo sebi, dati a teki vo bro. We wi Kristen-soema moe doe so srefi toe, wi moe loekoe da zondei vo wan gran dei vo Masra, wi moe go na kerki, go jeri Gado tori, vo wi finni wan boen vo wi ziel.
(1. Mos. Kap. 2 & 3.)
Reti na mindri vo da srefi djari Eden, disi Masra ben potti Adam nanga Eva na ini, wan boom ben de, disi Gado ben kali da liebi-boom, nanga wan tra boom moro, disi meki soema kom sabi, san da boen en san da ogri. We Masra Gado waarskouwe Adam vo da boom, a taki: Joe kan njam ala dem vroektoe vo ala dem tra boom, disi de na djari; ma vo da boom, di de na mindri djari, da boom disi meki soema kom sabi, san da boen en san da ogri, dati wawan joe no moe tesi wan vroektoe vo hem; bikasi da dei, disi joe sa tesi hem, njam? da dede joe sa dede!
We so langa dem soema ben holi da gebootoe vo Masra, dem ben liebi switi na Gado ondro. Ma Satan kom moksi na ini, dati da didiebri. Hem srefi ben de wan gran Engel vo Gado fositem, wan gran foetoeboi vo Masra na tapo; ma di a no ben de tevrede nanga da boen liebi, disi Masra Gado ben gi hem, en di a ben meki oproeroe na ini hemel, a ben soekoe, vo meki hem srefi moro bigi, we vo da hede Masra ben jagi hem nanga so meni tra Engel moro, di ben moksi toe na ini da oproeroe, a meki dem komoto na hem fesi, a seni dem go na da takroe plesi, disi dem de kali hel. We na dapee Satan ben tron hedeman vo ala dem tra didiebri, en sinsi da tem a kom wan bigi vyanti vo Gado en vo ala liebi-soema toe, doro nomo a de soekoe, vo a pori Gado wroko, en nanga wan toemoesi koni-fasi a de soekoe vo poeloe soema na Gado ondro, nomo vo a kan kisi dem na hem ondro.
We di da bigi-membre-fasi vo hem ben meki hem srefi lasi da boen vo hem kaba, dati meki a kom na da prakseri, vo a seti da srefi trapoe gi Adam nanga Eva toe, vo meki dem moe pasa Gado mofo. En di Satan ben sabi, sneki koni moro leki ala tra meti na grontapo, dati meki a go na ini wan sneki skin, en da so, leki wan sneki, a go loekoe Eva tee na ini da djari, a sori hem da mooi boom, en dan a haksi Eva na wan koni-fasi, a taki: Hoefasi a troe? Gado taki, oen no moe njam ala vroektoe vo dem boom, di de na djari? Eva taki: Gado gi wi pasi vo njam ala vroektoe vo dem boom, di de na djari, ma vo da wan boom nomo, di de na mindri djari, dati wawan Masra taki, wi no moe njam vo hem, wi no moe meli hem srefi, vo wi no dede.
Satan piki Eva, a taki: Dati a no troe, oen no sa dede, bikasi Gado srefi sabi, so hesi oen sa tesi da njanjam, dati sa meki oen hai hopo wantem, oen sa tron leki Gado srefi, oen sa sabi, san da boen en san da ogri.
We fositem Adam nanga Eva no ben loekoe da boom srefi, vo di Gado ben waarskouwe dem vo hem, ma now di Eva kom bribi da lei-taki vo didiebri, a hiti wan hai na da boom tapo, a si, taki, da boom mooi vo troe, en wantem a kom luste da vroektoe so tee a go piki hem, njam; so srefi a gi hem man hafoe toe, en Adam teki hem, a njam so srefi toe. Ma poti! now dem hai kom hopo, dem si, dem de nanga soso skin, dem kom sjem vo dem srefi, en dati meki dem go teki figa-wiwiri, brei dem, dem meki kamisa nanga kojo, vo tapo dem skin.
Ma buiti dati dem konsiensi srefi kom trobi dem toe vo da ogri, disi dem ben doe, di dem ben pasa Masra Gado mofo. Fositem, di dem nanga Gado ben de boen makandra jete, alatem a ben switi na dem vo tan klosibei na Gado, ma now, di winti kom hopo pikinso, en di dem jeri da stem vo Gado na ini djari, wantem dem kom frede vo hem, en dem go kibri na ondro dem boom, di de na ini djari, meki Gado no moe si dem. Ma Masra Gado kali Adam, a taki: Adam, hoepee joe de? Adam taki: Di mi jeri joe stem na ini djari de, mi kom frede, bikasi mi de nanga soso skin; dati meki mi go kibri. Masra Gado taki: We hoesoema ben taki gi joe, dati joe de nanga soso skin? Hoefasi, joe njam vo da boom, di mi ben taki gi joe, dati joe no moe njam? Adam taki: We da oeman, di joe ben gi mi, da hem gi mi da vroektoe vo da boom, en mi ben njam hem. Now Gado haksi da oeman, a taki: Vo san-hede joe doe so? Da oeman taki: Da sneki kom kori mi, a meki mi njam.
Na baka Masra Gado taki nanga da sneki, a floekoe hem, a taki: Joe ogri sneki joe, di joe doe so, mi sa potti da moro hebi floekoe na joe tapo, moro hebi, leki na ala dem tra meti na grontapo! Nanga joe bele joe sa kruipi na gron, en doti soso joe sa njam ala joe liebitem! En mi sa meki joe nanga da oeman tron vyanti, so srefi dem pikien vo joe pikien nanga dem pikien vo hem pikien, dem sa vyanti toe makandra. Da siri vo da oeman sa masi joe hede, en joe sa beti hem na hem baka-foetoe. Dan Masra floekoe da oeman toe, a taki: Te joe meki pikien, a sa gi joe pyn vo troe vo meki dem, en alatem joe sa de na joe man ondro, da hem sa de joe masra! So srefi Masra taki nanga Adam toe, a taki: Vo di joe ben harki joe wefi mofo, en di joe ben njam vo da boom, di mi ben taki gi joe, dati joe no moe njam, we da vo joe hede mi sa floe-koe grontapo, a sa trobi joe, vo joe finni wan njanjam, vo joe pasa joe liebi, bikasi maka nanga bra-maka soso joe gron sa meki. Nanga sweti na joe fesi srefi joe sa pina vo finni wan njanjam, en da so joe sa doro joe liebi tee joe sa tron da srefi doti baka, di mi ben teki vo meki joe. Bikasi doti soso joe de, en doti soso joe sa tron baka ageen. Na baka Gado teki toe boeba, a meki toe japon, wan vo Adam en wan vo hem wefi Eva, a weri gi dem. En dan Gado poeloe Adam na ini da djari vo Eden-kondre, a seni hem go vo a wroko wan gron. So srefi Masra potti wan gran Engel vo hem na da djari doro, a gi hem wan blootoe srapoe houroe, vo meki a wakti da pasi, vo Adam no moe go baka, njam vo da boom vo liebi toe.
1. We da tori disia vo wi fosi tata en mama, fa dem ben pasa Masra Gado mofo, dati a no wan switi tori kweti-kweti. Ke, da boen liebi, disi Gado ben gi dem, nanga da Paradysi, disi ben habi so meni mooi en boen boom, dem lasi hem so hesi! Da loekoe soso Eva ben tanapoe nomo de loekoe da boom; ma dati a no ben moe doe, a ben moe ron gowei. Bikasi di a loekoe da boom soso, dati meki a kom luste da vroektoe vo hem tee a kom tesi hem srefi, en da so a fadom na ini zondoe. We efi wi no wani fadom, dan alatem wi moe frede vo doe zondoe, so leki wi frede da beti vo wan sneki.
2. Di Satan fosi ben doe ogri, tee Gado ben moese floekoe hem, seni hem go na hel, na baka a ben soekoe vo meki trawan kom na da srefi ogri fasi toe. We vo da hede a go na Eva, a kori hem nanga lei; bikasi vo sinsi bigin didiebri de wan leiman en wan kiliman toe. (Joh. 8, v. 44.) We meki wi loekoe boen nanga hem, vo a no kori wi so srefi, leki da falsi sneki ben kori Eva; bikasi doro a de feti vo seti trapoe gi wi, vo a drai wi hede en vo a poeloe da bribi na ini wi hatti. (2. Kor. 11, v. 3.)
3. Te soema no bribi Gado, dati de da loetoe vo ala tra ogri. Dati wawan ben tjari dem fosi soema so fara, tee vo dem pasa Gado mofo. Ma na baka di dem doe da ogri kaba, dem konsiensi bigin vo trobi dem, en dem kom frede Gado; bikasi iniwan zondoe, di wi doe, a platie wi nanga Gado. (Jes. 59, v. 2.)
4. Sani a ben helpi Adam nanga Eva, disi dem ben soekoe vo go kibri, meki Gado no moe si dem? En ba-katem ageen, san a ben helpi dem, disi trawan verwyti trawan? A no ben helpi dem noti, bikasi Masra Gado sabi alasani. Ma da so wi soema maniri de, no wan soema wani soekoe foutoe na hem srefi.
5. So langa Adam nanga Eva ben de na Paradysi jete, dem ben doe dem wroko nanga plisiri, a no ben trobi dem kweti- kweti; ma sinsi dem doe ogri, da wroko kom trobi dem, bikasi Gado ben floekoe dem. Ma efi wi loekoe Masra Jesus na hem liebi-soema fasi, fa hem ben de so wan boen wrokoman, en fa a no ben lasi wan joeroe vo soso, sondro a ben doe wan boen wroko, da dati moe meki wi toe kan doe ala wi wroko nanga plisiri.
6. Wan soema ben tjari da zondoe kom na grontapo, en zondoe ageen ben tjari dede kom. (Röm. 5, v. 12.) Ma efi wan soema go lasi tee na ini hel, so wan soema no ha reti vo taki, hem no kan helpi, da Adam habi skulti vo dati. No no, da soema srefi srefi, hem wawan habi skulti, a ben kan libi da ogri, efi a ben wani; bikasi dasani disi Adam ben pori, dati Kristus ben meki boen baka; hem da wi Helpiman.
7. Vo troe-troe, wi Masra Jesus Kristus, da hem srefi de da reti siri, da pikien, disi wan oeman ben meki, so leki Gado ben pramisi na Eva. Da joeroe, di a ben de hanga na kruisi, di dem spikri ben booroe hem hanoe nanga hem foetoe, dem gi hem so meni skin-hati, da srefi joeroe a ben fili da beti vo da sneki vo troe; ma nanga da dede vo hem en nanga da hopo baka vo hem a tra-poe da sneki na ondro hem foetoe so tee, a masi da sneki hede krin-krin, vo a no kan doe wi ogri moro. We da so Masra Jesus hopo da Paradysi baka gi wi, vo wi alamal kan kisi Gado-kondre, efi wi bribi na Jesus en efi wi doe hem wani.
(1. Mos. Kap. 4 nanga 5.)
Adam nanga hem wefi Eva ben meki toe man-pikien, da fosiwan dem kali Kain en da trawan dem kali Abel. We di dem toe pikien kom bigi, Abel ben tron wan skapoe- herder, ma Kain tron wan pranasi-man.
We wan dei Kain go teki wan njanjam vo hem gron, a meki dati vo wan ofrandi gi Masra; so srefi Abel toe teki da moro fatoe meti vo hem, da bestewan, a meki wan ofrandi gi Gado. We di Abel ben habi bribi vo Gado, dati ben meki da ofrandi vo hem ben switi na Masra, a teki hem nanga boen. (Ebr. 11, v. 2.) Ma Kain nanga da ofrandi vo hem, dati Gado no teki nanga boen, bikasi hem ben de wan ogri soema. (1. Joh. 3, v. 12.) We dati meki Kain hatti kom bron nanga hem brara, a tai fesi gi hem. Ma Masra Gado haksi hem, a taki: San de meki joe hatti kom bron so? Vo san-hede joe meki so wan doengroe fesi? A no so a de? Te joe waka reti, dan joe hatti kouroe, ma te joe no waka reti, dan da zondoe de tan na joe doro mofo, a de trobi joe, en ibri momenti a de soekoe vo kisi joe. Ma loekoe boen nanga hem, vo a no kisi joe! Joe moe feti boen nanga hem, vo joe dwingi hem na ondro duim!
We di Gado taki so nanga Kain vo waarskouwe hem, Kain sori leki hem kaba vo mandi nanga hem brara Abel, a kom taki baka nanga hem. Ma wan dei, di dem ben de makandra na firi, Kain kisi hem brara Abel, a naki hem, tee a kili hem. We bakatem Masra Gado kom meki trobi nanga Kain, a haksi hem: Hoepee joe brara Abel de? Kain taki: Mi no sabi! Hoesoema ben potti mi, vo mi loekoe mi brara? Masra taki: Joe denki, mi no sabi, san joe doe? Da broedoe vo joe brara, disi de bari na grontapo, de tori joe, a kom piki tee na mi jesi srefi. We mi sa floekoe joe, en da floekoe sa holi joe na heeli grontapo, bikasi grontapo srefi ben hopo hem mofo, vo teki joe brara broedoe dringi na joe hanoe! Te joe wroko wan gron, a no sa gi joe da njanjam so foeloe, leki a ben kan vo gi joe! So srefi joe no sa habi wan vaste plesi moro na grontapo vo tan, ma joe sa waka jajo, leki wan soema, disi hem konsiensi de trobi hem, meki a no kan finni ruste na wan plesi. Kain piki Masra, a taki: Ke da zondoe vo mi a bigi, so tee mi no sa kan vo kisi pardon moro. Bikasi di joe floekoe mi tidei, joe poeloe mi na joe kondre, joe jagi mi komoto na joe fesi, hoepee mi sa go? Mi no tron leki wan ronweiman na grontapo? Iniwan soema, disi de miti mi, a kan kili mi. Masra taki: No no, dati no sa de, ma da soema, disi sa kili Kain, a sa kisi hem paiman baka sebi doblo srefi. We da so Kain komoto na Masra fesi, a go meki wan foto, disi dem kali Hanok.
Na baka-tem di Adam ben kisi wan hondro nanga dritentin jari kaba, Masra Gado gi Adam nanga Eva wan tra pikien moro na plesi vo Abel, da wan manpikien toe, disi dem kali Set, en na hem baka dem ben meki foeloe tra pikien moro, man nanga oeman. We di Adam ben ouroe negi hondro nanga dritentin jari, dan a dede. En hem pikien Set, di a kom ouroe wan hondro nanga feifi jari, a meki wan pikien, disi dem kali Enos. We datem dem ben bigin kaba vo holi kerki, en vo preki tori vo Masra Gado. We wan soema vo Set famili ben de, disi dem kali Henok, wan pikien-pikien vo Set, dati ben de wan boen soema vo troe, a ben liebi toemoesi switi nanga Gado; en di a ben si so meni ogri soema, disi no ben holi bribi, en disi no ben habi frede vo Gado moro, Henok krasi dem na profeti-fasi, a taki: Loekoe boen! Masra sa kom, hem nanga foeloe doezend santa soema, vo kroetoe ala soema en vo strafoe ala dem ogri soema! (Juda, v. 14 & 15.) We di Henok ben liebi so familiari nanga hem Gado alatem, en di a ben holi bribi so, dati meki Masra Gado poeloe hem na grontapo, sondro a dede, ma liebi-liebi a teki hem na ini hemel, dati no wan soema si hem moro. En bifo Gado ben teki hem srefi, a ben taki kaba, dati hem lobbi da soema. (Ebr. 11, v. 5.) Ma hem pikien Metusala, dati ben liebi langa vo troe, a kisi negi hondro nanga siksitentin na negi jari, bifo a dede.
Wan pikien vo Metusala dem kali Lamek, en di Lamek ben meki wan pikien, a kali hem Noa, a taki: Da pikien disia sa troostoe wi na ini ala wi trobi en verdriti, en na ini da hebi wroko, disi wi moe wroko na grontapo; bikasi Masra floekoe grontapo vo troe.
Vo da famili vo Kain wan soema ben de, hem nem Jabal, we da vo hem ala dem soema komopo, disi de liebi na masanga de loekoe dem meti. Ma Jabal ben habi toe brara moro, wan dem kali Jubal, da trawan dem kali Tubalkain. Jubal ben de da fosi soema, disi ben leri muziki, en Tubalkain ben de da fosi smeti-basi, disi ben leri trawan, vo wroko isri.
1. We da tori vo dem ofrandi, disi Kain nanga Abel ben meki gi Masra Gado, dati de leri wi, taki, efi wi wani doe wansani vo taki Masra tangi, ofoe iniwan tra sani di wi doe vo hopo hem nem, wi hatti srefi moe de na ini, bikasi na dati wawan Masra de loekoe, efi troe troe wi hatti de habi da fili en da lobbi vo hem.
2. So srefi da tori vo Kain de sori wi, taki, efi wan soema habi ogri hatti vo trawan, da ogri djaloesoe kan meki so wan soema tron wan kiliman srefi. Ke, Gado moe kibri wi, vo wi no holi no wan soema na hatti! Apostel Johannes taki: Da soema disi membre ogri na hem hatti vo hem brara, da wan kiliman kaba. (1. Joh. 3, v. 15.)
3. Da broedoe vo Abel, dati ben bari vo tori hem brara Kain. We da broedoe vo Masra Jesus, disi dem ben kili na kruisi, dati de bari toe, ma a de bari moro switi leki di vo Abel; bikasi a no bari vo tori wi, vo Gado moe strafoe wi, ma doro nomo a de bari, vo Gado moe sari wi. (Ebr. 12, v. 24.)
4. Profet Jeremias taki: Soema hatti ogri toemoesi, a bedriegi hem toemoesi! (Jerem. 17, v. 9.) We na Kain ma-niri wi kan si troe-troe, Gado habi reti, di a taki so. Bikasi fosi a ben kisi hattibron nanga hem brara, en na baka a kom lasi hatti krin-krin. We vo dati hede Apostel Paulus vermane wi, a taki: Mi pikien, te joe stoutoe, te Masra moe fom joe, joe no moe loekoe da fomfom vo wan soso sani; ma vo lasi hatti? joe no moe lasi hatti toe, alwasi Gado de strafoe joe! (Ebr. 12, v. 5.)
(1. Mos. Kap. 6-9,17.">)
Langatem dem soema vo Set famili, disi Boe-koe lobbi kali dem pikien vo Gado, dem ben liebi vo dem aparti, dem no ben habi wroko nanga dem ogri soema vo Kain famili. Ma na bakatem di soema kom foeloe na grontapo, so srefi-srefi dem soema vo Gado bigin vo bemoeje nanga dem ogri soema, dem loekoe na dem pikin oeman, fa dem mooi, en dem teki wefi, iniwan di dem wani. We dati ben meki wan ogri speli soema hopo na grontapo, tee pikin-moro no wan soema ben ke vo Gado moro.
We di Masra Gado si dasani so, fa ala soema hatti nanga ala soema maniri kom pori toemoesi, a kom hati hem vo troe, disi a ben meki liebi-soema, a taki: Mi sa poeloe ala soema na grontapo, liebi-soema nanga meti, ala di mi ben meki; bikasi dem habi toemoesi tranga hai, alwasi mi ben meki da jeje vo mi waarskouwe dem so menitron, dem no wani jeri mi moro; dem de liebi net so, leki soso meti. Ma mi sa gi dem tem jete wan hondro nanga twenti jari.
We ala di dem soema ben pori so, wan boen soema ben de na dem mindri jete, disi Masra Gado ben lobbi, hem nem Noa, dati ben habi moro boen maniri, leki ala tra soema vo da tem, en a ben liebi net so familiari nanga Gado, leki hem gran-papa Henok. We wan dei Gado kom na Noa, a taki: Heeli grontapo pori toemoesi na mi hai, dem soema kom ogri vo troe, en da tem vo dem kisi, vo mi strafoe dem, en vo mi pori heeli grontapo. We go teki cedroe-hoedoe, meki wan bigi sipi vo joe, wroko hem nanga foeloe kooi nanga kamera, vo soema nanga meti kan go na ini! En krafata hem boen-boen nanga pekki na inisei en na dorosei! Da sipi moe bigi so tee a moe marki siksi hondro foetoe na langa, hondro foetoe na bradi en siksitentin foetoe a moe dipi! Dri zoldro a moe habi, en na kroboi zoldro na ondro dakki joe moe meki wan pikin kamera vo joe, nanga wan fensri na ini dakki. Bikasi mi sa meki wan bigi-bigi watra-floedoe kom na grontapo, disi sa soen-goe ala soema nanga meti. Alasani disi! de na gron-tapo, sa soengoe krin-krin. Ma nanga joe mi sa meki wan verbond, mi sa meki joe go na ini da sipi, joe nanga joe wefi nanga joe heeli famili. So srefi vo ala krin meti joe moe teki sebi paari vo ibri speli, ma vo ala tra meti, disi no krin, joe moe teki wan paari nomo vo ibri speli. So srefi joe moe bezorgoe njanjam toe, potti na ini da sipi, vo joe nanga joe famili nanga ala dem meti kan pasa liebi.
We Noa doe alasani prontoe so, leki Masra taki gi hem, en nanga dati a meki ala dem ogri soema kan si, hem habi bribi en respeki vo Gado. So srefi ala da tem di a de meki da sipi, a no mankeri toe, vo vermane dem ogri soema, en vo krasi dem, taki, Gado sa pai dem nanga reti, efi dem no sa kaba nanga da ogri vo dem. (Ebr. 11, v. 7, 2 Petr. 2, v. 5.) Ma di dem soema ben feti nanga da Jeje vo Gado so meni langa kaba, dati meki dem no ke vo noti moro, dem meki spotoe srefi nanga Noa, dem taki, a lau, en da njam nomo dem njam, da dringi nomo dem dringi; dem man teki oeman, dem oeman teki man, tee da pikado-watra kom, a poeloe dem alamal na grontapo. (Matth. 24, v. 38 & 39.)
Reti siksi hondro jari Noa ben ouroe da joe-roe, di a kom klari nanga da sipi, en di Masra ben seni hem go na ini, hem nanga hem wefi, nanga dem dri pikien vo hem, nanga dem oeman vo dem pikien, nanga dem so meni meti. Da heeli famili vo Noa ben meki aiti soema, di ben go kibri na ini da sipi; ma da sipi no ben habi masti nanga zeili, a ben de leki wan bigi hoso, disi dem potti na ini wan bigi sloepoe, vo a kan swem na watra tapo. We di dem ala go na ini kaba, na baka Masra Gado srefi kom tapo da luiki gi dem.
En dan da srefi dei Masra hopo ala dem dipi-dipi watra-horo, vo dem poeloe so meni watra, disi ben de na ondro gron; so srefi na tapo-sei a ben de, leki dem hopo so meni sluisi vo loesoe da watra, en da areen kom fadom tranga toemoesi, fotentin dei nanga fotentin neti langa. We dati meki da watra kom hei na grontapo tee a marki dritentin voetoe, a pasa ala dem hei bergi srefi; en da sipi vo Noa dati waka na da bigi watra tapo. We da so ala liebi-soema nanga ala liebi-meti, di de na grontapo, dem soengoe na ini da watra. Noa wawan ben libi abra, hem nanga hem famili, nanga ala dem meti, disi ben de nanga hem na ini da sipi. En da watra tan so hei na grontapo wan heeli feifi moen langa.
Ma Masra Gado no vergiti Noa nanga ala dem meti, disi de nanga hem na ini sipi. Bikasi na baka vo dem fotentin dei a meki wan tranga winti hopo na grontapo vo koti da areen, en na baka vo dem feifi moen da watra bigin vo fala, tee wan toe moen moro da sipi kom fassi reti na tapo vo wan bergi, dem kali da bergi Ararat. Ma dem pinti vo dem bergi wawan ben de vo si fosi.
We fotentin dei moro na baka, di Noa hangri vo sabi, efi heeli grontapo dre kaba, a hopo hem fensre, a jagi wan raver go na doro; ma da raver ben flei-flei rontoe so langa, tee da watra kom fala moro. Sebi dei na baka, disi Noa si, da raver no kom jete, a seni wan doifi go na doro, vo a kom sabi, efi ala dem sabana dre kaba. Ma di da doifi no finni wan plesi, dapee a kan potti hem foetoe, dati meki a kom baka na da sipi, en Noa hopo hem fensre a teki da doifi baka na ini sipi. Sebi dei moro na baka Noa seni wan tra doifi ageen go na doro, we dati broko wan olyf-boom-blaati, potti na hem mofo, en sabatem a kom baka na Noa nanga da njoe blaati na hem mofo. We dati meki Noa kom si, dati da watra fala boen-boen kaba. En sebi dei moro na baka a seni wan tra doifi ageen, ma dati no kom baka. We now Noa go poeloe da dakki, disi ben de na sipi tapo, en a si, dati heeli gron-tapo kom dre boen-boen.
Da tem disi Noa ben go na ini da sipi, dati ben de reti na ini da jari, disi ben meki wan doezend siksi hondro nanga feifitentin na siksi (1656), sinsi Gado ben meki hemel nanga grontapo, en Noa ben ouroe siksi hondro jari. Wan jari na baka, di Noa ben pasa wan heeli jari na ini da sipi, Masra Gado kom na hem, a taki: Komoto now na ini da sipi, joe nanga joe wefi, nanga joe famili, nanga ala dem meti toe; meki dem go liebi na grontapo, meki dem meki pikien, vo dem kom foeloe na grontapo! We dem doe so, dem alamal komoto na sipi, en so hesi dem potti dem foetoe na gron, nomo Noa go hopo wan altari gi Masra, a teki hafoe vo ala dem krin meti en vo ala dem krin fowloe, a kili dem, potti na da altari tapo vo wan ofrandi, en dan a go potti faja na da ofrandi, meki a bron. We di Masra smeri da switi smoko vo da ofrandi, a pra-misi, taki, hem no sa floekoe grontapo moro, hem no sa pori soema moro na so wan fasi, leki fa a ben doe, bikasi da ogri de na ini soema hatti tee vo sinsi dem pikientem. We so langa grontapo sa de, dem no sa kaba moro vo plani njanjam en vo koti njanjam, dre-tem nanga areen-tem no sa kaba moro, en dei nanga neti no sa kaba toe.
En Gado blesi Noa nanga dem pikien vo hem, a potti dem vo masra na heeli grontapo. So srefi a gi dem wan toe dri wet, vo dem sabi, sani dem moe njam, en fa dem moe holi dem srefi. Vo taki: Te wan soema kili wan tra soema, dem moe kili so wan soema baka; bikasi di Gado ben meki liebi-soema, a ben meki dem vo hem srefi speli, vo dem moe geersi hem. Na baka Gado meki wan ver-bond nanga Noa en nanga dem pikien vo Noa, a sweri gi dem, taki, hem no sa pori kondre moro na so wan fasi nanga watra; en a sa teeken da kontraki gi dem tee na tapo srefi, a sa meki wan areen-boo hopo, vo dem moe habi wan marki vo da verbond tee vo teego. We alatem, so langa soema sa de na grontapo, te dem si da areen-boo na tapo, dem moe loekoe dati vo wan bewysi, dati Gado no vergiti da verbond jete, disi a ben meki nanga Noa.
1. We da tori disia, di wi ben jeri vo da bigi-bigi watra-floedoe, dati de sori wi, Masra Gado hem da wan santa Gado en wan reti Gado, di de pai ala soema nanga reti; dem ogri soema a de strafoe, ma dem boen soema a de blesi. Alwasi Gado habi foeloe pasiensi nanga soema, tog a no wani, wi moe holi hem vo spotoe. So srefi di a ben pramisi Noa, taki, hem no sa pori kondre moro na so wan fasi, dati no moe meki wi denki, Gado no de strafoe da ogri moro, disi wi doe. Bikasi alwasi a no sa pori kondre moro nanga watra, tog efi wi no ke vo hem, a kan strafoe wi na nofo tra fasi, a de sabi vo finni wi tee tidei jete.
2. Masra Jesus ben taki toe vo da zondoe-floedoe, a taki: So leki kondre ben pori na Noa tem, so srefi a sa de ageen, te Soema-pikien sa kom baka, vo holi kroe-toe. No wan soema sa wani sabi Gado, no wan soema sa wani jeri hem, en no wan soema sa wani bribi hem srefi, so langa tee dem sa si. (Matth. 24, v. 37-39.) We vo dati hede Jesus vermane wi, a taki: Oen loekoe boen, vo oenoe no kili oen konsiensi nanga dringi tee vo droengoe, en nanga bigi hai vo njanjam, en nanga da soso goedoe vo disi grontapo, vo da gran dei vo Masra no moe doro onverwakti na oen tapo, kaba oen no klari! (Luc. 21, v. 34.)
3. Te wi si da mooi areen-boo na tapo, alatem wi moe membre, dati de wan gran marki vo Gado. Wi moe loekoe hem vo wan bewysi, fa Masra Gado ha foeloe pasiensi nanga soema. Ma wi moe loekoe boen toe, vo wi no dwingi Gado, vo meki da pasiensi vo hem moe kaba, bikasi troe-troe a habi hem marki, en a kan kaba, so leki dem hondro nanga twenti jari ben kaba toe, disi Masra Gado ben gi dem soema tem jete! (Juda v. 4.)
4. Noa ben sabi da boen, disi Masra ben doe hem, di a ben kibri hem na ini da sipi, vo a no dede na ini da watra leki ala dem tra soema, en vo dati hede hem hatti ben seni hem, vo a taki hem Gado gran tangi. We so srefi ala dem soema, disi ben de nanga wan hebi en nanga foeloe verdriti, kaba Masra ben poeloe dem na ini, a de fiti dem toe vo dem taki hem gran-tangi vo hem boen-hatti en vo ala dem gran wonder-wroko vo hem. (Psalm 107, v. 8.)
(1. Mos. 9, v. 18 & Kap. 11, v. 26.)
Noa ben habi dri manpikien, da Sem nanga Ham nanga Japhet. We ibriwan ben habi hem famili, dem ben meki pikien nanga pikien-pikien, tee vo ala kondre kom foeloe baka nanga soema. Noa srefi, dati go meki wan gron en a plani wan droifi-djari.
We wan dei di dem droifi ben repi, Noa teki dem, a masi dem, a dringi da wini tee a kom droen-goe, en dan a go lidom slibi na ini hoso, hem skin no ben tapo boen. We di hem pikien Ham kom na ini, en di a si, hem tata lidom so nakend, a djompo go na doro, a verteli dati gi dem toe brara vo hem. Ma Sem nanga Jafet, di dem jeri dati, dem teki wan klosi, dem go tapo dem tata skin; ma nanga baka dem waka go na ini, vo dem no si dem tata sjem.
We di Noa wieki, en di a jeri dasani, disi hem pikien Ham ben doe hem, a floekoe Kanaan, a taki, da famili vo hem sa tron katibo vo Sem nanga Jafet famili, dem sa dini dem. Ma Sem dati Noa blesi wan aparti blesi, a taki, Masra Jehova sa de hem Gado, a sa helpi hem famili, vo dem kom masra vo Kanaan-kondre. (Kanaan dati ben de wan pikien vo Ham.) So srefi Jafet ben kisi wan blesi toe na hem tata, bikasi Noa belovoe hem, a taki, dem famili vo hem sa go panja tee na ala kondre farawei, ma na bakatem dem sa kom liebi na ini dem hoso vo Sem, da vo taki, dem sa kisi hafoe toe vo da boen, disi da famili vo Sem, dem Djoe, sa finni na Masra, te da Messias sa kom. Dati Noa ben taki na profeti fasi.
Na baka vo da zondoe-floedoe Noa ben liebi dri hondro nanga vyftig jari jete, bifo a kom dede; we ala nanga ala a ben kisi negi hondro nanga vyftig jari. Wan soema vo Ham famili ben de, wan pikien-pikien vo hem, di dem kali Nimrod, dati ben kom wan tranga masra na grontapo, leki wan koning, en a ben de wan boen hontiman toe. We da srefi Nimrod ben meki wan bigi kondre, disi dem kali Babel, en na baka a doro tee na Asiria-kondre srefi, a meki wan bigi-bigi foto dapee, disi dem kali Ninive.
Omtrenti wan doezend nanga aiti hondro nanga fotentin na dri jari langa ala soema vo heeli kondre ben de taki wan tongo nomo, vo sinsi Gado ben meki hemel nanga grontapo. Ma na bakatem di soema kom foeloe baka, en di dem go soekoe wan tra plesi vo liebi, dem waka go na da sei, dapee zon hopo, en dem finni wan mooi kondre, disi dem kali Sinear, ofoe Babilon, da heeli kondre no ben habi bergi, a ben tan leki wan bigi-bigi sabana. We disi dem kom tan dapee, dem kom na da prakseri, dem taki: Kom meki wi go baka ston, meki wi meki wan bigi foto, nanga wan bigi toren na ini, da toren moe hei so tee da pinti vo hem moe kisi tee na tapo srefi, dati sa gi wi wan bigi nem na ala soema, di kom na wi baka. Kaba da toren moe tan leki wan bigi flagra-tiki, vo wi kan si hem na ala plesi en vo wi kan finni hoso baka, vo wi no lasi pasi go panja na tra kondre!
Ma ala di dem ben de na da wroko, bifo dem doro hem hafoe jete, Masra Gado srefi saka kom na ondro, vo a loekoe da foto nanga da toren, disi dem soema de meki. No vo taki, da loekoe a kom loekoe dem soso, ma di Gado no ben wani, dem moe doro da wroko, vo da hede a kom pori da wroko gi dem. Bikasi Masra ben wani expresi, dem soema no moe liebi ala na wan kondre, ma dem moe panja go tee heeli grontapo kom foeloe nanga soema; en buiti dati Masra no ben wani toe, vo da famili vo Sem moe moksi nanga dem tra soema. Masra Gado taki: Tee tidei ala soema na grontapo de meki wan kondre nomo, so srefi dem alamal de taki wan tongo nomo; we mi sabi, dem no sa libi da wroko, bifo dem doro alasani so, leki dem ben potti dati na dem hede. Ma mi sabi, san vo doe! Mi sa broeja da taki vo dem, mi sa meki no wan soema moe verstaa dasani, disi trawan taki! We vo da hede Masra Gado saka kom na ondro, a jagi dem alamal komoto de dapee, meki dem panja go na ala kondre rontoe na heeli grontapo, en da so dem ben moese kaba, vo meki da foto. We da vo dati hede dem ben kali da foto Babel, dati taki wan broeja fasi, vo di Masra ben meki ala soema tongo vo ala kondre ben kom na wan broeja-fasi dapee.
1. We da tori vo Noa de leri wi, alwasi Boekoe de kali Noa wan boen soema, tog di da Boekoe no kan lei, vo da hede a no kan kibri hem zondoe toe. A troe, wi kan taki, somtem Noa no ben sabi jete, da watra vo da droifi tranga so, vo a kan meki hem droengoe; a kan de so. Ma tog Gado ben wani, dem moe skrifi da tori gi wi vo wan waarskouwe, vo wi no moe meki didiebri kori wi. We Apostel Paulus vermane dem bribi-soema na Galacia-kondre, a taki: Joe soema! Loekoe boen nanga joe srefi, vo joe no fadom na so wan fasi toe!
2. Disi Noa ben lidom nanga soso skin na ini hem hoso, dati de leri wi toe, fa wi moe loekoe boen, vo wi doe alasani nanga maniri en respeki. Bikasi efi wan soema habi sjem vo hem skin, dati de helpi hem foeloe, vo a no doe takroe sani.
3. Disi Ham ben meki spotoe nanga hem tata tee, a kali dem toe brara vo hem, a taki, meki dem kom loekoe, fa dem tata lidom soso, we dati ben meki hem tata ben floekoe hem. Koning Salomo taki: Heloe vo dem pikien, disi de holi dem tata nanga dem mama vo spotoe! (Kap. 30, v. 17.) Ma boen vo ala dem pikien, disi de geersi Sem nanga Jafet; bikasi dem ben habi respeki vo dem tata, alwasi dem ben si wan foutoe na hem!
4. Ala di dem soema ben de meki da bigi toren na Babel, wi jeri, Masra Gado srefi kom loekoe da toren toe. We da so srefi a de potti hai na wi toe tee tidei jete. Alwasi hoepee wi de, a de si wi, en a sabi alasani, di wi doe. Wan psalm wi habi na ini Bybel, dati taki: Alwasi Masra hei tee na tapo, tog a de potti hai na ala liebi-soema, di de na grontapo. (Psalm 33. v. 10.)
5. Masra Jesus taki: Da bigi membre vo soema, dati de wan fiste na Gado hai. (Luc. 16, v. 15.) We juisti vo dati hede da mooi hei toren no ben boen na Gado toe, vo di dem ben meki hem, nomo vo dem kisi wan bigi nem.
6. Alwasi liebi-soema kan teki ala dem koni, vo prakseri wansani en vo doe wan bigi wroko, tog efi Masra Gado srefi no wani so toe, a no hebi gi hem, vo a pori da wroko gi dem. Liebi-soema de meki barki, ma Gado de meki sipi. (Psalm 33, v. 14.)
7. Da joeroe di Masra ben jagi dem soema komoto na Babel-kondre go panja na ala tra kondre, dem famili vo Sem ben go liebi na Asia- kondre; dem famili vo Jafet ben go na Bakra-kondre en dem famili vo Ham ben go na Afrika, dapee Ningre-kondre de. Tangi vo Gado, disi hem srefi ben zorgoe vo wi alamala, vo wi ben kom jeri da Evangelium vo Kristus. Tangi vo hem boen hatti, disi a ben meki dem Ningre toe kan kom na bribi! Bikasi wi Masra Jesus Kristus de wan Helpiman vo ala kondre, da hem poeloe da floekoe baka, disi Gado Masra ben floekoe wi vo wi zondoe hede!
(1. Mos. 11, v. 27 & Kap. 14.)
Na baka vo da panja, disi dem famili vo dem dri pikien vo Noa ben panja go na ala kondre, dem famili vo Ham en vo Jafet kom vergiti Gado hesi. Alwasi dem ben sabi, wan Gado nomo de na tapo, tog dem kom na da takroe prakseri, vo teki iniwan tra sani, loekoe dati leki Gado; trawan ben begi na zon, trawan na moen, trawan na star, trawan na kow en na sneki srefi (Rom.1,v.19-24.) En vo taki reti, dem soema vo Sem famili srefi no ben bevry vo dati toe.
We wan soema ben de vo da srefi famili vo Sem, disi dem kali Tara, a ben liebi na Ur na Kaldea- kondre, en a ben habi dri manpikien, da Abram nanga Nahor nanga Haran. Haran ageen ben habi wan pikien, disi dem kali Lot. So srefi Abram nanga Nahor teki oeman toe, di vo Abram dem kali Sarai en di vo Nahor dem kali Milka. Ma Sarai, dati no ben meki pikien.
We di dem alamal ben de dini kroekoetoe gado toe, net so leki ala tra kondre ben doe, en di Masra Gado wani, Abram moe de da soema, disi moe holi da reti bribi, en disi na hem famili da Messias moe komopo, we vo dati hede Masra kom na Abram, a taki: Komoto na joe kondre en na joe tata hoso, libi joe famili, en go na wan tra kondre, di mi sa sori joe! Mi sa meki joe kisi wan bigi famili, en mi sa blesi joe tee, joe srefi sa tron wan blesi vo trawan baka; da joe mi teki vo meki ala soema na ala kondre moe finni blesi tee na heeli grontapo srefi. We di Abram ben bribi Gado, a doe so, leki Masra taki gi hem, a libi hem kondre, a teki pasi go na da kondre, disi Masra ben sori hem. Vo taki reti, Gado ben loekoe vo poeloe Abram krin-krin na ala hem famili, ma nanga da fosi verhuisi a no ben kan kisi dati jete, bikasi da tata vo Abram nanga so meni tra soema vo hem famili, dem ben go nanga hem toe. We di Masra no ben finni vo boen jete, vo piki Abram so krin vo da reti kondre, dapee a moe go, dati meki dem alamal go liebi na Haran na Mesopotamia -kondre. Ma wan toe dri jari na baka, di da ouroe tata vo Abram kom dede, Masra kom poeloe Abram dapee, a tjari hem go na Kanaan-kondre, hem nanga hem wefi Sarai, nanga Lot, hem brara pikien. Da srefi jari, di dem ben doro na Kanaan-kondre, Abram ben ouroe sebitentin na feifi jari. En Masra kom na hem dapee, a belovoe hem, a taki: Da kondre disi mi sa gi na joe famili, da vo taki, na dem pikien-pikien vo joe, disi sa kom na joe baka. We da srefi plesi, dapee Masra ben kom taki so nanga Abram, Abram meki wan altari gi Masra, a dini hem, en a bigin preki tori vo Jehova. Dati ben de na Sikem. Ma na baka-tem Abram go moro na hoposei, tee a kom klosibei na Betel, na dapee a meki wan altari moro gi hem Gado.
We da so Abram ben waka heeli Kanaan-kondre doro, sondro a ben habi wan vaste plesi vo tan. A ben sabi, dati hem de wan vreemde soema na disi grontapo, en dati ben meki a ben soekoe da reti kondre vo hem, disi de na tapo. (Ebr. 11, v. 9. 10. 16.) Na bakatem di heeli Kanaan-kondre kom pina toemoesi nanga hangri, Abram go moro na hoposei tee a doro na Egipti-kondre srefi.
We di a kom klosibei na da kondre, Abram waarskouwe hem wefi Sarai, a taki: Jere, mi sisa! Te dem Egipti-soema si joe, joe no moe taki, joe da mi wefi, ma joe moe taki, joe da mi sisa; bikasi joe de wan mooi oeman, somtem te dem si joe, dem sa wani joe; en efi dem sabi, mi da joe man, somtem dem kan kili mi srefi, nomo vo dem kan teki joe sondro trobi. We so hesi dem doro na Egipti-kondre nomo, koning Farao jeri wantem, taki, so wan mooi oeman kom na hem kondre, en djoensnoe a seni teki hem, potti hem na hem hoso. So srefi a doe Abram foeloe boen vo Sarai hede. En Abram kisi so meni skapoe nanga kow nanga hasi nanga kameli, nanga foeloe slavoe srefi a kisi toe, man nanga oeman.
Ma ala di Sarai ben de na koning Farao hoso, Masra Gado kom strafoe Farao tranga, nanga hem heeli famili, vo Abram wefi hede. We so hesi Farao kom sabi da loetoe vo da strafoe, a kali Abram kom, a taki: Fa joe kan doe mi so? Vo san-hede joe no ben taki gi mi, Sarai da joe wefi? Ma di joe ben taki, hem da joe sisa, dati meki mi teki hem. We teki joe wefi baka, en go vo joe! We da so Abram komopo baka na Egipti-kondre, en Farao gi hem wan toe dri soema, vo potti hem na pasi, vo no wan ogri moe kisi hem nanga hem wefi, nanga Lot toe, di ben de nanga hem. En Abram kom liebi baka na Betel, na da srefi plesi, dapee a ben meki da altari tra jari.
Tee vo so langa Lot ben holi hem srefi alatem nanga hem oom Abram; dapee Abram ben go, dapee Lot go toe nanga hem. Ma di Lot srefi ben habi foeloe skapoe nanga kow nanga so meni tenti, dati ben meki da kondre no ben kan teki dem, vo dem ala toe liebi makandra; bikasi dem herder vo Abram nanga di vo Lot, doro nomo dem ben kisi trobi makandra. En buiti dati dem soema vo Kanaan en vo Peres ben liebi na da srefi kondre toe.
We dati meki Abram kom taki nanga Lot, a taki: Jere mati, no meki mi nanga joe kom na trobi! So srefi dem herder vo mi nanga di vo joe, dem no moe liebi nanga trobi toe, dati no fiti, bikasi wi ala toe de brara nanga brara makandra. Hoefasi, da heeli kondre no hopo na joe fesi? We meki wi platie dan! Efi joe wani go na kroekoetoe sei, dan mi sa go na reti sei; ma efi joe wani go na reti sei, dan mi sa go na kroekoetoe sei. We, dan Lot hopo hem hai, a loekoe da heeli kondre rontoe, en di a si, da kondre na Jordan sei dati habi foeloe watra, a ben de leki wan djari vo Masra srefi, dati meki a go liebi dapee; bikasi bifo Masra ben pori Sodom nanga Gomora, da heeli kondre ben de wan mooi plesi vo troe. We da so dem toe brara platie makandra, Lot go meki hem kampoe na Sodom, en Abram tan na Kanaan-kondre. Ma dem soema vo Sodom ben ogri vo troe, dem ben doe takroe toemoesi pasa-marki, en dei vo dei dem ben trobi da boen soema Lot nanga da takroe liebi vo dem; dem soekoe vo pori hem srefi toe, meki a pre da takroe pre nanga dem. (2 Petr. 2, v. 7 & 8.)
We na baka di Lot ben komopo na Abram, Masra Gado kom na Abram ageen, a taki: Hopo joe hai, en loekoe rontoe! Da heeli kondre disia, so leki joe si hem de, mi sa gi na joe en na dem pikien vo joe pikien toe vo teego. Mi sa meki dem famili vo joe kom wan bigi naatsi, dem sa kom foeloe so tee no wan soema sa man vo teli dem srefi. We hopo dan, en waka heeli kondre doro, bikasi da joe sa kisi hem. We, Abram doe so, a broko hem tenti, a go verhuisi tee na Mamre na sei Hebron, a meki wan altari dapee gi Masra.
Ma hem brara-pikien Lot, dati no ben habi wan boen liebi na Sodom kweti-kweti, alwasi fa da kondre ben mooi. We wan dei da koning vo Sodom-kondre ben feti wan bigi feti nanga wan tra koning, en di da tra koning kom masra vo da feti, a teki ala soema vo Sodom nanga dem goedoe, tjari gowei. So srefi Lot ben de na ini toe, dem teki hem toe nanga ala hem goedoe, tjari gowei. Ma so hesi Abram kisi njoesoe vo dati, a teki dri hondro nanga tin na aiti knegti vo hem, dem moro knapoe soema, di a habi, bikasi dem alamal ben de jonge krioro vo hem, a gi dem pyli nanga boo, en dan a jagi na dem fetiman baka, tee na da foto Dan. Na dapee a platie da hipi vo hem, en na neti a doro na dem fetiman tapo, a jagi dem gowei krin-krin. Da so Abram ben poeloe Lot nanga ala hem goedoe na dem vyanti hanoe, a tjari hem kom baka na Sodom, nanga ala dem tra soema toe.
We di Abram komopo na da feti, Melchisedek, da koning vo Salem, kom miti hem hafoe pasi, a tjari brede nanga wini kom gi hem. Da Melchisedek ben de wan domine vo Gran-Gado na tapo. We Melchisedek blesi Abram, a taki: Gran-Gado na tapo, disi hemel nanga grontapo de vo hem, da hem moe blesi joe! Ma Abram teki hafoe vo ala hem goedoe, a gi Melchisedek tin procenti. (Ebr.7, v.1 & 2.) So srefi da koning vo Sodom toe, a kom miti Abram hafoe pasi, a wani gi hem wansani vo pai hem, a taki: Meki mi teki dem soema, disi joe winni na da feti, en joe kan holi ala da tra goedoe! Ma Abram taki: No, Gado kibri mi, vo mi teki wansani na joe hanoe, no wan pikin-sani srefi mi sa teki, no wan soso tetei srefi, vo joe no moe taki, da joe ben meki Abram tron wan goedoeman.
1. We da tori vo Abram de leri wi wan toe dri sani. Fosi, disi Masra ben kali hem, vo a libi hem kondre nanga ala hem famili, meki a go liebi na wan tra kondre, disi a no sabi jete, dati ben de wan bigi sani vo troe, disi Masra ben de soekoe na hem. Ma Gado ben doe dati nomo, vo dem pikien nanga dem pikien-pikien vo hem no moe leri da kroekoetoe-gado-wroko na dem tra famili, bikasi dem alamal ben de tranga na ini da afgoderywroko. We da srefi sani wi Masra Jesus ben wani taki toe, di a taki: Disoema disi lobbi hem tata ofoe hem mama moro leki mi, a no waarti vo mi. (Matt.10, v. 37.)
2. Da wan switi pramisi vo troe, disi Masra ben pramisi Abram, di a taki: Da joe mi teki vo meki ala soema na heeli grontapo moe finni blesi! Da vo taki: Da vo Abram famili da Messias sa komopo, disi sa meki ala soema finni boen na Gado. We dati da wi lobbi Helpiman Jesus Kristus.
3. Da tori vo da platie vo Abram nanga Lot, dati de sori wi, fa Abram ben de wan soema, disi no ben lobbi meki trobi. We meki wi teki Abram maniri toe! En te wi habi vo platie wansani nanga trawan, betre wi meki trawan teki dasani, disi boen na dem, leki vo wi meki trobi nanga dem. Masra Jesus taki: Boen vo dem vo soema, disi habi wan tiri safri fasi, bikasi dem sa de masra vo kondre! (Matt. 5:5,9.)
4. A troe, Sodom-kondre ben de wan mooi kondre reti-reti, ma dem soema, disi ben liebi dedapee, dem no ben de boen soema kweti-kweti, en vo dati hede a no ben fiti da boen soema Lot, vo a go liebi dapee nanga dem ogri soema makandra. Bikasi no wan soema ben dwingi hem vo dati, hem srefi ben wani so; bikasi da mooi vo da kondre ben kori hem. Masra Jesus taki: San a kan helpi wan soema, alwasi a winni heeli kondre srefi, kaba a lasi hem zieli? (Matt. 16, v. 26.)
5. Melchisedek ben de wan soema, disi ben tan, leki wan teeken vo wi Masra Jesus Kristus, bikasi hem de da reti Gran-domine vo wi en da Koning vo ala soema hatti. (Ps. 110, v. 4. Ebr. 6, v. 20.) So ben tjari brede nanga wini kom gi Abram, vo gi hem tranga, so srefi wi Masra Jesus de tjari brede nanga wini kom gi wi toe, te a de kali wi kom na da santa tafra vo hem, vo meki da Gado-njanjam moe gi wi tranga, vo wi kan feti boen nanga didiebri, en vo wi kan doro tee na ini Gado-kondre.
(1. Mos. Kap. 15 tee 18.)
Di Abram komopo na da feti, disi a ben helpi hem brara pikien Lot, na baka a kom frede dem vyanti pikinso, a taki, somtem da koning vo Elam nanga di vo Sinear kan kom soekoe hem baka vo feti nanga hem, bikasi dem ben de heiden-soema en boen fetiman toe.
Ma Masra Gado kom na hem wan dei, a troo-stoe hem vo dati, a taki: No frede Abram, mi srefi sa helpi joe, vo no wan ogri moe kisi joe, en mi sa doe joe foeloe boen! Abram taki: Ke mi Masra vo mi! San joe sa doe gi mi? Di mi no ha pikien vo mi srefi, soema sa kisi ala mi goedoe? A no da pikien vo Elieser, da gran foetoeboi vo mi hoso? Masra taki: No no, a no hem sa de joe erfgenaam, ma joe eigen pikien srefi, di joe sa meki, da hem joe sa libi joe goedoe gi. En djoensnoe Masra teki Abram, a tjari hem go na doro mofo, a taki: Loekoe na tapo, en teli ala dem star! Joe man vo teli dem? We da so meni pikien joe sa kisi, nanga pikien-pikien, tee no wan soema sa man vo teli dem! Ma fosi dem sa de vreemde soema na wan tra kondre, disi no de vo dem srefi, en na dapee dem sa de tranga na ondro dwingi, dem heiden sa pina dem fo hondro jari langa. Na baka dem sa libi dem, en te dem komoto na da kondre baka, dem sa tjari foeloe goedoe go nanga dem. Ma joe srefi sa go slibi nanga kouroe hatti, leki wan bejari soema, en dem sa beri joe nanga ala respeki. We Abram bribi da taki vo Masra, en dati ben meki Masra loekoe hem vo wan reti bribi-soema.
Sarai, da wefi vo Abram, dati no ben meki pikien. Ma a ben habi wan pikin oeman, di ben de vo Egipti-kondre, hem nem Hagar. We di Sarai ben sabi, Gado ben belovoe Abram wan pikien, kaba hem srefi grani kaba, tee vo hem no kan meki pikien moro, dati potti hem na da prakseri, a taki, somtem Gado wani gi Abram wan pikien nanga wan tra oeman. We vo da hede a teki Hagar, tjari go gi Abram, vo a liebi nanga hem, en vo da slavoe-oeman moe meki wan pikien gi hem missi. We Abram doe so, leki hem wefi taki gi hem. Ma so hesi Hagar kisi bele, a kom asranti tee, a no wani jeri hem missi moro. We dati meki Sarai go na Abram, a taki, da hem tjari da trobi kom gi hem, bikasi vo sinsi da pikin oeman de nanga bele, a no teli hem missi moro. Abram taki: We a no de joe pikin oeman? doe nanga hem leki fa joe wani! Ma di Sarai ben wani strafoe hem, Hagar teki pasi, a ronwei.
We di Hagar ben kibri na boesi, wan dei da Engel vo Masra kom miti Hagar, a sidom na sei wan watra-horo, en da Engel haksi hem: Hoepee joe ko-mopo Hagar? En hoepee joe de go? Hagar taki: Na mi missi Sarai mi komopo, mi ronwei. Da Engel taki: No no, dati no fiti, drai baka, go na joe missi en saka joe srefi na hem ondro! Di joe de nanga bele, joe sa meki wan pikien, disi joe moe kali Ismael; bikasi Masra ben habi sari-hatti vo joe. Ma da pikien sa kom wan krasi soema, a sa feti nanga ala soema, en nanga ala hem brara srefi a sa feti toe.
We Hagar doe so, leki da Engel taki gi hem, a go baka na hem missi. En na baka a meki wan manpikien, disi Abram kali Ismael. Da joeroe tem Abram ben ouroe aititentin na siksi jari. Ma Ismael, dati no ben de da reti pikien, disi Masra Gado ben belovoe hem, alwasi Abram nanga Sarai ben denki so.
We dati meki wan tin na dri jari moro na baka, di Abram ben kisi negitentin na negi jari kaba, Masra kom na hem vo toetron, vo meki a kom sabi da tori moro krin, a taki: Mi de da Gran-Gado vo tapo; we waka alatem so, leki joe de na ondro mi hai, en holi joe srefi boen! Bikasi mi sa meki wan verbond nanga joe, dati joe sa kisi wan bigi-bigi famili. We dem no moe kali joe Abram moro, ma Abraham dem moe kali joe, bikasi mi wani, joe moe kom wan gran tata vo foeloe-foeloe kondre. En da verbond, di mi nanga joe sa meki, en di mi sa meki nanga dem pi-kien vo joe pikien, dati sa de wan verbond tee vo teego srefi, dati mi sa de joe Gado, en da Gado vo ala joe famili na joe baka. En mi sa gi na joe fa-mili da heeli Kanaan-kondre disi, dapee joe srefi de liebi leki wan vreemde soema vo di djoensnoe. Ma joe srefi nanga joe famili, oen moe holi da verbond toe, oen moe loekoe hem leki wan vaste kontraki, di wi meki makandra. Oen moe besnyde oen srefi nanga ala mansoema vo oenoe, dem krioro nanga dem tra slavoe toe, di oen ben bai na tra kondre.
Te wan oeman meki wan manpikien, oen moe besnyde da pikien, so hesi a kisi aiti dei nomo, dati moe de wan vaste wet vo oen tee vo teego. Ma efi dem libi wan boi soso, sondro dem besnyde hem, so wan boi mi no wani na oen mindri, dem moe poeloe hem na kondre krin-krin. We joe wefi Sarai joe no moe kali Sarai moro, ma Sara joe moe kali hem (dati taki wan gran oeman), bikasi hem mi sa blesi toe, vo a meki wan pikien gi joe; en da pikien joe moe kali Isaak. We di Abraham jeri, hem Masra taki so switi nanga hem, a hiti hem srefi nanga bele na gron gi Masra, a taki hem grantangi vo hem boen hatti. En so srefi a begi Masra toe vo da tra pikien vo hem, a taki: Ke mi Masra, tangi-tangi, meki Ismael moe liebi na joe fesi toe! Masra taki: Ja, a sa liebi toe, en mi sa blesi hem tee a sa kisi wan bigi famili toe. Ma Sara sa meki wan tra pikien gi joe, di joe moe kali Isaak, da hem sa de da soema, disi mi sa meki mi verbond nanga hem tee vo teego. We da so Masra libi Abraham vo di leisi, a go baka na hemel. En da srefi dei Abraham teki Ismael nanga ala dem tra mansoema, di de na hem hoso, a besnyde dem, so leki Masra ben taki gi hem. We da joeroe, disi Abraham ben besnyde hem srefi, a ben ouroe negitentin na negi jari, en hem pikien Ismael ben ouroe tin na dri jari.
Na baka-tem Masra Gado kom loekoe Abraham ageen na wan tra fasi. Bikasi wan dei na twalf joe-roe tem so, di Abraham ben sidom na hem doro mofo na Mamre, na ondro wan boom, a hopo hem hai, a si dri soema de kom na hem, dem de na hem fesi. En a hopo waka hesi, vo go miti dem, a potti hem fesi tee na gron gi dem, a taki: Ke mi Masra! efi joe ha boen hatti vo mi, tangi-tangi, no pasa joe foetoeboi hoso. Mi sa meki dem tjari pikin watra kom gi oenoe, en dem sa wasi oen foetoe djoensnoe. Efi oen plisi, doe mi da plisiri, en go sidom ruste pikinso na ondro da boom. Mi sa go loekoe wan pikin njanjam gi oenoe, vo oen kan njam wansani, en dan oen kan teki pasi baka! Dem taki: A boen, doe so leki joe taki!
We Abraham djompo hesi go na koekroe, a kali Sara, a taki, meki a feti hesi, vo baka wan koekoe gi dem soema. Ma Abraham srefi go teki wan pikin kow, a meki hem foetoeboi kili hem, brai hem na faja. En Abraham go deki tafra, a potti botro nanga melki gi dem, nanga wan piesi meti vo da pikin kow, a meki dem soema go sidom njam, en Abraham srefi tanapoe dini tafra gi dem.
We di dem sidom na tafra de njam, dem haksi Abraham, hoepee hem wefi Sara de. Abraham taki: A de na ini mi tenti. Masra taki: We joe sabi? tra jari na so wan moen mi sa kom loekoe joe baka, en dan joe wefi Sara sa habi wan pikien. Ma Sara jeri toe, san Masra taki, bikasi a ben tanapoe na baka da doro vo hem tenti. We di dem ala toe ben de bejari soema kaba, Abraham nanga Sara, dati meki Sara kom lafoe na ini hem hatti, a taki: Fa mi nanga mi Masra sa meki pikien jete, di mi ouroe kaba, en mi Masra srefi de wan bejari soema toe! So wan plisiri mi no kan verwakti moro. Ma Masra piki Abraham, a taki: Ja, Sara de lafoe mi, a taki, dati no kan de. Hoefasi? wan wroko sa de, disi sa moro Masra, disi Masra no sa man vo doe? Vo troe-troe, na so wan joeroe mi sa kom baka tra jari, en Sara sa habi wan pikien. We dati meki Sara kom frede pikinso, a bigin vo stry, a taki, hem no ben lafoe. Ma Masra taki: Mi sabi boen-boen, dati joe lafoe.
Na baka dem soema hopo, dem teki pasi go na Sodom, en Abraham potti dem na pasi. We di dem de waka so, Masra taki: Fa mi sa libi Abraham, bifo mi meki a kom sabi dasani, di mi de go doe? Tog hem de da soema, disi sa meki ala kondre na heeli grontapo finni boen. En mi sabi, taki, a sa leri dem pikien vo hem, tee vo pikien-pikien srefi, a sa vermane dem, vo dem waka da reti pasi vo Masra, en vo dem holi dem srefi boen. We dem soema vo Sodom en vo Gomorra dem ogri vo troe, en dem zon-doe hebi, dem bari tee na mi jesi srefi, dem kisi dem marki kaba; vo da hede mi de go, vo go loe-koe, efi a de so. We dem toe Engel, di ben de nanga Masra, dem waka doro, dem go tee na Sodom. Ma Abraham tan de nanga Masra jete, a haksi hem: Hoefasi, joe sa kili dem boen soema nanga dem ogri soema makandra wantem? No no Masra, mi no bribi so; joe no de da kroetoeman vo heeli grontapo? Tog joe no sa pai boen soema nanga ogri soema wan fasi. We efi somtem vyftig boen soema sa de na da foto jete, joe no sa gi da heeli foto pardon vo dem vyftig soema hede? Masra taki: Efi mi finni vyftig boen soema na Sodom jete, mi sa gi da heeli kondre par-don. Ma Abraham taki: Ke mi Masra, no mandi nanga mi, mi de wan soso stof, mi de doti soso! Ma di mi teki hatti vo taki nanga joe, grantangi! Somtem joe no sa finni vyftig reti soema. Masra taki: We efi mi finni fotentin na feifi, mi no sa pori da foto. Abraham taki ageen: Somtem joe sa finni fotentin nomo. Masra taki: A boen, mi finni foten-tin? mi no sa kili dem trawan toe vo dem fotentin soema hede. We da so Abraham akorderi nanga Masra, a begi hem so langa, tee Masra taki, efi twenti boen soema sa de, hem no sa pori Sodom. Ma Abraham proberi wantron moro, a taki: Ke mi Masra, grantangi! no mandi nanga mi, disi mi teki hatti, vo trobi joe wantron moro: Somtem joe sa finni tin boen soema nomo. Masra taki: We, efi tin boen soema sa de jete, mi no sa kili ala dem trawan toe, vo dem tin soema hede. Da so Masra gowei libi hem, en Abraham drai baka go na hem hoso.
1. We te wi jeri da tori vo Abraham, dati meki wi kom membre dasani, disi Apostel Paulus de skrifi, taki, Abraham de wan tata vo ala boen bribi-soema; bikasi a ben habi bribi nanga hoopoe, alwasi no wansani ben de vo hoopoe jete. (Rom. 4, 18.) Boen vo wi, efi wi bribi Gado woortoe wantem, alwasi wi verstand no kan begrypi hem so hesi! (Lukas 1, v. 37.)
2. Wi Masra Jesus, di a ben de leri soema, a taki tori toe vo Abraham, a taki: Abraham ben plisiri vo troe, disi a ben habi da boen hede, vo si da dei vo mi. (Joh. 8, v. 56.) We dati meki wi si, da Masra, disi ben kom loekoe Abraham na Mamre, en disi ben taki so switi nanga hem, dati ben de da pikien vo Gado srefi. Ma na bakatem, di da reti joeroe vo hem ben kisi, disi Masra Jesus ben waka rontoe na disi grontapo na hem liebi-soema-fasi dritentin na dri jari langa, dati ben de wan moro switi tem srefi, bikasi datem foeloe soema ben kan si hem, en a ben taki moro switi toe nanga dem soema, leki a ben taki nanga Abraham srefi. Ma moro switi a sa de vo wi, te da bigi joeroe sa kisi, disi wi sa kom si hem na hemel. Bikasi na dapee wi sa si hem hai na hai, so leki fa a de, en wi hatti sa plisiri vo troe. (1 Joh. 3, v. 2.)
3. Di Abraham ben de so wan boen mati vo Gado, (Jakobus 2, v. 23.) en di a ben begi hem so switi nanga so wan familiari fasi, ma nanga respeki en nanga pasiensi; we dati ben meki da begi vo hem no kom verfeeli Gado, alwasi Abraham ben trobi Masra vo troe, a ben dwingi hem srefi nanga da begi vo hem. We meki wi begi Masra toe nanga pasiensi! Fosi wi moe begi vo wi eigen zieli, en dan wi moe potti wan boen mofo gi ala tra soema toe.
(1. Mos. Kap. 19.)
Dem toe Engel vo Masra, disi ben de nanga Gado pikien na Abraham hoso, da joeroe di dem doro na Sodom a ben lati kaba, ma dem miti Lot sidom na doro mofo jete. We so hesi Lot kom si dem toe soema, djoensnoe a ben de, leki wan soema taki gi hem, dem no de liebi-soema soso, en dati meki a hopo go miti dem, a meki wan dipi kompli-menti gi dem, vo sori dem respeki, en dan a begi dem: Tangi-tangi, mi Masra vo mi, kom na ini, tan di neti na mi hoso! Mi sa gi oen watra, vo oen wasi oen foetoe, en dei broko mamantem oen kan teki pasi baka, gowei. Ma di dem ben sabi na fesi, efi dem doe so, dati sa tjari Lot na foeloe trobi, vo da hede dem taki: No, betre wi tan na doro-sei. Bikasi foeloe soema ben njoesoe so na da kondre. Ma Lot begi dem so meni tee dem kom na ini, dem go sidom njam nanga hem.
We bifo dem go lidom slibi, ala soema vo da heeli foto Sodom kom makandra, ouroewan nanga jongewan, dem rontoe Lot hoso, dem naki doro, en dem bari Lot, vo a tjari dem toe soema kom na doro, nomo vo dem kan pre da takroe pre nanga dem, disi dem soema vo Sodom ben de njoesoe. Ma Lot go na dem na doro-sei, a tapo doro na hem baka, en a begi dem, a taki: Ke mi mati, no doe so ogri! No trobi dem toe soema, bikasi mi srefi ben teki dem na ini mi hoso, vo no wan soema moe trobi dem. Ma dem soema bari Lot, dem taki: Go vo joe! Hoefasi, joe de da wan enkli vreemde soema dia, kaba joe wani komanderi wi? No no, wi sa sori joe! We da so dem bigin vo trobi Lot toemoesi vo dem toe soema hede, tee dem feti vo broko da doro srefi. Ma dem toe soema, disi ben de na ini hoso, dem hopo doro hesi, dem teki Lot na ini, en dan dem tapo doro baka. Kaba ala dem tra soema, disi ben de na doro-sei, dem kisi dem strafoe wantem, bikasi Gado meki dem hai kom doengroe tee dem no kan si noti moro; dem soekoe da doro tee dem kom weri srefi, ma dem no finni.
We na baka dem toe soema haksi Lot: Hoefasi? joe habi soema diaso na foto, di de vo joe famili? somtem wan freiri vo joe pikien, ofoe wan tra famili? Efi so wan soema de, teki hem, tjari gowei! Bikasi dem zondoe vo da foto disia dem bari tee na tapo srefi, kaba Masra seni wi kom de, vo wi pori da foto. We di dem toe oeman-pikien vo Lot ben habi freiri kaba, Lot go na dem wantem, a taki, meki dem feti vo gowei, komoto na ini foto, bikasi Masra de go pori da foto. Ma dem soema no bribi Lot, dem meki spotoe srefi nanga hem.
We dei-broko mamantem froekoe-froekoe dem toe Engel taki gi Lot, meki a feti hesi, vo a komoto, hem nanga hem famili, vo dem no kisi wan ogri toe. En di Lot ben drai pikinso nomo, dem toe Engel teki hem na hanoe, hem nanga hem wefi, nanga dem toe pikien vo hem, tjari go tee na sabana-sei, en da-pee dem libi hem. Bikasi vo Abraham hede Masra ben poeloe Lot na ini da strafoe, vo di Abraham ben begi hem so meni. We so hesi dem toe Engel ben libi Lot na da sabana, Masra Gado srefi kom waar-skouwe hem dapee a taki: Loekoe boen, vo joe kibri joe ziel! No loekoe na joe baka; so srefi joe no moese tanapoe loekoe, no pikinso srefi, so langa joe no komoto krin-krin na disi kondre na Jordan sei! Ma waka doro, go kibri tee na tapo da bergi, di de na joe fesi janda, vo joe no dede! Ma di Lot ben frede, somtem da onweri kan kom moro hesi, leki hem sa man vo kisi da bergi, dati meki a begi Masra, a taki: Ke mi Masra, di joe habi so boen hatti vo mi, joe poeloe mi na ini da ogri, gran-tangi! mi no sa man vo kisi da bergi, somtem wansani kan miti mi dapee, vo mi dede!
We mi si, wan foto de moro klosibei jandaso, tangi-tangi, mi Masra, gi mi pasi, vo mi go kibri dapee, vo mi no kisi wan ogri! tog da wan pikin foto nomo! Masra taki: We di joe begi mi so, mi sa jeri joe, mi no sa pori da pikin foto nanga faja. Waka hesi, vo joe doro dapee, bikasi mi no kan bigin wansani, bifo joe kisi jandaso! Da vo dati hede dem kali da srefi foto Zoar, dati taki: wan pikin sani.
We di Lot kisi na Zoar, a ben de da srefi joeroe, di zon hopo na tapo, en so hesi a doro nomo, djoens-noe Masra Gado meki faja nanga zwavel komoto na tapo, leki wan tranga areen, a fadom na dem toe foto tapo, da Sodom nanga Gomorra, en da heeli kondre vo dem na Jordan sei soengoe krin-krin, nanga ala dem soema toe; da srefi plesi, dapee dem toe foto ben de, tron wan bigi watra, disi dem kali da dede-zee, bikasi tee tidei noti kan liebi na ini, no wan fisi srefi. We ala di dasani ben de pasa, da wefi vo Lot drai hem fesi, loekoe baka, en wan-tem a tron wan zoutoe-ston.
Da srefi mamantem froekoe-froekoe Abraham hopo go na da plesi, dapee hem nanga Masra ben taki tra dei, en di a drai, loekoe na Sodom sei, a si wan smoko komopo na da kondre go na tapo, a tan leki wan smoko vo wan bigi-bigi oven.
Ma Lot no tan na Zoar, a komoto baka, hem nanga dem toe oeman-pikien vo hem, dem go tee na wan bergi tapo, en na dapee dem tan vo liebi na ini wan horo, bikasi Lot ben frede vo tan na Zoar. We na baka dem pikien vo Lot ala toe kom meki pikien; da wan meki wan pikien, disi dem kali Moab, dati ben kom da tata vo dem Moabitri-soema; en da trawan meki wan pikien ageen, disi dem kali Ammon, dati ben kom da tata vo dem Ammonitri-soema.
1. We da tori vo Abraham en vo Lot, disi Abraham ben verzoekoe dem dri soema, vo kom njam na hem hoso, en disi Lot ben ontvanga dem toe soema so switi, meki dem slibi na hem hoso: dati meki wi kom membre da ver-mane, disi Apostel Paulus vermane dem bribi-soema, di a taki: Te oen si tra soema, disi no habi wan reti plesi vo tan, oen no moe drai, vo teki dem na oen hoso, bikasi nofo soema, disi ben doe so, dem ben teki Engel srefi na dem hoso, sondro dem srefi ben sabi. (Ebr. 13, v. 2.)
2. Dem soema vo Sodom ben ogri vo troe. Da vo taki, dem ben habi hei membre, dem no ben habi lobbi vo trawan, dem no ben lobbi wroko, en di dem no ben wani sabi, dati wan Gado de na tapo, dati meki dem ben soekoe dem plisiri vo disi grontapo soso, dem ben doe so toemoesi takroe zondoe srefi, tee Masra Gado no ben kan si dem moro na hem hai, a ben habi wan fiste srefi vo dem. (Hezek. 16, v. 49 & 50. Lukas 17, v. 28-30.) We efi na wan kondre ala soema de feti na da ogri baka, man nanga oeman, ouroe soema nanga jongewan, vo dem zondoe kom bari tee na hemel srefi, dan wi kan sabi, da tem de klosibei, disi Masra Gado sa kom strafoe dem.
3. Apostel Petrus taki: Masra Gado sabi, vo poeloe dem boen bribi-soema vo hem na ini ala ogri, disi de loekoe vo tesi dem. (2. Petri 2, v. 9.) We da vo dati hede a ben seni dem toe Engel vo hem go na Lot, vo dem poe-loe hem na Sodom. Bikasi so leki Apostel Paulus taki: Dem Engel alamala de na dienste vo Gado leki bood-skopoeman, disi Masra de seni go, vo dini dem boen bribi-soema. (Ebr. 1, v. 14.)
4. Disi Gado ben pori dem toe foto Sodom nanga Gomorra so tee, dem tron wan hipi asesi soso, a ben doe dati vo waarskouwe ala dem tra ogri soema, disi sa kom na bakatem, vo dem moe teki wan waarskouwe na dati. (2. Petri. 2, v. 6.) Ma di Gado ben strafoe dem ouroe-tem-soema so tranga, tee a pori dem foto krin-krin, fa a moe strafoe dem soema vo disi- tem nojaso, di no wani ke vo da Evangelium vo Kristus! - Masra Jesus srefi taki: Na da laatste dei vo kondre, te Gado sa kroetoe ala soema, dan dem soema vo Sodom-kondre en vo Gomorra no sa kisi so ogri strafoe srefi, leki so wan foto vo wi tem, disi no wani bribi. (Matt. 10, v. 14 & 15.)
5. Da tori vo Lot de gi wi wan vermane toe, a taki, meki wi platie nanga dem soso kondre-soema. Kaba wi no moe drai so leki Lot ben drai; ma hesi wi moe feti vo go kibri, poeloe wi srefi na so wan strafoe. En te wi libi ala dem takroe plisiri vo disi grontapo kaba, dan alatem wi moe membre da wefi vo Lot, vo wi no drai baka, en vo wi no poeloe foetoe baka na da boen pasi vo Masra. (Luk. 17, v. 32.)
(1. Mos. Kap. 21 & 22.)
So langa leki Lot ben de na Sodom, Abraham ben liebi na Mamre, dapee Masra nanga dem toe Engel ben kom loekoe hem; ma na bakatem di So-dom-kondre nanga Gomorra ben kom soengoe so krin-krin na ini da faja-areen, dati meki a no ben boen na Abraham moro, vo liebi so klosibei na dem kondre sei, a verhuisi go liebi na wan tra kondre, disi dem kali Gerar. We na dapee a ben kom na da srefi verlegi ageen vo hem wefi Sara hede, so leki dasani ben pasa hem wantron kaba na Egipti-kondre. Bikasi di a ben frede dem heiden-soema, vo da hede a taki gi dem, Sara da hem sisa, en dati ben meki koning Abimelek seni teki Sara, potti na hem hoso. Ma Masra Gado srefi kom taki nanga Abimelek na drem, a taki: Da oeman da wan tra soema wefi; seni hem go baka gi Abraham wantem; bikasi Abraham da wan profet, hem sa potti wan begi gi joe, vo joe no moe dede vo da oeman hede. Bikasi di joe ben doe dati leki wan soema disi no ben sabi moro betre, da vo dati hede mi ben meki joe kom siki, vo joe no ben kan go na Sara, ma efi joe no seni hem go baka, da dede joe moese dede, joe nanga ala joe famili.
We dei-broko mamantem Abimelek hopo froe-koe-froekoe, a kali ala gran-masra vo hem kondre kom makandra, a verteli dem da heeli tori, en dati meki dem alamal kom frede vo troe. Na baka Abimelek kali Abraham srefi kom na hem, a gi hem wan pikin verwyti vo dati, disi a ben taki, Sara da hem sisa, a taki, dati no ben fiti Abraham so, bikasi pikin-moro koning srefi nanga hem heeli kondre ben kan kom na wan bigi ongeluk vo dati. Abraham taki: We di mi ben frede, dem soema vo disi kondre no sabi Gado, somtem dem kan kili mi vo mi wefi hede, da vo dati hede mi ben begi hem, meki a taki, hem da mi sisa; bikasi a de mi sisa troe-troe, wi de vo wan famili. We Abimelek teki Sara, a gi hem baka na Abraham; so srefi a gi hem foeloe skapoe nanga kow, nanga so meni slavoe, man nanga oeman, ala da vo presenti. Ma Abraham begi Gado gi Abimelek, vo a kom boen baka, en Gado kom helpi koning nanga hem wefi nanga ala dem oeman vo koning hoso, vo dem kan meki pikien baka; bikasi so langa Sara ben de na koning hoso, Gado ben strafoe dem, vo dem no ben kan meki pikien.
We ala di Abraham ben de liebi na Gerar-kondre, da joeroe kisi, disi Masra kom blesi Sara, vo a kisi bele, so leki Masra ben pramisi Abraham tra jari, en Sara meki da fosi pikien vo hem, wan man pikien, en Abraham kali hem Isaak. Da jari, disi Isaak geboroe, Abraham ben ouroe wan hondro jari kaba. We na baka, di da pikien kisi aiti dei, Abraham teki hem, a besnyde hem, so leki Gado ben taki gi hem. Ma Sara taki: Ke so wan plisiri Gado doe mi, a meki mi lafoe srefi, en ala soema, disi sa jeri da tori, dem sa lafoe toe, dem sa plisiri nanga mi makandra. Bikasi hoesoema ben sa taki gi Abraham, Sara sa meki wan pikien gi hem na hem ouroe jari jete? We da pikien gro, a kom mooi, en di da tem kisi, vo dem poeloe hem na bobi, Abraham meki wan bigi trakteri gi ala soema vo hem hoso.
Ma na bakatem Abraham nanga hem wefi Sara kom na wan pikin trobi makandra vo da tra pikien hede, disi Abraham ben meki nanga da Egipti-oeman Hagar, disi ben de hem slavoe. Bikasi di Sara si, Ismael da wan wildri boi, di lobbi meki spotoe nanga da bribi vo da troe Gado, kaba doro nomo a ben de na hem pikin brara baka, vo trobi hem en vo pori hem maniri; we dati ben meki Sara no kan verdragi hem moro langa na hem hoso, a go na Abraham, a taki, meki a poeloe da slavoe-oeman na ini hoso, hem nanga hem pikien, meki a jagi dem, bikasi Isaak de da reti pikien vo hem, disi a moe libi hem goedoe gi; ma Ismael dati no moe platie hafoe na ini. We da taki vo Sara no ben switi na Abraham kweti-kweti, bikasi Ismael ben de tog hem pikien. Ma Masra Gado kom na hem, a taki, meki hem hatti kouroe, meki a doe dasani, disi Sara ben taki gi hem, bikasi troe-troe, Isaak de da soema, disi habi hem blesi, en disi Masra wani, a moe hopo Abraham famili na grontapo.
We dei-broko mamantem Abraham hopo bitem, a teki Hagar nanga hem pikien Ismael, a gi dem brede nanga wan djogo watra, vo dem kan pasa liebi na pasi, en dan a seni dem gowei safri. Ma di Hagar no ben sabi pasi na boesi na Bersaba -kondre, a waka-waka rontoe tee bakatem a lasi pasi krin-krin. So srefi da watra, disi Abraham ben gi hem, vo dem kan dringi na pasi, dati kom kaba toe na ini da batra, en vo da hede Hagar libi hem pikien Ismael lidom na ondro wan boom, kaba hem srefi go sidom na abrasei, no toemoesi farawei vo hem, en nanga watra na hai a taki, hem no kan si da pikien pina so nanga dede. We di da pikien srefi ben de kre so toe na ondro da boom, Masra Gado kom jeri da kre vo hem, a seni wan Engel vo hem komoto na ini hemel, en da Engel bari Hagar, a taki: San doe joe, Hagar? No frede! Bikasi Gado srefi jeri da kre vo da boi, so leki fa a lidom de.
We hopo, go teki da pikien na joe hanoe, en tjari hem go, bikasi mi wani meki a kisi wan bigi famili, tee a tron wan bigi kondre srefi. Na baka Gado hopo Hagar hai, a meki a kom si wan peti; we na dapee Hagar go, a foeloe hem djogo nanga watra, a gi hem vo dringi. En Gado ben loekoe Ismael na boesi tee a kom bigi, a ben tron wan boen hontiman; kaba hem mama gi hem wan Egipti-oeman vo hem wefi. Na bakatem Masra Gado kom na Abraham vo tesi da bribi vo hem, a taki: Teki joe pikien Isaak, da wan pikien vo joe, di joe habi; mi sabi, joe lobbi hem, ma tjari hem go na Moria-kondre, tee na tapo wan bergi, di mi sa sori joe, en kili hem dapee vo wan bron-ofrandi gi mi!
We dei-broko mamantem Abraham hopo froekoe-froekoe, a pliti wan bosoe hoedoe, a teki hem boeriki, nanga toe knegti vo hem, nanga hem pikien Isaak, a lai da hoedoe na da boeriki tapo, en dan a teki pasi go na da plesi, disi Gado ben taki gi hem. Toe heeli dei dem ben waka doro, dem no si noti jete, ma da dei di meki dri, di Abraham hopo hem hai, a kom si da bergi tee na fesi farawei. We dati meki a taki gi dem toe jonkman: Oen tan dia nanga da boeriki so langa, tee mi nanga mi pikien go jandaso, vo begi Gado! Te wi kaba vo begi, wi sa kom baka na oenoe.
We da so Abraham poeloe da hoedoe na da boeriki, potti na hem pikien Isaak tapo; ma hem srefi teki da faja-tiki nanga da nefi, en da so dem ala toe waka makandra go na da bergi. Ma di dem de na pasi, Isaak bigin vo haksi hem tata Abraham, a taki: Mi papa? Abraham taki: San joe wani, mi pikien? Isaak taki: Mi si, faja nanga hoedoe de, vo meki ofrandi; ma hoepee da pikin skapoe de, disi wi sa kili, bron gi Gado vo wan ofrandi? Abraham taki: Mi pikien, meki wi no trobi wi srefi vo dati, Masra Gado srefi sa bezorgoe da skapoe gi wi, disi wi moe kili, bron gi hem vo wan ofrandi. We da so dem ala toe waka makandra, dem go.
Ma so hesi dem doro na da plesi, disi Gado ben taki gi Abraham, Abraham meki wan ston-tafra dapee vo wan altari, a potti da hoedoe na tapo da altari, en dan a teki hem pikien Isaak, a tai hem, potti na da hoedoe tapo; so srefi a teki da nefi, a hali hem hanoe vo kili hem pikien. We da so, di Abraham ben habi bribi vo Gado troe-troe, da bribi wawan ben gi hem da tranga, vo a gi da wan pikien vo hem abra na Gado, alwasi a ben sabi da switi pramisi, disi Masra ben pramisi hem vo Isaak, tog a taki: Efi Gado wani, a kan wieki da pikien baka na ini dede srefi. (Ebr. 11, v. 17-19.)
Ma da tesi soso Masra ben wani tesi da bribi vo Abraham. Bikasi da srefi momenti, disi Abraham ben hali da nefi, vo kili Isaak, da Engel vo Masra bari hem na ini hemel, a taki: Abraham! Abraham! We Abraham piki hem baka, a taki: Mi diaso Masra! En Masra taki: No potti joe han na da pikien, no doe hem ogri! Bikasi now mi sabi, joe habi lobbi vo Gado, nanga frede toe, kaba mi si troe-troe, joe hatti krin vo gi mi da wan pikien vo joe, so leki mi ben haksi joe dati!
We di Abraham hopo hem hai, a si wan boko-boko fassi na ini maka-boesi nanga hem toetoe, a no kan waka, en dati meki Abraham go kisi da meti, a kili hem na plesi vo hem pikien, en dan a bron hem na tapo da altari vo wan ofrandi gi Gado. We da srefi plesi Abraham kali Jehova-yereh, dati wani taki: Masra de loekoe wi, a de zorgoe vo wi.
Na baka da Engel vo Masra kali Abraham wantron moro, a taki: Vo troe-troe, mi sweri gi joe: Disi joe ben doe so, joe ben teki da wan pikien vo joe, di joe habi, joe wani gi mi hem, we mi sa blesi joe, mi sa meki dem pikien vo joe nanga dem pikien vo joe pikien tron wan bigi-bigi famili, dem sa kom so meni, leki dem star na hemel. En na bakatem wan soema sa komopo vo joe famili, dati sa meki ala kondre na heeli grontapo finni blesi; mi sa doe joe dati, vo di joe ben harki mi mofo. Joe jere? da so Masra taki. We na baka di da Engel kaba nanga hem, Abraham drai baka go na dem toe knegti vo hem, a teki dem, en dan a go baka tee na Bersaba, a go liebi dapee.
1. We da tori disi a de leri wi wan toe dri sani, kaba a de gi wi wan troostoe toe. Fosi wi ben jeri, alwasi Isaak wawan ben de da reti egti pikien vo Abraham, di ben habi da blesi vo Gado, tog Masra no ben libi da tra pikien vo Hagar soso, ma a ben loekoe hem toe. We te wi srefi kom na wan verlegi na disi grontapo, tee a kan tan, leki da hebi kom moro wi krin-krin, pasiensi! wi no moe lasi hatti; ma meki wi kre wi pina gi Masra, so leki Hagar ben doe, a sa jeri da kre vo wi so srefi, leki a ben jeri di vo Hagar. Alwasi wi srefi moe taki, wi no waarti, tog vo hem boen-hatti soso Masra sa hiti wan hai gi wi a sa helpi wi.
2. Da wan bigi tesi vo troe, disi Masra ben kom tesi da bribi vo Abraham, di a taki gi hem, meki a teki hem pikien Isaak, kili hem vo wan ofrandi. Ke, efi Masra sa kom vo tesi da bribi vo wi alamal na so wan fasi toe: hoefasi? a sa boen na wi, vo harki Gado mofo so srefi, leki Abraham ben doe?
3. Abraham no ben mombi Gado da wan pikien vo hem; we so srefi Gado no ben mombi wi da wan pikien vo hem, ma a gi hem abra vo wi alamala tee na dede srefi. We di a gi wi hem pikien kaba, a no sa gi wi ala tra sani toe, disi wi habi vanoodoe? (Rom. 8, v. 32.)
4. Isaak da wan teeken vo wi Masra Jesus Kristus. Bikasi so leki Isaak ben de da wan pikien vo Abraham, da so Masra Jesus ben de da wan pikien vo Gado, disi hem tata ben lobbi vo troe. So leki Isaak ben waka go nanga hem tata, so srefi Masra Jesus ben gehoorzam hem tata toe, tee vo a dede na kruisi srefi. (Filip. 2, v. 8.) Isaak srefi ben tjari da hoedoe, disi Abraham ben teki vo bron da ofrandi, so srefi Masra Jesus ben tjari da kruisi vo hem go na Golgata. (Joh. 19, v. 17.) Abraham ben tai hem pikien Isaak, potti na tapo da altari, we so srefi dem djoe ben teki Masra Jesus, dem tai hem, spikri hem na da kruisi hoedoe. En ala di dem ben strafoe hem so, Masra Jesus no ben hopo hem mofo, a no piki dem wan woortoe srefi. (Jesajas 53, v. 7.)
(1. Mos. Kap. 23-25, v. 19.)
Na baka vo da tesi, disi Masra ben tesi da bribi vo Abraham, Abraham verhuisi, a komoto na Bersaba, a go liebi na Hebron na Kanaan-kondre, en na dapee hem wefi Sara kom dede, a ben ouroe wan hondro nanga twenti na sebi jari. Ma Abraham kre toemoesi vo hem, a ben habi bigi sari. Na baka di a finni pikin troostoe, a go taki nanga dem Hetitri-soema, disi ben de masra vo da kondre, a bai wan pikin gron, vo a kan beri hem wefi Sara, en vo da srefi gron kan de wan vaste beri-plesi vo hem famili tee vo alatem.
We di Abraham srefi kom grani kaba, en di Masra ben blesi hem na ala fasi en na ala plesi, dapee a ben de liebi, now a no ben hangri noti moro, leki hem pikien Isaak moe teki wan wefi, vo a kan si wan pikien vo hem jete, efi Masra Gado wani. Bikasi Isaak ben go na ini fotentin jari kaba, en Abraham srefi ben ouroe wan hondro nanga fotentin jari. Ma di Abraham no ben wani, Isaak teki wan oeman vo da srefi kondre, dapee dem ben liebi; en di hem brara Nahor ben seni njoesoe gi hem tra jari, dati hem kisi wan bigi famili toe na Mesopotamia-kondre, we dati meki Abraham kali hem gran foetoeboi Elieser kom na hem, di loekoe hem heeli hoso, a taki gi hem: Kom sweri wan sweri gi mi! Pramisi mi, dati joe no sa soekoe wan oeman gi mi pikien Isaak diaso vo dem Kanaan-oeman, ma vo joe go na mi kondre, soekoe wan oeman vo mi famili srefi, teki hem, tjari kom gi mi pikien Isaak. Elieser taki: A boen! Ma san vo doe, efi da oeman no wani kom nanga mi tee na di kondre diaso? Somtem a sa frede, vo go liebi na mindri dem Kanaan-soema? Hoefasi, efi da so, mi kan teki joe pikien, tjari go na Mesopotamia-kondre, vo a liebi dapee nanga da oeman? Abraham taki: No, joe no moe tjari hem go dapee kweti-kweti! Masra Gado na tapo, di ben poeloe mi na mi kondre en na mi famili, en disi ben pramisi mi nanga sweri srefi, a taki, da kondre disia hem sa gi na mi pikien tee vo pikien-pikien srefi: we da hem srefi sa seni wan Engel vo hem go na joe fesi, vo a sori joe da reti oeman, di joe moe teki vo mi pikien wefi. Ma efi da oeman no wani kom nanga joe, dan da sweri no kan doe joe ogri, di joe ben sweri gi mi, bikasi joe ben doe joe pligti. Ma dati joe moe loekoe boen, vo joe no teki mi pikien, tjari gowei na Mesopotamia-kondre.
We now Elieser hatti kom kouroe, a sweri Abraham da sweri, en dan a teki tin kameli vo hem masra nanga so meni tra goedoe, en wantem a teki pasi go na Mesopotamia-kondre. We di a doro tee dapee, en di a kom klosibei na da foto Haran, dapee Abraham brara Nahor ben de liebi, Elieser meki dem kameli go lidom bro pikinso na sabana na sei wan peti, disi habi watra, en dapee dem oeman vo da foto ben lobbi vo kom kisi watra ala bakadina, bifo neti kisi. We da so wan srefi joeroe Elieser ben miti, di a doro na da peti; en di a si so meni oeman kom vo kisi watra, a begi Gado, a taki: Ke Masra, di joe de da Gado vo mi masra Abraham, gran-tangi! mi begi joe, ha boen hatti vo mi masra, en helpi mi tidei; sori mi da reti oeman, disi joe srefi wani, mi pikin masra moe kisi vo hem wefi! We mi sa teki dati vo wan marki: Di mi tanapoe diaso na sei da peti, kaba dem pikin oeman vo foto de kom vo kisi watra, we efi mi hatti seni mi, vo haksi wan vo dem, mi taki: Tangi-tangi mati, saka joe djogo en gi mi pikin watra vo mi dringi, kaba da pikin oeman sa piki mi: Ja masra, dringi, mi sa gi joe kameli toe vo dem dringi; we da dati mi sa teki vo wan marki vo mi kan sabi, da srefi oeman, disi sa piki mi so, da hem joe wani gi mi pikin masra vo hem wefi.
We ala di Elieser ben de begi Masra so, a si wan wendje doro dedapee nanga hem djogo, dati da Rebekka , wan pikien-pikien vo Abraham brara Nahor, wan mooi pikin oeman, a kom kisi watra na ini da peti, a foeloe hem djogo, en dan a wani gowei baka. Ma Elieser djompo go miti hem, a taki: Tangi-tangi mati, saka joe djogo, en gi mi pikin watra, vo mi dringi! Rebekka taki: Ja masra, nanga ala plisiri; so srefi mi sa go kisi watra, gi joe kameli toe, vo dem dringi. En wantem Rebekka doe so, leki a ben taki, a meki ala dem kameli dringi so meni leki dem wani. Ma Elieser tanapoe de loekoe hem, a no sabi, san a sa taki, kaba a no piki Rebekka wan mofo so langa, tee a kom si troe-troe, Masra Gado ben jeri da begi vo hem. We na baka di ala hem kameli dringi kaba, a poeloe wan goutoe ketting nanga wan toe dri ringa, a gi Rebekka vo presenti, en dan a haksi hem, a taki: Mi pikien, hoesoema da joe tata? Joe no kan taki gi mi, efi somtem mi nanga mi kameli kan slibi di neti na joe tata hoso? Rebekka taki: Mi tata da Betuel , en mi granpapa dem kali Nahor; wi hoso bigi nofo, vo joe nanga joe kameli kan slibi wan neti, en njanjam no dieri toe; efi joe wani, joe kan kom na ini.
We di Elieser jeri so wan taki, hem hatti njam pre, en nanga bele na gron a taki hem Gado tangi, a taki: Gran-tangi vo Masra, di de da Gado vo mi masra Abraham! gran-tangi vo hem, disi a ben sori mi da reti pasi, tjari mi kom reti na mi masra famili; bikasi a gi Abraham wan njoe bewysi ageen, dati a lobbi mi masra Abraham! Ma ala da tem dati Rebekka meki hesi go na hoso, a verteli hem mama da heeli tori, a taki: Da so wan soema mi ben miti na sabana, en da so da so a ben taki nanga mi. We so hesi Rebekka brara Laban jeri hem sisa tjari so wan njoesoe kom, en di a si dem mooi ringa na hem sisa hanoe, a ron go miti da soema na sei da peti, a taki: Gado blesi joe! We kom na ini dan, vo san hede joe tan diaso na dorosei? Mi potti hoso klari kaba, so srefi joe kameli sa finni wan plesi toe, vo dem kan slibi. We da so Laban teki Elieser, a tjari hem go na ini hoso, a poeloe toom na dem kameli mofo, vo dem kan njam; so srefi dem potti watra gi Elieser nanga dem tra soema, di ben de nanga hem, vo dem wasi foetoe; en dan dem deki tafra gi hem, meki a njam.
Ma Elieser taki, hem no kan njam no wan njanjam, bifo a doe hem boodskopoe. Dem taki: We meki wi jeri dan! Elieser taki: Mi da vo Abraham, a no vo hem famili srefi, ma hem foetoeboi mi de, mi ha vo loekoe ala hem sani. Bikasi Masra Gado ben blesi mi masra, tee a kom wan goedoeman vo troe; a gi hem so meni skapoe nanga kow nanga kameli nanga hasi, nanga moni, nanga so meni slavoe, man nanga oeman. So srefi mi missi Sara ben meki wan pikien gi hem tee na hem ouroe jari srefi, hem nem Isaak, we da hem a sa libi ala hem goedoe gi. Ma di mi masra no wani, hem pikien teki wan Kanaan-oeman vo hem wefi, vo da hede a gi mi da boodskopoe, meki mi kom diaso, vo mi soekoe wan oeman gi mi pikin masra na ini mi masra famili srefi. We di mi doro diaso na da peti, en di mi begi mi Masra Gado, vo hem srefi moe sori mi da reti oeman, disi hem wani gi mi pikin masra vo hem wefi: ala di mi de na ini da begi, Rebekka kom kisi watra na ini da peti, en na nem vo Masra mi miti alasani reti so, leki mi ben begi Masra, vo a gi mi da marki. We efi oenoe wani toe, vo gi mi Rebekka, meki mi kan tjari hem go, oen sa doe mi masra wan bigi plisiri; ma efi a no boen na oenoe, meki mi jeri, vo mi sabi, san vo doe.
We di Laban nanga Betuel jeri da boodskopoe, dem taki: We dati da Gado wroko srefi, da hem srefi seni joe kom de; wi no kan taki, no, wi no wani, wi no habi noti vo taki srefi. Teki Rebekka, tjari go gi joe pikin masra, meki a teki hem vo hem wefi, so leki Masra Gado wani! We di Elieser kisi da woortoe nomo, a hiti hem srefi nanga bele na gron, a taki hem Gado gran-tangi; en dan a teki so meni klosi nanga tra mooi sani, a gi Rebekka vo presenti; so srefi Rebekka mama nanga hem brara Laban dem kisi mooi presenti toe. Na baka Elieser go sidom njam, hem nanga dem tra soema, di ben de nanga hem, en dan dem go slibi.
Dei-broko mamantem Elieser taki: Now meki mi feti, vo mi drai baka go na mi masra! Ma Rebekka brara nanga hem mama dem taki: Ke meki da pikin oeman tan wan toe dri dei nanga wi jete, na baka joe kan go. Ma Elieser taki: No no, disi Masra Gado ben meki alasani waka so boen gi mi, tangi-tangi, meki mi go baka na mi masra wantem, no holi mi moro langa! We dem kali Rebekka kom na ini, dem haksi hem: Hoefasi, joe wani go nanga da soema? Rebekka taki: Ja mi wani go nanga hem. We da so dem meki Rebekka go nanga Elieser, dem taki, meki hem minna go nanga hem toe, vo Rebekka habi wan gezelskapoe na pasi. En dem brara vo hem feliciteri hem, dem taki: Gado moe blesi joe, wi lobbi sisa, a moe gi joe wan bigi famili, tee dem pikien-pikien vo joe moe meki wan bigi kondre srefi! We da so Rebekka taki ala hem famili adjosi, a go sidom na wan kameli tapo, en dan Elieser teki hem, nanga wan toe dri pikin oeman vo Rebekka, dem rei na hem baka.
We di dem doro klosibei na da kondre, dapee Abraham ben de liebi, wan bakadina Isaak go koiri pikinso na hem gron, vo a membre hem Gado en vo a begi, we di a hopo hem hai, a si dem kameli vo hem de waka de kom. So srefi disi Rebekka kom si Isaak, nomo a djompo komoto na hem kameli tapo, a haksi Elieser: Hoesoema dati, disi de kom miti wi? Elieser taki: Dati da mi pikin masra. We so hesi Rebekka jeri dati, nomo a teki wan fini klosi, a tapo hem fesi, so leki dem wendje ben njoesoe, te dem miti dem freiri; en dan Elieser teki hem, tjari go gi hem pikin masra, a verteli hem da heeli tori, hoefa alasani ben waka.
Ma Isaak teki Rebekka, tjari go na ini hoso, a gi hem da srefi kamera, disi hem mama Sara ben liebi na ini, di a ben de jete, meki Rebekka liebi dedapee toe, en dan a teki hem vo hem wefi, kaba a ben lobbi hem vo troe. We da so Isaak troostoe hem srefi vo da dede vo hem mama.
Da srefi joeroe hem tata Abraham ben tranga jete, ma na bakatem, di a kom moro ouroe, a kom zwaki so tee a no ha plisiri vo liebi moro langa, en di a kisi wan hondro nanga sebitentin na feifi jari, a dede. Dem toe pikien vo hem, Isaak nanga Ismael beri hem na ini da srefi horo, disi Abraham ben bai vo wan aparti beri-plesi vo hem famili, reti na hem wefi Sara sei.
1. We da tori de sori wi, fa dem ouroe-tem-soema ben doe so meni moeiti, vo meki dem famili moe kisi wan beri-plesi. So srefi a de fiti wi toe, vo wi loekoe dem beri-plesi vo wi nanga bigi respeki; wi moe loekoe dem, leki wan Gado-gron, dapee Masra de plani dem boen bribi-soema skin na ini, meki dem gro tee nanga wan njoe-njoe Gado-skin dem komopo baka, liebi nanga Gado teego. We te wi de na wan beri-plesi, kaba wi habi hatti vo meki spotoe nanga prefoeroe, efi vo doe iniwan trasani, disi no fiti na so wan plesi, da wan bigi zondoe.
2. Da tori vo Elieser de sori wi, efi wan soema habi foetoeboi, kaba dem foetoeboi de boen betrouw Kristen-soema, dati de wan bigi boen vo so wan hoso. Bikasi te joe doe ala joe wroko nanga begi, so leki Elieser ben doe, dan Masra Gado de helpi joe, vo alasani waka boen. Apostel Paulus ben skrifi gi Titus, meki a vermane dem slavoe, vo dem onderdaniki dem masra na ala fasi, vo dem no moe asranti, dem no moe foefoeroe, ma dem moe de getrouw na dem masra efi missi, dem moe dini dem nanga krin hatti, vo ala soema moe si, da leri vo Masra Jesus de meki boen foetoeboi. (Titus 2, v. 9 & 10.)
3. Abraham ben sabi boen-boen, vo san hede a no ben wani, hem pikien Isaak teki wan oeman vo Kanaan-kondre vo hem wefi. Bikasi dem soema vo Kanaan-kondre ben de toemoesi takroe heiden-soema da joeroe tem; we efi da famili vo Abraham ben go moksi nanga dem, teki man, teki oeman, dati ben sa pori da bribi vo dem boen soema. En da so a de tee tidei: Joe meki mati nanga dem soso kondre-soema? joe lasi joe bribi!
4. Boen vo Isaak, disi a ben harki hem tata, a doe so, leki Abraham ben rai hem! Bikasi alwasi Isaak srefi ben ouroe so meni kaba, tog a ben sabi, hem tata habi moro onderfindi, leki hem. We so srefi a de fiti ala jonge soema, nanga dem bejari soema toe, efi dem loekoe vo teki man efi oeman, meki dem kom haksi dem tata nanga dem mama fosi, nanga dem leriman en dem tra gran-soema vo kerki; meki dem teki wan boen rai, vo dem no doe wansani, disi no fiti bribi-soema. Ma efi wan soema ha bigi membre, a no wani jeri tra soema, dati tjari hem na foeloe ogri.
5. Da tem vo profet Jesajas Masra Gado ben taki. Bifo soema sa kali mi, mi sa piki kaba, en te dem no kaba jete nanga da begi vo dem, mi sa jeri dem. (Jes. 65 v. 24) We da so srefi Masra Gado ben doe nanga Elieser toe di a ben de na da peti; en so srefi a sa doe wi toe, te wi begi hem nanga reti bribi en pasiensi. Ma dan wi no moe vergiti toe, vo wi taki Masra gran-tangi, soleki Elieser ben taki hem tangi.
(1. Mos. Kap. 25, v. 20 tee Kap. 27, 41.)
Isaak ben ouroe fotentin jari datem di a teki Rebekka vo hem wefi. We di Masra Gado ben wani tesi da bribi vo Isaak so srefi, leki a ben tesi di vo hem tata Abraham, Masra tapo hem wefi bele langa-tem tee a tan srefi, leki Rebekka no kan meki pikien kweti-kweti. Ma ala dati Isaak no ben lasi hatti, a holi hem bribi boen, en na hem wefi fesi srefi a ben begi hem Gado doro nanga toemoesi pasiensi, vo a moe sari dem; en so twenti jari na baka Rebekka kisi bele vo da fositron. We di da bele ben trobi hem, a ben de, leki toe pikien de na ini, Rebekka taki: Efi mi ben sabi so, mi no ben sa wensi vo kisi pikien. Ma Masra Gado piki hem, a taki: Da toe kondre de na ini joe bele, en dem toe speli soema, di joe sa meki, dem sa platie; da wan kondre sa moro da trawan, tee da fosiwan moe onderdaniki da bakawan.
We di da tem vo Rebekka kisi vo a meki, toe pikien ben de na ini hem bele, ala toe da man. Da fosiwan, di a meki, dati ben redi, en ala hem skin ben tapo nanga wiwiri, leki boeba vo meti; vo da hede dem kali hem Ezau. Ma da trawan, di kom na hem baka, dati ben holi hem brara na hem baka-foetoe, vo da hede dem kali hem Jakob. Da srefi tem Isaak ben ouroe siksitentin jari. We na baka di dem toe pikien kom bigi, Ezau tron wan hontiman, doro nomo a ben de waka honti na sabana en na boesi. Ma Jakob, dati ben de wan tiri soema, a ben lobbi tan na hoso de wroko. We da tata, di hem ben lobbi njam dia nanga tra boesi-meti, disi hem pikien Ezau ben soetoe gi hem, dati meki Isaak ben lobbi Ezau moro, leki a ben lobbi Jakob. Ma Rebekka, dati ben lobbi Jakob moro, vo da pramisi hede, disi Gado ben pramisi hem, bifo a meki dem pikien. Somtem da mama no ben kibri dati toe gi Jakob srefi, bikasi Jakob ben soekoe alatem, vo a winni hem brara Ezau, vo hem fosi kan kisi da moro bigi blesi vo dem tata Isaak nanga reti, so leki a ben denki, a moese kisi hem, efi dasani sa kom so, leki Gado ben taki gi hem mama. We wan dei di Jakob ben sidom holi wan njanjam, a ben de wan soortoe pikin peesje, hem brara Ezau komoto na honti, a ben weri, en di a si da njanjam na ini patoe, a kom luste hem, a taki gi Jakob: Kom meki mi tesi da redi njanjam vo joe, bikasi hangri de kili mi vo troe, mi dede vo hangri! Jakob taki: Ja, efi joe wani kenki nanga mi, joe kan njam. Joe sabi? joe da mi gran brara; we meki wi kenki; teki da grani vo joe, seli gi mi, vo mi tron da fosiwan, en joe tron bakawan! (Bikasi na ouroe-tem alatem da gran brara ben de hedeman vo hem famili, en te dem brara nanga dem sisa ben platie dem tata goedoe, dan hem ben kisi moro foeloe, leki dem trawan; dati ben de wan vaste wet.) We di Jakob taki so nanga hem brara, Ezau taki: A troe, di wi mama ben meki wi, da mi fosi ben gebooroe, ma san dati kan helpi mi, bika leki mi de, mi hangri tee vo dede. Jakob taki: We sweri gi mi wantem! En Ezau sweri gi hem, a teki hem grani, seli gi hem pikin brara Jakob, a taki, hem no sa soekoe dati moro. Na baka Jakob teki dem peesje nanga wan piesi brede, a meki hem brara njam, en dan Ezau hopo, a gowei. We da so Ezau kom lasi da grani vo hem, vo di a ben loekoe dati, leki wan soso-sani.
Na bakatem di wan tranga hangri-tem kom fadom na Kanaan-kondre, Isaak verhuisi, a wani go tee na Egipti-kondre. Ma di a doro na Gerar nomo, Masra Gado kom na hem, a taki, hem no moe go na Egipti-kondre; ma meki a tan dapee a de, hem srefi sa loekoe hem, a sa doe hem ala da boen, disi a ben pramisi gi hem tata Abraham kaba. We da so Isaak ben tan na Gerar, dapee dem Filistri ben de liebi. Ma di dem soema vo da kondre ben trobi-trobi hem alatem, dem no ben wani, dem kameli vo hem moe dringi na dem peti, dati meki Isaak libi da kondre baka, a go tee na Bersaba. En na dapee Masra Gado kom na hem ageen, a taki, a no moe frede, bikasi hem sa doe hem foeloe boen, tee vo dem pikien-pikien vo hem, disi sa kom na hem baka. Ma Isaak meki wan altari dapee, a preki tori vo Masra Jehova, a hopo Gado nem. We na baka di Isaak ben kom wan goedoeman, en di dem Filistri kom frede hem, dem taki, somtem now a sa soekoe, vo pai dem da ogri baka, di dem ben doe hem, dati meki koning Abimelek kom loekoe hem, hem nanga wan tra gran ofciri vo hem, dem taki, dem wani meki fri baka nanga hem; bikasi dem si, hem Gado lobbi hem. Isaak taki: A boen, mi no lobbi habi trobi nanga soema; en da so dem meki da fri makandra.
Na bakatem di Isaak kom ouroe, pasa wan hondro nanga twenti jari, hem hai kom doengroe so tee pikin-moro a no kan si noti moro; bikasi ouroe nanga verdriti ben meki a kom zwaki so. En vo taki reti, dem toe heiden-oeman, disi Ezau ben teki vo hem wefi, dem ben trobi da ouroe tata en mama toemoesi nanga dem takroe maniri vo dem. Ma nanga ala dati Isaak no ben kom na da prakseri jete, dati hem pikien Ezau, so leki a de, a no kan de da soema, disi Masra Gado wani, vo hem tron da gran-tata vo dem boen bribi-soema; bikasi Ezau ben falsi, en na hem tata fesi a no ben sori da wildri so, leki a ben doe, te a ben de nanga dem tra heiden-soema.
We wan dei Isaak kali hem pikien Ezau, a taki: Joe si? mi kom grani kaba, en mi no sabi, hoetem mi sa dede, somtem mi kan dede hesi. We teki joe pyl nanga joe boo, go na boesi go honti, soetoe wan meti, en meki wan njanjam klari gi mi, so leki joe sabi, mi lobbi vo njam, tjari kom gi mi, vo mi hatti kan blesi joe, bifo mi go dede. We Ezau doe so, a go na boesi. Ma di Rebekka ben jeri da taki, disi Isaak ben taki gi Ezau, hesi da mama go verteli hem pikien Jakob safri, a taki: Da so da so mi jeri, joe papa ben taki nanga Ezau; we doe san mi taki gi joe. Go hesi, teki toe pikin krabita kom, toe manwan, disi mooi en fatoe, mi sa kili dem, meki wan switi njanjam gi joe papa, so leki mi sabi a lobbi; en te a klari, joe kan teki da njanjam, tjari go gi hem, meki a njam, en meki a blesi joe, bifo a go dede.
Ma Jakob no ben habi hatti vo dati, a piki hem mama, a taki: Joe no sabi, mi mama? mi brara Ezau skin habi foeloe wiwiri, ma di vo mi a glati? We te mi kom na mi papa sei, somtem a kan fassi mi hanoe, en dan a sa si, mi bedriegi hem, en dati kan meki mi papa floekoe mi, na plesi vo blesi mi. Da mama taki: No no, mi pikien, dati joe no ha vo frede, da floekoe mi sa teki na mi tapo; go mara, en doe sani mi taki gi joe.
We di Rebekka taki so nanga Jakob, a go wantem, a doe so, leki hem mama ben taki gi hem. En te da njanjam klari, Rebekka teki dem moro beste klosi vo Ezau, a weri dem gi Jakob; so srefi a teki dem boeba vo dem pikin krabita-boko, a tai dem na Jakob hanoe en na hem neki, dapee a ben glati, meki a geersi hem brara Ezau, en dan a gi hem da njanjam nanga brede, vo a tjari go gi hem papa. We di Jakob kom na ini da kamera, a taki: Odi mi papa! Isaak taki: Odi mi pikien! Hoesoema da joe? Jakob taki: Mi papa no sabi mi? Mi da joe pikien Ezau. Mi papa no ben seni mi, vo go soetoe wan meti? We mi doe so, leki joe ben taki gi mi; kom sidom de, tesi da njanjam vo mi, en gi mi da blesi, disi joe ben taki, joe sa gi mi. Isaak taki: Ke mi pikien, fa joe ben finni da meti so hesi? hoepee joe kisi hem? Jakob taki: Masra Gado ben helpi mi, a meki mi finni wan. Isaak taki ageen: Drifi pikinso, kom meki mi fili joe, efi troe-troe joe da mi pikien Ezau, efi somtem joe de wan tra soema. We di Jakob drifi moro klosibei, en di hem tata fili-fili hem hanoe nanga hem neki, Isaak taki: Da tongo, di mi jeri, da Jakob tongo; ma dem hanoe, di mi fili, dem dati de vo Ezau. En dati meki Isaak haksi hem wantron moro, a taki: Hoefasi mi pikien, joe da Ezau troe-troe? Taki reti gi mi, no meki lei! Jakob taki: We da hem mi de. Da tata taki: A boen, tjari da njanjam kom, meki mi njam, vo mi kan blesi joe. En Jakob go teki da njanjam, potti gi hem tata, so srefi a kanti wini gi hem, vo a dringi. We so hesi Isaak kaba vo njam en vo dringi, a taki: Kom dia, mi pikien, en bosi mi! Jakob doe so, a kom klosibei na hem tata, a bosi hem. We ala di dem bosi dem srefi makandra, Isaak kom smeri dem klosi vo Ezau, disi Jakob ben weri, en dati meki da tata gi hem da blesi wantem, a taki: Ke mi pikien, joe de smeri na mi noso, leki wan gron de smeri, disi Masra Gado ben blesi. We Gado moe blesi joe toe, da dow moe fatoe joe gron, vo a meki foeloe karoe nanga droifi gi joe! Heeli kondre moe onderdaniki joe, en ala soema moe sori joe respeki! Joe moe tron masra vo dem brara vo joe, en dem pikien vo joe mama moe gi joe respeki! Di soema disi floekoe joe, Gado sa floekoe hem baka; ma disoema, disi blesi joe, Gado sa blesi hem baka! We da so da ouroe tata Isaak, sondro hem srefi ben sabi, a ben gi hem pikien Jakob da srefi blesi, disi Masra Gado ben pramisi Jakob, di a ben taki gi Rebekka: Da fosiwan sa onderdaniki da bakawan.
We na baka di Isaak kaba nanga Jakob, so Jakob komoto na ini da kamera, nomo Ezau doro, a meki da njanjam klari, tjari kom gi hem tata, a taki: Kom mi papa, kom njam da meti, disi joe pikien soetoe gi joe, en gi mi da laatste blesi vo joe, so leki joe ben taki, joe sa gi mi! Ma Isaak haksi hem, a taki: Hoesoema da joe? Ezau taki: Mi da Ezau, da fosi pikien vo joe. (Ma dati Ezau ben taki nanga lei, disi a kali hem srefi da granwan, bikasi a ben sabi boen-boen, dati a ben seli da grani vo hem gi hem brara Jakob, nanga sweri srefi a ben doe dati.) We di Isaak jeri da taki vo Ezau, a skreki so tee ala hem skin kom befi, a taki: We joe brara winni joe kaba, bikasi nanga wan koni fasi a kom na mi, a teki da blesi vo joe, a gowei; en vo taki reti, mi no kan poeloe da blesi baka, Gado srefi no sa poeloe hem baka toe. Ma di Ezau jeri hem tata taki so, a bigin vo kre, a bari tranga, en nanga watra na hai a haksi hem tata, a taki: Ke mi tata, da wan blesi nomo joe habi? Tangi-tangi gi mi wan blesi toe, no libi mi soso! Bikasi now a meki toetron kaba, disi mi brara poeloe mi boen na mi hanoe; tra dei a ben teki da grani vo mi, en now ageen a teki mi blesi toe. Isaak taki: We san mi sa doe joe dan? Bikasi mi potti Jakob vo joe masra kaba, en mi gi hem karoe nanga droifi toe. Ma mi sa gi joe wan blesi toe: Joe kondre sa fatoe vo troe, en alwasi joe moe dini joe brara wan piesi tem, tog efi joe feti boen, joe sa poeloe joe srefi baka na hem ondro.
We vo sinsi da tem Ezau ben teki wan hattibron na tapo vo hem brara, vo disi Jakob ben kisi da moro bigi blesi vo dem tata, en a pramisi Jakob na hem hatti, a taki, hem sa pai hem baka; so hesi hem papa dede, hem sa soekoe vo kili hem brara Jakob.
1. We da tori vo Ezau, disi a no ben teli da grani vo hem, di Masra Gado ben gi hem, dati de meki wi membre da vermane, disi Apostel Paulus vermane dem bribi soema, di a taki: Loekoe boen, vo oenoe no geersi da ogri Ezau, disi vo wan soso njanjam hede a ben teki da grani vo hem, seli gi hem brara! (Ebr. 12, v. 16.) We efi Masra Gado doe wi da boen, vo a teki wi, meki wi tron soema vo hem, wi moe loekoe dati, leki wan bigi grani vo troe; ma efi na bakatem a kom hati wi vo wan soso grontapo goedoe, efi vo wan pikin kondre-plisiri, kaba wi drai baka gi Gado, wi libi hem? dan wi lasi wan moro bigi grani srefi, leki Ezau ben lasi, a de so boen, leki wi teki Gado-kondre srefi, seli.
2. So leki Ezau no ben finni pasi moro, vo meki dasani boen baka, disi a pori kaba, alwasi fa a ben hati hem na bakatem, en alwasi fa a ben kre, tog a no ben kan meki hem tata poeloe da blesi baka, disi a ben gi na hem brara kaba, bikasi Ezau no ben waarti moro: We so srefi wi toe, efi wi lasi wi tem na disi grontapo? wi no soekoe bribi bitem? na bakatem, te Gado kroetoe wi kaba, taki, wi moe go na ini hel, dan no wan soema kan meki Gado poeloe da mofo baka, alwasi fa a de hati wi, alwasi fa wi sa bari, alwasi wi sa poeloe ala watra na wi hai srefi, vo kili da faja, wi no sa man. (Ebr. 12, v. 17.)
3. Disi Rebekka ben gi hem pikien da rai, vo a moe go meki lei gi hem tata Isaak, wi no kan taki, a ben doe dati nanga Gado wani. Bikasi alwasi a ben sabi, Gado srefi wani, hem pikien Jakob moe kisi da moro bigi blesi, tog a no ben fiti hem, vo a soekoe dati na so wan fasi; ma nanga pasiensi en nanga bribi a ben moe wakti da joeroe, disi Masra Gado srefi sa naki Isaak hatti, vo a gi hem pikien Jakob da blesi, disi Masra ben pramisi Rebekka, bifo a meki dem pikien. Ma di a ben doe, leki hem moe helpi Gado, vo meki Gado woortoe kom reti, juisti dati ben kori hem, vo a meki hem pikien moe meki wan lei gi hem tata. Apostel Paulus taki: Nooiti wi moe doe ogri, alwasi wi denki, somtem wan boen kan komopo na ini da ogri. (Rom. 3, v. 8.)
4. Jakob srefi ben doe wan bigi zondoe toe, disi a ben meki da lei gi hem tata; kaba alwasi anders a ben de wan boen soema, tog vo da ogri a ben kisi hem paiman boen-boen na bakatem.
5. Di Ezau hatti ben bron so toemoesi nanga hem brara, dati meki a taki, hem sa kili hem. Ke, da wan takroe pramisi dati! Wan skreki-sani vo troe! We vo da hede Apostel Paulus vermane dem bribi-soema na Rom, a taki: Oen lobbi brara nanga sisa, oenoe no moe soekoe, vo teki oen srefi revensi, vo pai ogri vo ogri baka; betre oen libi dati gi Masra. (Rom. 12, v. 19.)
(1. Mos. Kap. 27, v. 42 tee Kap. 30.)
Ezau ben pramisi hem brara Jakob, taki, da kili hem sa kili hem, so hesi da ouroe tata Isaak sa dede; bikasi so langa dem tata ben de jete, a no ben habi hatti, vo doe dasani. Ma Masra Gado ben sabi, vo pori dasani gi hem, a drai hem nanga da dede vo da ouroe tata fotentin jari langa; en di Ezau no ben sabi moro vo kibri da hattibron vo hem, tee bakatem hem mama Rebekka srefi kom kisi njoesoe vo dati, taki, da so wan sani hem pikien Ezau ben pramisi hem brara Jakob. We vo da hede Rebekka seni kali hem pikien Jakob wantem, a taki gi hem: Ke mi pikien, san mi jeri! Dem taki, joe brara Ezau pramisi joe, dati hem sa kili joe. We mi sa gi joe wan boen rai, mi pikien; go kibri tee na mi brara Laban na Haran, na Mesopotamia-kondre, en tan dapee wan toe dri jari tem, tee joe brara kom bedaari pikinso; na bakatem te hem hatti kouroe en te a vergiti dasani, di joe doe hem, dan mi sa seni teki joe kom baka. Bikasi mi no kan lasi oen ala toe so wantem.
We Jakob, di a ben lobbi jeri hem mama alatem, a taki, a boen, hem sa go. Ma di a no ben wani gowei, sondro hem tata sabi, en sondro hem tata gi hem wan blesi jete, vo a waka boen, we dati meki dem kom na wan pikin verlegi, fa dem sa doe taki gi da ouroe tata; bikasi dem no ben wani meki a sabi, da vo Ezau hede nomo Jakob go kibri; dati ben sa hati da tata toemoesi. Na baka Rebekka kom na wan tra prakseri, a go na Isaak, a taki gi hem, dem toe heiden-oeman, disi Ezau ben teki vo hem wefi, dem trobi hem toemoesi, a verfeli hem vo troe, vo liebi nanga dem; kaba efi Jakob sa teki so wan heiden-oeman toe vo da kondre, dan da liebi sa kom moro hem krin-krin; betre Jakob go na Mesopotamia-kondre, teki wan oeman jandaso na ini dem famili srefi.
We dati ben boen na Isaak srefi toe, a kali Jakob kom, a taki, meki a go na Mesopotamia-kondre, teki wan oeman jandaso vo dem pikien vo Laban, en dan Isaak hopo hem hanoe, potti na Jakob hede tapo, a taki: Gran-Masra Gado na tapo moe blesi joe, a moe gi joe foeloe pikien nanga pikien-pikien, tee joe tron wan bigi kondre! En da blesi, disi Gado ben blesi mi tata Abraham, da srefi blesi moe kom na joe tapo en na tapo dem pikien vo joe, vo joe kom masra vo da kondre, disi joe de wan vreemde soema na ini nojaso, en disi Masra ben teki, gi na mi tata Abraham! We da so nanga da blesi Isaak seni Jakob gowei na Mesopotamia-kondre na Rebekka brara Laban. Ma di Ezau kom jeri ala dasani, fa hem tata ben blesi Jakob wantron moro, a seni hem gowei na hem mama kondre, vo a teki wan oeman dapee, dati meki Ezau go teki wan tra oeman moro vo dem pikien vo Ismael, moksi nanga dem toe heiden-oeman, di a ben habi kaba.
We di Jakob ben komopo na Bersaba, go na Haran, hem wawan ben moe waka da langa pasi na foetoe soso, sondro wan soema de nanga hem; en di a no ben kan kisi wan foto, efi wan pranasi, dedapee a kan slibi da fosi neti, bikasi a ben lati kaba, we helpi no ben de, a teki wan toe dri stoon dapee potti na ondro hem hede, a go lidom slibi. We na ini da slibi a drem wan drem; a si wan trapoe tanapoe dedapee, wan toemoesi langawan, disi kisi tee na ini hemel; kaba dem Engel vo Gado waka-waka na da trapoe, trawan klim go na tapo, trawan saka kom na ondro. Ma tee na taposei Masra Gado srefi tanapoe, a kali Jakob, a taki: Mi da Jehova, da Gado vo joe gran-tata Abraham en vo joe tata Isaak! We da kondre, disi joe lidom de, mi sa gi joe, nanga ala joe pikien, di sa kom na joe baka. En da joe mi sa teki, nanga dem pikien vo joe, tee vo pikien-pikien srefi, mi sa meki ala kondre na heeli grontapo finni blesi. En loekoe, mi de nanga joe, mi sa loekoe joe na ala dem plesi, dapee joe de go, en mi srefi sa tjari joe kom baka toe, tee na di kondre diaso; bikasi mi no sa libi joe, tee mi doe joe ala dasani, disi mi ben taki gi joe.
We di Jakob wieki na ini da slibi, a taki: Da plesi disi, Masra srefi dia troe-troe; kaba mi no ben sabi! En di Jakob kom fili hem Gado so klosibei dapee, da respeki, disi a ben habi vo Gado, meki a kom frede pikinso, a taki: Ke da wan santa plesi disia! da Gado-hoso srefi! da diaso mi ben si hemel-doro hopo!
Dei-broko mamantem Jakob hopo froekoe-froekoe, a teki da stoon, disi ben de na ondro hem hede, a hopo hem tanapoe vo wan marki; en dan a teki hem oli-batra, kanti pikin oli na tapo da stoon, a wy hem gi Gado. En da srefi joeroe Jakob gi da plesi wan tra nem, a kali hem Betel , dati taki, wan Gado-hoso . So srefi Jakob pramisi Masra, a taki: Efi Gado sa de nanga mi, vo mi kan doro da pasi nanga boen; efi a sa gi mi brede, vo mi njam, nanga klosi vo weri, en efi a sa tjari mi kom baka nanga boen, vo mi si mi tata hoso: dan mi sa taki, da Gado vo mi gran-papa Abraham en vo mi tata Isaak, da mi Gado toe, en dapee mi ben hopo da stoon tanapoe di djoensnoe de, na da srefi plesi diaso mi sa hopo wan altari, meki da plesi tron wan Gado-hoso; kaba vo alasani, disi joe sa gi mi, mi sa gi joe tin procenti baka.
Na baka Jakob hopo, a teki hem pasi baka, a go tee na Haran. En di a doro klosibei na da foto, a si foeloe skapoe lidom na sei wan peti. We dati meki a go na dem skapoe-herder, a haksi dem, vo hoe foto dem de. Dem taki: Wi da vo Haran. Jakob taki: Hoefasi, oen sabi Laban toe, da pikien vo Nahor? Fa a tan? Dem taki: Ja, wi sabi hem, a de heeli boen. Joe no si? hem pikien Rahel srefi de kom nanga hem skapoe? We so hesi Jakob si, Rahel nanga dem skapoe de kom, djoensnoe a go poeloe da stoon na tapo da peti, vo meki dem skapoe vo hem oom Laban kan dringi. En dan a go na Rahel, a bosi hem, a kre so tee, watra ron na hem hai; pikin-moro a no ben kan taki gi hem, hem da Jakob, hem tanta Rebekka pikien. We so hesi Rahel jeri so wan taki na hem mofo, nomo a ron go na ini foto, taki da tori gi hem papa; en wantem Laban srefi kom miti Jakob, a brasa hem, bosi hem, en dan a teki hem, tjari go na hem hoso. Na dapee Jakob bigin vo verteli hem oom Laban foeloe tori vo hem mama en vo hem papa, fa alasani ben waka na hoso, sinsi dem no ben jeri wan njoesoe vo dem moro. So srefi a verteli hem da trobi toe, disi hem nanga hem brara Ezau ben kisi, en disi ben meki a moe go kibri. Laban taki: We mi si, joe de vo mi famili, joe kan tan na mi hoso, liebi nanga mi. Ma wan moen moro na baka Laban haksi Jakob ageen, a taki: Efi joe wani tan nanga mi, dini mi, a boen; ma mi no wani, joe moe dini mi vo soso; we taki gi mi, san mi moe pai joe? Jakob taki: Efi joe wani gi mi joe pikien Rahel vo mi wefi, mi sa dini joe sebi jari langa. Laban taki: A boen; betre joe teki hem, leki wan trawan teki hem. We da so Jakob ben dini Laban sebi jari langa vo Rahel, en di a ben lobbi Rahel, dati meki da tem pasa hem so hesi, a ben de, leki da sebi dei nomo.
Ma na baka di da tem vo da kontraki pasa, Jakob taki gi Laban: We gi mi mi wefi noja, vo mi teki hem! Laban taki: A boen. En wantem a meki wan trakteri, a verzoekoe foeloe soema, vo dem kom na da boda. Ma na neti di dem go slibi, Laban kori Jakob, a no gi hem Rahel, ma a gi hem da gran sisa vo Rahel, da Lea; hem no ben de so mooi leki Rahel. We dei-broko mamantem di dem wieki, en di Jakob si, da Lea dem ben gi hem, na plesi vo Rahel, a go na Laban, a taki: San joe doe mi? A no vo Rahel mi ben dini joe? We vo san hede joe kori mi so? Laban taki: Na wi kondre diaso a no fiti, vo mi teki da pikinwan fosi, gi na man; bikasi dati a no maniri vo wi kondre. Ma pasiensi, holi Lea; efi joe dini mi sebi jari moro ageen, mi sa gi joe Rahel toe. We Jakob doe so, a teki Rahel toe, a tan sebi jari moro na Laban hoso. Ala nanga ala Jakob ben meki twalf man-pikien, nanga wan oeman-pikien. Dem manwan da Ruben, Simeon, Levi, Juda, Dan, Naftali, Gad, Asser, Isaschar, Sebulon, Josef nanga Benjamin . En da oeman-pikien dem kali Dina . Benjamin ben de da kroboiwan, bikasi datem di hem mama Rahel ben meki hem, dem ben de na Kanaan-kondre kaba; ma ala dem trawan ben geboroe na Mesopotamia-kondre.
We so hesi dem tra sebi jari ben pasa ageen, disi Jakob ben dini Laban vo hem wefi Rahel, a go na Laban, a taki: Gi mi mi wefi now, nanga dem pikien vo mi, meki mi go baka na mi kondre en na mi tata hoso. Laban taki: Dati sa hati mi vo troe, bikasi mi si, ala di joe ben de nanga mi, Masra ben doe mi foeloe boen vo joe hede. We joe sa doe mi wan bigi plisiri, efi joe tan wan toe dri jari jete. Taki gi mi, san mi moe gi joe, vo pai joe? Jakob taki: We joe srefi sabi, fa mi ben dini joe, en fa Masra ben blesi joe ala da tem, disi mi ben de loekoe joe meti, tee joe kisi foeloe-foeloe hipi. We now mi sa wani zorgoe vo mi famili toe. Laban taki: A boen, san mi sa gi joe dan? Jakob taki: Joe no ha vo pai mi; ma mi sa taki joe wansani, efi dati boen na joe, dan mi sa tan jete, loekoe dem skapoe vo joe. Meki wi go loekoe ala joe skapoe tidei, nanga dem krabita toe; en ala dem blakawan nanga dem penniwan, di wi finni, wi sa teki, poeloe na ini, meki dem wetiwan tan, dem wawan. We na bakatem ala dem blaka pikien nanga dem penniwan, disi dem weti skapoe nanga krabita sa meki, dati mi sa teki vo mi paiman. Dan joe srefi kan si alatem, efi mi bedriegi joe, efi mi doe joe reti; bikasi ala dei srefi joe kan kom loekoe da hipi vo mi, kaba efi joe finni wan enkli wetiwan na ini, wantem joe kan sabi, taki, da foefoeroe mi foefoeroe hem.
Laban taki: Loekoe so wan prakseri! A boen na mi, meki wi doe so, leki joe taki. We da srefi dei dem bigin poeloe ala dem blaka skapoe nanga dem penniwan na ini da hipi, en Laban teki dem, a meki dem pikien vo hem jagi dem go na wan farawei sabana, vo dem loekoe dem aparti dapee, meki dem no kan moksi moro nanga dem weti skapoe, disi Jakob ben de loekoe gi Laban. Ma na bakatem, di dem weti skapoe kom meki pikien, nanga Gado blesi dem meki foeloe blakawan nanga penniwan, moro leki wetiwan srefi; en dati meki Jakob tron wan bigi goedoeman na Laban hoso; bikasi alwasi tin tron Laban ben kenki da paiman gi hem; dan a ben taki, dem penniwan a moe kisi, dem wawan; dan ageen a ben taki, dem blakawan, dem wawan moe de vo hem, tog Jakob ben kisi so meni skapoe nanga slavoe, man nanga oeman, nanga so meni kameli toe, nanga hasi, tee a tron wan goedoeman vo troe.
1. We da tori disi, a de leri wi wan toe dri sani ageen. Di Jakob ben libi hem tata hoso, go na wan tra kondre, hem tata Isaak ben gi hem wan aparti blesi jete, vo a teki hem na pasi, nanga wan boen vermane toe, vo a no moe teki wan heiden-oeman. We so srefi a de fiti ala boen tata nanga mama toe, te dem pikien de go na pranasi go wroko, efi te dem go na wan tra kondre, dan dem moe vermane dem pikien, taki: Holi joe srefi boen, mi pikien! en holi joe begi, vo joe no doe wan ogri, pasa Gado mofo! So wan boen vermane kan naki wan pikien hatti, tee a no sa vergiti da mofo moro wantem; en dati sa helpi da pikien foeloe, vo a no kan doe ogri, leki wan tra soema, disi no ben sabi moro betre.
2. Da tori vo Jakob de sori wi toe, fa Masra Gado ha boen-hatti vo soema. Alwasi wi kan misi wansani, tee Gado moe jagi wi, tog nooiti a kan libi wi so kweti-kweti, vo a no teki wi baka; da vo taki, efi nanga begi wi kom soekoe hem baka, so leki Jakob ben doe, di a ben de na da langa pasi, hem wawan.
3. So srefi wi kan si na da tori vo Jakob, efi wi lobbi wi Masra Jesus nanga krin hatti, dan wi no ha vo frede wansani; bikasi alwasi hoepee wi de, Masra de dapee toe nanga wi, so srefi leki a ben de nanga Jakob, da neti di a ben lidom slibi na pasi, hem wawan. En reti vo dati hede, disi no wan tra soema ben de nanga hem, dati ben meki Masra srefi kom hem so klosibei, na so wan switi fasi, tee a tan, leki nanga hai srefi Jakob si hem Masra, nanga so meni santa Engel vo hem. Da neti a no ben kan vergiti moro, so langa a ben de.
4. Ala di Jakob ben de na hem oom Laban hoso, Laban ben sori wan toemoesi bigi-hai-fasi; bikasi doro nomo a ben verandri da kontraki baka, disi a ben meki nanga Jakob. Ma tog nanga blesi vo Masra, Jakob ben tron wan goedoe-man, kaba da bigi-hai-fasi no ben helpi Laban noti.
(1. Mos. Kap. 35.)
Na bakatem disi Jakob ben kom so wan goedoe-man, dati ben meki a no ben habi wan boen liebi moro na hem oom hoso; bikasi a ben hati dem tra pikien vo Laban, di dem si, Jakob kisi so meni skapoe nanga kameli nanga tra goedoe, moro foeloe leki dem srefi ben habi; en nofotron a ben moe jeri dem taki, da bedriegi Jakob ben bedriegi dem tata, dati wawan ben meki a kom so wan goedoe-man. En Laban srefi kom mandi nanga Jakob; te a si hem, nomo a moe meki wan doengroe fesi gi hem, en dati ben hati Jakob vo troe.
Ma wan dei di Jakob ben de na wan farawei sabana, dapee a ben loekoe dem skapoe vo Laban, na neti di a lidom slibi na hem wakti-hoso, Masra Gado kom na hem dapee, a taki: Jere Jakob! go baka na joe kondre noja, en na joe famili! Mi srefi sa go nanga joe toe; bikasi mi de da srefi Gado, disi joe ben si na Betel, datem di joe ben de na pasi vo kom diaso! We wantem Jakob seni wan boodskopoe go na hoso, a kali Rahel nanga Lea kom na hem dapee, a potti alasani na dem fesi, fa hem ben dini dem tata so trouw, so meni jari, en fa dem tata ben handri hem so slekti, so leki dem srefi sabi toe; en jete a no kan taki no wan switi woortoe nanga hem, ma doro nomo Laban moe de mandi. So srefi Jakob verteli dem da drem toe, disi a ben drem na neti, fa Masra Gado ben kom na hem, taki, meki a go baka na hem kondre, libi Laban.
Dem oeman taki: A boen, meki wi gowei, so leki Gado ben taki gi joe; bikasi wi srefi toe, a no de handri wi boen toe, ma leki vreemde soema soso a de loekoe wi alatem. We da so Jakob teki dem kameli vo hem, a meki dem oeman nanga dem pikien go sidom na dem kameli tapo, meki dem rei gowei. So srefi a teki ala hem meti nanga ala tra goedoe vo hem, disi Masra Gado ben gi hem na Mesopotamia-kondre, a teki pasi, tjari alasani gowei na hem tata Isaak na Kanaan-kondre, sondro a ben piki Laban wan woortoe srefi; bikasi Jakob taki, efi Laban sabi dati, a no sa gi hem pasi vo go, alwasi Jakob ben sa taki, Gado srefi wani so. We vo dati hede Jakob loekoe so wan joeroe, disi Laban no ben de na hoso, a ben go na wan tra sabana, go koti hem skapoe wiwiri; bikasi di Jakob ben de alatem wan betrouw soema, dati meki Laban no ben verwakti so wan sani.
We toe heeli dei ben pasa soso, sondro Laban ben jeri wansani, ma da dei di meki dri, soema kom taki gi hem, Jakob gowei. En wantem-wantem Laban teki ala mansoema vo hem famili, a feti hesi na Jakob baka sebi dei langa, tee a doro klosibei na hem na Gilead-kondre. Ma da srefi neti, bifo a kisi hem, Gado kom waarskouwe Laban na drem, a taki: Loekoe boen, vo joe no trobi Jakob, en vo joe taki switi nanga hem!
Dei-broko, di Laban miti Jakob, a haksi hem, a taki: Fa joe doe mi so? Vo san hede joe ben teki mi pikien, tjari gowei kibri-fasi? San ben meki oen libi mi safri, sondro oen taki mi adjosi? Efi mi ben wani, mi ben kan teki wan revensi noja; ma Gado ben kom na mi di neti, a taki, mi no moe trobi joe. We san ben meki joe gowei so hesi dan? Somtem di joe ben hangri vo si joe tata hoso baka? Jakob taki: No no, a no vo dati; ma vo di mi ben frede joe, mi ben denki, somtem joe sa teki dem pikien vo joe baka, poeloe na mi hanoe. Ma hoe ogri mi ben doe joe dan, disi joe kom so faja-faja na mi tapo? A no twenti jari langa mi ben de nanga joe? Mi ben loekoe joe skapoe nanga joe krabita so boen, tee no wan vo dem ben trowei bele wantem; en nooiti mi teki wan skapoe vo joe njam, no wan pikinwan srefi. Kaba alatem efi tigri ben kom kili wan skapoe vo joe, efi na dei, efi na neti, da mi ben moe gi joe wan trawan baka. Na dei zon ben trobi mi, en na neti kouroe ben kili mi; slibi no ben kom na mi hai. We da so mi ben dini joe ala dem twenti jari, di pasa. Tin na fo jari mi ben dini joe vo dem toe pikien vo joe; en siksi jari ageen mi ben dini joe vo skapoe en vo krabita; kaba tintron srefi joe ben verandri da kontraki baka, di wi ben meki; dan joe ben wani so , en dan ageen joe ben wani so . We efi mi Masra Gado no ben helpi mi, dan soso-soso joe ben sa meki mi komoto na joe hoso gowei baka. Ma tangi vo Gado, a ben sari vo mi, di a kom waarskouwe joe di neti! Laban taki: We kom dan, meki wi potti han na han makandra, meki fri baka! We dem doe so, en Jakob teki wan stoon dapee, a potti hem tanapoe vo wan marki; so srefi dem trawan hopo stoon toe, en dem kali da srefi plesi Mizpa.
Na baka Laban hopo, a bosi dem pikien vo hem, nanga dem pikien-pikien, a taki dem adjosi, meki dem waka boen; en dan a drai baka go na hem kondre.
So srefi Jakob hopo toe, a teki hem pasi baka. We di a no ben sabi jete, fa hem brara Ezau sa ontvanga hem, te a kom na hoso, bikasi hem mama no ben seni piki hem jete, dati ben meki Jakob hatti no ben kouroe so reti jete. Ma Masra Gado ben sabi vo troostoe hem. Bikasi so hesi Jakob ben teki hem pasi baka, nomo dem santa Engel vo Gado kom miti hem dapee; en di Jakob si dem, a sabi dem wantem, a taki: Ke dati da dem doezend doezend Engel vo Gado! We da plesi a kali Mahanaim , dati taki, toe hipi ; bikasi na wan sei a ben si da hipi soema vo hem srefi, en na tra sei a ben si di vo Gado. Na baka Jakob seni wan boodskopoe go na fesi, a seni hem brara bigi odi, meki hem brara sabi, hem de kom. Ma dem boodskopoe-man kom piki Jakob baka, dem taki: Wi ben miti joe brara Ezau na pasi, hem srefi de kom, a de tjari fo hondro soema kom miti joe. We di Jakob jeri so wan tori, dati meki a kom skreki moro-moro, bikasi a no sabi, sani Ezau sa go doe nanga hem. Ma di Jakob ben de wan soema, disi ben lobbi doe alasani nanga voorzigti, dati meki a teki ala hem slavoe, nanga ala hem skapoe, nanga kow, nanga kameli, a platie dem reti mindri, vo dem meki toe hipi, a taki: Efi somtem Ezau sa miti da wan hipi, kili dem, tog da tra hafoe sa finni pasi vo kibri, vo dem kan doro nanga boen. Na baka Jakob vouw hem hanoe, a hopo hem hatti gi hem Gado, a taki: Ke mi Masra Jehova, joe di de da Gado vo mi gran-tata Abraham en vo mi tata Isaak! Joe srefi ben taki gi mi, meki mi go baka na mi kondre en na mi famili, joe sa doe mi boen! Ma mi boen Masra vo mi! mi no waarti vo ala da boen, di joe ben doe mi, bikasi mi de wan soso foetoeboi vo joe; ke joe ben holi joe woortoe toemoesi boen gi mi! Bikasi wan twenti jari pasa, di mi ben koti da riba Jordan abra, mi no ben habi noti, leki da tiki soso, di de na mi hanoe, kaba now mi kisi toe hipi srefi, slavoe nanga meti. We tangi-tangi Masra, kom helpi mi dan, en poeloe mi na mi brara Ezau hanoe! Bikasi mi frede hem vo troe; somtem a kan kom kili mi nanga dem mama nanga dem pikien, ala makandra. Ke mi Masra! membre da woortoe, disi joe ben gi mi, di joe ben taki, joe sa doe mi boen, joe sa meki dem pikien vo mi tron wan bigi-bigi kondre, tee no wan soema sa man vo teli dem srefi! - Na baka Jakob teki toe hondro nanga twenti krabita, toe hondro nanga twenti skapoe, man nanga oeman, dritentin kameli nanga dem pikien, nanga so meni kow nanga boeriki, a gi na dem basja, a taki, meki dem waka go na fesi; en te Ezau miti dem, kaba a haksi dem, vo hoe-soema dem de? dan dem moe taki gi hem, da hem foetoeboi Jakob seni ala dem meti gi hem masra Ezau vo wan presenti; hem srefi de kom toe; ma fosi a wani meki hem brara hatti kom kouroe baka, vo a moe ontvanga hem nanga boen. We so hesi dem basja gowei nomo, da srefi neti Jakob hopo, a teki dem toe oeman vo hem, nanga dem pikien, nanga ala hem sani, a meki dem pasa wan pikin riba abra, disi dem kali Jabok , ma hem srefi fika na tra sei, vo a holi hem begi, hem wawan.
We na baka di hem srefi toe wani pasa da riba abra, so onverwakti wan soema kom brasa hem dapee, en di Jakob no ben sabi, hoesoema dati, a wani poeloe hem srefi na da soema hanoe, en dati meki a feti nanga hem tee moesoedei. Ma di da soema si, hem no kan moro Jakob, a fassi hem tranga tee da skroefoe vo hem bigi foetoe kom loesoe na taposei. Dan da soema taki gi Jakob: Libi mi, bikasi dei broko kaba! Ma di Jakob kom sabi now, da soema, disi kom brasa hem, da hem Gado srefi, vo da hede a taki! No no, mi no kan libi joe, bifo joe gi mi wan blesi. We da soema haksi hem: Hoe nem vo joe? Jakob taki: Mi nem, da Jakob. Da soema taki ageen: We dem no moe kali joe Jakob moro, ma Israel dem moe kali joe; bikasi joe ben feti nanga Gado en nanga liebi-soema toe, kaba da winni joe ben winni. (Da nem Israel dati taki, wan soema, disi nanga begi a de feti nanga Gado tee a moro Masra srefi.) Na baka Jakob haksi da soema, a taki: Hoe reti nem vo joe? Da soema taki: Fa joe kan haksi mi so? Joe no sabi kaba, hoesoema da mi? En wantem Masra blesi hem dapee. We da srefi plesi Jakob kali Pniel , a taki: Da diaso mi ben si mi Gado, hai na hai, kaba now mi hatti kouroe.
Na baka di Jakob komopo na Pniel, en di a si hem brara Ezau de kom kaba nanga dem fo hondro soema, djoensnoe Jakob teki Rahel nanga Lea nanga dem pikien, a potti dem reti, fa dem moe waka trawan na trawan baka, en dan hem srefi waka go na fesi go miti hem brara. Ma ala di a waka so, a saka hem kni, potti hem fesi tee na gron gi Ezau; dan a hopo baka, en di a waka pikinso nomo, a doe da srefi sani ageen, en da so a doe sebi tron, so langa tee a kisi hem brara; bikasi da so da maniri vo da kondre ben de, te wan soema wani sori trawan respeki. Ma Masra Gado srefi ben naki Ezau hatti kaba, bikasi so hesi a si hem brara Jakob nomo, a ron kom miti hem hafoe-pasi, a brasa hem, a bosi hem, en dem ala toe bigin kre makandra. Na baka di Ezau si dem oeman nanga dem pikien toe, a haksi: Hoesoema dem de? Jakob taki: Dati da dem pikien, di mi boen-hatti Gado gi mi. En dem alamal kom meki dem komplimenti gi Ezau, so srefi dem mama kom taki hem odi toe. Dan Ezau haksi Jakob ageen vo da tra hipi meti, disi dem basja ben tjari kom miti hem na pasi jandaso, sani dati moe de? Jakob taki: Dati mi ben seni vo wan pikin presenti gi joe, mi masra, nomo vo mi meki joe hatti kom kouroe baka. Ezau taki: No no, mi brara, mi srefi habi foeloe goedoe toe; teki joe sani baka. Ma Jakob ben begi Ezau so meni, a dwingi hem tee a teki da presenti.
Na baka Ezau taki hem brara adjosi so langa, a drai baka go na Seir, bikasi dati da hem wefi kondre. Ma Jakob waka hem pasi doro tee a kisi Kanaan-kondre, a go meki wan kampoe na Sikem, dapee hem gran-tata Abraham ben bai da gron vo wan beri-plesi vo hem famili; en Jakob srefi bai wan tra gron moro, a meki wan altari dapee, vo disi Masra ben meki a kisi Kanaan-kondre baka nanga boen. Ma di dati no ben de da reti plesi, disi Jakob ben pramisi Masra, taki, efi Masra sa tjari hem kom baka nanga boen, dan a sa meki wan altari gi hem dapee, efi wan kerki: we vo da hede Masra kom na Jakob noja, a taki gi hem: Hopo, komoto diaso, go na Betel go liebi janda; bikasi dati de da plesi, dapee joe moe meki wan altari gi da Gado, di ben kom na joe datem, di joe ben go kibri vo joe brara Ezau!
We dati kom tjari Jakob na wan tra prakseri ageen, a taki, so meni obia-sani de na hem famili jete en na ala dem slavoe, di a ben tjari komopo na Mesopotamia-kondre; en vo taki reti, a ben fiti hem vo a ben poeloe dati granwei kaba; bikasi dem soema vo Haran nanga hem famili srefi, dem ben de heiden-soema jete. We da srefi dei Jakob kali ala soema vo hem kom na hem fesi, a taki: Tjari ala kroekoetoe-gado-sani nanga obia-sani kom, di de na oen hoso, teki ala trowei! nanga dasani toe, disi de na oen skin, poeloe ala, trowei! Oen krin oen srefi. En meki wi go na Betel, meki wan altari dapee gi da boen-hatti Gado vo mi, disi ben helpi mi so fara! We dem doe so, dem tjari ala demsani kom, en Jakob meki wan horo na ondro wan bigi tamarin-boom, a beri alasani na ondro gron.
Na baka di dem kom na Betel, Jakob bigin vo meki da altari wantem; en di a klari, Gado kom na hem dapee vo toetron, a blesi hem da srefi blesi ageen, disi a ben blesi hem tra leisi kaba, en Jakob teki wan tra stoon moro, a potti hem tanapoe vo wan marki.
Ma di Jakob no ben si hem tata Isaak moro, sinsi dritentin jari, dati meki a libi Betel baka, vo go loekoe hem tata na Hebron. We na pasi, di a kom klosibei na Efrata, hem wefi Rahel kom meki da kroboi pikien vo hem, dati da Benjamin. Ma Rahel srefi kom siki so tee a dede dapee; en Jakob beri hem na Betlehem, a teki wan stoon, potti na tapo da grebi vo wan marki; kaba dem soema vo Betlehem sabi da grebi vo Rahel tee tidei jete. (Matt. 2, v. 16.) (Efrata nanga Betlehem da wan.)
We di Jakob doro na hem tata hoso na Mamre, a miti hem brara toe dapee; bikasi na Hebron Ezau ben de liebi so langa, tee Jakob kom baka, dan a libi hem tata hoso, a verhuizi tee na hem wefi tata kondre, disi dem kali Seir. Ma omtrenti tin na fo jari moro na baka da ouroe tata Isaak kom zwaki tee a go slibi, en dem toe pikien vo hem, Ezau nanga Jakob, dem beri hem na hem tata Abraham sei. Ala nanga ala Isaak ben kisi wan hondro nanga aititentin jari.
1. We bifo wi libi da tori disia, teki wan trawan, meki wi teki wan leri na Jakob. Di hem ben sidom prakseri ala da boen, disi hem Gado ben doe hem, dati meki hem hatti kom sjem so tee a taki: Ke mi Masra vo mi, mi no waarti vo ala da boen, di joe doe mi! We da so srefi wi toe, te wi membre ala da boen, disi Gado ben doe wi na grontapo, vo sinsi wi de; wi moe taki so srefi toe: Wi no waarti!
2. Da tori vo da feti, disi Jakob ben feti nanga da soema, tee a moro hem, dati moe gi wi hatti toe, vo wi no kom weri vo begi Gado nanga pasiensi en nanga watra na hai, so leki Jakob ben doe. (Hosea 12, v. 4 & 5.) Boen vo wi, efi dem zondoe vo wi kom hati wi so tee, a tan leki wi hatti no kan finni wan troostoe moro! Meki wi holi wi begi! Meki wi feti nanga Gado so, leki Jakob ben feti nanga hem, taki: Ke mi Gado, mi teki joe pikien, mi begi joe: Tangi-tangi, gi mi pardon! Mi no libi joe, bifo joe gi mi da blesi! Dan troe-troe, da begi vo wi sa moro hem, a sa meki wi fili wan switi kouroe na ini wi hatti.
3. Ezau nanga Jakob ben de na wan bigi trobi vo troe, ma tog dem ben meki fri baka. We efi wi nanga tra soema kom na trobi, dan wi no moe holi trawan na hatti, ma wi moe soekoe so meni leki wi kan, vo wi kom boen baka nanga dem. Da so wi Masra Jesus srefi leri wi toe. (Matt. 5, v. 23 & 24.) Alwasi somtem wan soema hatti kan bron toemoesi ogri nanga wi: efi wi kom na hem nanga sakafasi, taki switi nanga hem, dati kan meki so wan soema kom bedaari wantem, so leki wi si dati na Ezau.
4. Disi Masra Gado ben moese membre Jakob dasani baka, disi a ben pramisi hem, taki, efi Gado sa tjari hem kom baka nanga boen, dan a sa meki wan altari gi hem na Betel, we dati de sori wi, fa wi liebi-soema maniri de. Vo pramisi? wi kan pramisi sani hesi; ma vo doe dasani? dati wi lobbi vo vergiti. We vo dati hede koning Salomo taki toe: Te joe pramisi Gado wansani, joe no moe drai toe vo doe hem. (Salom. 5, v. 3.)
(1. Mos. Kap. 37.)
Datem di Isaak dede, hem pikien Jakob ben ouroe kaba, pasa wan hondro jari. Foeloe hebi en verdriti ben miti hem kaba na grontapo, en dati ben meki a kom hangri vo troe, vo a kan pasa dem laatste jari vo hem nanga ruste. Ma vo hem? da moro bigi ongeluk, disi kan miti wan soema, dati ben de loekoe hem jete, datem di a kom liebi baka na Kanaan-kondre.
Pikin-moro ala hem pikien ben de ogri soema, en nanga da ogri-doe vo dem dem ben gi da tata foeloe sari en verdriti. Josef wawan ben de wan boen pikien, disi ben jeri hem tata, en di Israel ben meki hem na hem ouroe dei, dati ben meki a lobbi Josef moro, leki a ben lobbi ala dem tra pikien vo hem, kaba a gi hem wan mooi japon toe, wan penniwan, vo a weri. We disi Josef kisi tin na sebi jari, hem tata seni hem go na wroko, vo a loekoe dem meti, hem nanga dem tra brara vo hem makandra. - Ma di dem brara ben sabi, dem tata lobbi Josef moro, leki a lobbi dem, en di Josef ben habi da maniri toe, te a kom jeri, ofoe te a si wan ogri, disi dem brara vo hem ben doe, dan hem no ben kan kibri dati gi hem tata, ma alatem a ben meki hem tata kom sabi dati wantem: we dati ben meki ala dem tra brara no ben lobbi Josef, dem holi hem na hatti so tee dem no ben kan vriendliki nanga hem moro. En buiti dati wan neti Josef ben drem wan aparti drem, kaba di a no ben membre wan ogri na ini hem hatti, dei-broko a verteli dem brara da drem, a taki: Di neti mi ben drem, dati wi alamal ben de na gron, de koti areisi. We da bosoe, di mi ben koti, dati mi si a hopo tanapoe; ma dem bosoe vo oenoe, dem alamal ben rontoe di vo mi, en dem buigi gi hem. We di dem brara jeri so wan tori, dem taki gi hem: Hoefasi, san joe membre dan? Somtem joe wani tron koning na wi tapo, meki wi onderdaniki joe? En dem kisi moro ogri-hatti vo hem jete vo da drem hede en vo da taki.
Ma wan tra neti ageen Josef kom drem wan tra drem moro, en dei-broko a verteli dem da drem ageen na dem tata fesi srefi, a taki: Di neti mi ben drem, dati zon nanga moen nanga elf star kom buigi gi mi. We di da tata jeri Josef taki so wan tori, a krasi hem vo dati, a taki: Fa joe kan drem so wan drem? Somtem joe denki, mi nanga joe mama nanga dem brara vo joe sa kom potti kni gi joe, sori joe respeki? En vo sinsi da tem dem brara vo Josef kom moro djaloesoe na hem tapo; ma tog da ouroe tata hem no ben kan vergiti da drem moro.
Pikinso moro na baka, di dem sabana vo Hebron no ben habi boen grasi moro, dem brara vo Josef teki dem tata skapoe, tjari go na Sikem, meki dem soekoe njanjam dapee. Ma di da tata no ben jeri wan njoesoe vo dem moro wan dri fo dei langa, en di a ben frede pikinso, somtem dem soema vo Sikem ben teki wan revensi, pai dem da ogri baka, disi dem pikien vo Israel ben doe dem tra jari, sondro da tata ben sabi: we dati meki Israel seni hem pikien Josef go na dem baka go loekoe dem, haksi, fa dem tan nanga dem meti vo hem, vo a kan piki hem baka. We Josef no meki trobi vo go, a teki da boodskopoe wantem. Ma poti! dem ala toe no ben sabi, dati dem no sa si dem srefi baka so hesi.
Di Josef doro na Sikem, a waka go soekoe dem brara vo hem na ala dem sabana, ma a no finni dem, bikasi dem no ben de dapee moro. We di wan tra soema kom miti hem dapee, a si Josef waka-waka rontoe, leki wan soema, disi verdwali na boesi, dati meki da soema kom haksi hem, a taki: Hoesan joe de soekoe? Josef taki: Da dem brara vo mi mi de soekoe; joe no kan taki gi mi, na hoepee dem go nanga dem skapoe? Da soema taki: Dem go moro na hoposei, mi jeri, dem go tee na Dothan. En djoensnoe Josef waka go na dem baka, tee a finni dem na Dothan.
Ma di a ben de pikin farawei jete, dem brara vo hem si hem, dem taki: Loekoe si, da drem-man de kom de! En djoensnoe dem go sidom meki barki makandra, dem taki: Kom go, meki wi kili hem! Meki wi teki hem, hiti na ini wan bigi horo, en te wi kom na hoso, wi kan taki, wan ogri meti kili hem; dan wi sa si, sani sa kom vo hem drem. Ma Ruben, da gran brara vo Josef, di hem jeri dem taki so, a no ben tevrede nanga dem a taki: No no! no meki wi kili hem, no trowei hem broedoe! Betre oen teki hem, hiti hem na ini da horo, disi de na da bigi sabana jandaso; ma loekoe boen, vo oen no doe hem wan tra ogri moro! Dati Ruben ben taki, nomo vo a poeloe Josef na dem hanoe; bikasi hem ben membre na hem hatti, vo go safri go poeloe Josef na ini da horo, tjari hem go baka gi hem tata.
We ala di dem de taki so makandra, Josef doro klosibei na dem brara vo hem, en wantem dem kisi hem, poeloe da mooi japon vo hem, dan dem teki hem, hiti hem na ini da horo; ma a ben de wan soso horo, watra no ben de na ini. Na baka dem go sidom njam. Ma Ruben? dati no go sidom nanga dem, bikasi di a ben loekoe vo poeloe hem brara safri na ini da horo, dati meki a gowei vo hem, a doe, leki hem habi wan pikin wroko jete, vo kaba hem.
Ma poti! bifo Ruben kom na da horo, dem tra brara winni hem kaba. Da tori ben waka so: Reti da joeroe di dem sidom makandra vo njam, dem si foeloe-foeloe Ismael-soema kom pasa dedapee nanga dem kameli, dem ben de koopman, dem komopo na Gilead-kondre, dem tjari sani go na Egipti-kondre go seli. We dati tjari Juda na wan tra prakseri ageen, a taki gi dem brara vo hem: San a kan helpi wi, vo wi kili wi brara, vo a dede soso na ini da horo? Betre wi go seli hem gi dem Ismael-soema, di de kom dapee, leki wi srefi hanoe doe hem wan ogri; bikasi tog hem da wi brara. Dem tra brara taki: We a boen toe, meki wi doe so, a moro betre so. En di dem Ismael-soema doro dedapee, nomo dem brara go poeloe Josef na ini da horo, en alwasi fa a ben begi dem so meni, alwasi fa dem ben si da sari vo hem, tog dem no jeri hem kweti-kweti, dem no ke vo noti (1. Mose 42,v.21); ma dem seli hem gi dem Ismael-soema, dem meki dem pai dem twenti piesi silver-moni; en dan dem soema teki hem, tjari go tee na Egipti-kondre.
Ma na baka di Ruben toe kom na da horo, kaba a no finni Josef na ini moro, dati meki a kom skreki tee a pliti hem klosi, a ron go baka na dem brara vo hem, a bari, a taki: Ke, da boi no de moro! Hoepee mi sa go now? San mi sa doe? - Ma dem brara taki gi hem, meki hem hatti kouroe, bikasi da seli nomo dem seli hem. Na baka dem go kili wan krabita-boko, dem teki da japon vo Josef, dipi na ini da broedoe; en dan dem seni da penni japon go na dem tata, dem seni taki gi hem, da so dem ben finni da japon, meki hem loekoe, efi somtem dati da hem pikien Josef japon, bikasi a tan so na dem hai, leki da hem.
We so leki da ouroe tata kom si da japon, a sabi hem wantem, a taki: Ke! da mi pikien japon srefi! Somtem wan ogri meti njam hem! Vo troe-troe, wan krasi meti kili mi pikien Josef! En Jakob pliti hem klosi, a weri wan soso zakka na hem skin vo rouw, so leki dem ouroe-tem-soema ben lobbi doe, te dem de na ini wan bigi sari; kaba alwasi ala hem pikien ben feti vo troostoe hem, tog da poti tata no ben kan teki wan troostoe, a taki, nanga bigi sari hem sa go na da srefi dede-kondre toe, dapee hem pikien go kaba; en a ben sari vo hem pikien wan langa tem.
Ma dem Ismael-soema, disi ben bai Josef, di dem doro na Egipti-kondre, dem teki hem, seli hem baka gi Potifar, dati ben de wan gran-soema vo koning Farao hoso.
1. We di wi ben jeri da tori vo Josef, fa a ben lobbi alatem, vo tori dem brara vo hem, dati no moe meki wi denki, vo gongosa soema, dati no de wan ogri. Josef no ben de wan gongosa-man, ma di a ben tori dem brara vo hem, a ben doe dati wawan, vo hem tata kan krasi dem, en vo dem kaba nanga dem ogri maniri. We vo ogri-hatti soso no wan pikien moe tori trawan, vo meki trawan kisi fomfom. Ma te wi tori trawan, somtem vo dem no moe kom na wan moro bigi ogri, dan alatem wi moe doe dati nanga wan sari-fasi, a moe hati wi srefi, disi trawan de so ogri, vo wi moese tori dem.
2. Te wan soema habi ogri-hatti vo trawan en djaloesoe, ke dati kan seni hem vo doe foeloe-foeloe ogri, so leki wi si dati na dem brara vo Josef. Bikasi di dem ben habi da takroe djaloesoe na hem tapo, dati ben meki dem potti mofo makandra, vo kili dem eigen brara. En alwasi Gado no ben gi dem pasi, vo dem kili hem, tog dem seli hem, en na baka dem meki lei na tapo jete, kori da ouroe tata vo dem, dem taki, da so dem ben finni da japon. We da so wi kan si, efi wan soema de feti nanga da Jeje vo Gado, kaba a no sabi vo dwingi hem srefi vo pikin-sani, dan didiebri de seni hem go doe ala soortoe bigi ogri.
3. Da tori vo dem brara vo Josef de sori wi wan skreki exemple vo troe, fa wan soema kan kili hem konsiensi so tee bakatem hem hatti kom tranga leki wan stoon. So dem ben seli dem brara, dem go sidom wantem go njam, leki no wansani ben pasa. We meki wi teki dati vo wan waarskouwe, vo wi no kili wi konsiensi so srefi toe, tee no wan ogri kan hati wi moro!
4. Disi dem pikien vo Jakob ben habi da ogri-hatti so vo dem pikin brara Josef, dati wawan ben potti da heeli famili na so wan toemoesi jamerfasi na bakatem; en alwasi fa dem ben ogri, tog te dem ben si da ouroe tata nanga da sari so, alatem a ben moe de, leki wan maka soetoe dem na dem konsiensi. We efi brara nanga sisa vo wan famili de lobbi dem srefi makandra, ke dati de wan toemoesi boen-sani, wan switi-sani vo troe! (Psalm 133, v. 1.)
5. Da tori vo Josef geersi di vo Masra Jesus toemoesi. So leki dem brara vo Josef no ben lobbi hem, so srefi dem djoe no ben lobbi Masra Jesus toe, alwasi a no ben doe dem wan ogri. (Joh. 15, v. 25.) So leki dem brara vo Josef ben potti mofo makandra, taki, dem sa kili hem, so srefi dem djoe ben sidom na komparisi toe, dem meki barki vo kili Jesus. (Matt. 26, v. 4.) Dem brara vo Josef ben seli hem vo twenti piesi silver moni, ma Judas ben seli Masra Jesus vo dritentin piesi. (Matt. 26, v. 15.)
(1. Mos. Kap. 39 nanga 40.)
Disi dem Ismael-soema ben tjari Josef kom na Egipti-kondre, dem seli hem baka gi Potifar, da wan gran-soema vo koning Farao, en Potifar teki hem vo hem foetoeboi.
We ala di Josef ben de na da Egipti-soema hoso, Masra Gado no libi hem dapee, ma a blesi hem na ala fasi; en dati ben meki bakatem a finni foeloe boen na da kondre. Bikasi di Potifar srefi ben si, ala wroko, disi Josef ben doe, alwasi hoe-sani a ben teki na hem hanoe, ala komopo so boen, dati meki hem masra kom lobbi hem, a potti hem vo basi na ini hoso, a gi hem alasani abra, meki a loekoe hem heeli plasi nanga ala goedoe na ini hoso. En sinsi Josef ben teki da wroko abra, Masra Gado ben blesi da Egipti-soema hoso, vo Josef hede; alasani ben waka so boen na hem ondro, na ini hoso en na firi srefi, tee bakatem Potifar no ben bemoeje nanga wansani na hem hoso moro, so langa leki Josef ben de na hem hoso.
Ma poti Josef! da liebi kom kenki hesi gi hem. Bikasi di a ben de wan mooi jonkman, da wefi vo Potifar potti hai na hem, tee a kom kisi wan takroe lobbi vo hem, en wan dei da missi taki gi hem, meki a kom slibi nanga hem na ini kamera. Ma Josef taki, hem no wani, hem no kan doe dati, a taki: Di mi masra ben potti ala hem goedoe na mi ondro, a vertrouw mi alasani na mi hanoe, fa mi sa doe so wan bigi ogri, pasa mi Gado mofo! Gado moe kibri mi, vo mi no doe so wan zondoe! Ma alwasi doro nomo da missi ben trobi Josef vo dati, tog Josef no gi hem jesi kweti-kweti, a no ben wani go klosibei srefi na da oeman, ma te a si hem nomo, a skreki, a soekoe vo komopo wantem na hem fesi.
We wan dei, disi Josef ben moese vo go na ini da hoso ini, vo doe wan boodskopoe vo hem masra, en di no wan tra soema ben de dapee na ini da kamera, leki da missi wawan, nomo da missi kisi hem, a fassi hem, holi hem na hem japon, a taki: Kom slibi nanga mi! Ma Josef libi da klosi na hem missi hanoe, a ron komoto na ini da hoso.
We disi da oeman si, Josef no wani kweti-kweti, kaba a gi hem so wan afrontoe tee a libi da japon na hem hanoe, a ron gowei, dati meki da missi kom kisi wan toemoesi hattibron na hem tapo, a hopo wan babari, a kali ala dem tra foetoeboi kom makandra, a taki: Loekoe, da pikin djoe, disi masra ben bai, tjari kom na ini hoso, da so da so a wani doe mi, meki mi kom na sjem, nomo vo a spotoe nanga wi! En da missi teki da japon, potti na hem sei tee Potifar srefi kom baka na hoso. We so hesi Potifar kom na hoso, nomo hem wefi meki da srefi lei ageen, a taki gi hem man: Da pikin djoe, di joe bai tra dei, a kom tee na ini mi kamera, a wani gi mi sjem. Ma di mi bari wantem, mi kali soema kom helpi mi, dati meki a kom frede, a ron gowei, libi hem klosi na mi hanoe.
We di da masra jeri so wan tori na hem wefi mofo, dati meki hem hatti kom bron toemoesi nanga hem boen foetoeboi Josef, a teki hem, hiti hem na ini da bigi doengroe-hoso vo lanti, dapee dem gran foetoeboi vo koning-hoso ben sidom, te dem ben doe wansani, disi no boen. We na dapee dem sloto Josef, potti hem foetoe na boeje, en dem weri banditi gi hem, libi hem dapee. (Psalm 105,v.18.) Ma hem boen Gado no ben libi hem, bika a naki da profosoe hatti, vo a kisi wan sari vo Josef, en di Josef ben holi hem srefi so boen alatem, dati meki profosoe kom lobbi hem, tee bakatem a poeloe hem foetoe na boeje, a teki hem vo hem knegti, meki a helpi hem, vo loekoe dem tra soema na doengroe-hoso. En Masra Gado gi Josef foeloe koni, vo a kan bezorgoe ala hem wroko so trouw, tee bakatem profosoe srefi no ben bemoeje nanga wansani moro, ma hem heeli wroko a libi abra na Josef.
We wan heeli piesi tem na baka toe gran-soema vo koning Farao hoso kom kisi trobi nanga koning. Wan ben de hem hofmeester, disi ben habi da wroko vo skenki wini gi koning, en da trawan ben de da gran-bakker vo koning, di ben meki brede nanga koekoe gi hem. We di dem ala toe ben doe wansani, disi no boen, dati ben meki koning Farao hatti kom bron nanga dem, en a potti dem na ini da srefi doengroe-hoso vo lanti, dapee Josef ben de. We ala di dem toe soema vo koning-hoso ben de na doengroe-hoso dapee, wan neti dem ala toe drem, ibriwan ben drem wan aparti drem; ma no wan vo dem ben sabi, sani da drem vo hem wani taki. We dei-broko mamantem di Josef hopo doro, kom na ini da kamera, en di a si dem ala toe sidom so nanga sari, a haksi dem: San doe oen tidei? Vo san hede oen meki so wan sari fesi? Dem taki: Wi ala toe ben drem di neti, kaba wi no habi wan soema, disi kan poeloe dem drem gi wi. Josef taki gi dem: Da troe, vo poeloe tra soema drem, dati Gado wawan kan doe, ma meki mi jeri, sani oen drem; somtem Gado sa helpi mi, vo mi poeloe dem drem gi oenoe.
We da hofmeester, di ben habi da wroko vo skenki wini gi koning, hem fosi verteli hem drem gi Josef, a taki: Na neti di mi drem, a ben de leki mi si wan droifi-boom na mi fesi, da boom ben habi dri takki, en dem takki ben meki blometje, tee dem blometje tron droifi kaba, en som vo dem droifi ben gro so mooi, tee dem repi kaba. Ma mi ben holi da beker vo Farao na mi hanoe, en mi teki dem repi droifi, masi dem na ini da beker vo koning, en dan mi langa da beker gi Farao, potti na hem hanoe.
Josef taki: Da drem no trobi vo poeloe: Dem dri takki, dati da dri dei. We dri dei moro Farao sa poeloe joe diaso, potti joe na joe wroko baka, vo joe loekoe hem tafra, so leki joe ben doe fositem. Ma te joe finni boen baka, gran-tangi! no vergiti mi; membre mi toe, te joe de nanga Farao ageen, en potti wan boen mofo gi mi, vo mi toe kan komopo diaso! Bikasi da foefoeroe dem ben foefoeroe mi na Djoe-kondre, dem poeloe mi safri na mi tata hanoe, tjari kom na disi kondre, en diaso ageen mi no ben doe wan soortoe ogri, kaba dem teki mi, potti mi na doengroe-hoso, da lei soso dem ben lei gi mi.
We di da gran-bakker si, fa Josef poeloe da drem vo da hofmeester so boen, nomo a bigin verteli di vo hem toe gi Josef, a taki: Mi ben drem toe na neti, a ben tan leki mi tjari dri baskita na mi hede, trawan na trawan tapo. We da baskita di ben de na tapo, da kroboiwan, dati ben habi ala soortoe switi koekoe, so leki Farao lobbi vo njam; ma ala di mi tjari dem koekoe, dem pikin fowloe kom njam dem koekoe na ini da baskita, di ben de na mi hede tapo. Josef taki: Da drem no trobi toe vo poeloe. Dem dri baskita, dati da dri dei. We dri dei moro Farao sa teki joe, a sa hanga joe na bongopita, en dem pikin fowloe sa kom njam joe skin. We reti so leki Josef ben taki, da so dasani kom pasa toe. Bikasi dri dei na baka, di koning Farao ben habi hem verjari, en di a ben meki wan trakteri gi ala soema na hem paleis, da srefi dei a seni poeloe dem toe soema na doengroe-hoso, a teki da hofmeester, potti hem baka na hem wroko; en da trawan a seni go, vo dem hanga hem, so leki Josef ben taki gi dem. Ma da hofmeester no ben membre Josef moro, a vergiti hem.
1. We da tori disi, a de sori wi da srefi sani ageen, disi wi ben si kaba na da tori vo basi Elieser, disi ben loekoe Abraham hoso, vo taki: Efi wan soema habi wan betrouw foetoeboi na hem hoso, nanga boen betrouw soema na hem plasi, dati de meki so wan soema finni foeloe boen vo troe. Bikasi dapee wan boen Kristen-soema de, dapee Gado blesi no kan mankeri. Masra Jesus taki: Efi wan masra habi wan betrouw foetoeboi, disi bekwaam vo a kan potti hem vo basi, meki a loekoe ala dem tra soema na plasi, en vo a gi dem rantsoen na reti tem: dati de wan bigi sani vo troe! (Luk. 12, v. 42.) We foeloe masra nanga missi, alwasi somtem dem srefi no de so boen Kristen-soema, tog te dem soekoe soema vo joeroe, alatem dem sa soekoe, vo kisi boen betrouw Kristen-soema, disi dini dem boen, so leki a fiti.
2. Da tem disi Josef ben de na Potifar hoso, vo dorosei a ben habi wan boen liebi troe. Ma boen liebi vo skin nanga boen liebi vo ziel dati no wan. Efi Josef no ben wakti hem hatti boen, hesi hem zieli ben kan kisi wan ogri dapee. We te wi finni boen na dorosei, dan wi habi vo wakti wi hatti moro fini srefi, leki te wi de na wan pina-liebi; bikasi weiniki soema de, disi kan verdragi da boen liebi vo disi grontapo. We meki wi begi Masra alatem, vo wi no fadom na ini tesi! (Mark. 14, v. 38.) En efi somtem wan tesi kom miti wi, meki wi membre Gado wantem, so leki Josef ben membre hem, meki wi taki toe: “Ke fa mi sa doe so wan bigi ogri, pasa mi Gado mofo!”
3. Da wan bigi tesi vo troe, disi ben miti Josef, di so wan gran missi ben kom na hem tapo, a ben wani dwingi hem, vo bemoeje nanga hem; ma tog Josef no ben meki da tesi kom moro hem. We da so srefi ala soortoe tesi kan miti wi toe na disi grontapo: wi srefi skin kan tesi wi, vo doe wansani, disi no boen, en tra ogri soema kan soekoe toe, vo dwingi wi, meki wi bemoeje nanga dem; somtem dem kan pramisi wi foeloe sani, vo blindi wi hai. Ma tog efi wi no wani meki dem foefoeroe wi hatti, efi wi teki da tranga vo Masra Jesus, en efi nanga begi wi feti nanga da ogri, so leki Josef ben doe, dan vo troe-troe no wan soortoe tesi sa man vo moro wi, en vo poeloe wi na Gado hanoe. Ma efi wi wani so, dan wi no moe pre nanga zondoe, ma da frede wi moe frede hem. So srefi wi no moe holi wi srefi nanga dem ogri soema, vo tan na dem sei; en te wi de na wan plesi, dapee soema de taki takroe tori, a moe hati wi jesi so tee wi feti hesi vo komoto dapee, so leki Josef ben ron komoto na ini da missi kamera. Ma efi so wan tori switi na wi, dan wi moe sabi, wi de na ini da ogri kaba.
4. Da tori vo Josef de sori wi, fa Gado ha foeloe pasiensi, tee a kan dangra wi srefi. Josef ben de so wan boen soema, en tog a ben moese go na doengroe-hoso, a ben tan na ala soema hai, leki hem ben doe wan bigi ogri. We, Masra Jesus taki: Boen vo dem soema, disi trawan soekoe nanga ogri-hatti, efi dati de vo dem boen maniri hede wawan. (Matt. 5, v. 10.)
5. Disi da hofmeester vo Farao finni boen baka, a kom vergiti Josef hesi, a no membre hem moro; ma tog Masra Gado no ben vergiti hem, a no libi hem tee na ini doengroe-hoso srefi, so leki wi sa jeri dati bambei. We dati meki wi membre da psalm, di taki: Boen vo da soema, disi de potti hem vertrouw na Masra; en disi no loekoe na liebi-soema, vo helpi hem! (Psalm 118, v. 8.)
6. Da tori disi, a de geersi di vo Masra Jesus ageen. Bikasi so leki da bigi tesi ben miti Josef, kaba Josef no ben meki da tesi kom winni hem, so srefi ala soortoe tesi ben miti wi Masra Jesus toe, didiebri nanga liebi-soema ben tesi hem, ma dem no ben kan moro hem, bikasi hem no ben habi zondoe. (Ebr. 4, v. 15.)
7. So leki da missi ben potti soso lei na Josef tapo tee dem potti hem na banditi srefi, nomo vo da takroe oeman hede; we da so srefi dem djoe ben doe nanga wi Masra Jesus toe, da soso lei dem ben potti na hem tapo; en da vo wi ogri soema paiman hede Gado ben boetoe hem so, tee da dede a ben moese dede. - So leki da hofmeester vo Farao ben vergiti Josef hesi, a no ben sabi da boen, disi Josef ben doe hem; we so srefi foeloe soema de tee tidei jete, di no wani sabi ala da foeloe boen, disi Masra Jesus ben doe wi, en dem no membre hem toe, vo dem taki hem tangi.
(1. Mos. Kap. 41.)
Da tem disi koning Farao ben poeloe da hofmeester nanga da tra soema baka na ini doengroe-hoso, poti! - Josef ben fika na ini jete, sondro a ben sabi, hoetem dem sa poeloe hem toe; bikasi da hofmeester, di a ben kom na hem wroko baka, a no ben membre Josef moro, a vergiti hem krin-krin. Ma Masra Gado no ben vergiti hem. We toe jari na baka vo da tori, wan neti koning Farao drem wan aparti drem. A ben de leki hem tanapoe na sei wan bigi riba, disi dem kali Nil, en na dapee a si sebi mooi fatoe kow komopo na ini da riba, dem go na sabana go njam. Na baka a si sebi tra kow ageen komopo na ini riba, dem ben mangri so tee, dem ben sori takroe vo troe. We di dem go toe na dem tra kow na sabana, dem sebi mangriwan teki dem sebi fatoewan, njam dem liebi-liebi; ma nanga ala dati dem no ben kom moro fatoe, joe no ben kan si srefi, efi dem ben njam dem trawan; bikasi dem ben tan so mangri, leki dem ben de. We nanga da drem Farao wieki na ini slibi.
Ma na baka disi Farao fadom na ini slibi baka, a drem wan tra drem ageen. A ben tan, leki a ben de na wan areisi-gron, en na dapee a ben si wan areisi-tiki, disi ben meki sebi bigi bosoe, dem ben dekki en mooi vo troe; ma na baka a kom si wan tra tiki moro, disi ben meki sebi bosoe toe, ma dem bosoe ben fini en pikin toemoesi, dem ben dre krin-krin. We dem sebi fini bosoe teki dem sebi dekki-wan, dem swali dem so srefi, leki dem sebi mangri kow ben njam dem sebi fatoewan. Na dati Farao kom wieki vo toetron na ini slibi, en a si, da drem a ben drem ageen. Dei-broko mamantem, di a membre dem drem vo hem, dasani kom gi hem wan pikin broko skin; bikasi a ben hangri vo sabi, sani dem drem wani taki gi hem. We vo da hede a seni boodskopoe go na heeli Egipti-kondre, a kali ala kartaman en loekoeman kom makandra, meki dem poeloe dem toe drem gi hem. Ma no wan vo ala dem soema ben man, vo poeloe dem drem gi koning, bikasi dem no ben sabi. We dati meki da hofmeester kom membre Josef baka, a go taki nanga Farao, a taki: Tidei mi kom membre mi zondoe baka! Bikasi datem, disi koning ben potti mi nanga da gran bakker na doengroe-hoso, wan neti wi ala toe ben drem wan drem dapee, ibri-wan vo hem aparti; en wan jonkman ben de nanga wi dapee, wan djoe, di ben de foetoeboi na Potifar hoso, we da hem wi verteli dem drem, en wantem a ben sabi vo poeloe dem gi wi, a no ben trobi hem kweti-kweti. En reti so, leki a ben taki gi wi, da so dasani ben kom toe; bikasi mi ben kom na mi wroko baka, en da trawan, dati dem hanga na bongopita.
We di Farao jeri da hofmeester taki so gi hem, nomo a seni soema go na profosoe, vo a poeloe Josef na doengroe-hoso, meki a kom na hem. We profosoe doe so, a poeloe hem wantem; en Josef meki dem poeloe hem barba hesi, a weri tra klosi, en dan dem soema teki hem, tjari hem go na Farao tee na ini hem kamera ini. We so hesi Josef doro dapee, Farao bigin wantem vo taki nanga hem, a taki: Jere Josef, mi ben drem wan drem, kaba no wan soema de, disi sabi vo poeloe hem gi mi, ma mi jeri, joe habi da koni, vo poeloe drem. Josef piki Farao, a taki: A no mi, Masra Gado srefi sa meki koning kom sabi da boen, disi a wani doe na koning.
Farao taki: We mi drem, mi tanapoe na sei riba, en mi si sebi mooi fatoe kow komopo na ini da riba, dem go na sabana go njam. Na baka mi si sebi tra kow ageen komopo na ini riba, dem ben mangri en takroe so tee, na heeli Egipti-kondre mi no ben si so takroe kow jete nooiti wantem. We dem sebi mangriwan go kisi dem sebi fatoewan, dem teki dem, njam dem liebi-liebi; ma nanga ala dati dem no kom moro fatoe, joe no ben kan si, efi dem ben njam dem trawan; bikasi dem ben tan so mangri leki dem ben de. Nanga da drem mi wieki na ini slibi. Ma di slibi kom teki mi baka, mi bigin drem wan tra drem moro. A ben tan, leki mi de na wan areisi-gron, dapee mi si wan areisi-tiki, disi ben meki sebi bigi bosoe, dem ben dekki en mooi vo troe; ma na baka mi kom si wan tra tiki ageen, disi ben meki sebi bosoe toe, ma dem bosoe ben fini en pikin toemoesi, dem ben dre krin-krin. We dem sebi fini bosoe teki dem sebi dekkiwan, dem swali dem so srefi, leki dem sebi mangri kow ben njam dem sebi fatoewan. Mi verteli dem drem gi dem loekoeman kaba, ma no wan vo dem sabi, vo poeloe dem gi mi. - Josef taki: We ala toe drem de taki da srefi sani. Gado wani meki Farao sabi, sani disi hem de go doe. Dem sebi fatoe kow nanga dem sebi dekki bosoe areisi di Farao ben si, dati da sebi fatoe jari; ma dem sebi mangri kow, nanga dem sebi dre bosoe areisi, dati da sebi jari hangri-tem. We fosi dem sebi fatoe jari sa kom, disi so meni njanjam sa gro na kondre, tee dem sa habi foeloe toemoesi pasa-marki na heeli Egipti-kondre; ma na baka vo dem sebi boen jari wan tranga hangri-tem sa fadom na kondre, a sa holi sebi jari langa, en da hangri-tem sa hebi vo troe; bikasi ala njanjam sa kom dieri so tee dem no sa taki, wan tem ben de, disi alasani ben de so boen-koopoe; da so da hangri-tem sa kom moro heeli Egipti-kondre. Ma disi Farao ben drem dem toe drem so hesi na baka makandra, en disi dem ala toe habi da wan taki, na dati Farao kan si, Gado sa doe so troetroe, en a sa doe dati hesi. We meki Farao loekoe wan boen soema, disi bekwaam en disi koni, vo koning kan potti hem, meki a loekoe heeli Egipti-kondre. So srefi Farao moe potti amtenari na da soema ondro, a moe gi dem da wroko, vo piki ala njanjam, disi de gro na ini dem sebi boen jari, kibri na ini koning makzien. Vo ala areisi en vo ala tra njanjam, disi sa gro na dem sebi boen jari, dem moe teki feifi procenti, kibri na makzien, vo no wan soema moe vermorsoe sani, en vo dem habi njanjam vo njam na bakatem, te dem sebi dieri jari sa kom na Egipti-kondre, vo soema no moe dede nanga hangri.
We da rai vo Josef ben boen toemoesi na Farao en na ala dem tra gran-soema vo hem. En Farao haksi dem gran-soema vo kondre, a taki: Fa wi sa doe finni so wan soema? Bikasi mi no habi wan soema na mi heeli kondre, disi sa man, vo loekoe da wroko so boen, leki Josef srefi, bikasi oen srefi si, Josef de wan soema, disi Gado gi hem foeloe koni vo troe. En dan Farao taki nanga Josef wantem, a taki: Disi Gado ben meki joe sabi ala dasani so, dati de meki mi si, no wan soema sa fiti da wroko so boen, leki joe srefi. We mi sa teki joe, potti joe na mi sei, vo joe loekoe mi heeli kondre. Ala soema vo mi hoso en vo mi kondre sa onderdaniki joe; dasani di joe taki, dem moe doe. No wan-pee mi sa grani moro leki joe, buiti da koning-troon, dapee wawan mi sa grani moro leki joe. We da so Farao potti Josef vo granman na heeli Egipti-kondre; en dan a poeloe hem ringa na hem finga, weri gi Josef, a gi hem mooi koning-klosi vo weri, en wan goutoe ketting a weri toe na hem neki. Na baka a teki wan mooi wagi vo hem, meki Josef sidom na ini, a seni hem go rei da heeli foto rontoe; so srefi koning besteli soema, vo dem waka go na hem fesi, a meki dem bari gi ala soema, taki: Oen saka oen kni! Bikasi da masra disia, hem dati koning meki granman vo kondre!
We di Josef kom baka na hoso, Farao taki gi hem: We Josef, mi kondre de na joe hanoe. Mi sweri joe, dati no wan soema na heeli Egipti-kondre sa habi permisi, vo doe wansani sondro joe sabi, no wan pikin -sani srefi! En Farao gi Josef wan tra nem, a kali hem Zofnat Paneak , dati taki, wan soema di sabi kibri-tori. So srefi a gi hem wan wefi toe, da missi nem Asnat , a ben de wan tra gran-soema pikien. Datem Josef ben ouroe dritentin jari.
We so hesi Josef tron granman nomo, a teki hem wroko wantem, a meki wan bigi reisi, a waka heeli Egipti-kondre doro, vo loekoe ala dem foto, dapee a ben denki vo meki dem bigi makzien, disi a ben wani kibri da njanjam na ini. En zoodra dem makzien klari, a bigin vo piki ala da njanjam, disi soema no ben kan njam wantem, a meki dem kibri ala na ini dem makzien, vo a no moe vermorsoe soso, en vo a no go pori; we dem kisi so meni areisi makandra nanga karoe nanga ala soortoe tra njanjam, tee bakatem Josef srefi kaba vo teli hem, a no ben man vo teli hem moro; bikasi na ini dem sebi boen jari ala dem pranasi, nanga dem pikin gron, nanga dem djari ben meki so meni njanjam, a ben foeloe toemoesi pasa-marki.
Na ini dem sebi fosi jari Josef wefi meki toe manpikien; da fosiwan Josef kali Manasse , bika a taki: Gado meki mi kom vergiti ala da ongeluk, disi ben miti mi; en da trawan a kali Efraim , a taki: Gado meki mi kom bigi na da srefi kondre, dapee mi ben pina so langa.
We bakatem, disi dem sebi boen jari ben pasa, nomo dem sebi dieri jari bigin wantem, so leki Josef ben taki dati na fesi. No wan reti njanjam ben gro moro, en dati meki ala kondre kom pina toemoesi nanga hangri. Na Egipti-kondre dem no ben fili da hangri-tem so hesi, leki na dem tra kondre, bikasi dem ben habi brede jete. Ma bakatem di no wansani ben gro moro, en di ala njanjam kom dieri na heeli Egipti-kondre toe, dati meki ala soema kom na Farao, dem kre dem nootoe gi hem, taki, dem no ha brede moro, dem pina toemoesi nanga hangri. Ma Farao seni dem na Josef, meki hem zorgoe vo dem. En Josef bigin vo hopo ala dem makzien na heeli Egipti-kondre, a seli karoe nanga areisi nanga so meni tra njanjam gi dem Egipti-soema; bikasi jari vo jari da hangri-tem kom moro hebi na Egipti-kondre. So srefi dem soema vo tra kondre kom na Egipti-kondre toe, vo bai njanjam na Josef; bikasi da hangri-tem ben fadom na ala kondre.
1. We te wi lesi da tori, fa da srefi Josef, disi dem brara vo hem ben seli, en disi ben sidom so meni langa na doengroe-hoso, fa bakatem di da joeroe vo Masra kisi, a tron granman vo wan bigi kondre; - te wi lesi en te wi jeri da tori disi, wi moe bekenti, Gado-wroko dangra wi liebi-soema vo troe! Hem sabi alasani langatem na fesi kaba, fa alasani sa waka. Profet Jesajas taki: Te Gado wani doe wansani, fosi a dangra wi; ma te a kaba, dan wi moe taki, a meki alasani boen toemoesi. (Jes. 28, v. 29.)
2. Wi habi foeloe tori na ini boekoe, fa na ouroe-tem Masra Gado ben lobbi taki nanga soema na ini slibi, te dem drem, vo meki dem kom sabi hem wani, so leki a ben doe nanga Farao toe. We efi Gado wani, a kan doe dati tee tidei jete; en vo troe a doe dati jete wan-wantron. Ma tog wi no kan taki, ala drem, disi soema drem, da vo Gado. Bikasi alasani disi wi moese vo sabi, dati da woortoe vo Masra srefi meki wi sabi.
3. Da tori disi de leri wi, fa na boen tem, te njanjam de nofo na kondre en te alasani de boen-koopoe, dan wi no moe denki, wi kan vermorsoe alasani wantem. Ma na Josef wi moe teki wan exemple; dati taki, te wi njam wan hafoe, dan wi no moe teki da tra hafoe, trowei, ma kibri wi moe kibri hem tee vo wan tra tem, vo hangri no kili wi na bakatem, te alasani kom dieri baka. Da so Masra Jesus srefi leri wi toe, di a ben taki gi dem disciple vo hem, meki dem piki dem saka-saka, disi libi abra, vo no wansani moe lasi. (Joh. 6, v. 12.)
4. Da tori vo da poeloe, disi Gado ben poeloe Josef na ini da bigi sjem na doengroe-hoso, a meki hem so bigi, tee a tron granman vo kondre srefi, we da tori geersi di vo Masra Jesus ageen. Bikasi disi Jesus srefi ben saka hem srefi so toemoesi dipi, tee a ben pina vo wi hede, en a ben dede toe; we vo dati hede Gado ben hopo hem baka, a potti hem so hei, tee a gi hem bigi nem en glori teego na ini hemel. (Ebr. 2, v. 9.) Vo Josef? ala soema, disi ben kom na hem, dem ben moese potti kni gi hem, sori hem respeki. We vo Jesus? ala soema, disi de na ini hemel, en disi de na grontapo en na ondro gron srefi, dem moe potti kni gi hem; bikasi hem nem bigi moro ala tra nem. (Filip. 2, v. 9 & 10.) Josef ben de da soema, na disi ala soema ben moe go, vo teki brede. We so srefi wi Masra Jesus srefi de kali wi, vo kom na hem, a taki, hem de da brede, disi gi soema liebi, en disoema disi kom na hem, hangri no sa kili hem moro. (Joh. 6, v. 35.)
(1. Mos. Kap. 42 nanga 43.)
Da tranga hangri-tem, disi ben kom na baka vo dem sebi boen jari, dati ben fadom tee na Kanaan-kondre toe, dapee Jakob nanga dem brara vo Josef ben de liebi. En di no wan soema ben de dapee, disi ben kan waarskouwe dem na fesi, dati so wan hangri-tem sa kom, so leki Masra ben meki Josef waarskouwe Farao na Egipti-kondre, we dati meki dem soema vo Kanaan-kondre no ben meki makzien, vo kibri njanjam na ini, dem jari, disi foeloe njanjam ben gro. We di Jakob kom jeri, na Egipti-kondre dem seli areisi nanga karoe boen-koopoe, a kali dem pikien vo hem, a taki: Sani oen drai jete? Mi jeri, na Egipti-kondre dem seli areisi boen-koopoe; go dapee, bai areisi nanga karoe, vo wi kan pasa liebi, en vo wi no dede nanga hangri. We dem tin brara vo Josef teki pasi wantem, dem go na Egipti-kondre go bai njanjam, dem nanga nofo tra soema moro; bikasi heeli Kanaan-kondre ben pina nanga hangri. Ma Benjamin, da pikin brara vo Josef, hem dati Jakob no ben seni go nanga dem, bikasi a taki, somtem wan ogri kan miti hem.
We disi dem tin brara vo Josef doro na Egipti-kondre, na koning Farao hoso, vo bai areisi, nomo dem jeri, na Josef dem moe go bai dati; bikasi da hem ben de granman vo kondre, en na hem ondro dem amtenari ben de, disi ben habi da wroko, vo seli njanjam. We dati meki dem kom tee na Josef srefi, en na hem fesi dem alamal hiti dem srefi na gron gi hem, vo sori hem respeki; bikasi a ben de wan gran-soema, en dem no ben sabi, hem da Josef. Ma Josef, so leki dem brara kom na hem fesi nomo, a sabi dem wantem; ma a doe, leki a no sabi dem. We disi a si dem alamal lidom na hem fesi nanga so wan saka-fasi, dati meki a kom membre dem drem vo hem, disi a ben drem na hem jonge jari tem; en di a ben wani, dem srefi moe kom membre da ogri toe, disi dem ben doe hem, dati meki a bigin vo taki nanga dem na wan pikin krasi-fasi, a haksi dem, hoepee dem komopo. Dem taki: Na Kanaan-kondre wi komopo, wi kom bai njanjam. Josef taki: No no, spion oen de; wi kondre oen kom loekoe, vo oen kan piki dem vyanti baka, di ben seni oenoe; dati wawan meki oen kom dia! Dem taki: No no, mi Masra, njanjam soso wi kom bai. Bika wi alamal da brara, vo wan tata, wi de boen soema troe-troe; nooiti wantem wi ben de spion, wi no sabi da wroko kweti kweti. Vo taki reti, da twalf brara wi ben de, da pikinwan de na hoso jete, a de nanga wi tata, ma da trawan, dati no de moro. - Josef taki: Ja ja, da so a de, leki mi taki gi oenoe, da vo spion oen kom dia; bikasi dem vyanti vo wi seni oenoe, vo oen loekoe wi kondre na wan koni-fasi, en bakatem oen go piki dem baka, vo dem kan sabi, fa dem moe doe, vo kom doro na wi tapo onverwakti, teki wi kondre. Dati wi moe ondersoekoe boen-boen. - We di oen taki, wan pikin brara vo oenoe de na hoso jete, a boen, meki wan vo oen go teki hem, tjari kom toe; dem trawan mi sa potti na binfoto so langa, en te da pikin brara kom, dan wi sa ondersoekoe da taki vo oenoe; we efi mi finni, dasani, disi oen ben taki gi mi, da troe, a boen vo oenoe; ma efi no so, dan wi moe loekoe oenoe leki spion.
We disi Josef kaba vo taki so nanga dem, a teki dem alamal, a seni dem go na wan kamera, meki dem sidom dapee dri dei langa. Na baka a seni kali dem baka, a bigin vo taki wantron moro nanga dem, a taki: We efi oen wani tan na liebi, dan helpi no de, oen moe doe so, leki mi ben taki gi oenoe. Mi de wan soema, disi frede Gado, en mi no sa doe oen kroekoetoe. We efi oen de boen soema, meki mi teki wan vo oenoe vo panti, meki mi holi hem diaso, dan oenoe kan tjari da njanjam go na hoso, di oen ben bai, vo oen famili no go dede nanga hangri. Ma te oen kom baka, oen moe tjari da pikin brara vo oen kom gi mi, dan mi kan si, oen no ben lei, en dan wi no sa kili oenoe. We helpi no ben de, dem taki ja, dem sa doe so.
Ma da taki, disi Josef ben taki so tranga nanga dem, dati kom naki dem hatti tee dem kom membre dem zondoe vo dem jonge jari, en dem taki, trawan gi trawan: Joe si? now wi kisi wi paiman vo da ogri, di wi ben doe na wi brara; bikasi wi ben si da jamer vo hem, fa a ben kre, en fa a ben begi wi so meni, ma wi no ben wani jeri hem. We dati de meki so wan ogri kom miti wi noja. Ruben taki: We mi no ben waarskouwe oenoe, mi no ben taki gi oenoe: Loekoe boen nanga da pikien, vo oen no doe hem ogri? Ma oen no ben wani jeri mi. We now oen si, Gado de soekoe hem broedoe na wi han. Ma disi dem taki so makandra, dem no ben sabi, Josef kan verstaa dem; bikasi te hem ben taki nanga dem, a ben doe, leki hem no sabi dem tongo, en alatem a ben meki wan tra soema moe poeloe dem woortoe gi hem na Egipti-tongo.
We disi Josef jeri, dem brara vo hem kom fili da ogri noja, dati meki a go kibri pikinso na wan tra kamera, bikasi hem hatti kom zwaki so tee hem hai ron watra. Ma di a kom baka, a dwingi hem srefi ageen, a meki dem no kan si noti na hem fesi. En wantem a teki Simeon, a potti hem na boeje na dem fesi srefi. Na baka a gi dem skrifi-man order, vo dem teki dem trawan zakka, foeloe dem nanga areisi en nanga karoe, so srefi da moni, disi dem ben pai vo da karoe, a meki dem potti baka na ini dem zakka, ibriwan di vo hem na hem zakka, nanga nofo tra njanjam moro a meki dem potti gi dem, vo dem habi sani vo njam na pasi. We da skrifi-man doe so, en dem brara vo Josef lai dem zakka na dem boeriki tapo, dem teki pasi go vo dem.
Ma na pasi di wan vo dem hopo hem zakka, vo gi hem boeriki njanjam, a si, hem moni de na ini hem zakka; en wantem a kali dem tra brara, a taki: Mi finni mi moni baka, a de na ini mi zakka. We dati meki dem alamal kom skreki vo troe, dem lasi hatti krin-krin, dem taki: Ke, san dati ageen, disi Gado moe meki sosani kom miti wi! En di dem doro na dem tata Jakob na Kanaan-kondre, dem verteli hem alasani, disi ben miti dem na Egipti-kondre, dem taki: Da masra vo da kondre ben taki tranga nanga wi, a ben loekoe wi vo spion, en alwasi hoesan wi ben taki gi hem, dati wi de boen soema, wi no ben de spion nooiti wantem, wi alamal de brara vo wan tata, wan pikin brara vo wi de na hoso jete, tog da masra no ben wani bribi wi, a holi Simeon dapee, a taki, meki wi go teki wi pikin brara Benjamin kom, dan fosi hem kan si, troe-troe wi de boen soema, en dan a sa loesoe Simeon baka gi wi.
We bakatem di dem poeloe da karoe na ini dem zakka, ibriwan vo dem finni hem moni baka na ini hem zakka, en dati meki dem alamal nanga da ouroe tata srefi kom skreki vo troe. En Jakob taki gi dem: Ke, ala mi pikien oen moe poeloe na mi hanoe! Josef no de moro, Simeon no de moro, now oen wani teki Benjamin toe. Liebi nanga dede-trobi de miti mi!
Ruben taki: We mi tata, mi sa tan borgoe vo hem, mi srefi sa zorgoe vo dati, vo a kom baka; en efi mi no tjari hem kom baka, dan joe kan teki dem toe pikien vo mi, kili dem. Jakob taki: No no, mi pikien no kan go nanga oenoe; bikasi hem brara dede kaba, a libi disi wawan; somtem wan ogri kan miti hem na pasi, dan mi no habi wan pikien vo Rahel moro; we da so oen sa meki mi ouroe weti hede go slibi nanga bigi sari, meki mi gowei na da srefi dede-kondre, dapee mi pikien go kaba.
Ma di da srefi hangri-tem ben go doro tee a kom moro da kondre, en da pikin njanjam, disi dem ben bai na Egipti-kondre, dati kom kaba, we bakatem Jakob taki gi dem pikien, meki dem go baka, bai njanjam.
Ma Juda taki gi hem: Mi papa, da masra ben taki toemoesi tranga nanga wi, a taki, efi wi no tjari wi brara kom, dan wi no moe kom na hem fesi moro. We efi joe seni Benjamin go nanga wi, dan wi sa go baka, bai njanjam; ma efi joe no wani meki a go nanga wi, dan wi no kan go; bikasi da masra ben taki expresi, dati wi moe loekoe boen, vo wi no kom na hem fesi moro, sondro da pikin brara de nanga wi. Israel taki: Ma vo san hede oen ben verteli da masra dan, dati oen ha wan pikin brara jete? Nanga dati oen ben doe mi wan bigi ogri vo troe. Dem taki: Da soema haksi wi toemoesi fini vo wi famili, efi wi tata de jete, en efi somtem wi habi wan brara moro na hoso; we da dati ben meki wi piki hem so, leki fa a ben haksi wi. Kaba wi no ben kan sabi, hem sa taki, meki wi go teki wi brara kom gi hem.
Na baka Juda go begi hem tata Israel, a taki: Meki da pikien kom go nanga wi, vo wi kan teki da reisi baka, en vo wi no dede nanga hangri, wi nanga joe nanga dem pikien vo wi. Mi sa tan borgoe vo Benjamin; efi mi no tjari hem kom baka, potti na joe fesi dia, dan mi srefi sa teki da skulti na mi tapo, en so langa mi de liebi, mi sa habi vo verantwoortoe dati. Bikasi efi wi no ben drai so toemoesi, dan vo toetron wi ben kan doro diaso ageen. We now da ouroe tata Israel no ben kan dwingi dem moro, a taki: We efi helpi no de, teki hem dan! Ma oen moe teki som switi vroektoe vo wi kondre, dem soortoe, disi dem no habi jandaso, dati wani taki, pikin honi, nanga specery, nanga noto, nanga amandra, vo oen kan gi da masra wan pikin presenti. So srefi oen moe teki tra moni, vo bai moro njanjam, buiti da ouroe moni, disi oen ben finni na ini dem zakka; bikasi mi bribi dati de wan aboisi. Ma Masra Gado Jehova moe helpi oenoe, a moe naki da soema hatti, vo oen kan tjari Simeon nanga Benjamin kom baka gi mi! San mi sa taki? Alatem mi moe de leki wan soema, disi lasi ala hem pikien!
We da so dem teki da reisi, dem go baka na Egipti-kondre, en dem doro tee na Josef. Ma so hesi Josef si dem brara vo hem, nanga Benjamin toe, a taki gi hem boekhouder, meki a tjari dem tin soema kom na ini hoso, meki koki kili wan meti, en meki dem deki tafra bitem, bikasi dem soema moe njam dina nanga hem. We da boekhouder doe so, leki Josef ben taki gi hem, a teki dem vo tjari dem go na ini hoso. Ma di dem si, dem tjari dem go na ini Josef hoso, dati meki dem kom frede, dem taki: Somtem da vo da moni hede dem tjari wi kom diaso na kroetoe, vo strafoe wi; somtem dem kan teki wi srefi, meki wi tron katibo vo dem. We vo da hede dem begi da boekhouder na doro mofo, dem taki: Gran-tangi masra, jeri wi wan woortoe! Tra dei wi ben kom diaso, vo bai njanjam, en wi ben pai da moni wantem. Ma na baka di wi ben wani poeloe da njanjam, wi alamal finni wi moni baka na ini wi zakka; wi no sabi, hoesoema potti hem na ini; ma wi tjari da srefi moni kom baka, nanga tra moni toe, vo wi kan bai moro njanjam. Ma da boekhouder no wani teki da moni, a taki: Meki oen hatti kouroe, dati no wansani, somtem Gado srefi potti wan goedoe na oen zakka, bikasi mi ben kisi da moni vo oenoe.
Na baka da boekhouder go poeloe Simeon gi dem, en dan a tjari dem alamal go na ini Josef hoso, a gi dem watra vo wasi dem foetoe, so srefi a gi dem boeriki njanjam toe. We dinatem, disi Josef srefi kom na ini, dem teki ala dem presenti, gi hem, en dan dem potti dem kni na gron gi hem. Ma Josef taki switi nanga dem, a taki dem odi, a haksi dem: Hoefasi, fa da ouroe tata vo oen tan? A de na liebi jete? Dem taki: Ja a de na liebi jete, a de heeli boen. En dem buigi dem srefi wantron moro, tee dem hiti dem srefi na gron gi hem. Ma Josef, di a si hem brara Benjamin, a taki: Hoefasi, dati de da pikin brara vo oenoe, disi oen ben verteli mi vo hem, dati a de na hoso jete? Dem taki: Ja, da hem srefi. En Josef taki gi Benjamin: Gado moe blesi joe, mi pikien! Ma moro a no ben man vo taki; bikasi hem hatti ben kisi wan zwaki vo hem brara, tee a moese feti vo komoto dedapee, a go na ini hem kamera, en na dapee a kre so tee hem hai ron watra srefi. Ma na baka, di a wasi hem fesi, dan a kom na doro baka, en a doe hem best, vo dwingi hem srefi, meki dem no kan si, dati a ben kre. Dan a kali dem foetoeboi, a taki, meki dem deki tafra hesi, meki dem poeloe njanjam.
Ma dem ben potti da njanjam vo Josef aparti, en vo dem brara dem potti aparti toe, so srefi vo dem tra Egipti-soema toe; bikasi dem Egipti-soema ben habi trefoe vo njam nanga dem Ebreer makandra na wan tafra. We bifo dem go sidom njam, Josef ben taki safri nanga hem boekhouder, hoefa dem brara vo hem moe sidom na tafra, a meki dem potti dem stoeloe so, vo dem alamal kom sidom na wan lo, reti so, leki dem jari de, da gran brara ben sidom na hedesei, en da moro pikinwan tee na ondrosei. We di dem si dati, dem alamal kom verwondroe vo troe; bikasi dem no ben kan begreipi, fa dem Egipti-soema kan sabi dem jari so boen. Na baka disi dem foetoeboi kom potti njanjam gi dem, ibriwan ben kisi hem porsi wantem, ma Benjamin dati kisi feifi tron moro foeloe, leki ibriwan vo dem tra brara, en dati ben dangra dem ageen. Ma da njanjam, disi dem ben kisi, dati ben de vo da srefi njanjam, disi Josef srefi ben habi toe na hem tafra. We da so ala dem pikien vo Jakob ben sidom njam nanga dem brara Josef, en dem dringi toe nanga makandra.
1. We te wi lesi so wan tori, somtem wi kan haksi, vo san hede Josef ben sori so wan toemoesi krasi-fasi fosi gi dem brara vo hem? Somtem da vo teki wan revensi? No no, Josef ben sabi heeli boen, dati a no fiti wi, vo wi pai ogri vo ogri baka. Ma disi a ben doe so, a ben doe dati nomo, vo naki dem brara hatti, vo meki dem srefi kom sabi da ogri, disi dem ben doe.
2. We so leki Josef ben moe dwingi hem srefi vo kibri hem lobbi nanga hem fesi gi dem brara vo hem, da so srefi te wi doe ogri, wi Masra Jesus kibri hem fesi toe gi wi, a de mandi nanga wi. Ma jete hem boen hatti no kan kaba vo sari vo wi, en doro nomo a de kali wi, a taki: Drai baka, joe di joe ben libi mi, dan mi no sa kibri mi fesi moro gi joe; bikasi mi ha boen-hatti vo troe! Ma vo sabi? joe moe kom sabi da ogri di joe doe na joe Masra, joe Gado! (Jerem. 3, v. 12 & 13.)
3. Na dem brara vo Josef wi kan si, fa alwasi so meni jari wan soema konsiensi kan tan, leki a de slibi, tog bakatem a kan wieki baka. Bikasi so hesi dem ben kom na da verlegi nomo, wantem dem kom membre da ogri vo dem, dem taki: Joe si? now wi kisi wi paiman vo da ogri, di wi ben doe na wi brara! Ma a moro betre wi jeri da waarskouwe vo Masra bitem, vo a no habi vanoodoe fosi, vo strafoe wi so tranga.
(1. Mos. Kap. 45.)
Na baka di Josef komopo na tafra, a kali hem boekhouder safri, a taki gi hem: Go teki dem soema zakka, foeloe dem nanga karoe, gi dem so meni, leki dem sa man vo tjari, en dan potti dem moni baka na ini ibri soema zakka. So srefi teki da silver beker vo mi, potti hem safri na ini da pikin brara zakka na taposei, moksi nanga da moni vo hem. We da soema doe so, leki Josef taki gi hem; en dei-broko na mamantem dem seni dem gowei nanga dem boeriki, vo dem go baka na hoso. Ma so hesi dem komoto na ini foto, disi dem no kisi farawei jete, Josef taki gi hem boekhouder, meki a feti hesi na dem baka, haksi dem vo da beker. We da soema no ben habi trobi vo kisi dem baka, en so hesi a doro klosibei na dem, a haksi dem wantem: Hoefasi, na so wan fasi oen teki da boen, disi mi masra ben doe oenoe? Fa oen kan habi hatti vo teki mi masra beker? Oen no sabi, dati da beker, disi mi masra de gebruiki ala dei na hem tafra, vo a dringi na ini? Oen ben membre, dati no sa kom na krin? Fui fui, oen no doe boen kweti-kweti!
Ma di dem no ben sabi noti, dem verwondroe vo troe vo kisi so wan verwyti, dem taki: Ke, fa masra kan taki so, potti so wan ogri na wi tapo! Gado moe kibri wi, vo wi no doe so wan sani! Masra no sabi wi kaba, dati wi de boen betrouw soema? Bikasi da moni, di wi ben finni na ini wi zakka tra dei, di wi go na hoso, masra no sabi, wi tjari hem kom baka wantem? En now masra taki, wi teki wan silver-sani efi goutoe na gran masra hoso foefoeroe hem? No no, betre joe visiteri wi alamal, en da soema, disi joe finni da beker na ini hem zakka, a moese dede, en wi trawan sa tron slavoe vo joe masra. Da boekhouder taki: We a boen, so leki oen taki, mi sa visiteri oenoe; ma mi no wani oen alamal moe kom na strafoe, da wan nomo mi sa teki vo mi slavoe, disi mi sa finni da beker na ini hem zakka, dem trawan kan go.
We dem alamal poeloe dem zakka hesi na dem boeriki tapo, potti dem na gron, dem hopo dem, en wantem da boekhouder bigin vo visiteri ala dem zakka; fosi a teki di vo da gran brara, en da so a soekoe doro tee a kisi di vo da pikinwan, en reti na ini Benjamin zakka a finni da beker. We dati meki dem alamal kisi wan skreki tee dem pliti dem klosi, en wantem dem lai dem zakka baka na dem boeriki tapo, dem drai baka go na foto; en di dem doro na ini Josef hoso, dem alamal hiti dem srefi na dem kni gi hem. Ma Josef haksi dem, a taki: Hoefasi! san oen doe? Oen no sabi, so wan soema leki mi de, mi kan finni dati hesi? Juda taki: Ke mi masra, san wi sa taki? Wi no kan soekoe reti moro, vo krin wi srefi. Bikasi wi sabi boen-boen, vo san hede ala sosani kom wi abra; da vo da ogri, di wi ben doe, Gado de strafoe wi noja; da hem srefi gi wi da fomfom disi. We pasiensi, wi alamal de na joe hanoe, meki wi teki wi strafoe, tron joe slavoe! Josef taki: No, dati mi no wani! Mi no wani oen alamala; ma da wan soema nomo, disi dem finni mi beker na ini hem zakka, hem wawan mi sa teki vo mi slavoe, oen trawan kan go baka na oen tata hoso.
We disi Juda jeri so wan taki na Josef mofo, dati meki a drifi pikin moro klosibei na hem, a taki: Gran-tangi mi masra! Mi begi masra, efi masra sa plisi vo jeri mi wan woortoe nomo! Masra no moe mandi, bikasi a no vo asranti mi piki masra, mi sabi boen-boen, masra de wan gran soema, so leki Farao srefi. We tra leisi di wi ben diaso, masra ben haksi wi vo wi famili, efi wi tata de na liebi jete, en efi somtem wi habi wan tra brara moro. We di wi ben taki waarheid gi masra, wi taki, ja wi tata de jete, so srefi wan pikin brara de na hoso jete, ma wan tra brara dede kaba, masra ben taki, wi moe go teki da pikin brara kom, vo masra si hem; en alwasi fa wi ben begi masra, meki da pikin brara kan tan na hoso, bikasi hem tata lobbi hem toemoesi, a no sa gi hem pasi vo go, tog masra no ben jeri wi, masra taki, wi moese vo tjari hem kom, efi no so, wi no moe kom na masra fesi moro. We di wi kom na hoso, wi taki dati gi wi tata, ma hem taki, dati no kan de, hem no kan meki da pikien go nanga wi; bikasi da tra brara, di ben de vo da srefi mama, dati lasi kaba, en efi a moe lasi disi toe, dati sa de wan toemoesi jamer vo hem. Langatem da tata no ben wani meki da pikien go nanga wi; ma tee bakatem di hangri kom moro wi, mi taki gi hem, meki a gi da pikin brara pasi vo kom nanga wi, mi sa tan borgoe vo hem, mi srefi sa zorgoe vo dati, vo a kom baka, en efi mi no tjari hem kom baka, dan mi sa habi da skulti alatem. We mi begi masra, efi masra sa plisi, vo teki mi na plesi vo mi pikin brara, meki hem kan gowei baka na hoso, hem nanga dem tra brara! Mi no kan go baka na mi tata, efi da pikien no de nanga mi; bikasi da sari vo mi tata sa kom moro mi srefi toe. Masra srefi kan denki, fa da ouroe tata vo wi sa fili, efi mi kom na hoso, sondro mi tjari da pikien kom baka; a sa dede wantem, bikasi a lobbi da pikien toemoesi.
We now Josef jeri nofo kaba. Bikasi disi a si, da ogri disi dem ben doe na hem, hati dem brara noja, dati meki a kisi wan sari vo dem, tee a no man vo dwingi hem srefi moro, da fili kom masra hem krin-krin. We vo da hede a seni ala dem Egipti-soema go hesi na doro, a poeloe dem alamal na ini da kamera, meki hem wawan tan nanga dem brara vo hem; en dan a bigin vo kre so tranga, tee dem foetoeboi vo hem nanga dem soema vo Farao hoso srefi jeri hem. En nanga watra na hai a meki dem brara vo hem kom sabi hem, a taki: “ Mi da Josef! da brara vo oenoe, di oen ben seli! Hoefasi, mi tata de na liebi jete? ” Ma dem brara no man vo piki hem, no wan woortoe srefi, da so dem kom skreki na hem fesi. Ma Josef bigin vo troostoe dem en vo gi dem hatti, a taki: Drifi dan, kom klosibei na mi! Vo troe-troe, mi da Josef, da srefi brara vo oenoe, di oen ben seli go na Egipti-kondre. Ma meki oen hatti kouroe vo dati. Oen no moe denki, mi hatti de bron nanga oenoe, vo disi oen ben seli mi tee mi kom diaso; mi sabi, da vo oen boen hede Gado Masra ben seni mi kom diaso, vo oenoe no moe dede nanga hangri. Bikasi toe jari pasa kaba, disi da hangri-tem de na kondre, en feifi jari moro de na fesi jete, disi no wan njanjam sa gro. We a no oenoe ben seni mi kom diaso, ma Gado srefi ben seni mi diaso na oen fesi, vo mi zorgoe vo oenoe na disi hangri-tem; da hem srefi ben meki Farao potti mi vo granman na heeli Egipti-kondre. We now oen no moe drai moro, ma meki hesi, go na mi tata, taki gi hem, hem pikien Josef seni taki gi hem, Masra Gado ben potti hem vo granman na heeli Egipti-kondre; mi hangri toemoesi vo si mi tata, meki a kom na mi hesi. Mi sa meki a kom liebi klosibei na mi na Gozen-kondre, hem nanga ala hem pikien, nanga pikien vo hem pikien, nanga ala hem meti srefi, meki a tjari ala hem goedoe kom dia. Bikasi feifi jari hangri-tem de na fesi jete, dan mi sa zorgoe vo hem dapee na Gozen-kondre, vo no wansani moe mankeri hem nanga hem heeli famili. We oen hai srefi si now, da oen brara srefi de taki nanga oenoe, en mi pikin brara Benjamin sa sabi mi toe. We go hesi now, go taki alasani gi mi papa, fa oen si mi dia, en meki hesi, vo oen tjari hem kom gi mi. - Na baka Josef teki hem pikin brara Benjamin, a brasa hem nanga watra na hai, en Benjamin kre so srefi toe. Dan Josef bosi ala dem tra brara toe, en dati fosi ben gi dem hatti, vo dem kan taki nanga hem.
We ala disi Josef taki so nanga dem brara vo hem, Farao srefi kom kisi njoesoe, taki, dem brara vo Josef kom loekoe hem, en dati ben doe Farao foeloe plisiri, nanga ala dem tra soema vo koning hoso toe; bikasi Josef ben de wan soema, disi ala soema ben lobbi. En wantem Farao kali Josef, a taki, hem kan taki gi dem brara vo hem, dem moe go hesi na Kanaan-kondre go teki da ouroe tata kom, nanga ala famili vo hem, meki dem kom liebi na hem ondro, a wani gi dem da moro beste kondre, di de na hem heeli Egipti-kondre, dem sa kisi wan mooi plesi vo liebi. So srefi Farao taki toe gi Josef, meki a gi dem wagi nanga hasi vo lanti, so meni leki dem moe habi, vo dem kan teki dem pikien nanga dem wefi nanga da ouroe tata, tjari dem kom. En dem no habi vo trobi dem srefi nanga kisi toe, efi nanga pakala nanga patoe nanga ala sosani moro, bikasi ala dati dem sa kisi nofo na Egipti-kondre.
We Josef doe so, leki Farao taki gi hem, a gi dem wagi, nanga njanjam toe, so meni leki dem habi vanoodoe na pasi. So srefi Josef gi dem alamal krin klosi vo weri, ibriwan kisi toe klosi, ma Benjamin hem kisi feifi klosi nanga dri hondro piesi silver-moni. Ma vo hem tata a teki twenti boeriki, a lai so meni brede nanga areisi na dem tapo, vo hem tata habi nofo vo njam, te a de na pasi; so srefi a teki foeloe mooi-sani en dieri-sani, seni gi hem tata vo presenti. We da so Josef seni dem brara vo hem gowei, en di dem taki hem adjosi, a vermane dem, a taki: We no meki trobi na pasi! dati wani taki, oen no moe kroetoe nanga makandra vo dasani, disi ben pasa! Ma da ouroe tata Jakob, di a jeri so wan tori, fosi a no ben wani bribi dem; bikasi dasani meki a tan leki wan tanfoeroe soema, hem no ben sabi srefi, san a sa taki. Ma na baka, di dem gi hem ala dem boodskopoe, disi Josef ben seni gi hem tata, en di a kom si dem wagi toe, disi Josef seni gi hem vo teki hem, dan fosi da ouroe tata Jakob kisi liebi baka, a taki: We, now mi si nofo kaba, now mi si troe-troe, mi pikien Josef de na liebi jete. We meki mi go, vo mi si hem, bifo mi dede.
1. Da tori disi a de gi wi wan toe dri leri ageen. Na Juda wi kan si, fa wan ogri soema kan bedaari krin-krin, efi Masra Gado finni pasi, vo naki hem hatti. Bikasi fositem, disi Josef ben de na hoso jete, Juda ben falsi, net so leki ala dem tra brara; ma bakatem a ben sori wan heeli tra fasi na Josef fesi, wan toemoesi betrouw fasi. Bikasi a taki gi Josef: Betre mi srefi tron joe slavoe, leki mi tata moe habi da verdriti, vo a no si hem pikien Benjamin baka. We vo dati hede, datem disi Jakob ben loekoe vo dede en di a ben blesi ala hem pikien wan wan, Juda ben kisi wan aparti bigi blesi vo hem tata. (1. Mos. 49, v. 10.)
2. So srefi da tori vo dem brara vo Josef de sori wi toe, fa Masra Gado doe alasani nanga boen prakseri en nanga lobbi. Alwasi dem ben ogri vo troe, tog hem boen hatti no ben gi dem abra so, tee dem dede na ini da ogri; ma a meki da hangri-tem srefi moe seni dem go na Josef, vo dem kom sabi da ogri vo dem, en vo dem kom bedaari dapee. We da so Masra de soekoe na ala fasi, vo meki zondaar drai baka, kom na hem.
3. Da pina-liebi, disi Josef ben pina na Egipti-kondre fositem, dati srefi ben moe helpi dem famili vo hem na bakatem, vo dem no ben dede nanga hangri. - We da so ala da pina, disi wi Masra Jesus ben pina vo wi ogri soema hede, dati de helpi wi toe, vo wi ziel no moe pina tee vo teego na didiebri kondre, ma vo wi kan finni boen na Gado-kondre.
4. Disi Josef ben si, dem brara vo hem fili wan berouw vo da ogri, disi dem ben doe hem, dati meki a kisi wan sari en wan lobbi vo dem, tee a no kan dwingi hem srefi moro, a taki: Mi da Josef, da brara vo oenoe! We te wi Masra Jesus si, wi kom na hem nanga wan sari-fasi en nanga wan reti berouw, dan hem boen hatti kisi wan sari vo wi so srefi toe, tee a no kan mandi moro nanga wi; kaba hem no de sjem toe, vo kali wi brara vo hem. (Ebreer 2, v. 11.) We meki no wan soema moe habi tranga hatti moro, ma meki ala zondaar kom saka kni gi hem, begi hem pardon!
5. Josef ben vermane dem brara vo hem, a taki, dem no moe meki trobi na pasi. We meki ala soema vo wi moe teki da vermane toe, vo trawan no moe trobi trawan, alwasi hoepee wi de!
(1. Mos. Kap. 50.)
(Datem omtrenti 2200 jari ben pasa, vo sinsi Gado ben meki hemel nanga grontapo. En a ben de omtrenti 1700 jari na fesi, bifo Kristus gebore.)
So hesi Israel ben kisi da njoesoe nomo vo hem pikien Josef, a teki ala hem sani wantem, a komoto na Mamre, hem nanga hem heeli famili, a waka go na Egipti-kondre. Ma na pasi di a kisi na Bersaba, a meki wan ofrandi dapee gi da Gado vo hem tata Isaak; bikasi a ben frede pikinso, di a no ben sabi vaste, efi dati sa boen na Gado, disi hem libi Kanaan-kondre go na Egipti. We wan neti di a lidom de slibi, Masra kom na hem dapee, a kali hem, a taki, meki hem hatti kouroe, a no ha vo frede, vo go liebi na Egipti-kondre, bikasi hem sa meki Israel kom wan bigi famili dapee. Masra taki toe, hem srefi sa tjari Jakob go na da kondre, en te a kom vo dede, hem pikien Josef sa tapo hem hai; ma bakatem te ala soema vo Israel kom baka na Kanaan-kondre, dan Masra sa meki dem teki da dede skin vo Jakob toe, tjari go nanga dem.
We dei-broko Jakob teki pasi baka, a komopo na Bersaba, hem nanga ala hem pikien, nanga dem oeman, nanga pikien vo pikien, dem waka go na Egipti-kondre. Ala nanga ala dem ben meki siksitentin na siksi soema vo Israel famili, di ben go na Egipti; vo taki: efi wi no teli da ouroe tata srefi na ini, nanga Josef nanga dem toe pikien vo hem. Ma efi wi teli dem toe na ini, dan da heeli famili vo Israel ben meki sebitentin soema makandra.
Na baka di dem no ben de farawei vo Egipti-kondre moro, Jakob teki Juda, a seni hem go na fesi, vo waarskouwe Josef, dati hem de kom; efi Josef sa plisi, vo sori hem da reti plesi, dapee dem moe go liebi na Gozen-kondre. Ma Josef taki, hem srefi sa kom. En wantem a meki dem span hem hasi na wagi, vo a rei go miti hem tata Israel, disi ben doro tee na Gozen-kondre kaba. We so hesi a kom si hem tata nomo, wantem Josef komoto na hem wagi, a ron go brasa hem tata, en langatem a fassi na hem neki, a kre reti-reti. Ma Israel taki gi Josef: Ke mi pikien, now mi hatti kouroe, disi mi si joe baka; now mi kan go slibi nanga ruste, disi mi si, joe de na liebi jete.
Ma Josef taki: We meki mi go baka wantem go piki Farao, vo a sabi, dati oen kom baka! We, efi somtem a sa seni kali oenoe, haksi oenoe, hoe wroko oen sabi, dan oen moe taki reti gi hem, dati oen de herder, bikasi dati sa helpi oenoe, vo oen kan tan na Gozen-kondre, oen ala makandra. We di Josef kom gi Farao kenisi, taki, hem tata nanga hem famili kom kaba, dem de na Gozen-kondre, Farao taki, a boen, meki dem kom na hem, hem wani si dem toe.
We di dem brara kom na Farao fesi, koning haksi dem vo dem wroko; en dem piki hem, so leki Josef ben rai dem, dem taki, dem no sabi wan tra wroko, leki vo loekoe dem meti, dati wawan dem njoesoe. We efi koning sa permitteri dem, meki dem kan tan na Gozen-kondre, nanga dati a sa doe dem wan bigi plisiri; bikasi na Kanaan-kondre dem alamal ben pina toemoesi nanga hangri. Farao taki gi Josef: We da joe famili srefi, mi gi dem abra na joe, vo joe zorgoe vo dem; joe sabi, mi heeli kondre de vo joe; we joe moe loekoe wan mooi plesi gi dem! en efi dem lobbi Gozen-kondre, a boen, meki dem go liebi dapee! Na baka Josef tjari hem tata Jakob toe na ini, a potti hem na Farao fesi. En Jakob blesi Farao, a taki: Gado moe blesi joe, mi koning! Farao haksi hem, a taki: Hoe ouroe joe de? Jakob taki: Ala nanga ala mi ouroe wan hondro nanga dritentin jari nomo. Wan trobi-liebi mi ben pasa, tee sotem so mi no teli foeloe jari jete en mi no sa kisi so meni jari toe, leki dem tata vo mi ben kisi. Na baka Jakob blesi Farao wantron moro, a taki hem adjosi. En dan Josef teki hem tata nanga ala hem brara, a tjari dem go na Gozen, na dapee a gi dem wan pikin kondre, vo dem srefi, en dati ben de da moro beste plesi vo heeli Egipti-kondre; bikasi da so Farao ben wani. So srefi Josef ben meki hoso toe gi hem tata nanga dem brara; en vo njanjam nanga tra hoso-sani dem no ben habi vo zorgoe toe, bikasi Josef srefi ben loekoe ala dati gi dem, a ben bezorgoe dem so boen, vo no wansani ben mankeri dem; ibriwan ben kisi so meni njanjam, leki a moe habi vo hem nanga hem pikien. We da so dem soema vo Israel kom liebi na Egipti, dem kisi da pikin kondre Gozen vo presenti, en na dapee dem tron wan bigi famili vo troe.
Ma Jakob srefi ben liebi tin na sebi jari jete na Egipti-kondre, en da so ala nanga ala a kisi wan hondro nanga fotentin na sebi jari, bifo a dede. We di da joeroe kom klosibei, disi Israel ben loekoe vo dede, a seni kali hem pikien Josef kom na hem, a taki gi hem: Jere, mi pikien, efi joe lobbi mi, doe mi da plisiri, no beri mi diaso na Egipti-kondre te mi dede, ma tjari mi go na Kanaan, beri mi dapee na da srefi beri-plesi, dedapee dem tata vo mi de slibi, meki mi ruste na dem sei! Hoefasi, joe sa pramisi mi dati? nanga sweri srefi? Josef taki: Ja mi sa doe, so leki joe taki gi mi. Israel taki: A boen, tangi vo Gado! We vo da leisi Josef drai baka go na hoso.
Ma pikinso moro na baka Josef kisi wan boodskopoe ageen, dati hem tata siki vo troe. - Vo da hede Josef teki dem toe pikien vo hem, Manasse nanga Efraim, a go loekoe hem tata. We di da ouroe tata jeri, hem pikien Josef kom, a de na kamera de, Jakob meki tranga, a hopo sidom na ini hem bedi, en dan a bigin vo taki nanga Josef, a taki: Joe sabi? datem disi mi ben de na Kanaan-kondre jete, wan dei Masra Gado kom na mi dapee, a blesi mi, a taki, hem sa gi mi foeloe pikien nanga pikien vo pikien tee mi famili sa tron wan bigi kondre, en bakatem a sa teki Kanaan-kondre, gi na mi famili, meki dem tron masra vo da kondre, tee vo teego. We dem toe pikien vo joe, Efraim nanga Manasse, di joe ben meki, bifo mi kom diaso na Egipti-kondre, mi sa teki dem, leki mi eigen pikien, ibriwan sa kisi hem porsi so boen, leki Ruben nanga Simeon. Ma dem tra pikien, disi joe sa meki na dem baka, dem sa go wan fasi nanga ala dem tra pikien-pikien vo mi. We teki dem toe pikien vo joe, tjari kom gi mi, vo mi blesi dem! En Josef teki dem, a tjari dem kom moro klosibei na hem tata bedi, en da ouroe gran-tata brasa dem pikien, a bosi dem, a taki gi Josef: Ke mi pikien, mi no ben denki, mi sa si joe baka, kaba now Gado meki mi si joe pikien srefi! Gran-tangi vo hem!
Na baka Josef nanga dem toe pikien vo hem potti kni na gron gi Israel, en Israel teki hem toe hanoe, potti na dem pikien hede tapo, a blesi da famili vo Josef, a taki: Da Gado, disi mi gran tata Abraham en mi tata Isaak ben waka na hem fesi alatem; da Gado, disi ben loekoe mi so boen tee tidei; da srefi Engel, disi ben poeloe mi na ini so meni ogri, we da hem moe blesi dem toe jonkman disi, vo dem habi nem toe na ini wi famili, en vo dem finni foeloe boen na grontapo! So srefi Israel troostoe Josef, a taki: Joe si? mi de go dede, ma Masra Gado no sa libi oenoe, a sa tjari oen go baka na da kondre vo dem tata vo oenoe! Na dapee mi habi wan gron kaba, we da gron moe de vo joe en vo joe pikien, dem tra brara vo joe no habi vo platie hafoe na ini.
Na baka Jakob kali ala hem twalf pikien kom makandra na hem bedi, a bigin vo taki nanga dem na profeti-fasi, a pramisi ibriwan na fesi, sani sa miti hem nanga hem famili tee na bakatem. Dem dri granwan Ruben nanga Simeon nanga Levi, dem kisi wan tranga verwyti jete vo ala dem ogri, disi dem ben doe, a taki gi dem, alwasi dem ouroe moro leki dem tra brara, tog dem no sa kisi moro foeloe, leki dem trawan; bikasi dem lasi dem reti vo dati. Ma na plesi vo dem, da tata teki Juda, a gi hem wan aparti blesi, a taki: Dem famili vo Juda sa kom koning na dem trawan tapo, en nooiti da koning-staf sa komopo na Juda famili; so srefi dem no sa mankeri soema, disi sabi vo leri dem da wet so langa tee da Messias srefi sa kom, da hem ala kondre sa onderdaniki . Na baka, disi Israel si hem pikien Dan tanapoe na hem fesi, a pramisi hem toe, fa alasani sa kom nanga hem famili, en fa bakatem dem no sa wani sabi da reti Gado moro, we dati meki a kom na wan bigi sari, ma hesi a teki bribi baka, a djeme na hem Helpiman, a taki: Ke mi Masra, mi de wakti da helpi, disi joe sa kom helpi mi! We da so Jakob doro ala dem trawan toe, a pramisi dem, sani sa miti dem na bakatem. En dan a teki dem alamal wantron moro wan wan, a gi ibriwan wan aparti blesi; so srefi a vermane dem, a taki, te a dede, dan dem moe teki da lyk vo hem, tjari go na Kanaan-kondre, na dapee dem moe beri hem na ini da srefi horo na Machpela, dapee ala hem famili lidom de slibi makandra.
En di a kaba vo blesi dem pikien vo hem, a go lidom baka, a langa hem foetoe na tapo da bedi, a tapo hem bro. En Josef hiti hem srefi na hem tata fesi tapo, a bosi hem, en a kre vo hem toemoesi.
Na baka Josef seni kali dem Egipti-datra vo hem, vo dem hopo da bele vo hem tata Israel, a meki dem poeloe alasani na ini, en dan a meki dem teki specery-sani, robi na hem tata skin na inisei, so leki dem Egipti-soema ben njoesoe vo doe, te dem ben wani, wan lyk no moe pori. So srefi Josef seni begi Farao, vo a gi hem pasi, meki a kan go beri hem tata na Kanaan-kondre; en di dati no ben habi trobi, vo da hede fotentin dei na baka vo da dede, Josef nanga dem brara vo hem teki da lyk vo dem tata Israel, dem tjari hem go nanga wagi tee na Kanaan-kondre, en na dapee dem beri hem, potti hem na ini da srefi horo, disi Abraham ben bai vo wan beri-plesi vo hem famili. A ben de wan bigi beri vo troe, bikasi buiti ala dem famili vo Israel, so meni tra gran-soema vo koning Farao hoso srefi ben go toe nanga da lyk, nanga wagi en nanga hasi, a ben de wan bigi beri.
Ma na bakatem, di dem alamal kom na Egipti-kondre baka, dem brara vo Josef kom frede hem pikinso; bikasi dem taki, somtem Josef kan holi dem na hatti jete vo da ogri, disi dem ben doe hem, en now, disi dem tata dede, somtem a kan pai dem dasani baka. We dati meki dem seni wan boodskopoe gi Josef, dem taki: Joe tata ben taki nanga wi, bifo a dede, a taki, wi moe begi joe pardon vo da ogri, disi wi ben doe joe. We wi srefi toe de begi joe dati, wi teki Gado, wi begi joe, tangi-tangi, pardon wi! Ma disi Josef jeri dem brara seni begi hem so, dati kom naki hem hatti, tee a no kan helpi, a bigin vo kre srefi. Na baka dem brara srefi go na hem, dem fadom na dem kni na hem fesi, dem taki: Joe si? wi de na joe hanoe, teki wi vo joe katibo! Ma Josef taki gi dem: No no, oen brara vo mi, no frede mi, bikasi mi a no Gado! A troe, oenoe ben wani doe mi ogri, ma Gado ben wani doe wi boen, en vo da hede a ben sabi vo drai dasani so, vo a holi liebi vo foeloe soema, so leki wi si dati noja. We oen no moe frede moro, bikasi mi sa zorgoe vo oenoe en vo dem pikien vo oenoe. We disi Josef taki so switi nanga dem, dati meki dem brara hatti kom kouroe baka.
Na baka vo da tori Josef ben liebi langa jete, pasa vyftig jari srefi, tee a kom si pikien vo hem pikien-pikien srefi. Somtem na hem ouroe jari Josef ben bedanki vo granman, go liebi nanga dem brara vo hem; ten minsti wi kan sabi, dem toe pikien vo hem, disi hem tata Jakob ben teki leki hem eigen pikien, da dem ben go abra krin-krin na dem tra pikien vo Israel, go liebi nanga dem makandra. We da so Josef ben holi hem bribi trouw tee a dede. En bifo a dede, a kali ala hem famili kom makandra, a taki gi dem: Oen si? mi de go dede diaso na Egipti; ma mi sabi, Gado no sa libi oenoe, a sa teki oenoe, tjari oen go baka na Kanaan-kondre, so leki a ben taki gi Abraham nanga Isaak nanga Jakob. We pramisi mi dan, te oen sa komoto dia, go na Kanaan, oen sa teki dem boon vo mi, tjari go dapee toe. We dem pramisi hem dati nanga sweri srefi, dem taki, dem sa doe so. Na baka Josef kom dede, di a ben ouroe wan hondro nanga tin jari. En dem Israel-soema teki da dede-skin vo hem, dem robi hem nanga specery-sani, meki a no kan pori; en dan dem potti hem na ini wan kisi, dem kibri hem so langa na Egipti-kondre.
1. We da tori disi a de sori wi, so leki Jakob nanga Josef ben plisiri datem, disi dem kom si dem srefi baka na Egipti-kondre, so srefi dem boen bribi-soema sa plisiri toe, te dem sa miti dem srefi baka na Gado-kondre, dapee dem kom si wi Masra Jesus toe, so leki fa a de. (1. Joh. 3, v. 2.) Hem srefi taki, da plisiri sa go doro tee no wan soema sa man vo poeloe da plisiri baka na ini wi hatti. (Joh. 16, v. 22.)
2. Alwasi Josef ben de granman vo heeli Egipti-kondre, kaba hem tata nanga dem brara vo hem ben de laage soema, dem ben de herder soso, tog Josef no ben sjem vo hem famili. Boen vo ala dem pikien, disi teki wan exemple na Josef! Alwasi somtem wan pikien kan kom moro hei, leki hem tata nanga hem mama nanga hem famili, tog dati no moe meki da pikien kisi hei membre, tee a no wani sabi hem famili moro, ma alatem a moe habi respeki vo hem poti famili, en a moe soekoe vo helpi hem toe.
3. Da tori vo Josef de sori wi toe, fa Masra Gado, te a wani helpi soema, a doe alasani nanga so toemoesi koni en dipi prakseri, tee a kan dangra wi. Dem ogri wroko srefi, disi soema doe, Gado kan teki, a kan drai dem so, vo wan boen moe komopo gi trawan. Fosi a moe tan, leki alasani waka toemoesi verkeerti en kontrari, ma na baka wi moe si, a no liebi-soema ben meki dati kom so, ma Gado srefi ben tiri alasani so, vo no wansani moe pasa vo soso. We dati wi kan si krin-krin na ini da tori vo Josef. Bikasi disi Gado ben wani helpi so meni doezend Egipti-soema, vo dem no dede nanga hangri, en disi a ben wani, dem Israel-soema moe kom foeloe na Egipti-kondre, bifo a kan gi dem Kanaan, so leki a ben pramisi dati gi Abraham granwei na fesi kaba, dati dem famili vo hem sa go liebi na wan vreemde kondre, dapee dem soema vo da kondre sa dwingi dem, vo dem dini dem, en dem sa pina toemoesi na dem ondro fo hondro jari langa, tee bakatem dem sa libi dem hei membre, dem sa saka gi Gado, vo a kan doe dem boen baka (1. Mose 15, v. 13.), vo dati hede dem ben moese seli Josef go na Egipti fosi, en na dapee a ben moese sidom na doengroe-hoso so meni langa, tee no wan soema ben membre hem moro. Ma na bakatem, di da reti joeroe vo Masra kisi, a poeloe hem dapee, a hopo hem tee a kom granman srefi, meki a kan helpi hem famili.
4. Ma alwasi Gado kan doe so wan-wantron nanga hem boen-hatti, vo a meki dasani boen baka, disi wi liebi-soema ben pori, tog vo sjem? wi moese sjem vo troe vo ala ogri, di wi ben doe; a moe hati wi so langa, leki wi de na grontapo. En wi no moe taki toe: Meki wi doe ogri, bikasi Gado sa meki wan boen komopo na ini! (Rom. 3, v. 8.)
5. Jakob nanga Josef, dem ala toe ben bribi da pramisi, disi Gado ben pramisi dem vo Kanaan-kondre, en da bribi ben meki dem go slibi nanga kouroe hatti. Bikasi dem ben sabi, na disi grontapo diaso dem no habi wan vaste plesi vo tan, en vo da hede dem ben hangri vo wan moro betre kondre, dem ben soekoe di vo Gado, disi de na ini hemel. (Ebr. 11, v. 13 tee 16.) We so srefi da liebi vo wi na disi grontapo de wan kenki-liebi toe, a de pasa hesi, ma da reti kondre vo wi, dati de na tapo!
(2. Mos. Kap. 2 en 3.)
Na baka vo da dede vo Josef, en di ala hem brara ben dede toe, nanga ala dem tra Egipti-soema toe, disi ben sabi Josef jete, bakatem dem famili vo dem Israel-soema kom bigi vo troe, bikasi nanga Gado blesi dem ben meki so meni pikien, tee Gozen-kondre no ben bigi nofo, vo teki dem alamal, en dati meki moro na bakatem heeli Egipti-kondre kom foeloe nanga dem. We fo hondro jari moro na baka vo da dede vo Josef, wan njoe koning Farao kom, hem no ben sabi noti vo Josef en vo da boen, disi a ben doe na kondre. En di dem Israel-soema ben habi wan tra relisi, leki dem Egipti-soema, dati meki da njoe koning no ben lobbi dem; en vo taki reti, a ben frede dem toe, bikasi a ben denki, somtem te wan feti hopo, dem no sa tan trouw na hem ondro. We dati meki koning kali dem gran-soema vo kondre kom makandra, a holi komparisi nanga dem, a taki: Oen si, dem Israel-soema kom foeloe na kondre toemoesi pasa-marki, dem de moro foeloe srefi, leki wi. We meki wi loekoe boen nanga dem, vo wi tapo dem na wan koni-fasi en nanga voorzigti, vo dem no kom so foeloe, tee bakatem dem kom moro wi. Bikasi efi wi nanga wan tra kondre sa kisi trobi, vo wi moe feti, somtem dem Israel-soema kan go helpi dem vyanti vo wi, en dan dem kan poeloe dem srefi na wi ondro, go baka na dem kondre.
We disi koning ben de meki wan toe dri foto da srefi tem, dati meki a teki dem pikien vo Israel, a seni dem go na dem stoon-pranasi, meki dem bakka stoon; trawan a potti vo meselari, vo dem meki ala dem bigi stoon-hoso, en trawan ageen a seni go na firi go wroko. So srefi koning teki dem Egipti-soema, a soekoe dem moro ogriwan, di a ben sabi, a potti dem vo driktoro na dem Israel-soema tapo, meki dem holi dem tranga na ondro duim, leki katibo srefi. Ma dati no ben helpi Farao, bikasi moro dem ben pina dem Israel-soema? moro Gado gi dem pikien, tee dem famili kom moro bigi, jari vo jari. We disi Farao si dati, a gi ordre wantem, vo dem moe potti dem Israel-soema moro tranga na ondro dwingi, strafoe dem moro ogri; en dati meki dem meselari, nanga dem soema, disi ben wroko na firi, en dem disi ben doe iniwan tra wroko, dem alamal kisi moro bigi marki jete; en da fomfom ben de so hebi, efi Masra Gado no ben gi dem tranga? dem no ben sa man vo holi.
So srefi koning Farao kali dem vroedvrouw safri, a gi dem order, a taki, te dem Israel-oeman de vo meki, en te dem kali dem vo helpi dem, we so hesi dem si: da pikien da wan man, dan dem moe kili da pikien wantem safri; ma te dem si, da wan oeman, dan dem moese meki a tan na liebi, en da so dem moe doe na ala Israel-soema hoso, te dem helpi wan oeman. Bikasi koning ben denki, efi no wan manpikien vo dem Israel-soema kom bigi moro, dan na baka dem Israel-wendje sa verpligti, vo teki man vo Egipti-kondre, en da so safri-safri djoe nanga heiden sa moksi makandra, tee bakatem no wan soema sa ke moro vo da reti Gado. Ma dati no ben helpi Farao ageen. Bikasi dem vroedvrouw vo Egipti-kondre ben de boen soema, dem ben frede Gado moro, leki dem frede koning; en dati gi dem hatti toe, vo dem no doe so, leki koning ben taki gi dem, ma dem meki ala manpikien tan na liebi, so srefi leki dem oeman-pikien. Somtem dem Israel-oeman ben kisi dati vo sabi toe, dati da so wan ordre koning ben gi dem vroedvrouw, en vo dati hede somtem dem no ben kali dem moro.
We so hesi koning jeri dati, a seni kali dem vroedvrouw, a meki trobi nanga dem, a taki: Hoefasi! vo san hede oen no doe so, leki mi ben taki gi oenoe? Dem vroedvrouw taki: We dem Israel-oeman no de so, leki wi Egipti-soema, dem tranga moro leki wi, en dem sabi toe vo helpi dem srefi; bikasi alatem bifo wi kom na dem hoso, dem meki kaba. We dati ben switi toemoesi na Gado, disi dem vroedvrouw ben doe so, en sinsi da tem a ben doe dem foeloe boen vo dati hede.
Ma disi Farao kom si, dem famili vo dem Israel-soema kom bigi moro moro, dati meki a proberi wan trasani ageen, vo tapo dem pikien vo Israel, meki dem no kom bigi so na kondre. We a meki wan plakati, a seni hem go waka heeli kondre rontoe, en nanga da plakati a gi ala Egipti-soema tranga ordre, vo ala manpikien, disi dem Israel-oeman sa meki, dem moe teki, hiti na ini riba, njoe-njoe so leki dem mama meki dem; ma dem oeman-pikien, dati dem no moe kili, meki dem tan na liebi. We da srefi tem, disi dem ben kili so meni pikien na ini riba, wan soema vo Levi famili ben de, hem nem Amram, hem ben meki toe pikien kaba nanga hem wefi, bifo da plakati ben kom, wan manpikien, disi dem kali Aaron, nanga wan oeman-pikien, disi dem kali Mirjam. Ma na baka, di dem ben fom da plakati kaba, Gado kom gi dem wan tra pikien moro, wan manwan, en disi da mama si, da pikien de wan mooi pikien vo troe, dati meki a kibri hem dri moen langa na ini hoso, bikasi a ben hati hem vo so wan mooi pikien. Ma na baka, disi a no ben kan kibri hem moro langa, a meki wan pikin kisi gi hem, a tapo da kisi boen-boen na inisei nanga pekki, en dan a teki da pikien, potti na ini, a tjari da kisi go na riba, a potti hem na watra tapo klosibei na sjorosei, meki a fassi na ini da warimbo, vo a no kan drifi gowei. Ma Moses sisa Mirjam, hem go tanapoe pikin farawei, vo a wakti hem pikin brara, en vo a si, fa dasani sa waka.
We da srefi joeroe wan princes, wan pikien vo koning Farao, kom na riba kom wasi, hem nanga wan toe dri oeman foetoeboi. En di a kom si da pikin kisi na ini warimbo, nomo a seni wan pikin-oeman go teki hem. En disi a hopo da kisi, a si, wan pikien de na ini, de kre. We dati meki da princes kisi wan medeleiden vo da pikien, a taki: Ke so wan poti pikien! Mi bribi vaste, dati de wan vo dem pikin djoe, disi mi papa gi ordre, vo dem kili. Meki mi soekoe wan mina gi hem. We disi Moses sisa jeri dati, a komoto, dapee a ben kibri, a kom haksi da princes, efi missi no sa wani hem go kali wan vo dem djoe-oeman, meki a kom gi da pikien bobi. Da princes taki: A boen, go kali wan gi mi! En da pikin-oeman ron hesi, a go kali hem mama kom. We disi da mama doro dapee, da princes gi hem da pikien, a taki: Teki da pikien, gi hem bobi, mi sa pai joe! We nanga ala plisiri da mama doe so, a teki da pikien, tjari go na hoso. - En so hesi da pikien kom so fara, vo a kan begrypi wansani, dem bigin leri hem toe, meki a kom sabi hem Gado, disi ben pramisi Abraham nanga Isaak nanga Jakob, dati hem sa loekoe dem, en te da reti tem kisi, a sa seni da Messias kom gi dem.
Ma na baka di da pikien kom moro bigi, da mama teki hem, a tjari hem go baka gi da pikien vo Farao; en da princes teki hem leki hem eigen pikien, a kali hem Moses, vo di a ben poeloe hem na ini watra. We da so dem potti hem na skolo, dem leri hem, tee a kom koni en bekwaam na ala dem leri vo Egipti-kondre. (Apostel tori Kap. 7, v. 21 & 22.) Ma disi Moses ben habi bribi vo hem Gado, vo da hede di a kisi fotentin jari a no ben wani, dem moe loekoe hem moro leki pikien vo da oeman-pikien vo Farao, a taki: Betre hem holi hem srefi nanga dem soema vo Gado, njam da pina-liebi nanga dem, leki a njam da soso zondoe-plisiri vo disi grontapo. En da pina nanga da sjem, disi de miti wi vo Kristus hede, dati a ben loekoe vo wan moro bigi goedoe, leki ala goedoe vo heeli Egipti-kondre; bikasi da paiman nomo a ben de loekoe. (Ebr. 11, v. 24-26.) We disi Moses kom wan man, wan dei a go na doro go loekoe dem brara vo hem, dati da dem Israel-soema, a wani loekoe dem, fa dem tan na ini da pina-liebi vo dem. Ma da srefi momenti, disi a doro dapee, a miti wan Egipti-basja naki wan Israel-soema so, dati a dede. We disi dem Israel-soema ben de leki slavoe na Egipti-kondre, en disi dem no ben habi wan soema, dapee dem kan soekoe reti, dati meki Moses srefi kom helpi dem poti brara vo hem; (1. Mose 9, v. 6; 4. Mose 35, v. 19.) a go kisi da Egipti-soema, a naki hem, dati a dede, en dan a beri hem na ondro santi. Moses ben denki, dem Egipti-soema no sa kom sabi dati; bikasi di a ben loekoe rontoe, a no ben si wan tra soema de dapee; so srefi a ben denki toe, dem brara vo hem sa kisi wan vertrouw na hem, dem sa si, hem da wan soema, disi Gado srefi seni kom gi dem, vo a helpi dem, ma dem no ben begrypi dati.
We dei broko a go na doro ageen go loekoe dem, en di a si toe Israel-soema srefi de na trobi de feti makandra, Moses go na da soema, di habi kroekoetoe, a taki: Kaba mati! San joe naki joe brara so? No kroetoe makandra, bikasi tog oen de brara nanga brara! Ma da soema troesoe Moses, a taki: Soema potti joe vo fiskali na wi tapo? Joe wani kili mi toe, leki joe ben kili da Egipti-soema isredei? We disi Moses jeri so wan taki, a kom frede, bikasi a si, da tori no kibri moro, ma a kom publiki kaba. En di na baka Farao srefi kom jeri da tori toe, a soekoe Moses, vo a kili hem, we vo da hede Moses libi Egipti, a go kibri tee na Midian-kondre. Bikasi a ben si, dem Israel-soema, so leki dem de, dem no kom so fara jete, dem no sabi hem so jete, tee vo a kan helpi dem. En vo taki reti, da tem no ben kisi jete, disi Masra ben wani poeloe dem Israel-soema na ini da pina-liebi.
We di Moses doro na Midian, fosi a ben tan na sei wan peti, a liebi dedapee, hem wawan. Ma wan domine ben de na da srefi Midian-kondre, no toemoesi farawei vo da peti, dem kali da domine Jetro . We da soema ben habi sebi oeman-pikien, disi ben loekoe dem tata skapoe. En wan dei, di dem kom na da peti, vo kisi watra gi dem skapoe, te dem foeloe dem baki boen-boen, vo meki dem skapoe dringi, dan dem tra herder, disi ben loekoe tra soema skapoe, dem kom troesoe dem, poeloe dem dapee, vo meki dem skapoe fosi dringi. Ma Moses kom helpi dem pikin-oeman, a meki dem skapoe dringi wantem, vo dem kan tjari dem go na hoso. - We di dem kom na dem tata Jetro, da tata verwondroe vo troe, disi dem doro kaba, en a haksi dem: Fa oen kom so hesi tidei? Bikasi da tata ben sabi, dem herder ben lobbi trobi dem alatem. We dem pikien verteli dem tata, taki, wan Egipti-soema ben dedapee, di ben helpi dem, vo dem tra herder no ben kan drai dem so langa. Da tata taki: We hoepee da soema de dan? Vo san hede oen gowei, libi hem dapee? Go hesi, kali hem, meki a kom njam nanga wi! We Moses doe so, leki dem verzoekoe hem, a kom tan nanga da soema; en Jetro teki hem pikien Zipora, a gi na Moses, meki a teki hem vo hem wefi. En da oeman meki toe manpikien gi hem, wan dem kali Gerson , en da trawan dem kali Elieser . We ala da tem, disi Moses ben de na Midian-kondre, da srefi Egipti-koning Farao, disi na hem ondro Moses ben gebore, a kom dede. Ma da tra koning, disi kom na hem baka, dati ben pina dem Israel-soema moro ogri, leki da fosiwan ben doe, en dati meki dem djeme toemoesi vo da hebi wroko, dem kre na Gado tee Masra jeri da bari vo dem, en a membre da verbond, disi a ben meki nanga Abraham en nanga Isaak en nanga Jakob; bikasi noja fosi dem kom so fara, vo dem srefi soekoe da helpi, disi Gado ben loekoe vo helpi dem.
1. We da tori de meki wi membre da pramisi, disi Gado ben pramisi Abraham, dati hem sa meki Abraham famili tron wan bigi kondre. (1. Mos. 12, v. 2.) Bikasi so leki wi si na ini da tori disi, datem disi dem Israel-soema ben de na Egipti-kondre na ondro da tranga dwingi, da srefi tem da pramisi vo Masra kom reti. Da pina-liebi srefi ben meki dem kom so wan bigi kondre. We so srefi a de toe nanga da kerki vo Kristus. - Fosi a de wan pikin-sani, a tan leki wan mostert-siri, ma na baka te didiebri nanga dem ogri soema de soekoe vo pori dem Kristen-gemeente, dati de meki dem kom bigi. - Moro trawan trobi dem boen bribi-soema? moro da kerki de gro, a kom leki wan bigi boom. (Matt. 13, v. 31 & 32.) Bikasi da pina-liebi en ala da hebi, disi dem boen pikien vo Gado moe pasa na disi grontapo, dati moe helpi wi, vo wi no vergiti, da kondre diaso, dati a no wi reti kondre; ma wan tra kondre wi moe soekoe, di de na hemel, dapee Kristus srefi ben waka go na wi fesi, vo a meki wan boen plesi klari gi wi.
2. Da tori vo Moses de meki wi si toe, fa Masra Gado hai de wakti dem pikin-soema liebi na wan aparti fasi. Bika da srefi tem, disi da pikin Moses ben lidom so na ini da kisi de kre, Gado ben seni da pikien vo Farao go dapee go wasi, vo a poeloe da pikien dapee. Ma da joeroe no wan soema ben sa taki, da srefi onnoozloe pikien, te a bigi, a sa tron so wan hedeman vo dem Israel-soema, tee vo a poeloe dem na dem Egipti-soema ondro. We vo da hede Masra Jesus vermane wi toe, a taki: Loekoe boen nanga dem pikin soema, vo oenoe no veragti dem. (Matt. 18, v. 10.)
3. Disi da princes ben habi da boen-hatti, vo teki da poti pikien na hem hoso, a loekoe hem leki hem eigen pikien; we dati meki wi membre da woortoe vo Masra Jesus, di a taki: Da soema, disi teki so wan pikien na mi nem, a de teki mi srefi. (Matt. 18, v. 5.)
(2. Mos. Kap. 3 tee Kap. 7, v. 7.)
Ala da tem, disi dem Israel-soema ben de na da hebi pina-liebi jete na Egipti-kondre, Moses ben de loekoe dem skapoe vo hem wefi tata Jetro na Midian-kondre, wan heeli fotentin jari langa. We wan dei a ben teki dem skapoe, a tjari dem gowei, tee a doro klosibei na da bigi bergi vo Gado, disi dem kali Horeb, vo dem njam na sabana dapee. We di a de dapee, wan dei wi lobbi Helpiman saka kom leki wan flam-faja, a sori hem srefi gi Moses na ini boesi. We disi Moses si da heeli maka-boesi teki faja, a letti so, dati da flam go tee na tapo, sondro da faja ben njam da boesi, we dati ben dangra Moses, a taki: Meki mi go loekoe dasani moro klosibei, vo san hede da faja no bron da boesi. Ma da srefi momenti, disi Moses ben wani go, Masra kali hem nem toetron na ini da boesi, a bari hem, a taki: Loekoe boen, no kom diaso moro klosibei, ma poeloe joe soesoe na joe foetoe, bikasi da plesi, disi joe tanapoe de, da wan santa plesi! Mi de da Gado vo joe tata, da Gado vo Abraham, en da Gado vo Isaak, en da Gado vo Jakob! We di Masra taki so nanga Moses, nomo Moses hopo hem fesi, bikasi a ben frede vo troe, vo loekoe Gado so hai na hai. Dan Masra taki gi Moses: Mi si da pina-liebi, disi dem soema vo mi de pina na Egipti-kondre, en mi jeri da kre toe, disi dem ben kre gi mi, en fa dem djeme na ini da strafoe, disi dem Egipti-soema de strafoe dem doro nomo. We dati meki mi saka kom na gron, vo mi poeloe dem na dem Egipti-soema hanoe, en na Egipti-kondre srefi; mi wani tjari dem go na Kanaan, da wan bigi kondre, en wan mooi kondre toe, disi habi foeloe melki nanga honi. Da kondre, so leki a de, dem Kananitri nanga dem Hetitri nanga dem Amoritri nanga dem Feresitri en Hevitri en Jebusitri de liebi dedapee. We da joe de da soema, di mi wani teki, seni go na Farao, vo joe tjari dem soema vo mi komoto na Egipti-kondre.
Ma dati meki Moses kom na wan verlegi, a taki: Ke mi Masra, soema da mi, disi mi sa habi hatti, vo go na Farao go poeloe dem pikien vo Israel na hanoe vo Farao? Masra taki: Go mara, mi srefi sa go nanga joe! En mi sa gi joe wan marki toe, vo joe kan sabi na fesi, dati troe-troe da mi srefi seni joe. We te joe tjari dem komoto na Egipti-kondre boen-boen, dan na disi bergi tapo oen sa meki wan ofrandi gi Gado diaso. Moses taki: A boen; ma te mi kom na dem pikien vo Israel, mi taki, da Gado vo dem avoo seni mi kom na dem, somtem dem sa haksi mi, fa da Gado nem? We fa mi moe piki dem dan? Masra taki: Mi nem da Jehova, dati taki: Da Gado disi ben de , en disi de , en disi sa de , bikasi da so mi wani, dem moe kali mi alatem. We go hesi, kali dem gran-soema vo Israel kom makandra, en taki gi dem, da Gado vo Abraham en vo Isaak en vo Jakob ben saka kom na joe, a seni joe go na dem, vo joe taki gi dem, mi wani poeloe dem na ini da pina-liebi na Egipti-kondre, tjari go na Kanaan. We, te dem gi joe jesi, dan joe moe go na koning Farao, joe nanga dem gran-soema vo Israel, oen moe taki gi hem, da Gado vo dem Israel-soema wani, dem moe go na boesi go dini hem dapee, meki Farao gi dem pasi wan toe dri dei, vo dem kan waka go meki dem ofrandi gi Gado. Ma mi sabi na fesi, dati koning Farao hatti tranga, a no sa wani gi dem pasi vo go, alwasi san oen taki gi hem. We vo da hede mi sa doe foeloe bigi wonder-wroko na Egipti-kondre, mi sa strafoe dem Egipti-soema tranga, meki dem kom skreki; en dan fosi Farao sa gi dem Israel-soema pasi vo go. En ala dem tra Egipti-soema toe sa wani oen komoto, dem sa gi oen foeloe presenti srefi, nomo vo oen gowei hesi.
Ma Moses no ben de geruste jete, a taki, somtem dem Israel-soema srefi no sa bribi hem toe, somtem dem sa taki, dasani, di a verteli dem, taki, hem si Gado, dati a no troe, Gado no ben kom na hem. Masra taki: Hoefasi? dasani di joe holi na joe hanoe, san dati? Moses taki: Da wan tiki! Masra taki: We teki da tiki, hiti hem na gron. Moses doe so, en wantem da tiki tron wan sneki, tee Moses srefi kom frede da sneki, a ronwei vo hem. Ma Masra taki gi hem: Langa joe hanoe, kisi da sneki, fassi hem na hem tere. Moses doe so, a kisi da sneki, en so hesi a fassi da sneki, a kom wan tiki baka. Na baka Masra meki Moses doe wan wonder-wroko moro, a taki gi hem, meki a teki hem hanoe, soetoe na ondro hem hempi, meki a potti hem reti na hem hatti tapo. We Moses doe so, en di a poeloe hem baka, da hanoe ben foeloe nanga sawawa, a weti leki zoutoe. Na baka Masra meki Moses soetoe da han vo toetron na ondro hem hempi, en di a poeloe hem baka, a tron kom ageen leki hem skin. En Masra taki gi hem: We efi dem no wani bribi joe, te joe sori dem da fosi marki nanga da tiki, dan tog dem sa bribi joe, te dem si da tra marki. Ma efi dem toe marki srefi no kan meki dem bribi joe jete, efi dem no wani jeri joe, dan mi sa meki joe doe wan tra wonder-wroko moro; dan joe moe go teki watra na ini riba, hiti na gron, we da srefi watra, so hesi a kisi gron, nomo a sa tron broedoe wantem.
Ma nanga ala dati Moses no ben habi hatti jete vo go, a proberi wantron moro, vo poeloe hem srefi na da wroko, a taki: Ke mi Masra, mi de wan soema, disi no sabi vo taki krin, bika mi tongo hebi; alatem te mi wani taki wansani, a trobi mi vo troe, vo mi poeloe da taki reti! Masra taki: Hoefasi? Soema dati, disi ben gi soema tongo? Soema ben meki dem stomwan? nanga dem doofoeman? nanga blindiwan? nanga dem soema, disi kan si boen? A no mi, disi de wawan Masra? We go dan, mi srefi sa gi joe tongo, mi sa sori joe da reti woortoe, disi joe moe taki! Ma di Moses no ben habi hatti jete vo go, a bigin begi Masra wan tron moro, a taki: Ke mi Masra, gran-tangi! Betre joe seni wan trawan, teki iniwan di joe wani! Ma dati meki Masra kom mandi nanga Moses, a taki: Hoefasi? Joe denki, mi no sabi joe brara Aaron? hem no de wan boen takiman? We te joe doro na Egipti-kondre, a sa kom miti joe hafoe-pasi, en te a si joe, a sa switi na hem. We nanga hem joe moe taki, joe moe taki ala dem sani gi hem, di mi ben taki gi joe; en dan joe nanga hem makandra moe go na dem Israel-soema go taki nanga dem. Ma da tiki joe no moe vergiti, vo tjari go nanga joe, bikasi nanga hem joe sa gi foeloe marki en doe wonder-wroko.--
We now di Moses si, hem no kan feti nanga Gado moro, a teki pasi wantem, a go hesi na hem wefi tata Jetro, vo taki hem adjosi, a taki, hem wani go loekoe dem brara vo hem na Egipti-kondre, efi dem de jete. En Masra kom wantron moro na Moses na Midian-kondre, a taki: Meki hesi, vo joe go baka na Egipti-kondre, bikasi ala dem soema dede kaba, disi ben soekoe vo kili joe. Ma joe moe loekoe boen, vo joe doe ala dem wonder-wroko na Farao fesi, di mi ben sori joe, bikasi mi sa meki Farao hatti kom tranga vo troe, a no sa wani gi mi piple pasi vo gowei. We dan joe moe teki mi nem, waarskouwe hem, joe moe taki gi hem, dati mi loekoe dem Israel-soema, leki da fosi pikien vo mi, en mi wani, a moe gi mi pikien pasi, vo dem go dini mi; ma efi a no wani gi dem pasi, dan mi sa kili da fosi pikien vo hem.
We di Masra kaba vo taki nanga Moses, djoesnoe Moses teki hem wefi nanga dem toe pikien vo hem, en dan a teki pasi wantem go na Egipti-kondre. Ma Masra no ben taki gi Moses, dati a moe teki hem wefi toe, tjari go nanga hem. So srefi da moro jonge pikien, dati Moses no ben besnyde jete, nomo vo di a ben teki sjem vo hem wefi. We vo da hede ala di dem ben de na pasi, wan neti Masra kom miti Moses, a krasi hem tranga tee pikin-moro Moses ben denki, a moese dede. Ma di Moses nanga hem wefi kom membre dasani hesi, disi dem ben misi, dati meki Zipora teki da pikien, a besnyde hem wantem, en dan Moses seni da mama nanga dem pikien go baka na Jetro. Bikasi efi dem ben tan nanga hem, dem ben sa hindre hem foeloe na ini da wroko, disi Gado ben gi hem; en vo taki reti, dem Israel-soema no ben sa habi respeki toe vo Moses, efi dem ben si da Midian-oeman kom nanga hem. We so hesi da oeman go baka, Moses kom betre wantem, a teki hem pasi, waka go na Egipti-kondre. Ma di a doro klosibei na da bergi Horeb, hem brara Aaron kom miti hem dapee, bikasi Masra srefi ben naki Aaron hatti, vo a go miti hem brara hafoe-pasi. En dem ala toe brasa dem srefi, dem bosi makandra, bika dem plisiri vo troe, vo di dem si dem srefi baka.
We na pasi Moses verteli hem brara Aaron ala dem sani, disi Masra ben taki gi hem, en na baka di dem doro na Egipti, dem kali ala gran-soema vo Israel kom makandra, en Aaron taki ala dem sani gi dem Israel-soema, disi Masra ben taki na Moses, dati Gado wani poeloe dem na Egipti, tjari go na Kanaan. So srefi Moses no ben mankeri toe, vo doe ala dem gran marki wantem, na dem hai, so leki Masra ben sori hem, en dati meki dem bribi Moses nanga Aaron wantem. Bika di dem jeri, dati Masra srefi de si da jamer-fasi vo dem, en a soekoe vo helpi dem, poeloe dem na ini da pina-liebi, dem alamal fadom na dem kni, dem taki hem gran-tangi.
Na baka Moses nanga Aaron go tee na koning Farao srefi, dem taki gi hem, Masra Jehova, da Gado vo dem Israel-soema, seni taki gi hem, meki a gi dem soema pasi vo gowei, vo dem holi wan feesti-dei gi hem na woestein. Ma dati no ben boen na Farao kweti-kweti, a taki: Hoefasi? Soema de da Masra, disi mi moe jeri hem? Mi no sabi noti vo da Jehova; en mi no sa gi dem Israel-soema pasi toe, vo dem gowei, dati ben mankeri mi! - Moses nanga Aaron taki: We dati wi no kan helpi; bika da Gado vo wi Israel-soema kom haksi dati na wi, en vo da hede wi kom begi joe, vo joe gi wi wan toe dri dei, meki wi kan waka go na woestein, go meki wan ofrandi gi wi Gado, vo a no kom strafoe wi na bakatem. Ma Farao taki: Joe Moses nanga Aaron, sani oen kom trobi mi, vo mi poeloe dem soema na wroko? Betre oen srefi go na oen wroko toe! Dem soema de foeloe toemoesi na kondre kaba, pasa, en jete oen wani, mi gi dem so meni zondei vo verzuim soso, waka jajo? No no!
We da srefi dei Farao seni ordre gi ala dem driktoro en gi dem skrifiman, disi a ben potti na dem Israel-soema tapo, a taki, dem no moe gi dem wiwiri moro, so leki dem ben gi dem alatem, vo potti na oven, meki faja, te dem bakka dem stoon, a taki, dem Israel-soema srefi kan go soekoe da wiwiri, dem habi tem nofo vo dati. Ma ala dati dem moe kisi da srefi marki doro, dem driktoro no moe poeloe hafoe gi dem, ma so leki dem ben meki dem stoon tee tidei, da srefi marki dem moe doro ibri wieki prontoe; bikasi hem si boen-boen, dem no habi wroko nofo, da soso dem sidom de luiri, da dati meki dem prefoeroe so, taki, dem wani gowei go dini dem Gado. Te dem kisi moro tranga wroko, dan dem no sa taki so moro.
We dem driktoro doe so, dem taki gi dem Israel-soema, dati Farao no wani, meki dem gi dem wiwiri moro, vo bakka dem stoon, dem srefi moe soekoe dati, ma da ouroe marki, dati dem moese doro so srefi, leki fositem, a no kan poeloe no wan pikin-sani srefi. -- Ma dati dem poti Israel-soema no ben man kweti-kweti, bikasi nanga da soekoe vo da wiwiri dem ben lasi so meni tem, tee dem no ben kan doro dem marki moro no wan dei srefi, en vo da hede alatem te dem Israel-soema basja ben tjari dem stoon kom gi dem Egipti-driktoro, da heeli dei da fomfom ben go doro nomo, vo di dem no tjari da reti marki. We na bakatem, di dasani kom moro dem, ala dem granbasja makandra go na Farao srefi go klagi, dem kre da pina-liebi gi hem, en dem begi hem toemoesi, vo a moe helpi dem, dem taki, vo sinsi dem no kisi da wiwiri moro, sinsi dem srefi moe soekoe dati, dem no man vo doro dem marki moro; alwasi sani dem doe, dem no kan. Ma Farao no teki da begi vo dem kweti-kweti, a bigin krasi dem srefi, a taki, meki dem go wantem go wroko, bika da lezi soso dem lezi; efi no so, dem no ben sa kom na hem, taki, dem wani gowei, dini dem Gado.
We di dem basja vo dem Israel-soema jeri so wan taki na koning mofo srefi, dati meki dem kom si moro krin, dati da liebi kom ogri gi dem vo troe, no wan liebi-soema kan helpi dem moro; bikasi dem no ben kan denki, koning srefi ben gi da ordre so, en vo da hede dem no ben verwakti so wan antwoortoe vo hem. We ala disi dem komopo na Farao hoso, da srefi joeroe dem miti Moses nanga Aaron na pasi, bikasi dem ala toe ben tanapoe de wakti dem, en wantem dem basja go na dem, dem meki trobi nanga Moses en nanga Aaron, dem taki: Da oenoe ben meki da liebi kom so hebi gi wi, vo di oen ben tjari so wan taki go na Farao; betre oen ben libi wi so, leki fa wi ben de; bikasi oen pori wi nem na dem Egipti-soema, dati dem de loekoe wi now leki oproeroe-soema, en dem de feti vo kili wi nanga wroko. Masra moe kroetoe oen vo dati. We dati meki Moses kom na wan toemoesi verlegi, a go kre hem nootoe gi Masra, a taki: Ke mi Masra vo mi! fa joe doe wi so? Vo san hede joe ben seni mi kom dia? Bikasi sinsi da dei, disi mi ben go na Farao, gi hem da boodskopoe, na plesi vo a loesoe joe piple, a pina dem moro ogri, en joe no helpi dem pikinso srefi.
Masra taki gi Moses: We a boen, now joe sa si, fa mi sa doe nanga Farao; bika mi sa kisi hem tee a sa moese gi dem pasi vo gowei; vo troe-troe mi sa kisi hem boen-boen tee hem srefi sa seni dem, a sa jagi dem srefi komoto na hem kondre. Go taki gi dem pikien vo Israel, meki dem hatti kouroe, bikasi mi sa meki dem kom si, dati mi da Jehova. Vo troe-troe mi sa teki oenoe, meki oen tron wan kondre vo mi; mi sa poeloe oen na ini da pina-liebi diaso, en mi sa tjari oen go na da kondre, so leki mi ben pramisi Abraham nanga Isaak nanga Jakob granwei kaba. We Moses go baka go taki dem woortoe vo Masra gi dem Israel-soema. Ma dem lasi hatti krin-krin kaba, en da djeme, en da sari, en da tranga wroko ben meki dem no kan jeri srefi, sani Moses taki nanga dem.
Na baka Masra kali Moses nanga Aaron ageen a taki, dem moe go na Farao wantron moro go haksi hem pasi, vo meki dem pikien vo Israel kan gowei. Ma Moses no habi hatti moro vo go, a taki: Ke mi Masra, joe srefi si, dem pikien vo Israel srefi no wani jeri mi, fa koning Farao sa jeri mi dan? En buiti dati mi de wan soema, disi no sabi vo taki boen; bika mi tongo hebi. Masra taki gi Moses: Dati a no wansani, bikasi mi sa meki joe tan na Farao hai, leki Gado srefi, en joe brara Aaron hem sa de joe profet, disi sa teki joe woortoe, poeloe gi Farao. Ma ala dati Farao no sa jeri oenoe, hem hatti sa tranga vo troe, en dati sa meki mi doe foeloe marki en bigi wonder-wroko na heeli Egipti-kondre, tee ala Egipti-soema sa si, da mi srefi poeloe dem pikien vo Israel na dem mindri; en na wan tranga fasi mi sa doe dati. -- We Moses nanga Aaron doe so, leki Masra taki gi dem. Da srefi tem Moses ben ouroe aititentin jari, ma Aaron ben habi aititentin na dri jari.
1. We da tori vo Moses, disi a ben de so wan bejari soema kaba, datem di Masra kali hem, potti hem na da wroko, vo poeloe dem Israel-soema na Egipti-kondre, dati de sori wi, fa ala sabi en ala koni vo disi grontapo no kan helpi wi, vo doe wan reti wroko vo Gado, so langa wi srefi no bedaari jete, en so langa wi hatti no habi onderfindi. Bika vo leri? Moses ben leri foeloe sani na dem Egipti-soema skolo, a ben de wan bigi sabiman vo troe; ma jete Masra ben drai hem langa, a meki a wakti foeloe jari, tee Moses srefi kom bedaari boen-boen fosi, bifo Gado gi hem da wroko. We vo leri? ala soema moese leri sani, vo dem kom sabi Gado wani; “ma sabi soso no kan doe, wi moe de harki Masra toe.”
2. So srefi da tori de sori wi, te wi de na wan hebi, en te da hebi kom moro wi so, tee wi no man vo holi moro, dan wi kan sabi vaste, dati da joeroe de klosibei, disi Masra sa kom helpi wi. Da so dem pikien vo Israel ben onderfindi dati toe. Bikasi moro dipi dem ben kom na ini da pina-liebi? moro Masra ben soekoe vo helpi dem, a meki dem kom si, troe-troe hem no ben vergiti dem, ma hem de da srefi Gado jete, di a ben de alatem.
3. Di Masra ben kali Moses na da wroko, Moses ben drai toemoesi vo go, a taki, hem no kan doe so wan wroko, hem no man vo dati; bikasi a ben loekoe na da zwaki vo hem srefi moro hesi, leki a ben loekoe na da tranga vo hem Masra, di ben seni hem. Apostel Paulus taki: Da tranga vo Masra de wroko na ini dem zwakawan. (2. Kor. 12, v. 9.) We vo da hede alatem wi moe loekoe na dem toe sani; hafoe wi moe loekoe na da zwakafasi vo wi srefi, en hafoe wi moe loekoe ageen na da tranga vo Masra, dati sa meki wi habi hatti, sondro wan hei membre, nanga saka-fasi toe, sondro wi lasi hatti.
4. Na ini da tori wi ben jeri, Gado taki, da hem srefi ben meki dem soema, disi stom, nanga dem doofoeman nanga dem blindi soema. We wan soema, disi habi hatti, vo kosi so wan mofina malengri soema, da soema de kosi Gado srefi.
5. Koning Farao ben taki: Soema de da Masra, disi mi moe harki hem? Mi no sabi noti vo da Jehova! Dati ben de wan asranti taki vo troe. Ma tog nofo Kristen-soema de, disi wi moe taki, dem de moro ogri srefi, leki Farao. Bikasi Farao no ben meki lei, a taki krin-krin, hem no wani harki da Masra. Ma dem falsi Kristen-soema no taki so, dem taki, dem wani harki Masra, ma vo doe? dem no doe so kweti-kweti. (Matt. 21, v. 30.)
(2. Mos. Kap. 7, v. 8 tee Kap. 11.)
Di Moses nanga Aaron kom baka na koning Farao, Aaron teki hem tiki, a hiti hem na gron reti na Farao fesi, en na fesi vo dem tra gran-masra vo kondre; bikasi da so Masra ben taki, dem moe doe, efi Farao no wani jeri dem, efi somtem a sa taki, meki dem gi hem wan bewysi, vo a kan si, dati wan Gado ben seni dem. We so hesi Aaron hiti da tiki na gron, nomo da tiki tron wan sneki. Ma datem toe soema ben de na Egipti-kondre, toe bigi tofroe-man, wan dem kali Jannes , da trawan dem kali Jambres , dem ben sabi toe, vo meki foeloe dangra-sani nanga da takroe tofroe-wroko vo dem; bikasi datem didiebri ben wroko tranga jete na ini dem ogri soema hatti, ma nojaso sinsi Masra Jesus ben kom verzwaki hem, now a no habi so wan tranga moro. - We disi Moses nanga Aaron ben doe da wonder-wroko na Farao fesi nanga da tiki, nomo Farao seni kali dem toe soema wantem, nanga dem tra winti-man, vo dem sori Moses nanga Aaron, dati dem kan doe sosani toe. En di dem kom na Farao hoso, ibriwan hiti hem tiki na gron, en nanga da tofroe-wroko vo dem dem meki dem tiki tron sneki toe; ma da tiki vo Aaron kisi ala dem tra tiki, a swali dem.
Ma nanga ala dati Farao hatti ben tranga jete, a no wani jeri Moses. We dei-broko mamantem Masra seni Moses nanga Aaron go na watra-sei na wan riba, disi dem kali Nil, vo dem miti Farao dedapee, bikasi ala mamantem Farao ben lobbi go dapee go begi na da riba. En Masra taki gi Moses, meki a haksi Farao wantron moro, efi a sa gi dem pasi vo gowei; ma efi somtem a no wani, dan Aaron moe teki da tiki vo hem, naki na ini da riba, en dati sa meki da watra tron broedoe. We Moses nanga Aaron doe so, leki Gado taki gi dem, en na Farao hai srefi Aaron langa hem hanoe, a naki da watra nanga hem tiki, en so hesi da tiki mofo meli da riba nomo, da srefi momenti ala watra vo da riba tron broedoe wantem, tee na ini ala dem pikin kriki srefi na heeli Egipti-kondre, da watra ben tingi so tee dem Egipti-soema ben fiste vo hem, dem no ben kan dringi da riba-watra moro, en dem fisi srefi kom dede na ini. Efi dem no ben habi pikin peti jete na wan wan hoso so, disi ben habi krin watra, no wan soema ben sa habi watra vo dringi. Ma ala dati no ben seki Farao hatti jete, alwasi da broedoe ben ron doro na ini dem riba sebi dei langa; bika disi dem Egipti-tofroe-man ben geersi Aaron da srefi sani toe, dem meki watra tron broedoe, dati meki Farao no ben wani bribi Jehova jete.
We na baka Masra seni Moses go ageen na Farao, a pramisi hem, taki, efi a no gi dem soema pasi wantem vo dem gowei, dini hem, dan Masra sa strafoe hem heeli kondre, a sa seni so meni todo kom tee da riba sa foeloe nanga dem, en dem sa kruipi kom tee na ini hem hoso, en na ini hem slibi-kamera srefi, en tee na tapo hem bedi; so srefi dem sa go na ini makzien toe, tee na ini dem njanjam-patoe en na ini brede, dem sa kruipi srefi tee na hem eigen skin tapo, dem sa trobi hem reti-reti, hem nanga hem heeli kondre. We di Farao no ben wani jeri dem ageen, Masra doe so wantem, leki a ben waarskouwe hem, a meki Aaron langa hem hanoe nanga da tiki na abra ala dem riba en kriki en watra-horo vo Egipti-kondre, en dati meki so meni todo kom, tee heeli kondre foeloe nanga dem, no wan soema ben kan slibi na neti, so srefi vo njam? no wan soema ben kan njam wansani, bika dem todo ben de trobi soema toemoesi pasa-marki. En alwasi dem tofroe-man ben geersi Aaron dasani ageen, tog vo poeloe baka? dem no ben man vo poeloe dem todo baka. We dati kom broko Farao hatti pikinso; a seni kali Moses nanga Aaron kom na hem, a taki, meki dem begi Masra gi hem, vo a poeloe dem todo baka, dan hem sa gi dem Israel-soema pasi vo dem gowei, meki wan ofrandi gi Masra. Moses taki gi Farao: A boen, ma hoetem mi moe begi da begi gi joe? Farao taki: Tee tamara! Moses taki: We a boen. So leki joe taki, da so a sa kom. Tamara Jehova sa poeloe ala dem todo krin-krin na ini joe hoso en na joe kondre, na ini riba wawan dem sa tan.
We nanga da antwoortoe Moses nanga Aaron libi Farao vo da leisi, dem gowei. En Moses begi Masra tranga vo dem todo, meki a poeloe dem baka, so leki Moses ben pramisi Farao dati. En Masra teki da begi toe, a doe so leki Moses taki, a meki ala dem todo dede wantem; dem ben de so foeloe, tee dem Egipti-soema no ben man vo poeloe ala na strati, ma dem troesoe dem makandra, meki hipi, en da heeli kondre kom tingi vo dem. Ma so hesi Farao si, da strafoe saka gi hem, a meki hem hatti kom tranga baka ageen, tee a no wani jeri Moses nanga Aaron moro; dasani kom reti so leki Masra srefi ben taki na fesi. We vo da hede Gado ben moese strafoe hem wan tra fasi ageen, a meki Aaron teki da tiki vo Moses, naki na gron, en dati meki ala da stof en da pikin santi vo heeli Egipti-kondre tron loso wantem, a ben de leki wan speli pikin mompira efi patata-loso, dem ben trobi soema toemoesi, bika liebi-soema nanga meti ben foeloe nanga dem. En dem tofroe-man ben wani geersi dem dasani ageen nanga da tofroe-wroko vo dem, ma dem no kan, en dem srefi no meki lei gi Farao, dem bekenti, taki, da Gado-wroko.
Ma di ala dati no ben kan naki Farao hatti jete, tee vo a gi dem pasi vo gowei, Masra meki ala soortoe ongedierte kom na Farao tapo en na heeli Egipti-kondre, (vo taki, so meni muisi-muisi nanga arata nanga kakerlaka nanga doezend-been nanga marboensoe,) dem kom na ini ala soema hoso, beti dem. Ma alwasi heeli Egipti-kondre ben foeloe nanga dem, tog na da pikin Gozen-kondre, dapee dem pikien vo Israel ben de liebi, no wan soortoe ongedierte ben de trobi dem soema; en dati ben de wan aparti-sani vo troe, bika nanga dati Masra ben meki dem heiden-soema kan si, Gado lobbi da piple vo hem. We disi dasani kom so ogri gi dem Egipti-soema, tee Farao srefi no ben man vo holi moro, bakatem di Moses nanga Aaron kom na hem ageen, a taki gi dem, efi da vo meki wan ofrandi soso, meki dem go doe so, hem sa gi dem tem vo dati; ma dem kan doe dati na Egipti-kondre srefi. Moses taki: No no, dati no kan de, wi no kan doe dati so na dem Egipti-soema hai; bika dem sa kili wi nanga stoon, te dem si, fa wi slagti dem kroekoetoe-gado vo dem, tjari ofrandi kom gi wi Gado. Farao moe gi wi pasi, vo dem kan teki dri dei, waka go na boesi go dini Gado dapee na da fasi, so leki Gado srefi ben taki gi wi. Farao taki: We go dan, dini da Gado vo oenoe, ma loekoe boen, vo oen no gowei moro farawei, leki oen taki, en te oen begi Gado, oen moe begi vo mi toe. Moses taki: A boen, mi sa go begi Masra wantem, efi a sa plisi, vo poeloe da ongedierte baka; ma Farao no moe kori wi ageen.
We so hesi Moses go begi Masra, nomo Gado poeloe ala dem ongedierte baka wantem, tee no wan marboensoe srefi ben fika moro. Ma jete Farao no gi dem pasi vo gowei, bikasi a meki hem hatti kom tranga baka ageen.
We na baka Masra strafoe Farao wan tra fasi moro, a meki wan toemoesi ogri siki kisi ala dem Egipti-soema meti, en foeloe vo dem meti dede na ini da siki; ma dem Israel-soema meti, dem no kisi wan pikin ogri srefi. Ma di Farao no ben ke vo dati ageen, Masra meki ala Egipti-soema nanga dem meti kisi wan soortoe poki na dem skin, a ben tan leki wan takroe blaka jasi; en dem tofroe-man srefi no ben bevry toe, dem kisi da siki so ogri, tee dem no kan tan na Moses fesi moro. Ma ala dati Farao no wani jeri jete. We na baka Masra taki gi Moses, meki a go baka ageen na Farao, meki a potti alasani na hem fesi, fa Masra ben ha pasiensi nanga hem so meni langa; bika efi a ben wani, a ben kan meki da poki kili hem kaba, ma di Masra no ben wani so, vo da hede a ben kibri hem liebi, alwasi Masra ben sabi na fesi, Farao hatti no sa drai jete. Ma now Masra sa go sori hem wan trasani, meki a si, no wan Gado de na grontapo so tranga, leki Jehova. Tamara na so wan joeroe wan bigi onweri sa kom, en wan tranga hagla-areen sa fadom, leki dem no si jete na Egipti-kondre. Meki Farao seni soema go teki ala hem meti, di de na sabana, tjari kom na hoso; bika ala soema nanga meti, disi da hagla sa miti na sabana efi na strati, a sa kili dem wantem. We dem toe dri amtenari vo Farao, disi ben bribi da woortoe vo Masra, dem seni teki dem knegti nanga dem meti kom na hoso kom kibri, ma dem trawan, disi no ben bribi Masra, dem libi dem knegti nanga dem meti na sabana.
We dei-broko Masra meki wan bigi onweri kom; da dondro ben bari na tapo, en da faja ben koti so tee, da hagla kom fadom na gron, leki wan bigi faja-areen; en ala soema nanga meti, disi ben de na firi en na strati-sei, dem dede na ini da onweri. So srefi da flam vo da faja naki ala dem boom tee vo dem pliti, en ala groentoe toe, disi ben de na dem djari na heeli kondre, a kom pori krin-krin. Da heeli onweri, so leki a ben de, a ben de wan skreki-sani vo troe, bikasi sosani dem no ben si jete na Egipti-kondre nooiti wantem. Ma na Gozen-kondre, dapee dem pikien vo Israel ben de liebi, no wan hagla ben fadom. We na ini da onweri Farao hatti srefi kom skreki toe, a seni kali Moses nanga Aaron kom na hem, a taki: Di leisi mi doe ogri vo troe. Mi si, Jehova habi reti, ma mi nanga dem soema vo mi habi kroekoetoe. We begi Gado gi wi, vo a meki da hagla nanga da dondro moe pasa hesi, meki a kaba, dan mi sa gi oen pasi wantem vo gowei, mi no sa drai oen moro. Moses taki: A boen, mi no sa mankeri, vo go begi Masra, en da dondro nanga da hagla sa kaba toe, vo joe si, Jehova hem da Masra. Ma mi sabi na fesi, joe no habi wan reti respeki vo Jehova jete. We nanga da woortoe Moses libi Farao; a go begi Masra, en wantem da dondro nanga da hagla kom pasa; so srefi da areen kom wai toe, tee no wan dropoe srefi fadom moro. Ma so hesi Farao si da onweri pasa, nomo hem hatti kom tranga baka ageen, a no wani gi dem pasi jete, vo gowei.
We na baka vo da tori Masra seni Moses go ageen na Farao, a waarskouwe hem wantron moro, a taki, efi a no gi dem Israel-soema pasi, vo dem gowei, dini hem, dan Masra sa meki so meni sprinkhan kom, tee hem heeli kondre sa lai nanga dem, en ala boom nanga ala njanjam, disi da hagla no ben pori jete na firi, dati dem sprinkhan sa pori, dem sa doro tee na ini soema hoso srefi, trobi soema. We fosi Farao no ben wani ke vo da taki ageen, a meki Moses gowei baka, sondro a piki hem wan woortoe. Ma na baka dem tra gran-masra vo kondre kom begi hem, meki a gi dem soema pasi, libi dem; bika so langa dem no komoto, heeli Egipti-kondre no sa habi ruste vo dem hede. We disi dem potti alasani na Farao fesi so, fa nanga ala dem strafoe vo da Israel-Gado heeli kondre pori kaba, dati meki Farao kali Moses nanga Aaron kom baka na ini, a haksi dem, hoe reti soema vo dem wani gowei, vo dini dem Gado; bikasi hem sa gi dem pasi noja. Moses taki, dem alamal moese go, bigi soema nanga pikinwan, en dem meti srefi dem moese teki toe, tjari go nanga dem; bikasi nanga dem meti dem moese meki ofrandi gi Masra. Farao taki: No no, efi da vo dati hede wawan, dan dem kan libi dem oeman nanga dem pikien na hoso, hem sa meki dem man-soema gowei, dem wawan; moro dem no moe soekoe na hem. We nanga da antwoortoe Farao jagi Moses nanga Aaron komoto na hem fesi.
Ma dei-broko mamantem Gado meki wan tranga oost-winti hopo, en da winti tjari so meni sprinkhan kom tee dem tapo heeli Egipti-kondre, en ala da areisi nanga ala dem boom-vroektoe, disi da hagla no ben pori, dati dem sprinkhan kom njam krin-krin. We nanga dati Farao kisi wan skreki ageen, a seni kali Moses nanga Aaron kom na hem, a taki, meki dem gi hem pardon vo da leisi, en meki dem begi Gado wantron moro, vo a saka da strafoe gi hem; bika hem doe ogri vo troe, hem no sa doe moro. Ma Moses no piki hem, bika a ben sabi Farao maniri kaba; ma tog a go begi Masra ageen gi hem, en wantem Masra meki da winti drai so, vo a teki ala dem sprinkhan, tjari go na zee. Ma nanga ala dati Farao no holi hem woortoe jete, hem hatti kom tranga baka ageen. We vo da hede Masra sori hem wan tra marki ageen, a meki wan toemoesi bigi doengroe kom na heeli Egipti-kondre, en da doengroe ben holi dri dei langa; a ben doengroe pasamarki, tee no wan soema ben kan si trawan; alwasi dem ben letti faja srefi, dem no ben kan si sani, en dati ben meki no wan soema ben man, vo hopo na hem plesi go na wan trapee. Ma na ini dem Israel-soema hoso no wan doengroe ben de, da krin dei ben letti gi dem boen-boen. We da dei, disi meki dri, Farao seni kali Moses kom na hem, a taki, dem kan gowei, dini dem Gado, dem kan teki dem pikien toe, tjari go; ma dem skapoe nanga dem kow dem moese libi na hoso. Moses taki: No no! no wan kow-foetoe srefi moe fika na baka. We dati meki Farao hatti kom tranga ageen, tee a poeloe hem woortoe baka, a no wani meki dem go moro.
Ma na baka vo dem dri dei Gado kom na Moses ageen, a taki: Wan strafoe mi sa strafoe Farao nanga hem kondre jete, en dan a sa gi oen pasi wantem vo gowei; hem srefi sa jagi oen komoto na hem kondre. Bika tee mindri-neti mi sa waka heeli Egipti-kondre doro, en ala fosi pikien vo ala liebi-soema en vo ala meti sa dede da srefi neti; da fosi pikien vo koning Farao mi sa teki fosi, mi sa doro tee na dem fosi pikien vo dem slavoe-oeman, disi de wroko na mili; so srefi ala dem fosi pikien vo dem meti sa dede toe. En wan babari sa hopo na heeli Egipti-kondre, leki no wan soema ben jeri jete, en leki dem no sa jeri moro. Ma na mindri vo dem pikien vo Israel no wan dagoe srefi sa bari. We dan ala Egipti-soema sa kom begi oenoe, nanga kni na gron srefi dem sa taki gi joe: Tangi-tangi, komoto hesi na wi kondre, libi wi, joe nanga ala dem tra soema vo joe! We Moses teki dem woortoe vo Masra, en nanga wan toemoesi broko hatti a go baka na Farao vo da laatste leisi, a gi hem da boodskopoe. Ma Farao hatti ben tranga so, tee a bigin vo krasi Moses, a jagi hem, a taki: Loekoe boen, no kom na mi fesi moro! Efi mi hai si joe moro, joe sa dede! Moses taki: A boen! So leki joe taki; mi no sa kom na joe fesi moro. En nanga da woortoe Moses libi Farao, a gowei.
1. We da tori vo da tranga hatti vo Farao, dati de meki wi kan si, fa dem hei membre kan tjari wan soema so fara, tee bakatem a no ke vo noti moro, alwasi sani Gado doe nanga hem, vo meki a kom na verstand. Efi Farao ben habi pikin fili jete, hem hatti ben moese broko, di a ben si, fa hem heeli kondre ben pina vo hem hede; ma da bigi membre vo hem ben meki a lasi ala fili krin-krin.
2. Troe, vo da momenti, disi da strafoe vo Masra ben de na hem tapo de kwinsi hem, dan Farao no ben mankeri vo pramisi Masra, taki, hem sa harki Gado; ma so hesi da ogri kom saka pikinso gi hem, nomo a kenki baka, a no wani moro. We so srefi nofo Kristen-soema de, disi habi da srefi maniri. Vo so wan momenti, te dem de nanga wan hebi, di de loekoe vo moro dem, dan dem sabi vo kali Gado nem, vo a helpi dem; ma so hesi Gado sari vo dem, poeloe dem na ini da verdriti, nomo dem vergiti hem baka, en dem doe ala da srefi ogri, leki dem ben doe fositem.
3. Dem tofroe-man vo Egipti-kondre, nanga da takroe didiebri-wroko vo dem, dem ben sabi vo geersi Moses wan toe dri wonder-wroko vo hem (2. Tess. 2, v. 9.), ma tog na bakatem dem no ben kan lei moro, dem gi Gado nem, dem taki: Dati da Gado-wroko! We da srefi sani wi kan si na dem ogri soema tee tidei jete. Bika nofo soema, disi anders no wani sabi Gado, tog te dem si dem gran wroko vo Masra, dan dem no kan helpi, ma dem hatti srefi de seni dem, vo dem bekenti: Disi da Gado-wroko!
4. Datem, disi Gado ben strafoe dem Egipti-soema so, a no ben meki da strafoe go doro tee na dem Israel-soema, ma a kibri dem, vo ala soema kan si, hem meki wan onderskeid nanga dem soema, disi dini hem, en nanga dem soema, disi no dini hem. (Maleaki 3, v. 18.) - Ma no alatem a lobbi vo doe so. En vo da hede te a finni vo boen, vo strafoe wan heeli kondre, dan ala soema kisi da strafoe wan-fasi, dem pikien vo hem so boen, leki dem vyanti vo hem. En so leki profet Jeremias nanga Daniel ben saka dem srefi gi Gado, dem begi hem, taki: Ke Masra, da wi srefi ben doe ogri, wi ben pasa joe woortoe, en vo da hede joe doe reti, disi joe strafoe wi so (Daniel 9, v. 5.); so srefi dem pikien vo Gado moe begi Masra toe na so wan tem.
(2. Mos. Kap. 12 tee Kap. 15, v. 21.)
(Datem omtrenti 2500 jari ben pasa, vo sinsi Gado ben meki hemel nanga gron. En a ben de omtrenti 1500 jari bifo Kristus gebore.)
Toe dei bifo Masra ben seni da laatste boodskopoe gi Farao, Masra kali Moses nanga Aaron kom na hem, a taki, meki dem gi dem pikien vo Israel kenisi, dati na ini da moen, disi dem de, Masra sa poeloe dem na Egipti-kondre; en da srefi moen Abib dem moe teki noja vo da fosi moen, te dem teli da kerki-jari vo dem. (Na wi almanak noja da moen Abib fadom na Maart en April; ma da reti njoe-jari vo kondre? dati fadom na September, so leki dem pikien vo Israel ben njoesoe alatem vo njam jari.) We na ini da srefi moen Abib -- Masra taki -- da dei disi meki tin, ibriwan tata vo wan Israel-famili moe teki wan lam -- vo taki, wan pikin skapoe -- wan manwan, disi ouroe wan jari, en disi no habi wan mankeri na hem skin, oen moe kibri hem na hoso dri dei. Ma da dei, di meki tin na fo vo da srefi moen Abib, ibriwan famili moe kili da lam, en da broedoe vo hem oen moe teki, robi na dem toe postoe na sei doro en na da dwaarsi-balki na taposei. Oen no moe broko wan boon vo da lam! Ma da meti oen moe potti na krofaja, rosi hem, nanga switi brede toe, oen moe njam hem da srefi neti, moksi nanga bita slaa. Oen no moe njam hem hafoe-lala, en a no moe boli na ini watra toe, ma da rosi a moe rosi na faja boen-boen tee a safoe. So srefi oen no moe libi sani abra, kibri tee mamantem; ma dasani disi oen no kan njam, dati oen moe teki, bron na ini faja. Ma bifo oen go sidom njam, oen moe meki oen srefi klari boen-boen, weri soesoe na oen foetoe, teki tiki na oen hanoe, leki soema disi de feti vo gowei. Bika da srefi neti mi sa waka heeli kondre doro, mi sa kili ala fosi pikien vo dem Egipti-soema; ma dem hoso vo oenoe mi sa pasa, bika da broedoe sa de da marki vo oenoe na dem hoso, disi oen liebi na ini; te mi si da broedoe, mi sa pasa oen soso, meki da ogri no kisi oenoe, te mi strafoe dem Egipti-soema. En da dei oen no moe vergiti moro, ma oen moe holi hem vo wan bigi feesti-dei ibri jari, vo oen membre da tori, oenoe nanga dem pikien vo oenoe tee vo teego. Sebi dei langa oen moe holi dem feesti-dei; da fosi dei oen moe holi wan bigi kerki, vo hopo dem fesa, en di vo sebi oen moe holi wan aparti kerki ageen, vo tapo dem dei. Ma ala dem sebi dei oen moe poeloe ala zuurdegi krin-krin na oen hoso, da masoo wawan oen moe njam; efi wan soema njam brede, a moese dede! En te oen kom na da kondre, disi mi ben pramisi oenoe, kaba dem pikien vo oen haksi oenoe, hoe feesti-dei dati, dan oen moe taki gi dem, dati de da Paaska vo Masra; en oen moe verteli dem, fa Gado ben pasa dem pikien vo Israel hoso, datem di a ben strafoe dem Egipti-soema.
We so hesi Masra kaba vo taki nanga Moses en nanga Aaron, nomo dem kali ala gran-soema vo Israel kom makandra, dem taki alasani gi dem, disi dem jeri na Masra, en di dem tra pikien vo Israel kisi njoesoe vo dati, dem alamal hiti dem srefi na gron gi Masra, dem taki hem gran-tangi. Na baka dem gowei, vo meki dem srefi klari, so leki Masra ben taki gi Moses. We tee mindri-neti Masra Gado seni wan Engel vo hem go waka heeli kondre doro, a meki a kili ala dem fosi pikien vo dem Egipti-soema; a bigin na da gran prins vo koning Farao tee a kisi na dem fosi pikien vo dem soema na doengroe-hoso en tee na dem meti srefi. We dati meki ala soema kom skreki vo troe, en Farao srefi hopo na neti, hem nanga dem tra gran-masra vo kondre, nanga ala Egipti-soema, en wan bigi babari hopo na heeli Egipti-kondre da srefi neti; bika no wan hoso ben de, disi no ben habi dede-soema. En nanga da skreki Farao seni begi Moses nanga Aaron da srefi neti, meki dem teki dem Israel-soema, en gowei hesi, go dini Masra, so leki dem wani. A taki, dem kan teki dem skapoe toe nanga dem kow, so leki dem ben taki; ma dem moe gowei hesi en dem moe begi vo hem toe. So srefi ala dem tra Egipti-soema begi dem pikien vo Israel toemoesi, meki dem gowei hesi; bika dem ben frede, efi dem no gowei, libi dem hesi, dem alamal sa dede. En buiti dati Masra ben naki dem Egipti-soema hatti, vo dem gi dem Israel-soema so meni silver-sani en goutoe-sani, pleti nanga spoen, nanga so meni klosi toe; bika da so Masra srefi ben taki gi Moses, dem moe haksi dati na dem Egipti-soema. We da so nanga ala da foeloe goedoe dem teki pasi, dem komoto na Raemses vo go na Sukot. Ala nanga ala dem ben meki omtrenti siksi-hondro-tron doezend bigi man-soema, disi ben kan waka na foetoe, sondro vo teli dem oeman nanga dem pikien na ini. Malengri soema no ben de datem na no wan Israel-famili, ma so leki dem komoto, dem alamal ben de gezontoe soema doro-doro. En buiti ala dem foeloe meti, di dem ben habi, so meni tra soso-soema vo Egipti-kondre en vo tra kondre ben go toe nanga dem, dem kom wan bigi-bigi hipi. Ma dem Egipti-soema ben blyti vo troe, disi dem pikien vo Israel gowei; bika dem ben kisi wan frede vo dem. (Psalm 105, v. 37 & 38.) We so hesi dem komopo na Egipti boen-boen, dem meki kampoe na Sukot, en na dapee dem teki da soso lala-brede, di dem ben teki nanga dem, dem meki masoo, vo dem njam; bika dem Egipti-soema no ben gi dem tem vo dati moro, en tra njanjam dem no ben kan meki klari toe, vo teki nanga dem na pasi.
Da heeli tem, disi dem Israel-soema ben liebi na Egipti-kondre meki fo-hondro nanga dritentin jari. Na baka Masra poeloe dem alamal na wan dei. En da srefi neti ala soema vo Israel moe loekoe vo wan santa neti, dem moe pasa hem nanga begi en nanga tangi ibri jari. So srefi Masra taki gi Moses, ala fosi man-pikien, disi dem Israel-oeman sa meki, dem moe de vo Masra de santa; en vo da hede a gi dem da vaste wet, dati vo ibri fosi manpikien dem moe tjari wan aparti ofrandi kom gi Masra, vo loesoe en vo bai da pikien baka. Bika dati da vo dem membre da tori, fa Masra ben kili ala fosi man-pikien vo dem Egipti-soema, vo di Farao no ben wani loesoe dem pikien vo Israel.
We disi Masra ben dwingi Farao so tee a gi dem pasi vo gowei, fosi dem ben wani teki da reti hopo pasi go na Kanaan, en dati meki dem kisi hesi na da redi zee; bika dem ben feti vo koti da hoekoe hesi. Ma disi Gado no ben wani, dem moe waka Filistri-kondre doro, vo di da feti ben kan meki dem lasi hatti wantem, vo da hede Masra kom sori dem wan tra pasi, meki dem waka da woestein doro, so vo dem libi da redi zee na dem kroekoetoe hanoe. Bika da srefi dei, disi dem ben wani koti da hoekoe, Jehova srefi kom waka na dem fesi leki kompasi; na dei a ben sori dem wan wolkoe na tapo, di ben de waka go na dem fesi, en na neti da wolkoe ben letti dem leki wan bigi faja, meki dem kan waka doro na neti so boen, leki na dei. En da wolkoe no ben lasi na dem hai no wan dei, so srefi da faja no ben libi dem no wan neti. We da so dem alamal ben de waka, leki wan bigi hipi soldati; bikasi datem, disi dem komopo, Masra ben meki dem teki houroe nanga boo, vo dem kan feti nanga dem soema, disi wani tapo dem. So srefi Moses ben teki dem boon vo Josef toe, tjari go nanga hem; bikasi bifo Josef ben dede, dem pikien vo Israel ben moese pramisi hem dati, nanga sweri srefi, taki, dem sa doe so.
We wan dei, disi dem ben meki kampoe na Etham, Masra kom na Moses, a taki gi hem, meki a taki gi dem pikien vo Israel, vo dem teki pasi baka, drai pikinso go na zee-kanti-sei, na dapee dem moe meki kampoe klosibei na sjoro, kibri na mindri dem toe bigi stoon, di de dapee; bikasi te Farao si, dem no kom baka, a sa taki, dem lasi pasi na boesi, en dan a sa feti hesi na dem baka, vo kisi dem. Ma dati no sa helpi Farao, bikasi alwasi fa a meki hem srefi bigi, a denki, hem de wan gran-masra, tog Gado sa meki hem srefi moro bigi na Farao fesi, vo ala Egipti-soema si, Jehova hem wawan de Masra.
We dem pikien vo Israel doe so, leki Masra ben taki gi Moses, dem drai go na zee-kanti go kibri vo Farao. En so hesi koning Farao kom jeri, dem Israel-soema gowei krin-krin, dati dem no wani kom baka moro, a kom spyti Farao nanga dem tra gran-masra vo kondre, dem taki: Betre wi no ben gi dem pasi vo gowei, leki dem moe kori wi so. En wantem Farao meki dem span hasi na hem wagi, a teki so meni soldati nanga wagi nanga hasi, a feti hesi go na dem baka. Bika a no ben wani sabi jete, da Jehova srefi ben poeloe dem pikien vo Israel na Egipti-kondre.
We ala dati Moses nanga dem Israel-soema ben sidom jete de kibri na zee-kanti, dem ben denki, efi somtem Farao sa kom feti na dem baka, dan a no sa soekoe dem na so wan plesi, ma a sa teki da tra pasi, disi dem ben waka fosi, en te a no finni dem dapee, dan a sa drai baka go na hoso. Ma poti! ala disi dem sidom so de bro, wan dei dem hopo dem hai, dem si Farao nanga so meni soldati kom na dem baka, vo kisi dem; en dati meki dem kom frede toemoesi, dem bari kre na Masra; bikasi dem no ben si pasi na no wan sei, dapee dem kan ron go kibri. En di dem no ben habi wan reti vertrouw vo Masra, dati meki dem kom mandi nanga Moses, dem verwyti hem, dem taki, vo san hede a no ben libi dem na Egipti-kondre; efi dede moese de, moro betre dem ben dede na Egipti, leki na so wan woestein-plesi, dapee no wan soema kan beri dem. Ma Moses taki, meki dem bedaari, dati no wansani, dem no habi noti vo frede; bikasi Jehova srefi sa kom helpi dem, dem srefi no habi vo feti nanga dem Egipti-soema kweti-kweti, ma Masra sa feti vo dem; tamara no wan vo ala dem Egipti-soema sa de moro.
We vo Farao Moses no ben habi wan frede, ma disi dem pikien vo Israel no ben sori so wan bribi, leki dem ben fiti vo habi, dati nomo ben gi Moses wan pikin broko-skin. Ma hem boen Masra kom poeloe hem hesi na ini da verlegi, a troostoe hem, a taki: San hede joe de kre, Moses? Go taki gi dem pikien vo Israel, meki dem teki pasi hesi, gowei! En joe teki joe tiki, langa joe han na abra da zee, meki da watra platie vo makandra, tee dem pikien vo Israel kan pasa hem doro nanga dre foetoe! - We da srefi momenti, disi Masra ben de taki so nanga Moses, nomo da Engel vo Gado, di ben waka alatem na dem fesi, vo sori dem pasi, a hopo go tee na bakasei, so srefi da wolkoe toe komoto na fesi-sei, a go tee na bakasei, a kom tan reti mindri vo dem Egipti-soema kampoe nanga disi vo dem Israel-soema kampoe, a platie dem, meki dem no kan si makandra; na fesisei da wolkoe ben de leki wan bigi faja, a letti dem Israel-soema na neti, ma na bakasei a ben blaka so tee dem Egipti-soema no ben kan si noti. We reti na mindri-neti Moses teki hem tiki, a langa hem na abra da zee, en da srefi tem Masra meki wan tranga oost-winti hopo, en da winti wai da heeli neti doro, a jagi da watra na wan sei, meki a platie vo makandra krin-krin, tee a gi wan dre pasi da heeli zee doro. En nanga bribi dem pikien vo Israel teki da pasi, dem waka hem doro nanga dre foetoe; bikasi na ala toe sei da watra tanapoe gi dem, leki dem ben metsle wan bigi stoon-muur.
We so leki da wolkoe ben drifi go moro na fesi, so srefi dem Egipti-soema ben waka go na fesi toe, tee ala dem hasi vo Farao nanga dem wagi nanga dem soldati doro tee na mindri da watra, sondro dem srefi ben sabi, na so wan plesi dem de. Ma ala disi dem feti so na dem Israel-soema baka, na twee joeroe mamantem Masra Jehova kom poeloe hai gi dem Egipti-soema, a meki dem kom na wan toemoesi broeja-fasi; bika ala dem wagi lasi dem wieli, dem no ben kan go moro fara, en dati meki dem soldati kom skreki vo troe, dem taki, betre dem drai baka teki ron; bika Jehova srefi de helpi dem Israel-soema, dem no kan kisi dem. We da srefi joeroe, disi dem de na da broeja so, Gado meki Moses langa hem han na abra da zee wantron moro, en dati meki da watra hopo baka na bakasei vo da wolkoe, a bigin vo ron tranga tee ala soema vo koning Farao soengoe na ini watra, no wan soema libi abra. Ma na fesisei vo da wolkoe dem pikien vo Israel ben de waka da pasi doro nanga dre foetoe na mindri da watra, tee dem alamal kisi sjoro na abrasei, sondro wan soema ben kisi wan ogri; en dem Egipti-soema skin dem si drifi na tapo da watra, bika da winti ben jagi dem tee na sjorosei.
We di dem pikien vo Israel si da tranga han vo Masra Jehova ageen na so wan verwondroe-fasi, dati meki dem kisi respeki en bribi vo hem en vo hem foetoeboi Moses. En Moses srefi nanga ala dem pikien vo Israel hopo wan singi makandra, dem taki: Meki wi singi Jehova, bika a ben doe wan gran wroko! Ala hasi nanga soldati a teki, hiti na ini watra. Hem da mi helpi, hem da mi tranga, da vo hem wroko mi singi. Meki mi pryze hem, bika hem da mi Gado en da Gado vo mi tata toe! Masra de wan boen winni-man; hem nem da Jehova. Ala wagi nanga ala soldati vo Farao a teki, hiti na ini watra. Ala hem ofciri soengoe na ondro, leki stoon. Ke Masra, da reti han vo joe, a tranga vo troe; da reti han vo joe ben troesoe dem feti-man vo wi na ondro. Da vyanti vo wi taki, hem sa feti na wi baka, kisi wi; hem sa poeloe da hattibron vo hem na wi tapo, meki wi fili hem. Ma wi Masra Jehova! so hesi joe meki joe winti hopo, nomo da floedoe kom tapo dem hesi, en leki lootoe dem alamal soengoe tee na ini da dipi zee. Ke Masra Jehova, no wan Gado de leki joe! Soema kan doe so gran wonder-wroko? Ke Masra, teki dem soema vo joe en helpi wi moro fara, meki wi doro nanga boen! Tjari wi go, en meki wi go liebi na da bergi vo joe, na da plesi, disi joe ben meki vo wan hoso vo joe, na da santa plesi, disi joe hanoe srefi ben meki klari. Jehova sa tan Koning tee vo teego! We da srefi singi Aaron sisa Mirjam nanga ala dem tra oeman teki baka, dem piki dem tra singi-man baka, dem taki: Meki wi singi Jehova, bikasi a bigi vo troe; ala hasi nanga soldati a teki, hiti na ini zoutwatra!
1. We da tori vo da poeloe, disi Masra ben poeloe dem Israel-soema na koning Farao ondro, en fa a ben potti da Paaska-lam gi dem, vo dem no moe vergiti da boen, disi Jehova ben doe dem: dati de meki wi membre da moro bigi verloesoe, disi Masra Jesus ben verloesoe wi zondaar, di a ben poeloe wi alamal na didiebri ondro, en fa a ben potti da santa avondmaal vo wi Kristen-soema, vo wi no vergiti da dede, disi a ben dede vo wi hede.
2. Da Paaska-lam ben de wan teeken vo Kristus srefi, a ben geersi hem na ala fasi. (1. Kor. 5, v. 7.) Bikasi so leki Gado ben taki, da lam no moe habi mankeri na hem skin, so srefi Jesus ben de da krin Gado-lam, disi no ben doe wan ogri, (1. Petr. 1, v. 19.) en disi ben teki ala soema zondoe na hem tapo, tjari gowei. (Joh. 1. v. 29.) So srefi da tem, disi dem ben kili Kristus, dati ben fadom toe reti na Paaska-feest. En so leki Masra ben taki na ouroe-tem, dem no moe broko wan boon vo da lam, so srefi dem no ben habi pasi toe, vo broko wan boon vo Jesus. (Joh. 19, v. 33 tee 36.)
3. Na ouroe-tem Gado ben meki dem Israel-soema teki da broedoe vo da lam, fervi na dem doro-mofo, vo meki da Engel moe pasa dem hoso, te a si da marki. We so srefi da broedoe vo Jesus Kristus moe marki wi hatti toe na inisei, meki wi konsiensi kom krin na Gado hai, dan da ogri kiliman didiebri no habi wan reti moro na wi tapo. (Ebr. 10, v. 22.)
4. Di dem pikien vo Israel ben de na mindri dem bergi so tee dem no si pasi vo komoto go kibri vo dem Egipti-soema, di ben feti kom na dem baka, da joeroe dem ben de na wan bigi verlegi vo troe. Ma tog disi Moses ben hopo hem hai na tapo, a kre dem pina gi Masra, dati meki Gado kom hopo wan pasi gi dem, disi no wan soema ben kan denki, na so wan plesi dem kan pasa. We joe liebi-soema, di joe de nanga hebi toe, disi dem ogri soema de trobi en kwinsi joe na alafasi, joe no ha fesi, joe no ha baka; no lasi hatti, ma hopo joe hai, loekoe na tapo! Masra sa helpi joe, hem da joe fesi, hem da joe baka.
(2. Mos. Kap. 15, v. 22 tee Kap. 18.)
So hesi dem pikien vo Israel ben pasa da redi zee abra, dem kom na wan woestein-plesi, disi dem kali Sur; da kondre ben dre toemoesi, bika santi nanga biribiri soso ben de gro dapee, ma watra vo dringi? dati dem no finni. We di dem ben waka dri dei langa, da watra, disi dem ben tjari nanga dem, kom kaba na ini dem djogo, en da watra vo da plesi, dapee dem ben meki kampoe, dati ben bita so tee dem no kan dringi hem. Da srefi plesi ben nem Mara , vo da bita watra hede; bikasi da woortoe Mara, dati taki so meni, leki wan bita-sani. We di dem pikien vo Israel no kan dringi da watra, dati meki dem kom kroetoe nanga Moses ageen, dem taki: Sani wi sa dringi now? Ma tog di dem kre dasani gi Masra, vo da hede Gado no loekoe na da mandi vo dem, ma a sori Moses wan boom, a taki, meki a teki da hoedoe vo hem, potti na ini da watra; en so hesi Moses doe so, nomo da watra kom switi wantem. We na baka vo da tesi, disi Masra ben tesi da bribi vo dem dapee, a pramisi dem, a taki, efi dem sa harki hem woortoe alatem, en efi dem sa doe hem wani boen-boen, dan hem sa meki no wan vo dem siki kisi dem, di a ben potti na dem Egipti-soema tapo; bikasi Jehova srefi da dem datra.
Na baka di dem komopo na Mara, dem kom na wan plesi, disi dem kali Elim ; da plesi ben habi twalf watra-peti nanga sebitentin palm-boom. We na dapee dem meki kampoe na watra-sei, vo sidom bro pikinso. Di dem komopo baka na Elim, dem kisi wan tra woestein-kondre ageen, disi dem kali Sin ; da plesi ben de hafoe-pasi na mindri vo Elim en vo da bergi Sinai. We da srefi tem ala blom nanga karoe kom kaba, disi dem ben teki nanga dem na pasi; bikasi a ben meki fo wieki kaba, sinsi dem ben libi Egipti-kondre. We vo da hede da heeli gemeente vo Israel kom meki trobi ageen nanga Moses en Aaron, dem taki: Efi wi ben moese dede? betre wi ben dede na Egipti-kondre, dapee wi ben habi switi mofo nanga brede nofo vo njam, leki diaso na so wan woestein-plesi, di oen tjari wi kom, da vo meki da heeli gemeente moe dede nanga hangri soso. We ala disi Moses go kre dasani gi hem Gado, Masra kom piki hem hesi, a seni hem go na dem pikien vo Israel, vo a taki gi dem, di baka-dina srefi dem sa kisi switi mofo vo njam, en dei-broko mamantem hem srefi sa seni brede gi dem, ala dei da brede sa komopo tee na hemel, fadom na gron, leki areen. We ibri mamantem ala soema moe go na sabana go piki so meni brede, leki dem habi vanoodoe vo wan dei, ma di vo siksi dei dem moe piki vo toe dei, vo dem kan kibri hafoe tee tamara.
We di Moses nanga Aaron kali dem pikien vo Israel kom makandra, vo gi dem da boodskopoe vo Masra, dem taki: Di baka-dina oen sa si, a no wi ben poeloe oen na Egipti-kondre, ma Jehova srefi ben poeloe oenoe; en tamara oen sa si da krin glori vo Masra. Bikasi a no nanga wi oen ben kroetoe, ma nanga Masra srefi oen ben kroetoe, en te a sa gi oen switi mofo tidei, nanga brede tamara, dan oen sa si, Gado ben jeri da kroetoe, disi oen ben kroetoe nanga hem. We ala disi da heeli gemeente vo Israel ben de makandra so, na wan bro Jehova kom sori dem da krin glori vo hem na ini da wolkoe, en Masra srefi pramisi dem da switi mofo nanga da brede wantron moro, a taki, nanga dati dem sa si, troe-troe, Jehova hem da dem Gado.
We da srefi baka-dina Masra seni so meni pikin fowloe kom dapee, dem go sidom na gron tee da heeli kampoe lai nanga dem. (A ben de wan speli pikin fowloe, disi bakra kali kwakkelen, dem tan omtrenti leki doifi.) - En vo kisi? a no ben trobi dem pikien vo Israel, vo kisi dem, bikasi dem ben de so foeloe tee, da teki nomo dem ben ha vo teki dem; en vo da leisi dem poeloe da luste boen-boen, disi dem ben luste vo switi mofo. We dei-broko mamantem di dem wieki, dem si da douw rontoe da heeli kampoe vo dem, leki wan bigi smoko; ma so hesi da douw kom saka, dem si da heeli sabana lai nanga wan pikin rontoe-sani, a ben tan leki fini weti groto, en a ben tesi switi, leki boeskoetoe moksi nanga honi. We di dem si dasani lidom so na gron, dem verwondroe vo dati, dem taki: Man hoe? Dati wani taki na dem tongo, net so leki wi haksi: San dati? En da srefi woortoe, disi dem ben haksi: Man hoe, dati dem kali da brede Man, efi Manna. Na baka Moses kom poeloe da tori moro krin gi dem, a taki: Oen si? Dati de da srefi brede, disi Masra ben pramisi oenoe. We meki ibriwan go piki wan porsie vo hem en vo hem famili; ibri mamantem oen moe go teki so meni, vo oen habi nofo vo wan dei. Ma loekoe boen, no wan soema moe libi wansani, kibri hafoe tee tamara. We dem pikien vo Israel doe so, dem go piki da manna, trawan teki foeloe, trawan no teki so meni; ma na baka di dem go marki dem porsie, dem si, dem soema disi ben teki wan bigi porsie, dem no ben habi moro foeloe, leki dem trawan, disi ben teki wan pikin porsie; ma ibriwan ben habi so meni, leki a ben de vanoodoe vo hem. Ma som vo dem no ben harki Moses reti, dem kibri hafoe tee tamara, en dati meki pikin worom go na ini da manna, en da manna pori krin-krin, tee a kom tingi srefi. En Moses hatti kom bron nanga dem, disi dem no ben wani jeri hem; bika a ben taki krin-krin gi dem, dati ibri mamantem dem moe kom piki so meni, leki dem moe habi vo da wan dei, bika na mindri dei, te zon hati, dan da manna ben smelti.
We dati ben go doro so ala dem fosi feifi dei. Ma di vo siksi dei ala dem gran-soema vo Israel kom na Moses, dem verteli hem, taki, di mamantem da manna fadom moro foeloe, leki ala dem tra dei. Moses taki: We a no so Masra ben taki? Oen no sabi, tamara da wi Saba-dei, da dei vo da santa bro vo Masra? We dasani, disi oen wani rosi vo tidei? oen kan rosi; dasani disi oen wani boli? oen kan boli; ma da trawan, disi libi abra, dati oen teki kibri vo tamara, bikasi tamara de da Saba vo Masra, disi no wan manna sa fadom. We dem doe so, leki Moses taki gi dem, en dei-broko dem si, no wan worom kom na ini, en a no ben tingi toe. Ma tog nanga ala dati wan toe dri soema ben go na doro ageen go soekoe na Saba, ma dem no finni noti. En Masra krasi dem vo dati, a taki: Vo san hede oen no kan doe dasani, di mi taki gi oenoe? Oen no si, mi wani gi oen wan dei, vo oen bro? A no vo dati hede mi gi oen brede vo toe dei? We da dei, di meki sebi, ibriwan soema moe tan na hem plesi, dapee a de; no wan soema moe doe wan wroko. Vo sinsi da tem dem pikien vo Israel ben teki da sebi dei alatem, vo dem bro. Na baka Masra taki gi Moses, meki Aaron teki wan porsie vo da manna, potti na ini wan pikin djogo, en te da hoso vo da verbond sa klari, dan dem moe kibri da manna na ini da moro santa plesi, potti na Masra fesi, vo dem pikien vo dem tee vo dem pikien-pikien kan si da hemel-brede, disi dem gran-tata ben njam datem, disi dem ben de na pasi. We da srefi manna dem pikien vo Israel ben njam ala dem fotentin jari doro, so langa tee dem kisi da marki efi da grensi vo Kanaan-kondre, dapee dem ben go liebi.
We di dem komopo na Sin, dem meki kampoe na Rafidim , da wan plesi klosibei na da bergi Horeb; bikasi so leki da wolkoe vo Masra ben sori dem pasi, da so dem ben de waka alatem. Ma di dem no finni watra dedapee, dem kom kroetoe nanga Moses ageen tee dem meki trobi nanga hem, dem taki: Gi wi watra, vo wi dringi! Moses taki: We san dati, disi nanga mi oen kroetoe? Oen no de bribi na Masra moro? Ma di dem no ben habi watra kweti-kweti vo dringi, vo da hede da drewatra kom moro dem alamal so, dati dem no membre Masra moro, ma nanga Moses wawan dem mandi, dem taki: San dati, disi joe poeloe wi na Egipti-kondre, meki wi nanga wi pikien nanga ala wi meti moese dede dia? We dati meki Moses srefi kom na wan bigi verlegi, tee a kre dasani gi hem Gado, a taki: San mi sa doe nanga so wan hipi soema? Pikin-moro dem wani kili mi nanga stoon. Masra taki: We libi ala soema diaso, en teki joe tiki na joe han, nanga wan toe dri gran-soema vo Israel, waka go na fesi tee na da bergi Horeb. Na dapee joe sa si mi tanapoe na wan bigi stoon tapo, en joe sa teki joe tiki, naki da stoon; en so hesi joe naki hem, nomo a sa poeloe so meni watra, tee ala soema kan dringi nofo. We Moses doe so, a teki dem gran-soema, a go na da plesi, di Masra ben sori hem, en na dem hai srefi a teki hem wonder-tiki, naki na da stoon; en nanga da fosi naki nomo da stoon kom pliti, a poeloe so meni watra, tee wan bigi kriki srefi komopo na ini da stoon mofo; en da wan kriki kom platie na pikin-pikin gotro, bika da watra soekoe pasi vo ron na ala plesi. En di dem gotro go panja da heeli woestein doro, dati meki ala soema nanga meti ben kisi watra nofo vo dringi, en dem dre sabana srefi ben kom so mooi toe, tee ala dem foeloe kow nanga skapoe ben finni grasi nofo vo njam. We da srefi plesi Moses kali Massa nanga Meriba , dati taki: Tesi nanga trobi , vo disi dem pikien vo Israel ben meki trobi dapee, en vo disi dem ben tesi Masra, dem ben taki: Meki wi si, efi Masra de nanga wi, efi somtem a no de nanga wi.
Ma da srefi dei, bifo Masra ben meki da watra ron komoto na ini vo da stoon, dem Amalekitri-soema ben kom feti na dem Israel-soema baka, dem kili ala dem ouroe zwaki soema, disi ben waka tee na bakasei, bikasi da drewatra ben moro dem, tee dem ben weri vo troe, dem no ben man vo helpi dem srefi. We so hesi Gado ben gi dem watra, di dem ala ben dringi nofo, nomo Moses kali hem gran ofciri Josua kom, a taki gi hem: Go teki ala dem bigi mansoema vo wi, go feti nanga dem Amalekitri. Dei-broko mi sa klim go tee na tapo da bergi, mi sa teki da tiki vo Gado, holi na mi hanoe. We Josua doe so, leki Moses taki gi hem, a go feti nanga dem Amalekitri; ma Moses nanga Aaron nanga Hur dem klim go tee na tapo da bergi. We so langa Moses ben holi hem han na tapo, sori dem da tiki, a no ben trobi dem Israel-soema kweti-kweti vo winni dem Amalekitri; ma so hesi Moses saka hem han pikinso nomo dem Amalekitri kom winni dem Israel-soema. Ma bakatem di dem hanoe vo Moses kom weri, tee a no kan holi moro, Aaron nanga Hur, di ben de nanga hem, dem teki wan stoon, meki Moses go sidom na hem tapo; en dan dem helpi hem ibriwan holi wan han vo hem, meki a kan holi dem styfi, tee zon go na ondro. We nanga dati Josua winni dem Amalekitri krin-krin, a kili dem alamal. En Masra taki gi Moses, meki a teki hem dei-boekoe, skrifi da tori na ini, vo dem Israel-soema no vergiti da feti, disi Gado ben helpi dem, vo feti nanga dem ogri soema, tee dem winni dem. So srefi Masra taki gi Moses, meki a gi Josua kenisi, dati hem sa poeloe dem soema vo Amalek krin-krin na grontapo, vo di dem ben kili so meni Israel-soema, sondro dem ben doe dem wan ogri; vo ogri-hatti soso dem ben fadom na dem tapo, kili dem. - We fohondro jari moro na baka dem soema vo Amalek-kondre kisi da strafoe reti so, leki Gado ben floekoe dem.
Da srefi tem, disi Moses ben doro tee na da bergi Horeb, hem wefi tata Jetro na Midian-kondre kisi njoesoe vo ala dasani, disi Gado ben doe nanga Moses en nanga dem tra Israel-soema, en fa Gado ben poeloe dem na Egipti-kondre. We dati meki Jetro teki hem pikien Zipora, Moses wefi, di a ben seni gowei baka tra jari, nanga dem toe pikien vo Moses, Gerson nanga Elieser, a teki pasi go loekoe hem tee na da woestein kondre, dapee Moses nanga dem pikien vo Israel ben meki kampoe na sei da bigi bergi vo Gado. We di Jetro no ben de farawei moro, a seni wan boodskopoe go na Moses vo meki a sabi, hem nanga Zipora nanga dem toe pikien vo hem de na pasi de kom. En so hesi Moses kisi da njoesoe, wantem a go miti dem hafoe-pasi, a bosi dem, a haksi dem, fa dem ben tan ala da tem, sinsi hem libi dem; en dem haksi hem toe, fa hem ben tan alatem, en dan a teki dem, tjari go na ini hem tenti. Na baka Moses go sidom nanga hem wefi tata, a verteli hem ala dem tori, fa Masra ben strafoe Farao nanga dem tra Egipti-soema vo dem Israel-soema hede, en fa Gado ben poeloe dem na so meni ogri, disi ben miti dem na pasi. We di Jetro jeri ala dem tori so na Moses mofo, da heiden-domine kom verwondroe vo troe, tee hem srefi hatti fili wan plisiri vo dati, a taki: Gran-tangi vo Jehova, disi a ben helpi oen so fara, vo a poeloe oen alamal na dem Egipti-soema en na koning Farao ondro. Now mi srefi si, troe-troe Jehova bigi, moro leki ala dem tra soso Gado. Na baka Jetro teki wan meti, a kili hem vo wan ofrandi gi Jehova; hafoe a potti na da altari tapo, disi Moses ben hopo dedapee, en hafoe a teki vo meki wan trakteri gi hem famili, a meki Aaron nanga ala dem tra gran-soema vo Israel toe kom njam nanga hem na Jehova fesi.
Dei-broko mamantem Moses go sidom na hem wroko, a meki ala dem soema kom na hem fesi, disi ben habi wan trobi makandra, vo a kan koti da kroetoe vo dem, so leki fa a ben njoesoe vo doe ala-dei. Ma da srefi dei soema ben kom foeloe toemoesi, disi ben habi vo taki nanga hem, en alwasi Moses ben bigin froekoe mamantem, vo kroetoe dem soema, tog a no ben man kaba bifo neti; so foeloe soema ben de. We di hem wefi tata Jetro si ala da wroko so, disi Moses habi vo doe nanga dem soema, a haksi Moses, a taki: Vo san hede joe wawan moe sidom trobi joe srefi nanga so meni soema? Bika mi si, dem no gi joe bro da heeli dei tee sabatem srefi. Moses taki: Dem de kom na mi, vo mi haksi Jehova wan rai gi dem. Bika alatem te dem habi wan taki efi wan trobi makandra, da na mi dem moe kom, vo mi koti da kroetoe vo dem; so srefi mi wawan de da soema toe, disi moe leri dem da wet vo Gado. Jetro taki: Ma da wroko hebi toemoesi vo joe wawan; joe sa weri joe srefi nanga dem soema vo soso, joe no sa man vo doro da wroko. We jere mi, mi sa gi joe wan boen rai. Joe moe loekoe wan toe dri boen soema, disi joe kan potti vo gran-masra na dem trawan tapo, vo dem helpi joe na ini da wroko vo tiri kondre; ma dem moe de betrouw soema, disi frede Gado, en disi habi wan boen nem na ala tra soema. Nanga ala dem pikin-pikin sani, disi pasa, no wan soema moe kom trobi joe moro, ma meki dem go na dem tra gran-masra, meki dem soekoe dati. Ma efi wan bigi sani de, disi dem trawan no sabi, dan dem kan kom na joe, vo joe skiki dati. Bikasi joe moe tan na da wroko, vo leri dem alasani, disi dem moe doe, en vo sori dem da pasi, di dem moe waka; so srefi joe moe tan leki da boodskopoe-man vo dem, disi kan haksi Gado gi dem. Efi joe doe so, dati sa helpi joe foeloe, a sa meki joe finni tem, vo joe kan loekoe joe granman-wroko moro betre, leki noja.
We Moses doe so, leki Jetro rai hem, a kali ala soema kom makandra wantem, a taki gi dem, hem no kan loekoe dem moro, hem wawan, bikasi dem kom so foeloe noja, dati da wroko kom moro hem, en nanga Gado blesi dem sa kom moro foeloe jete, tee dem tron wan bigi kondre; we vo da hede hem sa loekoe wan toe dri boen soema, disi bekwaam, vo helpi hem na da wroko. En wantem Moses teki so meni soema, leki a ben denki a sa boen, a potti dem vo hedeman na ala dem trawan tapo, en a vermane dem boen-boen, a taki, te dem sidom vo kroetoe soema, dan dem no moe teki sjem vo gran-soema en vo goedoeman, gi dem reti, efi dem no habi reti; en dem no moe veragti dem laage soema toe, gi dem kroekoetoe, efi dem no habi kroekoetoe; ma dem moe meki ala kroetoe waka reti, bikasi Jehova srefi de da reti gran-masra vo kroetoe. Ma te wansani de, disi dangra dem, dati dem no sabi, san vo doe, dan dem moe kom na hem, kom haksi hem.
Na baka Jetro taki Moses adjosi, a drai baka go na hem kondre.
1. We te wi jeri da tori, fa Masra ben meki so meni doezend soema finni brede nanga switi mofo vo njam, nanga watra vo dringi, tee dem alamal ben habi nofo, en dati na so wan soso biribiri-plesi srefi, dan wi moe taki, troe-troe da wan bigi wonder-wroko vo troe. Ma te wi si, fa tee tidei jete Masra Gado de loekoe so meni doezend doezend soema nanga meti na heeli grontapo, a bezorgoe dem njanjam nanga dringi ala dei, dan wi moe bekenti so srefi toe, da wan bigi wonder-wroko vo troe.
2. Disi Masra ben meki na Saba-dei no wan manna ben fadom, ma di vo siksi dem ben kisi hem doblo vo toe dei, we nanga dati Masra de sori wi, efi wan soema de wroko boen ala dem siksi dei doro, efi a no lezi, dan a sa finni hem njanjam na zondei toe, alwasi a no go na wroko. Ma dem soema, disi de soekoe vo wroko moni na zondei, na plesi vo dem go na kerki, dem no potti dem vertrouw na Masra, en vo da hede so wan wroko no habi Gado blesi; da moni, disi dem verdini na zondei, dati kom smelti na dem hanoe.
3. Da so wi kan si toe na dem toe dri Israel-soema disi ben habi bigi hai, en disi ben piki so meni manna, vo dem kan kibri hafoe vo tamara, bikasi dati no ben helpi dem, da manna ben pori wantem. We vo dati hede wi Masra Jesus vermane wi, a taki, wi no moe zorgoe vo tamara. (Matt. 6, v. 34.) Bikasi da soso-goedoe vo disi grontapo, da vo tidei nomo, somtem tamara wi kan lasi hem kaba; ma da goedoe vo hemel, dati tan tee vo teego.
4. Da tem disi Masra Jesus ben de na grontapo, a ben teki dem ouroe-tem-tori toe, a taki gi dem djoe: Oen no sabi? dem gran avoo vo oenoe ben njam manna? ma dede? dem alamal ben dede. We mi srefi de da reti hemel-brede, disi de gi ala soema Gado-liebi. (Joh. 6, v. 49 tee 51.) En Apostel Paulus ben teki da tori toe, vo da stoon, disi Moses ben poeloe da watra na ini, a taki: Da srefi stoon, dati da Kristus. (1. Kor. 10, v.4.)
5. Ala disi dem soema vo Amalek ben de feti nanga dem pikien vo Israel, Moses ben holi hem hanoe styfi, tee dem Israel-soema winni da feti krin-krin. We so srefi a fiti wi Kristen-soema toe, vo wi hopo wi hanoe ala-dei, en vo wi begi Masra nanga pasiensi, meki hem kondre moe hopo moro-moro na grontapo, tee ala wroko vo didiebri kom pori krin-krin.
(2. Mos. Kap. 31.)
Datem disi dem pikien vo Israel ben doro na ini da woestein kondre, disi dem kali Sinai, dem ben de toe moen langa na pasi kaba, a ben go boen-boen na ini dri moen, vo sinsi dem ben libi Egipti-kondre. Reti mindri vo da woestein wan hei bergi ben de, disi dem lobbi kali da bergi vo Gado. En da srefi bergi ben habi toe hede, wan dem kali Horeb, da trawan dem kali Sinai. We klosibei na da srefi bergi dem pikien vo Israel meki kampoe, dem hopo dem tenti en dem jagi dem meti go na sabana go njam; bikasi Masra ben wani, dem moe tan langa na da plesi. En Moses klim go na da bergi tapo, go miti Gado hafoe-pasi. Ma Masra srefi ben de na tapo da bergi kaba, a kali Moses, a taki: Go na dem pi-kien vo Israel, taki gi dem: So Masra taki: Oen srefi ben si, fa mi ben doe dem Egipti-soema, en fa mi ben tjari oen so boen, leki wan mama de tjari hem pikien. We efi oen sa harki mi tongo, en efi oen sa holi da verbond vo mi, dan mi sa teki oen vo wan eigen kondre vo mi srefi. A troe, heeli grontapo da vo mi, ma oenoe mi wani teki na wan aparti fasi, vo oen alamal tan leki wan heeli domine-famili, en vo oen tron wan santa kondre vo mi. Go taki dem woortoe disi gi dem!
We di Moses kom gi dem da boodskopoe vo Masra, dem alamal makandra piki hem wanfasi, dem taki: A boen so, alasani disi Masra taki, wi sa doe; en nanga da antwoortoe Moses go baka na Masra. Na baka Gado taki gi Moses, meki a go baka na dem pikien vo Israel, taki gi dem, dem moe meki dem srefi klari tidei nanga tamara, dem moe wasi dem klosi, en nanga begi dem moe holi dem srefi krin tee vo tamara; bikasi tra-tamara Jehova srefi sa saka kom tee na da bergi Sinai tapo, meki ala soema hai si hem. So srefi Masra taki gi Moses, a moe meki wan trariki rontoe da bergi, leki wan pen, vo no wan soema habi hatti, vo klim go na tapo, en fassi? dem no moe fassi da bergi, dem no moe kom klosibei srefi; bikasi disoema, disi meli hem, efi da wan liebi-soema, efi da wan meti, dede a sa dede. Ma so hesi oen jeri da trompeti bari, nomo dem alamal moe drifi kom klosibei na da trariki.
We nanga da boodskopoe Moses komoto ageen na tapo da bergi, a go baka na dem Israel soema, en a meki dem krin dem srefi boen-boen ala dem toe dei, so leki Masra ben taki.
Ma di vo dri dei -- a ben pasa reti vyftig dei na baka, vo sinsi dem ben libi Egipti-kondre, -- na moesoe-dei mamantem wan bigi onweri hopo nanga toemoesi tranga dondro, bikasi dem wolkoe ben blaka na tapo da bergi tee da faja ben koti doro; so srefi dem jeri wan tongo vo wan bigi trompeti, da trompeti ben bari so tranga, tee ala soema na ini da heeli kampoe kom skreki pasa-marki vo da bari vo da trompeti en vo da onweri hede. En Moses srefi kom skreki toe, tee ala hem skin befi, bikasi a ben de wan skreki-sani vo troe, vo si. We da srefi momenti, disi Gado ben gi da sein so nanga da trompeti, nomo Moses teki dem pikien vo Israel, a tjari dem go miti Gado, meki dem alamal tanapoe na ondrosei na da bergi foetoe. En Jehova srefi saka kom na ondro na ini wan bigi faja tee da heeli bergi ben tapo nanga smoko, en a befi tranga toe; en ibri momenti da dondro nanga da trompeti kom bari moro tranga. We ala dati Masra kali Moses kom na hem, a taki, meki a go waarskouwe dem Israel-soema wantron moro, vo no wan soso soema moe proberi vo kom na tapo da bergi kom loekoe; bika disoema, disi sa habi hatti vo doe so, Masra sa masi dem wantem. Ma dem domine, te Masra sa kali dem, vo kom pikin-moro klosibei na hem, dan dem moe krin dem srefi fosi, vo dem no kisi wan ogri.
We di Moses kaba da boodskopoe, Masra no meki a kom baka tee na tapo, ma a taki, meki hem nanga hem brara Aaron kom na hem hafoe-pasi, meki dem tanapoe reti na mindri vo Gado en vo dem tra Israel-soema, vo Moses kan teki ala dem woortoe vo Masra abra, tjari gi dem soema baka; bikasi dem ben frede da faja, en dati meki dem no kom so klosibei na da bergi, vo dem trawan na bakasei kan jeri ala dem woortoe krin.
We na baka Masra Jehova, so leki a ben de na ini da faja na tapo da bergi, a bigin leri dem, a taki:
We dem tin gebod disi, dati da dem woortoe, disi Masra ben taki nanga tranga tongo gi da heeli gemeente vo Israel, ala di a ben de na tapo da bergi, na ini da faja en na ini da onweri. Moro a no taki.
Ma so hesi Jehova kaba vo taki, nomo dem si da bliksem baka, en da dondro nanga da trompeti bigin baka vo bari so tranga ageen, tee ala dem Israel-soema, di dem si da faja nanga da smoko so, dem ron komoto dapee, dem go tanapoe farawei. En ala dem gran-soema kom makandra na Moses, dem taki: Ke fa Masra Jehova sori wi da glori en da majesteiti-fasi vo hem tidei! Wi ben jeri hem tongo na ini da faja. Tidei Gado ben taki nanga wi liebi-soema, en tog wi no dede. Ma efi wi moe jeri da tongo vo Jehova, wi Gado, wantron moro so, wi alamal sa dede; bikasi fa liebi-soema sa man vo holi, te Gado srefi taki nanga dem na ini so wan faja! Betre joe go na Gado, begi gi wi, vo wi no moe jeri hem tongo moro. Meki a taki nanga joe, dan joe kan taki gi wi, san a wani leri wi; en alasani, disi Jehova, wi Gado, sa taki gi joe, dati wi sa teki, wi sa doe. Moses taki: No no, oen no moe frede; bikasi disi Gado kom na so wan fasi, dati a no vo da faja moe kili oenoe, ma vo a naki oen hatti, en vo a meki oen frede hem, vo oen membre da faja alatem, vo oen no doe ogri.
Na baka Moses klim go moro na tapo tee na ini da blaka wolkoe, dapee Gado ben de na ini, a tjari da boodskopoe go na Masra, disi dem gran-soema vo Israel ben gi hem. Masra taki: We, a boen, mi srefi ben jeri ala dem woortoe, disi dem taki nanga joe. Da taki vo dem de boen. Ma mi wensi, dem hatti moe krin toe, vo dem frede mi, en vo dem doe ala mi gebod, vo mi kan doe dem boen, dem nanga dem pikien tee vo teego! -- We go taki gi dem, meki dem go baka na dem kampoe, en waarskouwe dem, vo dem no teki kroekoe-toe-gado moksi nanga mi, dem no moe meki wansani, no vo silver, no vo goutoe, noti dem moe meki. Ma joe teki doti, meki wan altar gi mi, potti joe skapoe nanga joe kow na tapo, bron dem vo wan ofrandi, en taki mi tangi. Na baka mi srefi sa sori joe da plesi, dapee mi wani, mi nem moe hopo; en na dapee mi sa kom na joe kom blesi joe.
Ma bifo joe go meki da altari, mi sa gi joe ala dem tra wet vo kondre toe, di joe moe leri dem, vo dem sabi, fa dem moe liebi na da kondre, disi mi sa gi dem.
We te wan soema naki wan trawan, tee a dede, da soema moe dede baka. Ma efi da soema no ben soekoe hem expresi, vo a kili hem, somtem a misi hanoe soso, dan mi sa sori joe wan plesi, dapee a moe go kibri. Ma efi wan soema ogri so, tee expresi a soekoe wan trawan vo kili hem, so wan soema joe moe poeloe na mi altari, kili hem baka. -- So srefi efi wan soema naki hem tata efi hem mama, a moe dede toe. -- Da soema, disi foefoeroe wan tra soema, seli hem, a moe dede; en wan soema, disi floekoe hem tata efi hem mama, a moe dede toe. Te wan soema meki wan horo, kaba a no tapo hem baka, en wan tra soema kow efi hasi fadom na ini da horo, tee a dede na ini, dan da soema moe pai da trawan da meti, so meni leki a ben waarti.
Te wan kow boekoe wan tra soema kow, tee da meti dede, dan dem moe teki da liebiwan, seli hem, en da moni dem moe platie, meki ala toe soema kisi hafoe.
Te wan soema foefoeroe wan kow efi wan skapoe, efi da vo kili, efi da vo seli, da soema moe pai feifi kow baka vo wan kow, en fo skapoe vo wan skapoe. Te wan foefoeroe-man broko wan soema hoso na neti, en wan soema kisi hem, a kili hem, so wan soema dem no moe kili baka; ma efi dasani pasa na mindri-dei, dan dem moe kili hem baka. Wan foefoeroe-man moe gi alasani doblo baka, disi a ben foefoeroe; ma efi a no habi, dan dem kan teki hem srefi, seli hem vo slavoe.
Wan vreemde soema oen no moe trobi, oen no moe pina hem, bikasi oen srefi toe ben de vreemde soema na Egipti-kondre. Dem weduwe nanga dem pikien, disi no habi tata en mama, oen no moe doe ogri; wan soema, disi doe dem ogri, mi sa pai hem baka. Dem gran-soema vo kondre oen moe respeki; bikasi Gado srefi potti dem, vo loekoe kondre. Ma dem moe loekoe boen, vo ala kroetoe waka reti, en vo dem no teki presenti na dem goedoeman, en gi dem potiman kroekoetoe.
So srefi Masra gi Moses foeloe tra vermane moro vo dem feesti-dei en vo ala dem sosani moro. En na baka a seni Moses go na ondro go taki ala dem tori gi dem pikien vo Israel, en dem alamal makandra pramisi Moses, dem taki, ala dasani disi Masra ben taki gi hem, dem sa doe. -- Ma Moses teki wan boekoe, a skrifi ala dem woortoe vo Masra na ini. En dei-broko mamantem a go meki da altari na ondrosei vo da bergi, en dan a teki twalf stoon, so meni leki Jakob ben habi pikien, a potti dem tanapoe na da altari sei. Na baka a teki som jonkman vo dem twalf famili vo Israel, a meki dem kili dem kow, potti dem na da altari tapo, bron dem vo wan ofrandi, vo taki Masra tangi. Ma da broedoe, dati Moses teki, a hiti hafoe na tapo da altari, en da tra hafoe a kibri na ini toe bekki. Na baka a teki da boekoe, disi a ben skrifi ala dem woortoe vo Masra na ini, a lesi hem duideliki na ala soema jesi, en dem pramisi hem wantron moro, dem taki, alasani disi Masra ben taki, dem sa doe, dem sa harki hem. En dan Moses teki da broedoe na ini dem bekki, a nati da boekoe nanga hem, nanga ala dem soema toe, a taki: Oen si? dati de da broedoe vo da verbond, disi Jehova de meki nanga oenoe na ala dem woortoe tapo!
Na baka Moses teki hem brara Aaron nanga dem toe pikien vo Aaron, Nadab nanga Abihu, nanga sebitentin gran-soema moro, dem alamal klim go na da bergi tapo, en na dapee dem kom si da Gado vo Israel, no na so wan skreki-fasi na ini faja, ma na wan toemoesi switi-fasi, en dati gi dem so wan kouroe hatti, tee dem alamal go sidom ruste de njam. Na baka Gado kali Moses kom moro klosibei na hem, en Moses teki hem ofeiri Josua, a go moro na hoposei. Ma Aaron nanga Hur nanga dem tra gran-soema a seni gowei baka, go taki gi dem pikien vo Israel, fa dem ben si Jehova so switi na dem hai; en na Aaron a taki, meki hem loekoe hem wroko so langa, tee hem srefi kom baka. We di Moses kom moro na hoposei, a si wan krin wolkoe ageen na hem fesi, en na ini da wolkoe a go, a tan dapee nanga Masra fotentin dei nanga fotentin neti, sondro a ben njam wansani. En Masra taki foeloe tori gi Moses vo da santa hoso, disi hem wani, dem pikien vo Israel moe meki gi hem, vo hem liebi na dem mindri; en a sori hem wan model toe, fa dem moe wroko da hoso na inisei en na dorosei, en fa dem domine moe doe dem diensti na kerki, en ala sosani moro.
We di Masra kaba ala dem tori nanga Moses na tapo da bergi Sinai, na baka Gado teki toe stoon-lei, en nanga hem eigen finga a skrifi dem tin gebod na ini, a gi dem abra na Moses vo kibri dem vo wan bewysi gi dem Israel-soema.
Ma da moro bigi gebod vo ala dem gebod vo Gado, dati taki so: Joe moe lobbi Gado, joe Masra, nanga joe heeli hatti, nanga joe heeli ziel, nanga ala joe membre en nanga ala joe tranga! Dati de da moro bigi gebod. Ma da trawan, dati de geersi hem toe: Joe moe lobbi ala tra soema so, leki joe lobbi joe srefi. (Matt. 22, v. 37-39.) We da soema, disi sa doe ala dem gebod en dem wet vo Masra, nanga dati a sa finni liebi. (3. Mose 18, v. 5.) Ma heloe vo da soema, disi no doe ala dem woortoe vo da wet boen-boen! En ala soema moe taki: Amen! (Da so a moe de!) (5. Mose 27, v. 26.)
1. We te wi jeri da tori so, fa Jehova ben gi dem da wet, dan wi kom membre, fa datem, disi Gado ben meki liebi-soema, a ben gi dem so wan hatti kaba, vo dem srefi kan sabi, san dem moese doe, en san dem no moese doe. We disi na bakatem a gi wi dem gebod jete, dati a ben doe nomo, vo a meki wi kom sabi alasani moro krin, en vo no wan soema kan taki, hem no ben sabi moro betre.
2. Da wet vo Gado de sori wi da zondoe. (Rom. 3, v. 20.) Bikasi efi wi onderzoekoe wi srefi hatti nanga ala wi maniri, dan da wet de sori wi, fa wi alamal ben pasa Gado mofo, en fa wi no waarti na Gado hai, wi no fiti hem kondre. We da so da wet moe tan leki wan basja na wi tapo, a moe jagi wi go na Masra Jesus Kristus, vo wi soekoe helpi na hem. (Gal. 3, v. 24.)
3. Disi Masra Gado ben gi wi da wet, a ben gi wi hem vo wi liebi. Ma di no wan soema kan holi hem so boen, leki a fiti, dati meki wi alamal ben moe go na bigi strafoe, efi wi lobbi Helpiman Jesus Kristus no ben kom poeloe da strafoe en da floekoe vo Gado na wi tapo nanga dati, disi hem srefi ben teki da floekoe na hem tapo, (Gal. 3. v 13.) en disi hem ben holi da wet na plesi vo wi.
4. Na ouroe-tem te wan soema ben pasa da wet, kaba wan toe dri getuige ben de, disi ben sabi troe-troe, da soema doe da ogri, so wan soema ben moese dede sondro pardon. We vo da hede apostel Paulus vermane dem bribi-soema tranga, a taki: Hoefasi? Wan soema, disi trapoe da pikien vo Gado nanga foetoe, en disi de teli da broedoe vo da verbond vo wan soso-sani, en disi de kosi da Santa Jeje vo Gado, fa oen membre? so wan soema no fiti wan moro ogri strafoe srefi? (Ebr. 10, v. 28 & 29.)
(2. Mos. Kap. 34.)
Disi Moses nanga Josua ben tan pikin langa na tapo da bergi, pikin-moro a ben meki siksi wieki, sinsi dem pikien vo Israel no ben si hem moro, we dati meki dem kom frede, dem taki, somtem Moses dede, ofoe wan tra ogri miti hem. En wan dei dem meki wan komploto makandra, dem alamal go na Aaron, dem taki gi hem: Kom go, meki tra gado gi wi, di kan waka go na wi fesi; bikasi wi no sabi, hoepee da soema tan so langa, da Moses, di ben poeloe wi na Egipti-kondre; somtem wansani kom hem abra. Aaron taki: We efi oen wani so, dan oen moe poeloe ala dem goutoe ringa, disi dem oeman nanga dem pikien vo oenoe de weri na dem jesi, tjari kom gi mi! We so leki Aaron taki dati, dem alamal go wantem, poeloe dem goutoe ringa na dem jesi, tjari kom gi Aaron. En Aaron teki ala da goutoe makandra, a meki wan model, efi wan vorm, a smelti da goutoe, hiti na ini da vorm, meki a tron wan pikin-kow, so leki dem pikien vo Israel ben si dem kroekoetoe-gado alatem na dem Egipti-soema temple. We so hesi Aaron ben klari nanga da pikin-kow, nomo dem alamal bari, taki: Joe si? Israel! dati da joe Gado, disi ben poeloe joe na Egipti-kondre! Na baka Aaron meki wan altari, en dan a seni soema go bari na ini da kampoe, taki, tamara dem sa holi wan feesti-dei gi Jehova! Bikasi Aaron no ben wani, dem moe anbegi da pikin-kow, leki Gado srefi, ma hem ben membre, dem moe teki hem, leki wan printje vo Jehova. Ma dem tra soso Israel-soema no ben begreipi hem reti, dem teki dati heeli verkeerti, en dei-broko mamantem ibriwan tjari wan njanjam kom gi da kroekoetoe-gado, en dem plisiri vo da wroko, disi dem srefi han ben meki. (Aposteltori 7, v. 41.) Na baka dem alamal go sidom, dem njam en dem dringi na heiden-fasi; en di dem kaba nanga dati, dem bigin vo dansi toe gi da kow, vo sori da njoe gado respeki. We dati ben pasa na da srefi dei, disi Jehova ben gi Moses dem toe stoon-lei, en vo da hede Masra seni hem hesi go na ondro, a taki: Saka hesi go na dem soema, di joe ben poeloe na Egipti-kondre, bikasi dem bigin wan takroe wroko. Dem poeloe dem foetoe hesi baka na da pasi, di mi ben sori dem; dem meki wan goutoe kow, potti njanjam gi hem, en da so dem dini hem na alafasi, dem taki, dati de da Gado, disi ben poeloe dem na Egipti-kondre. We mi si, dem soema vo Israel da wan kondre, disi habi toemoesi tranga hede, dem meki mi hatti kom bron nanga dem, tee mi sa poeloe dem krin-krin na grontapo. Ma joe famili mi sa teki, mi sa blesi dem pikien-pikien vo joe, tee dem tron wan bigi kondre, moro bigi srefi, leki disia.
Ma Moses begi Masra tranga en nanga wan toemoesi sari-fasi, a taki: Ke mi Masra Jehova, gran-tangi! No meki joe hatti bron so nanga dem soema, di joe srefi ben poeloe na Egipti- kondre! San dem Egipti-soema sa taki dan, te dem jeri so? Dem no sa meki spotoe, taki, joe ben poeloe dem Israel-soema na Egipti-kondre, vo strafoe dem soso, en vo joe kili dem? We Masra, gran-tangi! no doe so, leki joe taki! Ma membre dasani, disi joe ben pramisi joe foetoeboi Abraham nanga Isaak nanga Jakob vo da kondre, disi joe sa gi dem, vo dem famili liebi dapee tee vo teego! We disi Moses begi Masra so switi vo dem Israel-soema, dati meki Gado teki da begi boen, a taki, hem sa saka da strafoe hafoe gi dem. En nanga da woortoe Moses libi Masra, a saka go na ondro; en dem toe stoon-lei, disi Gado srefi ben skrifi hem wet na ini, dati Moses ben holi na hem hanoe, tjari go nanga hem; dem ben skrifi na ala toe sei.
We disi dem saka hafoe-pasi, Josua taki gi Moses: Mi jeri wan bigi babari, a tan leki dem de feti na ini kampoe. Ma Moses taki: No no, a no wan feti-babari dati, ma na mi jesi a tan, leki mi jeri wan dansi-singi. We ala dati dem kisi tee na ondrosei na da bergi foetoe, en so hesi Moses kom si da pikin-kow na ini da kampoe na tapo wan postoe, nanga da dansi vo dem Israel-soema, nomo hem hatti kom bron nanga dem, tee a teki dem toe stoon-lei, di ben de na hem hanoe, a broko dem na ala dem soema fesi. Na baka a go teki da pikin-kow, di dem ben meki, a hiti hem na ini faja, meki a smelti baka, en dan a teki da piesi goutoe, a fom hem tee a tron leki fini santi, leki wan geeli poeiri, en da poeiri a teki, hiti na ini da watra, disi dem pikien vo Israel ben moe dringi ala dei. Na baka Moses meki trobi nanga hem brara Aaron, a gi hem wan tranga verwyti, a taki: Fa joe tjari so wan zondoe-strafoe kom na dem soema tapo! Ma Aaron begi hem, a taki: Ke mi Masra, no meki joe hatti bron so nanga mi! Tog joe srefi sabi dem soema, fa dem ogri. Bika dem alamal kom na mi, dem taki, meki mi meki wan gado gi dem, di kan waka go na dem fesi; bika dem no sabi, san ben kom joe abra. We dati wawan ben meki mi doe so, mi no ben kan helpi. Ma alwasi Aaron taki so, hem no kan helpi, tog Masra Jehova hatti srefi ben bron toe-moesi nanga hem, tee vo a ben wani kili hem, en a ben sa kili hem troe-troe, efi Moses no ben begi vo hem. (5. Mose 9, v. 20.)
Na baka Moses go tanapoe na fesi vo da kampoe-doro, a bari, taki: Ala soema, disi de vo Jehova troe-troe, meki dem kom na mi dia! En wantem ala mansoema vo Levi famili kom na hem dapee, bikasi dem no ben moksi na ini da kroekoe-toe-gado-wroko. En Moses komanderi dem na nem vo Jehova, a taki, meki ibriwan teki hem houroe, en meki dem waka da heeli kampoe doro, kili ala dem soema, disi ben de na ini da afgodry-wroko leki apostroe, en disi ben kori so meni trawan, vo dini da kow; a taki, dem no moe loekoe na brara efi na famili efi na mati, ma ibiriwan soema, disi dem finni a ben de na ini, dem moe kili hem wantem. We dem soema vo Levi doe so, leki Moses taki gi dem, en da srefi dei dem kili dri doezend soema vo Israel. Bifo dasani disi pasa, alatem dem fosi manpikien vo dem famili ben habi da wroko vo meki ofrandi, ma now Masra teki da heeli famili vo Levi, meki dem wawan doe ala domine-wroko na kerki. Dei-broko Moses kali ala soema makandra kom na hem, en a krasi dem vo da ogri, di dem doe; ma di dem kom sori pikin fili noja, a tan leki da ogri hati dem, dati meki a pramisi dem, taki, hem sa go begi Masra pardon gi dem. En sondro Masra ben kali hem, Moses drai baka wantem, a go wantron moro na Masra, kre da zondoe gi hem, a taki: Ke mi Masra vo mi, mi no kan stry, dem soema doe wan bigi ogri vo troe, dem meki wan goutoe kow vo dem gado. Ma mi Masra, gran-tangi! mi begi joe, efi joe plisi, pardon dem vo da zondoe disi-tron wawan! Ma efi joe no kan, betre joe poeloe mi nem toe na joe boekoe, meki mi dede toe, leki ala dem trawan! Masra taki: No no, mi no sa poeloe joe, mi sa poeloe da soema, disi doe mi ogri. We go mara, teki dem soema, en tjari dem go na da kondre, disi mi ben taki gi joe. Mi sa meki wan Engel vo mi waka go na joe fesi, ma mi srefi no sa go nanga oen moro. En te da tem kisi, vo mi strafoe dem vo dem zondoe, mi sa sabi, vo finni dem. We di Moses kom piki dem Israel-soema baka, en di dem jeri so wan taki vo Masra, dati meki dem alamal kom na wan bigi sari, tee no wan soema habi plisiri, vo weri wan mooi klosi moro.
Na baka Masra taki gi Moses, efi dem sa saka dem srefi boen-boen gi hem, dan hem no sa libi dem so krin-krin; meki Moses go hopo da santa verbond-hoso vo Masra, no na ini kampoe srefi, ma meki a potti hem farawei na sabana-sei, na dapee hem sa saka alatem vo kom taki nanga hem. Bikasi te wan soema habi wansani, vo haksi Jehova, dan Moses moe kom na ini da santa hoso kom haksi hem; nanga Moses wawan hem sa taki hai na hai, leki wan soema de taki nanga hem mati. Ma ala dem tra soema moe tanapoe farawei, en loekoe da wolkoe nanga bigi respeki.
We nanga dati Moses no ben tevrede so reti jete, bikasi dati ben hati hem, disi Masra ben taki gi hem, hem srefi no sa go nanga dem, ma a sa seni wan Engel vo hem; en vo da hede Moses begi hem so langa, tee Masra pramisi hem baka, hem srefi sa go nanga dem tee na Kanaan. Na baka di Gado ben taki so switi nanga Moses, dati meki Moses begi hem wansani moro, a taki, meki a sori hem da reti glori vo hem, sondro a kibri hafoe na ini da wolkoe. Masra taki: No no, dati no kan de, mi fesi joe no kan si, bikasi no wan liebi-soema hai sa man vo verdrage dati; ma teki toe tra stoon-lei, en kom na mi na tapo da bergi Sinai tamara, na dapee mi sa meki ala mi switi glori-fasi pasa na joe hai, vo joe kom sabi Jehova moro krin. Ma joe no moe teki wan tra soema kom nanga joe; no wan meti srefi moe kom klosi-bei na da bergi.
We dei-broko mamantem Moses teki toe stoon, a koti dem, so leki dem toe fosi lei ben de, en dan a meki hesi, go na tapo da bergi. We na dapee Masra saka kom na ondro na ini da wol-koe, a kom pasa na Moses fesi, en da srefi momenti Moses jeri da tongo vo Masra taki: Jehova, Jehova da wan boen Gado, wan sari-hatti Gado, disi habi foeloe pasiensi en boen-hatti; en a de wan reti trouw Gado toe, disi de holi hem gnade tee vo doezend doezend soema, en te soema misi wansani, a de gi dem pardon vo dem zondoe. Ma a de wan krin Gado toe, disi no kan verdrage ogri; a de soe-koe da ogri vo dem tata tee na dem pikien en na dem pikien-pikien, na ini dri tee vo fo famili srefi. -- We ala dati Moses hiti hem srefi na gron, anbegi Jehova, a taki: Ke mi Masra, efi joe lobbi mi? gran-tangi, no libi wi soso! A troe, dem soema hatti tranga toemoesi; ma gi wi pardon vo wi zondoe en teki wi vo joe piple! Masra taki: A boen, mi no sa mankeri, vo holi da verbond, di mi ben meki nanga oenoe. Ma loekoe boen, te oen kom na Kanaan, vo oenoe no meki verbond nanga dem heiden-soema vo da kondre, vo dem no seti trapoe gi oenoe, meki oen fadom. Oen moe broko dem altari vo dem, nanga dem popiki, nanga dem moko-moko. Bikasi Jehova, da Gado vo oenoe, no kan verdrage wan tra Gado, moksi nanga hem. Vo da hede oen no moe bemoeje nanga dem soema na ini wansani vo dem. So srefi Masra taki wantron moro nanga Moses vo dem feesti-dei en vo dem ofrandi, en fa dem moe dini hem, en na baka a teki dem toe stoonlei, di Moses ben tjari, a skrifi dem tin gebod na ini, a gi na Moses baka na plesi vo dem toe fosiwan, di Moses ben broko. We da leisi Moses tan fotentin dei nanga fotentin neti ageen nanga Masra, sondro a njam en sondro a dringi wansani. En alwasi dem pikien vo Israel no ben sabi ageen, sani ben miti Moses, tog vo disi leisi dem ben holi pasiensi, en dem wakti hem safri so langa, tee a kom baka.
Ma so leki a ben saka kom na ondro, en so hesi dem pikien vo Israel kom si hem, dem frede vo go klosibei na hem, bikasi disi a ben tan nanga Masra so wan langa tem, taki nanga hem, nanga dati hem fesi ben kisi wan heeli verandre, hem skin kom skyn leki zon, tee a blinkri srefi. Ma Moses srefi no ben sabi, dati hem fesi de so. -- We disi Moses ben moese taki nanga dem, a kali dem kom na hem, en Aaron nanga dem gran-soema, dem fosi go na hem, vo a taki nanga dem. Na baka ala dem tra pikien vo Israel kom toe, en Moses taki ala dem woortoe gi dem, disi Gado ben taki nanga hem na tapo da bergi Sinai. Ma so hesi Moses kaba vo taki nanga dem, a teki wan doekoe, tapo hem fesi. En da so a ben doe alatem; te a ben go na ini da santa verbond-hoso go taki nanga Masra, en te a ben piki dem soema baka, dan a ben poeloe da doekoe so langa, meki dem pikien vo Israel kan si da skyn na ini hem fesi, vo dem respeki hem. Ma te a no ben habi noti nanga dem, dan a ben tapo hem fesi baka so langa.
1. We te wi jeri da tori, fa dem pikien vo Israel ben vergiti Gado so hesi, nanga ala da boen, disi a ben doe dem, en fa dem ben pasa da wet vo Jehova so toemoesi grofoe, tee dem meki wan pikin-kow srefi, anbegi hem, ke, dati de wan skreki-tori vo troe. Ma da so wi liebi-soema maniri de tee tidei jete. Alwasi san wi pramisi Masra tidei, somtem tamara wi no membre hem moro.
2. Aaron no ben doe reti toe, disi a ben frede dem soema so, vo a no weigre dem dasani. Somtem a ben denki, te a haksi so meni goutoe na dem, dati sa meki dem no wani moro. Ma dati no ben hati dem; bikasi dem alamal poeloe dem goutoe ringa wantem, tjari kom gi hem. We da srefi sani wi kan si na soema tee tidei jete. -- Vo kerki? efi vo helpi wan poti soema? efi vo iniwan tra boen-sani? -- vo dati no wan soema habi moni; ma vo go njam wan soso kondre-plisiri, efi vo bai wan soso prodo-sani? vo dati ala soema habi moni nofo.
3. Disi dem pikien vo Israel ben vergiti Gado, vo da hede Gado ben gi dem abra toe na da verkeerti membre, tee vo dem teki da glori vo Jehova, dem geersi hem nanga wan kow-popiki. (Rom. 1, v. 23.) We meki wi teki dati vo wan waarskouwe! Bikasi no wan soema kan taki, so wan lausani hem no sa doe, hem sabi Gado. Da soema, disi potti hem vertrouw na hem moni, moro leki na Gado, en disi kan taki na wan piesi goutoe: Joe da mi troostoe! (Joh. 31, v. 24.) so wan soema de dini kroekoe-toe-gado, net so leki dem pikien vo Israel ben doe. So srefi te wan soema loekoe hem bele vo hem Gado, dati de wan kroekoetoe-gado-sani toe. (Filipi 3, v. 19.)
4. Disi Gado ben teki da begi vo hem foetoeboi Moses so boen, disi a ben begi vo dem Israel-soema; moro hesi a sa jeri da begi vo hem pikien Jesus Kristus, disi a de begi vo wi, ala di a sidom na reti han vo Gado.
(2. Mos. Kap. 28, 29 & 35 tee Kap. 40 & 3. Mos. Kap. 8.)
So hesi Moses komopo na da bergi Sinai kom na ondro, a kali da heeli gemeente vo dem pikien vo Israel kom makandra, a taki gi dem: Kom jere, san Jehova ben taki gi mi na tapo da bergi, fa oen moe doe! A taki: Siksi dei oen habi, vo oen doe ala oen wroko, ma di vo sebi no wan soema moe go na wroko, bikasi dati de da dei, disi Masra ben teki, vo a bro. We ibriwan soema, disi habi hatti, vo go doe wan wroko na so wan dei, a sa dede. Oen no moe letti faja srefi na Saba na no wan hoso vo oenoe!
So srefi Moses taki gi dem pikien vo Israel, fa Masra ben gi hem ordre na tapo da bergi vo da santa hoso, disi hem wani, dem moe meki gi hem, vo Jehova kan liebi na dem mindri, en vo ala dem wroko-sani toe, disi moe go na ini da hoso, vo dem kan dini hem. We meki ibriwan soema tjari wansani kom gi Masra, -- so Moses taki gi dem, -- vo wi kan meki da hoso, iniwan-sani di oen wani, en so meni leki oen wani; vo taki, goutoe, efi silver, efi kooproe, efi zy-klosi, efi katoen, efi wiwiri, efi leeri, efi hoedoe, efi oli, efi specery-sani, efi mooi stoon en dieri krala, efi ini-wan tra-sani, disi dem kan gebruiki, vo meki ala soortoe mooi-mooi na ini da santa hoso! En ala soema, disi bekwaam, en disi sabi, vo meki wan mooi wroko, dem moe kom helpi vo meki da hoso, so leki Masra ben sori mi dem patron vo alasani na tapo da bergi. Trawan kan meki da hoso srefi nanga da tenti vo hem, trawan kan wroko dem pranga, trawan kan meki da santa kisi vo da verbond nanga da gnaden-troon nanga da gardyn, trawan ageen kan meki dem kandera-tiki nanga da oli nanga dem lampoe, trawan dem altari nanga dem kooproe trariki, en trawan dem domine-klosi; ibriwan kan meki so wan wroko, leki Gado gi hem koni, vo a sabi.
We so hesi Moses kaba vo taki so nanga dem, nomo da heeli gemeente vo dem pikien vo Israel go na hoso wantem go teki, san dem habi, en nanga bigi plisiri dem tjari dem kom gi Moses. Na baka Moses teki toe soema, disi Jehova srefi ben sori hem, Bezaleel nanga Ahaliab, a potti dem vo basi, vo dem loekoe da heeli wroko. Bikasi dem ben de soema, disi da Jeje vo Gado ben de nanga dem, a gi dem foeloe koni, dem sabi vo prakseri ala soortoe wroko, en vo meki hem toe, dem ben sabi vo wroko goutoe nanga silver nanga kooproe, en vo koti mooi fini stoon, en vo fiti dem mooi, en vo timre da hoedoe, en vo meki mooi bre-wroko. En buiti dem toe basi so meni tra Israel-soema moro ben de, disi ben bekwaam, vo meki mooi wroko, en disi dem hatti ben seni vo potti han na da wroko, we dem alamal kom helpi toe, vo meki da hoso. So srefi nofo vo dem oeman, disi ben sabi vo vlekti sani en vo meki mooi bre-wroko, dem ben potti hanoe toe vo helpi, dem meki ala soortoe mooi klosi, tjari kom na da hoso.Ma di da heeli gemeente vo dem Israel-soema ben habi plisiri so nanga da hoso, dati meki dem alamal tjari so meni sani kom ibri mamantem, tee bakatem dem basi nanga dem knegti kom na Moses, dem begi hem, meki a tapo dem soema noja, vo dem no tjari sani moro; bikasi dem tjari toemoesi kaba, da hoso no kan teki ala. En wantem Moses seni soema go bari na ini da heeli kampoe, dati a nofo now, meki dem kaba vo tjari sani.
We da so dem wroko da hoso dapee, dem meki hem leki wan bigi tenti, dem meki hem siksi-tentin voet na langa, en twenti voet na bradi. Nanga pranga soso dem meki hem, ma ala dem pranga ben tapo nanga goutoe krin-krin. En so hesi dem basi nanga dem tra wroko-man ben klari so fara, wantem Moses go hopo da hoso, a potti hem na doro-sei vo da kampoe, a teki boeba, potti na da hoso tapo vo wan daki, en da srefi hoso a kali wan verbond-hoso. (2. Mos. 33, v. 7.) Na baka Moses teki wan bigi klosi, a hanga hem na ini da hoso, leki wan bigi gardyn, vo platie da Santa-plesi vo da Moro-santa-plesi. (2. Mos. 26, v. 33.)
We da kamera, disi ben de na bakasei vo da gardyn, dati dem kali da Moro-santa-plesi, dapee Moses potti da kisi vo da verbond na ini, so leki Masra ben taki gi hem. Da kisi ben de wan hoe-doewan, ma a ben tapo nanga goutoe krin-krin na inisei en na dorosei; we na ini da kisi Moses ben kibri dem toe stoon-lei, disi Masra ben skrifi da wet vo hem na ini, nanga da goutoe djogo toe, disi ben habi da hemel-brede. (Ebr. 9, v. 4.) Da tapo vo da kisi ben de vo krin goutoe soso, en dem kali hem da Genade-troon, bikasi a ben habi da fasi,leki wan koning-troon. En na tapo da Genade-troon ageen toe Kerubin ben de, goutoewan, vo krin goutoe soso, (wan Kerub da wan gran Engel vo Gado); ibriwan vo dem Kerubin ben tanapoe nanga hem foetoe na da troon mofo, dem fesi buige na gron, en dem flei bradi na abra da Genade-troon tee dem miti makandra. (Ebr. 9, v. 5.)
Na ala fo hoekoe da kisi ben habi fo goutoe ringa, disi dem ben soetoe toe goutoe tiki na ini, vo dem kan hopo da kisi, tjari hem.
Ma da tra kamera na fesi-sei vo da bigi gardyn, disi dem kali da Santa-plesi, dati ben habi da goutoe smoko-altari, disi dem domine ben meki switi smoko na hem tapo, na ini wan goutoe komforo, ibri mamantem nanga ibri sabatem; dem ben habi wan aparti switi specery-poeiri, vo meki da smoko, en da faja dem ben teki alatem vo da santa faja, disi ben de bron na tapo da bron-ofrandi-altari. Ma buiti da smoko-altari da Santa-plesi ben habi wan tafra toe, wan goutoewan, disi da gemeente vo Israel ben potti twalf brede na hem tapo ibri wieki, so meni pikien leki Jakob ben habi; dem kali dem brede toon-brede, vo disi dem ben lidom na Masra fesi alatem, leki wan bewysi, fa dem Israel-soema sori hem tangi. Ala wieki dem ben moese kenki dem brede, potti njoe-wan baka na dem plesi, en dem domine, disi ben habi speli da wieki, dem ben teki dem ouroewan, njam, bikasi no wan tra soema ben habi pasi vo njam dem, leki dem domine wawan. (Lukas 6, v. 4.) We da tafra nanga da smoko-altari ben habi fo goutoe ringa toe nanga vergulde tiki, vo tjari dem. -- Reti na abra vo da tafra da mooi goutoe kandera-tiki ben de, a ben de vo boen goutoe soso, nanga siksi hanoe, disi ben habi sebi lampoe; ibri sabatem dem ben letti dem lampoe, en dei-broko mamantem dem ben kili dem baka. Na baka Moses meki wan bigi gadri da heeli hoso rontoe, da gadri ben bigi toe hondro voet na langa en wan hondro voet na bradi. Ma na dorosei vo da gadri, na plasi srefi, Moses potti da altari vo dem bron-ofrandi nanga ala dem wroko-sani vo dem domine, te dem meki dem ofrandi.
We datem, disi dem ben klari nanga da heeli hoso, vo hopo hem en vo potti alasani reti, dati ben de net wan jari, sinsi dem libi Egipti-kondre; da dei disi dem hopo da hoso, a ben de net da srefi dei wan jari, disi dem ben teki pasi, gowei. En Moses ben meki alasani reti so, leki Masra srefi ben sori hem da patron na tapo da bergi, no wansani ben mankeri. We na baka Moses teki wan oli, a robi da heeli hoso nanga da oli, nanga da altari, nanga dem wasi-beki, nanga ala dem wroko-sani, vo wye da santa hoso gi Masra; en da srefi momenti da wolkoe vo Masra saka kom na da hoso tapo, en da bigi glori vo Jehova kom foeloe da heeli hoso, a tapo da heeli Genade-troon. Ma vo da diensti na ini da santa hoso, dati wani taki, vo meki ala dem ofrandi, en vo loekoe da heeli domine-wroko, dati Masra ben taki gi Moses,meki a teki hem brara Aaron nanga dem dri pikien vo Aaron, Nadab nanga Abihu nanga Itamar, meki a wasi dem nanga watra, weri dem santa domine-klosi gi dem, en meki a blesi dem nanga da santa oli, wye dem vo domine, vo dem dini Jehova na ini da santa hoso. Aaron ben de da grandomine, en na hem baka alatem da fosi pikien vo hem famili ben kom na da wroko. We so wan grandomine ben de wan soema, disi ben tan moro klosibei na Gado alatem, leki ala dem trawan. Bikasi hem wawan ben habi pasi vo go ibri jari wantron na ini da Moro-santa-plesi, tjari wan bigi ofrandi kom gi Masra, vo poeloe ala soema zondoe. Ma sondro broedoe a no ben kan go na ini. (Ebr. 9, v. 7.) Dem santa domine-klosi, disi Aaron ben weri alatem te a doe hem diensti na kerki, dem ben mooi vo troe, moro mooi, leki di vo dem tra domine, kaba Masra srefi ben sori Moses da patron, fa da klosi moe wroko. Da grandomine-wapoe, disi ben habi twalf mooi fini stoon nanga dem nem vo dem twalf pikien vo Israel, dati ben haaka na da mantre vo Aaron reti na hem borstoe tapo, vo Aaron kan membre dem twalf famili vo Israel alatem nanga begi na ini hem hatti, te a kom na Masra fesi. Bikasi alatem te dem Israel-soema ben habi wansani, vo haksi Masra rai, kaba Aaron kom na hem nanga da grandomine-wapoe, dan Masra kom piki hem wantem.
Reti na hem fesi-hede Aaron ben habi wan pikin goutoe blakri ageen, leki wan wapoe, dati ben fassi na tapo-sei na hem grandomine-moesoe, hanga na ondro, en na ini da blakri dem ben koti wan pikin skrifi, da skrifi taki: Da santa-fasi vo Masra.
Ma dem tra domine, disi ben de na Aaron ondro, dem no ben habi pasi, vo kom na ini da Moro-santa-plesi, dem ben habi dem wroko na da tra kamera na fesi-sei, disi dem kali da Santa-plesi, na dapee dem meki ofrandi nanga switi smoko gi Gado, en dem loekoe da santa faja na tapo da altari, en dem wakti da santa hoso, en ala so soor-toe wroko moro ben de vo dem. Bikasi buiti dem domine no wan tra soso-soema ben habi pasi, vo kom klosibei na da santa hoso vo Masra; da soema, disi habi hatti vo doro tee na ini, a ben moese dede. (4. Mos. 17, v. 13.)
Ma dem soema vo Levi famili, vo taki, ala mansoema, dem ben kisi da wroko vo dinari, vo dem helpi dem domine na kerki. Vo taki reti, fosi Gado ben wani, ala ala fosi manpikien vo dem twalf bigi famili vo Israel moe kom na da wroko, vo dini hem; ma di dem ben doe da ogri nanga da goutoe pikin-kow, vo da hede Masra ben poeloe dem elf famili, a teki di vo Levi wawan, meki dem helpi dem domine, vo dini hem na ini da santa hoso; bikasi dem no ben moksi na ini da pre, disi dem trawan ben pre nanga da pikin-kow. We da srefi tem, disi Masra ben teki dem Leviti, potti na da wroko, ala dem mansoema vo da heeli Levi-famili ben meki twenti na toe doezend soema, net so meni, leki ala dem fosi manpikien vo dem elf tra famili. Ma disi Gado no teki ala makandra so, ouroewan nanga jonge soema, ma a teki dem wawan disi ouroe twenti na feifi jari en disi no pasa vyftig jari jete, we dati meki Moses kisi aiti doezend nanga feifi-hondro en aititentin soema, di a kan wye wantem, potti na da diensti, vo helpi Aaron nanga dem tra domine, te dem meki dem ofrandi, en vo dem tanapoe alatem na Masra fesi, dini hem na ini hem santa temple. So srefi dem Leviti ben habi da vaste wroko toe, so langa dem ben de na pasi, vo dem tjari da santa hoso nanga da verbond-kisi, bikasi da hoso ben wroko so, vo dem kan loesoe hem piesi-piesi, tjari go nanga dem, en te dem ben meki kampoe na wan plesi, dan dem ben hopo hem baka.
We vo da wroko hede dem domine nanga dem leviti no ben kisi wan piesi gron vo dem srefi, datem di dem kom na Kanaan-kondre, so leki dem tra elf famili ben kisi, ibriwan wan pikin kondre vo hem; ma Masra pramisi dem, a taki, hem srefi sa de da porsie en da goedoe vo dem. (5. Mos. 10, v. 9.) So srefi a pramisi dem toe, taki, a sa gi dem wan toe dri foto na da kondre, en vo alasani, disi dem tra elf famili de habi, dem sa kisi hafoe toe, efi da vo meti, efi da vo areisi, efi vo iniwan tra njanjam; bikasi dem tin procenti, disi dem trawan moe tjari kom gi Masra na kerki, dati hem sa libi gi dem domine en leviti, meki dem njam.
1. We da tori vo da santa hoso, en disi Masra srefi ben leri Moses da heeli fasi, fa dem moe dini hem na ini da temple, dati de sori wi, Gado no ben wani, dem srefi moe meki wan kerki, so leki a kom na dem hede; bikasi somtem dem ben kan prakseri wan heeli verkeerti sani. En di dem ouroe-tem-soema ben njoesoe toemoesi, vo bribi na sani, disi dem hai srefi si, vo da hede Gado ben finni vo boen, vo gi dem so wansani toe, meki dem dini hem nanga foeloe sani, disi soema hai kan si, ma disi habi wan dipi prakseri en wan dipi membre. We wi Kristen-soema no habi vanoodoe moro, vo dini Gado na so wan fasi; bika Kristus srefi ben leri wi, fa wi moe dini Gado noja, en fa wi moe begi hem na ini jeje, en nanga wi heeli hatti.
2. Da Moro-santa-plesi, disi ben de na ondro da tenti vo Gado, dati ben de wan printje vo hemel srefi. Bikasi so leki no wan tra soema ben habi pasi, vo go na ini da plesi, leki grandomine wawan, so srefi hemel ben tapo toe gi wi alamala vo wi zondoe hede. Ma wi lobbi Helpiman Jesus Kristus hopo hem baka gi wi, nanga dati, disi a ben teki hem eigen broedoe srefi, tjari go na ini hemel vo wan boetoe vo ala soema zondoe. Bikasi disi da bigi gardyn na ini temple ben pliti reti na toe da srefi joeroe, di Jesus ben dede na kruis, vo ala soema kan loekoe na ini da Moro-santa-plesi, dati ben pasa nomo, vo Gado sori wi, fa da dede vo hem pikien Jesus Kristus ben hopo pasi baka gi ala zondaar, vo wi kan kom na hem kondre. (Lukas 23, v. 45.)
3. Da temple vo da ouroe testament ben habi wan genade-troon, dapee Jehova ben saka kom na ondro, gi soema pardon. We da genade-troon vo wi, di wi de na njoe testamenti-tem, dati da wi Masra Jesus Kristus. Vo da hede apostel Paulus vermane wi, a taki: We meki wi teki hem broedoe dan, meki wi go klosibei na hem nanga wan krin konsiensi en nanga reti bribi! (Ebr. 4, v. 16. Rom. 3, v. 25.)
4. So srefi Jesus Kristus de da reti grandomine vo wi. Bikasi ala boen bribi-soema, disi de vo hem kerki troe-troe, a de membre dem alatem na ini hem hatti; en a de sabi ibriwan soema vo hem nanga nem srefi. (2. Tim. 2, v. 19.)
5. Disi dem Israel-soema ben habi so toemoesi plisiri nanga da hoso, vo meki hem mooi, en disi nanga krin hatti dem ben tjari so meni sani kom vo helpi, moro foeloe srefi, leki Moses ben haksi: we na dati a fiti wi Kristen-soema, vo wi alamal teki wan exemple. Bika efi wi lobbi dem kerki vo wi, en efi wi loekoe dem, leki Gado-hoso srefi, dan wi sa ha plisiri toe vo helpi, te wan wroko de na kerki, efi da nanga hanoe, efi da nanga moni, efi na iniwan tra fasi.
6. So srefi dem toe basi, Bezaleel nanga Ahaliab, disi ben meki da santa hoso, dem sori wi wan exemple toe. Vo taki, efi wan soema de, disi Gado gi hem koni, vo a bekwaam, tee a sabi vo meki wan mooi wroko, da soema no moe kisi bigi membre vo dati, soekoe nem vo hem srefi; ma da koni, disi hem Gado gi hem, a moe teki, vo wroko wan boen wroko, vo Masra Gado wawan moe kisi bigi nem.
(3. M29 & 35 ">s.)
Da moro bigi ceremonie, disi Gado ben sori dem Israel-soema, fa dem moe dini hem na kerki, dati da dem ofrandi. (Wan ofrandi, dati taki so meni, leki wan presenti, disi soema tjari kom gi Gado, vo taki hem tangi, efi vo begi hem pardon.) Wi no kan taki, Gado ben leri dem dati, leki wan njoe-sani, bikasi dem ouroe-tem-soema ben njoesoe so kaba, vo meki ofrandi gi Gado, so leki wi lesi vo Abel en vo Noa en vo nofo tra soema moro. Dem heiden-soema srefi ben njoesoe dati toe, vo tjari njanjam gi dem kroekoetoe-gado, so leki dem doe tee tidei jete. Ma disi Masra Jehova ben gi dem Israel-soema da wet vo dem ofrandi, dati a ben doe nomo, vo a sori dem, fa dem moe dini hem na wan krin fasi, en no na so wan takroe fasi, leki dem heiden-soema ben dini dem gado. So srefi Masra ben wani toe, dem moe loekoe dem ofrandi vo wan teeken, disi sori dem, fa bakatem Masra Jesus sa teki hem srefi, tjari kom gi Gado, leki wan bigi ofrandi, vo pai ala soema zondoe.
Dem ofrandi, disi Masra ben meki dem tjari kom gi hem, dem ala no ben de wan-fasi; wan dem kali bron-ofrandi, trawan dem kali zondoe-ofrandi efi boetoe-ofrandi, en trawan ageen dem kali njanjam-ofrandi. Ma tog ala ofrandi, di dem Israel-soema ben gi, da dem domine wawan ben habi da wroko, vo meki dem klari, potti gi Masra, na ini da santa verbond-hoso. En da soema, disi ben habi vo gi so wan ofrandi vo hem eigen perzon, efi da wan kow, efi skapoe, efi krabita, efi doifi, so leki Gado ben potti wan vaste boetoe vo ibri pikado, da soema ben moe teki hem hanoe, potti na da meti tapo, we dati ben de so boen, leki a potti ala hem zondoe na da meti tapo, en dan dem ben teki da meti, kili hem na Masra fesi, leki na plesi vo da soema srefi. En da broedoe vo da meti, dati dem domine teki, dem spater hafoe na da altari tapo, en hafoe dem hiti na gron.
Dem bron-ofrandi, dati ben de dem ofrandi, disi dem ben loekoe moro bigi, leki ala dem tra ofrandi. Ala dei dem ben teki toe pikin skapoe, disi no habi wan mankeri na dem skin, kili dem gi Gado vo wan bron-ofrandi, wan na mamantem, en da trawan na bakadina. Ma buiti dem aladei-ofrandi, ibriwan soema, disi ben wani, a ben habi pasi toe, vo meki wan aparti bron-ofrandi jete gi Masra, alwasi a no ben misi wansani srefi; bikasi dem bron-ofrandi ben de, leki wan vaste boetoe vo da heeli zondoe-fasi vo soema. En vo da hede dem domine ben letti so wan ofrandi alatem, dem bron hem na tapo da altari, tee da faja njam da meti krin-krin.
Ma dem zondoe-ofrandi en dem boetoe-ofrandi dati dem ben verpligti vo meki, so hesi wan soema ben misi wansani, vo a kan kisi pardon vo da ogri, di a ben doe. Bikasi sondro wan ofrandi en sondro broedoe no wan soema ben kan kisi pardon, no wan gran-soema en no wan domine srefi.
Dem njanjam-ofrandi, disi Gado ben taki, dem moe tjari gi hem, dati ben de leki wan begi, vo Gado moe membre dem, vo dem pranasi nanga dem njanjam-gron moe meki foeloe njanjam. Ma dem tangi-ofrandi, dati dem ben meki vo sori Gado tangi vo ala da boen, di a ben doe dem. En alatem te dem meki so wan ofrandi, dem ben lobbi meki wan pikin trakteri toe, vo dem plisiri nanga Masra; en ala di dem sidom njam, dem ben singi switi Psalm gi Jehova, vo taki hem gran-tangi. We vo dem njanjam-ofrandi en vo dem tangi-ofrandi alatem dem domine ben kisi dem procenti, en dem procenti disi, dati ben de leki wan vaste leveransi, di dem ben kisi da heeli jari doro, vo pasa dem liebi.
Na baka Gado leri Moses toe vo dem feesti-dei, di dem moe holi ibri jari, a taki: Go taki gi dem pikien vo Israel: Siksi dei mi gi oen, vo oen wroko, ma di vo sebi dei, dati de da Saba-dei, da dei vo oen bro, en vo oen kom makandra na mi fesi na ini da santa hoso. No wan soema moe doe wan wroko na so wan dei; bikasi Jehova srefi ben teki da dei vo a bro. Ma buiti da Saba-dei, di oen njam ibri wieki, oen moe holi jete dri bigi feesti-dei ibri jari en dem feesti-dei oen moe loekoe nanga bigi respeki; en alatem te so wan dei kisi, oen moe waarskouwe da gemeente bitem, vo dem meki dem srefi klari, en vo dem kom makandra kom miti Jehova.
We da fosi moen vo njoe-jari, da dei vo hem di meki tin na fo, dati de da Paaska vo Masra, disi oen moe kom makandra, meki ofrandi. Sebi dei oen moe njam da Paaska, en ala dem sebi dei oen no moe njam brede, di habi zuurdegi, masoo wawan oen moe meki, njam; bika da vo oen membre da dei, disi oen ben komoto na Egipti-kondre, en vo oen no vergiti da tori nooiti wantem. (5. Mose 16, v. 3.) Da fosi Paaska-dei oen moe holi wan bigi kerki, en di vo sebi ageen; dem toe dei oen no moe doe wan wroko, ma dem tra dei oen kan doe oen wroko; buiti dem ofrandi, dati moe go doro ala dem sebi dei. En te oen kom na Kanaan, ibri jari te oen njam Paaska, da dei di meki toe, oen moe teki dem fosi bosoe vo ala njanjam, di oen koti, tjari kom na da hoso vo Masra, meki dem domine potti hem vo wan ofrandi. So srefi oen moe tjari wan toe tra ofrandi moro kom, bron-ofrandi nanga njanjam-ofrandi. En vo da fosi njanjam, di oen koti, oen no moe teki noti, vo oen njam, bifo oen ben tjari da fosi bosoe kom, vo taki oen Gado tangi. Dati moe de wan vaste wet vo oenoe tee vo teego. Na baka vo da tweede Paaska-dei oen moe teli vyftig dei moro, dan oen moe holi wan tra bigi feesti-dei ageen, dati de da feesti-dei vo da fosi njanjam, disi oen ben plani en disi oen ben koti. We te oen bigin vo koti areisi nanga karoe, en te oen bigin vo tjari da njanjam kom na hoso, kibri na makzien, dan na so wan dei oen moe meki toe brede vo da njoe blom, tjari kom gi Masra vo wan ofrandi, vo Jehova kisi da fosi presenti vo da njoe njanjam. En buiti dati oen moe tjari tra ofrandi moro kom, so meni leki ibriwan sa wani, en so meni leki Jehova ben blesi oenoe. (5. Mose 16, v. 10.) We da dei oen no moe go na wroko, ma oen moe kom makandra, taki Gado tangi vo da njanjam, disi dem pranasi vo oen ben meki. Na baka te oen kisi da moen, di meki sebi, da fosi dei vo hem oen moe blo dem trompeti, en oen moe holi da dei vo wan bigi Saba; bika da srefi moen da wan santa moen vo troe. We te negi dei vo da moen pasa, da dei di meki tin, dati de da bigi Verzoen-dei, vo taki, da dei, disi oen moe soekoe vo oenoe nanga Jehova kom boen. We da dei dati de wan bigi bedagi, disi oen moe kom makandra na kerki, en nanga fasten en nanga begi oen moe saka oen srefi dipi gi Masra, begi hem pardon vo ala oen zondoe. Da dei oen no moe doe wan wroko, ma ofrandi oen moe tjari kom gi Jehova, en nanga fasten oen moe pina oen skin, vo oen zondoe hede. Fosi Aaron moe teki wan jonge kow, kili hem vo wan ofrandi vo hem eigen perzon srefi, vo meki hem srefi nanga hem famili fosi kom boen nanga Gado. Na baka a moe teki toe krabita-boko vo dem pikien vo Israel, potti dem na Masra fesi na da verbond-hoso doro, en dan a moe hiti doblo vo dem toe boko, da wan, da vo kili gi Masra, en da trawan, da vo liebi. We da boko, disi kisi da doblo vo Masra, dati Aaron moe teki, kili vo wan zondoe-ofrandi; en dan a moe foeloe hem hanoe nanga switi specery-sani, tjari dati go tee na bakasei vo da bigi gardyn na ini da Moro-santa-plesi. So srefi a moe teki hafoe vo da kow-broedoe, tjari go na ini, en dan a moe dipi hem finga na ini da broedoe, spater na da Genade-troon; ma na fesi vo da Genade-troon a moe spater da broedoe sebi-tron na gron nanga hem finga. So srefi a moe doe toe nanga da broedoe vo da boko, di a ben kili vo wan zon-doe-ofrandi gi dem pikien vo Israel. Na baka a moe nati da altari toe nanga da broedoe vo da kow en vo da boko, meki dati kom krin toe. En te a kaba nanga da wroko, vo poeloe ala zondoe na ini da heeli temple, dan Aaron moe teki da tra boko, da liebiwan, potti ala toe hanoe na da boko hede, en ala datem, di hem hanoe de na tapo da boko, a moe bekenti ala zondoe vo dem pikien vo Israel, nanga alasani, di dem ben misi, potti na da meti tapo. Na baka Aaron moe meki wan soema teki da boko, jagi hem go farawei tee na ini woestein, vo meki da meti tjari ala soema zondoe gowei. Da so Aaron moe poeloe dem Israel-soema zondoe ibri jari wantron, en dati moe de wan vaste wet vo oenoe tee vo alatem.
Pikin-moro na baka vo da bigi Verzoen-dei, da dei di meki tin na feifi na ini da srefi moen, te oen koti ala areisi nanga tra njanjam, kibri na ini makzien boen-boen, dan oen moe njam wan tra feesti-dei ageen, dati de da feesti-dei vo pina-hoso, da wan bigi dei vo Masra toe. We te da dei kisi, dan oen moe teki pikin hanoe vo palm-boom en mooi takki vo mirte, oen moe bre dem, meki masanga, vo oen liebi na ini. Sebi dei oen moe njam da feesti-dei vo pina-hoso. Da fosi dei oen moe teki vo wan bigi Saba-dei, disi no wan soema vo oen moe go na wroko, en da dei di meki aiti oen moe holi so srefi ageen. Ma ala dem sebi dei oen moe liebi na ini dem groen masanga, plisiri na Masra fesi. -- En dati moe de wan vaste wet vo oenoe, vo oen njam da feesti-dei ibri jari, vo meki dem pikien vo oen membre da tem, disi mi ben tjari dem pikien vo Israel komoto na Egipti-kondre, en di mi ben meki dem liebi na ini masanga; datem di dem ben de na pasi. -- We ala di oen njam dem feesti-dei oen moe meki ofrandi gi Jehova, taki hem gran-tangi vo da njanjam, disi oen pranasi nanga oen droifi-djari ben meki; en oen no moe vergiti dem potiman toe nanga dem weduwe, vo gi dem hafoe vo ala njanjam, di Gado-blesi ben gi oenoe.
Dri-tron ibriwan jari ala bigi mansoema vo Israel moe kom na Masra fesi, na Paaska-feest en na Pinkster-feest en na pina-hoso-feest. En ala disi oen libi oen hoso soso, gowei na Jerusalem na da temple vo Masra, mi srefi sa meki no wan soema kom trobi oenoe nanga feti. (2. Mos. 34, v.23 & 24.) Ma oen no moe kom na mi fesi nanga soso hanoe, sondro wan pikin ofrandi. (2. Mos. 23, v.15.)
Na baka Masra taki nanga Moses, meki a taki gi hem brara Aaron nanga dem pikien vo hem, te dem blesi da gemeente vo dem pikien vo Israel, dem moe taki so: Jehova moe blesi joe, a moe kibri joe! Jehova moe meki hem fesi skyn na joe tapo, a moe loekoe joe boen! Jehova moe hopo hem fesi na joe tapo, a moe gi joe da fri vo hem! Bikasi mi nem oen moe teki, potti na dem pikien vo Israel tapo, vo mi blesi dem. (4. Mos. 6, v. 22-27.)
So srefi Gado leri Moses toe vo dem ofrandi, hoemeni dem moe tjari kom ibri feeste-dei, en hoe soortoe meti efi njanjam dem moe teki vo dati. So srefi Masra meki Moses nanga Aaron kom sabi toe, hoe speli meti nanga fowloe nanga fisi de krin, vo dem kan njam, en hoedisi no krin, disi moe de trefoe vo dem.
Na baka Gado taki toe nanga dem vo alasani, disi de meki wan soema skin kom takroe na Gado hai, en fa dem moe doe vo krin dem srefi baka. Vo taki: Te wan oeman meki wan pikien, dan da mama moe tan wan toe dri wieki na ini hoso, a no moe go na doro; en efi da pikien de wan man-pikien, dan dem moe besnyde hem, te a kisi aiti dei. En te da tem kisi, vo da mama krin hem srefi, dan a moe teki wan pikin skapoe, disi ouroe wan jari, nanga wan pikin doifi, tjari go na kerki doro, meki domine kili dem meti gi Gado vo wan ofrandi. Ma efi da oeman de wan poti soema, vo a no kan bai wan skapoe, dan a moe teki toe pikin doifi, tjari kom gi Gado.
Na baka Masra leri dem moro krin, a taki: Loekoe boen, vo oen no teki dem tra heiden-soema maniri, ma vo oen holi oen srefi krin, so leki a fiti soema, disi de na mi ondro! Oen jeri? Mi da Jehova, da Gado vo oenoe! Te wan soema doe mi wani, dati sa meki a finni liebi.
We, oen go taki gi dem pikien vo Israel: No wan soema moe teki man efi oeman vo hem eigen famili srefi. Da so Jehova taki. Joe no moe teki joe pikien-pikien vo joe wefi, ofoe joe tanta, ofoe joe oom wefi; joe no moe liebi toe nanga joe kroe-koetoe pikien. Joe no moe teki joe brara wefi toe, so langa joe brara de na liebi jete. Joe no moe teki wan oeman toe, moksi nanga hem pikien, vo liebi nanga dem ala toe makandra; so srefi wan pikien-pikien vo joe wefi joe no moe teki toe, liebi nanga hem. So srefi joe no moe go na wan tra soema wefi go hoeroe nanga hem; da soema disi doe so, a moe dede, hem nanga da oeman, ala toe.
Na baka Masra leri Moses moro krin, a taki: Go taki gi dem pikien vo Israel: Efi wan Israel-soema, efi wan vreemde soema srefi, disi de liebi na Israel-kondre, teki hem pikien, trowei gi Molok, meki da pikien dede na ini faja, da soema moe dede baka sondro pardon, nanga stoon dem moe kili hem; bikasi da wan toemoesi takroe wroko. En efi oenoe no kili so wan soema, dan mi srefi sa soekoe hem, kili hem. Ala sosani oen no moe doe, vo oen no pori oen srefi, bikasi dem heiden-soema, disi de liebi na Kanaan, dem de tranga na ini ala dem takroe wroko, tee da heeli kondre vo dem pori, en vo da hede mi sa poeloe dem na grontapo, mi sa teki da kondre gi na oenoe. Bikasi sosani de meki wan heeli kondre kom fiste, na mi hai, en vo sosani hede mi moese strafoe dem soema, meki dem kisi dem paiman; da kondre srefi moe pio dem, tee dem lasi. We loekoe boen, vo oenoe no doe sosani toe, ma holi oen srefi so, leki mi leri oenoe, vo da gron no moe poeloe oenoe toe, leki a ben poeloe dem fosi soema vo hem, di ben liebi dapee na oen fesi! Oen jeri? Mi Jehova, da Gado vo oenoe, de taki so!
Oen moe de santa en krin, bikasi mi toe de santa! Potti membre boen-boen na alasani, di mi taki gi oenoe, vo oen no pasa da wet vo mi! Oen no moe foefoeroe; oen no moe lei; oen no moe bedriegi trawan! Oen no moe teki mi nem, sweri wan falsi sweri, bikasi mi da Jehova. Wansani, disi de vo tra soema, joe no moe soekoe, vo poeloe na hem hanoe. Da soema, disi de wroko gi joe, joe moe pai hem wantem, joe no moe holi hem tee tamara. Malengri soema, efi doofoe-man, efi blinde soema joe no moe kosi, holi dem vo spotoe! Te joe si wan blinde soema de waka, joe no moe potti sani na pasi gi hem, meki a naki hem foetoe, fadom! Te oen koti wan kroetoe, oen no moe teki sjem vo gran-soema, gi dem reti, gi poti soema kroekoetoe; ma ala kroetoe vo oenoe moe waka reti. Joe no moe waka rontoe gongosa soema, pori tra soema nem! Joe no moe holi joe brara na hatti, ma krasi joe kan krasi hem, te a doe ogri. Te soema kosi joe, joe no moe kosi dem baka, en te dem doe joe ogri, joe no moe pai dem baka. Ma lobbi joe moe lobbi ala soema, so leki joe lobbi joe srefi! Mi da Jehova! Te oen kili wan meti, oen no moe njam hem, so langa da broedoe de na da meti jete, bikasi da liebi de na ini da broedoe.
Oen no moe bemoeje nanga obia, efi nanga azee-man, efi nanga iniwan tra tofroe-wroko.
Oen no moe bre oen hede-wiwiri, vo meki prodo, ma oen moe koti oen wiwiri nanga oen barba, so leki a fiti.
Da boeba vo oen fesi en vo oen skin oen no moe koti-koti, so srefi oen no moe fervi oen skin toe. Mi da Jehova!
Efi joe habi wan oeman-pikien, loekoe boen, vo joe no gi hem pasi, vo a waka-waka go hoeroe, meki kondre foeloe nanga takroe soema; ma joe moe tapo hem, meki a no kan doe so. Mi da Jehova.
Te wan ogri miti oenoe, kaba oen no sabi, hoe-soema doe oen dasani, oen no moe go na loe-koeman, vo go soekoe dati, oen no moe bemoeje nanga sosani kweti-kweti. Efi wan soema de go na wan tofroe-man efi loekoe-man, mi sa strafoe hem vo dati. Ma efi wan soema vo oen srefi tron wan tofroe-man efi loekoe-man, da soema moese dede sondro pardon, nanga stoon oen moe kili hem.
Te joe sidom na joe doro-mofo, kaba joe si wan gran-soema de pasa nanga weti hede, joe moe hopo tanapoe gi hem; en vo ala ouroe soema joe moe habi respeki. -- Joe moe frede joe Gado toe. Mi da Jehova.
Dem mofina soema oen no moe trobi. En efi wan vreemde soema de liebi nanga joe, disi no sabi joe kondre maniri jete, joe no moe bedriegi hem, ma joe moe lobbi hem, so leki joe lobbi joe srefi. Bika oen srefi ben de vreemde soema toe na Egipti-kondre. Mi da Jehova, oen Gado.
Te oen seli sani, loekoe boen, vo oen no bedriegi soema, ma oen moe gi reti marki nanga reti wegi, en oen no moe haksi moro moni toe, leki a fiti. Bika mi da Jehova oen Gado, di poeloe oen na Egipti-kondre.
We membre ala dasani, di mi taki gi oenoe, en doe so toe! Holi oen srefi krin en santa, bikasi mi da Jehova, disi wani meki oen kom krin. En vo dati hede mi ben poeloe oenoe na ala dem tra heiden mindri, vo oen tron mi eigendom.
1. We da tori vo dem ouroe-tem-ofrandi, dati de leri wi, fa Gado ben potti dem vo wan printje, disi ben sori dem soema, fa Kristus sa gi hem srefi na Gado, leki wan bigi ofrandi vo ala soema zondoe. We nanga da wan ofrandi vo hem Kristus ben poeloe ala dem tra ofrandi vo ouroe-tem; bikasi di vo hem de wroko doro tee vo teego. (Ebr.10, v.12.)
2. Te dem ben meki ofrandi na ouroe-tem, alatem dem ben moese teki wan krin meti, disi no habi mankeri. We so srefi Kristus ben de da krin Gado-lam, disi no ben habi wan zondoe. (1 Petr.1, v. 19. Joh.1, v. 29.) Te wan soema ben meki wan ofrandi na ouroe-tem, dan a ben potti ala hem zondoe na da meti tapo. We so srefi Gado Masra ben teki ala wi zondoe, potti na hem pikien Jesus tapo. (Jes. 53, v. 6.) Da ofrandi-meti ben moese dede, en hem broedoe dem ben teki, spater na gron en na da genade-troon tapo. We so srefi Kristus ben dede toe, en efi nanga bribi wi meki hem broedoe nati wi hatti, dan wi konsiensi no kan trobi wi moro vo no wan zondoe, di wi ben doe. (Ebr. 10, v. 22.)
3. Da tori vo dem feesti-dei, disi Gado ben potti gi dem Israel-soema, dati de sori wi Kristen-soema toe, fa wi moe teki dem feesti-dei vo wi, vo wi no pori dem nanga soso plisiri vo disi grontapo; bikasi dati Masra no wani. (Amos 5, v. 21.)
4. Da Paaska vo Djoe, dati ben de, vo dem membre fa Gado ben poeloe dem komoto na Egipti-kondre. We da Paaska vo wi Kristen-soema, dati de vo wi membre da tori, fa Kristus ben hopo baka, komoto na ini hem grebi liebi-liebi. (Da woortoe Paaska, dati de kom vo da Pasa, disi da Engel ben pasa dem Israel-soema hoso, da neti di a ben waka rontoe, kili ala fosi pikien vo dem Egipti-soema.)
5. Da Pinkster-feest vo Djoe, dati ben de, vo dem taki Masra tangi vo da fosi njanjam, disi dem pranasi ben meki. So srefi dem ben teki da dei toe, vo dem taki Jehova tangi, vo disi a ben gi dem da wet vo hem. We te wi Kristen-soema njam da Pinkster-feest vo wi, dan wi de membre da tori, fa Masra ben seni da Santa Jeje vo hem kom na dem disciple tapo. We da srefi Jeje wi moe begi toe, vo a teki da wet vo Gado, skrifi hem tee na ini soema hatti, so leki a ben doe dati na da fosi bigi Pinkster-feest, ala di Petrus ben de preki da Evangelium vo Kristus na Jerusalem, kaba dri doezend soema ben teki da bribi wantem.
6. Na plesi vo da bigi Verzoen-dei vo Djoe, wi Kristen-soema habi da boen Vrydag; bikasi da srefi dei wi Masra Jesus ben dede na kruisi, na tapo da bergi Golgata; en nanga dati a ben poeloe ala soema zondoe. We vo da hede, so leki dem pikien vo Israel de pasa dem Verzoen-dei nanga begi en nanga fasten, so srefi a de fiti wi Kristen-soema toe, vo wi pasa da boen Vrydag nanga begi en nanga wan sari-fasi, en vo wi membre boen-boen, vo san hede Jesus ben dede so wan pina-dede, en vo wi taki hem tangi toe vo da helpi, di a ben helpi wi.
7. Da gran-domine vo ouroe testament ben go ibri jari wantron na ini da Moro-santa-plesi, ma sondro broe-doe a no ben go na ini. We so srefi Kristus ben teki hem eigen broedoe srefi, a go na ini da Moro-Santa-plesi, na ini hemel. (Ebr. 9, v. 7 & 12.) En so leki da domine ben habi da wroko toe, vo potti wan begi gi dem tra soema en vo blesi dem, so srefi Jesus de potti wan begi vo wi toe na hem lobbi tata, (1. Joh. 2, v. 1.) en a de blesi wi toe nanga foeloe Gado-blesi. (Efes.1, v.3.)
(3. Mos. Kap. 8, v. 35 tee 4. Mos. Kap. 10.)
Di Masra ben kaba Nanga Moses, vo taki alasani krin gi hem, fa dem pikien vo Israel moe holi dem srefi, na baka Moses teki Aaron nanga dem pikien vo hem, a tjari dem kom na Gado fesi na da verbond-hoso-doro, dapee a meki dem wasi dem skin, vo dem kom krin boen-boen; en dan a teki dem santa domine-klosi, weri gi dem. So srefi a teki da santa oli, a potti hafoe vo da kow-broedoe na ini, di Aaron ben kili vo hem ofrandi, en dan a kanti da oli moksi nanga da broedoe na Aaron en na ala dem trawan tapo, tee na dem klosi srefi, vo wye dem gi Gado, meki dem kom santa. We da so Moses meki dem wakti Jehova sebi dei na da santa hoso doro, so leki Masra srefi ben taki gi hem; ma di vo aiti dei a seni kali da heeli gemeente vo Israel kom makandra, meki ibriwan tjari hem ofrandi kom. En di dem alamal kom tanapoe na da hoso doro tee na Masra fesi, Moses taki gi Aaron: meki hem fosi teki hem ofrandi, tjari kom gi Masra, vo poeloe hem zondoe fosi, nanga di vo hem famili. We Aaron teki toe pikin kow, a tjari dem go na da altari, a kili dem dapee, wan vo wan zondoe-ofrandi, en da trawan vo wan bron-ofrandi, ala toe vo hem srefi en vo hem famili. Na baka a teki dem ofrandi vo ala dem tra soema toe, a tjari dem kom gi Gado, potti na tapo da altari; en da broedoe a teki, spater hafoe na da altari, en hafoe a trowei na gron. We di a klari nanga da heeli wroko, a hopo hem hanoe na dem pikien vo Israel tapo, a kali Jehova nem na dem tapo, a blesi dem, so leki Masra srefi ben taki gi Moses. Na baka Aaron komopo na baka da altari, a saka na da stoepoe vo da altari, a go tee na ini da santa hoso, hem nanga Moses makandra; en di dem komoto baka na doro, dem blesi da gemeente wantron moro ageen. We so leki dem gi dem soema da blesi, nomo ala soema kom si da bigi glori vo Jehova wantem. Bikasi da faja vo hem komoto na tapo, fadom na ondro, a teki dem ofrandi na tapo da altari, a bron dem krin-krin. We di dem soema si dati, dem plisiri vo troe, en nanga bigi respeki dem hiti dem srefi nanga bele na gron, taki Masra tangi.
Ma dem toe pikien vo Aaron, Nadab nanga Abihu, di dem ben habi da wroko vo meki smoko, dem teki dem komforo, en na plesi vo dem teki da santa faja, disi ben de na tapo da altari, so leki Moses ben leri dem, dem go teki tra soso krofaja potti na ini dem komforo, en dan dem potti specery-sani na tapo, dem tjari dati kom na Masra fesi. Ma so hesi dem kom na ini, nomo da srefi santa faja vo Gado, disi ben bron dem ofrandi na tapo da altari, a kom naki dem soema tee dem ala toe dede na Masra fesi, dem fadom na gron. We di dasani pasa so, Moses taki gi Aaron: Joe si? dati de dasani, disi Masra ben waarskouwe wi, di a taki: Mi wani, dem domine, disi kom klosibei na mi fesi, dem moe sabi, mi de wan krin santa Gado, en mi sa sori ala dem tra soema toe, mi de wan bigi Gado, meki dem moese habi respeki vo mi! -- Ma Aaron no piki hem wansani, bikasi hem srefi kom fili boen-boen, dem verdini da strafoe so. We Moses kali toe soema vo Aaron famili, a taki, meki dem hopo dem toe dede-soema skin, poeloe na ini da santa hoso, en meki dem tjari dem gowei, vo dem komoto na ini da kampoe.
Na baka Moses waarskouwe Aaron nanga dem toe tra pikien vo Aaron, Eleazar nanga Itamar, a taki: Oen no moe pliti oen klosi, weri rouw vo dem toe brara, bikasi efi oen doe so, oen kan dede so srefi toe, en dan da heeli gemeente kan kom na wan ongeluk. Ma meki dem tra brara vo oenoe, vo taki da heeli famili vo Israel, kre vo dem toe domine, disi da faja vo Masra ben bron. Oen srefi no moe komoto dia, go beri dem, vo oenoe no dede; bikasi da santa oli vo Masra de na oen hede tapo! We dem doe so, leki Moses taki gi dem. -- Na baka Masra srefi kom waarskouwe Aaron toe, a taki: Te joe nanga dem pikien vo joe kom na ini da santa verbond-hoso, loekoe boen, vo oen no dringi wini efi iniwan soortoe tranga dringi, vo oen no dede! En dati moe de wan vaste wet vo oenoe alatem, vo oen hai tan krin, en vo oen sabi, san disi krin en san disi no krin, en vo oen kan leri dem pikien vo Israel ala dem wet vo mi, di mi ben meki Moses gi na oenoe.
Na baka vo da tori, di da Paaska-moen ben kisi, dem meki dem srefi klari, vo njam Paaska, da fosi-tron vo sinsi dem ben libi Egipti-kondre, en dem doe alasani so, leki Gado ben taki gi Moses. Na baka ageen Masra kom na Moses, a taki gi hem, meki a go teli da heeli gemeente vo dem pikien vo Israel, vo taki ala mansoema, disi ouroe twenti jari en pasa, ala dem disi tranga nofo, vo go na feti. Masra taki, meki a teki hem brara Aaron nanga wan hedeman vo ibri bigi famili, vo dem helpi hem. We Moses doe so, en di dem teli ala bigi man-soema, dem finni ala nanga ala siksi hondro nanga dri doezend nanga feifi hondro en vyftig soema, disi man vo go na feti, sondro vo teli dem oeman na ini, nanga ala dem jonge mansoema, disi no kisi twenti jari jete. So srefi da heeli famili vo Levi, dati no ben de na ini toe, bikasi dem ben habi dem wroko na kerki.
We so hesi dem kaba nanga da teli, Masra gi Moses ordre, vo a platie dem twalf bigi famili vo dem pikien vo Israel na twalf pikin kondre, en meki ibriwan kondre kisi hem aparti flagra nanga wan hedeman toe, en dan a meki dem poeloe dem tenti na ini da ouroe kampoe, drifi go tee na sabana, vo dem alamal kom liebi rontoe da santa verbond-hoso, disi ben de na sei da kampoe. Masra srefi sori ibriwan kondre da reti lo vo hem, nanga da plesi toe, dapee a wani, dem moe potti dem hoso. Da heeli kampoe nanga ala dem reti-hopo strati ben tan, leki wan bigi-bigi foto. We di Moses ben potti alasani reti, na baka Masra kom gi hem ordre toe vo dem melaats-soema, a taki, dem moe poeloe dem na ini da kampoe na tra soema mindri, meki dem go liebi na wan aparti plesi na sabana sei. So srefi Masra taki toe gi Moses, fa dem moe loekoe so wan siki, en fa domine moe doe, vo krin so wan soema, meki a kan kom na ini gemeente baka; dati vo taki, efi Gado srefi ben helpi so wan soema, vo a kom boen baka.
Da srefi tem wan pikin Malata-boi, disi hem mama ben de wan djoe-oeman, ma hem tata ben de wan heiden vo Egipti-kondre, hem kom meki trobi nanga wan Israel-soema, en na ini da trobi a bigin vo floekoe dem Israel-soema, tee a kosi dem Gado srefi. We di dem trawan jeri dati, dem kisi da soema, tjari kom gi Moses, meki a strafoe hem. Ma di Moses no ben sabi reti, hoe strafoe da soema moe kisi, dem potti hem na boeje so langa, tee Masra srefi sa taki gi dem, san vo doe nanga hem. En Masra no ben drai toe, ma a piki Moses hesi, a taki, dem moe poeloe da floekoeman na ini da kampoe, tjari go na doro, en ala dem soema, disi ben jeri da floekoe vo hem, dem moe potti dem hanoe na hem hede tapo, en na baka da heeli gemeente moe kili hem nanga stoon. Bikasi da soema, disi teki Jehova, kosi hem, da dede a moese dede, alwasi hoe soema a de! We Moses go taki dati gi dem pikien vo Israel, en dem teki da floekoe-man, tjari go na doro, dem kili hem nanga stoon, so leki Masra ben taki gi Moses.
Da heeli tem, disi dem pikien vo Israel ben de tan na sei da bergi Sinai, da wolkoe vo Masra, disi ben sori dem pasi alatem, a no ben libi dem, ma dei vo dei dem ben si hem na tapo da santa verbond-hoso; na dei a ben sori blaka, ma na neti a ben letti krin, leki wan faja. We di da tem kom klosibei, disi Masra ben wani, dem moe teki dem reisi baka, Jehova kom taki gi Moses, meki a teki toe trompeti, gi na dem domine, en so hesi hem wani, ala dem hedeman moe kom makandra na Moses, dan wan domine moe teki da wan trompeti, blo na ini wan-tron nomo, bikasi dati da vo waarskouwe dem hedeman. Ma te hem wani, da heeli gemeente moe hopo, kom na hem fesi, dan dem moe teki ala toe trompeti, blo dem boen-boen, vo ala soema na ini da heeli kampoe kan jeri. En Moses doe so, leki Masra taki. We na baka Gado kom na dem na ini da wolkoe, a taki gi dem: Oen tan langa nofo kaba diaso na disi bergi sei. Hopo noja, teki pasi baka, en waka go tee oen doro na Kanaan-kondre. Bikasi da kondre jandaso, di de na oen fesi, dati de da srefi kondre, disi mi ben pramisi Abraham nanga Isaak nanga Jakob, vo mi wani gi oenoe. Go teki hem abra! We da srefi dei da wolkoe hopo toe, a komoto na tapo da santa hoso, a waka go na dem fesi. En so hesi dem si da wolkoe na dem fesi, nomo Aaron go na ini da Moro-santa-plesi wantem, a teki klosi, a tapo da genade-troon boen-boen, nanga da santa kisi toe, disi ben habi da wet-boekoe nanga da manna, vo no wan soema moe dede, te a si ala dem santa-sani, efi te a meli dem. Na baka dem tra domine bigin vo loesoe da heeli hoso na piesi, dem gi dem leviti vo tjari. Ala dati ben pasa wan jari nanga wan moen na baka, sinsi dem ben libi Egipti-kondre, a ben go na ini toe moen kaba, tee tin na negi dei ben pasa srefi, ma di vo twenti da wolkoe hopo. Pikin-moro a ben meki wan heeli jari, disi dem ben liebi na sei da bergi.
We di dem pikien vo Israel teki pasi baka komopo na Sinai-kondre, ala dem twalf bigi famili ben platie, tee dem meki twalf pikin kondre. En da so dem ben waka toe, trawan na trawan baka. Da kondre vo Juda famili ben waka na fesi nanga dem flagra en nanga dem hedeman, en ala dem trawan kom na dem baka, ibriwan kondre na hem reti lo, so leki Gado srefi ben potti dem. Ma dem leviti, di ben tjari da santa hoso nanga da kisi vo Masra, dem ben waka na mindri, dati taki, hafoe vo dem pikien vo Israel ben waka na fesi, en hafoe ben waka na baka. En da wolkoe vo Masra, dati ben waka go na dem fesi, vo sori dem pasi; so srefi a ben tapo da tranga zon gi dem, vo da heeli hipi ben waka na ondro da wolkoe, vo da zon no bron dem. En da wolkoe no ben libi dem wan dei srefi. So hesi da wolkoe komopo na tapo da hoso, gowei, nomo dem pikien vo Israel hopo toe, dem waka go na hem baka; ma te da wolkoe saka baka, go tan na da hoso tapo, dan dem pikien vo Israel ben tanapoe dapee toe, dem wakti Masra so langa, tee da wolkoe hopo baka. We da so dem ben de na ondro Masra komando srefi; te hem wani, dem bro? dem go sidom de bro; en te hem wani, dem hopo? dem teki pasi baka, dem go. Doro nomo dem ben wakti da wolkoe. En alatem te dem hopo da santa verbond-kisi, vo a waka, Moses ben lobbi taki: Hopo, Jehova! meki dem vyanti vo joe panja gowei, en dem soema, disi no lobbi joe, meki dem teki pasi de ron komoto na joe fesi nanga frede! Ma te dem leviti saka da kisi vo bro, dan Moses ben taki: Kom baka, Jehova! kom loekoe dem tin doezend tron doezend Israel-soema vo joe, dem dia!
1. We da tori vo dem toe pikien vo Aaron, disi da faja vo Gado ben kili na sei da altari, dati wi alamal moe teki toe, leki wan tranga waarskouwe, meki wi kisi respeki vo Masra en vo hem hoso. Somtem dem toe domine ben dringi toemoesi wini, bifo dem go na dem diensti; somtem dati ben meki dem no ben sabi reti, fa dem moe doe da wroko. Koning Salomo taki: Wakti joe foetoe boen, te joe go na joe Gado-hoso, (Kap. 4, v. 17.) en meki da Jeje vo Masra kan naki joe hatti, vo joe kom na joe Gado fesi nanga respeki en nanga begi!
2. So srefi da tori vo da floekoeman, di dem ben kili nanga stoon, dati de gi wi wan boen waarskouwe toe, vo wi no teki Gado nem, meki spotoe nanga hem, efi vo kosi hem srefi. Ke meki ala soema kisi wan frede vo dati! Bikasi tee tidei jete nofo soema de, disi habi da takroe maniri, vo kali Gado nem nanga floekoe en nanga sweri, en nanga spotoe, en nanga kosi-kosi srefi. Pikin soema srefi no habi sjem toe vo doe so, en nofo vo dem kan doe dati, sondro wan bigi soema de krasi dem vo dati, bikasi somtem dem bigi soema srefi ben leri dem so. Ma meki ala floekoeman sabi, alwasi no wan liebi-soema sa krasi dem, tog iniwantem Gado Masra sa finni dem, a sa pai dem vo da floekoe en vo da kosi-kosi, disi dem teki hem nem, kosi hem. Da so hem srefi taki. (2. Mos. 20, v. 7.)
3.Jehova, da bigi Koning vo dem Israel-soema, hem srefi ben de da reti kompasi vo dem, disi ben waka na dem fesi na ini da faja-wolkoe, sori dem da reti pasi, di dem moe waka na ini da woestein. We so srefi wi lobbi Helpiman Jesus Kristus de da hedeman vo hem gemeente en da reti kompasi vo ala bribi-soema, di de waka na wi fesi, sori wi da reti pasi, di wi moe waka na disi grontapo, meki wi kan doro nanga boen tee na ini hemel.
(4. Mos. Kap. 14.)
Di dem pikien vo Israel ben komopo na Sinai, waka na da wolkoe baka, dri dei nomo dem ben de na pasi de waka na ini da bigi woestein kondre, so leki Jehova srefi ben tjari dem, a tan leki da pasi kom verfeeli dem; en dem alamal bigin vo meki wansani, leki dem mandi nanga Gado. We dati no ben switi na Masra jesi vo jeri, ma hem hatti kom bron nanga dem, en da faja vo hem bigin vo naki dem, a bron srefi na dem mindri, tee a teki wan toe dri kampoe vo dem, disi ben de na bakasei. Ma di dem alamal kom kre dasani gi Moses, en di Moses begi Masra gi dem, djoesnoe da faja kom dede baka. We da srefi plesi dem kali branti-plesi, vo disi da faja vo Masra ben bron dem kampoe dapee.
Na baka som vo dem vreemde soema, disi ben waka go nanga dem, dem laage soso-soema, dem kom luste switi mofo, en dati meki bakatem dem Israel-soema srefi bigin toe vo kre ageen, dem taki: Ke, soema sa gi wi switi mofo diaso, vo wi njam? Datem di wi ben de na Egipti-kondre, wi ben habi so meni fisi vo njam, nanga pampoen, nanga kom-komroe, nanga watramoen, nanga kooloe, nanga ajoen; vo soso srefi wi ben kisi vo njam, sondro vo bai. Ma diaso, da wan hangri-plesi vo troe; bikasi no wan tra njanjam wi de si na wi hai, leki manna nanga manna soso. -- We dati meki Masra hatti kom bron nanga dem vo troe, en Moses srefi kom na wan bigi verlegi toe, a kre hem nootoe gi Masra, a taki: Ke mi Masra, fa joe ben potti so wan hebi wroko na joe foetoeboi tapo, vo mi wawan teki ala dem soema, leki wan mama de teki hem pikien, tjari go na da kondre, disi joe ben pramisi gi dem avoo vo dem? Dem alamal de kre vo switi mofo, dem taki, meki mi gi dem meti vo njam. Ma hoepee mi sa kisi switi mofo, vo gi so meni soema? Mi wawan no kan loekoe ala dem soema, bika da wroko de moro mi. Efi joe lobbi mi, betre joe kili mi wantem, meki mi komopo na ini da pina-liebi!
We di Moses begi Gado so, hem boen Masra kom piki hem wantem, a taki: Go teki sebitentin soema vo dem gran-soema en hedeman, di joe sabi, kali dem kom gi mi na da santa hoso doro, meki dem tanapoe na joe sei, wakti mi dapee. Dan mi sa saka kom na ondro, kom taki nanga joe, en mi sa teki hafoe vo da jeje, disi de nanga joe, potti na dem tapo, meki dem helpi joe na ini da hebi wroko, vo joe wawan no habi da trobi nanga ala dem soema. En dan go taki nanga ala dem tra Israel-soema, meki dem go wasi, holi dem srefi klari vo tamara, bikasi dem sa kisi meti vo njam. Taki gi dem: Masra Jehova srefi ben jeri da kre vo oenoe, di oen ben taki: Soema sa gi wi switi mofo vo njam? Na Egipti-kondre wi ben habi moro betre liebi, leki diaso. We Masra sa gi oen switi mofo nofo. No vo wan enkli dei wawan oen sa kisi, efi vo toe dei, efi vo feifi dei, en no vo tin dei toe, efi vo twenti dei, ma vo wan heeli moen langa oen sa kisi, tee bakatem a sa kom fiste na oenoe, oen no sa man vo smeri hem moro; en dati de, vo di oen no wani Jehova moro, di de na oen mindri, en disi oen ben kre na hem fesi, taki, betre oen ben tan na Egipti-kondre.
Ma di Moses no ben begreipi Masra so hesi, a taki: Ke mi Masra, siksi-hondro-tron doezend soema de, dem bigi mansoema wawan, sondro vo teli dem oeman nanga dem pikien na ini, kaba joe taki, joe sa gi dem meti vo njam wan heeli moen langa. Hoefa dati kan de? Somtem joe wani, dem moe kili ala dem kow nanga dem skapoe nanga dem krabita? En alwasi dem doe so, dem sa sari vo so meni soema? Ofoe somtem joe sa poeloe ala fisi na ini watra, vo wi tjari kom gi dem, dati sa nofo? Ma Masra gi Moses wan verwyti vo dati, a taki: Hoefasi, joe denki, Jehova hanoe kom sjatoe now, tee a no kan helpi moro? Djoesnoe joe sa si, efi a sa kom so, leki mi ben taki gi joe.
We nanga dati Moses kom membre da wonder-wroko baka, disi Masra ben doe tra jari, di a ben gi dem switi mofo wantron kaba. En wantem Moses go kali dem sebitentin gran-soema kom makandra na da santa hoso doro, en da srefi momenti Jehova srefi saka toe na ini da wolkoe, a taki nanga Moses; en dan na ala soema hai a teki hafoe vo da Profeti-jeje, di ben de nanga Moses, potti na dem trawan tapo. We so hesi da Jeje kisi dem, nomo dem alamal bigin vo taki profeti-tori, en nanga dati ala dem tra Israel-soema kom si, da Jehova srefi ben potti dem sebitentin soema gi Moses, vo dem helpi hem. Bikasi datem, disi Moses srefi ben teki dem sebitentin kroetoeman tra jari, so leki hem wefi tata Jetro ben rai hem, datem dasani no ben pasa na so wan bigi fasi, Masra no ben habi wroko na ini. We da srefi joeroe toe vo dem sebitentin gran-soema ben de, disi no ben kom na da santa hoso, da Eldad nanga Medad, ma ala di dem ben tan na hoso, da srefi Jeje kom kisi dem dapee toe, en dem ala toe bigin vo taki profeti-tori na ini da kampoe. We di wan jonkman djompo kom verteli dati na Moses, Josua taki gi Moses, meki a tapo dem toe soema, vo dem no taki profeti-tori moro. Ma Moses taki: Vo san hede dan? Mi wensi, Masra moe teki hem Jeje, gi na ala ala soema vo hem, meki dem alamal taki profeti-tori.
We di Moses nanga dem gran-soema kom baka tee na ini da kampoe, nomo da winti vo Masra hopo, a tjari so meni pikin fowloe komopo na zee-kanti, panja dem da heeli kampoe rontoe, en dem fadom so foeloe trawan na trawan tapo, tee da heeli gron ben lai nanga pikin fowloe, dem ben lidom fo foetoe hei vo gron.-- A ben de wan soortoe pikin fowloe, leki anamoe.-- We dati ben boen na dem Israel-soema, en da srefi dei nanga da heeli neti, nanga wan dei moro dem ben de nanga tranga wroko, vo kisi dem fowloe, en vo hanga dem na ini zon da heeli kampoe rontoe, meki dem dre leki barbakoto. En dem ben kisi so meni fowloe, dati dem no ben man vo njam ala, alwasi wan heeli moen dem no njam wan tra-sani, leki da switi mofo wawan. Ma nanga dati dem ben kisi dem strafoe toe wantem-wantem, so leki a ben fiti da bigi-hai-fasi vo dem. Bikasi ala di da switi mofo ben de na dem tifi jete, dem no ben njam ala, di dem ben dre srefi, Masra hatti kom bron nanga dem bigi-hai-soema, a strafoe dem nanga siki, tee foeloe vo dem kom dede dapee. We vo da hede dem kali da srefi plesi dem switi-mofo-grebi, vo di dem ben beri dem gridiman dapee.
Na baka di dem komopo dapee, dem waka wan heeli dei, tee dem go meki kampoe na Hazerot. We na dapee Moses sisa Mirjam nanga hem brara Aaron meki trobi nanga Moses vo da blaka oeman, di a ben teki na Midian-kondre. En na ini da trobi dem haksi hem toe, dem taki: Hoefasi, te Masra habi vo taki wi wansani, da nanga Moses wawan a de taki? a no de taki nanga wi toe? Ma Moses no piki dem, bikasi hem no ben lobbi soekoe reti, en a ben de wan safri soema toe, a ben habi foeloe pasiensi, moro leki tra soema. Ma alwasi Moses srefi no ben soekoe hem reti, tog hem boen Gado, di ben jeri dasani, hem no ben kan verdrage da taki vo dem, en vo da hede a meki dem ala dri kom makandra na da santa hoso, vo a koti da kroetoe gi dem. We so leki dem kom dapee, nomo Jehova srefi saka toe na ini da wolkoe, a kali Aaron nanga Mirjam kom na hem fesi, a haksi dem, efi dem no sabi, Moses de so wan toemoesi vertrouw foetoeboi vo hem, disi alatem a de taki nanga hem hai na hai, so familiari, leki a no doe nanga wan tra profet, a meki Moses kan si hem fesi srefi? We fa dem kan habi hatti dan, vo meki trobi nanga hem boen foetoeboi Moses? En nanga hattibron Masra libi dem, a gowei. Ma da srefi momenti, disi da wolkoe komopo na dem hai, Moses sisa Mirjam kisi wan branti na hem skin, tee ala hem skin kom weti leki sawawa. We di Aaron kom si dati, a go begi hem brara Moses, vo a gi dem pardon, en vo a potti wan begi toe gi hem sisa. En Moses doe so, a begi Masra tranga, a taki: Ke mi Gado, helpi hem, vo a kom boen baka! Ma Masra taki gi hem, meki dem poeloe Mirjam na ini kampoe, potti na wan aparti plesi na sabana-sei, vo a tan dapee sebi dei, sloto hem na ini hoso; na baka dem kan seni teki hem baka. We da vo Mirjam hede dem alamal ben verpligti vo tan na da plesi so langa, tee dem poeloe hem baka.
We da tori vo dem bigi-hai-soema, disi ben njam da switi mofo na so wan gridi-fasi, tee dem kom siki, en nofo vo dem kom dede srefi, dati de sori wi, fa Gado de strafoe dem soema, disi no tevrede nanga da njanjam, disi hem srefi gi dem, nanga dem soema toe, disi habi da maniri alatem, vo njam en vo dringi toemoesi pasa-marki, leki dem bele da dem Gado. We nofo soema habi da srefi maniri tee tidei jete, en nanga dati dem sjatoe da liebi vo dem, so leki wi ben jeri vo dem Israel-soema.
Na baka di dem pikien vo Israel komopo na Hazerot, dem waka wan heeli pasi ageen; fosi dem kom na Paran, en na baka dem meki kampoe na Kades-barnea, dati ben de reti na mofo Kanaan-kondre. We vo da hede Moses taki gi dem, meki dem feti hesi now, vo dem go teki da kondre abra, dem no moe frede; bikasi da heeli kondre, di dem si na dem fesi de, a de da srefi kondre, disi Masra Jehova ben pramisi dem. Ma dem alamal kom na Moses, dem taki gi hem, betre dem voorzigti, meki dem seni soema go na fesi go loekoe da kondre fosi, nanga dem foto, vo dem kan piki dem baka, en vo dem sori dem da reti pasi, di dem moe teki vo waka. Moses taki, a boen. En Masra srefi toe, alwasi dasani no ben boen na hem kweti-kweti, disi dem no ben bribi hem ageen moro fara, leki dem hai kan si, tog di Moses haksi hem pasi, a no ben wani tapo dem nanga tranga, ma a taki, meki ibriwan hedeman seni wan soema vo hem kondre go loekoe Kanaan. We Moses doe so, a teki dem twalf soema, a taki gi dem, meki dem waka go na fesi go loekoe da heeli kondre boen-boen, vo dem kan piki hem baka, hoe speli soema de liebi dedapee, efi a sa trobi vo feti nanga dem, ofoe somtem a no sa trobi, en efi soema de foeloe na da kondre. So srefi Moses gi dem ordre toe, vo dem ondersoekoe da gron vo da kondre, efi da doti vo hem fatoe, ofoe somtem a mangri; en fa dem foto de, efi dem habi tranga stoon-hoso, ofoe somtem dem soema de liebi na masanga soso. So srefi Moses taki, dem moe loekoe dem boom vo da kondre toe, en meki dem soekoe wan vroektoe, tjari kom, vo sori. Ma dem no moe frede.
We dem soema doe so, dem go waka da heeli kondre doro, en dem potti hai na alasani. Wan dei di dem kom miti foeloe droifi-boom na sei wan pikin riba, dem go koti wan hanoe, di ben habi wan toemoesi bigi droifi, en dem hanga hem na wan tiki tapo, meki toe soema tjari hem. So srefi dem teki wan toe dri granat-apla dapee nanga som figa, tjari go nanga dem. We di dem ben waka rontoe fotentin dei langa, dan dem tron baka, dem kom piki Moses nanga Aaron nanga ala dem tra Israel-soema, fa dem ben finni da kondre, dem taki: Da wan mooi kondre vo troe, loekoe vroektoe vo hem! Melki nanga honi soso de dapee. Ma dem soema, disi de liebi dedapee? dem tranga vo troe; kaba dem habi bigi-bigi foto, nanga tranga stoon-hoso; en wi ben si wan speli soema toe, disi bigi en langa moro ala tra soema, dati da dem Enaki.
We di dem pikien vo Israel jeri so wan tori, dem alamal kom lasi hatti krin-krin, en dem hopo wan babari, dem kre da heeli neti doro. En da heeli gemeente bigin vo meki trobi nanga Moses en Aaron, dem taki: Masra no lobbi wi moro, da vo dati hede a ben poeloe wi na Egipti, nomo vo dem Amoritri moe kili wi. Betre wi ben dede na Egipti-kondre! En betre srefi, wi dede diaso na pasi jete. Vo san hede Masra moe tjari wi go na so wan kondre, dapee dem fetiman sa kili dem oeman vo wi; en dem pikien vo wi dem sa teki, foefoeroe. A no moro betre, wi drai baka go na Egipti-kondre? En dem taki na makandra: Meki wi soekoe wan hedeman, potti na wi tapo, en meki wi go baka na Egipti! Ma Moses potti alasani na dem fesi, a taki: No no! No frede dem fetiman! Jehova, da Gado vo oenoe, di de waka go na oen fesi alatem, hem srefi sa helpi oenoe, so leki a ben helpi oen na Egipti-kondre en na pasi, tee oen doro so klosibei na da kondre kaba.-- Ma di ala dati no ben helpi, vo meki dem pikien vo Israel kom bedaari baka, Moses nanga Aaron hiti dem srefi nanga bele na gron, en na hai vo da heeli gemeente dem begi Jehova, vo hem srefi moe kom helpi dem. So srefi Josua nanga Kaleb, toe vo dem twalf soema, di ben go loekoe da kondre, dem doe foeloe moeiti toe, vo poeloe da frede baka na dem Israel-soema hatti, dem taki: Da kondre, di wi ben waka doro vo loekoe, da wan toemoesi mooi kondre; melki nanga honi soso de dapee. We efi Jehova de nanga wi, san wi sa frede dan? Hem srefi sa tjari wi go na ini da kondre, en a sa gi wi hem toe, meki wi kom masra vo hem. Ma loekoe boen, vo oen no meki oproeroe, en vo oen no frede dem soema vo da kondre, bikasi wi sa njam dem, leki wi njam brede. Dem no habi wan soortoe helpi, ma wi habi Jehova na wi sei. Kom go, meki wi teki da kondre, bika troe-troe, wi sa dwingi dem soema. Ma dem tra tin soema, di ben go loekoe da kondre, dem taki: No no, wi no kan go feti nanga dem soema, bikasi dem tranga moro leki wi. We dati meki da heeli gemeente vo Israel kisi hattibron nanga Josua en nanga Kaleb, tee dem bari, taki, meki dem kili dem nanga stoon.
Ma ala di dem ben meki da oproeroe so, na wan bro Jehova srefi kom sori dem da bigi glori vo hem na tapo da santa hoso, vo ala soema hai si hem, en vo dem kisi respeki. En dan Masra haksi Moses, a taki: Hoe langa dem soema sa dreigi mi so? En hoe langa dati sa go doro so, disi dem no wani bribi mi, alwasi mi doe so meni wonder-wroko na dem hai kaba? We mi sa poeloe dem na mi fesi, kili dem alamal; en dan mi sa teki joe, meki joe tron wan bigi kondre, moro bigi srefi, leki dem de noja. Ma Moses begi Masra na wan toemoesi saka-fasi, a taki: Ke mi Masra, te dem Egipti-soema sa jeri dati, sani dem sa taki dan? Tog dem srefi sabi, fa joe ben poeloe dem Israel-soema vo joe na dem ondro na so wan wonder-fasi. -- So srefi dem soema vo disi kondre diaso, di ben jeri toe, fa joe srefi na ini da wolkoe ben tjari dem soema vo joe; sani dem sa taki, te dem jeri, dem alamal lasi na pasi? Dem heiden-soema, disi ben jeri da bigi nem vo joe, dem no sa meki spotoe na baka, taki, Jehova no ben man vo tjari dem soema go doro, tee na ini da kondre, di a ben pramisi dem; da vo dati hede a ben kili dem alamal na pasi? We wi Masra, di joe srefi ben taki, Jehova habi foeloe pasiensi, en a de sari vo soema, a de gi dem pardon, alwasi ala ogri moe habi hem paiman: we mi Masra, gran-tangi! sari vo dem soema, en gi dem pardon, so leki joe ben pardon dem so menitron kaba, sinsi dem komopo na Egipti tee tidei! -- Masra taki: We, so leki joe begi mi; mi gi dem pardon kaba. Ma dati mi taki gi joe, ala kondre sa kom si, Jehova da wan bigi Gado vo troe. Bikasi ala dem mansoema, disi ben si dem wonder-wroko vo mi na Egipti-kondre en na pasi, no wan vo dem sa kom si da kondre, di mi ben pramisi dem tata, vo di dem ben tesi mi tin-tron kaba. Ma mi foetoeboi Kaleb nanga Josua, dem wawan sa si da boen kondre, vo di dem hatti ben krin, vo waka na mi baka. So srefi dem onnoozloe pikien vo dem, disi dem ben frede, somtem dem fetiman sa kom foefoeroe dem, tjari gowei, dem sa doro toe na ini da boen kondre; mi srefi sa tjari dem go na ini, meki dem si dasani, disi dem tata no ben wani. Ma dem bigi soema, disi ouroe twenti jari en pasa, en disi ben meki da komplot nanga da oproeroe, so leki mi srefi jesi ben jeri, dem sa kisi dasani toe, disi dem srefi ben wensi; mi sa meki oen tron baka wantem go na Egipti-kondre tee na da redi zee, ma mi sa drai oen so langa na pasi, tee oen alamal dede na woestein. Fotentin dei dem twalf soema ben de na pasi, vo go loekoe da kondre: we ibriwan dei mi sa teki vo wan jari, meki oen tjari da strafoe vo oenoe so langa, vo oen kom si, san dati wani taki, te mi poeloe mi hanoe, libi oen soso. We ala dem fotentin jari dem pikien vo oenoe sa swervi rontoe nanga oenoe, en loekoe dem meti; ma na baka te oen alamal dede, dan mi sa teki dem pikien vo oenoe, tjari go na Kanaan, meki Josua platie da kondre gi dem.
We di Moses kom na dem Israel-soema, en di a taki ala dem woortoe vo Masra gi dem, da srefi tem Masra meki wan siki kisi dem tin soema, di ben go loekoe da kondre, en da siki kom ogri so, dati dem ala tin dede moesoe-moesoe na Masra fesi. Ma Josua nanga Kaleb, di ben de vo dem twalf soema toe, dem no kisi wan ogri, dem tan na liebi. We di dem tra Israel-soema si da tranga justici, disi Gado ben strafoe dem tin soema, en di dem jeri da boodskopoe toe, disi Masra ben seni gi dem, dati meki dem kom na wan bigi sari, en dei-broko dem alamal kom na Moses, dem taki: We, wi sa go, wi sa doro na ini da kondre, so leki Masra ben wani; bika wi si, wi ben doe ogri. Ma Moses taki: No no, sani oen wani pasa Gado mofo wantron moro ageen? Bika hem no wani moro, vo oen go. Efi oen go, dasani no de go waka boen gi oenoe, bika Masra no de go nanga oenoe. Loekoe boen, vo oen no go dapee, vo dem fetiman no kili oenoe! Mi taki gi oenoe. Ma alwasi sani Moses ben doe, vo tapo dem, tog dem no harki na hem, ma nanga tranga dem go, dem libi Moses nanga da santa verbond-kisi na ini da kampoe. We so hesi dem kom doro pikin klosibei na da kondre, nomo dem Amalekitri nanga dem Kananitri, disi ben wakti dem na mindri dem bergi, dem alamal djompo komopo na doro, dem ron go miti dem Israel-soema hafoe pasi, dem fom dem, en dem jagi dem, dem ron na dem baka wan heeli tem. We di dem kom baka na Moses, dem kre toemoesi na Masra fesi, vo a teki dem baka, ma Masra no wani jeri dem moro. En dem drai wan langa tem na Kades jete, bifo dem tron baka go na Egipti, so leki Masra ben taki gi dem.
1. Moses ben de wan toemoesi vertrouw soema vo hem Gado, so srefi Josua nanga Kaleb toe; bika Masra srefi ben pryze dem vo dati na ala tra soema hai. We meki wi alamal soekoe dan, vo wi toe kom trouw disciple vo Jesus, en vo a kan pryze wi toe wan dei, taki: Kom mi boen foetoeboi, joe de wan vertrouw soema! We di joe ben loekoe joe pikin wroko so trouw, mi sa potti joe, vo joe loekoe wan moro bigi wroko gi mi. Kom go, njam plisiri nanga joe Masra! (Matt. 25, v. 21.)
2. Ma meki wi teki wan waarskouwe toe na dem tra Israel-soema! Bikasi alwasi Jehova srefi ben poeloe dem na Egipti-kondre, en a ben pramisi dem, dati a sa tjari dem go na Kanaan, tog no wan vo dem ben doro na da kondre. En dati ben kom vo da tranga hatti vo dem, disi dem no ben bribi Gado, en disi dem no ben wani jeri hem. We di Masra ben pramisi wi toe, taki, hem sa teki wi kom na hem kondre, vo bro na hem sei, meki wi frede dan, vo wi no lasi tem, vo soekoe da switi bro vo Masra, meki no wan vo wi moe fika na baka. (Ebr. 4, v.1 & 11.)
3. Meki wi no trobi Masra toe nanga mandi, so leki som vo dem ouroe-tem-soema ben mandi, kaba Masra meki wan ogri siki kom kili dem! (1. Kor.10, v.10.)
(4. Mos. Kap. 21.)
(Tori vo da soema, di no holi da Saba-dei, en vo da oproeroe, di Kora ben meki; en vo da tiki vo Aaron; en vo da watra, disi Moses ben poeloe na ini wan bigi stoon, en vo dem faja-sneki.) Di Gado no ben wani, dem pikien vo Israel moe doro na Kanaan-kondre so wantem so, leki fa dem ben de, we helpi no de, dem moese drai baka go na Egipti-sei, so leki dem srefi ben wensi; en dati meki dem komopo na Kades, dem go baka tee na ini da soso woestein, disi dem ben pasa doro wantron kaba. En da srefi pasi dem holi wantem, dem waka hem doro, tee dem kisi wan plesi, disi dem kali Jotbat. We na dapee dem liebi langatem, bikasi da kondre ben habi foeloe pikin riba nanga mooi sabana.
We ala di dem ben de dapee, Jehova kom taki wantron moro nanga Moses vo dem ofrandi, di dem moe tjari gi hem, te dem kom na Kanaan-kondre, vo dem sabi alasani boen-boen. So srefi a taki toe gi hem: Efi somtem wan soema sa misi wansani na ini dem ofrandi, kaba a doe dati, leki wan soema, di no ben sabi moro betre, efi somtem hem vergiti, so wan soema moe tjari aparti ofrandi kom gi Masra vo dasani, di a ben misi, en dan a sa kisi pardon vo hem zondoe. So srefi te da heeli gemeente kom misi wan woortoe vo Gado, sondro dem ben sabi moro betre, efi somtem nanga dem vergiti, dan da gemeente moe teki wan jonge kow, tjari kom gi Masra vo wan bron-ofrandi, nanga wan krabita-boko vo wan zondoe-ofrandi; dati sa meki Gado gi dem pardon vo dasani, di dem ben misi. Ma efi wan soema doe wan ogri nanga hem boen sabi, dati de so ogri, leki a kosi Jehova srefi, en so wan soema dem moe kili, meki a komopo na ini gemeente; bikasi a kaprisi vo jeri Jehova, a loekoe hem gebod vo wan soso-sani, en vo da hede so wan soema no kan tan na ini gemeente, a moese kisi hem paiman.
We ala di dem pikien vo Israel ben de na da woestein-plesi, wan dei dem miti wan soema de piki hoedoe na Saba-dei, en dem soema, disi ben finni hem nanga da wroko, dem kisi hem, tjari hem go na Moses en na Aaron, en na fesi vo da heeli gemeente. Ma di dem no ben sabi so krin, san vo doe nanga so wan soema, dati meki dem potti hem na boeje so langa, tee Masra srefi kom piki Moses, a taki: Da soema moe dede, da heeli gemeente moe kili hem nanga stoon. We dem doe so, dem poeloe da soema na ini da kampoe, tjari go na doro, en na dapee dem kili hem nanga stoon, so leki Jehova ben taki gi Moses.
Na baka wan tra-sani kom pasa ageen. Wan gran-soema vo Levi famili, disi dem kali Kora, nanga toe trawan moro vo Ruben famili, dem nem Datan nanga Abiram, dem ala dri ben soekoe granwei kaba, vo meki dem srefi bigi, en di dem ben koenkroe alatem nanga dem tra hedeman vo kondre, we wan dei dem kali toe-hondro en vyftig soema vo dem kom makandra, dem meki barki nanga dem, en nanga oproeroe dem alamal kom na Moses en na Aaron, dem taki: Kaba na wi baka! Oen meki oen srefi bigi toemoesi na wi tapo. Ala soema vo da heeli gemeente dem no de santa soema? disi Jehova srefi de liebi na dem mindri? We san oen meki oen srefi bigi dan, vo oenoe wawan moe komanderi da gemeente vo Masra?
We di Moses jeri so wan taki, nomo a hiti hem srefi na gron gi Masra, a kre hem nootoe gi hem boen-hatti Gado, en dan fosi a piki Kora nanga dem tra oproeroe-man, a taki: A boen, tamara Jehova srefi sa kom sori wi, hoesoema hem sa wani vo hem domine, di moe loekoe hem altari. We joe Kora, nanga oen alamal, di de na ini da oproeroe! Tamara oen teki oen komforo, potti krofaja na ini, nanga specery-sani na tapo, tjari kom na Masra fesi, meki Jehova srefi sori wi da soema, di a wani vo hem domine. Na baka Moses teki Kora aparti, a potti alasani na hem fesi, a taki: Loekoe dan, oen pikien vo Levi! Oen hatti no kouroe jete, disi Masra teki oenoe na ini da gemeente vo Israel, a meki oen kom klosibei na hem, tee vo oen dini hem na ini da santa hoso vo hem, en vo oen tanapoe na da gemeente fesi, dini dem brara vo oenoe? Kaba now oen soekoe, vo tron domine srefi? We joe Kora, nanga ala dem trawan, di holi nanga joe, oen de oproeroe-soema, disi de feti nanga Jehova srefi. Bikasi soema da Aaron, disi oen meki trobi nanga hem?
Na baka Moses seni kali Datan nanga Abiram toe, meki a kan taki nanga dem aparti, bikasi dem toe soema ben de vo Ruben famili. Ma dem taki, dem no sa kom, en nanga asranti srefi dem seni haksi Moses, efi a no kori dem nofo jete, disi a ben poeloe dem na da switi Egipti-kondre, nomo vo a kili dem na pasi, na ini da woestein? Efi somtem a denki, da komanderi moe go doro so? Dem taki: Ja wi si, joe tjari wi mooi na ini da fatoe kondre, disi habi so meni melki nanga honi! Hoepee dem pranasi nanga dem droifi-djari, di joe ben pramisi wi? Joe denki, joe wani blindi wi hai, meki wi no kan si? No no, wi no de go kom. We dem woortoe kom hati Moses toemoesi, en dati meki a go kre hem nootoe ageen gi Jehova, a taki: Ke mi Masra vo mi, no teki da ofrandi vo dem! Dem taki, mi holi dem toemoesi na ondro duim, kaba no wan tem mi no ben soekoe wansani vo dem, no wan soso boeriki srefi; en no wan vo dem kan taki toe, mi ben doe hem kroekoetoe.
We dei-broko Kora nanga ala dem tra oproeroe-man teki dem komforo, dem potti krofaja na ini, nanga specery-sani na tapo, en da so dem alamal kom tanapoe na da santa hoso-doro, so leki Moses ben taki gi dem. En Moses srefi nanga hem brara Aaron go tanapoe toe na dem sei. So srefi da heeli gemeente kom dapee toe, bikasi Kora ben koenkroe nanga dem, a hali dem ala na hem sei. We di dem alamal tanapoe de wakti Masra, na wan bro Jehova kom sori dem da krin glori vo hem tee da heeli gemeente si hem, en dan a waarskouwe Moses nanga Aaron, a taki: Komoto hesi diaso na da gemeente, meki mi kili dem wantem! Ma Moses nanga Aaron hiti dem srefi nanga bele na gron gi Masra, dem begi hem, taki: O Gado! joe di joe de da Gado vo ala liebi-soema! We te wan enkli soema doe wan ogri, joe sa meki joe hatti bron nanga da heeli gemeente, vo da wan soema hede? Masra taki: We go dan, taki gi da gemeente, meki dem feti vo poeloe dem hoso na sei dem hoso vo Kora en vo Datan en vo Abiram, meki ala boen soema komoto hesi na dem ogri soema buurti, dem no moe meli wansani vo dem, vo dem no kisi wan ogri toe. We Moses doe so, a teki som gran-soema vo Israel, en dan a go poeloe da gemeente krin-krin na sei vo dem dri soema hoso. Ma ala dati Datan nanga Abiram no kisi frede jete, dem teki dem oeman nanga dem pikien, dem go tanapoe na dem doro-mofo. En Moses waarskouwe da gemeente, a taki: Pikin-moro oen sa si, efi da Jehova ben seni mi, vo doe ala da wroko, di mi ben doe, efi mi ben doe dati nanga mi srefi wani. We loekoe ala dem soema disia! Efi dem sa dede so wan srefi dede, leki ala tra soema, dan oen kan taki, a no Jehova ben seni mi. Ma efi Masra doe wan aparti sani nanga dem, efi a meki gron hopo hem mofo, swali dem liebi-liebi, dan oen kan si, dem ben kosi Jehova srefi. We pikin-moro dem woortoe no komopo jete na Moses mofo, ofoe da gron pliti na ondro dem foetoe, a swali Kora nanga Datan nanga Abiram liebi-liebi, nanga ala dem famili toe, nanga dem hoso nanga dem goedoe. En ala dem tra Israel-soema, disi ben tanapoe rontoe de loekoe, di dem jeri da babari vo dem soema, dem alamal ron komoto dedapee, dem taki, somtem da gron kan swali dem srefi toe. We da srefi joeroe wan faja vo Gado kom kili dem toe-hondro en vyftig soema toe, disi ben de na ini da oproeroe, en disi ben tanapoe nanga dem komforo na da santa hoso doro. We da so ala dem ogri soema kisi dem strafoe wantem vo da oproeroe, di dem ben meki.
Na baka Masra taki gi Moses, meki Eleasar, da pikien vo Aaron, teki ala dem komforo vo dem toe-hondro en vyftig soema, meki a masi dem tee dem tron leki fini blakri, en dan a moe hanga dem na da altari rontoe, meki dem Israel-soema kan si dem alatem na dem hai, vo dem kisi respeki, en vo no wan soema, buiti Aaron famili, moe habi hatti moro, vo go meki smoko gi Masra. We dei-broko mamantem da heeli gemeente vo dem pikien vo Israel kom meki trobi ageen nanga Moses en Aaron, dem taki: Da oenoe de dem soema, disi ben kili so meni soema vo Masra. -- Ma di Moses nanga Aaron go kibri tee na da santa hoso, Jehova srefi kom helpi dem foetoeboi vo hem, a meki foeloe soema kom dede moesoe-moesoe, sondro dem ben siki. Dem ben meki tin na fo doezend nanga sebi-hondro soema, disi kom dede na ini da strafoe, di Gado Masra ben strafoe dem. En moro foeloe soema ben sa dede jete, efi Moses nanga Aaron no ben begi Jehova, vo a meki da dede kaba na dem mindri.
Na baka Masra taki gi Moses, meki a teki twalf tiki na dem pikien vo Israel; ibriwan vo dem twalf hedeman moe gi hem wan tiki; en dan a moe teki di vo Simeon famili, skrifi Simeon nem na hem tapo, di vo Ruben famili moe kisi Ruben nem, en so srefi a moe marki ala dem twalf tiki, vo ibriwan kisi da nem vo hem avoo. Ma da tiki vo Levi famili, dati moe kisi Aaron nem. We te a marki ala kaba, dan a moe tjari dem twalf tiki go na ini da Moro-santa-plesi, potti dem reti na da verbond-kisi fesi, meki dem tan wan neti dapee. We da soema, disi Jehova srefi wani vo hem domine, da soema tiki sa groen na mamantem, en nanga dati hem sa meki dem pikien vo Israel kaba vo mandi nanga Moses en nanga Aaron. We Moses doe so, leki Masra taki gi hem, en dei-broko mamantem, di a go loekoe dem tiki, a si, di vo Aaron kisi wiwiri, a meki blomiki kaba, tee a meki repi amandra srefi. En wantem Moses poeloe ala dem tiki baka, a tjari dem kom na doro, meki ala Israel-soema si dem; en ibriwan vo dem hedeman teki hem tiki baka. Ma da tiki vo Aaron, dati Masra taki gi Moses, meki a tjari hem go baka, kibri na ini da santa verbond-kisi, vo dem oproeroe-soema moe membre hem alatem, leki wan waarskouwe, vo dem no meki trobi moro. (Ebr. 9, v. 4.) Na baka Gado kom na Moses ageen; a taki gi hem: A langa nofo now, disi oen tan diaso; a tem, vo oen drai baka! Ma te oen kisi da kondre Seir, dapee dem brara vo oen de liebi, dem pikien vo Ezau, loekoe boen, vo oen no trobi dem nanga feti; oen moe waka da kondre reti doro. Njanjam wawan oen kan bai na dem soema, nanga watra vo dringi, noti moro. Bikasi Jehova, joe Gado, ben blesi oen na ala fasi, a ben loekoe oen boen; alwasi pikin-moro a meki fotentin jari kaba, di oen de na pasi, tog alatem Jehova ben de nanga oenoe, vo no wansani ben mankeri oenoe.
We nanga da vermane dem pikien vo Israel teki dem reisi baka, dem waka da kondre vo dem pikien vo Ezau doro, tee dem kisi wan woestein, disi dem kali Zin, na mofo Kanaan-kondre, en na Kades, dapee dem ben kom wantron kaba, dritentin na aiti jari pasa; da srefi plesi dem meki kampoe ageen. We na dapee Moses sisa Mirjam kom dede, en dem beri hem dapee toe.
1. We dem tori disi, dem leri wi foeloe sani ageen. Da fosi tori vo da soema, disi ben piki hoedoe na Saba-dei, en disi Masra meki dem kili hem nanga stoon, dati de gi wi wan tranga waarskouwe, vo wi no lasi da santa dei vo Masra nanga soso wroko, efi somtem nanga takroe sjem-sani srefi.
2. So srefi da tori vo Kora en vo dem tra oproeroeman, disi Jehova ben holi so wan tranga justici nanga dem, dati de gi wi wan boen waarskouwe toe, vo wi no geersi dem. Apostel Paulus taki: Dem soema, disi meki oproeroe gi dem gran-soema vo kondre, dem meki da oproeroe gi Gado Masra srefi, di ben potti dem gran-soema; en dem soema, disi sori da tranga hede na dem gran-soema, dem sa kisi dem strafoe. (Rom. 13, v. 2.) So srefi Salomo taki toe: Mi pikien, joe moe respeki Jehova, nanga joe koning toe, en te soema de meki oproeroe, joe no moe go moksi na ini. (Salom. 24, v. 21.)
Ma di da plesi no ben habi watra nofo vo so wan bigi gemeente, dati meki dem alamal kom makandra, dem bigin vo kroetoe nanga Moses en nanga Aaron, dem taki: Betre wi alamal ben dede toe tra dei, di dem brara vo wi ben dede na Masra fesi. Vo san hede oen ben poeloe wi na Egipti, tjari wi kom na so wan takroe plesi, dapee wi no kan plani noti? Figa-boom no de, droifi-boom no de, gra-ntapla no de; watra srefi no de toe, vo wi dringi. Sani oen tjari da gemeente vo Masra kom dia na so wan soso-kondre, meki wi nanga wi meti moe dede diaso? Ma Moses nanga Aaron no piki dem, dem libi da gemeente, dem go na da santa verbond-hoso go begi Jehova, nanga bele na gron srefi, vo a kom helpi dem ageen. En na ini da begi ini dem kom si da bigi glori vo Jehova, en Masra piki Moses, a taki gi hem: Go teki joe tiki, en kali da gemeente kom makandra, en taki nanga da bigi stoon diaso, na ala soema hai, joe nanga joe brara Aaron; dati sa meki da stoon poeloe hem watra, vo joe kan teki da watra, gi na da gemeente, meki dem nanga dem meti dringi.
We Moses doe so, a go teki hem tiki, di a ben kibri alatem na ini da santa hoso, en dan hem nanga hem brara Aaron kali da gemeente kom makandra na da bigi stoon, dem taki: Hoefasi, oen tranga-hatti-soema? Oen wani, wi moe poeloe watra gi oenoe na ini da stoon srefi? Oen denki, dati kan go? We nanga dem woortoe Moses hopo hem hanoe, a naki da stoon toe-tron nanga hem tiki, en wantem da stoon poeloe so meni watra, tee dem alamal ben kisi nofo vo dringi. We dati de da watra, disi Boekoe de kali trobi-watra, vo da trobi hede, disi dem pikien vo Israel ben kroetoe nanga Jehova. Ma di Moses nanga Aaron ben sori, leki dem srefi toe ben lasi hatti pikinso, en di dem ben haksi dem Israel-soema fosi, efi dem denki, dem kan poeloe watra gi dem na ini da stoon, we vo da hede Masra kom na Moses nanga Aaron wantem, a taki: Vo di oen no ben sori wan reti bribi, vo oen hopo mi nem na hai vo dem pikien vo Israel, we na dati mi si, oenoe no kan tjari da gemeente go doro, tee na ini da boen kondre, di mi wani gi dem.
We di Moses jeri Masra taki so, now hem srefi kom si toe, hem zwaki kaba, tee Masra no kan gebruiki hem moro vo so wan bigi wroko, vo a tjari dem pikien vo Israel reti doro na Kanaan-kondre. En di Kades no ben de wan boen plesi, vo soema kan liebi langa dedapee, dati meki Moses seni begi da koning vo Edom, efi a sa plisi, vo gi dem pasi, meki dem kan pasa hem kondre doro, dem no sa trobi hem kweti-kweti, en da watra srefi, disi dem sa dringi na pasi, dem sa pai hem. Ma dem soema vo Edom no gi dem pasi, en alwasi Moses seni begi dem toe-tron, a pramisi dem alasani, tog dem no wani, en da koning vo Edom kom miti dem Israel-soema nanga feti srefi. We dati meki dem komopo na Kades, dem teki wan tra pasi, koti wan bigi hoekoe, tee dem libi Edom-kondre na sei, en di dem kisi da bergi Hor, dem meki kampoe de bro pikinso. We na dapee Masra kom taki gi Moses, meki a teki Aaron nanga hem pikien Eleasar, tjari go tee na tapo da bergi; en te dem kisi dapee, dan a moe poeloe dem domine-klosi gi Aaron, weri gi hem pikien Eleasar; bikasi Aaron no sa doro na ini da kondre janda, ma na tapo da bergi a sa go slibi; a sa go, dapee ala dem avoo vo hem de kaba. We Moses doe so, leki Masra ben taki gi hem, a teki Aaron nanga hem pikien Eleasar, en na hai vo da heeli gemeente dem ala dri klim go na tapo da bergi, na dapee Moses poeloe Aaron klosi, weri gi hem pikien Eleasar, en dan Aaron dede reti na tapo da bergi. Ma di Moses nanga Eleasar saka kom na ondro, en di da heeli gemeente si, Aaron no de moro, dati meki dem alamal kom na wan bigi sari, en dem kre vo hem wan heeli moen langa. Datem a ben go na ini fotentin jari kaba, sinsi dem ben libi Egipti-kondre; en Aaron srefi ben ouroe wanhondro nanga twenti na dri jari.
Na baka vo da dede vo Aaron wan pikin koning vo Kanaan-kondre kom jeri, dem pikien vo Israel de na pasi, vo kom teki hem kondre, en dati meki a go miti dem hafoe-pasi, a feti nanga dem, tee a kisi wan toe dri soema kaba. Ma di dem Israel-soema kom kre dem nootoe gi Masra, meki a helpi dem, Masra jeri da begi vo dem wantem, a meki dem winni dem fetiman.
Na baka di Gado meki dem teki pasi baka, a meki dem waka heeli Edom-kondre rontoe, da pasi kom verfeeli dem vo troe, en dem bigin baka ageen, vo kroetoe nanga Gado en nanga Moses toe, dem taki: San joe ben poeloe wi na Egipti-kondre, meki wi moe dede diaso na woestein? Bika wi no ha brede, wi no ha watra, wi no ha noti, leki da soso-manna, en dati kom verfeeli wi vo troe, wi no lobbi da manna moro. We di dem kroetoe so ageen, Masra seni wan soortoe sneki kom dapee, dem kali dem faja-sneki bikasi da beti vo dem bron leki faja; we dem sneki kom beti soema toemoesi, en foeloe vo dem Israel-soema dede dapee. We dati meki dem alamal kom na Moses nanga kre en nanga sari, dem taki: Ke, wi doe ogri vo troe, disi wi ben kroetoe so nanga Masra, en nanga joe toe! Gran-tangi, begi Masra gi wi, vo a poeloe dem sneki baka gi wi! We Moses doe so, en na ini da begi srefi Masra kom piki hem wantem, a taki gi hem, meki a meki wan kooproe sneki, fassi hem na wan hei flagra-tiki tapo; en ala soema disi dem faja-sneki ben beti, dem moe go loekoe da kooproe sneki, en dati sa meki dem tan na liebi. We Moses doe so, a teki kooproe, a wroko hem leki wan sneki, en dan a fassi da sneki na da flagra-tiki, a hopo hem tanapoe. En te wan sneki kom beti wan soema, nomo da soema go loekoe da kooproe sneki, en dati meki a tan na liebi.
Na baka di dem pikien vo Israel ben waka heeli Edom-kondre rontoe, en di ala dem ouroe soema dede kaba, disi ben komoto na Egipti, Moses gi dem kampoe na wan woestein vo Moab-kondre, meki dem bro pikinso. We na dapee Masra kom na Moses, a taki gi hem: Joe no moe go feti nanga dem soema vo Moab-kondre, bikasi da kondre mi gi na dem pikien vo Lot. Ma te oen kom so fara, tee vo oen kisi dem Amoritri-kondre, dati mi gi oen pasi, vo oen feti nanga koning Sihon, disi de liebi na Hesbon; bikasi da kondre mi sa gi oen brara, vo oen teki hem. En da srefi dei mi sa bigin vo helpi oenoe, tee ala dem tra kondre sa kisi frede vo oenoe; te dem jeri nomo, taki, oen de na pasi de kom, wantem dem sa skreki. We nanga da ordre vo Masra dem teki pasi baka, dem waka doro, tee dem kisi da bergi Pisga. Na dapee dem tan so langa, tee dem seni wan boodskopoe go na fesi go haksi koning Sihon, efi hem sa permiteri dem, vo dem pasa hem kondre doro, dem no sa doe hem wan ogri, da pasa soso dem wani pasa doro. Ma di koning Sihon no wani gi dem pasi, en kontrari a kom miti dem nanga feti, dati meki dem Israel-soema winni hem, dem kili hem nanga hem pikien nanga ala soema vo hem kondre, en dan dem teki da heeli kondre abra, dem kom liebi dapee, so leki Jehova ben taki gi dem. So srefi dem doe nanga koning Og vo Basan toe, vo di a no ben wani permiteri dem, vo dem pasa hem kondre doro. We nanga dati dem pikien vo Israel kom masra vo wan bigi kondre, disi ben habi siksitentin bigi foto nanga foeloe pikinwan toe; dem soema, dati dem kili, ma dem goedoe nanga dem meti, dati dem holi vo dem srefi.
Na baka dem pikien vo Israel doro tee na ini Moab-kondre, na dapee dem meki kampoe na sei wan bigi riba, disi dem kali Jordan, a ben de reti na abra da foto Jeriko.
1. Disi Moses ben misi wan woortoe nomo, da joeroe di a ben poeloe da watra na ini da bigi stoon, a ben sori, leki a no habi reti bribi na Gado moro, (Psalm 106, v. 33.) wantem Jehova pramisi hem, a taki, hem no sa doro na Kanaan, ma na pasi a sa dede. We dati de sori wi, fa Masra de loekoe alasani fini vo troe; en te dem foetoeboi vo hem de misi wansani, alwasi da wan pikin-sani nomo, hesi a kom poeloe hai gi dem, meki dem trawan si. Bikasi te dem dinari vo Kristus doe wansani, disi no boen, dan dem tron leki wan stoon na pasi, disi meki trawan naki foetoe, fadom so srefi toe.
2. Di Apostel Paulus ben skrifi hem brifi gi dem bribi-soema na Korint, a ben teki da tori toe vo dem soema, disi ben kroetoe nanga Gado, a taki: Loekoe boen, vo wi no tesi Kristus, so leki som vo dem ouroe-tem-soema ben tesi hem, kaba dem sneki kom kili dem! (1. Kor. 10, v. 9.)
3. Da kooproe sneki, disi dem Israel-soema ben moese loekoe te dem faja-sneki beti dem, dati ben de wan voorbeeld efi wan printje vo Kristus, disi dem ben kili na kruisi. Hem srefi taki: So leki Moses na woestein ben hopo wan sneki, so srefi dem moe hopo Soema-pikien toe (spikri na wan hoedoe tapo), vo ala dem soema, disi bribi na hem, no moe go lasi, ma vo dem liebi teego. (Joh. 3, v. 14 & 15.)
4. Nanga ala dem foeloe wonder-wroko, disi dem pikien vo Israel ben si ala dem fotentin jari doro, tog dem no kom na verstand, en na bribi, ma doro dem ben de nanga da kroetoe en nanga da mandi. Dem ben de stoutoe pikien vo troe. Ma ala dati Jehova ben holi foeloe pasiensi nanga dem, vo meki dem kom bedaari. We so srefi a habi da pasiensi nanga wi tee tidei jete, en dati moe troostoe wi. Ma wi no moe misbruiki da pasiensi toe. (2. Petr. 3, v. 15.)
(4. Mos. Kap. 22 tee Kap 31.)
Disi dem pikien vo Israel ben winni dem toe koning so hesi, en di dem si, dem doro so klosibei na dem marki kaba, we dati gi dem hatti, vo meki dem srefi klari noja, vo go teki heeli Kanaan-kondre abra wantem. Ma di dem ben de na dem kampoe jete na Moab-kondre na sei Jordan, bifo dem kom so fara, vo dem koti da riba abra, wan aparti tesi kom miti dem ageen. Bikasi di koning Balak vo Moab-kondre si ala dasani, disi dem Israel-soema ben doe nanga dem Amoritri, di ben de na hem buurti, en di a si toe, ala soema vo hem kondre habi toemoesi frede vo dem Israel-soema, tee dem hede gro vo dem, dem taki: Now dem Israel-soema sa kom njam ala wi sani, leki kow de njam wiwiri na sabana; we dati meki Balak kom na da prakseri, vo a teki wan toe dri soema, a gi dem moni, a taki: Oen waka go na Mesopotamia na wan loekoe-man, disi dem kali Bileam, taki gi hem, meki a kom floekoe dem soema gi mi, di komopo na Egipti kom trobi mi; somtem dati sa meki dem lasi hatti, vo mi kan jagi dem gowei baka; bika mi sabi troe, da soema, disi hem de blesi, da soema finni boen; en da soema, disi hem de floekoe, a moese kisi ogri.
We dem soema teki da moni, dem waka go na Mesopotamia, en dem gi Bileam da boodskopoe vo Balak. Ma Bileam taki gi dem, meki dem slibi wan neti, dei-broko mamantem fosi hem sa piki dem so, leki Jehova sa taki gi hem. We da srefi neti Gado Masra kom waarskouwe Bileam, a taki gi hem: Loekoe boen, vo joe no go nanga dem soema, en vo joe no floekoe mi kondre Israel, bika da blesi mi srefi ben blesi dem. We dei-broko mamantem Bileam hopo bitem, a taki gi dem boodskopoe-man, meki dem go baka go taki gi Balak, hem no kan kom, bikasi Jehova no gi hem pasi vo go. Ma Balak, di a jeri da antwoortoe vo Bileam, a teki tra gran-soema vo hem, a seni dem go na Bileam, meki dem taki gi hem, efi hem sa doe hem da plisiri, vo a kom floekoe dem soema gi hem, dan hem sa doe hem foeloe boen; alasani disi Bileam sa taki, dati Balak sa doe gi hem. Ma Bileam piki dem soema vo Balak, a taki gi dem: Alwasi Balak sa gi hem ala hem silver nanga hem goutoe, tog dati no kan meki a pasa hem Gado woortoe. Ma di Bileam hatti no ben krin, vo dini Jehova, en di a ben hati hem vo da tofroe-paiman, disi Balak ben pramisi hem, (2. Petr. 2, v. 15.) vo da hede a taki ageen gi dem boodskopoe-man, meki dem tan nanga hem wan neti, somtem Gado sa gi hem pasi noja, vo a go nanga dem. We di Gado ben si da toe-hatti-fasi vo Bileam, a kom na hem da srefi neti, a taki gi hem, efi a wani vo go, meki a go mara, ma a moe loekoe boen, vo a no doe wan tra-sani, leki disi hem srefi sa taki gi hem. We dei-broko mamantem Bileam hopo, a teki hem boeriki nanga toe knegti vo hem, a waka go nanga dem gran-soema vo Moab-kondre. Ma Gado hatti ben bron vo troe nanga Bileam, disi nanga ala waarskouwe tog a go. En vo da hede di a sidom na hem boeriki tapo de rei, Masra seni wan Engel vo hem kom tapo pasi gi hem. We di da boeriki kom si da Engel tanapoe na mindri pasi, a holi wan blootoe houroe na hem hanoe, dati meki da boeriki komopo na pasi, a bendi pikinso go na sei boesi. Ma Bileam, di a si da boeriki waka go na sei, a bigin vo naki da meti, en a hali hem toom so langa, tee hem foetoe kisi da reti pasi baka. Pikinso moro na baka, di dem kisi wan smala pasi, disi ben pasa na mindri toe droifi-djari, en disi ben habi trariki na ala toe sei, we na dapee da Engel vo Masra kom tapo pasi gi hem ageen. En di da boeriki kom si da Engel, a drifi go na sei, a kwinsi hem srefi so klosibei na da trariki, tee a masi Bileam foetoe na sei dem pranga, en dati meki Bileam naki da boeriki moro ogri. We na baka da Engel vo Masra gowei moro na fesi, a wakti hem na wan plesi, dapee da pasi smala so, dati da boeriki no ben kan go na sei, no na reti han en no na kroekoetoe hanoe. We di da boeriki si da Engel vo Masra ageen, en di a no kan bendi na sei moro, helpi no de, alwasi Bileam sidom na hem tapo, a potti hem kni na gron, a no kan waka go na fesi. En dati meki Bileam hatti kom bron nanga hem boeriki, tee a teki hem tiki srefi, naki da meti.
We now Masra hopo da boeriki mofo, meki a taki, en wantem a drai hem fesi, a haksi Bileam: Hoefasi, san mi doe joe, disi joe moe naki mi? Dritron joe naki mi kaba. Bileam taki: We vo di joe dreigi mi so, joe no wani waka reti. Efi mi habi wan houroe na mi hanoe, mi ben sa kili joe. Da boeriki taki: We, mi a no joe boeriki? a no na mi tapo joe ben rei alatem tee tidei? We joe kan taki, mi ben doe joe so wantem? Bileam taki: No no, mi no moe lei. We now Gado hopo Bileam hai, vo hem srefi toe kom si da Engel vo Masra, disi tanapoe na mindri pasi nanga da blootoe houroe na hem hanoe; en dati meki Bileam komoto wantem na hem boeriki tapo, en nanga skreki a hiti hem srefi na gron gi da Engel. Ma da Engel vo Masra haksi hem, a taki: San joe fom joe boeriki so? Dri-tron joe ben naki hem. Joe no si, mi srefi kom tapo joe na pasi? Bikasi da pasi, di joe de waka, a no boen kweti-kweti. Da boeriki ben si mi boen-boen, en vo da hede a ben frede mi, a bendi na sei dri-tron; we, efi hem no ben doe so, mi ben sa kili joe noja, meki hem tan na liebi. Ma Bileam begi da Engel vo Masra, a taki: Ke, mi doe ogri vo troe, ma mi no ben sabi, dati joe srefi ben tapo pasi gi mi. We efi a no boen na joe, disi mi go, meki mi drai baka dan. Ma di da Engel ben sabi, Bileam hatti no ben de, vo drai baka, vo da hede a taki: No no, go mara; ma loekoe boen, vo joe no taki wan tra woortoe, leki disi mi srefi sa gi joe vo taki. We nanga da antwoortoe Bileam waka go na dem gran-soema baka, disi Balak ben seni vo teki hem. Bikasi dem ben waka na fesi go waarskouwe Balak, dati Bileam de kom; en vo da hede dem no ben sabi noti vo da tori nanga da Engel.
We di koning Balak jeri na dem boodskopoe-man, taki, Bileam de na pasi de kom, nomo Balak go teki hem hafoe-pasi, en di a miti hem, a haksi hem, vo san hede a no ben kom wantem, di a ben seni kali hem da fosi-tron, efi somtem Bileam ben denki, hem no kan pai hem? Bileam taki: We, joe no si, mi de kom? Ma mi no sabi, efi mi sa kisi pasi vo taki wan woortoe srefi; Gado tapo mi kaba, a meki mi no kan taki wan tra woortoe, leki disi hem srefi sa potti na mi mofo, vo mi taki. We da so Bileam waka go nanga Balak, tee dem kom na wan foto, disi dem kali Kiriat-Huzot; na dapee Balak kili foeloe kow nanga skapoe, nomo vo a geersi dem ofrandi vo dem Israel-soema, vo meki Jehova moe lobbi hem. Ma dei-broko mamantem Balak teki Bileam, a tjari hem go tee na tapo wan bergi, dapee dem ben kan si hafoe vo da kampoe vo Israel. So srefi Balak ben habi wan kroekoetoe-gado dapee, disi dem kali Baal-Peor. We di Bileam ben loekoe dem Israel-soema boen-boen, na baka a taki gi Balak, a moe meki sebi altari gi hem dapee; en dan a moe teki sebi kow nanga sebi krabita-boko, vo dem ala toe kan meki dem ofrandi. We Balak doe so, en so hesi dem klari nanga dem ofrandi, Bileam taki, meki Balak tan vo hem dapee, wakti hem ofrandi, hem sa gowei pikinso go haksi Jehova, sani a moe taki, en dan a sa kom piki hem baka. Ma di Bileam ben go na wan tra pikin bergi, vo proberi hem tofroe-wroko dapee, efi a no kan kisi winti, (Kap. 24,v.1.) Gado kom miti hem hafoe-pasi, a tapo hem, meki a no kan bigin da tofroe-wroko; en da srefi momenti Jehova potti wan woortoe na Bileam mofo, a taki, meki a go baka na Balak, en da so da so a moe taki.
We di Bileam kom baka na Balak en na ala dem gran-soema vo Moab-kondre, a hopo da profeti-singi vo hem wantem, a taki: “Na Mesopotamia mi komopo! Na dapee koning Balak vo Moab-kondre seni teki mi. A taki, meki mi floekoe Jakob gi hem, meki mi kosi dem Israel-soema. Ma fa mi kan floekoe soema, di Gado no de floekoe? En fa mi kan kosi soema, disi Jehova no de kosi? Di mi tanapoe diaso na tapo da bergi, mi si ala dem soema boen-boen, di de na ondro jandaso; we, da wan kondre, di moe liebi vo hem aparti, dem no sa teli dem na ini dem tra heiden-soema. We, mi wensi, te mi dede, mi moe dede so wan dede, leki dem boen soema disia sa dede; en da laatste joeroe vo mi moe de so, leki di vo dem!”
Ma di Balak jeri so wan taki, a skreki vo hem, a taki: Hoesani dati? Mi no ben seni teki joe, vo joe kom floekoe mi vyanti gi mi? Kaba joe de blesi dem? Bileam taki: We mi no moe taki so, leki Jehova srefi potti na mi mofo, vo mi taki? Na baka Balak teki Bileam, a tjari hem go na wan tra bergi, disi dem kali Pisga, a taki, somtem na dapee a sa habi tranga, vo floekoe dem Israel-soema gi hem. En Bileam proberi da srefi tofroe-wroko ageen, di a ben wani doe na da tra bergi; ma Jehova no gi hem pasi, a taki, meki a go baka, en da so da so a moe taki.
We di a kom baka, Balak haksi hem, sani Jehova ben taki? En Bileam hopo da profeti-singi vo hem, a taki: “Hopo Balak, jeri mi! Potti jesi na dasani, di mi taki! Gado no de wan soema, vo a kan meki lei; a no de wan liebi-soema toe, vo wansani kan hati hem baka. Joe denki, Gado sa taki wansani, kaba a no sa doe? We a blesi dem soema kaba, en vo da hede mi moese blesi dem toe, mi no kan helpi. Gado no kan si, wan soema trobi Jakob; en a no kan verdragi, vo trawan doe Israel ogri. Jehova srefi de nanga dem. No wan tofroe-wroko kan doe dem wansani.” We di Balak jeri so, a taki gi Bileam, efi a no wani floekoe dem, tog a no moese blesi dem toe. Ma Bileam taki: We mi no ben taki gi joe, alasani disi Jehova taki gi mi, dati mi moese doe?
Na baka vo dati Balak teki Bileam, a tjari hem go na wan tra plesi ageen tee na tapo wan bergi, disi dem kali Peor, a taki, somtem na dapee Gado sa gi Bileam pasi, vo a floekoe dem Israel-soema. Ma di da Jeje vo Gado kom kisi Bileam, a hopo hem profeti-singi, a taki: “Oen jere, san Bileam de taki! Bileam de wan soema, disi hem hai kom krin; so srefi hem jesi krin toe, vo a kan jeri, san Gado taki! -- Ke, Jakob, fa dem hoso vo joe mooi! Ke Israel, dem plesi, dapee joe de liebi, dem switi vo troe! Mi hai de si da koning vo Israel, ma a no kom jete; mi de loekoe hem, ma a de farawei jete! Wan star vo Jakob sa hopo! Israel sa kisi wan bigi koning, disi sa masi dem hedeman vo Moab-kondre!”
“Heloe! heloe! Soema sa tan na liebi, te da joeroe sa kisi, disi Gado sa doe ala dasani! Dan dem feti-sipi vo Macedonia sa kom, dem sa teki da kondre vo Assur, tee bakatem dem winni-man srefi sa lasi toe. We joe Israel! disoema, disi wensi joe boen, hem srefi sa finni boen toe; ma disoema, disi floekoe joe, Gado sa floekoe hem baka.”
We di Balak jeri da taki so, hem hatti kom bron nanga Bileam ageen, a bigin vo kroetoe nanga hem, a taki: Mi no seni kali joe, vo joe floekoe mi vyanti gi mi? kaba da blesi joe blesi dem dritron kaba. We mi no wani joe moro, go vo joe, go baka na joe hoso. Mi ben pramisi joe troe, dati mi wani gi joe wan bigi nem, ma Jehova no wani, joe kisi da nem. Bileam taki gi Balak, hem no kan helpi, hem no kan taki wan tra woortoe, leki disi Jehova srefi gi hem vo taki. Ma di Bileam ben de wan falsi-hatti soema, en di a ben hati hem vo gowei baka na hoso soso, sondro a kisi wan bigi nem, en sondro koning Balak gi hem wan presenti, dati meki a pingi Balak safri, a taki, meki hem hatti kouroe, hem sa gi hem wan boen rai; te hem go na hoso, meki a kom nanga hem, potti hem na pasi, dan hem sa taki nanga hem. We di dem ala toe de waka makandra, Bileam teki Balak pikinso na sei, a taki gi hem, meki a proberi, vo poeloe dem Israel-soema na Jehova ondro, meki dem kom dini Baal-Peor; bika efi a kan kisi dem so fara nomo, vo dem pasa Jehova mofo, dati sa doe dem moro ogri, leki hem ben floekoe dem.
We so djoesnoe koning Balak gi dem soema vo hem kondre wan bigi pre, en nanga da rai vo Bileam, dem jonge heiden-oeman vo Moab-kondre en vo Midian dem go verzoekoe dem jonge man-soema vo Israel, meki dem kom njam nanga dem. En dati no ben habi trobi toe. Bikasi disi dem Israel-soema no ben de so tranga na ini da bribi vo Jehova, dati meki nofo vo dem go loekoe da pre vo dem heiden-soema, dem go sidom njam nanga dem vo da kroekoetoe-gado-njanjam, dem dini Baal-Peor, en na baka dem bigin vo hoeroe srefi nanga dem Moabitri-oeman. We dati meki Jehova hatti kom bron vo troe nanga dem Israel-soema, a kali Moses kom na hem, a taki: Go hesi, teki ala dem gran-soema, disi ben bemoeje nanga dem heiden-soema, hanga dem gi mi na bongopita, reti na ini zon, meki mi poeloe mi hattibron na oen tapo! We djoesnoe Moses gi ordre na dem tra gran-soema vo kroetoe, a taki, meki ibriwan ondersoekoe dem soema, di de na hem ondro; en dem, disi ben habi wroko nanga Baal-Peor, dem moe kili wantem. Ma buiti dati Masra strafoe dem Israel-soema nanga wan toemoesi ogri siki jete, en na ini da siki foeloe doezend soema kom dede ageen; so da siki kisi dem, hesi-hesi dem dede kaba. We di Moses nanga so meni vo dem tra boen Israel-soema ben kom makandra na kerki-plasi de kre na da verbond-hoso doro, ala di dem tanapoe de begi Jehova nanga watra na hai, meki a saka da strafoe gi dem, da srefi momenti wan asranti Israel-soema doro dedapee, hem nem Simri, hem tjari wan Midian-oeman kom nanga hem tee na ini da kampoe, a no sjem vo meki Moses nanga da heeli gemeente vo Israel si dati. Ma wan soema ben de dapee, wan pikien vo Eleasar, en wan pikien-pikien vo Aaron, dem kali hem Pinehas; we so hesi hem kom si dasani, nomo a djompo komopo na mindri da gemeente, a teki wan lanza na hem hanoe, a waka go na da hoeroeman baka tee na ini hem slibi-kamera, en di a miti hem dapee nanga da oeman, a teki hem lanza, a soetoe dem, kili dem ala toe wantem. We nanga dati da strafoe kom saka, disi Masra ben strafoe dem pikien vo Israel. Ala nanga ala meki twenti na fo doezend soema, disi ben dede na ini da siki en na dem bongopita.
Na baka Jehova kom na Moses, a taki: We a boen, disi Pinehas, da pikien vo Eleasar, ben doe so, nanga dati a ben poeloe da hattibron vo mi hafoe na dem Israel-soema tapo, meki mi no kili ala so faja-faja. We vo da hede mi sa meki wan verbond nanga hem, vo ala soema kan si, mi lobbi hem; en mi pramisi hem toe, dati ala hem pikien, disi sa kom na hem baka, mi sa teki dem vo mi domine tee vo teego, vo di a ben feti so trouw vo hem Gado, en di a ben meki mi hatti kom kouroe baka nanga dem pikien vo Israel.
Na baka vo dati Masra taki gi Moses, meki hem nanga Eleasar teli dem pikien vo Israel wantron moro, vo taki, ala dem soema, disi ouroe twenti jari kaba. We di dem teli ala dem famili doro, dem finni, ala bigi mansoema, disi kan go na feti, dem meki siksi-hondro nanga wan doezend, nanga sebi-hondro en dritentin soema, buiti dem twenti na dri doezend soema vo Levi famili, disi ben habi vo dini Gado na ini da santa verbond-hoso. Ma vo ala dem soema, disi ben komopo na Egipti-kondre, no wan vo dem ben de moro, dem alamal dede kaba, buiti Josua nanga Kaleb, dem wawan ben de jete.
We di dem kaba nanga da teli, Masra kom taki gi Moses, meki a go feti now nanga dem soema vo Moab-kondre, nanga di vo Midian, meki Jehova nanga dem Israel-soema teki dem revensi, vo dem heiden-soema kisi dem strafoe vo da ogri, di dem doe, di dem ben seti trapoe gi dem pikien vo Israel, meki dem fadom. En Moses teki twalf doezend mansoema, vo ibriwan famili wan doezend, a seni dem gowei go feti; dem alamal ben de boen knapoe soldati, en Pinehas ben komanderi dem.
We so hesi dem doro na dem soema vo Moab-kondre en vo Midian, nomo dem kili ala man-soema vo dem, nanga feifi granman toe vo dem kondre. So srefi Bileam toe, disi ben kibri jete na Moab-kondre, hem dem kili toe nanga houroe, vo a kisi hem strafoe vo da ogri, di a ben doe, di a ben leri dem heiden-soema, fa dem moe seti trapoe, vo kisi dem Israel-soema, vo dini kroekoe-toe-gado. Na baka dem potti branti na ini dem foto en na dem pranasi, dapee dem soema vo Moab-kondre en vo Midian ben de liebi, dem pori ala dem hoso krin-krin. Ma dem oeman nanga dem pikien, nanga dem meti nanga ala dem goedoe, dati dem teki, tjari gowei.
We di dem kom baka na hoso, Moses nanga grandomine Eleasar nanga ala dem hedeman vo Israel dem go na doro go teki dem hafoe-pasi. Ma di Moses kom si ala dem oeman, di dem tjari, a bigin vo meki trobi nanga dem ofeiri, a taki: Vo san hede oen meki dem oeman tan na liebi? A no dem ben tjari so meni pikien vo Israel na ogri nanga da switi verzoekoe vo dem, so leki Bileam ben rai dem? Oen moe kili dem alamal toe, buiti dem jonge pikin-oeman, disi no sabi man jete, dem dati kan tan na liebi. We da so dem ogri soema kisi dem strafoe boen-boen, so leki dem verdini; ma ala dem twalf doezend Israel-soema, disi ben go na da feti, dem ben holi dem srefi heeli boen, no wan vo dem ben lasi, efi kisi wan ogri.
1. We da tori vo Bileam de gi wi foeloe leri ageen. Bileam ben de wan loekoe-man troe, en vo da tofroe-wroko hede koning Balak ben seni kali hem, vo a floekoe dem Israel-soema gi hem. Ma ala tofroe da wan heiden-wroko, wan takroe didiebri-wroko. Bikasi didiebri wawan de meki soema kan doe sosani. En a doe dati troe-troe, nomo vo a poeloe soema na Gado ondro, en vo a tjari dem moro dipi na ini da verkeerti bribi.
2. Bileam ben de wan soema, disi Gado ben gi hem foeloe verstand vo troe, ma a no ben meki wan boen gebruik vo dati; bikasi nanga ala sabi vo hem a ben de wan falsi soema, hem hatti no ben krin vo dini Jehova. We vo da hede apostel Paulus skrifi gi dem bribi-soema na Korint, a taki: Alwasi mi sabi vo taki ala soema tongo, alwasi nanga Engel-stem srefi mi kan taki, ma lobbi no de na mi hatti? dan ala taki vo mi de, leki wan soso gingee de lui, te dem seki hem, en leki wan kooproe pleti, disi soema naki. En alwasi mi de wan profet, tee mi sabi ala kibri-tori, alwasi mi hai krin vo troe, vo mi kan begrypi alasani boen-boen, en alwasi mi habi so wan tranga bribi, vo mi kan poeloe bergi srefi na dem plesi, potti na wan trapee, ma lobbi no de na mi hatti? a no kan helpi mi wansani. (1. Kor. 13, v. 1 & 2.)
3. Bileam ben de so wan srefi soema, leki Judas, bikasi a ben habi toemoesi bigi-hai vo moni, en dati ben drai hem hatti so, vo a jeri da ogri jeje moro hesi, leki di vo Gado. We meki wi loekoe boen nanga da soso grontapo-goedoe, vo dati no foefoeroe wi hatti! Apostel Paulus taki: Da gridi-fasi vo soema de da loe-toe vo ala ogri. (1. Tim. 6, v. 10.)
4. Da tem vo profet Hozea, di Jehova ben waarskouwe dem Israel-soema vo da verkeerti pasi, di dem feti vo waka alatem, a taki: Jere mi, joe Israel-piple! Mi sa teki maka, tapo da pasi gi joe. (Hozea 2, v. 6.) We so srefi Gado ben meki foeloe moeiti nanga Bileam toe, vo tapo hem, meki a no go na Balak; bika di a no ben wani jeri hem eigen konsiensi moro, Gado meki da boeriki srefi moe hopo hem mofo, taki nanga hem. So srefi tee tidei jete Gado no mankeri, vo meki da srefi moeiti nanga wi alamal, vo tapo wi na ini dem ogri pasi, di wi de waka, meki wi drai baka, kom na hem. Ma heloe vo wi, efi wi geersi Bileam, efi wi no wani jeri Masra! Bika dan Gado moe libi wi abra na wi srefi verkeerti hatti, meki wi doe sani, disi no boen. (Rom. 1, v. 28.)
5. Disi Bileam ben helpi dem ogri soema, vo dem seti trapoe gi dem pikien vo Israel, meki dem fadom, kisi ogri; we dati meki hem srefi toe kom kisi ogri, hem nanga ala dem trawan. Bika da so Masra Jesus de taki: Heloe vo da soema, disi de leri trawan, vo doe ogri! En moro bigi ogri sa kisi so wan soema, disi de leri wan onnoozloe pikien, vo a doe ogri! A sa moro betre vo so wan soema, dem tai wan bigi stoon na hem neki, en dem soengoe hem tee na ini da dipi-dipi zoutwatra. (Matt 18, v. 6 & 7.)
6. Da star vo Jakob, disi Bileam ben taki vo hem na profeti-fasi, dati da wi Masra Jesus Kristus; bikasi hem srefi toe de taki: Mi de da krin faja vo kondre. Joh. 8, v. 12. Da hem de letti gi ala soema. So srefi da bigi Koning vo Israel, da Kristus toe; bikasi hem de da Koning vo ala tra koning. (Openb. Joh. 19, v. 16.)
(4. Mos. Kap. 34.)
Disi Gado ben helpi dem pikien vo Israel, vo dem kom masra vo Moab-kondre en vo Midian, dati potti dem soema vo Ruben famili nanga di vo Gad na da prakseri, vo dem go begi Moses nanga ala dem tra hedeman, efi dem no sa permiteri dem, vo dem kan teki da kondre, leki dem porsie, di dem moe kisi; bikasi dem habi foeloe meti, en da kondre habi foeloe mooi sabana, we vo dati hede dem sa wensi, efi dem kan liebi dapee. Da kondre ben de na disi sei vo da bigi riba Jordan, a no ben de vo Kanaan srefi. We fosi Moses no ben wani jeri vo dati, a taki: No no, dati no kan de; oen no kan tan dia, libi dem brara vo oenoe; dati sa meki dem lasi hatti toe, en dan wi kisi trobi ageen. Ma dem pramisi hem, taki, dem no wani libi dem brara vo dem, vo dem wawan moe go feti nanga dem heiden-soema vo Kanaan, dati no de na dem hatti; ma dem plisi Moses wawan vo dem oeman nanga dem pikien nanga dem meti kan tan na Moab-kondre wantem; dem bigi mansoema alamal sa go nanga dem, koti da riba abra, dem sa waka go na fesi srefi, dem sa helpi dem brara so langa, tee dem kom masra vo heeli Kanaan-kondre; na baka fosi dem sa tron baka, go liebi nanga dem oeman nanga dem pikien na disi sei vo da bigi riba, dem sa teki da kondre vo dem porsie. We di Moses jeri so, a no ben habi wansani vo taki moro, ma a tevrede, a taki, efi da so, dem kan kisi da kondre vo dem toe koning Sihon nanga Og, di dem ben kili, meki dem libi dem oeman dedapee, en na baka te dem teki Kanaan-kondre kaba, dan dem srefi kan tron baka toe, go teki da kondre vo dem porsie liebi dapee. So srefi Moses taki gi dem soema vo Manasse famili, efi dem wani, hafoe vo dem kan liebi dapee toe.
Ma bifo da tori ben pasa, Gado ben kali Moses, vo a klim go na tapo da hei bergi, disi de reti na abra-sei vo da foto Jeriko, dem kali da bergi Nebo, meki a go loekoe da kondre farawei, disi dem pikien vo Israel sa kisi; na baka, te a loekoe hem kaba, dan da joeroe vo hem sa kisi, disi hem sa go toe, dapee hem brara Aaron go kaba. Masra taki, dati da vo di dem no ben bribi hem, datem di da gemeente ben meki trobi vo da watra; bikasi di Moses srefi ben misi da woortoe, nanga dati dem ben sori na dem tra soema hai, leki dem srefi no habi wan reti bribi vo Jehova moro; en vo da hede hem ben pramisi dem wantem, dem ala toe sa dede na pasi, dem no sa doro tee na Kanaan-kondre. (4. Mos. Kap. 27, v. 12 tee 14.)
Ma Moses, di a si da kondre farawei, fa a mooi, a begi Masra toemoesi, a taki: Ke, mi Masra, mi Gado, Jehova! Joe meki joe foetoeboi si ha-foe kaba vo da bigi glori vo joe, en vo dem bigi wroko, disi da tranga han vo joe de wroko; bika troe-troe, no wan tra Gado de, disi bigi so, leki joe, no na ini hemel, en no na grontapo toe. We, mi begi joe, mi Masra vo mi, gran-tangi, meki mi kan koti da riba toe, vo mi njam da mooi kondre, en vo mi si dem mooi bergi moro klosibei! Ma Masra no wani, a no jeri hem kweti-kweti, a taki: No no! no trobi mi moro nanga dati. Go mara na tapo da bergi, disi dem kali Pisga, hopo joe hai dapee, en loekoe da heeli kondre rontoe, bika joe no kan koti da riba abra. -- Wi no moe denki. Gado ben mandi jete nanga Moses, di a no ben wani jeri da begi vo hem; no, a no vo dati, ma vo dem tra soema hede, disi ben jeri, fa Moses ben misi da mofo tra jari, Masra no ben kan poe-loe da woortoe baka, disi a ben pramisi hem.
We di Moses si, helpi no de, a bigin begi Masra wan tra-sani, a taki: We mi Masra, joe di sabi ala soema hatti, mi plisi joe dan, vo joe teki wan tra soema, potti gi da gemeente, di kan waka go na dem fesi de tiri dem, leki hedeman, vo da gemeente vo Masra no moe tan soso, leki wan hipi skapoe, di no habi wan herder! Masra taki: We Josua, da pikien vo Nun, hem de wan bekwaam soema; hem mi wani, joe potti na da wroko. We teki hem, potti joe han na hem tapo, tjari hem go na gran-domine Eleasar; en dan kali da heeli gemeente kom makandra, vo Josua kan teki joe wroko abra na ala soema hai. En taki nanga dem pikien vo Israel, meki dem alamal respeki hem, en meki dem jeri hem net so, leki dem ben jeri joe. So srefi joe moe taki nanga Josua toe, meki a de geruste, a no moe frede; bikasi da hem sa pasa da riba abra, a sa waka go na dem fesi; en te dem doro na Kanaan, dan hem sa de da soema, disi moe platie da kondre gi dem. En alatem te Josua kom na wan verlegi, disi a no sabi, san vo doe, dan a moe meki grandomine Eleasar haksi Jehova gi hem na ini da santa verbond-hoso. We Moses doe so, a teki Josua, a tjari hem go na Eleasar, en dan a potti hem tanapoe gi da heeli gemeente, meki Josua teki hem wroko abra na ala soema hai. Alasani Moses doe so, leki Masra ben taki gi hem.
Na baka di da joeroe vo Moses kisi, disi a moe go na Masra go slibi, -- a ben de fotentin jari kaba, na ini da laatste moen vo hem, sinsi dem ben libi Egipti, -- we bifo dem pikien vo Israel hopo vo koti da riba abra, Moses kali da heeli gemeente kom makandra wantron moro, vo a gi dem wan toe dri vermane jete, bifo a go dede. Fosi a teki ala dem tori, disi ben pasa nanga dem Israel-soema ala dem fotentin jari, di dem ben de na da langa pasi, sinsi dem tata ben libi Egipti tee noja, a meki dem membre alasani baka, vo dem jonge soema moe sabi boen-boen, san Jehova ben doe gi dem, fa dem hatti ben tranga alatem, en fa Gado ben habi so meni pasiensi nanga dem, tee a no kom weri vo meki moeiti nanga dem, vo dem tron boen pikien vo hem, vo a kan doe dem moro foeloe boen. Na baka Moses teki ala dem leri wantron moro, disi Jehova ben leri dem pikien vo Israel na tapo da bergi Sinai, a bigin vo poeloe ala dem tori krin gi dem, vo dem sabi alasani boen-boen, a taki: We oen Israel-soema, jeri mi now! Mi sa leri oen ala dem ge-bod vo Jehova, wi Gado, vo oen sabi, en vo oen doe so, leki hem ben taki gi oenoe.
Oen srefi sabi, wi Masra Jehova, hem de da wan Gado, disi ben poeloe oen na Egipti, na ini da pina-liebi, vo a tjari oen go na wan boen kondre, disi fatoe, en disi habi foeloe njanjam. Hem srefi ben poeloe oen na mindri vo ala tra kondre, disi de na grontapo, a teki oenoe, meki oen tron wan santa kondre vo hem, di a kan loekoe vo hem eigendom. Oen no moe denki, Gado ben teki oenoe, vo di oen de moro betre, leki so meni tra kondre, no! oen de dem moro ogriwan; ma Jehova ben teki oenoe, vo di a ben lobbi oenoe, en vo da sweri hede, di a ben sweri gi dem tata vo oenoe, dati hem sa poeloe oenoe na ini da pina-liebi, di oen ben djemee na koning Farao ondro, a sa gi oen wan mooi kondre, disi habi foeloe riba, nanga so meni peti, disi habi switi watra, nanga bigi sabana, nanga hei bergi, nanga mooi djari, vo oen habi wan boen liebi. We ala dem fotentin jari, di oen ben de na pasi, soema ben gi oen njanjam? A no Jehova ben gi oen da manna, da switi hemel-brede? A no hem srefi ben helpi oen, vo oen klosi no kom pori, vo oen soesoe no ben broko, en vo oen foetoe srefi no ben sweli toe? Oen no si na ini ala demsani disi, fa Jehova, oen Gado, ben loekoe oenoe, leki wan tata de loekoe hem pikien? We di a ben gi oen da switi hemel-brede, disi oen no ben sabi fosi, a ben doe dati nomo, vo a sori oenoe, a no da soso grontapo-brede wawan de gi soema liebi, ma ibriwan woor-toe vo Gado toe, disi hem mofo de taki.
Da tem di oen ben tan na sei da bergi Horeb, da dei di Jehova ben taki gi mi, meki mi kali oen kom makandra na da bergi foetoe, oen srefi no ben si da wolkoe? nanga da onweri? nanga da faja? Oen srefi no ben jeri, fa Jehova ben taki nanga oenoe, hai na hai? Tee na ini da faja oen ben jeri da stem vo hem na tapo da bergi, ma si ? oen no ben si hem srefi. We da srefi dei a ben gi oen dem tin gebod vo hem, a teki toe stoon-lei, skrifi dem na ini; ma na mi a taki, meki mi leri oen ala dem wet vo hem boen-boen, vo oen sabi, fa oen moe holi oen srefi. We di oen no ben si da fasi vo Gado da joeroe tem, loekoe boen, vo oen no teki wan liebi-soema-popiki, efi wan meti, efi wan fowloe, efi iniwan tra-sani, vo geersi dati nanga Jehova, en vo loekoe sosani vo oen Gado. So srefi oen no moe begi na zon, efi na moen, efi na dem star; ala dati no de Gado, bikasi Jehova srefi meki dem.
We loekoe boen, vo oen no vergiti ala dem tori, disi oen hai ben si, en disi oen jesi ben jeri!
Membre ala dasani boen-boen, disi Masra Jehova ben doe oenoe tee vo tidei; bika a ben doe oen foeloe boen vo troe, vo da sweri hede, di a ben sweri gi dem tata vo oenoe. Ma dati mi taki gi oenoe, efi oen sa vergiti Jehova, libi hem, efi oen sa bigin, vo dini kroekoetoe-gado, dan oen alamal sa lasi, Masra sa kili oen so srefi, leki a de go kili dem heiden-soema, disi de na oen fesi jandaso na Kanaan.
We oen Israel-soema! so leki oen de tidei, oen de klari, vo go koti da riba abra, vo doro na ini da kondre, disi habi so bigi-bigi foto, en dan oen sa go feti nanga dem Enakim, dati da dem bigi-bigi soema, disi oen ben jeri vo dem tra jari, di dem tin soema ben meki oen lasi hatti, dem taki, dem ben si soema dedapee, disi bigi so tee no wan soema kan feti nanga dem. Ma mi taki gi oenoe, dati no ha trobi; bika Jehova, wi Gado, disi de leki wan faja de njam alasani, hem srefi sa broko da tranga vo dem, a sa dwingi dem na oen ondro, vo oen kan jagi dem hesi, kili dem, so leki Jehova ben pramisi oenoe. Ma bakatem, te Gado srefi poeloe dem heiden-soema gi oen kaba, vo oen kan liebi na dem kondre, dan oen no moe meki oen srefi bigi, taki, da vo oen boen maniri hede Jehova ben gi oen da kondre. No no! A no vo oen krin hatti hede Gado de poeloe dem, meki dem gi oen pasi; ma vo da takroe liebi hede, disi dem heiden-soema de liebi, en vo da sweri hede, disi Jehova ben sweri gi dem gran-tata vo oenoe, Abraham, nanga Isaak, nanga Jakob. Oen srefi sabi boen-boen, dati oen srefi no waarti toe. Bika oen de wan tranga-hede piple vo troe. Oen no moe vergiti, fa oen ben trobi Jehova, en fa oen ben meki hem hatti bron nanga oenoe; sinsi oen ben libi Egipti-kondre tee tidei, alatem oen jesi ben tranga, vo jeri hem. Oen sabi jete, sani ben pasa na Sinai, ala di mi ben de na tapo da bergi? Fa oen ben meki Jehova hatti bron nanga oenoe tee a ben wani kili oen alamal, vo da goutoe kow hede, di oen ben meki! Ma mi ben begi hem vo oenoe, nanga bele na gron mi ben plisi hem, vo a no moe loekoe na da bigi zondoe vo oenoe, en vo a no moe strafoe oen so, leki oen ben verdini. Mi ben teki Abraham nanga Isaak nanga Jakob, mi ben begi hem, vo a moe holi pasiensi nanga oenoe, meki oen kan si da mooi kondre, di a ben pramisi wi. En Masra jeri mi toe da leisi, a taki, hem sa gi oen da kondre. So srefi nanga mi brara Aaron Jehova hatti ben bron toe, a ben wani kili hem, ma mi ben begi vo hem toe. Na baka mi teki da gou-toe kow, mi masi hem, tee a tron leki wan fini santi, mi hiti hem na ini watra. We da so oen ben trobi Jehova doro nomo nanga da tranga hai vo oenoe. En wan dei oen ben meki a kom mandi nanga mi srefi toe, tee a pramisi mi, a taki, mi foetoe no sa koti da riba abra. We da vo oenoe hede mi no sa doro na ini da mooi kondre, ma diaso na disi sei mi sa dede; oen wa-wan sa koti da riba abra, go teki da kondre.
We oen Israel-soema! Sani Jehova, oen Gado, wani now, vo oen doe? Noti moro a wani, leki vo oen frede hem, vo oen waka na hem boen pasi, en vo oen lobbi hem, en vo oen dini hem nanga oen heeli hatti en vo oen membre dem ge-bod vo hem alatem, so leki mi ben taki gi oen tidei. Dan oen sa finni boen vo troe, en oen sa kisi wan bigi nem na ala tra kondre. Bika te dem heiden-soema sa jeri da wet vo oen kondre, nanga dem maniri vo oenoe, dem sa verwondroe vo dati, dem sa taki: Ke fa dem soema koni! Dem sabi sani vo troe! Da kondre mooi reti-reti! -- Bika mi haksi oenoe, oen sabi wan tra kondre moro, disi bigi so, en disi habi so wan boen Gado, leki wi Gado Jehova de, disi de kom wi klosibei, alatem te wi de begi hem? Mi haksi oenoe, efi oen sabi iniwan tra kondre moro, disi Jehova ben blesi so, en disi alasani vo hem de waka so mooi, en disi dem tiri so nanga reti en switi, leki fa mi ben leri oen tee tidei? Troe-troe, so wan kondre no de moro. -- We loekoe boen dan, vo oen no vergiti ala dem tori, di oen ben si en di oen ben jeri! Nooiti oen moe lasi dem na oen hatti. So srefi oen moe leri oen pikien toe, nanga dem pikien-pikien vo oenoe, meki dem kom sabi alasani toe. We vo da hede oen moe teki ala dem woortoe, di mi taki gi oenoe tidei, kibri boen-boen na oen hatti. En alatem oen moe taki tori vo dati, te oen sidom na ini oen hoso, en te oen de na pasi de waka; te oen go lidom slibi, en te oen hopo baka; alatem da tori moe de na oen mofo. So srefi oen moe teki dem woortoe skrifi na wan pampira, tai na oen hanoe, vo wan marki, vo oen no vergiti dem. En na ala dem doro, di de na oen hoso en na plasi, oen moe skrifi dem woortoe toe na dem dwaarsi-postoe na tapo-sei, vo oen kan si dem alatem, te oen pasa wan doro, go na ini hoso.
Oen si? mi potti alasani na oen fesi tidei, blesi nanga floekoe. We efi oen teki ala dem ge-bod vo oen Gado Jehova, efi oen dini hem so, leki mi ben leri oen tidei, dan Masra sa doe oen foeloe boen vo troe. Ma efi oen no jeri hem, efi oen poeloe oen foetoe baka na da boen pasi, di mi ben sori oen tidei, oen waka go na kroekoetoe-gado baka, dan Jehova sa floekoe oenoe, a sa verban oenoe, seni oen go panja na ala kondre, meki oen onderdaniki dem heiden-soema. Ma efi bakatem oen sa soekoe Jehova baka nanga oen heeli hatti, dan oen sa finni hem; en dan a sa poeloe oen baka na ala dem kondre, dapee a ben seni oen gowei, a sa teki oen kom baka. En na bakatem Jehova sa hopo wan bigi profet na oen mindri, a sa teki hem na ini dem brara vo oenoe, so leki a ben teki mi toe, da hem oen moe jeri!
We na baka di Moses kaba nanga ala dem taki vo hem, a go sidom skrifi alasani na hem boekoe, en dan a teki gi dem domine, meki dem teki ala dem boekoe vo hem, kibri na ini da santa verbond-kisi; en bakatem, te dem kom liebi na Kanaan, dem moe lesi dem boekoe gi dem pikien vo Israel, na ini temple, meki ala soema kom sabi sani de na ini. Na baka vo dati Masra meki Moses nanga Josua kom wantron moro na ini da santa verbond-hoso, a taki gi dem, fa dem Israel-soema sa vergiti Jehova na bakatem, dem sa kom so ogri, tee a no kan loekoe dem moro, en dati sa tjari dem na wan toemoesi jamer-liebi. We meki Moses nanga Josua meki wan singi, meki dem potti dati na ini da singi vo wan waarskouwe, en meki ala Israel-soema leri da singi na hede; vo na bakatem, te alasani kom so, da singi srefi moe de leki wan getuigi, a moe helpi vo kroe-toe dem. We Moses doe so, a meki da singi, en dan a gi na dem pikien vo Israel, meki dem leri hem.
Na baka Masra taki gi Moses, meki a go na tapo da bergi noja, go loekoe da kondre, bika da joeroe vo hem kisi kaba, vo a moe dede. We vo da hede Moses taki dem bigi adjosi, a blesi dem alamal; ibriwan vo dem twalf bigi famili ben kisi wan aparti blesi vo hem. En dan Moses klim na tapo da bergi, disi dem kali Nebo, efi Pisga; na dapee Jehova sori hem heeli Kanaan-kondre ron-toe, a taki: Joe si? dati de da kondre, disi mi ben sweri Abraham nanga Isaak nanga Jakob, dati dem famili sa kisi da kondre. We da kondre, di joe si jandaso, dati da vo Naftali famili, dem sa kom liebi dapee; en da trawan jandaso, dati da vo Efraim famili; en da kondre di joe si janda na da trawan sei, dati da vo Manasse, en da trawan ageen, dati da vo Juda famili.
We da so Moses kom dede dapee, da boen foetoeboi vo Masra. En Jehova srefi beri hem dapee na wan laage plesi na mindri dem bergi vo Moab-kondre. Ma hem reti grebi, dati no wan soema kom sabi tee tidei jete. Wan-hondro nanga twenti jari Moses ben ouroe, datem di a dede. Hem hai no kom doengroe, en a no ben kom zwaki toe. We dati meki dem pikien vo Israel tan dapee jete dritentin dei langa; en da heeli tem dem no ben doe wan tra wroko, leki doro nomo dem ben kre vo da dede vo Moses, a ben spyti dem vo troe.
We so hesi Moses dede, wantem Josua teki hem wroko abra, en dem pikien vo Israel respeki hem, so leki Jehova ben taki gi Moses. Ma sinsi da tem so wan profet, leki Moses ben de, disi Jehova ben taki nanga hem hai na hai, en disi ben doe so meni wonder-wroko na Egipti-kondre -- so wan profet no ben hopo moro na mindri dem pikien vo Israel, tee bakatem da bigi profet Jesus Kristus srefi kom, disi Moses ben taki vo hem, en disi ben doe foeloe wonder-wroko; so srefi da leri vo hem ben tranga vo troe. (Luk. 24, v. 19.)
1. We te wi lesi da tori so, fa Moses ben vermane dem pikien vo Israel so switi en so tranga, bifo a go slibi, dati moe gi wi srefi wan fili toe na wi hatti; bi-kasi a ben potti alasani so krin na dem fesi, leki wan leriman kan taki nanga hem gemeente, te a holi hem kroboi kerki, bifo a gowei. Vo da hede apostel Paulus vermane dem bribi-soema, a taki: Membre dem leriman vo oenoe, disi ben preki da tori vo Gado gi oenoe; oen moe loekoe na da dede vo dem; en da bribi vo dem oen moe teki toe, feti na dem baka! (Ebr. 13, v. 7.)
2. Di Jehova ben wani, dem pikien vo Israel moe taki tori vo da wet vo hem na neti te dem go lidom slibi, en na mamantem te dem wieki baka: we dati de sori wi toe, fa a de fiti ibriwan famili, vo dem holi wan pikin begi-kerki makandra ibri mamantem en ibri sabatem, en vo dem teki Bybel toe, lesi wan pikin tori makandra. Dati moe de wan vaste gewenti na ala Kristen-soema hoso. So srefi Jehova ben taki, dem pikien vo Israel moe taki tori vo da wet, te dem sidom na hoso, en te dem de na pasi de waka. We dati de leri wi ageen, fa wi toe moe membre da boen tori vo Masra alatem, al-wasi hoepee wi de, na hoso, efi na wroko, efi na firi; doro nomo da tori moe de na wi prakseri, wi no moe vergiti Gado nooiti wantem.
3. Alasani di wi jeri, Jehova ben meki Moses pramisi gi dem pikien vo Israel, ala dati ben kom so na bakatem; da boen nanga da ogri. Fosi dem ben finni boen na Kanaan-kondre, so leki Gado ben taki; ma bakatem, di dem vergiti Jehova, da floekoe no ben mankeri toe, vo fadom na dem tapo; bika Jehova poeloe dem baka na Kanaan, a seni dem gowei, panja na ala ala kondre, dapee dem de liebi tee tidei. We nanga dati wi kan si, alasani di Gado mofo taki, a taki nanga reti; en alasani di a pramisi wi, dati a sa gi wi toe, efi da boen, efi da ogri. We tee tidei Masra de potti alasani na wi fesi, blesi nanga floekoe, liebi nanga dede, meki ibriwan teki dasani, di a wani. We meki wi soekoe dan, vo wi finni da boen liebi tee vo teego. (1. Tim. 6, v.12.)
4. Moses no ben kan doro na ini da Kanaan-kondre, di de na disi grontapo; dati ben de hem strafoe. Ma vo si? Gado ben meki a si da kondre farawei. En na bakatem Jehova teki hem boen foetoeboi kom na da moro switi Kanaan-kondre, di de na tapo, na ini hemel. We da so Gado Masra lobbi vo doe nanga dem pikien vo hem; nofo-tron a kan tan na wi hai, leki a de poeloe ala plisiri na wi hanoe, meki wi tan soso; ma ala dati a de feti, vo gi wi wan moro betre sani baka.
Di wi de na disi grontapo jete, meki Masra kan hopo wi hai, vo wi kan si da boen Kanaan-kondre wan-wantron, di de na tapo, dapee Kristus srefi ben waka go na wi fesi!
(Job Kap. 1 tee Kap. 42.)
Wan soema ben liebi na Uz-kondre, disi dem kali Job; a ben de wan toemoesi boen soema, en wan betrouw soema, bika a ben frede Gado, en a no ben bemoeje nanga ogri soema. A ben habi tin pikien, sebi man nanga dri oeman-pikien. So srefi Gado ben blesi hem nanga foeloe goedoe, bika a ben habi sebi doezend skapoe, nanga dri doezend kameli, nanga feifi hondro kow, nanga feifi hondro boeriki, nanga foeloe slavoe toe, man nanga oeman; a ben de wan goedoe-man, pasa ala tra soema vo hem kondre.
We dem pikien vo hem ben habi da gewenti, te wan vo dem ben habi hem verjari, dan dem brara ben lobbi alatem vo meki wan trakteri na da srefi brara hoso, disi ben verjari, en dan dem verzoekoe dem dri sisa toe, vo dem kom njam nanga dem. We na baka vo so wan trakteri, te dem ben habi so wan plisiri makandra, dan Job ben njoesoe alatem, vo seni kali dem pikien, a meki dem wasi dem srefi, vo dem kom krin; en buiti dati hem srefi meki tin ofrandi vo dem, leki so meni pikien, disi a habi. Bikasi Job taki: Somtem dem pikien ben doe wansani, disi no boen; somtem dem ben vergiti Gado na ini da plisiri vo dem. En vo da hede a ben doe so alatem, te so wan trakteri ben pasa, vo Gado kan gi dem pardon baka. We wan dei, disi dem pikien vo Gado kom na Masra (dati wani taki, dem santa Engel vo hem), dem tanapoe na hem fesi vo teki ordre, satan toe doro dedapee, moksi nanga dem. We vo da hede Masra haksi hem, a taki: Hoepee joe komopo? Satan taki: No wan reti plesi mi komopo, da waka mi ben waka heeli kondre doro, dati da mi wroko. Masra taki: Hoefasi, joe ben loekoe mi boen foetoeboi Job toe? So wan boen soema moro no de na heeli grontapo, leki hem; a de holi hem srefi so boen, a respeki hem Gado, en a no bemoeje nanga wan ogri soema. Satan taki: Ja, da troe! Ma joe denki, Job frede hem Gado vo soso? Joe no doe hem so meni boen? Joe no ben blesi hem na ala fasi, hem nanga hem famili, nanga hem pranasi, nanga alasani vo hem? A no habi nem vo wan bigi goedoe-man na heeli kondre? We dati meki a lobbi hem Gado. Ma so hesi joe sa tesi hem pikinso nomo, joe sa si, a no sa lobbi joe moro, a sa libi joe hesi. Masra taki: We alasani, di a habi, mi gi na joe hanoe; ma loekoe boen, vo joe no potti han na hem skin. We nanga da antwoortoe satan komopo na Masra fesi.
Na baka vo dati, wan dei di ala dem pikien vo Job ben sidom na wan trakteri na da gran-brara hoso, wan soema tjari wan boodskopoe kom na Job a taki: Dem Arabia-soema doro na ini joe kondre, dem teki ala joe kow nanga dem boeriki, tjari gowei, en dem knegti vo joe dem kili nanga houroe; mi wawan libi, vo mi kom meki joe sabi, san pasa. We ala di da srefi soema no kaba jete vo taki nanga Job, wan trawan kom ageen, a taki gi hem: Dondro-faja komoto na tapo, a kili ala joe skapoe nanga dem herder toe; mi wawan djompo komopo na ini da faja, vo mi kom meki joe sabi. We bifo dati kaba vo taki, wan trawan ageen doro na Job, a taki: Dem Kaldea-soema hopo, dem meki dri bigi kompanie, dem doro na ini joe kondre, dem teki ala joe kameli, tjari gowei en dem knegti vo joe dem kili nanga houroe; mi wawan libi, mi ronwei, vo mi kom meki joe sabi. Da soema ageen no kaba jete vo taki, ofoe wan trawan doro ageen, a taki: Ala joe pikien ben de ma-kandra na da gran-brara hoso, en di dem sidom de njam, wan tranga drai-winti hopo, a naki da hoso na ala fo hoekoe vo hem, tee da hoso fadom na gron, a kili ala joe pikien wantem; mi wawan djompo komopo dapee, vo mi kom meki joe sabi. We di Job jeri ala dem tori so, a hopo na hem stoeloe, a pliti hem klosi, a koti hem hede-wiwiri, en dan a hiti hem srefi nanga bele na gron, a taki: Ke, san mi sa taki! Nanga naakend skin mi gebore, we nanga da srefi naakend skin mi moe go baka. Masra ben gi mi ala dasani, Masra teki hem baka. Gran-tangi vo hem! Na ini ala da hebi Job ben holi pasiensi boen, a no misi wan woortoe srefi.
We wan tra dei, disi dem pikien vo Gado kom na Masra ageen, en di satan toe moksi nanga dem, Masra taki gi hem: Hoefasi, joe si now, fa mi boen foetoeboi Job holi hem bribi so boen jete, alwasi joe ben meki mi strafoe hem soso, sondro a ben doe mi wan ogri? Satan taki: Ja dati no de wan reti tesi jete. Mi sabi soema maniri boen-boen; alasani disi wan soema kan lasi, a no sa hati hem, so langa a no lasi hem liebi. We so hesi joe sa meki wan ogri kisi hem eigen skin srefi, joe sa si, a sa bedanke joe hesi. Masra taki: We a de na joe hanoe; ma loekoe boen, vo joe no kili hem!
We di satan jeri da woortoe nomo, a komoto hesi na Masra fesi, a doro na Job tapo, a meki ala hem skin kisi toemoesi ogri soro, nanga broedoe-sweri, nanga branti; komoto na hem ondrofoetoe tee na tapo hem hede da branti ben masi hem heeli skin. En dasani ben krasi hem so tranga, tee bakatem a teki wan piesi broko batra, vo kraboe hem skin, ala di a sidom na ini asesi nanga bigi sari. We di hem wefi si hem so, a haksi hem, a taki: Hoefasi dan? Joe holi joe bribi jete? A no moro betre, joe bedanke joe Gado, kili joe srefi? Ma Job taki gi hem: No trobi mi nanga da lau-taki vo joe, da wan asranti taki! Mi denki, di Gado ben gi wi so meni boen-sani kaba, tog wi moe teki da ogri toe. We na ini ala dati Job no ben doe ogri jete, a no misi wan woortoe srefi.
En Job ben habi dri mati, dem nem Elifas vo Teman, nanga Bildad vo Sua, nanga Zofar vo Naema; dem ben de gran-soema vo wan tra pikin kondre, en dem ala dri ben de vo wan kroekoetoe famili vo Abraham, so leki Job srefi ben de vo da famili toe, alwasi no vo dem reti Israel-soema srefi. We di dem dri mati vo Job kom jeri dasani, disi ben kom hem abra, dem taki, meki dem go loekoe hem, vo si, efi dem kan troostoe hem pikinso. Ma di dem doro na hem hoso, en di dem si hem nanga so wan jamer-fasi, tee pikin-moro dem no sabi hem fesi moro, dati meki dem kisi wan toemoesi sari vo hem, dem bigin vo kre, en dem pliti dem klosi vo sari hede, dem go sidom nanga hem; ma no wan vo dem ben man, vo taki wan woortoe nanga hem, bikasi dem si, a de pina toemoesi nanga skin-hati.
Ma na baka, di da pyn kom moro Job, hem fosi hopo hem mofo, a taki: Ke, mi wensi, mi no ben gebore! Bika da dei di mi mama ben meki mi, a no ben de wan boen dei; betre da dei no ben hopo wantem. So srefi da neti vo hem, mi wensi, a no ben kom toe. Somtem da dei, di mi ben gebore, a ben de wan soso dei, di Gado no ben teli; somtem da neti vo hem ben de wan ogri neti. Betre, mi mama bele ben tapo, meki mi hai no kom si so wan pina. Vo san hede mi no ben dede wantem, di mi ben gebore njoe-njoe, efi na ini mi mama bele srefi? Vo san hede dem ben teki mi, potti mi na dem foetoe tapo? Vo san hede mi ben dringi bobi? Efi dem ben beri mi wantem, dan tog mi ben lidom noja nanga ruste, en no wansani ben sa trobi mi. Bika jandaso na da tra liebi tog dem ogri soema moe kaba vo trobi trawan. Janda tog dem poti malengri kan ruste. Janda tog dem loesoe dem katibo, dem no jeri basja de bari dem moro. Janda tog ala soema de wan-fasi, gran-soema nanga laagewan. We vo san hede mi moe kom na so wan pina-liebi? Mi no ha fesi, mi no ha baka! Liebi-nanga dede-trobi de miti mi! Doro nomo mi moe kre, na djeme tapo mi de, tee mi no kan njam srefi. Watra de ron na mi hai, leki wan riba. Ke, mi no ben sabi, so wansani sa kom mi abra. Mi ben sabi so? mi hede ben sa gro! Mi no ben de nanga mi boen liebi? Mi no ben de nanga ruste? Kaba so wan sani moe kom mi abra noja!
We di Job taki so na hem srefi, hem mati Elifas vo Teman piki hem, a taki: Somtem a no sa boen na joe, efi mi proberi vo taki nanga joe, ma mi no kan helpi. Joe si? joe srefi ben de wan soema, di ben leri so meni trawan, joe ben troostoe dem zwakawan, en nanga dem boen vermane vo joe joe ben hopo nofo soema, di ben fadom, en dem soema kni, di ben feti vo broko, joe ben meki dem tranga baka. Ma noja, di joe srefi kom na pina, a verfeeli joe hesi; wan tesi miti joe, nomo joe lasi hatti wantem. Somtem joe ben troostoe joe srefi toemoesi nanga da boen bribi vo joe? Somtem joe ben denki alatem, no wan ogri kan kisi joe, vo di joe ben de so wan boen soema, di frede Gado? Hoefasi, joe no finni wan foutoe na joe srefi? Membre joe srefi! Hoesoema ben kisi strafoe wantem, sondro a ben verdini hem? Joe ben si wantem, dati dem kili wan boen soema? Ogri soema mi ben si nofo, di ben kisi dem paiman baka, da onweri vo Gado kom kili dem, vo dem no kan doe ogri moro. Wan neti, di ala soema ben lidom de slibi, en di mi ben de nanga dipi prakseri, mi kom si wansani na mi hai, disi meki mi skreki tee mi befi. Mi ben si wan jorka efi wan geest pasa safri na mi fesi, en na mi jesi mi jeri wan stem, di taki: Hoefasi, wan soema krin na Gado hai? Wan liebi-soema no sa habi foutoe na fesi vo hem Gado, disi meki hem? Dem boen Engel vo Gado no de so krin na hem hai, en nanga dem boodskopoe-man vo hem a de finni foutoe srefi. We fa a no sa finni foutoe dan nanga wi liebi-soema, di wi de wan soso doti, wan stof, en te wi dede, dem worom kom njam wi skin? -
A troe, ala ogri soema kisi dem aparti strafoe vo da ogri, di dem doe, Gado srefi de pai dem. Mi srefi ben si so wan soema wan dei, disi ben ogri doro-doro, en vo da hede mi ben pramisi hem, dati a sa kisi hem strafoe; en troe-troe, Gado ben pai hem boen-boen, dem pikien vo hem ben kisi hafoe toe. Ma tog da reti loetoe vo ala ogri, dati de na ini ala soema hatti. We efi mi kan gi joe wan boen rai, mi sa taki: Go haksi Gado srefi, meki hem taki gi joe, vo san hede so wansani moe miti joe; bikasi dasani, disi Gado doe nanga wi, alatem a lobbi trobi wi vo begrypi, vo san hede dati kom so. Mi taki, a boen vo wan soema, efi Gado hali hem jesi; en vo da hede joe no moe feti nanga hem, te a gi joe wan pikin fomfom. Bika hem de fom joe troe, ma hem srefi sa dresi joe baka; hem de masi joe skin, ma hem srefi hanoe sa genezi joe baka. Alwasi siksi-tron joe kom nanga pina, pasiensi! Masra sa poeloe joe na ini; en di vo sebi-tron no wansani sa doe joe ogri. Alwasi hoesani kom miti joe, joe no sa frede; ma na ini ala pina en verdriti joe sa lafoe srefi, joe sa onderfindi, fa joe Gado de loekoe joe boen; joe sa si, fa a sa helpi joe, dati joe kan go slibi nanga kouroe hatti. Joe si? da so wi sabi, en da so a de. We doe so toe, en membre dasani!
Ma Job piki hem, a taki: Ke mi no kan holi moro! Da pyn moro mi kaba! Mi no kan. Mi heeli skin bron mi leki faja. O, mi Gado! Mi wensi, mi kan dede hesi, meki mi komoto na ini so wan pina! Dan tog mi kan habi da wan troostoe jete, vo mi sabi, a no sa moro mi so, tee mi lasi ala mi pasiensi krin-krin, en vo mi no taki wan woortoe, disi no fiti wan boen soema. Ma san mi sa taki! Langa mi no kan holi moro. Alwasi mi wani dwingi mi srefi, vo holi pasiensi pikinso jete, mi no kan, di mi no si wan kaba vo da pyn jete. Bika tog mi no tranga leki stoon; mi skin tog a no isri. Hoefasi dan? Helpi no de vo mi moro? Mi moese pori dan soso-soso, sondro wan soema kan helpi mi? Mi ben denki, dem brara vo mi sa kom gi mi wan troostoe; ma mi si, mi kori mi srefi. Mi ben denki, oen sa habi wan sari hatti vo mi, ma oen libi mi soso; di oen si da toemoesi jamer-fasi vo mi, nomo oen kom frede wantem. Ma vo sani dati? Tog mi no ben haksi oen wansani vo presenti; mi no ben trobi oenoe vo wan tra-sani toe.
We, oen leri mi dan, mi sa tan tiri vo mi. Sori mi dasani, di mi no ben taki reti! Oen sa si, alasani di mi ben taki, mi ben taki nanga reti. Mi no kan kre mi nootoe dan? Mi no kan taki dasani, disi de hati mi? O mi Gado, loekoe fa mi de! So wan mofina soema! Membre tog, da liebi vo mi de leki wan winti; ibri momenti a kan gowei! Ke, mi wensi, mi dede kaba! Mi weri vo troe! We mi Gado, kaba dan nanga mi! No meki mi pina moro; bika da soso mi de na liebi.
Ke, sani da wan liebi-soema, disi joe kan meki so meni moeiti nanga hem, so leki joe doe nanga mi! Ala dei joe de na mi tapo, en ibri momenti srefi joe de seni wan njoe tesi ageen, vo poeloe mi foutoe. Hoetem joe sa kaba dan nanga mi? Efi mi ben doe ogri, san dati kan trobi joe dan? Joe de wakti soema toemoesi, di joe de loekoe alasani so fini-fini. We gi mi pardon dan vo da ogri, di mi doe, en poeloe mi zondoe. Bika pikin-moro dem sa beri mi na ondro gron; tamara te joe sa soekoe mi, mi no sa de moro.
Na baka Bildad vo Sua piki Job, a taki: Hoe-langa joe sa taki so jete? Dem woortoe vo joe, di joe mofo de taki, dem tranga vo troe. Joe denki, Gado sa doe soema kroekoetoe? Somtem dem pikien vo joe ben doe wan ogri; somtem dati ben meki Masra kili dem so na ini da ogri, dem ala makandra. Ma efi joe sa soekoe joe Gado baka bitem, begi hem pardon nanga joe heeli hatti, dan hem sa blesi joe baka, a sa meki joe kisi moro foeloe pikien, leki joe ben habi. Dan joe sa plisiri baka, tee joe sa lafoe srefi, en joe sa taki hem gran-tangi. Bikasi Gado no kan libi dem boen soema; ma dem ogri soema wawan sa kisi bigi sjem. Job piki hem, a taki: Ja dati mi srefi sabi boen-boen; no wan soema de krin na Gado hai. Efi hem wani kroetoe nanga wi, wi no kan piki hem wan woortoe, alwasi doezend sani a sa teki, potti na wi fesi. Hem wawan habi ala koni, hem habi ala tranga.
Soema sa man vo feti nanga hem? A no hem de da tranga Gado, disi de kanti dem hei bergi, meki dem fadom na dem ogri soema tapo, beri dem, bifo dem srefi kan sabi, sani kom dem abra? Te wan aardbefi de, a no Gado, di meki gron kom seki so? Te hem wani, zon no moe hopo, dan a no sa hopo; so srefi te a wani, star no moe kom, joe no sa si star. Hem wawan de hopo da bigi hemel-tenti, en na da bigi zoutwatra tapo hem foetoe de waka. Dem wroko vo hem bigi vo troe, tee wi no kan begrypi dem. Soema sa man, vo teli ala dem foeloe wonder-wroko vo hem? Efi hem poeloe wansani na joe hanoe, joe sa go teki hem baka? Soema sa haksi hem: San joe doe mi? Bikasi hem da Gado; te hem hatti de bron, no wan soema kan dwingi hem; dem bigi-membre-soema srefi, disi de prodo nanga da tranga vo dem, dem moe saka toe na hem ondro. We fa mi sa man dan vo stry nanga hem en vo soekoe reti? En alwasi mi habi reti, tog mi no sa piki hem, ma mi sa begi hem pardon.
We ala dati mi sabi boen-boen. Ma wansani de, disi mi no kan kisi krin jete. Oen taki, Gado meki dem boen soema finni boen, ma vo dem ogri soema a no ke. We dati mi no finni so. Oen srefi sabi, te Gado de strafoe wan kondre nanga feti, efi nanga hangri-tem, efi nanga siki, dan alatem dasani de kisi dem boen soema, net so leki dem ogriwan, Gado no poeloe dem boenwan na ini. We da so mi si na mi srefi toe; mi no sabi, san mi moe denki. Ma mi no kan kroetoe nanga Gado, bikasi hem no de wan liebi-soema; efi hem ben de vo mi speli, mi ben sa kroetoe nanga hem, ma di hem bigi moro leki mi, mi no kan doe noti, en tra soema no kan koti da kroetoe toe gi mi. Efi Gado sa poeloe hem wipi na mi tapo, vo mi komopo na ini da skreki pikinso, nomo mi sa taki, mi no sa frede moro; ma vo di djoesnoe mi srefi no sabi, fa mi de.
Ke, da liebi kom verfeeli mi vo troe! Ma pasiensi, mi no sa kre vo dati moro. Mi sa taki vo dasani wawan, disi de hati mi ziel , en vo da troostoe, disi mi hatti de fili. Mi sa begi mi Gado: Ke mi Masra, no floekoe mi! Ma meki mi sabi dasani, disi joe mandi nanga mi! A no joe han srefi ben meki mi?
We now joe srefi sa pori joe wroko baka, vo meki dem ogri soema taki, dem habi reti vo doe tra soema kroekoetoe? No mi Masra, joe hai krin; joe de loekoe sani moro dipi, leki wi liebi-soema! Di joe han ben meki mi so mooi en so boen, we now joe sa teki mi, pori mi baka? A no joe ben gi mi liebi? Joe ben doe mi so meni boen? Efi joe no ben potti hai na mi, granwei mi ben dede kaba. En tog joe ben kibri sosani na ini joe hatti, vo joe wani doe mi, so leki mi si noja? We efi na baka vo disi liebi no wan tra liebi de moro, dan mi no sabi, vo san hede joe ben meki mi kom gebore; dan a ben betre, mi ben dede wantem. Efi da heeli liebi vo mi sa de so wan pikin-sani nomo, dan tog Gado sa kaba nanga mi, vo mi kan habi mi plisiri pikinso jete, bifo mi go na da doengroe dede-kondre.
We now hem mati Zofar vo Naema piki hem, a taki: Hoefasi, wan soema, disi de meki so foeloe taki-taki, a no moe jeri trawan toe? Di joe prodo so nanga da dipi taki vo joe, joe denki, joe moese habi reti? Somtem joe moe membre, nanga dem soso tori, di joe ben prakseri na joe hede, joe wani tapo tra soema mofo? Joe denki, joe wawan kan holi soema vo spotoe, sondro wan soema sabi, vo piki joe? A troe, joe sa taki, da leri vo joe de reti, Gado no kan finni foutoe nanga joe. Ma mi wensi, Gado srefi moe hopo hem mofo, taki nanga joe, vo a sori joe da dipi-dipi koni vo hem, disi de pasa ala soema koni; dan joe sa si, efi Gado wani, a kan strafoe joe toe-tron moro ogri, leki a doe kaba; bika troe-troe, Gado no loekoe ala joe zondoe jete. Hoefasi, joe denki, joe sa man vo begrypi ala da dipi koni vo Gado, tee a no kan dangra joe moro? No no, dati joe no kan. Fa joe sa man, vo sabi sosani? Gado wawan sabi soema doro-doro; hem kan si boen-boen, hoepee da zondoe sidom; en a sabi toe, san vo doe nanga wi, meki wi kom na verstand, vo wi kisi onderfindi. Bikasi so leki wan soema gebore, a dom leki wan meti. We efi joe ben de wan boen soema, joe ben soekoe Gado, efi joe hanoe no ben doe kroekoetoe, en efi joe ben poeloe ala ogri na ini joe hoso: dan joe ben kan hopo joe fesi noja sondro so wan sjem, joe no ben habi noti vo frede. Dan troe joe ben sa habi wan troostoe na ini da pina vo joe, joe ben kan lidom nanga kouroe hatti, sondro wan soema gi joe verwyti. Ma dem ogri soema moese pori, dem no habi wan plesi vo tan, en da troostoe vo dem de wan soso-sani, wan pi-kin winti srefi kan teki hem, tjari gowei.
Job piki hem, a taki: Ja oenoe wawan de dem soema, disi sabi sani; te oenoe dede, dan no wan koni sa de moro na grontapo. Ma mi denki, mi sabi sani toe, so boen leki oenoe; oenoe no sa meki mi lasi hatti jete. Dasani disi oenoe sabi, dati ala tra soema sabi toe. A troe, mi de wan soema, disi dem mati vo mi de lafoe; ma mi habi onderfindi, bika alatem te mi kali mi Gado, a de jeri mi. Ma da so a de na grontapo; alatem te wan soema drai hem liebi, a lobbi hem Gado, nomo dem trawan moe lafoe hem, dem moe loekoe hem vo wan lauman. Ma wan ogri soema, disi no frede Gado, en disi membre, hem habi reti vo doe ala soortoe ogri: so wan soema de liebi boen, no wan trawan sa trobi hem. Ma mi sabi, da Jehova srefi, disi meki sani waka so; bika ala soema de na hem hanoe. Oen taki, dem gran-tata sabi sani, en dem ouroe soema habi verstand. Ma mi taki: Masra wawan sabi ala sani, hem wawan habi ala koni nanga ala tranga. A kan doe, sani a wani; ala soema moe onderdaniki hem. A kan meki dem koniman tron lau, en dem gran-soema a kan poeloe, meki dem tron noti. Ala dati mi srefi sabi toe, so boen leki oenoe. Ma wan tra-sani de, di mi soekoe na Gado; dati wawan mi hangri, vo mi kom sabi. Oenoe meki so meni soso taki-taki, di no kan helpi mi noti. Mi wensi, oen tapo oen mofo, dati moro betre. Somtem oen denki, oen wani helpi Gado, vo gi hem reti? No no, na so wan fasi, leki oenoe taki nanga mi, oen no moe meki moeiti vo helpi hem, vo soekoe hem reti, gi mi kroekoetoe; dati a no sa taki oen tangi, ma krasi a sa krasi oenoe; oen sa skreki srefi, te hem sa hopo vo taki nanga oenoe. Ala dem odo vo oenoe de noti, dem no kan meki mi hatti kouroe.
We tan tiri dan, en meki mi taki vo mi, meki mi troostoe mi srefi pikinso, vo mi no lasi hatti krin-krin. Mi sabi boen Gado no sa libi mi; en alwasi a doe, leki a wani kili mi, tog mi sa wakti da helpi vo hem, di a sa helpi mi baka. Ma wan -sani de, di mi hangri vo sabi; mi wensi, Gado moe sori mi, hoe reti ogri mi ben doe. Ke, mi Gado, gran-tangi! meki mi sabi mi zondoe, meki mi si, fa mi ben pasa joe mofo! San meki joe de kibri joe fesi so gi mi? Joe doe, leki mi da joe vyanti. - Mi de leki wan dre wiwiri; we san joe habi dan nanga mi, disi joe de strafoe mi so? Fosi joe meki mi lasi ala mi goedoe, en dan joe masi mi so, tee ala mi skin kom pori, leki wan soso hoedoe de pori. Somtem da vo mi jonge jari zondoe? San da wan liebi-soema, di hem mama meki, di de liebi so wan sjatoe tem? A no ha bro so langa leki a de; leki wan blomiki a tan, disi de gro hesi, ma hesi a lasi baka; da liebi de, leki wan skyn soso. We fa joe kan poeloe joe hai so gi mi dan, tjari mi na kroetoe? Soema sa finni wan krinwan, dapee krinwan no de? Mi wensi vo troe, vo joe meki mi kan dede wantem, kibri mi so langa na da doengroe dede-kondre, tee da hattibron vo joe sa saka. Ma gran-tangi! mi plisi joe, potti wan tem gi mi, pramisi mi, dati na so wan tem joe sa membre mi, gi mi liebi baka. - Bika mi hoopoe, dati dem dede-soema sa wieki baka; en vo da hede na ini ala pina, di mi pina, mi sa troostoe mi srefi nanga da njoe fasi, di mi sa kisi na da tra liebi. Da joeroe joe sa kali mi, en mi sa piki joe. Joe srefi sa hangri, vo si da wroko vo joe hanoe baka ageen.
Na baka Elifas vo Teman nanga Bildad vo Sua piki hem ageen, dem taki: Ka, joe ha toemoesi hei membre! Joe prodo vo troe nanga da dipi taki vo joe. Ma sani ala dati, di joe taki? Da winti soso, di no kan helpi; da drem joe de drem. Fa joe kan meki joe srefi bigi so na Gado fesi? Joe denki, joe wawan sabi Gado? joe wawan sabi alasani? San joe sabi dan, di wi no sabi toe? So meni ouroe soema no de, di habi moro onderfindi, leki joe? We da troostoe, di wi ben troostoe joe so switi, dati joe no wani teki? Joe loekoe dati, leki wan soso-sani? Fa joe hatti tranga so? San joe membre dan? Joe denki, joe krin na Gado hai? Joe no sabi, dem santa soema vo Gado srefi no de so krin na hem fesi? Hemel srefi no krin nofo vo hem? We fa wan liebi-soema, wan soso takroe soema, sa krin dan na hem fesi? Joe denki, joe habi reti, en Gado doe joe kroekoetoe? We, wi sa sori joe, fa a de. Potti joe jesi boen! Alatem wi ben si, dem ogri soema de soekoe pina, potti gi dem srefi, en dem srefi moe njam da ogri, di dem ben doe. Alwasi somtem dem kan finni pikin boen, tog da boen no sa tan langa na dem hanoe. Doro nomo dem de nanga djompo hatti en nanga skreki, leki ronweiman na boesi. Ma dem no kan poeloe dem srefi na Gado hanoe, ronwei vo hem; dem moese kisi dem paiman, so leki dem verdini. Bika nanga Gado no wan soema kan feti; en dati meki dem ogri soema moese tan nanga da skreki hatti so langa dem de liebi na grontapo.
Job piki dem ageen, a taki: O, kaba dan! Ala dati mi srefi sabi, sondro oen ha vo taki gi mi. Oen alamal de soso troostoe-man. San mi doe oenoe, disi oen trobi mi so? Oen denki, efi oenoe ben de na mi plesi, mi ben sa trobi oenoe so toe? No, Gado kibri mi! En alwasi mi ben finni foutoe nanga oenoe, tog mi no ben sa krasi oen so, ma troostoe mi ben sa troostoe oenoe. We oen no si, fa mi de pina, en fa mi kre? Hoe langa oen sa holi jete, vo krasi mi? Oen no sjem vo trobi mi so nanga da taki vo oenoe? Alwasi mi ben misi wan woortoe, hoe reti oen habi, vo oen meki oen srefi bigi so, gi mi sjem? Tog oen srefi si, fa Gado hiti mi na gron kaba; a kisi mi na ini hem netti. Vo troe, a moro mi kaba. Mi no kan moro. Mi no ha fesi, mi no ha baka. Gado hatti srefi de bron nanga mi, a loekoe mi vo hem vyanti. Ala hem soldati de rontoe mi hoso. Dem brara vo mi libi mi, dem tan farawei vo mi; dem kompe vo mi doe, leki dem no sabi mi moro. No wan vo mi famili kom loekoe mi; dem moro beste mati vo mi vergiti mi krin-krin. Dem soema vo mi hoso srefi no ke vo mi moro, dem de loekoe mi, leki wan heeli vreemde soema. Te mi kali mi foetoeboi, a no de piki mi; da begi mi moe begi hem, tangi-tangi, meki a kom helpi mi. Mi wefi srefi habi fisti vo mi, a taki, hem no kan smeri da dampoe vo mi. So srefi dem pikien-pikien vo mi, dem no ke vo mi; te mi krasi dem, nomo dem gi mi asranti. No wan soema lobbi mi moro. Mi verfal so tee ala mi skin de gowei; da soso-boeba wawan de tapo dem boon vo mi. Ke mi begi oenoe, helpi mi, troostoe mi! No trobi mi moro. Mi wensi, soema moe de, di teki wan boekoe, skrifi ala mi taki na ini, vo soema kan sabi tee na bakatem, san mi ben taki. A no vo da tra liebi mi taki? Bika mi sabi vo troe, mi Helpiman de ! En te mi skin tron wan soso stof kaba na ondro gron, dan bakatem hem sa wieki mi baka, poeloe mi na ondro gron. Mi sa kenki mi boeba, en nanga da njoe skin, di mi sa kisi, mi sa si mi Gado; mi srefi hai sa si hem; no wan trawan sa kisi mi skin, ma mi srefi sa kisi hem baka; bika mi hangri dati toemoesi. Alwasi oenoe taki, a no troe, tog a sa kom so, da hoopoe de na ini mi hatti jete. Ma di oen kroetoe mi so, loekoe boen, vo Gado no strafoe oen vo dati; bikasi oen moe sabi, wan kroetoe de toe na baka vo disi liebi.
We di Job taki so, hem mati Zofar vo Naema koti hem mofo, a taki: So? nanga mi joe de kroetoe, di mi ben taki, joe drem? We, joe denki, mi no sabi vo piki joe moro? Mi haksi joe, efi joe no sabi, dati ben de so alatem, sinsi soema de na grontapo? Da wildri vo dem ogri soema, da wan pikin-tem wildri nomo; en da plisiri vo dem falsiwan, da vo wan momenti soso. En alwasi wan ogri soema kan meki hem srefi bigi tee na tapo, tee hem hede kisi dem wolkoe srefi, tog a sa pori hesi, vo ala soema sa taki: Hoepee da bigi vo hem de now? Ala goedoe vo hem sa gowei, tee dem pikien vo hem moe waka begi njanjam; en dem boonjon vo hem moe lidom na ondro gron, verrotoe. Da so Gado de strafoe dem ogri soema vo ala dem ogri, di dem doe.
Job taki: Tangi-tangi! Jere mi reti dan, sani mi wani taki! Oen sa doe mi wan bigi plisiri, efi oen jeri mi boen. Na baka oenoe kan taki ageen, bika oen no begrypi mi reti. Mi no ha trobi nanga liebi-soema, a no gi dem mi klage mi nootoe. Mi hangri nomo, vo mi kom sabi, vo san hede so wan ogri miti mi. Efi mi sabi dati, dan mi sa holi pasiensi. Oen no si, fa mi de? Oen no skreki? We tan tiri dan, meki mi taki.
Vo san hede so meni ogri soema de, disi de liebi boen alatem, tee dem kom ouroe? Dem habi so meni goedoe, nanga pikien, nanga pikien-pikien. Alasani vo dem waka so boen, dem no sabi wan trobi, no wan nootoe, noti de hati dem; plisiri wawan dem plisiri doro. En te dem kom ouroe, dem kan meki spotoe nanga dede srefi. Dem no membre Gado toe, dem taki, dem no wani hem, dem no ha wroko vo dini hem en vo kali hem nem, dati no kan helpi dem. - Somtem oen sa taki: Da strafoe, disi wan ogri soema verdini, Gado kan kibri dati so langa, tee dem pikien vo hem kisi hem. Ma mi denki, a moro betre, da soema srefi kisi hem strafoe wantem, vo hem srefi hai kom si, fa a ben pori hem srefi, en fa Gado hatti de bron na hem tapo. Bika te a dede kaba, dan dem pikien vo hem no hati hem moro. Somtem oen sa krasi mi, di mi taki so; somtem oen sa taki, mi de kroetoe nanga Gado, mi wani leri hem, fa a moe doe nanga soema. Ma mi haksi dati wawan, vo san hede wan soema moe de nanga hem boen liebi doro da heeli liebi-tem vo hem, tee a dede, sondro wan pikin-sani ben mankeri hem, en wan trawan dati no kan habi wan plisiri, a no kan njam hem bele foeloe srefi, en te da pina-liebi vo hem pasa, dan a moe dede wan mofina fasi, en dan dem ala toe lidom makandra na ondro gron, worom kom njam da wan so boen, leki da trawan. A no so a de? Oen srefi no si, da so a de pasa na grontapo?
Ma mi sabi, oen no wani verstaa mi boen, bika oen teki da kre vo mi vo wan tranga-hede-kre, alwasi oen srefi si, fa mi de begi en fa mi djeme. Ke, mi wensi vo sabi, hoepee mi kan finni mi Gado, mi wensi, mi kan doro tee na hem fesi, vo mi haksi hem srefi, efi mi no habi reti. Vo troe, mi hangri vo sabi, fa hem sa piki mi, en sani hem sa taki. Somtem oenoe sa taki, Gado sa krasi mi. No, dati a no sa doe. Ma poti vo mi, mi no kan finni hem; alwasi hoesan mi doe, vo soekoe hem, mi no kan fili, dati a de mi klosibei. Mi sabi troe, alasani disi Gado doe nanga mi, hem sa sabi toe, vo san hede a doe mi so. Bikasi a ben tesi mi reti-reti, efi mi foetoe no sa misi hem pasi, en efi mi mofo no sa taki wan woortoe, disi no fiti. We, hem da Gado; a kan doe, san a wani en a sa doe nanga mi toe, san a wani, mi no kan tapo hem. Ma juisti dati de meki mi skreki vo hem; mi membre hem? nomo mi frede kaba. Bika Gado srefi meki mi kom frede so, vo di mi no kan begrypi, vo san hede a no ben poeloe mi na grontapo, bifo da ogri kom kisi mi, kaba a no ben waarskouwe mi srefi, dati so wan sani sa kom mi abra.
Mi ben si so meni ogri soema, disi ben doe ala soortoe ogri, dem foefoeroe, dem bedriegi soema, dem de hoeroe, dem kili soema srefi, ma mi no si, Gado strafoe dem so, leki dem verdini; a tan, leki no wan soema ke vo da ogri, di dem doe. Mi lei? - Ma mi , di mi ben lobbi mi Gado alatem, mi moe kom na so wan pina. We dati no sa meki mi doe ogri jete, vo oenoe moe kisi reti na mi tapo, sori mi wan foutoe. Mi sa holi mi srefi boen, so langa leki mi de. Mi konsiensi no gi mi wan verwyti vo no wan sani, di mi doe na mi heeli liebi-tem. Ke, fa mi ben liebi switi alatem na mi boen Gado ondro! Hem srefi ben de mi klosibei de loekoe mi, en nanga dem pikien vo mi mi ben habi mi plisiri. Mi ben de wan gran-soema vo troe; te mi ben sidom na mi stoepoe tapo, no wan jonge soema ben meki prefoeroe na mi fesi, en ala ouroe soema ben respeki mi. Mi ben habi boen nem na ala soema, di ben sabi mi. Bika mi ben helpi foeloe potiman, en iniwan tra mofina soema nanga dem poti weduwe mi ben asisteri dem alamal. Nooiti mi ben doe wan soema kroekoetoe, reti wawan mi ben doe. Mi ben de dem blinde soema hai, en dem laam soema foetoe, en dem potiman tata, en dem vreemde soema advokati. We vo da hede mi ben verwakti, mi sa finni boen, en mi sa liebi langa na grontapo. Ma poti vo mi, so leki mi de noja, dasani kom verandre wan heeli tra-fasi. No wan soema lobbi mi moro, ma ibriwan soema meki spotoe nanga mi; dem soso-soema srefi, di no waarti noti, dem moe lafoe mi, dem singi mi na strati srefi. We hoepee da bigi vo mi de now? A gowei krin-krin. A tan, leki wan storm-winti teki ala mi sani, tjari gowei. Da boen liebi vo mi wai, leki wan wolkoe de pasa. Na pina mi de. Dei nanga neti mi no ha bro; ala mi skin de njam mi, a bron mi leki faja, mi moe bari doro nomo.
We fa dati kom dan? Bika tog nooiti mi ben loekoe na tra soema oeman. Fa mi ben kan doe so wan takroe-sani! Mi no ben moe frede da strafoe, di Gado ben sa strafoe mi? Da soema, disi doe ogri, a no moe kisi strafoe? Efi mi foetoe ben waka kroekoetoe pasi, Gado hai no ben sa si mi? Efi mi hatti ben seni mi, vo waka go na tra soema oeman, dan a ben fiti mi, vo trawan doe mi so srefi baka; bika dati da wan bigi sjem-sani, sosani moe go na fiskali srefi. Dati ben sa de wan faja, disi njam ala mi sani, en disi pori mi tee na loetoe srefi. Ma dati mi no doe. Mi wensi, Gado srefi moe ondersoekoe mi liebi, a sa finni, dati mi no doe sosani. Te wan vo mi slavoe ben habi wan kwesti nanga mi, hoetem mi ben gi dem kroekoetoe, vo mi moe habi reti? Gado no ben meki dem toe, net so leki a ben meki mi? We fa mi ben sa doe verantwoortoe mi srefi, te Gado kom ondersoekoe dati? Nooiti mi ben si wan soema nanga hangri, ofoe mi ben teki mi piesi brede, gi hem hafoe. Mi ha wan toemoesi zwaki hatti vo dem mofina soema; mi no kan njam, mi wawan, mi moese gi dem hafoe, leki wan tata de zorgoe vo hem pikien. Da so mi ben njoesoe alatem, sinsi mi jonge jari. Naakti soema mi no ben kan si toe, disi de waka soso na ini kouroe, sondro dem habi klosi, vo tapo dem skin. Ke, hoe meni poti soema ben taki mi tangi vo dem skapoe-boeba, di mi ben gi dem, vo dem kan warm dem skin! So srefi vo moni mi no ben gridi toe. Nooiti mi ben potti mi vertrouw na mi goutoe tapo, leki soema kan teki wan piesi goutoe taki: Joe da mi troostoe. Mi no ben meki mi goedoe foefoeroe mi hatti, bikasi dati ben sa de wan bigi zondoe vo so wan gran-soema, leki mi de; dati ben de so boen, leki mi taki, mi no sabi da Gado, di de na tapo.
Te wan vyanti vo mi ben kom na wan ongeluk, nooiti mi ben taki: dati boen, mi lobbi so. Ke, fa mi sa wensi wan trawan ogri, fa mi kan floekoe soema! Te mi ben si vreemde soema na strati, disi no habi hoso vo slibi, alatem mi hoso ben hopo vo dem soema, vo dem kan kom na ini, slibi, efi dem wani. - Mi kan teki ala soema vo getuigi, bika heeli kondre sabi mi. We efi mi ben doe wan ogri, di mi soekoe vo kibri, so leki oenoe membre, mi sa habi hatti, vo taki so dan, mi no sa sjem vo kom na dem fesi? Ke, mi wensi, mi kan go na Gado kroetoe, verantwoortoe mi srefi vo dasani, disi oen potti na mi tapo! Mi sa sabi vo piki; mi sa verteli hem alasani, fa mi ben waka, en fa mi ben doe. Oen sa si, mi sa finni mi reti. Mi no frede.
We di Job bigin vo taki so, dem dri mati vo hem no piki hem moro, vo di a ben loekoe hem srefi vo wan reti boen soema. Ma wan trawan ben de jete, disi dem kali Elihu , wan jonge soema; we di hem jeri da taki so, hem hatti kom bron nanga Job, vo di a ben denki, hem habi moro reti, leki Gado. So srefi hem hatti bron toe nanga dem dri mati vo hem, vo di dem sidom kroetoe so nanga Job, kaba now dem no sabi vo piki hem moro. Bika Elihu ben sidom wakti so langa, tee dem kaba vo taki nanga Job, vo di dem ben moro ouroe, leki hem. Ma di a si, dem ala dri no sabi vo piki Job moro, dati meki a bigin nanga dem, a taki: Di mi de wan jonge soema jete, ma oenoe grani kaba, vo da hede mi ben sjem, mi no ben wani taki na ini. Mi ben membre na ini mi hatti: Meki dem bejari soema taki, meki dem gran-soema sori dem koni. Ma now mi si, a no dem jari de gi soema koni, ma da Jeje wawan, di de na ini soema ini; da winti vo Gado na tapo, hem wawan de gi soema verstand. Gran-soema wawan no sabi alatem, sani de reti; en dem foeloe jari wawan no gi joe onderfindi jete.
We meki mi taki dan! Oen jere mi! Mi sa sori oenoe, sani mi sabi. Mi ben wakti langa nofo tee mi si, oen kaba, oen no sabi noti moro vo piki; we vo da hede mi sa bigin noja. Bika mi ha foeloe vo taki. Mi no kan helpi; mi hatti srefi de seni mi. We alasani, di de na ini mi hatti, mi sa poeloe; mi no sa frede vo wan soema perzon, bika efi mi frede vo soema, mi Gado no sa tevrede nanga mi.
We Job kom dan, jere san mi taki! Potti joe jesi boen-boen na ala mi woortoe! Bika mi hatti ben seni mi granwei kaba, vo mi piki joe. Loekoe, fa joe krin joe srefi; joe taki, joe de boen doro-doro, joe no doe wan ogri, zondoe no de na joe; da vo soso Gado de strafoe joe so, a de loekoe joe leki hem vyanti. A no so joe ben taki? A no mi srefi jesi jeri dati? We da dem woortoe vo joe mi teki, vo sori joe, fa joe ha kroekoetoe.
Gado no bigi, moro leki wan liebi-soema? We hoe reti joe habi dan, vo kroetoe so nanga hem? Joe denki, hem verpligti, vo gi joe verantwoortoe vo alasani, di a doe? No! Gado srefi sabi, san a doe; bika a prakseri alasani boen-boen, bifo a bigin wansani. We jere dan, fa wi ha vo loekoe so wan siki! Gado proberi na alafasi, vo hali soema jesi.
Na neti te soema lidom de slibi, a kan meki dem si wansani na drem, di moe skreki dem, en nanga dati a de waarskouwe dem, vo dem no doe da ogri, disi ben de na dem hatti. We da so Gado de soekoe vo hopo soema jesi, en vo poeloe dem na ini ogri, meki dem no kisi hei membre, vo dem ziel no moe lasi. So srefi a kan strafoe wan soema toe nanga siki, a kan meki a lidom nanga tranga skin-hati, tee hoemeni langa; da siki kan masi hem heeli skin; somtem a no luste no wan njanjam srefi, en dati kan meki a kom mangri so tee, joe si hem? joe sa taki, a de go dede djoesnoe. We efi dan wan vo dem boen Engel vo Gado kom asisteri so wan poti soema, efi Gado meki da Engel taki nanga hem, fa a moe doe, en fa a moe begi Gado pardon; en efi dan da srefi boen Engel kom troostoe da soema baka, a taki, meki hem hatti kouroe, a no ha vo frede moro, hem no sa lasi, bika hem srefi meki Gado kisi hem satisfaksi kaba: We efi da soema jeri so wan tori, dati sa helpi hem, a sa hopo, a sa kisi njoe tranga baka, leki wan jonge soema. En efi dan da soema soekoe hem Gado, begi hem pardon, dan Gado sa teki hem baka, a sa loekoe hem switi, meki da soema hatti kan kouroe baka, leki a ben de fositem. En dan bakatem da soema srefi sa taki Gado gran-tangi vo da pikin fomfom; hem srefi sa bekenti, taki: Ke, mi ben doe ogri troe-troe, mi si, mi ben doe kroekoetoe, dati wawan ben tjari mi so fara. Ma Gado ben helpi mi baka, a meki mi tan na liebi. We joe si? da so Gado doe nanga ibriwan soema wan toe dri leisi, a meki moeiti, vo wi drai baka, meki wi hai kom krin. A no so a de? We piki mi dan, Job! Ma efi joe no habi noti vo piki, jere mi dan, bika mi habi moro vo taki nanga joe.
Joe taki, joe habi reti, ma Gado poeloe da reti na joe hanoe; en da siki, di joe siki, dati de pina joe vo soso, sondro joe ben doe wan ogri. Ke Job membre, san joe ben taki! Joe denki, Gado kan doe soema kroekoetoe? Dati sa fiti so wan bigi Gado? Soema ben potti alasani reti dan na grontapo? A no Gado srefi? We efi hem no lobbi wi, efi hem wani doe nanga wi, so leki wan ogri soema kan doe nanga wan trawan, a no hem ben kan kili wi alamal granwei kaba, meki wi tron soso doti baka! Membre sani mi taki! Wan soema, disi lobbi doe trawan kroekoetoe, hem sa fiti vo tron granman, meki a tiri wan heeli kondre? - We mi haksi joe, efi joe denki, Gado sa doe joe kroekoetoe, nomo vo di a bigi so, tee a kan doe alasani, di a wani? Joe sa taki so? No! Gado hai krin vo troe, hem de si ala dem pasi, di soema de waka; a sabi da plesi, dapee dem potti dem foetoe. Na hem hai no wan doengroe plesi de, dapee dem ogri soema kan go kibri. En te Gado meki soema kom na hem fesi, vo a kroetoe dem, dan a no de loekoe na da soema perzon, efi da wan gran-soema, efi da wan poti soema; so srefi a no ha vo haksi en vo ondersoekoe fosi, bikasi hem srefi sabi ibriwan soema maniri. We vo da hede, te Gado gi wi wan pikin fomfom, wi no moe feti nanga hem, ma wi moe teki da fomfom, wi moe taki: Ke mi Masra, mi verdini da strafoe, mi no kan taki, joe doe mi kroekoetoe; bika efi mi taki so, mi sa meki a kom moro ogri gi mi. Joe sabi, vo san hede joe moe doe mi so; ma gran-tangi mi begi joe, meki mi toe kom sabi da ogri, di mi doe, vo mi no doe hem moro! - Joe jere? da so wi moe teki da fomfom vo Masra, anders a no kan poeloe wi foutoe so, leki fa a wani.
We Job, mi ha vo haksi joe wansani moro. Joe ben taki, efi joe kan kom na Gado fesi, joe sa soekoe joe reti, en joe sa winni da proces; joe denki, nanga dati joe ben taki reti? So srefi joe ben taki, da bribi vo joe, en disi joe ben holi joe srefi so boen alatem, dati no helpi joe noti, efi joe ben de wan ogri soema doro-doro, joe no ben kan kom na wan moro bigi ongeluk, leki noja. A no so joe ben taki? We hopo joe hai, loekoe na tapo! Joe si dem wolkoe, fa dem hei? A no dapee Gado de na ini Hemel? We efi joe doe ogri, sani dati kan doe hem? Alwasi joe doe ogri na ogri tapo, joe denki, na hem joe doe da ogri? En efi joe doe boen, sani dati kan helpi hem? Sani hem winni nanga dati? We efi wan soema doe ogri, a no gi hem srefi a doe da ogri? En efi wan soema doe boen, a no gi hem srefi ageen a doe da boen? Joe taki, a de hati joe, disi joe no kan si Gado srefi; tan mara, a sa kom, a sa koti da kroetoe gi wi! Holi pikin pasiensi. Mi verwondroe, disi a no kom potti hem mofo na ini jete.
We, gi mi joe jesi so langa, meki mi taki nanga joe; meki mi poeloe ala mi hatti gi joe, bika mi no kori joe; sani mi taki a troe, da waarheid a de. Joe si? Gado da wan bigi Gado vo troe, ma tog nooiti a sa strafoe wan soema vo soso, bika a de lobbi wi, a de wan boen-hatti Gado. A no sa helpi dem ogri soema, libi dem mofinawan. No, dem boen soema wawan a de loekoe. En alwasi a meki dem kom na wan pikin hebi, alwasi a hiti dem na gron, tog a de hopo dem baka. En ala dati, di a potti dem na boeje pikinso, a meki dem kom sabi, sani dem misi, vo dem no kisi hei membre. Na ini da pyn a de hopo dem jesi, vo dem kan jeri hem, te a krasi dem, meki dem drai baka kom na hem. We efi dem habi jesi vo jeri hem, efi hatti de vo dini hem, a boen vo dem srefi, dem sa pasa dem liebi switi. Ma efi dem no wani jeri, dan dem doe dem srefi ogri; bikasi falsi soema, Gado no kan helpi dem, alwasi san a doe nanga dem. Ma dem mofina soema a de helpi, dem disi saka dem srefi. We a sa helpi joe toe, a sa sari joe, poeloe joe baka na ini da benauwtoe, meki no wansani moe hati joe moro, dan joe sa finni ala joe boen baka, en dan joe hai sa krin, joe srefi sa si, fa Gado Masra pai ala soema nanga reti, en dati sa meki joe hatti kouroe. Joe jere? Ma loekoe boen, vo da faja hatti vo joe no kori joe, vo joe no sori tranga hai, en vo joe no potti wan falsi vertrouw na ala dem foeloe ofrandi, di joe ben lobbi gi na Gado, vo verzoen, joe srefi nanga hem. Dem ofrandi soso no kan helpi joe. Bika efi joe no ben de wan goedoe-man, joe no ben kan doe so. We Gado no de loekoe na soema goedoe. So srefi joe no moe soekoe da dede so tranga; holi pasiensi! En loekoe boen toe, vo joe no feti nanga Gado, di joe loekoe vo krini dem ogri soema, so leki joe ben doe kaba, di joe taki, dati moro betre, leki vo tan na so wan pyn. No no, Gado hem wawan de basi, no wan soema tranga so, leki hem. Hem wawan de da bigi meester, no wan soema kan leri hem wansani. Hoesoema kan habi hatti, vo meki trobi nanga hem, taki: So wansani, efi so wansani joe no ben doe reti? No, dasani disi Gado doe, en disi hem ben meki, ala boen soema sa taki, a meki hem heeli boen. Ma vo begrypi alasani, di a doe? dati wi no kan, bika wi no bigi so, leki hem.
Joe si, fa da areen blaka? Joe sa taki, Gado teki hem hanoe, tapo da zon, meki a no kan skyn: ma da wan wolkoe de tapo hem. We nanga dati Gado sa sori wi, sani de na hem hatti. Mi srefi skreki vo troe, ala mi skin de befi. Oen jeri, fa da dondro vo hem de bari? Oen si, fa a blo da winti na hem mofo? Loekoe, fa da faja de koti na tapo, a letti krin na heeli grontapo. Te da faja fadom, da dondro de bari; da wan bigi tongo dati! Wan tranga tongo vo troe. Da Gado tongo srefi, di de piki na ini da dondro, ma wi no kan verstaa hem. We di da onweri de bari so, efi Gado wani, a no kan pori alasani wantem? Ma dati a no wani, a de sori wi nomo, sani a kan doe. Joe si? dem boesi-meti srefi go kibri na ini dem horo, en dem fowloe de go na dem hoso go kibri. Bika wan storm de go kom, nanga wan bigi areen. A no Gado de seni dati? Wi no kan sabi jete, vo san hede a meki da weri kenki so hesi, efi da vo wan strafoe, efi da vo wan boen; wi sa si dati na bakatem. We Job! tan tiri vo joe, en potti membre na dem bigi wroko vo Gado. Joe sabi, vo san hede Gado meki da faja koti so na tapo? Joe sabi, sani Gado wani doe, di a seni so wan onweri kom? Da joe de helpi Gado, vo holi dem wolkoe so, leki wi si dem de? Loekoe so wan faja! Joe si da bigi glori, di romboto Gado? Da wan majesteiti sani vo troe; a meki joe skreki, te joe si dati! Ma tog, hem srefi perzon wi no kan si, wi no kan finni.
We ala di Elihu taki so jete vo da bigi vo Gado, Masra srefi kom piki Job na ini da storm-weri, a taki: Soema dati, disi ben kroetoe so nanga mi, disi no tevrede nanga sani, di mi finni boen, vo doe? Soema wani sabi moro betre leki mi? Kom tanapoe gi mi! Habi hatti! Piki mi! Mi sa haksi joe.
Hoepee joe ben de datem, di mi ben meki grontapo? Efi joe sabi sani, kom meki mi jeri, hoesoema ben potti alasani so, leki fa a de. Hoesoema ben holi da watra-pas, en soema ben naki da slaglein, vo marki en vo pasra alasani? Hoepee dem bigi pilari de, nanga da bigi stoon-foetoe, disi de tjari heeli grontapo? Hoepee joe ben de da joeroe, di dem star ben singi makandra, en di ala dem Engel vo Gado ben plisiri? Datem, di da bigi zoutwatra ben tapo alasani, leki wan bigi-bigi floedoe, en di mi ben hopo wan dam, mi meki sluisi gi hem, sloto hem na ini, en dan mi ben krasi hem, mi taki: Tee diaso joe kan kom, ma no moro fara; da diaso da krasi watra vo joe sa kouroe! Mi haksi joe, hoepee joe ben de datem? Joe habi so meni jari kaba, vo joe kan taki, da joe ben kali da zon, meki a hopo vo skyn? Joe kan fassi heeli grontapo na ala fo hoekoe vo hem? joe kan seki hem so tranga, tee ala ogri soema komoto? Joe ben si da horo, dapee ala da foeloe zoutwatra komoto? Joe sabi da reti dipi vo da bigi-bigi zee? Dem dede-soema hopo dem kondre gi joe, meki joe soetoe joe hede na ini, vo joe sabi, fa da kondre tan? A troe, sani vo disi grontapo joe kan sabi, ma meki mi si, efi joe sabi ala. Hoepee letti de, te joe no si hem? Hoepee doengroe de, te joe no si hem? Joe sa man vo go teki hem? Ofoe joe sa man vo tjari hem gowei baka? - Bifo joe ben de, joe ben sabi na fesi, dati na so wan dei joe mama sa gebore joe? Joe ben sabi, hoe langa joe sa liebi na grontapo? Joe ben si dem plesi, dapee mi de kibri hagla nanga areen so langa, tee mi meki a fadom? Na hoepee da winti komopo? Soema de tiri da areen, nanga onweri? Soema de meki da areen srefi, nanga douw nanga ysi? Soema meki da kouroe kan kom so tranga, tee areen kom weti, leki zoutoe, watra kom tranga leki stoon; dem bigi riba srefi kisi wan dekki boeba, vo soema kan waka na hem tapo? Hoefasi, da joe kan sori dem star pasi, nanga zon nanga moen, vo dem sabi, fa dem moe waka? Joe kan meki dondro-faja koti na tapo? Joe kan meki dondro bari? Joe kan meki areen fadom? Soema habi da tranga, vo tapo areen, meki a no fadom moro? Soema ben gi joe koni, vo joe kan sabi kibri-tori? Soema gi joe verstand, vo joe kan prakseri sani?
Soema de gi dem tigri njanjam? Joe man vo meki dem pikin tigri na boesi njam dem bele foeloe? Soema de gi dem pikin fowloe njanjam na boesi, te dem pikien vo dem de bari na Gado vo njanjam, en te dem de flei rontoe na ala plesi, sondro dem sabi, hoepee dem sa finni wan pikin njanjam?
Da joe de loekoe dem dia na boesi? En te dem de nanga bele, da joe de helpi dem, vo no wan ogri kisi dem, en vo dem kan meki dem pikien na reti tem? En te da mama meki kaba, dan a libi dem pikien, a gowei vo hem, ma tog dem pikien no dede: we soema de gi dem njanjam dan? En soema meki so meni tra meti de liebi na boesi en na dem bigi sabana, dapee no wan soema de? Soema de loekoe dem dapee? - Hoefasi, joe sa dwingi dem kaiman nanga dem sneki, meki dem dini joe? Da joe gi dem fowloe so mooi wiwiri? Soema meki hasi tranga so? Soema meki dem kan prodo so nanga dem mooi neki? Somtem da joe meki dem djompo so, leki wan sprinkhan, dem no sabi wan frede? Hoefasi dan? A fiti, vo soema kroetoe nanga da bigi Masra, di de na tapo? Meki da srefi soema piki, di ben kroetoe so nanga Gado!
Job taki: No no, mi Masra! mi si, dati mi no ben doe reti, di mi taki so. Mi no kan piki joe; mi tapo mi mofo kaba. Wantron mi ben taki troe, ma mi no sa taki moro; wan toe leisi mi ben doe so, ma mi no sa doe moro.
Masra piki Job ageen na ini da storm-weri, a taki: We, kom tanapoe na mi fesi! Holi joe srefi styfi! Mi sa haksi joe sani. Piki mi! Hoefasi, joe sa stry nanga mi toe, gi mi kroekoetoe, nomo vo joe kan habi reti? Joe hanoe tranga so, leki di vo Gado? Joe tongo kan dondro so, leki di vo hem? Kom dan, meki mi si ala joe bigi en ala joe glori! Meki joe hatti bron dan nanga ala ogri soema. Poeloe hai dan gi ala dem soema, disi habi hei membre, en disi meki dem srefi bigi! Bari dem ogri soema, krasi dem, taki, meki dem kaba vo doe ogri! Verzwaki dem boen-boen! Kili dem alamal wantem! Beri dem na ondro gron, meki dem no kom baka moro! Efi joe kan doe dati, dan mi srefi sa taki, joe de wansani, joe habi reti.
Joe si da azau jandaso? Soema ben meki hem? A no mi ben meki hem, so boen leki mi ben meki joe? Loekoe hem skin, fa a bigi! Loekoe hem foetoe, fa dem tranga! Joe si dem bigi tifi vo hem? Dem tan leki isri tiki. Joe si hem noso? A langa leki wan cedroe-boom. We efi joe denki, joe kan geersi Gado-wroko, go hiti hem na gron! Joe sa si, a sa sori joe, a sa masi joe hesi. Joe sabi dem bigi zoutwatra-kaiman? Hoefasi, joe kan hoekoe dem, leki soema de hoekoe fisi? Joe denki, joe kan kisi so wan kaiman nanga netti? Ofoe a sa kom begi joe, vo joe no trobi hem? A sa taki: Tangi-tangi, no doe mi ogri; mi sa joeroe mi srefi gi joe na kontraki, mi sa dini joe so langa leki mi liebi? Joe denki, joe kan pre nanga hem, leki nanga wan fowloe? Joe sa tai wan tetei na hem tongo, meki joe pikien pre nanga hem? Joe sa habi hatti, vo go feti nanga hem? Go proberi dan; joe no sa wani vo toe-tron moro. Mi taki gi joe. We di joe no habi hatti, vo go feti nanga wan soso meti, fa joe habi hatti dan, vo kroetoe nanga mi vo dasani, di mi doe? Hoesoema de, disi kan taki, hem ben gi mi wansani, mi verpligti vo pai hem baka? A no alasani de vo mi, di de na hemel en na grontapo?
Job taki: Ke mi Masra, nomoro leki reti! Mi srefi sabi, joe wawan de da tranga Gado, di kan doe, sani joe wani; mi si, joe sabi ala soema hatti doro-doro! We da soema, disi wani kroetoe nanga joe, da wan dom soema, a no sabi, san a taki. En mi srefi toe ben doe so; mi ben kroetoe nanga joe vo sani, di mi no kan sabi, en dati mi no ben doe reti; mi no sa doe moro. Ma mi plisi joe, gran-tangi! gi mi pasi dan, vo iniwan tra leisi mi kan haksi joe dasani, di mi no sabi. Mi no sa taki moro, mi sabi sani; no, now mi hai kom krin, now mi kisi onderfindi, di mi srefi jesi ben jeri da taki vo joe. We dasani, di mi ben taki, mi poeloe ala baka; a hati mi vo troe, disi mi ben taki so, mi kom sjem reti-reti; en mi begi joe pardon.
We di Masra kaba nanga Job, na baka Masra bigin nanga Elifas vo Teman, a taki: Mi ha wansani nanga joe toe en nanga dem toe mati vo joe; bikasi dasani, di oen ben taki vo mi, oen no ben taki reti; mi foetoeboi Job ben taki krin vo mi, moro leki oenoe. We teki sebi kow nanga sebi skapoe, tjari go na mi foetoeboi Job, bron dem gi mi vo wan ofrandi, en meki mi foetoeboi Job begi vo oenoe; dan mi sa teki da begi vo hem, vo mi no doe oen so, leki oen verdini nanga da soso taki vo oenoe; bikasi oenoe no ben taki reti, ma mi foetoeboi Job hem ben taki reti vo mi. We dem dri soema, Elifas vo Teman, nanga Bildad vo Sua, nanga Zofar vo Naema, dem doe so, leki Gado taki gi dem, en Masra teki da begi vo Job, a no mandi moro nanga dem soema.
En ala di Job ben begi so vo dem mati vo hem, Gado kom poeloe hem srefi toe na ini da pina, a meki a kom boen; en alasani, di a ben habi fosi, dati Gado gi hem baka, tee a kisi doblo so meni, leki a ben habi.
We na bakatem ala hem brara, nanga hem sisa, nanga so meni tra soema, disi ben sabi hem fositem, dem kom felisiteri hem, en dem troostoe hem vo ala da ongeluk, disi a ben pasa, en dan dem holi wan trakteri makandra na hem hoso, ibriwan gi hem wan piesi goutoe vo presenti. En Masra Gado srefi doe Job foeloe boen, a gi hem moro foeloe na bakatem, leki Job ben habi bifosi. Tin na fo doezend skapoe a kisi, nanga siksi doezend kameli, nanga wan doezend pari kow, nanga wan doezend pikin hasi. So srefi Gado gi hem tin pikien baka, sebi manpikien, nanga dri oeman; dem ben mooi vo troe.
We na baka vo da tori Job ben liebi wan-hondro nanga fotentin jari jete, tee a si foeloe pikien-pikien, nanga pikien vo pikien-pikien srefi. En di a kom dede, a ben de nanga hem boen jari kaba; tee a no ben ha plisiri srefi, vo liebi moro langa.
1. We da tori vo Job de sori wi, dati satan de wan ogri toriman vo troe; bikasi doro nomo a de soekoe vo go tori dem bribi-soema na Gado, meki hem kan kisi dem na hem ondro, so leki a ben meki moeiti vo kisi Job toe. (Openb. Joh. 12, v. 10.) Ma da tori de sori wi toe, efi wi hatti no falsi, dan ala dem tesi vo didiebri no kan pori wi ziel, bika Gado srefi de helpi wi baka, a meki da bribi vo wi kom moro tranga. Apostel Paulus taki: Da soema, disi Masra lobbi, hem a de strafoe. (Ebr. 12, v. 6.)
2. Ala da ogri, disi dem Kaldea-soema nanga dem Arabia-soema ben doe Job, di dem foefoeroe ala hem meti, dati Job ben loekoe leki wansani, disi Gado srefi meki a kom hem abra. En dati a ben doe reti; bika no wan soema, diediebri srefi, no kan doe wi wan ogri, sondro Gado gi hem pasi vo dati. No wan wiwiri srefi kan komoto na wi hede, fadom na gron, sondro wi Tata sabi. (Lukas 21, v. 18.)
3. Apostel Jakobus vermane dem bribi-soema, a taki: Oen lobbi brara vo mi, teki da pasiensi vo Job vo wan exemple. (Jakobus 5, v. 10 & 11.) Bikasi alwasi hoemeni a ben lasi, tog a no mandi, ma a taki: Masra ben gi mi, Masra teki hem baka; gran-tangi vo hem! We da so ala boen bribi-soema moe taki toe, te wansani de hati dem.
4. Ma wi no kan stry, na baka Job ben doe ogri vo troe, di a ben floekoe hem geboortoe-dei, en di a ben wani, Gado moe gi hem rekenskap vo alasani, di a doe, en di a ben loekoe hem srefi vo wan boen soema na Gado hai. Nanga dati Job ben foutoe. Bika da krin, disi wi srefi denki, wi krin, dati de leki wi weri wan morsoe doti klosi, di wi moe poeloe, anders Gado no kan teki wi. (Jesajas 64, v. 6.)
5. Dem mati vo Job no ben doe reti toe, disi dem krasi hem so, en disi dem taki, somtem a ben doe wan ogri, disi meki Gado strafoe hem so. A no ogri soema wawan de kom na pina, ma sosani kan miti dem pikien vo Gado toe; bika wi ala ha vanoodoe, vo Masra hali wi jesi, en vo da hede ibriwan soema moe soekoe vo finni hem eigen foutoe, bifo a soekoe di vo trawan.
6. We te joe kom na so wan hebi, leki Job; te ala soortoe tesi en trobi en verdriti kom miti joe; somtem joe kan taki toe, joe no ha fesi, joe no ha baka; somtem a kan moro joe reti-reti, tee joe moe bari doro: Pasiensi! No lasi hatti! No lasi joe bribi! Kali joe Gado nem, a sa jeri joe, a sa poeloe joe na da pyn, so leki a ben poeloe Job toe, en dan na baka joe sa taki hem doezend tron gran-tangi.
(Josua Kap. 1 tee Kap. 6.)
Na baka di Moses dede kaba, Masra Jehova kom na Josua, a taki gi hem: Joe sabi, mi foetoeboi Moses no de moro; we now joe moe de da soema, di moe tjari dem Israel-piple vo mi go abra na da kondre, disi mi ben pramisi oenoe, en disi mi sa gi oenoe. We kom dan, teki dem soema, go pasa da riba abra, disi dem kali Jordan, vo oen kan doro na ini da kondre! Joe no ha vo frede, bika mi pramisi joe, no wan soema sa doe joe wan ogri, so langa joe de. So leki mi ben de nanga Moses alatem, mi ben helpi hem, so srefi mi sa de nanga joe toe. Mi no sa libi joe; nooiti mi sa komoto na joe sei. We no frede, bikasi da joe sa de da soema, disi sa platie da kondre gi dem; da srefi kondre, di mi ben pramisi dem ouroe tata granwei kaba. Ma dati mi taki gi joe, joe moe holi joe srefi boen, en joe moe doe alasani prontoe so, leki da wet vo mi de leri oenoe, en so leki mi foetoeboi Moses ben taki gi joe. Joe no moe pasa mi woortoe, no na wan sei, no na reti han, en no na kroekoetoe han; dan alasani vo joe sa waka boen. Da wet-boekoe vo mi no moe komoto na joe hanoe en na joe mofo srefi; ma dei nanga neti joe moe membre en prakseri hem, vo joe kan sabi, fa joe moe doe en fa joe moe waka. Joe jere? Ma so leki mi taki kaba, joe no ha vo frede en vo lasi hatti, bika Jehova, joe Gado, de nanga joe; alwasi hoepee joe de go, mi no sa libi joe.
We Josua teki hem wroko wantem, a kali ala dem hedeman kom makandra, a taki gi dem, meki ibriwan go komanderi dem soema vo hem, vo dem holi dem srefi klari, bika dri dei moro dem sa pasa da riba Jordan doro, go teki da kondre. So srefi Josua taki gi dem soema vo Ruben famili en vo Gad en vo Manasse, dati dem kan libi dem oeman nanga dem pikien nanga dem meti na disi sei vo da riba; ma dem mansoema moe pasa abra toe, go helpi dem brara fosi, vo dem kan teki Kanaan-kondre abra hesi, na baka dem kan tron baka kom liebi na disi sei, na da kondre, di Gado ben gi dem. We dem ala makandra piki Josua, dem taki: A boen, wi sa doe so, leki joe taki gi wi; dapee joe de seni wi, dapee wi sa go. So leki wi ben respeki Moses, so srefi wi sa respeki joe toe. Wi wensi, Masra Jehova moe de nanga joe, a moe helpi joe, so leki a ben helpi Moses alatem. En wi srefi sa helpi joe toe; efi wan soema no wani jeri joe, wi sa kili hem wantem.
Ma Josua ben seni toe mansoema go na fesi kaba, vo dem loekoe da kondre na wan koni-fasi, en vooral da foto Jeriko. We di dem toe soema doro dedapee na da foto, dem go na wan oeman hoso, disi dem kali Rahab; bika da missi ben holi wan kolesi-hoso. Ma so hesi da koning vo Jeriko jeri, toe Israel-soema doro dedapee, nomo a gi da missi ordre, meki a seni dem toe soema kom na hem wantem. Ma di da oeman ben kisi dati vo sabi pikin boen tem, bifo dem skoutoe doro na hem hoso, a teki dem toe soema, a kibri dem na hem kroboi-zoldro tee na ondro dakki, na dapee a beri dem na ondro wan bigi hipi katoen. En na baka, di dem skoutoe kom haksi vo dem soema, da missi taki: Ja, toe soema ben kom dia, ma mi no ben sabi, hoepee dem komopo en mi no sabi toe, hoepee dem go; bika di a kom doengroe dem gowei baka, efi oen wani kisi dem, dan oen moe feti hesi na dem baka. We dem doe so, dem seni wan patroeli go na dem baka, tee na Jordan sei. Ma da oeman, bifo a go slibi, a go safri na zoldro, a taki gi dem toe soema: Mi sabi, oen de masra vo wi kondre kaba, bika Jehova gi oen hem, en dati meki wi frede vo oenoe; ala soema vo wi kondre dia kisi frede vo oenoe, di dem jeri, oen de na pasi de kom. Bika wi ben jeri ala dem tori, fa Jehova ben meki wan pasi gi oenoe na mindri da redi zee, vo oen koti da zee abra nanga dre foetoe, en fa oen ben doe nanga dem toe Amoritri-koning na tra sei vo Jordan. We sinsi wi ben jeri demsani disi, wi hatti gowei krin-krin, no wan soema vo wi habi hatti, vo go feti nanga oenoe. Bika Jehova, da Gado vo oenoe, da wan bigi Gado; a de na tapo tee na hemel, en a bigi na grontapo toe. We di mi ben habi sari-hatti vo oenoe, gran-tangi, mi plisi oenoe, vo oenoe habi sari-hatti baka vo mi toe. Pramisi mi dan, dati oen no sa doe mi ogri, nanga mi tata nanga mi mama, nanga mi heeli famili; te oen kom dia, no meki wi moe dede na ini da feti. Oen sa teki Jehova, sweri mi dati? We gi mi wan marki dan, vo mi kan sabi.
Dem toe soema taki: We a boen, dati wi pramisi joe; efi joe no tori wi, wi sa membre joe baka, te wi kom dia, wi sa doe joe boen vo troe. We di da oeman jeri so, nomo a teki wan langa tetei, wan rediwan, a tai hem na hem fensre, vo a fassi, en dan a meki dem toe soema saka dem srefi nanga da tetei na abra da muur na sabana sei. Ma bifo dem toe Israel-soema komopo dedapee, dem taki gi da oeman, meki a teki da srefi redi tetei, tai hem baka na hem fensre vo wan marki, vo bakatem, te dem pikien vo Israel kom teki da foto, dem kan sabi da hoso wantem. We da oeman doe so, en dan a sori dem da reti pasi, di dem moe teki vo gowei baka, vo da patroeli no moe kisi dem.
We di dem soema kom baka na Josua, dem verteli hem alasani, fa dem ben finni da kondre en sani ben miti dem dapee, dem taki: Wi si, a de so boen, leki Masra gi wi da heeli kondre abra kaba, bika ala soema de frede vo wi, dem lasi hatti krin-krin. We zoodra Josua kisi da raportoe, nomo hem nanga ala dem pikien vo Israel libi da plesi, dapee dem ben tan wakti so langa, dem waka go moro na fesi, klosibei na sjoro na Jordan sei, en na dapee dem wakti dri dei moro ageen. Ma na baka vo dem dri dei Josua seni dem hedeman go waka da heeli kampoe doro, vo dem waarskouwe dem soema, taki, so hesi dem sa si, dem domine hopo da Verbond-kisi vo Masra, tjari go, nomo dem alamal moe hopo toe, waka go na hem baka. Ma dem moe loekoe boen, vo dem no drifi go toemoesi klosibei na da santa kisi, bikasi da kisi de go na dem fesi, wawan vo sori dem pasi; da wan pasi, disi dem no ben waka jete nooiti wantem. En Josua srefi taki toe nanga ala dem soema, meki dem holi dem srefi klari, bikasi tamara Jehova sa sori dem wan wonder-wroko.
We dei-broko mamantem Josua meki dem domine hopo da Verbond-kisi, tjari go na fesi. En ala di dem waka so, Jehova srefi kom gi Josua hatti, a taki: Tidei mi sa potti joe vaste na joe wroko; mi sa gi joe tranga na ala Israel-soema hai, vo dem kom si, mi de nanga joe toe, net so leki mi ben de nanga Moses. We taki gi dem domine, disi de tjari da Verbond-kisi, te dem kom so fara, vo dem foetoe kan trapoe na ini da riba, dan dem moe tan pikinso, tee ala dem trawan klari toe.
We Josua doe so, a komanderi ala dem Israel-soema, meki dem waka go na da kisi baka, en meki dem jeri, sani Jehova taki gi dem. Na baka Josua taki: Tidei oen sa kom si, troe-troe, dati da liebi Gado de na oen mindri, disi sa poeloe ala dem heiden-soema na oen fesi, hem srefi sa jagi dem gowei. Oen si? da santa Verbond-kisi vo Masra Zebaot de waka go na oen fesi, tee na ini da riba ini; we zoodra dem domine foetoe sa trapoe na ini da riba tanapoe pikinso, nomo da watra, disi komopo na hopo-sei, a sa tan vo hem tee a hopo leki wan dam; ma di vo bilo-sei dati sa ron gowei, tee a meki wan dre pasi, vo oen kan pasa abra nanga dre foetoe.
We ala dati kom so, leki Josua ben taki gi dem. Alwasi da watra ben hei vo troe na ini riba da srefi joeroe, jete so hesi dem domine foetoe meli da riba nomo, djoesnoe da watra kom platie, a hopo wan bradi pasi gi dem tee na abrasei, meki ala dem foeloe soema kan pasa abra boen-boen, sondro dem nati dem foetoe. Ma dem domine, disi ben waka na fesi nanga da Verbond-kisi, dem go tanapoe reti mindri, dem wakti so langa, tee ala dem trawan pasa dem na sei. En di dem alamal kisi na abrasei, Masra taki gi Josua, meki a teki twalf mansoema, vo ibriwan gran famili a moe teki wan, meki a seni dem go baka tee na mindri riba, dapee dem domine tanapoe jete; na dapee dem moe teki twalf stoon, tjari kom na disi sei, dem moe potti dem tanapoe na sjoro vo wan marki, vo bakatem dem pikien vo dem nanga dem pikien-pikien sabi da plesi alatem tee vo teego, dapee Jehova ben doe so wan wonder-wroko, di a ben meki dem pasa da riba abra nanga dre foetoe. We Josua doe so, leki hem Masra taki gi hem, a komanderi dem twalf soema, vo dem go teki dem stoon kom, en dan a meki dem potti dem twalf stoon tanapoe na Gilgal, na da srefi plesi, dapee dem ben meki kampoe da fosi neti. So srefi na mindri riba ini Josua hopo twalf stoon toe, dapee dem domine ben tanapoe nanga da Verbond-kisi; dem stoon de dapee jete na ini riba tee tidei. Na baka Masra meki dem domine nanga da santa kisi komoto toe na ini riba. En so hesi dem potti dem foetoe na sjoro, nomo da watra hopo baka, a bigin vo ron so srefi, leki a ben ron bifosi.
We da srefi dei Masra meki Josua kisi wan bigi nem na dem Israel-soema, en sinsi da tem dem alamal respeki hem leki dem ben respeki Moses toe.
Ma ala dem koning vo heeli Kanaan-kondre, di dem jeri da tori, fa Jehova ben platie da riba-watra gi dem pikien vo Israel, tee dem alamal pasa hem abra nanga dre foetoe, dati meki dem heiden-soema kom skreki vo dem, dem frede so, tee no wan soema habi hatti, vo go feti nanga dem; ma dem alamal go kibri vo dem Israel-soema, dem sloto dem srefi na ini dem foto.
We da srefi tem, di dem ben de na dem kampoe na Gilgal de ruste, Masra taki na Josua, meki a teki ala mansoema vo Israel, besnyde dem; bika ala dem fotentin jari, disi dem ben de na pasi, dem no ben besnyde dem pikien moro, vo di dem no ben habi wan vaste tem vo dati. We Josua doe so, leki Masra taki gi hem, a teki srapoe nefi, a besnyde ala mansoema, en dan a meki dem tan wan toe dri dei na da kampoe jete, tee dem genezi baka.
Na baka Masra taki gi Josua: Joe si? Tidei mi ben poeloe da sjem vo Egipti na oen tapo vo oen no moe liebi leki heiden-soema moro, ma oen kisi oen Sakramenti baka. We da so, na baka vo da besnyde, ala di dem ben de na dem bigi sabana na Jeriko, da fosi moen vo da jari, disi meki fotentin na wan, sinsi dem ben libi Egipti, da dei vo hem, di meki tin na fo, dem holi dem Paaska toe, so leki Gado ben taki, dem moe doe ibri jari, te dem kom na dem kondre; bikasi sinsi dem komopo na Sinai, dem no ben njam Paaska moro na pasi. We da fosi dei vo Paaska Masra ben gi dem da manna jete, vo dem kan meki dem masoo; ma dei-broko mamantem da manna kaba, dem no kisi hem moro; bika dem ben finni njanjam nofo na Kanaan-kondre, vo njam. We da fosi Paaska-dei pasa, di vo toe dem pikien vo Israel bigin, vo soekoe da njanjam vo Kanaan-kondre, dem teki de njam ala soortoe karoe, di dem finni na firi; hafoe vo da karoe dem griti vo meki koekoe, en hafoe dem rosi na faja de njam.
We wan dei Josua go klosibei na da foto Jeriko, hem wawan, vo loekoe dem bigi stoon-muur, fa dem hei; bika dem soema vo Jeriko ben sloto dem bigi poortoe vo dem foto tranga vo troe, meki no wan soema kan kom na ini. We ala di Josua ben de nanga hem dipi prakseri, san vo doe, vo teki so wan foto abra, en di a hopo hem hai de loekoe rontoe, na wan bro a si wan soema tanapoe na hem fesi, di holi wan blootoe houroe na hem hanoe. We Josua no frede, ma a go moro klosibei na hem, a haksi hem: Soema da joe? Joe da vo wi, efi vo dem vyanti vo wi? Da soema taki: No no, mi da wan hedeman vo da bigi hipi Engel vo Jehova; da kom mi de kom vo helpi joe. Di Josua jeri so wan taki, nomo a hiti hem srefi nanga bele na gron, en nanga toemoesi bigi respeki a haksi hem: Sani mi Masra habi vo taki gi hem foetoeboi? Da gran Engel vo Jehova taki: Poeloe joe soesoe na joe foetoe, bika da plesi, disi joe tanapoe de, da wan santa plesi! We Josua poeloe hem soesoe wantem-wantem.
Ma Jeriko ben de wan bigi foto, a ben tapo rontoe nanga wan tranga muur, leki wan bigi binfoto; en dem poortoe ben sloto toe vo dem Israel-soema hede, vo no wan soema kan go na ini, en no wan soema ben kan komoto go na doro toe.
We na baka, di Josua kom na hem kampoe baka, Jehova srefi kom na hem ageen, a taki: Joe si? da heeli foto Jeriko nanga hem koning mi gi abra na joe hanoe; alwasi fa dem soldati tranga, di de na ini foto, a no wansani. We oen mansoema vo Israel, hopo dan, kom rontoe da heeli foto fosi, en na baka oen moe waka hem rontoe nanga parade, ibri dei wantron. Dem domine moe tjari da Verbond-kisi, en sebi tra domine ageen moe teki dem sebi trompeti vo temple, dem moe waka go na da kisi fesi, blo dem trompeti. Ma te oen jeri da bigi bigi trompeti de blo, dan oen ala makandra moe hopo wan bigi feti-babari, dati sa meki dem foto-muur broko fadom, vo oen ala kan doro na ini foto faja-faja, broko hem krin-krin.
We di Josua jeri so, nomo a gi dem domine ordre, nanga ala dem tra Israel-soema, meki dem doe so, leki Masra ben taki. En djoesnoe dem soldati vo Israel teki dem houroe, dem waka go na fesi nanga parade. Na baka dem sebi domine hopo, disi ben blo dem trompeti, en na dem baka ageen fo tra domine ben tjari da Verbond-kisi vo Jehova; ma dem ouroe soema, disi no kan feti moro, nanga dem oeman nanga dem jonge pikien, dem alamal ben waka tee na bakasei. We da so dem waka da foto rontoe ibri mamantem, ala di dem domine ben blo dem trompeti. Ma Josua ben waarskouwe dem, vo dem no moe hopo wan babari na ini dem siksi dei, dem no moe taki no wan woortoe srefi, tee da dei kisi, disi hem srefi sa taki gi dem.
We di dem siksi dei pasa, dei-broko mamantem dem hopo froekoe-froekoe na moesoedei, dem waka da foto rontoe siksi-tron na baka makandra, so leki dem ben doe ala dei; ma di vo sebi-tron, ala di dem domine ben blo dem trompeti, Josua komanderi dem, meki dem hopo wan feti-babari noja, bikasi Jehova gi dem da foto abra kaba. Ma meki dem loekoe boen, vo dem no teki wansani, kibri vo dem; bikasi da heeli foto moe pori krin-krin; ala soema nanga meti moe dede, buiti da oeman Rahab, disi habi da kolesi-hoso, dati wawan moe tan na liebi, hem nanga ala hem famili, di de nanga hem na ini hoso, vo di a ben kibri dem toe boodskopoe-man tra dei. Ma vo da soso goedoe, disi dem sa finni na ini foto, dem no moe teki wansani, tjari kom na dem kampoe, bikasi da wan pori-sani, disi Gado no wani; Gado floekoe alasani krin-krin. We efi wan soema sa habi hatti, vo teki wansani vo da soso goedoe, kibri vo hem, alwasi da wan pikin-sani nomo, dati sa meki da heeli kampoe vo Israel kom na wan ogri, vo Gado floekoe dem toe. Ma goutoe nanga silver nanga ala kooproe en isri-sani, dati wawan dem kan teki, tjari kom; bikasi dem kan gebruiki dati bakatem vo da temple vo Masra.
We so hesi Josua kaba vo taki nanga dem, nomo dem domine bigin vo blo dem bigi trompeti, en dem alamal hopo da feti-babari so, tee da bigi muur fadom, a broko tee na gron. En da srefi momenti ala mansoema vo Israel djompo go na ini, dem teki da heeli foto abra, dem kili ala soema nanga houroe, man nanga oeman, kow nanga hasi, nanga skapoe nanga boeriki nanga ala-ala-sani. Buiti da oeman Rahab nanga hem famili, dati Josua ben taki, dem no moe kili hem, bika da so dem toe soema ben pramisi hem. En vo da hede Josua seni dem srefi toe boodskopoe-man go na hem hoso go teki hem nanga hem famili, tjari kom na sabana-sei, dapee dem pikien vo Israel ben habi dem kampoe. We da so da bribi vo Rahab ben meki a no go lasi, moksi nanga ala dem trawan, disi no ben bribi Gado. (Ebr. 11, v. 31.) We zoodra dem ben poeloe Rahab nanga hem famili na Jeriko, djoesnoe dem Israel-soema potti branti na ini, dem bron ala dem hoso nanga ala da takroe goedoe vo dem heiden-soema, tee da heeli foto kom pori krin-krin. Buiti ala silver en goutoe nanga kooproe en isri-sani, dati wawan dem teki, kibri vo da hoso vo Masra.
We da srefi joeroe Josua taki, hem sweri vo Gado, dati no wan soema moe hopo da foto Jeriko baka; en efi wan soema sa wani doe so, dan te a potti da fosi stoon vo da foto, a sa koste hem da fosi pikien vo hem, en te a klari so fara tee a wani potti dem bigi poortoe na ini, dati sa koste hem da baka pikien vo hem. En dati ben kom so toe feifi-hondro jari na baka. (1. Koning 16, v. 34.)
We di Masra ben helpi Josua so boen, dati meki ala soema vo heeli Kanaan-kondre kom frede hem vo troe, di dem jeri, fa a ben doe na Jeriko.
1. We da nem Josua nanga Jesus de geersi makandra, bika dem ala toe de taki so meni, leki wan Helpiman. We da so Josua srefi ben geersi Masra Jesus toe. Josua ben tjari dem pikien vo Israel go na da Kanaan-kondre vo disi grontapo, leki dem hedeman, a winni ala dem vyanti vo dem; ma Jesus de helpi dem boen Kristen-soema vo hem, vo dem kan winni ala dem vyanti, disi de soekoe vo pori dem ziel; en bakatem te wi doro nanga boen, dan hem teki wi, tjari wi go na da moro betre Kanaan-kondre, disi de na Hemel, dapee hem srefi ben waka go na wi fesi, vo meki wan boen plesi klari gi wi.
2. Josua ben de wan boen ofciri vo troe, disi no ben frede, vo go miti dem vyanti vo hem. Ma ala dati a no ben potti hem vertrouw na hem srefi kragti, efi na dem knapoe soldati vo hem; ala hem vertrouw ben de na hem Gado wawan. Nanga saka-fasi en nanga bribi a doe alasani prontoe so, leki Jehova ben taki gi hem; en juisti da bribi vo hem en vo dem tra Israel-soema, dati wawan ben meki dem Engel vo Gado broko dem bigi stoon-muur gi dem, meki dem kan go na ini.
(Josua Kap. 7 tee Kap. 9.)
Alwasi Josua ben waarskouwe dem Israel-soema vo hem toemoesi tranga, vo dem no moe teki wansani vo dem heiden-soema goedoe na Jeriko, tog wan soema ben de vo Juda famili, hem nem Akan, dati no ben ke vo da vermane, ma a teki wansani kibri safri, sondro Josua nanga dem tra soema ben sabi; en nanga dati da soema meki Masra hatti kom bron nanga dem pikien vo Israel, tee a no kan tan nanga dem moro, so langa da ogri soema de na dem mindri jete.
We di dem kom Masra vo Jeriko kaba, na baka Josua seni wan toe dri soema go moro na fesi, vo loekoe wan tra foto moro na wan koni fasi, dem kali da foto Ai. We di dem soema kom baka vo gi Josua raportoe, dem taki gi hem, da foto no bigi, a no ha foeloe soema; efi Josua seni dri doezend soema go dapee, a sa nofo, vo teki so wan pikin foto, a no ha vo seni ala. We Josua doe so, leki dem rai hem, a komanderi dri doezend soema, meki dem go dapee. Ma di dem doro na Ai, dem soema vo da foto bigin vo feti nanga dem tee dem winni dem Israel-soema, dem kili dritentin na siksi soema vo dem, en ala di dem Israel-soema teki pasi de ron, dem heiden-soema feti wan langa pasi na dem baka.
We di dem tra Israel-soema si, dasani de waka so, leki dem no ben verwakti, dati meki dem alamal kom skreki vo troe, dem lasi hatti krin-krin. En Josua srefi kom na wan toemoesi verlegi toe, a hiti hem srefi nanga bele na gron, hem nanga dem tra gran-soema vo Israel; dem hiti santi na dem hede tapo, en nanga bigi sari dem lidom na fesi vo da kisi vo Masra, dem kre vo dasani tee sabatem. En Josua begi hem Gado, a taki: Ke mi Masra Jehova! Gran-tangi, no mandi nanga mi! Vo san hede joe ben meki wi pasa da riba abra, kom diaso? Joe wani, dem Amoritri-soema moe kisi wi, kili wi alamal? A no moro betre, wi ben tan na tra sei vo da riba, dapee wi ben de? Ke mi Masra! San mi sa taki, di mi si, dem Israel-soema lasi hatti, dem teki pasi de ron? Te dem tra soema vo Kanaan jeri dati, dem no sa kom kili wi alamal? Dem no sa teki da bigi nem vo joe, meki spotoe?
We di Josua begi so, Masra kom piki hem, a taki: Hopo! San joe potti joe fesi so na gron? Disi dasani kom pasa oen so, da vo da ogri, disi dem Israel-soema doe, di dem ben pasa mi woortoe so grofoe; bikasi alwasi hoesani mi ben taki, tog dem ben teki hafoe vo da goedoe, di mi ben taki, dem no moe teki, dem kibri hem safri, leki foefoeroe-man. We da dati meki dem no kan tanapoe na fesi vo dem vyanti moro, ma dem teki pasi de ron, bika da floekoe de hindre dem. En efi oen no poeloe da floekoe-sani na oen mindri, dan mi no kan tan nanga oenoe moro. We go waarskouwe dem soema, taki gi dem, wan floekoe-sani de na dem mindri, disi de meki dem no kan tanapoe na fesi vo dem vyanti moro, so langa da floekoe no komopo baka. We meki dem holi dem srefi klari, vo tamara mamantem oen alamal kan kom na mi fesi. Fosi dem twalf bigi famili moe kom wanwan, en na baka dem pikin famili, dan mi srefi sa sori oen da soema, disi ben doe da ogri. En da srefi soema oen moese teki, bron hem na ini faja, hem nanga ala hem goedoe, vo di a ben pasa mi woortoe so, meki heeli Israel kom na so wan sjem.
We dei-broko mamantem, di Josua tjari ala dem famili vo Israel kom na da Verbond-hoso doro wan-wan, so leki Masra ben taki gi hem, fosi Masra sori hem da famili vo Juda, dati na ini da famili da soema de. Na baka Josua platie da famili vo Juda moro fini, a meki dem kom hoso vo hoso; en di Masra sori hem da hoso, disi da soema de na ini, dan a meki ala dem mansoema vo da hoso kom wan-wan, a hiti doblo, en da doblo kisi Akan, wan pikien vo Karmi, da hem ben doe da ogri. We djoesnoe Josua teki Akan, a taki gi hem: Joe si, mi pikien? alasani moe kom na krin. We sori Jehova respeki, en bekenti joe zondoe! Taki gi mi, hoe ogri joe doe, no meki lei gi mi. Akan taki: Ja da troe, mi no kan stry, mi doe ogri troe, mi pasa Jehova mofo. Di wi ben de na Jeriko, poeloe alasani, mi finni wan mooi mantel nanga toe hondro bigi piesi silver-moni, nanga wan goutoe ketting; we di mi si dati, a kom bigi na mi hai, mi teki hem, kibri na ini mi hoso; a de dapee jete na ini wan horo, di mi diki na ondro gron; en da silver-moni mi beri dapee toe. We djoesnoe Josua seni soema go teki dasani, en di dem kom baka, a meki dem hiti alasani na gron na Masra fesi. Na baka Josua komanderi soema, meki dem teki Akan srefi nanga da silver, nanga da mantel, nanga da goutoe, nanga ala hem pikien, nanga hem kow, nanga hem hasi, nanga hem skapoe, nanga hem hoso, nanga ala hem goedoe, poeloe na da kampoe, tjari go na sabana. En Josua srefi nanga ala tra Israel-soema go nanga dem toe.
We di dem doro dedapee, Josua taki gi Akan: Joe si? Da ongeluk, di joe ben tjari kom na wi tapo, da srefi ongeluk Masra seni kom na joe tapo tidei. En nanga da woortoe ala dem Israel-soema teki stoon, fringi na hem tapo, tee dem kili hem nanga ala hem pikien; en dan dem letti wan faja dapee, dem bron dem tee dem tron asesi, dem nanga ala dem goedoe. Na baka dem hiti wan bigi hipi stoon na dem tapo, vo trawan kan habi wan waarskouwe; dem stoon de dapee jete tee tidei. We da so Jehova poeloe da floekoe baka na dem tapo, a meki hem hatti no bron moro nanga dem.
Na baka Masra kom na Josua ageen, a taki gi hem: Now joe no ha vo frede moro, ma meki joe hatti kouroe, en teki ala joe soldati makandra, go feti nanga dem soema vo Ai; mi sa helpi joe, vo joe kom masra vo da koning, en vo da foto en vo da heeli kondre vo hem. En nanga dem soema vo Ai joe moe doe net so, leki joe ben doe nanga dem soema vo Jeriko; buiti dem meti nanga dem goedoe, dati oen kan teki vo oenoe.
We Josua doe so, leki hem Masra taki gi hem, a teki ala hem soldati makandra, a tjari dem go na da foto Ai. Ma di dem doro klosibei na da plesi, na neti a teki dritentin doezend soldati, a komanderi dem, a taki: Oen waka safri go na fesi, vo oen pasa da foto na sei, en na bakasei oen moe soekoe wan plesi, vo kibri so langa na ini boesi. Ma oen no moe go toemoesi farawei, en ibri momenti oen moe holi oen srefi klari. Bikasi dei-broko mamantem mi nanga dem trawan sa drifi moro klosibei na da foto, wi sa meki dem komoto na ini da foto, vo dem kom feti nanga wi, so leki dem ben doe tra-dei; en dan wi sa kori dem, wi sa doe, leki wi frede dem ageen, wi alamal sa teki ron, meki dem feti na wi baka, jagi wi wan langa pasi, so leki dem ben doe da tra leisi toe. We te oenoe si dati, dan oen moe komopo hesi na boesi, djompo go na ini foto, teki hem abra; bikasi Masra srefi sa helpi oenoe, vo dati no kan trobi oenoe. En so hesi oen kom masra vo da foto, djoesnoe oen moe potti faja na ini, bron da foto. Ma loekoe boen, vo oen meki alasani prontoe so, leki Masra ben taki. Oen jere? We dem soldati doe so, dem go kibri na ini boesi, na bakasei; ma Josua tan nanga dem trawan na fesi-sei.
We dei-broko mamantem Josua hopo pikin froekoe, a meki ala hem soldati kom na parade, en dan a tjari dem go klosibei na da foto. Ma so hesi da koning vo Ai kom jeri dati, nomo a seni ala hem soldati go feti nanga Josua, bika a no ben sabi, dati hafoe vo dem Israel-soema kibri na bakasei. We di a si, Josua nanga dem soldati vo hem sori frede, dem teki pasi de ron, dati meki a bari ala soema na ini foto, meki dem kom feti na dem Israel-soema baka; en da so dem libi da heeli foto soso, sondro wan soema ben tan na ini, vo wakti dem hoso.
We zoodra dem alamal komoto na ini da foto, Masra taki gi Josua: Now a tem, vo joe hopo joe flagra, waarskouwe dem tra dritentin doezend soema, meki dem komopo na bakasei, teki da foto. En di Josua hopo hem flagra-tiki, meki sein gi dem, nomo ala dem dritentin doezend soema komopo na boesi, dem djompo hesi go na ini da foto, dem teki hem abra, en wantem dem potti faja na ini. We di dem soema vo Ai kom si da bigi smoko na ini foto, da skreki meki dem alamal kom broeja so tee dem no sabi, na hoe sei dem sa drai; bikasi na fesi-sei Josua nanga hem soldati drai baka, miti dem, en na baka-sei dem tra dritentin doezend soema kom feti na dem baka. We da so dem pikien vo Israel kisi dem soema vo Ai reti na dem mindri, en dem kili dem alamal, dem no meki wan soema ronwei. Ala dem soema, di dem ben kili da srefi dei, dem meki twalf doezend soema makandra.
Ma da koning vo Ai dem kisi liebi-liebi, dem tjari hem kom na Josua, en Josua meki dem hanga hem wantem na wan boom tapo; ma na sabatem a meki dem poeloe hem baka, en dem sleepi hem go tee na sabana-sei, dapee dem hiti wan bigi hipi stoon na hem tapo. Dem stoon de dapee jete tee tidei.
We da srefi tem Josua hopo wan altari gi Jehova, da Gado vo Israel, na tapo da bergi Ebal, a meki hem ofrandi na tapo da altari, vo taki Gado tangi, so leki Moses ben taki gi dem pikien vo Israel, dem moe doe, te dem doro na da kondre. So srefi Josua meki wan kopie vo da wet vo Masra, koti na ini dem altari stoon vo wan gedagtenis. En ala dem Israel-soema nanga dem gran-soema en amtenari tanapoe toe dapee abra na abra, leki wan bigi parade; hafoe tanapoe na sei da bergi Ebal, en hafoe na sei da bergi Garizim; ma dem domine nanga da Verbond-kisi, dem ben de reti mindri. We ala di dem tanapoe so, Josua meki dem domine bigin vo preki da heeli wet vo Gado gi dem; a meki dem potti alasani na dem fesi, blesi nanga floekoe, so leki a skrifi na ini da leri-boekoe vo Gado. No wan woortoe ben libi, disi Josua no ben meki dem domine preki gi dem nanga tranga tongo, vo da heeli gemeente vo Israel kan jeri krin-krin, man nanga oeman nanga pikien, nanga dem vreemde soema toe, disi ben kom liebi nanga dem, vo teki dem relisi. Na baka dem alamal drai baka go na dem kampoe na Gilgal.
Ma so hesi ala dem tra koning vo Kanaan-kondre kisi njoesoe vo dati, fa Josua kom masra vo dem toe foto kaba, Jeriko nanga Ai, djoesnoe dem alamal kom makandra hipi-hipi, dem nanga ala man-soema vo dem kondre, dem taki, meki dem ala makandra go miti Josua, feti nanga dem Israel-soema; efi no so, Josua sa kom pori dem kondre toe, wan na baka vo trawan.
Ma dem soema vo da foto Gibeon , disi no ben habi koning na dem tapo, dem no moksi nanga dem trawan, bika dem ben frede vo go feti nanga Josua. Somtem dem ben jeri srefi, dati da bigi Gado vo dem Israel-soema wani expresi, dem moese kili ala soema vo Kanaan-kondre. We dati meki dem prakseri wan tra fasi, san vo doe, vo dem holi dem liebi; dem taki, meki dem proberi toe, efi dem no kan kori Josua na wan koni-fasi, so leki hem ben kori da koning vo Ai tra dei. We vo da hede dem seni wan boodskopoe go na Josua, vo meki fri nanga hem. Ma di dem no wani, Josua moe sabi, dem de liebi so klosibei, vo da hede dem meki dem boodskopoe-man weri ouroe broko klosi, nanga broko soesoe na dem foetoe, dem potti ouroe zadel na dem boeriki tapo, di lapoe kaba, en dem gi dem ouroe koerkoeroe, nanga ouroe brede na ini, di pori hafoe kaba, vo a moe tan, leki dem ben de toemoesi langa na pasi.
We di dem soema doro na Gilgal, dapee dem Israel-soema ben de na dem kampoe jete, dem kom na Josua, dem taki: Wi komopo na wan farawei kondre, vo kom meki fri nanga oenoe. Ma dem gran-soema vo Israel taki: Somtem oen de soema vo di kondre srefi, fa wi sa doe meki fri nanga oenoe? Dem taki gi Josua: We meki wi tron joe knegti dan. Josua taki: Hoesoema da oenoe? Na hoe kondre oen komopo? Dem taki: Wi komopo na wan farawei kondre; bika wi ben jeri foeloe tori vo oen Gado Jehova; tee na wi kondre srefi wi ben jeri ala dem bigi wonder-wroko, di a ben doe na Egipti en na ala dem tra kondre, disi oen pasa doro. We vo da hede dem gran-soema vo wi kondre seni wi, vo wi meki verbond nanga oenoe; bika wi wani dini oenoe vo soso. Oen no si da brede, fa a ouroe? Da srefi dei a ben rosi, di wi komopo na hoso; a ben faja jete, di wi potti hem na ini koerkoeroe, ma now oen srefi si, fa a kom tranga, hafoe boekkoe kaba. So srefi wi klosi nanga wi soesoe, alasani kom ouroe; wi no ben sabi, da pasi langa so. We di dem soema taki so, dati meki Josua nanga dem tra gran-soema bribi dem wantem; en sondro vo meki wan ondersoekoe, efi vo haksi Jehova fosi, san vo doe, nomo Josua teki dem, a meki da verbond nanga dem, dati hem no sa kili dem; so srefi dem tra gran-soema pramisi dem dati toe. Ma dri dei na baka dem pikien vo Israel kom jeri, dati dem soema vo Gibeon de liebi so klosibei na buurti, na ini Kanaan-kondre srefi. Bikasi di dem waka pikinso moro na fesi, nomo dem kisi da foto Gibeon kaba, nanga dri tra foto moro, disi ben de na dem Gibeon-soema ondro. We di dem tra soso Israel-soema si dati, dem meki trobi nanga dem gran-soema, vo disi dem ben meki dem soema vo Gibeon kori dem so. Ma dem gran-soema taki, dem no kan helpi; dem pramisi dem kaba, nanga sweri srefi, taki, dem no sa kili dem; we dem no kan broko da sweri, go feti nanga dem. Ma a no wansani, dem kan teki dem vo temple-slavoe, meki dem domine potti dem na kerki-plasi, vo pliti hoedoe, en vo tjari watra, te da gemeente meki ofrandi.
We nanga dati dem tra soema tevrede toe, en Josua kali dem soema vo Gibeon kom na hem, a krasi dem, a taki: Fa oen kori wi so? Oen taki, na wan farawei kondre oen komopo, kaba so klosibei oen de liebi. Dati a no maniri. We wi sa strafoe oen boen-boen, wi sa teki oen vo katibo, meki oen dini wi, oenoe nanga dem pikien vo oenoe tee vo teego; da hoedoe nanga watra oen sa tjari gi dem domine, te wi dini wi Gado na kerki. Oen jere?
Dem soema taki: Gran-tangi masra! San wi sa taki! Di wi ben jeri ala dei, joe Gado Jehova ben taki gi Moses, oen moe teki heeli Kanaan-kondre, kili ala soema, we dati meki wi kom frede, en vo dati hede wi doe so. We, wi de na joe hanoe, doe nanga wi, so leki joe wani; wi tevrede. En Josua gi dem pikien vo Israel ordre wantem, vo dem no kili dem soema vo Gibeon; en da srefi dei a potti dem na da wroko vo pliti hoedoe, en vo tjari watra, te da gemeente dini Jehova na da altari vo hem. Dati ben de dem vaste wroko na alatem.
1. We da tori vo Akan de gi wi wan toe dri leri ageen. Fosi wi kan si na da tori, fa no wan wroko vo dem pikien vo Israel ben waka boen, so langa da foefoeroe-goedoe no komopo na dem mindri, meki Gado toe kan poeloe hem floekoe baka. We so srefi a de nanga ibriwan soema hatti toe. So langa wi de kibri wansani na ini, disi no boen na Masra, wan takroe maniri, efi so, wi hatti no kan kouroe reti, en Masra Jesus no kan tan wi klosibei, ma da floekoe vo hem wi moe fili, a de na wi tapo.
2. Gado ben taki expresi, ala goutoe en silver, disi dem finni na Jeriko, hem wani, dem moe gebruiki bakatem vo hem temple-hoso; ma ala dati Akan ben foefoeroe hafoe, kibri vo hem srefi. Heloe vo da soema, disi foefoeroe wan kerki-goedoe, efi iniwan tra-sani! So wan goedoe no ha blesi, ma da floekoe vo Gado de na hem baka, tee a smelti krin-krin na da soema hanoe, a pori ala hem tra goedoe toe.
3. Akan ben denki, no wan soema sabi da foefoeroe vo hem, ma tog Gado ben sabi vo poeloe hem na doro, meki a kom na krin. Wi Masra Jesus taki: No wan sani kibri so, vo a no komopo na doro, en no wan sani koenkroe so, vo a no kom na krin. (Markus 4, v. 22.)
4. Disi Josua nanga dem tra gran-soema no ben haksi Gado fosi, san vo doe nanga dem soema vo Gibeon, dati meki dem soema kori dem. We da tori de leri wi, efi wi no wani misi Gado, dan alatem bifo wi go doe wansani, wi moe haksi Gado nanga begi, efi dasani boen na hem, di wi wani doe. Ma efi wi denki, wi srefi sabi, san vo doe, wi no ha vo begi Gado, meki hem leri wi, dan wi kan misi hesi.
(Josua Kap. 10 tee Kap. 24.)
Di Adonizedek, da koning vo Jerusalem, kom jeri, Josua winni da foto Ai toe nanga hem koning, en a doe dapee so srefi, leki a ben doe na Jeriko, en buiti dati dem soema vo Gibeon meki fri nanga hem, tee dem onderdaniki dem Israel-soema srefi, dati meki da koning vo Jerusalem kisi toemoesi hattibron vo dem soema vo Gibeon, en a seni taki gi dem fo tra koning na hem buurti, meki dem kom helpi hem, vo go feti nanga dem soema vo Gibeon, bifo dem Israel-soema doro moro dipi na ini kondre. -- We da so dem feifi koning teki ala dem soldati, moksi makandra, dem go meki wan bigi kampoe klosibei na da foto Gibeon, bika dem taki, efi dem kom masra vo Gibeon fosi, dan a no sa trobi dem, vo tapo dem Israel-soema, meki dem no kan doro moro fara na ini dem kondre. Ma di dem soema vo Gibeon si, dem feifi koning kom feti nanga dem, djoesnoe dem seni wan boodskopoe go na Gilgal, dem begi Josua, vo a kom helpi dem hesi, dem taki: Gran-tangi, no libi wi! Efi joe no kom asisteri wi, dan dem Amoritri koning sa moro wi hesi. We di Josua kisi da boodskopoe, nomo a komanderi ala hem soldati wantem, meki dem hopo hesi, go helpi dem soema. Bika Jehova srefi ben taki gi hem, meki a go mara, a no ha vo frede, hem srefi sa helpi Josua, vo a winni ala dem feifi koning wantem.
We nanga da woortoe vo Masra Josua hopo da srefi neti jete, hem nanga hem soldati, en dei-broko mamantem dem doro onverwakti na dem vyanti tapo, klosibei na Gibeon. En da srefi momenti di dem Amoritri si, dem Israel-soema de kom, Gado Masra seni wan skreki kom na dem hatti, tee dem no sabi, san vo bigin; en na ini da broeja dem Israel-soema feti wan bigi feti dapee na Gibeon, dem jagi dem Amoritri gowei krin-krin. So srefi ala di dem vyanti ben de na pasi de ron, Gado meki wan bigi hagla fadom na dem tapo na ini wan onweri, da hagla ben bigi, leki pikin stoon, en nanga da hagla-areen Gado srefi kili moro foeloe soema, leki dem pikien vo Israel ben kili nanga dem houroe.
We di Josua ben wensi, vo a kan doro da wroko wantem na baka makandra, da srefi dei jete, dati gi hem hatti, vo a haksi hem Gado wan wonder-wroko, en di Gado no weigre hem dati, a bari tranga na ala Israel-soema fesi, a taki: Joe zon, tan dia na Gibeon sei! En joe moen, tan vo joe, dapee joe de! We di Josua ben taki dati nanga bribi, djoesnoe zon nanga moen tan vo dem so langa, tee dem pikien vo Israel kaba nanga dem vyanti krin-krin. Da srefi tori wan tra boekoe verteli wi toe, a taki: “Dati ben de wan aparti dei, disi Masra ben jeri wan soema tongo, a meki zon tan langa nofo na tapo, wakti da feti, bifo a go na ondro; bika Jehova srefi ben helpi dem Israel-soema, vo feti nanga dem heiden.”
We ala di dem vyanti ben de na pasi ronwei, dem feifi koning vo dem ben djompo go na ini wan horo, go kibri. Ma di Josua kisi njoesoe vo dati, taki, ala dem feifi koning de makandra na Makeda, dem kibri na ini wan horo, hesi a seni soema go dapee, a taki, meki dem rolo bigi-bigi stoon vo tapo da horo, en meki dem potti waktiman na da plesi, vo dem koning no kan komopo, gowei, ala di dem Israel-soema de feti na dem Amoritri-soldati baka. Ma na baka, di dem kom masra vo da feti boen-boen, tee no wan soema ben trobi dem moro, en di ala dem soldati kom baka na Josua, dan a taki, meki dem go now, poeloe dem feifi koning na ini da horo, tjari kom na hem. En di dem tjari dem kom, a meki dem kili dem wantem, en dan a seni hiti dem skin na ini da horo baka. Dati ben de da koning vo Jerusalem, en di vo Hebron, en di vo Jarmut, en di vo Lakis, en di vo Eglon. We da so Josua teki da heeli kondre vo dem feifi koning abra wantem, en dan fosi a drai baka go na hem kampoe na Gilgal, hem nanga ala hem soema.
Ma buiti ala dem kondre en foto, disi Josua winni kaba, nofo tra koning ben de na Kanaan jete, disi Josua no ben poeloe so hesi, bika dem ben liebi moro na sei. We di dem kom jeri dem tori so, dem alamal meki da verbond, taki, dem sa helpi dem srefi makandra; en da so dem teki ala dem soldati nanga dem hasi, nanga dem feti-wagi, dem go miti Josua hafoe-pasi vo feti nanga hem, meki a no kan doro tee na dem kondre; dem ben de wan bigi hipi soema vo troe.
Ma bifo dem doro, Masra kom na Josua ageen, a gi hem tranga, a taki: No frede dem foeloe soema! Tamara na so wan joeroe joe sa klari nanga dem, joe sa si dem alamal lidom dede na joe fesi; dem hasi foetoe joe sa broko, en dem wagi joe sa bron nanga faja. We nanga da woortoe vo Masra Josua hopo wantem, hem nanga dem soldati vo hem, a go miti dem vyanti; en na ini da feti Gado helpi dem Israel-soema so hesi ageen, vo dem winni dem vyanti wantem, dem kili ala dem foeloe soema, tee no wan srefi ben libi abra. Alasani kom so, leki Masra ben taki gi Josua. Na baka Josua waka heeli Kanaan doro, a no meki kampoe moro, so langa, tee a kom masra vo da heeli kondre; buiti da bergi Zion na Jerusalem, dati wawan a no ben kan kisi jete, bikasi dem Jebusitri ben kibri na ini da foto. Ala nanga ala Josua ben feti nanga dritentin na wan koning, en a winni dem alamal. No wan kondre ben soekoe vo meki fri nanga dem pikien vo Israel, buiti dem soema vo Gibeon wawan; ala dem trawan ben hopo vo feti nanga dem. Ma Gado srefi ben tiri dati so, expresi vo dem takroe heiden-soema srefi moese soekoe dem dede, bikasi dem ben repi vo troe, vo Gado poeloe dem na grontapo, so leki a ben doe nanga di vo Sodom en Gomora toe, en so leki a ben pramisi dem soema vo Kanaan granwei kaba. We di Josua ben holi da feti nanga dem soema vo Kanaan siksi jari langa, en di a ben klari so fara, tee no wan soema ben kan trobi dem pikien vo Israel moro, dem bigi-bigi Enakim srefi a ben kili toe, disi ben panja, kibri na mindri dem bergi, na baka Gado kom na Josua, a taki gi hem: Joe si? joe kom ouroe kaba; joe habi joe jari. We alwasi nofo pikin kondre na buurti libi jete vo teki abra, a no wansani; betre joe bigin vo platie da kondre noja. Nanga lot ibriwan famili vo Israel moe kisi hem porsie, so leki mi ben taki gi joe kaba. Na baka mi srefi sa helpi dem, vo dem winni dem tra pikin kondre toe, sondro a sa trobi dem. Da srefi tem Josua ben ouroe wan hondro jari.
Ma bifo Josua bigin da wroko, Kaleb, wan vo dem twalf soema, di Moses ben seni go na fesi, go loekoe da kondre, en disi ben habi wan krin hatti vo hem Gado, leki Josua srefi toe, a no meki dem Israel-soema lasi hatti, so leki dem tin trawan ben doe, we hem kom na Josua noja, a membre hem dasani, disi Masra ben pramisi hem kaba fotentin na feifi jari pasa, dati hem nanga hem famili sa kisi da foto Hebron nanga ala dem kombe rontoe vo hem porsie. En Josua tevrede toe, a taki, no moro leki reti, meki a teki hem. So srefi da famili vo Efraim en da hafoe famili vo Manasse, dem kisi dem porsie wantem toe na da srefi buurti.
Ma ala dati dem sebi tra famili, di no kisi dem porsie jete, dem go liebi so langa na mindri kondre, moksi makandra; en di no wan soema ben trobi dem dapee, vo da hede dem no meki moeiti moro, vo krin da heeli kondre doro, vo broko dem kroekoetoe-gado-altari, en vo kili dem tra heiden-soema, di ben libi jete. En alwasi hoesani Josua ben taki, en sani a no ben taki, tog langatem a no ben kan kisi dem so fara, vo a platie da kondre gi dem ala; tee bakatem Masra srefi kom hopo, a meki dem no libi da wroko hafoe-pasi. Bikasi wan dei, di da heeli gemeente ben de makandra na Silo, da Engel vo Jehova -- dati da pikien vo Gado -- komopo na Gilgal, dapee da Verbond-hoso ben de, a kom na dem na ini da wolkoe, a krasi dem, vo di dem no respeki hem ordre moro, en a pramisi dem wantem, a taki: Disi dem no ben broko dem heiden altari, en disi dem no meki moeiti moro, vo poeloe ala heiden-soema krin-krin, tee no wan srefi moe fika, vo da hede hem no sa poeloe dem toe, ma dati sa tjari dem na foeloe tesi en trobi. We di dem jeri Masra taki so tranga nanga dem, dem alamal bigin vo kre reti-reti, en sinsi da tem dem kali da plesi Bokim, dati taki, wan kre-plesi . En djoesnoe dem go teki da Verbond-hoso na Gilgal, tjari kom na Silo, na dapee dem hopo hem, en dan dem meki dem ofrandi gi Masra. Bika Bokim nanga Silo ben de klosibei makandra, en di Masra ben kom taki nanga dem dapee, dati ben potti dem na da prakseri, dem taki, somtem na dapee Gado wani, dem moe potti hem hoso. En na dapee da santa hoso ben tan toe alatem, tee na profet Samuel tem.
We di Masra srefi ben waarskouwe dem Israel-soema so tranga, na baka Josua no mankeri toe, vo vermane dem wantron moro, meki dem doe hesi now, vo a kan platie da kondre gi dem. En djoesnoe a seni soema go waka da heeli kondre doro, disi no platie jete, a taki, dem moe marki hem na bradi en na langa, en dan dem moe teeken hem, meki wan karta vo hem. We di dem kom baka na hoso, Josua nanga grandomine Eleasar teki da karta, dem go sidom na da Verbond-hoso doro, dem platie da kondre na tapo da karta, vo a gi sebi porsie, -- bikasi dem tra famili ben kisi dem porsie kaba -- en dan na Masra Jehova fesi srefi en na ala dem gran-soema hai dem hiti lot vo ibriwan porsie, tee dem doro ala sebi. Bika da so Gado srefi ben taki gi Josua, vo a moe doe, vo no wan soema kan meki trobi nanga hem; ma vo ibriwan moe tevrede nanga hem porsie, di dem alamal ben si, da Gado srefi meki da lot fadom so gi dem.
Na baka di dem klari so fara nanga da platie, dem gran-soema vo Israel taki gi Josua, meki hem srefi toe teki wan foto vo hem, iniwan di a wani. Bika Masra srefi ben taki so gi domine Eleasar, vo dem moe presenteri Josua wan foto vo hem porsie, so leki Kaleb ben kisi wan toe, vo di dem no ben meki dem Israel-soema lasi hatti, datem di dem kom gi Moses raportoe vo da kondre. We Josua teki da foto Timnatsera, en bakatem a go liebi dapee.
Na baka Masra membre Josua toe vo dem frifoto, di a ben taki gi Moses kaba, a taki, dem moe teki wan toe dri foto, potti dem vo kibri-plesi, vo dem soema, disi habi da ongeluk vo kili trawan, sondro dem ben kan helpi en sondro dem srefi ben sabi, kan go kibri dapee, vo dem famili vo da tra soema no moe kili so wan soema baka, bifo dem domine kan meki ondersoekoe, fa dasani ben pasa. En te dem finni, da soema no ben doe dati vo ogri, ma da misi a ben misi hanoe soso, dan da soema moe tan na so wan foto so langa, tee grandomine dede; na baka fosi a kan go na hem hoso baka.
Ma te wan soema go kibri na so wan foto, da soema moe gi kenisi wantem na dem gran-soema, vo dem sabi, san pasa, en vo dem kan meki onder-soekoe. We Josua nanga Eleasar teki siksi foto, disi panja na heeli kondre, dem potti dem vo kibri-plesi vo so soortoe soema, en dem kali dem fri-foto .
Da famili vo Levi, dati no ben kisi wan porsie vo hem, bika Jehova, da Gado vo Israel ben pramisi dem, dati hem srefi sa de dem porsie; en di dem habi da wroko, vo dini hem na hem temple en na hem altari, Masra ben taki, dem moe kisi hafoe alatem vo dem ofrandi, disi dem trawan tjari kom gi hem na kerki; we dem procenti de so boen, leki dem kisi wan faste leveransi ibriwan dei, vo dem domine nanga dem tra dinari vo kerki no moe pina vo njanjam. Ma buiti dati Masra ben gi Moses ordre toe, taki, dem tra elf famili moe gi dem leviti wan wan foto toe, dapee dem nanga dem famili kan liebi, te dem no ha speli na kerki. We vo da hede Josua nanga Eleasar hiti lot vo dem, meki Masra srefi sori dem na ala dem tra gran-soema fesi, hoe foto a wani, dem leviti moe kisi. En Masra sori dem fotentin na aiti foto, di dem leviti moese kisi, nanga dem kombe toe; ma dem foto ben lidom panja na heeli-kondre.
We da so Gado meki dem pikien vo Israel kom masra vo heeli Kanaan, so leki a ben pramisi na dem ouroe tata; dem liebi switi dapee, sondro wan soema kom trobi dem moro. En ala da boen liebi, disi Masra ben pramisi dem, dem finni dati toe, no wan pikin-sani srefi ben mankeri, dem kisi ala krin-krin.
We na baka Josua kali dem fotentin doezend soema vo Ruben famili en vo Gad en vo Manasse, disi ben kisi dem porsie kaba na tra sei vo da bigi riba, a taki gi dem: Oen si? di oen ben helpi dem brara vo oenoe so fara, tee wi kisi da heeli kondre, now oen doe oen pligti kaba, vo mi no kan holi oen moro. Sebi jari langa oen ben tan nanga wi, sondro mi ben habi wan klagi vo oenoe, bika oen ben respeki mi woortoe alatem, en da ordre vo Masra Jehova oen ben respeki toe. We now oen kan drai baka go na oen famili na da kondre, disi Moses ben gi oenoe na tra sei vo Jordan. Ma dati mi taki gi oenoe, loekoe boen, vo oen holi oen srefi alafasi, so leki da wet-boekoe vo Gado de leri oenoe, en so leki Moses toe ben taki gi oenoe, vo oen lobbi Jehova, oen Gado, vo oen respeki hem, en vo oen dini hem nanga oen heeli hatti. Da so Josua bedanke dem, a meki dem go baka na dem kondre; en vo ala da goedoe, disi dem ben finni na Kanaan, a gi dem wan boen porsie toe, a taki, meki dem gi dem famili hafoe, disi dem ben libi na hoso.
We da so dem taki dem trawan bigi adjosi, dem gowei. Ma di dem doro klosibei na da bigi riba, dem kom frede, somtem bakatem dem tra Israel-soema no sa teli dem moro vo dem brara, somtem dem sa taki, dem no habi da srefi bribi vo Jehova, en dem kan poeloe dem na kerki. We vo da hede dem kom na da prakseri, vo hopo wan bigi altari na sjoro-sei, bifo dem pasa da riba abra, dem taki, da altari moe tan vo wan getuige alatem, dati dem soema na abrasei de na ini da verbond toe.
Ma so hesi Josua nanga dem trawan jeri dati, nomo da heeli gemeente kom makandra na Silo, dem taki, dati no kan go, meki Pinehas, da pikien vo grandomine Eleasar, go wantem go tapo dem na ini da wroko. We di Pinehas nanga tin gran-soema moro doro dapee, dem meki trobi nanga dem, dem taki: Hoesani dati, disi oen meki wan altari diaso? Oen wani libi Jehova, dini wan kroekoetoe gado? Oen vergiti kaba, fa Masra ben strafoe so meni soema vo wi gemeente tra jari na Midian kondre, di dem ben moksi nanga dem heiden-soema, dini Baal Peor? En da tori vo Akan, oen no sabi dati moro? Somtem oen denki, da kondre janda no krin nofo, vo oen kan dini Jehova reti? We efi oen membre so, dan wi sa taki, betre oen tan dia na wi sei, liebi nanga wi makandra na ini Kanaan-kondre srefi, dapee da hoso vo Masra de; dati moro betre, leki oen hopo wan aparti altari vo oenoe.
Dem soema taki: Ke, Gado kibri wi, vo wi no libi hem! Jehova srefi sabi, dati no ben de na wi hatti kweti-kweti, vo teki wan tra gado, dini hem; a no vo dati hede wi ben hopo da altari diaso. Ma di wi ben frede, somtem bakatem dem pikien-pikien vo oenoe kan taki, dem soema na abrasei no de reti Israel-soema vo da gemeente vo Jehova en vo hem temple, vo di dem no de liebi na ini Kanaan-kondre ini; we vo da hede wi ben denki, da altari moe tan vo wan getuige alatem, taki, dem pikien vo oenoe nanga dem pikien vo wi, dem ala de na ini da wan verbond. Noti moro wi ben wani nanga da altari. We di Pinehas nanga dem tra gran-soema jeri so, dem hatti kouroe wantem, dem taki, dati de heeli boen, dem no ha noti vo taki, meki dem waka boen. En da srefi altari dem kali: Da getuige , di moe getuige alatem, taki, Jehova hem da Gado . We langatem na baka, di dem pikien vo Israel ben liebi switi na Kanaan-kondre, en di Josua kom na hem boen jari kaba, wan dei a kali ala Israel-soema kom na hem makandra na Sikem, a potti alasani na dem fesi, fa Gado ben poeloe dem ouroe tata na Egipti-kondre, en fa na ini ala tesi en trobi a ben helpi dem na so meni verwondroe-fasi tee tidei, a gi dem so wan mooi kondre, vo dem liebi. Josua verteli dem ala dem tori piesi-piesi, disi ben pasa sinsi Abraham tem, tee na da joeroe, vo dem kan si, hoe moeiti Gado ben doe nanga dem, vo dem no moe moksi nanga dem tra heiden-soema. En na baka di Josua kaba nanga ala dem tori, a taki gi dem: Oen si? mi kom ouroe kaba, mi no sa liebi langa moro. We vo da hede mi wani vermane oenoe, vo oen frede en respeki Jehova, oen Gado, en vo oen dini hem nanga oen heeli hatti en nanga wan vertrouw-fasi. Oen moe libi dem kroekoetoe-gado krin-krin, Jehova wawan oen moe dini! Ma efi dati no boen na oenoe, efi oen no lobbi so, vo dini Jehova, taki wantem, meki mi jeri, hoedisi vo dem tra gado oen sa teki dan, vo oen dini. Ma dati mi taki gi oenoe: Mi nanga mi famili, wi sa dini Jehova wawan. We dem alamal bari, taki: Ke, Gado kibri wi! Fa wi sa libi Jehova, go dini tra gado! A no Jehova ben poeloe dem ouroe tata vo wi na Egipti, na ini da pina-liebi? A no na wi hai srefi a ben doe so meni wonder-wroko, tee wi doro na di kondre diaso? A no hem ben poeloe ala dem heiden-soema na wi fesi, meki wi kan liebi dia? We Jehova hem wawan wi sa dini toe, bikasi hem da wi Gado.
Josua taki: Ja, oen kan pramisi dati hesi; ma membre boen, sani dati wani taki. Efi oen wani dini Jehova, dan oen moe dini hem nanga oen heeli hatti; bikasi hem no de wan soso Gado, leki di vo dem heiden-soema. Jehova da wan gran Gado, wan krin Gado, di no kan verdrage ogri, en a no wani, soema dini hem nanga dem tra Gado makandra. We di a ben doe oen so meni boen kaba, efi bakatem oen sa libi hem, go dini kroekoetoe-gado, dan a sa strafoe oen toemoesi tranga, a sa pori oen kondre krin-krin. Ma dem alamal pramisi Josua, dem taki: No no, dati wi no sa doe, Jehova wawan wi sa dini. Josua taki: A boen, oen srefi de getuige vo dati, en efi bakatem oen no doe so, dan oen eigen woortoe srefi sa kroetoe oenoe. Dem alamal taki: Ja, wi srefi de getuige vo dati, taki, Jehova wawan wi sa dini, bika hem da wi Gado. We da srefi dei Josua meki wan verbond nanga dem soema, en a skrifi da heeli tori na ini da leri-boekoe vo Gado, di ben kibri na ini da santa kisi, vo dati moe tan leki hem testamenti, en leki wan vaste kontraki tee vo alatem. So srefi a hopo wan bigi stoon-monumenti na da Verbond-hoso doro, a taki: Oen si? da stoon sa tan getuige na wi mindri; bikasi a ben jeri ala dem taki, disi Jehova ben taki nanga wi. We efi bakatem oen libi Gado, dan da stoon sa hopo hem mofo, kroetoe oenoe, vo oen no kan taki, oen no ben sabi moro betre. Na baka Josua bedanke dem, a meki ibriwan go na hem kondre.
We na baka vo da tori Josua no ben liebi langa moro, bika di a kaba da laatste wroko vo hem, dan da joeroe vo hem kisi, vo a go slibi, en dem beri hem na hem eigen foto Timnatsera.
Ma da dede-skin vo Josef, disi dem pikien vo Israel ben teki tjari go nanga dem, da joeroe di dem komopo na Egipti, dati dem beri na Sikem.
1. We da tori vo dem ogri Kanaan-soema, disi Masra ben poeloe na grontapo, dati de sori wi, fa Gado kan strafoe soema na foeloe difrenti fasi. Dem fosi ogri soema a ben kili na ini da bigi watra; dem soema vo Sodom en vo Gomora a kili na ini faja; en dem takroe heiden-soema vo Kanaan-kondre a kili na tra liebi-soema hanoe, di a meki dem pikien vo Israel kom feti nanga dem. Ma alwasi hoe strafoe Masra de strafoe soema, tog wi moe taki alatem, da justici vo hem de waka reti. (Openb. Joh. Kap. 16, v. 7.)
2. Gado ben holi pasiensi langa nofo nanga dem soema vo Kanaan, bifo a strafoe dem; ma na baka di da ogri vo dem kisi hem marki, di dem kom pori heeli kondre, dan Gado kom pori dem baka. We da so wi si, wi boen Masra na tapo doe nanga wi tee tidei jete. A habi pasiensi nanga soema, meki dem bedaari; ma te a si, dem no wani jeri hem, dem kom ogri moro-moro, dan a seni hem strafoe kom, meki dem kaba vo spotoe nanga hem.
3. Josua ben de wan boen tata vo kondre troe; en a ben gi ala soema vo hem kondre wan boen exemple toe, di a taki gi dem, hem nanga hem famili sa dini Jehova trouw, alwasi ala dem trawan no sa wani. Boen vo ibriwan hoso en famili, dapee ala soema habi da wan hatti en membre so, vo dem masra nanga missi, tata nanga mama nanga pikien nanga ala soema vo heeli plasi, kan taki nanga waarheid, ala makandra, dem sa dini Masra Jesus nanga dem heeli hatti.
(Boekoe vo dem kroetoeman Kap. 1 tee Kap. 12.)
So langa Josua ben de na liebi jete, nanga dem gran-soema, disi som vo dem ben liebi pikin moro langa, leki Josua, dem pikien vo Israel no ben trobi vo dini Gado so, leki dem ben pramisi hem; bikasi nofo vo dem ben de jete, disi ben si ala dem bigi wroko vo Gado, di a ben doe na dem mindri. So srefi na baka vo da dede vo Josua da famili vo Juda en vo Simeon no kaba vo feti nanga dem soema vo Kanaan, disi ben fika na kondre jete, en Masra ben helpi dem toe, vo dem winni nofo vo dem; bikasi hem srefi ben gi dem da ordre so, vo dem moese poeloe ala heiden-soema krin-krin na dem mindri. Wan dei dem kisi da koning vo Jerusalem toe, hem nem Adonibesek. Dati ben de wan toemoesi ogri soema, disi ben strafoe trawan toemoesi pasa-marki. Bifo dem pikien vo Israel kom na da kondre, da hem ben de da soema, disi heeli kondre ben frede, bika a ben de wan boen fetiman. En alatem te a ben kisi wan tra pikin koning na feti, dan a ben meki dem koti dem duim vo hem na han en na foetoe, a potti hem na ondro hem tafra leki wan dagoe, meki a piki dem pikin saka-saka, disi fadom na gron, te koning de njam. We di dem pikien vo Israel kisi hem, dem doe hem da srefi baka, disi hem ben doe trawan; en hem srefi bekenti toe, a taki, Gado pai hem reti, hem verdini so; bika da so hem ben handri trawan toe, sebitentin pikin koning a ben doe so; so hem srefi taki. Na baka di dem pikien vo Israel kom masra vo hem foto Jerusalem toe, dem tjari hem go dapee, en na dapee a kom dede. Ma da bigi fortres, disi ben de na tapo da bergi Zion, na mindri vo Jerusalem, dati wawan dem pikien vo Israel no ben kan kisi jete da srefi joeroe, bikasi dem Jebusitri, disi ben kibri na ini, dem no wani vo gi hem abra; en vo da hede dem soema vo Juda famili ben liebi na Jerusalem, dem nanga dem Jebusitri makandra, tee na koning David tem.
Na baka vo da tori grandomine Eleasar go slibi toe, en hem pikien Pinehas kom na hem wroko. So srefi da heeli speli vo dem ouroe-soema, disi ben si ala dem bigi wroko vo Gado jete, dem go slibi safri toe, trawan na trawan baka; en dem jonge speli soema, disi no ben si dem wonder-wroko vo Gado so nanga dem eigen hai, dem kom vergiti dasani hesi, disi dem tata ben verteli dem vo Jehova. En vo da hede, di dem kom bigi na kondre, da feti kom verfeeli dem hesi, dem taki, sani dem sa trobi dem srefi so meni nanga dem weiniki Kanaan-soema, disi ben fika panja na kondre jete, betre dem meki dem tan, meki dem heiden-soema pai dem wan vaste moni ibri jari, leki wan kontribusi, vo dem moe sabi, dem de na dem Israel-soema ondro. Fositem dem toe famili vo Juda en vo Simeon ben doe dem pligti, dem wawan ben holi da feti jete, ma bakatem dem kom lezi toe; en dem tra famili, dem no ben meki no wan soortoe moeiti moro, sinsi dem ouroe gran-soema ben go slibi, dem taki, meki dem sidom njam da boen vo kondre noja, dem ben feti langa nofo kaba. We da so dem meki nofo vo dem Kanaan-soema tan na dem mindri, nanga ala dem obia-sani, alwasi Gado ben taki expresi, dem moese kili dem alamal. Ma dati kom tjari dem na foeloe ogri. Bikasi nanga dati dem Amoritri na buurti ben kisi tranga baka vo feti nanga dem, en dem proberi toe, vo poeloe da famili vo Dan baka na da kondre, disi dem ben kisi vo dem porsie; en efi dem toe famili vo Efraim en vo Manasse no ben tapo dem, dem ben sa doro moro dipi srefi na ini kondre.
Datem Israel no ben habi granman; domine wawan dem ben habi, disi ben leri dem da wet-boekoe vo Gado, en disi ben haksi Jehova alatem, te dem no ben sabi, san vo doe. We na so fasi Gado srefi ben de da Koning, disi ben tiri kondre, hem wawan; en efi dem ben respeki hem alatem, dem ben kan habi wan toemoesi boen liebi na hem ondro, moro leki ala tra kondre na grontapo. Ma ala soema vo dem no ben sabi da boen, so leki a ben fiti; en di dem no ben haksi Gado alatem, ma nofo-tron dem doe so leki dem srefi wawan denki, dati kom tjari dem hesi na broeja.
Wan dei wan soema vo Efraim famili, a nem Mika, hem ben foefoeroe hem mama wan bigi moni; ma di a jeri, hem mama floekoe da foefoeroe-man, dati kom hati hem, tee a tjari da moni kom baka, a bekenti hem zondoe, en a begi hem mama pardon. We di da mama si da moni baka, a taki, betre dem teki da silver, meki wan gado-popiki vo hem, vo dem kan dini Jehova ala-dei na dem hoso srefi; bikasi a ben denki na hem dom verstand, dati sa boen na Jehova, dati sa meki a no strafoe hem pikien moro vo da foefoeroe-wroko. We vo da hede a potti da popiki na hem pikien Mika hoso, meki da hoso tron wan gado-hoso. En di juisti da srefi tem wan poti leviti kom pasa dapee vo soekoe wan hoso, Mika kali hem kom na ini, a joeroe hem vo hem prive-domine, a taki: “Now mi hoopoe, Jehova sa lobbi mi baka, bika mi habi wan leviti srefi vo mi domine.” -- Wi no kan taki, Mika ben wani meki wan kroekoetoe-gado-sani, dati no ben de na hem hatti kweti-kweti; ma tog di a ben doe dasani so vo hem srefi wawan, dati no ben boen na Gado; en bakatem, da srefi popiki ben tron leki wan stoon na pasi, di meki foeloe trawan naki foetoe, fadom. Bika di dem soema vo Dan famili ben go soekoe wan tra kondre vo dem, no toemoesi langa na baka, na pasi dem finni da popiki na Mika hoso, en dem teki hem safri, tjari go nanga dem. So srefi dem begi da leviti, meki a kom nanga dem, tron domine na dem kondre, dem sa pai hem boen. We da leviti libi Mika safri, a waka go nanga dem, en di dem kom masra vo da foto Lais na sei Siria-kondre, dem hopo da popiki dapee na da njoe foto, di dem meki; en sinsi da tem da heeli famili vo Dan no ben go na da Verbond-hoso na Silo moro, ma dem ben habi dem aparti domine, disi ben leri dem wan falsi fasi, vo dini Jehova. Da foto, di dem meki dapee, dati dem kali Dan, vo hopo dem avoo nem.
Ma na dem tra famili vo Israel dasani no ben waka so boen toe, en vooral da famili vo Benjamin kom pori vo troe. Bikasi di dem ben meki hafoe vo dem Kananitri tan na dem mindri, dati meki dem srefi leri ala dem takroe heiden-maniri toe. En wan dei wansani kom pasa na Gibea, disi meki nofo soema vo Benjamin famili ben geersi dem soema vo Sodom reti-reti. We di dem tra famili vo Israel kom jeri da tori, dem hatti kom bron nanga dem soema vo Benjamin, en wantem dem go feti nanga Benjamin-kondre, tee pikin-moro dem kili da heeli famili vo Benjamin, vo meki Gado kisi hem satis-faksi. Bikasi datem ala Israel-soema no ben pori so jete, nofo vo dem ben respeki da wet vo Jehova jete. Ma di kondre no ben habi so wan hedeman moro, leki Josua ben de, di kan holi dem makandra, dati meki ibriwan soema doe san a wani, en bakatem da heeli kondre kom pori moro ogri jari vo jari; dem libi Jehova, dem waka go na dem kroekoetoe-gado baka. We nanga dati dem meki Gado hatti kom bron vo troe nanga dem, en nofotron dem meki a kom so fara, vo a moe seni dem heiden-soema kom na dem tapo, disi ben liebi na dem buurti, a meki dem kom feti nanga dem, potti dem na verstand en na respeki baka, so leki a ben pramisi dem dati na fesi.
We efi dan na ondro da dwingi vo dem vyanti dem ben soekoe dem Gado baka, dan Masra no ben tapo hem jesi toe gi da kre vo dem, ma a naki wan vo dem gran-soema hatti, vo a tan na fesi, helpi dem, poeloe dem baka na dem ogri soema ondro, disi ben kwinsi dem. So wan gran-soema dem ben lobbi kali kroetoeman efi helpiman, bikasi da soema ben gi dem alatem boen rai, a ben tan leki dem hedeman vo so langa. Ma wan vaste koning dem no ben habi fositem, Gado srefi ben wani tiri dem kondre, hem wawan. We so langa so wan kroetoeman ben de na liebi, dem ben holi dem srefi alatem so hafoe-hafoe, vo Gado no libi dem so krin; ma so hesi da kroetoeman dede nomo, wantem dem kom na broeja ageen. En di dem pikien kom doe moro takroe alatem, leki dem tata ben doe, dem no meki twenti jari pasa srefi, ofoe dem bigin vo familiari nanga dem heiden so tee, dem Israel-jonkman no sjem moro vo go liebi nanga dem heiden-wendje, so srefi dem Israel-wendje teki dem heiden-jonkman, en dati meki dem kom gewenti da heiden-plisiri toe nanga ala dem afgodery-sani, tee dem srefi tron leki boen-boen heiden-soema toe. We dati meki Jehova hatti kom bron nanga dem ageen, en a gi dem abra na wan koning vo Mesopotamia-kondre, hem ben strafoe dem tranga vo troe aiti jari langa, tee bakatem dem saka gi Gado, dem begi hem pardon baka. En Masra sari dem toe, a naki Atniel hatti, da wan famili vo Kaleb, meki hem tan na fesi, helpi dem; en di Atniel go feti nanga da koning vo Mesopotamia, Masra meki a winni hem hesi en na hem ondro dem pikien vo Israel ben liebi nanga ruste fotentin jari langa.
Ma so leki Atniel dede nomo, dem kom na broeja ageen, en vo da hede Gado meki koning Eglon vo Moab-kondre kom strafoe dem, a pina dem tin na aiti jari langa. Bikasi Eglon ben teki tin doezend soldati vo hem, a doro na ini Kanaan-kondre, en da so a meki heeli Israel kom onder-daniki hem, a strafoe dem reti-reti. We na baka, di da pina-liebi kom moro dem, en di dem kre dem nootoe gi da boen-hatti Gado vo dem, Masra kom sari dem baka, a naki wan tra soema hatti ageen, meki a helpi dem, poeloe dem baka na da ogri koning ondro; da soema nem Ehud vo Benjamin famili. We da srefi Ehud ben habi hatti, vo go kili koning Eglon na wan koni-fasi tee na ini koning-hoso srefi, sondro wan soema kom sabi djoesnoe, sani pasa; en dan a komanderi dem Israel-soema vo go feti nanga dem soldati vo Moab-kondre. We di dem ben lasi dem koning kaba, na baka a no ben kan trobi dem pikien vo Israel moro, vo winni dem vyanti, en dem kili tin doezend soema vo Moab-kondre, dem no meki wan enkli soldati ronwei go na hoso. Na baka vo dati dem pikien vo Israel ben habi ruste na da kondre aititentin jari langa, sondro wan soema kom trobi dem. Buiti dem Filistri soema, dem ben proberi wan-wantron vo feti nanga dem pikin kondre na dem buurti; ma Gado gi dem pikien vo Israel wan tra soema ageen, disi ben helpi dem foeloe. Da soema nem Samgar . Hem wawan ben kili siksi hondro Filistri.
Ma di Ehud ben dede, na baka vo hem dem pikien vo Israel kom na broeja baka ageen, en dem bigin vo doe sani, disi no boen na Gado. We vo da hede Jehova seli dem, a gi dem abra na koning Jabin, disi ben habi da kondre Hazor; hem strafoe dem pikien vo Israel twenti jari langa. Ma na ini ala da strafoe dem ben sori tranga hatti langatem jete; tee bakatem, di dasani kom moro dem, dan fosi dem bigin vo soekoe Jehova baka.
We da srefi tem wan oeman ben de vo Efraim famili, wan profeti, disi dem kali Debora. Hem hoso ben de klosibei na da foto Rama na ondro wan palm-boom, en alatem, te soema ben kom na wan pikin trobi, efi na iniwan tra fasi so, dan dem ben lobbi go na hem, vo haksi hem boen rai, efi vo meki hem koti da kroetoe gi dem. We di Sissera, da generali vo koning Jabin, nanga ala hem foeloe soldati kom lastiki dem pikien vo Israel, tee pikin-moro a jagi dem srefi komoto na Kanaan-kondre; wan dei Gado naki da oeman Debora hatti, vo a seni kali Barak kom na hem, da wan soema vo Naftali famili, a taki gi hem nanga ordre vo Jehova srefi, meki a teki tin doezend mansoema vo hem famili en vo Sebulon, meki a go feti nanga Sissera. En nanga nem vo Masra da oeman pramisi Barak toe, dati hem sa winni Sissera nanga ala hem foeloe soldati, sondro a sa trobi hem. Barak taki gi hem: A boen, mi sa go, ma joe srefi toe moe kom nanga mi; efi joe no kom nanga mi, dan mi no kan go. Debora taki: We mi sa go, ma dan joe no kan kisi da nem, taki, da joe ben winni Sissera; ma Gado sa meki wan oeman kom winni hem. Ala dasani Debora ben taki na profeti-fasi.
We da so Barak kali dem tin doezend soema makandra, a tjari dem go na da bergi Tabor, na dapee a meki kampoe; en Debora go dapee toe nanga hem. So srefi Sissera, di hem kisi njoesoe vo dati, wantem a teki ala hem soldati makandra, a go miti Barak. Ma so hesi dem soema vo Barak kom si dem vyanti, nomo Debora waarskouwe hem, a taki: Hopo Barak, kom dan! Joe no si, Jehova srefi bigin da feti kaba? We ala di Barak komopo na da bergi, saka na ondro, hem nanga ala hem soldati, Masra srefi kom skreki dem vyanti, somtem nanga wan bigi onweri, en dati meki dem kom na wan toemoesi broeja, tee dem no habi hatti, vo feti nanga Barak, ma dem alamal teki pasi de ron; en dem pikien vo Israel feti na dem baka, dem kili dem alamal, no wan ronwei gowei. Buiti Sissera srefi, hem ben komopo safri na hem wagi, a waka na foetoe, vo no wan soema moe sabi hem, en dan a djompo go kibri na ini wan hoso, dapee wan oeman teki hem, a tapo hem skin nanga wan dekki; bika Sissera ben weri tee pikin-moro a flauw, en vo da hede a ben go lidom wantem na gron. Da oeman nem Jael . Ma Sissera begi da oeman, a taki: Tangi-tangi, gi mi pikin watra vo mi dringi, drewatra de kili mi! En Jael teki wan kometje nanga melki, a tjari kom gi hem, meki a dringi; en dan a tapo hem baka vo a slibi, bika Sissera ben weri vo troe. Ma bifo Sissera fadom na slibi, a begi da oeman, meki a go tanapoe na doro-mofo, en efi somtem wan soema sa kom haksi, hoesoema de na ini hoso, meki a taki, no wan soema de. Ma di Jael ben sabi alasani, fa Sissera ben trobi dem pikien vo Israel so meni, hem hatti taki gi hem, betre a kili hem wantem, meki a no kan doe ogri moro. Bikasi alwasi Jael no ben de vo dem Israel-soema srefi, tog di a ben de wan famili vo Moses wefi, a ben lobbi dem soema vo Gado alatem, en vo da hede a denki, da hem pligti, vo a helpi dem noja. Ma dati Sissera no ben verwakti. We ala di a ben de na ini da dipi slibi, da oeman no lasi tem, ma hesi a soekoe wan bigi spikri nanga wan hamera, a go safri, potti da spikri reti na da soema blo, en dan a naki hem so tranga nanga da hamera, vo da spikri doro hem hede tee a kom fassi na ini da pranga srefi, disi ben de na ondro Sissera hede, en da so a dede wantem.
Na baka di Jael si Barak kom feti na Sissera baka, a kali hem kom na ini, a sori hem da soema, di a soekoe, meki a si, fa a lidom dede na gron. We now Barak kom si dasani, disi Debora ben taki gi hem, di a taki, na wan oeman hanoe Sissera sa finni hem paiman. We sinsi da dei da tranga vo koning Jabin kom broko so, vo a moe saka gi dem pikien vo Israel, en bakatem dem kili hem srefi toe. Na baka vo da feti Debora meki wan mooi singi vo da tori, en na ini da singi a taki: “Now dem vyanti vo Israel kisi dem paiman! Wi fom dem boen-boen. Gran-tangi vo Masra! Jehova srefi ben helpi wi! Da hem mi sa singi. Da Gado vo Israel, hem wawan meki wi kom fri baka. We mi Gado Jehova, da so joe sa winni ala joe tra vyanti toe. Ma dem soema, disi lobbi joe? joe sa meki dem kom na krin, net so leki zon de hopo nanga ala hem glori!”
1. We da tori vo dem Israel-soema, fa da mati-fasi, di dem mati nanga dem heiden, ben tjari dem na so meni ogri, dati de gi wi wan boen waarskouwe, vo wi no meki mati nanga ogri soema, en vo wi no kweki takroe membre na ini wi hatti; bikasi dati no kan akorderi nanga da lobbi, di wi moe lobbi Masra Jesus nanga wi heeli hatti.
2. So srefi wi si toe na ini da tori, fa ala soema maniri de. Te soema finni boen, hesi dem kisi hei membre, dem vergiti dem Gado, en nanga dati dem meki Gado no kan loekoe dem moro vo hem pikien. Dati da heeli boekoe vo dem kroetoeman de sori wi. Job taki: Boen vo da soema, disi da fomfom vo Gado kan poeloe hem baka na da takroe pasi, di a ben waka! (Job 33, v. 29 & 30.)
We da so dem pikien vo Israel kom liebi boen na dem kondre ageen wan heeli fotentin jari. Ma bakatem, safri-safri dem bigin ageen vo doe sani, disi no boen na Gado, en nanga dati dem dwingi hem, vo a meki dem soema vo Midian kom na dem tapo kom pina dem. So srefi nofo vo dem tra heiden na buurti no mankeri toe, vo trobi dem; dan dem doro hipi-hipi na dem bigi sabana, foefoeroe ala dem meti, dan ageen dem doro na ini dem pranasi, koti ala dem areisi, tjari gowei; na alafasi dem ben de na dem baka de trobi dem. En dati ben holi sebi jari langa, tee bakatem dem pikien vo Israel kom begi Gado baka, en Masra jeri dem toe, a seni wan profet go na dem, vo a potti alasani na dem fesi, fa Jehova ben doe dem so meni boen, en tog dem no wani gehoorzam hem, ma doro dem de waka go na dem kroekoetoe-gado baka, en nanga dati dem srefi soekoe da strafoe, di kom na dem tapo. We da preki ben wroko so boen na dem hatti, vo bakatem Gado srefi kom na dem na liebi-soema fasi vo helpi dem. We da tori ben pasa so: Wan soema vo Manasse famili, hem nem Gideon, hem ben de wan dei nanga tranga wroko, vo fom areisi na wan matta, bika a ben feti vo kibri hem areisi, bifo dem vyanti na buurti doro na ini kondre ageen, kom foefoeroe hem. We di a de na da wroko so, na wan bro da Engel vo Jehova kom taki hem odi, a taki: Masra de nanga joe, joe de wan boen ofciri. Ma di Gideon no ben sabi, dati da wan Engel, a taki gi hem: Ke mi Masra, efi Jehova ben de nanga wi, hoefa a kom dan, dati ala sosani miti wi? Hoepee ala dem wonder-wroko, disi dem ouroe tata ben verteli wi, fa Jehova ben poeloe dem na Egipti? Wi no si noti vo dati moro, ma so leki wi de noja, wi moe taki, Jehova no de loekoe wi moro, a libi wi, di a meki dem Midianitri kisi wi na dem ondro.
We di Gideon taki so, Masra kom hem moro klosibei, a taki: Joe si? di joe habi da bribi so, di joe taki, ala sosani no ben sa miti oenoe, efi Jehova ben de nanga oenoe, we da srefi bribi de gi joe tranga, a meki joe bekwaam, vo joe kan tron wan helpiman, di poeloe Israel baka na ondro han vo dem Midian-soema. Joe jere? mi srefi seni joe, mi potti joe na da wroko. Gideon taki: Ke mi Masra, fa mi sa doe helpi Israel, di mi no de vo wan bigi famili, en di mi de so wan jonge soema, di no habi wan nem na kondre jete? Masra taki: A no nofo, di mi taki, mi srefi sa de nanga joe? Mi wawan sa meki joe fom heeli Midian-kondre; a no sa trobi joe, vo feti nanga dem, moro leki vo feti nanga wan enkli soema.
We fosi Gideon no ben sabi, hoesoema dati, disi de taki nanga hem; ma na baka di da soema no taki moro: Masra de nanga joe, ma a bigin taki: Mi srefi sa de nanga joe, dan fosi Gideon hai hopo vo a sabi, da Jehova srefi, disi de taki nanga hem. En sinsi da tem da Jeje vo Gado kom na Gideon tapo, a gi hem hatti, vo a no frede moro. We na baka di dem heiden vo Midian en vo Amalek doro na ini kondre ageen, vo kom feti nanga Israel, Gideon teki hem wroko wantem, a blo da bigi trompeti, en nanga dati a kali ala mansoema kom makandra, disi ben de klosibei na hem kondre. So srefi a seni boodskopoe go na dem tra pikin kondre vo Israel, vo meki dem sabi, da hem de da soema di leisi, di tan na fesi, tjari dem go na feti, en na so fasi a kisi dritentin na toe doezend soema makandra.
Ma di Gideon no ben kan potti wan reti vertrouw na dem soldati vo hem, vo da hede a begi hem Gado fosi, efi a sa plisi, vo gi hem wan marki, meki a kan sabi troe-troe, hem sa winni dem vyanti, en meki ala dem tra soema kan si toe, Jehova srefi ben seni hem. Gideon habi hatti srefi, vo sori Masra, hoe marki a moe gi hem, a taki, hem sa teki wol (dati da skapoe-wiwiri), disi dem koti njoe-njoe, a sa potti dati na plasi, meki a tan dedapee wan heeli neti; en dei-broko mamantem, efi da dow sa sidom na ini da wol soso, sondro a ben nati da gron na ondrosei, dati hem sa teki vo wan marki, vo a sabi, Jehova sa helpi hem na ini da feti. We Masra jeri da begi vo hem, a meki dasani kom so, reti leki Gideon ben taki: bika dei-broko mamantem a finni da wol foeloe nanga dow, en di a kwinsi hem, a poeloe wan heeli kopje dow-watra na ini. Na baka Gideon plisi hem boen Gado vo toetron, a taki: No mandi mi, mi Masra, disi mi trobi joe so meni! Mi hangri vo proberi dasani wantron moro na wan tra fasi. Tangi-tangi, meki mi potti da wol baka na gron, en meki dan da wol na taposei moe dre, ma da gron na ondro moe nati. We Gado doe hem da plisiri ageen, a meki dasani kom so, leki Gideon ben begi hem; en nanga dati Gideon kom si krin-krin, hem Gado Jehova lobbi hem.
We now Gideon no lasi tem moro, ma a teki ala hem soldati, a tjari dem go, dapee dem soema vo Midian ben habi dem kampoe. Ma na pasi Gado kom na hem, a taki, dem soema foeloe toemoesi, di a teki, tjari go na da feti, efi a no seni hafoe gowei baka, hem no sa helpi dem. Bikasi efi dem Israel-soema de so foeloe, dan dem no sa taki bakatem, Gado ben helpi dem, ma dem sa taki, da dem srefi ben helpi dem srefi. We meki Gideon taki gi ala dem soema, disi de frede, betre dem gowei baka na hoso wantem. We di Gideon taki dati gi dem, djoesnoe twenti na toe doezend soema drai baka gowei, dem no libi moro leki tin doezend. Ma Masra kom na Gideon ageen, a taki gi hem: Dem soema foeloe toemoesi jete, mi srefi sa kom smelti dem hafoe gi joe. En di Gideon tjari dem go na da plesi, disi Masra sori hem, Gado kom piki dri hondro soema na ini, a teki ala dem moro zwakawan, di a kan finni a taki na Gideon: Joe si? dati da dem soema, di mi wani, dem moe go feti nanga dem Midian-soema, en dem wawan sa meki Israel finni helpi; ala dem trawan kan gowei baka na hoso. Ma efi joe frede, dan betre joe teki joe serjanti di neti jete, joe waka go na fesi, tee joe doro safri na ini da heiden kampoe, na dapee joe sa jeri wan tori, disi sa meki joe no frede moro.
We da srefi neti Gideon seni ala dem trawan go baka na hoso, buiti dem dri-hondro zwakawan, dem wawan a libi na da kampoe, so leki Gado ben taki gi hem. En dan hem nanga hem serjanti waka safri, tee dem doro na ini da kampoe, dapee ala dem vyanti ben lidom de slibi, en nanga skreki a kom si, fa dem soema foeloe, da heeli bigi sabana ben lai nanga soldati. So srefi a si so meni kameli toe, disi a no ben man vo teli ala. Ma na baka di a kisi da fosi wakti-hoso vo dem, en di a waka safri, tee a doro klosibei na bakasei, a jeri dem skildwakti taki wan tori makandra; da wan soldati verteli da trawan, dati hem ben drem wan drem di neti, a ben tan, leki hem si wan marata-brede rolo hem srefi rontoe na ini dem kampoe, tee a naki ala dem tenti, hiti dem na gron, a broko dem alamal na piesi-piesi. Ma da tra soldati, disi jeri da tori, hem kom frede vo so wan drem, a taki: Da drem vo joe no boen; mi bribi, dasani di joe si, dati de da houroe vo Gideon; somtem da so Gado sa meki a kom kili wi alamal.
We di Gideon jeri so wan drem, a taki hem Gado gran-tangi, en dan a go hesi baka na hem kampoe, a komanderi dem soema vo hem, meki dem hopo hesi kom na feti, bikasi Gado helpi dem mooi kaba, a de so boen, leki dem winni dem vyanti kaba. En so hesi dem klari nomo, Gideon platie dem dri-hondro soldati vo hem na dri hipi, a meki ibriwan soldati teki wan trompeti na hem hanoe, nanga soso djogo, disi dem potti faja-tiki na ini, en dan a waarskouwe dem, fa dem moe doe, te dem kisi da kampoe. Wi di Gideon nanga dem dri hipi vo hem doro na dem vyanti tapo na mindri neti, fosi dem alamal go tanapoe tiri na da kampoe mofo; ma so hesi Gideon waarskouwe dem, nomo dem alamal bigin vo blo dem trompeti tranga, en ibriwan broko hem djogo toe, vo meki dem vyanti wieki nanga da babari; na dem kroekoetoe han dem holi dem faja-tiki, en na dem reti han dem holi dem trompeti, di dem blo; en dem alamal bari, dem taki: Diaso da houroe vo Masra, en di vo Gideon toe! We di dem Midian-soema kom wieki nanga da babari, en di dem si so meni faja-tiki na neti, dati meki dem kom skreki vo troe; en di dem no sabi, san pasa, dem kom na wan toemoesi broeja-fasi, tee dem alamal ron komopo dedapee nanga bigi babari. En na ini da broeja Gado meki dem srefi kom feti nanga makandra, tee dem srefi kili dem eigen kondreman, sondro dem sabi, san dem doe. Ma Gideon seni kali dem soema vo Efraim famili hesi, meki dem kom helpi hem, vo feti na dem heiden baka, en na da srefi pasi a kili fo pikin koning vo dem.
Na baka vo da tori dem dri-hondro soema, disi ben de nanga Gideon, nanga som trawan moro, dem kom na Gideon, dem taki: Wi wensi, joe tron wi granman, joe nanga joe pikien, nanga joe pikien-pikien, alatem wan soema vo joe famili moe tiri wi kondre vaste, bika da joe ben poeloe wi na ondro han vo dem ogri soema. Ma Gideon taki: No no, mi no wani de masra na oen tapo, en mi pikien toe no moe de masra na oen tapo, ma Jehova wawan moe de Masra na oen tapo. -- We da so Gideon ben meki Israel habi ruste ageen wan fotentin jari langa, en hem srefi kom na hem boen jari, bifo a dede.
Ma di dem pikien vo Israel ben de nanga da boen liebi, bakatem dem kom vergiti Gado ageen, en dem go dini kroekoetoe gado baka. So srefi dem si da famili vo da boen soema Gideon kom pori toe, sondro wan soema ben proberi, vo potti dem reti baka. Bikasi alwasi Gideon ben taki expresi, no wan vo hem pikien moe de masra na dem Israel-soema tapo, tog wan ogri pikien vo hem, disi dem kali Abimelek, hem kisi hei membre, a soekoe vo tron koning vo kondre, en vo da hede a kili ala dem tra brara vo hem, buiti da pikin-wan, di ben go kibri na wan hoekoe. We di dem tra soema vo Israel si dati, a ben fiti dem, vo dem pai da ogri soema baka wantem; ma dem no ke vo dem pligti, dem libi hem, meki a doe, san a wani; en dem soema vo da foto Sikem, dem no frede srefi, vo teki Abimelek vo dem koning.
Ma di ala dem granmasra ben kom makandra vo sweri gi hem, juisti da srefi joeroe hem pikin brara Jotam doro dapee toe, a klim go tee na tapo da bergi Garizim, en na dapee a hopo hem stem, a bari ala dem soema tranga, a taki: Oen gran-soema vo Sikem, jere mi wan tori, vo Gado kan jeri oen baka! Wan dei ala boom na boesi kom makandra, vo soekoe wan koning, vo potti na dem tapo. We fosi dem haksi wan olyf-boom, dem taki: Tron wi koning! Ma da olyf-boom taki: Oen denki, mi sa kaba, vo meki mi switi oli, nomo vo mi waka go trobi mi srefi nanga dem tra boom? No no, dati mi no wani. We dem libi hem, dem go haksi wan figa-boom, meki hem tron koning vo dem. Ma da figa-boom piki dem so srefi, a haksi dem, efi hem moe kaba, vo meki hem switi vroektoe, nomo vo a go trobi hem srefi nanga dem tra boom, dati hem no wani. Na baka dem go haksi wan droifi-boom, ma hem piki dem so srefi, a taki, hem no wani. We bakatem dem haksi wan maka-boesi, efi hem sa wani tron koning vo dem. En da maka-boesi taki: A boen, mi sa tron oen koning, ma dan oen moe pramisi mi, dati oen sa onderdaniki mi boen-boen; bika efi oen no respeki mi, dan da faja vo mi sa njam oen alamal, tee vo dem bigi cedroe srefi, di de gro na tapo da bergi Libanon. Mi taki gi oenoe! --
We so hesi Jotam kaba nanga da tori, nomo a ron go kibri, vo hem brara Abimelek no moe kili hem; bika da vo hem a ben koti da odo so. En so leki a ben taki, da so alasani kom pasa toe. Bika dri jari na baka Abimelek kisi trobi nanga dem soema vo Sikem, dem meki oproeroe, en vo da hede a teki ala hem soldati, a broko da foto krin-krin, en na baka a potti faja na ini wan bigi stoon-hoso, dapee ala dem gran-soema nanga dem famili ben kibri na ini, en da srefi dei omtrenti wan doezend soema lasi dem liebi dapee.
Na baka Abimelek srefi kisi hem paiman toe, bika di a ben wani pori da foto Tebez so srefi, leki a ben pori Sikem, wan oeman kom hiti wan bigi stoon na hem tapo, a masi hem hede. En di a si, hem no kan liebi moro, a meki hem foetoeboi soetoe hem nanga houroe, vo a no moe habi da sjem, vo soema taki, wan oeman ben kili hem.
Na baka vo Gideon Gado ben gi dem pikien vo Israel siksi helpiman moro na baka makandra, disi kondre ben kali kroetoeman; ma dem no ben kan helpi dem wan reti helpi; bikasi heeli kondre ben pori toemoesi kaba nanga da afgodery-wroko. Wan vo dem siksi soema da Jefta, hem dati ben winni dem soema vo Ammon-kondre, di ben doro tee na Gilead, a jagi dem gowei krin-krin.
1. Wi Bybel de taki foeloe vo da hattibron, disi Gado hatti de bron nanga dem ogri soema. We dati wi no moe loekoe so srefi, leki hattibron vo soema. Bikasi dasani, disi soema doe nanga hattibron, nooiti dati kan boen na Gado. (Jakobus 1, v. 20.) Ma da hattibron vo Gado de wan santa hattibron. Bikasi di hem de wan reti Gado, a moese strafoe dem ogri soema, disi no wani jeri hem.
2. Da tori vo Gideon, disi Gado ben meki a no moe teki moro, leki dem dri hondro zwaki soldati, vo go feti nanga so meni doezend soema, dati de sori wi, fa wi moe potti ala wi vertrouw na hem wawan; bikasi te hem joeroe kisi, vo a helpi wi, a kan helpi wi nanga weiniki, so boen, leki nanga foeloe. (1. Sam. 14, v. 6.)
(Boekoe vo dem kroetoeman Kap. 13 tee Kap. 16.)
Di dem pikien vo Israel ben doe ogri ageen, ala di dem ben pramisi Gado so menitron kaba, taki, dem no sa doe so moro, we vo da hede Masra seni dem Filistri kom na dem tapo, a meki dem kisi dem Israel-soema na dem ondro, plagi dem wan heeli fotentin jari. En vooral da famili vo Juda, disi ben liebi moro klosibei na dem buurti, dati ben fili da pina-liebi moro hebi, leki dem trawan, disi ben liebi moro dipi na ini kondre ini. We datem Gado gi dem wan tra soema ageen vo kroetoeman, vo a helpi dem, hem nem Samson ; hem ben doe dem Filistri foeloe ogri troe, ma tog da helpi, di a ben helpi Israel, dati no ben de wan reti helpi toe.
We da geboortoe vo Samson ben pasa na wan aparti fasi, bikasi hem mama ben de wan oeman, disi no ben kan meki pikien. Ma wan dei, di da oeman ben de na hem gron, wan Engel vo Gado kom na hem, a taki: Joe si? joe de wan oeman, disi no meki pikien, ma mi taki gi joe, joe sa kisi bele en joe sa meki wan manpikien. Ma joe moe loekoe boen, vo joe no dringi wini, efi iniwan tranga dringi, so srefi joe no moe njam wan trefoe sani. En da pikien, di joe sa meki, nooiti dem moe koti hem wiwiri; bika da pikien moe de wan soema vo Gado so hesi a gebore, en tee vo alatem; da hem sa bigin vo poeloe Israel baka na ondro dem Filistri-soema hanoe.
We di da oeman kom na hoso, a verteli dati baka gi hem man, a taki, da profet, disi ben gi hem da boodskopoe, a ben tan leki wan soema vo Gado, leki wan Engel, en vo da hede hem ben frede, vo haksi da soema, hoepee a komopo, en da soema srefi no ben kali hem nem toe gi hem. We da man vo hem, disi dem kali Manoa , a ben liebi na Zarea, di hem jeri da tori vo hem wefi, nomo a begi Masra tranga, efi hem sa plisi, vo meki da profet kom loekoe dem wantron moro, vo a kan taki gi dem, fa dem moe kweki da pikien, disi dem sa kisi. En Masra jeri hem begi toe, a meki da Engel kom na dem wantron moro, en di Manoa haksi hem vo da pikien, da Engel taki gi hem, meki hem wefi holi hem srefi so, leki hem taki gi hem kaba, en meki da pikien no kisi wini toe vo dringi, efi iniwan tranga dringi, so srefi dem no moe koti hem wiwiri, ma meki da wiwiri gro vo hem, so leki da wet vo Moses taki vo dem soema, disi pramisi dem srefi gi Gado. (4. Mos. Kap. 6, v. 3 tee 8)
Na baka Manoa haksi da soema vo Gado, efi a no sa doe dem da plisiri, vo kom na ini, kom njam nanga dem. Ma da Engel taki, hem no sa njam wansani, ma efi Manoa wani meki wan ofrandi gi hem Gado, dati a kan doe. We di Manoa no ben sabi jete, da Jehova srefi, disi de taki nanga hem, ma a ben denki, da wan profet, vo da hede a haksi hem, fa hem nem, vo bakatem te dem kisi da pikien dem kan taki, da so wan profet ben waarskouwe dem vo dati. Ma da Engel vo Masra taki: Fa joe kan haksi mi nem? Mi nem da Pele , dati taki: Wan verwondroe-sani.
We na baka Manoa teki wan pikin boko nanga wan tra njanjam moro, a potti dati na tapo wan bigi stoon vo wan ofrandi; en so leki a potti dati nomo, djoesnoe da Engel meki wan verwondroe-sani nanga da ofrandi na dem hai srefi (somtem a meki da stoon srefi poeloe da faja, di njam da ofrandi); en na ini da flam vo da faja, disi ben hopo na tapo da altari, da Engel srefi hopo go na tapo, tee dem no kan si hem moro. We now fosi Manoa nanga hem wefi hai kom krin, now dem si, da Jehova srefi, disi ben taki nanga dem; en dem ala toe hiti dem srefi nanga bele na gron, vo respeki. En Manoa taki gi hem wefi: Ke mi frede, now wi ala toe moe dede, bika wi ben si Gado srefi! Ma da oeman taki: No no, efi Gado ben wani kili wi, a no ben sa teki da ofrandi na wi hanoe, en a no ben sa taki so switi toe nanga wi. We na baka, di da joeroe vo da mama kisi, a meki da pikien, en dem kali hem Samson; en Gado ben de nanga da pikien, a blesi hem alafasi, meki a gro mooi. So srefi wi kan denki, hem tata nanga hem mama no ben mankeri toe, vo kweki hem so, leki da Engel ben taki gi dem, en vo vermane hem, meki a holi hem srefi boen, vo a kan bekwaam vo da bigi wroko, disi vo hem Gado wani gebruiki hem.
We na baka di a kom wan bigi man, da Jeje vo Gado kom naki hem hatti, tee a no habi ruste moro, vo tan na hem tata hoso; a ben de leki wan soema seni hem, meki a go soekoe trobi nanga dem Filistri, vo a kan doe dem ogri, en vo a verzwaki dem boen-boen, meki Israel no ha vo onderdaniki dem moro. We di a ben de na pasi vo go na Dan, dapee dem Filistri ben de liebi, na Timnat a kom si wan pikin-oeman vo dem, disi hem hatti lobbi, en vo da hede a drai baka go na hoso, a haksi hem tata nanga hem mama, efi hem kan teki da oeman vo hem wefi. Ma dem taki: Vo sani hede joe wani go teki wan heiden-oeman dan? Joe no kan finni wan oeman vo wi kondre dia, di joe kan teki, disi habi da srefi bribi, leki wi? Ma Samson begi dem tranga, a taki: Tangi-tangi, meki mi teki disi! Mi bribi, dati de da reti oeman, disi Gado wani, mi moe teki.
We di a taki so, dem tevrede, en dem ala toe waka go nanga hem na Timnat, vo a teki da oeman. Ma di dem doro klosibei na da foto, wan jonge leeuw kom miti Samson na dem kombe, da meti ben krasi vo troe. Ma da srefi momenti da Jeje vo Masra kisi Samson, a gi hem tranga, vo a djompo na da meti tapo, a fassi hem na hem tifi, en sondro a habi wansani na hem hanoe, a broko hem kaakoe-been net so, leki wan soema kan broko wan pikin-skapoe-mofo. Ma Samson no taki gi hem tata nanga hem mama, sani a ben doe.
We wan toe dri dei na baka Samson kom pasa da srefi pasi ageen, en di a wani go loekoe, efi da dede meti lidom dapee jete, a si so meni wasi-wasi ben go meki hoso na ini da leeuw skin, dem potti honi na ini. En Samson teki da honi, a gowei; hafoe hem njam na pasi, en da tra hafoe a gi na hem tata en mama, meki dem tesi toe; ma a no taki gi dem, na hoepee a ben teki da honi.
We na baka di a teki da oeman, potti na hoso, fosi a meki wan trakteri gi dem famili, so leki dem jonkman vo da kondre ben lobbi doe alatem, te dem teki oeman; en vo da hede dem famili vo da oeman ben verzoekoe dritentin mansoema vo dem Filistri, meki dem kom tan nanga hem, vo a kan pasa dem dei nanga plisiri. We da fosi dei, di dem sidom na da trakteri, taki tori makandra, Samson gi dem wan rai-tori, a taki, efi na ini dem sebi dei, disi dem sa de na da trakteri makandra, dem sa sabi vo taki gi hem, sani da rai-tori wani taki, dan hem sa gi ibriwan vo dem wan hempi nanga wan mooi klosi; ma efi dem no sabi vo taki gi hem, dan ibriwan vo dem moe gi wan hempi nanga wan klosi. Dem taki: We, a boen, meki wi jeri!
En Samson hopo da tori vo hem, a taki: Mi sabi wan gridiman, di ben gi mi njanjam, en wan krasiwan ben gi mi switi-sani. Hoesoema dati? - We djoesnoe dem alamal bigin vo rai en vo broko dem hede, ma dem no kan kisi da reti loetoe vo da taki, da tori ben dipi vo dem toemoesi pasa; en vo da hede dem go na Samson wefi, dem taki, meki hem haksi hem man safri vo da tori, vo a kan pingi dem baka. Dem pramisi da oeman toemoesi tranga, dem taki, efi hem no meki dem kisi dati vo sabi, bifo dem sebi dei pasa, dem sa bron hem hoso. We dati meki da oeman begi Samson toemoesi vo da rai-tori, ala-dei a ben de trobi hem vo dati, en di Samson no ben wani vo taki gi hem, da oeman bigin vo kre liebi nanga dede, tee bakatem a kom moro Samson, a poeloe da rai-tori gi hem wefi, en wantem da oeman go piki dem Filistri safri. We na baka di da tem pasa, disi Samson ben potti gi dem, dem alamal kom na hem, dem taki: Sani switi, moro leki honi? en soema tranga, moro leki wan leeuw? Ma Samson taki gi dem: Efi oenoe no ben koenkroe nanga mi wefi, nooiti oen ben sa man, vo poeloe da rai-tori gi mi. En da srefi momenti da Jeje vo Masra kisi hem ageen, a seni hem go na Askalon, na dapee a kili dritentin Filistri, a teki dem klosi, a gi na dem soema, disi ben poeloe da rai-tori gi hem; en dan a libi dem nanga hattibron, a go baka na hem tata hoso. Ma so hesi a gowei nomo, dem Filistri teki hem wefi, dem gi hem na wan boen mati vo Samson, ma a no ben de na Samson hatti, vo libi hem wefi. We wan tra dei, di a kom baka kom loekoe hem wefi, en di a tjari wan pikin krabita kom gi hem, da oeman tata miti hem na doro-mofo, a taki, hem ben denki, Samson no lobbi da pikien moro, en vo da hede hem ben meki a teki wan tra man kaba; ma dati no wansani, efi Samson wani, a kan teki wan tra pikin sisa vo hem, disi moro mooi, leki da bigiwan. Ma Samson taki, no no, dati hem no wani, hem sa go soekoe hem satisfaksi vo da ogri, disi dem Filistri doe hem. En djoesnoe Samson nanga dem tra soema vo hem go kisi dri hondro kraboe-dagoe, a teki dem toe-toe, a tai dem tere vo dem fassi makandra, en dan a potti wan faja-tiki na ini, a jagi dem go tee na ini dem bigi areisi-gron vo dem Filistri, meki da faja pori ala dem areisi nanga dem droifi-boom nanga ala tra njanjam, di dem ben plani na dem pranasi; bikasi da srefi moen ala njanjam ben repi.
We di dem Filistri kom si dasani, en di dem jeri, da Samson ben doe dem dati, vo di dem ben poeloe hem wefi na hem hanoe, dati meki dem go kili da oeman nanga hem tata, dem bron dem liebi-liebi, vo meki Samson kisi hem satisfaksi. Ma Samson no teki dati so, ma a loekoe dati vo wan moro bigi ogri, disi dem doe hem njoe-njoe ageen, en vo da hede a pramisi dem, a taki, hem sa sabi vo pai dem, hem no sa kaba na dem baka, bifo hem kisi hem satisfaksi boen-boen. En da srefi dei a gowei, a kili foeloe soema vo dem, en dan a go baka na Juda-kondre, dapee a go kibri na ini wan bigi stoon-horo.
Ma so hesi dem Filistri kom jeri, Samson go kibri na hem kondre, djoesnoe dem seni foeloe soldati go na hem baka go teki hem, vo dem kan pai hem baka; en di dem no kan finni hem so wantem, dem komanderi dem tra Israel-soema, meki dem go soekoe Samson gi dem, bika a ben doe dem ogri, dem moese habi hem. We di dem trawan ben frede dem Filistri, helpi no de, dem seni dri doezend soema vo Juda famili go teki hem. En di dem doro na da horo mofo, dem meki trobi nanga Samson, dem haksi hem, efi hem no sabi, dem de na dem Filistri ondro kaba, vo sani hede hem ben doe dem dasani, meki dem hatti kom bron moro ogri na dem tapo? Samson taki, hem no doe dem moro ogri, leki dem fosi ben doe na hem. Ma dem trawan taki, dem kisi ordre, vo tai hem en vo tjari hem kom na dem Filistri. Samson taki: We, kom tai mi dan, ma fosi oen moe sweri mi, taki, oen no sa kili mi. Dem taki: No no, wi no sa kili joe, ma tai wi sa tai joe soso, tjari joe go na dem Filistri. We da so dem poeloe hem na ini da horo, dem teki toe tetei, njoe-njoewan, dem tai hem hanoe, tjari hem go; en di dem Filistri kom si hem, dem lafoe, dem ron go miti hem nanga bigi babari.
We da srefi momenti da Jeje vo Masra kisi Samson ageen, a gi hem so wan tranga, dati a broko dem dekki tetei, disi dem ben tai hem hanoe, a no ben gi hem moro trobi, vo doe dati, leki wan soema broko wan fini nai-tetei, disi verrotoe hafoe kaba na ini faja. En dan a djompo go teki wan boeriki-kaakoebeen, disi ben lidom na sabana dapee, a naki dem Filistri tee a kili wan doezend soema vo dem, nanga da soso boeriki-kaakoebeen a kili dem; ma dem trawan, di a no kili, dem teki ron, dem gowei. We na baka Samson fili hem skin weri vo troe, en drewatra moro hem toe; en di a ben frede, somtem dem Filistri kan kom baka, a begi hem Gado Jehova, a taki: Ke mi Masra, di joe ben helpi joe foetoeboi so fara kaba gran-tangi! no libi mi nanga da drewatra, vo dem heiden kom kisi mi! En Gado jeri da begi vo hem wantem, a meki wan bigi stoon poeloe so meni watra gi hem, vo a kan dringi nofo en vo a kisi hem tranga baka.
Pikinso na baka vo da tori wan dei Samson go ageen na Filistri-kondre, en di a kom na da foto Gaza, a go na wan bigi kolesi-hoso, a slibi dapee. Somtem Samson ben denki, no wan soema sa sabi hem dapee, ma tog a no ben kan kibri; en di a kom jeri, dem soema vo da foto pramisi hem, taki, deibroko mamantem dem sa kom kili hem, dati meki a hopo na mindri-neti, a gowei safri. Ma di a si, dem ben sloto da bigi poortoe vo da foto, meki a no kan gowei, nomo a poeloe dem toe postoe, a hopo da heeli poortoe nanga da dwaarsi-postoe, a potti ala na hem neki, tjari go tee na tapo wan bergi. We sinsi da tem dem Filistri no kom na Israel-kondre moro, bika dem kisi respeki vo Samson noja; so srefi dem Israel-soema loekoe hem toe vo da soema, disi ben helpi dem, en a tan leki kroetoeman vo dem wan heeli twenti jari.
Ma na baka di Samson kisi bigi membre, a kom fadom na ini wansani, disi meki Gado no kan gebruiki hem moro. Bika di a ben lobbi go na dem Filistri kondre, vo sori dem, fa hem no frede vo dem, dati kom tron wan bigi tesi vo hem. Bikasi wan takroe heiden-oeman, disi dem kali Delila, dati ben lobbi teki hem na hem hoso alatem, te a ben kom dapee, en nanga dati a ben sabi vo foefoeroe Samson hatti, tee bakatem Samson teki da oeman vo hem wefi. We so hesi dem Filistri granman jeri dati, dem plisiri vo troe, dem taki, dati boen, en wantem dem go na da oeman safri, dem begi hem, meki a haksi Samson wan dei na wan koni-fasi, sani de gi hem da tranga so, meki a kan doe so bigi wroko; en dem pramisi da oeman, efi a sa meki dem kom sabi toe, sani dem moe doe, vo verzwaki Samson, vo dem kan dwingi hem, dem sa pai hem feifi doezend nanga feifi hondro piesi silver-moni.
We da oeman taki, a boen, hem sa meki moeiti, vo dem kom sabi; en wan dei a haksi hem safri vo dati. Ma di Samson no ben wani meki da oeman sabi dati, vo da hede a kori hem, a taki, efi dem teki kamina, vlekti sebi tetei, tai hem boen-boen, dati sa verzwaki hem, meki a tron leki ibriwan tra soema. We so hesi da oeman piki dem kondreman vo dati, djoesnoe dem gran-soema gi dem sebi tetei vo da srefi speli, di Samson ben taki; en na neti, di Samson ben de slibi, a meki dem Filistri kom na ini kamera safri, a tai hem man nanga dem tetei, en dan a wieki hem nanga wan bigi babari, a taki: Hopo Samson, dem Filistri doro na joe tapo, dem tai joe kaba! Ma Samson broko dem tetei wantem, leki soema broko wan fini nai-tetei; en dem Filistri no kom sabi jete, sani gi hem da tranga. We da so Samson kori hem wefi dri-tron, a no taki da reti sani gi hem.
Ma ala dati da oeman no kaba na hem baka, a trobi hem doro vo dati, a taki, Samson no lobbi hem, anders a no sa kibri so wansani gi hem. En nanga dati a foefoeroe hem hatti ageen, a meki Samson poeloe ala krin gi hem, a taki, hem da wan soema, disi dem ben wye gi Jehova sinsi a gebore, en vo dati hede dem no koti hem wiwiri nooiti wantem, dati wawan de gi hem da tranga; efi hem wiwiri sa koti, dati sa meki ala hem tranga gowei, a sa de leki iniwan tra soema. We di da oeman si, now Samson poeloe ala hem hatti krin gi hem, djoesnoe a seni kali dem Filistri wantron moro, en dem no drai toe, vo kom djoesnoe de, dem tjari da moni wantem, di dem ben pramisi gi hem. Ma bifo dem doro na hem hoso, Delila ben soekoe vo kori Samson na wan switi fasi, meki a fadom na wan dipi slibi, en na ini da slibi a koti ala hem wiwiri, en dan a wieki hem ageen, a taki: Hopo Samson! dem Filistri doro na joe tapo ageen. We di Samson wieki, a taki, dati no wansani, hem sa sabi vo poeloe hem srefi na dem hanoe, so leki a ben doe tra dei. Ma poti vo hem! a no ben sabi, hem Gado libi hem kaba, vo di a no ben holi hem srefi so, leki a fiti wan soema vo Gado. En dem Filistri kisi hem, dem teki wan nefi, diki hem hai, dem tjari hem go na Gaza, en na dapee dem weri banditi gi hem, meki a wroko na mili.
We na dapee Samson ben habi tem, vo membre hem foutoe, en di a kom soekoe hem Gado baka nanga wan berouw-fasi, vo da hede Masra meki a kisi hem tranga baka wantron moro. Da tori ben pasa so: Dem Filistri ben habi wan bigi temple vo dem gado Dagon na Gaza, en di dem ben denki, da hem ben helpi dem vo kisi Samson, vo da hede ala dem hedeman vo kondre kom makandra na da temple, vo taki Dagon tangi, disi a ben meki dem kisi so wan ogri vyanti, en dem tjari foeloe njanjam kom gi hem. We ala di dem ben de nanga da plisiri de dansi gi Dagon, dem taki, meki dem go teki Samson, vo pre pikinso nanga hem, holi hem vo spotoe. En djoesnoe wan soema djompo go teki hem, en dan dem bigin vo pre komedi nanga hem; na baka dem taki gi da soema, disi ben tjari hem, meki a poeloe hem dapee, tjari go na sei so langa, vo a bro pikinso. Ma Samson begi da soema, vo a potti hem na sei dem bigi pilari, meki a kan leni hem baka. We dati ben de dem srefi bigi postoe, disi ben holi da hoso, en da heeli hoso ben foeloe nanga soema, so srefi da zoldro vo da hoso ben lai nanga soema, dem ben de omtrenti dri doezend soema, man nanga oeman, disi sidom dapee vo loekoe da komedi, disi dem trawan ben de meki nanga Samson na ondrosei.
We di Samson sidom dapee na mindri dem toe bigi postoe, a hopo hem hatti gi Jehova, a taki: Ke mi Gado Jehova, mi Masra! Gran-tangi, membre mi baka, en gi mi tranga baka ageen vo di leisi nomo, vo mi kan pai dem Filistri da ogri baka, disi dem ben doe mi, di dem diki mi hai! En da srefi momenti Samson fassi dem toe mindri postoe, a taki: Alwasi mi srefi moe dede toe nanga dem Filistri, pasiensi! mi verdini so. En dan a hali dem postoe tranga, a troesoe dem, poeloe na ondro da hoso, en dati meki da heeli hoso fadom na dem gran-soema tapo, kili dem, nanga ala dem tra soema toe, disi ben de na zoldro de loekoe. We da so Samson ben kili moro foeloe soema nanga hem dede, leki a ben kili, di a ben de na liebi jete.
1. We da tori vo Samson de gi wi wan toe dri leri ageen. Wi de si, so langa Samson ben holi hem bribi, a ben tranga toe; ma so hesi a lasi da bribi, djoesnoe da tranga libi hem toe. Di apostel Paulus ben skrifi na wan brifi vo hem, fa da bribi vo dem ouroe-tem-soema ben wroko tranga, a kali Samson nem toe na ini, a taki, da bribi wawan ben meki dem soso zwaki soema kom tranga so, vo dem doe so bigi wroko. (Ebr. 11, v. 32 tee 34.) We efi da srefi bribi de na wi, dan wi habi tranga toe, vo doe ala boen wroko vo Gado.
2. Ma alwasi fa Samson ben tranga fosi, tee a ben dwingi ala soema na hem ondro, tog di a no ben voorzigti, vo holi hem bribi, bakatem a no ben sabi vo dwingi hem eigen skin moro, vo di hem hatti no ben krin vo hem Gado moro. Vo da hede Salomo taki: Betre joe sabi vo dwingi joe srefi hatti, leki joe sabi, vo teki wan heeli foto. (Kap. 16, v. 32.)
3. Meki wi ala teki wan waarskouwe na Samson, en vooral dem jonkman nanga dem wendje, vo wi no doe, leki hem ben doe! Sinsi hem pikien-tem a ben sabi hem Gado, en Masra ben blesi hem foeloe blesi vo troe; ma di a no ben wakti hem hatti, a go verkeeri nanga wan falsi hoeroe-oeman, dati meki a vermorsoe ala dem blesi vo Gado soso. We meki no wan soema prefoeroe nanga hem ziel, bika didiebri kan kisi wi hesi na ondro hem dwingi! No meki wi waka jajo na neti, bika dati de tjari wi na foeloe ogri! Ke, hoemeni soema de broko da verbond baka, disi dem ben meki nanga Masra, da joeroe di dem doopoe!
(Rut Kap. 1 tee Kap. 4.)
Datem di Ehud nanga Samgar ben de tiri Israel leki kroetoeman, wan tranga hangri-tem kom fadom na kondre; en dati meki wan soema vo Juda famili, disi ben liebi na Betlehem, a nem Elimelek, komoto na Kanaan, a go liebi na Moab-kondre, hem nanga hem wefi Naemi nanga toe manpikien vo hem. Ma ala di dem ben de dapee, Elimelek kom dede, a libi hem wefi nanga dem toe pikien. En di dem jonkman kom bigi, dem ala toe go teki oeman vo Moab-kondre; wan vo dem oeman dem kali Arpa, en da trawan dem kali Rut. Ma omtrenti tin jari na baka dem toe pikien vo Elimelek kom dede toe, dem libi da mama, sondro dem ben meki pikien nanga dem wefi. We di Naemi kisi njoesoe bakatem, a jeri, da hangri-tem saka na Israel-kondre, dati meki a libi Moab-kondre, a go baka na Betlehem, en dem oeman vo dem toe pikien vo hem potti hem na pasi. Ma di dem doro so fara, tee pikin-moro dem kisi Juda-kondre, dan Naemi taki gi dem: So, a boen now, mi pikien, disi oen ben tjari mi so fara; drai baka noja, go na oen mama. Masra Jehova moe de nanga oenoe, a moe blesi oenoe, pai oen ala da boen baka, disi oen ben doe na mi en na dem pikien vo mi. Mi wensi, Gado moe meki oen liebi switi alatem; oenoe nanga dem famili vo oenoe! Ma di Naemi go bosi dem, taki dem adjosi, dem ala toe seti kre, dem taki: No no, mama, meki wi tan nanga joe, en go liebi nanga joe na joe kondre. Naemi taki: Ke, mi pikien! San hede oen wani go nanga mi? Oen srefi sabi, mi grani kaba, mi no kan teki man moro, meki pikien, disi oen kan teki, liebi nanga dem. En alwasi mi sa taki, tidei srefi mi sa teki man, somtem mi kan kisi pikien jete, tog oen no kan wakti so langa, tee dem kom bigi: vo da hede betre oen drai baka wantem go na hoso. A hati mi vo oenoe, disi dasani kom so; ma sani mi sa taki? Mi srefi fili da hebi moro tranga, leki oenoe kan fili hem, di Masra ben meki mi lasi mi man nanga ala toe pikien vo mi.
We di Naemi taki so, dati kom gi dem toe oeman wan toemoesi sari na dem hatti, dem kre vo troe, en Arpa bosi da mama, a taki hem adjosi. Ma Rut, hem no wani libi hem, a taki, hem no kan platie nanga da mama. En vo da hede Naemi vermane hem wantron moro, a taki: Joe no si? joe sisa gowei kaba, a go baka na hem kondre; we no lasi tem, meki hesi, waka go na hem baka.
Ma Rut begi hem, a taki: Tangi-tangi, mama! no dwingi mi, vo mi libi joe! Dapee joe de go, na dapee mi sa go toe, en dapee joe sa tan, na dapee mi sa tan toe. Joe kondre, da mi kondre, en joe Gado, da mi Gado toe. Dapee joe dede, na dapee mi sa dede toe, en na dapee mi wani, dem moe beri mi toe. Alwasi hoe-sani Jehova doe nanga mi, tog dede wawan sa platie mi nanga joe! -- We na baka Naemi no trobi hem moro, en dem ala toe waka makandra go na Betlehem.
We di dem doro na Betlehem, da heeli foto kom plisiri, vo di dem si Naemi baka. Ma Naemi srefi no ben plisiri, hem hatti ben de nanga sari, a taki: Oen no moe kali mi Naemi moro -- dati taki, da switiwan, -- betre oen kali mi Mara -- dati taki bita, -- bikasi Masra Jehova meki alasani kom bita toemoesi gi mi. Di mi komopo diaso, mi ben de wan goedoe-man, ma noja, di Masra tjari mi kom baka, mi no ha wansani moro. Fa oen kan kali mi Naemi jete, di Masra libi mi, meki mi kom na ala soortoe verdriti?
We datem, disi dem toe oeman ben doro na Betlehem, dati ben fadom na da srefi moen, disi ala soema ben go koti dem areisi. En di Rut no ben kan finni wan reti wroko so hesi, vo pasa hem liebi, a haksi hem mama, efi a no kan go na firi, go piki pikin areisi, a taki, hem no sa go na wan tra gron, leki dapee soema koti dem areisi kaba; somtem a sa finni wan boen-hatti soema, disi sa gi hem pasi, vo piki dem saka-saka, disi fadom panja na gron. En da mama gi hem pasi, a taki, a boen, meki a go doe so.
We di Rut kom na dem areisi-gron, fosi a kisi di vo Boas, dati ben de wan boen soema, vo Naemi famili srefi; ma Rut no ben sabi hem. We di a miti dem wrokoman vo Boas dedapee de koti areisi, a haksi dem pasi, vo a kan piki dem saka-saka, disi panja fadom na gron, en dem no tapo hem toe. Boas srefi no ben de dapee da srefi joeroe, a ben de na ini foto jete na Betlehem; ma pikinso na baka hem srefi kom koiri, vo loekoe dem wrokoman. En di a doro klosibei na dem, a gi dem wan switi odi, so leki a ben njoesoe alatem, a taki: Odi odi, Masra moe helpi oenoe! En dem piki hem, dem taki: Tangi masra! Gado moe blesi joe toe! Na baka Boas go na hem skrifi-man, a haksi hem: Hoesoema dati, disi de piki dem saka-saka jandaso? Da skrifiman taki: A no da oeman vo Moab-kondre, disi ben kom nanga Naemi tra-dei? Di mamantem di wi go na wroko, a kom begi mi pasi, vo a kan waka na dem kotiman baka, piki dem saka-saka, disi fadom panja na gron; we da pikin-sani, di joe si, dati a ben piki sinsi mamantem, dati da ala njanjam, di a habi na hoso, vo pasa hem liebi.
Djoesnoe Boas go kali Rut kom na hem, a taki: Jere mi pikien! a boen na mi, disi joe kom piki areisi diaso, en vo da hede mi taki gi joe, nooiti joe moe go piki na wan tra soema gron; ma dia wawan joe moe tan alatem nanga dem oeman vo mi; dapee dem de go koti, na dapee joe kan go piki na dem baka; mi gi mi skrifiman ordre kaba, taki, no wan soema moe kom trobi joe. So srefi, te dem go njam? joe no moe frede, vo go njam en vo dringi nanga dem oeman vo mi. We di Rut jeri so wan taki, a kom sjem vo troe, en nanga bigi respeki a hiti hem srefi na gron gi Boas, a taki: Ke mi masra, gran-tangi vo joe! Ma mi no sabi, sani mi ben doe joe, disi joe habi so boen-hatti vo mi; bika tog mi de wan vreemde soema na joe kondre. Boas taki gi hem: Joe denki, mi no sabi joe? Mi no jeri alasani, fa joe ben loekoe joe man mama so boen na joe kondre? en fa joe ben libi ala joe famili, nomo vo joe kom liebi dia na wan vreemde kondre, disi joe no sabi? We Masra sa blesi joe vo dati! Jehova, wi Gado, di joe ben kom soekoe diaso, hem srefi sa teki joe, kibri joe na ondro hem flei, vo joe kan liebi switi. Rut taki: Ke mi masra, fa joe taki so switi nanga mi! Joe troostoe mi hatti vo troe! We di joe kali mi joe pikien, dati de gi mi hatti, vo mi begi joe, gran-tangi, teki mi, meki mi tron wan soso wrokoman vo joe! We ala di dem taki so makandra, dem kotiman go sidom njam breki, en Boas taki gi Rut, meki hem toe go sidom nanga dem, go njam. En di Rut go sidom na dem trawan sei, Boas srefi gi hem wan boen porsie, tee a no man vo njam ala na wantron, ma a libi hafoe na hem kometje. Na baka a go ageen na hem wroko.
Ma Boas taki gi hem skrifiman wantron moro, dem moe gi da oeman pasi, vo a kan piki na ala plesi, alwasi tee na mindri dem hipi bosoe srefi; en te dem tai dem bosoe, dem no moe gridi toemoesi, vo piki da areisi so krin, ma dem kan libi wan-wan tiki na gron, vo da poti oeman no moe pina so toemoesi, vo finni wansani. Boas taki, dem no moe trobi da oeman, no na wan fasi.
We da so Rut piki hem areisi, tee a kisi wan mooi bosoe makandra, en baka-dina, di a fom hem wantem, a si, dati pikin moro a kisi wan heeli baksi foeloe. Ma na sabatem a go na hoso, a sori hem mama da areisi nanga da njanjam, di a ben kibri; so srefi a verteli hem toe vo da boen soema Boas, disi ben gi hem dati, en disi ben taki so switi nanga hem. Naemi taki: Ja, da soema mi sabi heeli boen, da mi famili srefi. We da so hem maniri de, a sabi hem famili, bika sinsi langatem a doe wi famili foeloe boen. Gado moe blesi hem vo dati! Na baka Rut verteli hem mama toe, dati Boas no wani srefi, vo a go na wan tra soema gron, ma na hem gron wawan a moe kom alatem kom piki, so langa dem wrokoman de koti areisi dapee. Naemi taki: We dati boen, mi pikien, mi lobbi so; bikasi te joe de nanga dem soema vo Boas, dan no wan soema kan trobi joe na wan tra gron. We da so Rut go piki aladei so langa, tee dem koti ala da areisi; en na baka a tan nanga hem mama na hoso.
Ma dem pikien vo Israel ben habi wan ouroe wet, en dati taki: Efi wan soema kom dede, en a libi hem wefi sondro pikien, dan wan tra soema vo hem famili moe teki da oeman. We wan dei di Naemi nanga Rut ben sidom taki tori makandra, da mama verteli hem da tori vo da wet, en wantem a rai hem, a taki: Joe si, mi pikien, mi kom na mi jari kaba, en vo da hede mi sa wensi, joe kan finni wan man baka, bifo mi dede, vo mi sabi, joe habi wan soema, disi de loekoe joe. Joe srefi sabi, Boas da wi famili, en da hem pligti, vo a teki joe. We tidei a de na hem gron, a meki dem wrokoman wai ala hem areisi wantem, di dem koti en di dem fom, en baka-dina, te dem kaba, a de go meki wan trakteri gi dem wrokoman; mi sa rai joe, vo joe go dapee, go taki nanga hem, joe wawan. Joe moe verteli hem, taki, joe zaliki man ben de vo hem famili, a no libi pikien gi joe; en dan joe moe pingi Boas, meki a membre hem pligti, taki, da hem moe teki joe noja.
We Rut doe so, leki da mama rai hem, en di a kom na Boas, pingi hem da tori, Boas taki: We a boen; di joe de wan jonge weduwe en di mi si, joe holi joe srefi so boen, joe no waka go na dem jonkman baka, ma joe tevrede vo teki wan bejari soema, en joe wani teki wi bribi toe, ala dati de wan boen sani. Ma, mi pikien, joe moe holi pasiensi pikinso, mi sa go taki nanga dem gran-soema fosi, mi bribi, dasani no sa habi trobi, bika ala soema sabi, joe de wan boen oeman. A troe, mi de vo joe man famili, en mi sabi da wet toe, disi verpligti mi, vo mi teki joe vo mi wefi; ma wan tra moro klosibei famili de jete, disi habi reti, moro leki mi, vo a teki joe. We tamara mi sa go taki nanga hem. Efi hem wani teki joe, a boen; ma efi hem no wani, dan mi sa teki joe; mi sa piki joe baka.
We nanga da antwoortoe Rut taki hem adjosi, en Boas gi hem siksi baksi areisi vo presenti, meki a tjari go na hoso. We so hesi a doro na hoso, da mama haksi hem wantem, sani Boas ben piki hem, en Rut verteli hem da heeli tori, a sori hem da areisi toe, disi Boas ben gi hem vo presenti. Ma Naemi taki: We a boen, mi pikien, sidom vo joe so langa, tee joe jeri, fa da tori sa waka. Bikasi mi sabi Boas maniri, a no sa drai langa, ma a sa soekoe dasani hesi, tidei srefi a sa meki a kom klari.
We da so a ben kom toe. Bika Boas go wantem na da hoso, dapee ala dem gran-soema vo kroetoe ben lobbi kom makandra, a seni kali da famili vo hem toe, en dan a haksi hem na ala soema fesi, efi somtem hem sa wani, vo bai da gron vo dem brara Elimelek, en vo teki da Moab-oeman vo hem wefi. Bika Rut ben de da wefi vo Elimelek pikien, disi dede, en da wet vo dem taki, te dem go seli so wan soema gron, dem no moe meki a pasa wan transportoe, vo a go na wan tra soema nem, ma a moe tan na da ouroe masra nem, di dede. We da tra soema taki: No no, so wan fasi mi no kan bai da gron vo wi brara Elimelek, efi joe wani, joe kan teki hem. Boas taki: We a boen, mi sa kali Naemi wantem, bai da gron vo Elimelek, bika na hem hanoe a de, en dan mi sa teki da oeman vo Elimelek pikien vo mi wefi, meki da dede-soema nem hopo baka; mi teki oen alamal vo getuige. We ala dem foeloe soema vo Betlehem, disi ben kom makandra dapee, nanga dem gran-soema, dem alamal piki hem, dem taki: Ja, wi de getuige vo dati! Jehova moe blesi joe nanga da oeman vo joe, vo oen kan liebi boen makandra! So srefi a moe blesi dem pikien toe, disi a sa gi oenoe!
We da so Boas teki Rut vo hem wefi, en Masra blesi da oeman, vo a kisi bele, a meki wan man-pikien, en dem kali da pikien Obed . En ala dem tra oeman vo Betlehem kom feliciteri Naemi vo da pikien, dem taki, da pikien sa gi hem foeloe plisiri, en te a kom bigi, dan a sa loekoe hem gran-mama na hem ouroe jari. En Naemi teki da pikien, a potti hem na hem foetoe tapo, a tron hem nene. We da srefi Obed ben de koning David gran-tata; bikasi David tata Isai ben de Obed pikien.
1. We da tori vo Rut de gi wi wan toe dri leri ageen. Di Rut ben habi so wan lobbi vo hem man mama, tee a libi hem kondre, a go nanga Naemi na Betlehem, vo a loekoe hem dapee, we dati de sori wi, fa wi toe moe lobbi wi tata nanga wi mama nanga wi famili. Bika dem soema, disi doe so, Gado pramisi dem, dati dem sa liebi langa, en dem sa finni boen na da kondre, disi hem gi dem. (5. Mos. 5, v. 16.) We da srefi blesi Masra ben blesi Rut toe.
2. Ma di Rut ben soekoe dati so tranga nanga hem heeli hatti, vo a komopo na hem heiden-fasi, en vo a tron wan boen bribi-soema vo Jehova, vo da hede Masra ben meki a finni moro foeloe srefi, leki a ben soekoe. A ben kisi onderfindi vo dasani, disi Masra Jesus pramisi wi, di a taki: Ibriwan soema, disi de libi hem hoso vo mi nem hede, ofoe hem brara, ofoe sisa, ofoe tata, ofoe mama, ofoe wefi, ofoe pikien, ofoe pranasi, da soema sa kisi alasani baka hondro-tron, en bakatem da liebi vo teego. (Matt. 19, v. 29.)
3. Boas ben de wan boen soema vo Gado troe; dati wi kan si na hem maniri, di a ben taki so familiari nanga dem wrokoman vo hem, en di a ben holi da wet vo Gado so boen. Bikasi Masra ben meki Moses skrifi na ini da wet, taki, te dem koti dem areisi nanga ibriwan tra njanjam, dan dem no moe gridi, vo piki alasani so toemoesi krin, ma dem moe libi hafoe vo dem poti soema en vo dem vreemde soema, disi komopo na tra kondre. (3. Mos. 23, v. 22.)
4. Da poti Rut no ben sidom soso na hoso, meki tra soema loekoe njanjam gi hem, ma a ben soekoe wan wroko vo hem, iniwan di a ben finni, en a no ben sjem vo da moro laage wroko srefi. Alwasi a no ben finni foeloe, tog a ben tevrede nanga da pikin-sani, di a piki. En di a ben sori so wan respeki-fasi na Boas, dati meki Boas hatti hopo, vo a doe hem moro foeloe boen. We meki wi ala teki wan exemple na dati, vo wi sori so wan saka-fasi toe, en vo wi taki dem soema tangi, disi doe wi boen!
(1. Sam. Kap. 1 tee Kap. 4.)
Datem di Samson ben de kroetoeman vo Israel, da srefi tem dem ben habi wan gran-domine, disi dem kali Eli, a ben liebi na Silo, dapee da verbond-hoso vo Masra ben de. We so langa Samson ben de jete, Eli no ben bemoeje nanga da wroko, vo tiri kondre, a ben loekoe hem domine-wroko wawan; ma na baka di Samson dede, Eli teki da kroetoeman-wroko toe, moksi nanga hem domine-wroko. Eli vo hem eigen perzon ben de wan boen soema, di no libi hem Gado, en a no trobi wan soema toe; ma hem domine-wroko? dati wawan a no ben loekoe so boen, leki a fiti, a no ben feti so trouw vo hem Gado, leki Pinehas ben doe, disi ben de gran-domine, bifosi hem.
We di dem Filistri no ben kaba jete vo trobi dem pikien vo Israel, ma dem plage dem so, tee bakatem da pina-liebi kom moro dem Israel-soema, en dati meki dem kom soekoe Jehova baka, dem begi hem pardon, dem taki: Ke wi Masra, wi doe joe ogri troe, di wi libi joe, waka go na dem kroekoetoe-gado, en vo da hede wi verdini da strafoe so, dati wi sabi. Ma gran-tangi! wi begi joe, helpi wi di leisi nomo, en saka da strafoe pikinso gi wi! -- We di dem begi Masra so, da srefi dei dem go poeloe ala dem kroekoetoe-gado-sani wantem na dem hoso, dem teki ala, trowei; en dan dem bigin vo dini Jehova baka nanga dem heeli hatti. We vo da hede Gado kisi wan sari toe vo dem, en a soekoe vo gi dem wan soema ageen, disi kan helpi dem, potti kondre reti baka. Da soema, dati da Samuel, disi no ben gebore jete. Ma bifo Samuel kom so fara, Masra gi dem wan tra soema so langa, disi dem kali Jefta.
We da tori vo Samuel ben waka so: Hem tata Elkana, disi ben liebi na Rama, a ben habi toe wefi, wan dem kali Hanna, en da trawan dem kali Penina. We Penina ben de wan oeman, disi ben meki pikien, ma Hanna, dati no meki pikien, en vo da hede Penina ben veragti Hanna alatem, a no teli hem; bikasi na ouroe-tem efi wan oeman no meki pikien, dem ben loekoe dati alatem, leki Gado no lobbi so wan oeman.
We di Elkana ben njoesoe vo go ibri jari wantron na Silo go begi Jehova dapee, en vo tjari hem ofrandi, wan dei di a ben de dapee, hem nanga dem toe wefi vo hem, dan Penina bigin ageen vo trobi Hanna en vo kosi hem, vo di a no meki pikien. Bikasi da so Penina maniri ben de alatem; ibri jari, disi dem ben go na da hoso vo Masra, a moese trobi da poti Hanna so, tee no wan njanjam ben switi na hem mofo moro. We di Elkana si hem boen wefi Hanna sidom de kre, en a no wani njam, da man go troostoe hem, a taki: San doe joe Hanna? San joe sidom de kre, joe no wani njam? A troe, di joe no ha pikien, dati de gi joe sari; ma tog, di joe habi mi, en di mi lobbi joe, dati no moe troostoe joe, moro leki joe habi tin pikien? We so hesi dem komoto na tafra, djoesnoe Hanna go poeloe hem hatti gi hem boen Gado na da verbond-hoso doro, a begi hem nanga wan toemoesi respeki-fasi, a taki: Gran-tangi, mi Masra Zebaot, mi plisi joe, en mi pramisi joe troe, efi joe sa loekoe da jamer-fasi vo mi, efi joe sari mi mofinawan gi mi wan pikien? mi beloovoe joe troe, mi sa gi joe hem baka, meki a dini Jehova na hem hoso, so langa hem bro de na hem.
Ma ala di Hanna ben de na da begi so, gran-domine Eli ben sidom na hem stoeloe, no toemoesi farawei vo da verbond-hoso, a si Hanna dapee; ma di Hanna de begi safri, dati meki Eli no ben kan jeri da begi vo hem, a si nomo, fa hem mofo de sekseki. We dati tjari da ouroe domine na da prakseri, a taki, somtem da oeman droengoe, en vo da hede a bigin krasi hem vo dati.
Ma Hanna piki hem wantem, a taki: No no, mi masra, mi no droengoe, Gado kibri mi! Ma mi de wan oeman, disi de nanga wan toemoesi hebi, wansani de hati mi so, tee mi no kan helpi, mi moese kre mi nootoe gi mi Gado Jehova; en di mi poeloe ala mi hatti gi hem, dati meki mi kom na so wan dipi prakseri, leki fa domine ben si mi de. Ma droengoe? domine no moe denki, mi droengoe; Gado kibri mi vo so wan didiebri-wroko! Eli taki: Ja, efi da so, dan a boen. We meki joe hatti kouroe; Gado sa gi joe dasani, disi joe ben begi hem. -- En da oeman taki domine tangi vo da troostoe, di a gi hem, a taki, meki domine membre hem, te a begi na Masra. Na baka Hanna go na hoso go njam, a no meki so wan sari-fesi moro. En dei-broko mamantem hem nanga hem man go wantron moro na kerki, taki Masra tangi, en dan dem drai baka go na Rama.
We na baka vo dati Jehova membre Hanna, a blesi hem, vo a kisi bele; en te da joeroe vo hem kisi, a gebore wan manpikien, disi dem kali Samuel, bikasi da mama taki: Na Gado mi ben begi da pikien. En Hanna gi da pikien bobi, a no go na Silo moro, so langa a no kan doe dasani, disi a ben pramisi Masra. Ma so hesi a poeloe da pikien na bobi, a teki hem, tjari go na Silo, a potti hem na ini da hoso vo Masra. So srefi a teki dri kow nanga wan bali blom nanga wan batra wini, a poti dati vo wan ofrandi, hem nanga hem man makandra. Na baka Hanna tjari da pikien go na gran-domine, a taki: Somtem domine no sabi mi moro; mi de da srefi oeman, di ben tanapoe diaso tra jari. We di joe ben si mi begi Masra so tranga, da vo da pikin boi disi mi ben begi hem. Tangi vo Masra, mi kisi dasani, di mi ben begi! We di mi ben pramisi hem, dati mi sa gi hem da pikien baka, vo da hede mi tjari hem kom de; bikasi dati wawan mi ben begi, vo da pikien moe de vo Masra alatem.
We da so Eli teki da pikin Samuel, a potti hem na hem hoso, a leri hem; en Samuel holi hem srefi so boen, a leri da leviti-wroko hesi, vo a kan dini Masra na hem hoso, sinsi hem jonge jari tem. Alwasi a ben de wan pikin boi jete, tog a ben weri alatem wan linnen domine-hempi. Bikasi di da mama ben habi plisiri nanga da pikien, a meki ibri jari so wan pikin hempi gi hem, en te hem tata nanga mama ben kom na Silo, vo meki dem ofrandi, dan Hanna ben lobbi alatem, vo gi hem pikien Samuel so wan hempi vo presenti.
Ma na baka vo Samuel Gado kom blesi Hanna moro ageen, a gi hem feifi tra pikien moro, dri man-pikien nanga toe oeman. We dati ben gi Hanna foeloe plisiri, en vo da hede a singi wan mooi singi gi Masra, a taki: Ke mi hatti plisiri nanga mi Masra Jehova! Mi blyti vo troe vo so wan helpi, di a ben helpi mi. Da hem de da bigi Masra, disi kan meki soema tron poti, en so srefi hem kan meki poti soema tron goedoeman. Hem de saka soema, ma hem de hopo soema toe.
We datem Samuel gro mooi, tee a kom bigi, en di a ben doe hem leviti-wroko so trouw alatem, dati meki Gado nanga ala soema ben lobbi hem.
Ma da ouroe gran-domine Eli, dati kom fili da zwaki vo hem moro tranga na hem skin, en di da kroetoeman-wroko ben gi hem so meni trobi toe, tee a no ben man moro, vo loekoe ala toe wroko makandra, vo da hede a teki dem toe pikien vo hem, Hofni nanga Pinehas, potti na hem domine-wroko. Ma dem toe pikien vo Eli ben de toemoesi takroe soema, dem no ben habi wan soortoe respeki vo Jehova en no wan frede toe, en buiti dati dem no ben de boen domine toe. Bika te wan soema ben tjari wan ofrandi kom gi Masra, djoesnoe dem domine seni wan foetoeboi go dapee nanga wan bigi forkoe na hanoe, en ala di da meti ben de na faja jete de boli, da foetoeboi soetoe hem forkoe na ini patoe, a poeloe hafoe vo da meti na ini, tjari gi na domine. We dati ben kom wan faste gewenti vo dem, bikasi da so dem ben doe nanga ala dem Israel-soema, disi ben kom na Silo, tjari wan ofrandi. En efi wan soema no ben wani gi da foetoeboi pasi, vo poeloe da meti, dan dem domine meki a teki hem nanga tranga srefi. We nanga dati dem domine kom pori da heeli ofrandi-wroko krin-krin, bika di dasani kom moro ogri jari vo jari, bakatem no wan soema ha plisiri moro, vo tjari wan ofrandi kom gi Masra.
Ma da ouroe tata Eli, alwasi hem jeri alasani, fa dem pikien vo hem handri dem Israel-soema, en fa dem familiari nanga dem oeman, disi ben dini dem domine na kerki plasi, tog ala dati da ouroe domine no meki wan reti moeiti, vo tapo dem na ini da ogri; wan pikin soso vermane a gi dem, a taki: Fa oen doe so, mi pikien? Mi jeri, oen nem pori na heeli kondre. No no, mi pikien, dati a no wan boen tori, di mi jeri vo oenoe. Nanga dati oen pori da heeli gemeente vo Masra, meki dem doe ogri toe. Ma moro fara Eli no ben soekoe dati, en da soso vermane, di a gi dem, vo dati dem pikien no ke; kontrari dem kom moro tranga na ini da ogri jari vo jari, bika Gado ben meki dem verfal kaba, meki dem kisi dem strafoe.
We vo da hede wan soema vo Gado kom na Eli wan dei, a taki gi hem: Jere, san Jehova taki gi joe! Mi si, joe lobbi joe pikien moro, leki joe lobbi mi; we vo da hede mi sa poeloe joe famili na domine, meki no wan vo dem tron domine moro; mi sa teki trawan, vo dem dini mi! Bika disoema respeki mi, mi sa sori hem respeki toe; ma disoema veragti mi, mi sa veragti hem baka. We joe sa si, iniwantem mi sa kom broko da tranga vo joe; en joe famili mi sa verzwaki toe, no wan soema na joe baka sa kisi so meni jari moro, leki joe ouroe. So srefi joe sa si, da moro beste sani, disi Israel habi, da verbond-kisi, dati da vyanti vo da santa hoso sa kom teki, tjari gowei; en dem pikien vo joe, Hofni nanga Pinehas, dem ala toe sa dede makandra na wan dei. Na baka mi sa loekoe wan tra domine gi mi, disi sa dini mi nanga wan vertrouw fasi en nanga hem heeli hatti; da hem mi sa meki wan hoso gi, vo a tan na mi fesi alatem.
We da tem di dem pikien vo Eli ben pori alasani, da jonge Samuel ben leri hem wroko mooi na Eli ondro, en a dini hem Gado nanga hem heeli hatti. Ma da tori vo Jehova, dati ben dieri vo troe da joeroe tem; en vo si Gado? no wan enkli soema ben de moro, disi kan taki, hem ben si Gado. Ma wan neti, di Samuel lidom de slibi na kerki-kamera, Masra Jehova kom na hem dapee, a kali hem; en di da slibi-kamera vo gran-domine no ben de farawei, Samuel denki, somtem da Eli, disi kali hem, en vo da hede a djompo go na hem, a haksi hem, efi a wani wansani; bikasi hem jeri, domine kali hem. Ma Eli taki: No no, mi no kali joe, go baka, slibi vo joe. We di Samuel go lidom slibi baka, Masra kom kali hem vo toetron, en Samuel go haksi Eli ageen, efi a wani wansani, ma Eli seni hem go baka, a taki, meki a go slibi. So wansani no ben pasa Samuel jete nooiti wantem, en vo da hede na so wan fasi a no ben sabi hem Masra Jehova stem jete; na ini boekoe wawan a ben sabi hem. Ma di dasani kom pasa hem vo dritron, en di a kom haksi Eli ageen, efi a no hem ben kali hem, dati meki Eli kom na da prakseri, a taki, somtem da Jehova srefi, di ben kali da jonkman. En vo da hede a seni Samuel go baka, a taki, efi da stem kom kali hem wantron moro ageen, meki a piki wantem, taki: Ja Masra, dia mi de! San Masra wani? We pikin-moro Samuel no lidom reti baka, ofoe Jehova kom tan na hem fesi ageen, tee hem hai srefi kom si hem, a kali hem toetron ageen, a taki: Samuel! Samuel! We Samuel piki hem so, leki Eli ben taki gi hem, en dan Masra bigin waarskouwe Samuel vo ala da ogri en skreki-sani, disi hem sa seni kom na kondre en na domine Eli famili toe, so leki hem ben pramisi Eli kaba, vo di a ben sabi ala dem takroe maniri vo hem pikien boen-boen, sondro a ben krasi dem. Dei-broko mamantem Samuel go na hem wroko, sondro a go piki Eli vo dasani, disi a ben si en disi a ben jeri; bikasi a ben frede, vo taki gi hem. Ma di Eli srefi kali hem expresi, a haksi hem vo dasani, di a jeri na neti, a taki, Samuel no moe kibri wan woortoe gi hem, hem wani sabi alasani, disi Jehova ben kom taki gi hem: we, helpi no de, Samuel verpligti, vo verteli hem da heeli tori. En Eli taki: We, san mi sa taki? Meki Masra doe so, leki a finni vo boen, mi tevrede!
We sinsi Masra ben kom taki so nanga Samuel da fosi-tron, bakatem a ben kom loekoe hem moro ageen na Silo, kom taki sani gi hem, en nanga dati Samuel kisi wan bigi nem na kondre; bika di Masra ben meki ala hem profeti-taki kom reti, na dati heeli Israel kom si, troe-troe Samuel de wan boen profet vo Masra.
Ma da strafoe, disi Jehova ben pramisi Eli, dati no ben drai langa toe vo kom. Bikasi wan dei di dem pikien vo Israel go feti nanga dem Filistri, vo poeloe dem srefi na dem ondro, meki dem tron wan fri kondre baka; en di dem ben doe dati, sondro dem haksi Jehova bifosi, efi dati sa boen na hem toe, we vo da hede Masra meki dem Filistri winni da feti, dem kili omtrenti fo doezend Israel-soema.
Ma di dem gran-soema vo Israel no ben wani begreipi jete, vo san hede Gado ben meki dati kom so gi dem, dem seni wan boodskopoe go na Silo, go teki da verbond-kisi vo Masra, dem taki, somtem dati sa meki dem kan winni dem vyanti; dem ben doe, leki dem wani dwingi Masra, vo a moese helpi dem. We da so dem go poeloe da verbond-kisi na Silo, dem tjari hem kom, en dem toe pikien vo Eli, Hofni nanga Pinehas, dem srefi go toe nanga hem. Ma so hesi da kisi vo Masra Zebaot doro na da kampoe, djoesnoe ala dem foeloe Israel-soema hopo wan bigi babari dapee, dem plisiri so, tee dem Filistri srefi jeri da babari vo dem. We dati meki dem vyanti kom skreki vo troe, dem seni loekoe, sani dati; en di dem jeri, da kisi vo Jehova doro dedapee, dem kom frede, dem taki: Ke, dati no sa waka boen gi wi di leisi, bika da Gado vo Israel srefi kom helpi dem! Da Gado da wan bigi Gado, da srefiwan, disi ben doe dem Egipti-soema so meni ogri. Ma nanga ala frede, disi dem Filistri ben frede, tog dem no lasi hatti so, tee vo ronwei; bika dem ofciri bari dem soldati, dem taki: We oen Filistri, kom teki hatti, meki Israel no winni oenoe, vo oen moe dini dem, so leki dem ben dini oenoe so meni langa kaba! Kom feti, holi oen srefi boen! We da so dem Filistri go miti dem pikien vo Israel, dem feti wan bigi feti, dem kili dritentin doezend Israel-soema, en dan dem teki da kisi vo Masra, tjari gowei. Dem toe pikien vo Eli, Hofni nanga Pinehas, ben de na ini dem soema toe, disi ben lasi dapee.
Ma dem weiniki tra soema, disi no ben dede na ini da feti, dem alamal teki ron, go kibri. Buiti wan soema vo Benjamin famili, hem ron go reti na Silo, a doro dedapee da srefi dei, en ala soema, di a miti na strati, a verteli dem, fa da feti ben waka, en dati meki dem alamal bigin kre vo da kisi, a ben tan, leki da heeli foto kom na wan oproeroe. Ma da srefi joeroe, di da soema tjari da boodskopoe kom, da ouroe domine Eli ben sidom na wan stoeloe na strati-sei, de wakti vo jeri wan njoesoe, bikasi a ben hangri vo jeri, fa da feti ben waka, en vo da kisi vo Masra a ben frede vo troe. We di a jeri da kre nanga da babari na foto, a haksi wan soema, hoesani dati; en bifo da soema kan piki hem jete, da trawan, di tjari da boodskopoe kom, hem srefi doro toe dapee, a kom na Eli nanga wan haaste fasi, a taki: Na feti mi komopo tidei, da kom mi de kom! Eli taki: We, fa da feti ben waka? Da soema taki: Da feti no waka boen. Di dem Filistri kom moro wi Israel-soema, helpi no ben de, wi ben moese vo teki ron gowei, en dan dem feti na wi baka, dem kili toemoesi soema vo wi, dem toe pikien vo joe dede toe, so srefi da kisi vo Gado, dem Filistri teki hem, tjari gowei. We so hesi da soema meli da woortoe nomo vo da santa kisi, djoesnoe Eli komoto na hem stoeloe, en nanga baka a fadom na gron, a broko hem neki, a dede; bika a ben de wan bejari soema kaba, di no kan helpi hem srefi moro; a ben ouroe negitentin na aiti jari.
1. We da tori de leri wi wan toe dri sani ageen. Disi Hanna ben begi Masra so na ini hem hatti ini, alwasi hem tongo no ben poeloe wan woortoe, dati ben meki Masra jeri da begi vo hem, en a gi hem dasani toe, disi a ben begi. We da hatti -begi wawan Masra de loekoe. Ma foeloe soema de begi Gado nanga dem mofo soso, ma dem hatti tan farawei vo hem, en vo da hede Gado no kan teki so wan begi. (Matt. 15, v. 8 & 9.)
2. Disi da pikin Samuel ben de na domine Eli hoso, dem toe pikien vo domine no ben sori hem wan boen exemple kweti-kweti. Ma tog Samuel no ben loekoe na dem ogri soema, a ben loekoe na hem srefi wawan, en dati ben meki hem tan wan switi pikien alatem. We da so koning Salomo vermane ala jonge soema, a taki: Mi pikien, te dem ogri boi de kali joe, no waka go nanga dem! (Kap. 1, v. 10.)
3. Disi Samuel ben lobbi hem Masra Gado so nanga hem heeli hatti, vo da hede Masra kom taki nanga hem hai na hai na hem jonge jari jete. We da tori Masra Jesus de leri wi toe, di a taki: Da soema, disi lobbi mi? mi Tata sa lobbi hem baka; en mi sa lobbi hem toe, mi sa meki hem hai kom krin, vo a sabi mi. (Joh. 14, v. 21.)
4. Disi Eli no ben loekoe dem pikien vo hem so, leki a ben fiti, a no ben hali dem jesi reti, te dem ben doe ogri, we dati ben tjari da heeli famili na ogri. Meki ala tata nanga mama nanga dem pikien toe teki wan waarskouwe na dati. Foeloe pikien de, disi, te dem tata nanga dem mama holi dem pikin tranga na ondro dwingi, meki dem no kan go wildri, dan dem no lobbi so, dem de loekoe dati vo wan hebi; ma tog bakatem te dem srefi kom na verstand, dan fosi dem si, a boen vo dem srefi, disi dem tata ben holi dem na hoso, meki dem no go leri ogri.
(1. Sam. Kap. 5 tee Kap. 12.)
Di dem Filistri ben winni da feti, disi dem pikien vo Israel kom feti nanga dem, en di dem ben poeloe da Verbond-kisi vo Masra toe na dem hanoe, tjari gowei, fosi dem teki da kisi, tjari go na Asdod, dapee dem ben habi wan bigi kroekoetoe-gado-popiki, disi dem kali Dagon; en reti na ini da heiden temple dem potti da santa kisi vo Jehova, klosibei na Dagon sei. Ma dei-broko mamantem, di dem soema vo Asdod wieki, dem finni Dagon lidom plata nanga bele na gron, reti na da Verbond-kisi fesi; en vo da hede dem go hopo hem hesi, potti hem baka na hem reti plesi. Ma dati no ben helpi dem wansani; dei-broko mamantem, di dem wieki, dem finni hem ageen lidom nanga bele na gron na da Verbond-kisi fesi, hem hede koti, nanga dem toe han vo hem, dem lidom dapee toe, reti na ini da temple-doro na tapo da postoe; noti ben libi vo da heeli Dagon, leki wan soso fisi-skin, bikasi da so dem ben wroko hem skin.
En buiti dati Masra gi dem soema vo Asdod wan toe tra strafoe moro, a meki so meni muisi-muisi kom pori ala dem njanjam na firi, so srefi ala soema na foto en na da heeli kondre rontoe kisi wan takroe blaazi-siki, disi gi dem toemoesi skin-hati, en foeloe soema kom dede srefi na ini da siki. We di dem soema vo Asdod si, dasani de waka so, dem taki, somtem da kisi vo da Israel-Gado doe dem ala da ogri; betre da kisi no tan na dem mindri. En vo da hede dem kali ala dem Filistri granman kom makandra, dem haksi dem, san vo doe nanga da kisi, bikasi dem no wani hem moro, a no kan tan na Dagon sei. Dem gran-soema taki: We poeloe hem dan, tjari hem go na Gad! En so djoesnoe dem go poeloe hem baka na ini Dagon hoso, dem tjari hem gowei. Ma so hesi da kisi doro na Gad nomo, da srefi strafoe vo Jehova kom kisi da srefi foto toe nanga da heeli buurti vo hem, en dati meki dem soema kom skreki so, tee dem alamal bari, taki: Wi no wani da kisi diaso, meki wi seni hem go na Ekron! Ma di a doro na Ekron, dem soema vo dapee bari so srefi toe, dem taki, dem no wani, da kisi moe kili dem ala, betre dem seni hem go baka na hem reti plesi. Bikasi liebi nanga dede-skreki kom kisi dem alamal, di dem si so meni dede nanga so meni siki, disi da kisi tjari kom na kondre.
We di da kisi vo Masra ben tan sebi moen langa na da kondre kaba, bikasi dem ben proberi na wan toe dri plesi vo potti hem, ma na ala foto, dapee dem ben potti hem, dem soema kom kisi da strafoe wanfasi -- we bakatem dem Filistri kali ala dem loekoeman nanga dem wintiman kom makandra, dem haksi dem, fa dem moe doe, vo seni da kisi go baka na hem kondre, sondro a kom doe dem wan ogri moro. Dem loekoeman taki, meki dem lai da kisi na wan njoe-njoe wagi, meki dem gi hem tin piesi goutoe na ini wan pikin doozoe, potti na da kisi sei, vo wan presenti. En dan dem moe teki toe kow, disi habi pikien na bobi, en disi no njoesoe da wroko jete, vo hali wagi, dem moe span dem na da wagi, jagi dem gowei, meki dem waka go na hoepee dem wani; ma dem pikien dem moe poeloe na dem sei, holi dem na hoso. We efi dan dem kow sa teki da pasi, waka go na Djoe-kondre sei, dan dem kan sabi troe, dati da Gado vo Israel ben doe dem ala da ogri; ma efi dem kow sa drai go na wan tra sei, dan dem kan sabi, a no da kisi ben doe dem dati, ma ala dasani ben kom so vo hem srefi.
We di dem Filistri seni dem kow gowei nanga da wagi, dem waka go reti na Djoe-kondre sei, en alwasi dem ben bari toemoesi vo dem pikien, tog dem no proberi vo drai baka go na hoso, ma dem waka da pasi reti hopo, tee dem doro na Djoe-kondre. En dem Filistri granman waka safri go na da kisi baka de loekoe, tee dem kisi da dam vo Betsemes. Da foto Betsemes ben de vo Kanaan-kondre kaba.
We di dem kow doro dedapee nanga da wagi, juisti da srefi joeroe dem soema vo Betsemes ben de na firi, vo koti areisi, en di dem si da kisi vo Masra kom baka, dem plisiri vo troe, dem djompo hesi go dapee. So srefi dem leviti kom toe, dem poeloe da kisi na da wagi, nanga da pikin doozoe toe, potti na wan bigi stoon tapo, disi ben de dapee; en dan dem trawan teki da wagi, dem pliti da hoedoe vo hem, meki faja, so srefi dem kili dem kow, bron dem vo wan ofrandi gi Masra. We dem Filistri granman, di dem si ala dasani farawei, bakatem dem drai baka go na hoso, na Ekron. Ma dem soema vo Betsemes, di dem jeri na ini foto, taki, da kisi kom, dem alamal ron go na da kisi hipi-hipi, dem ben de vyftig doezend soema, disi ben kom makandra dapee; en di dem no ben voorzigti nofo nanga da kisi, ma som vo dem soso-soema ben habi hatti vo hopo hem, loekoe sani de na ini, we vo da hede Gado meki vyftig doezend en sebitentin soema kom dede na da plesi wantem, meki dem trawan kisi respeki. En vo troe, dati gi ala dem soema vo Betsemes so wan frede en so wan skreki, tee dem seni haksi dem soema vo Kiriat Jearim, efi dem no wani kom teki da kisi vo Jehova, holi na dem foto. En djoesnoe dem soema vo Kiriat Jearim kom teki da kisi, dem tjari hem go na Gibea, potti na ini wan soema hoso, disi dem kali Aminadab, en dem meki hem pikien Eleasar loekoe da kisi.
We na dapee da santa Verbond-kisi vo Jehova ben tan twenti jari langa. En ala da tem dem Filistri no ben kaba, vo plage dem pikien vo Israel toemoesi, tee bakatem heeli Israel-kondre kom kre dem nootoe gi Masra, en nanga bigi sari dem plisi Jehova, vo a moe helpi dem baka. We da srefi tem Samuel hopo toe, a vermane dem tranga, a taki, efi dem wani drai kom na Jehova baka nanga dem heeli hatti, dan dem moe libi dem heiden-gado fosi, dem moe poeloe ala afgodery-wroko krin-krin na dem mindri, dem moe hopo dem hatti gi Jehova, dini hem wawan; dan troe-troe Gado sa helpi dem, a sa poeloe dem baka na dem Filistri ondro. We dem pikien vo Israel doe so, dem poeloe ala afgodery-sani na dem hoso en na ini dem hatti, dem kom dini Jehova wawan nanga dem heeli hatti.
Na baka Samuel kali heeli kondre kom makandra na Mizpa, vo dem begi na Masra, a meki dem holi wan tranga fasten dapee, bika dri heeli dei dem no njam wansani, ma kre wawan dem kre dem zondoe gi Masra, begi hem pardon. We da srefi tem Samuel teki da kroetoeman-wroko abra, vo tiri kondre leki hedeman; ma dem ben de jete na dem Filistri ondro.
We di dem Filistri kisi njoesoe vo dati, taki, heeli Israel-kondre kom makandra na Mizpa, dem taki, somtem dem wani meki oproeroe; en vo da hede dem Filistri hopo wantem go feti nanga dem, vo dwingi dem bitem, meki dem no proberi so wan sani. Ma so hesi dem pikien vo Israel jeri, dem Filistri de na pasi de kom, dem alamal kom frede toemoesi, en dem kre na Samuel, meki a begi Gado tranga gi dem, vo a kom helpi dem, poeloe dem na dem Filistri hanoe. We dati Samuel no mankeri toe, a meki wan aparti ofrandi ageen vo dati, a begi hem Gado toemoesi vo hem kondre, en Masra jeri da begi toe. Bika di dem Filistri kom doro klosibei dapee, juisti da srefi joeroe Masra meki wan bigi onweri hopo, da dondro bari so tranga, tee ala dem Filistri kom skreki toemoesi, dem no man vo feti moro; en na ini da skreki dem pikien vo Israel winni da feti, dem jagi dem vyanti gowei, tee na da srefi plesi, dapee dem Filistri ben teki da Verbond-kisi vo Masra wan twenti jari pasa, di dem ben feti da bigi feti makandra.
We na baka Samuel teki wan bigi stoon dapee, a hopo hem tanapoe vo wan gedagtenis reti-mindri vo Mizpa en vo Sen, en da stoon a kali Ebenezer , dati taki, wan helpi-stoon ; bika Samuel taki: Tee diaso Masra ben helpi wi. We da so Gado meki dem Filistri kisi pikin respeki vo hem, vo dem no kom trobi dem Israel-soema moro, so langa Samuel ben de na liebi. -- En Samuel tiri da kondre vo Masra heeli boen. Ibri jari wantron a ben lobbi waka rontoe, vo leri dem pikien vo Israel na Betel, na Gilgal en na Mizpa; en te soema ben habi wan trobi makandra, dan hem ben de da soema alatem, disi dem moe tjari da klagi gi, en disi ben koti da kroetoe gi dem. Ma hem vaste hoso ben de na Rama, dapee a ben meki wan altari toe gi Jehova; bikasi sinsi da Verbond-kisi komopo na Silo, dem no ben habi wan vaste plesi, vo dini Gado, en vo da hede Samuel meki dem kom dini Jehova na Rama toe wan heeli piesi tem. So srefi te a ben de na hoso, a ben teki soema toe, vo koti kroetoe gi dem.
Ma bakatem di Samuel kom na hem jari, en di hem srefi no ben man moro, vo loekoe so wan wroko, hem wawan, we dati meki a teki dem toe pikien vo hem, a seni dem go na Berseba, meki dem loekoe hem wroko dapee, vo di hem srefi no ben kan waka so farawei moro. Ma dem pikien ala toe no ben de so boen soema, leki da ouroe tata, en di dem ben gridi vo moni, dem lobbi vo teki toemoesi presenti na soema, en nofotron te wan kroetoe ben de vo koti, dem gi da soema reti, disi pai dem boen, alwasi a no ben habi reti.
We nanga dati no wan boen soema vo kondre ben kan tevrede, dati da troe; ma na plesi vo dem go begi da ouroe tata, meki a krasi dem pikien vo dati, ofoe meki a skiki dati, wantem ala dem hedeman vo kondre kom makandra, go na hem na Rama, dem taki: Joe no si? joe kom ouroe kaba, en dem pikien vo joe no doe dem wroko boen; betre joe gi wi wan koning, disi kan tiri wi kondre, en disi kan waka go na fesi, te wi go feti nanga trawan, so leki ala tra kondre habi dem koning toe.
We da taki no ben boen na Samuel kweti-kweti, disi dem kom soekoe wan koning; ma sondro a piki dem wan woortoe, a go kre dasani gi hem boen Gado. En Masra piki hem wantem, a taki: Joe si? da so dem maniri de, da so dem ben doe mi alatem sinsi mi poeloe dem na Egipti tee tidei, doro nomo dem ben libi mi, dem go dini kroekoetoe-gado; we da so dem doe joe toe noja. Ma vo taki reti, a no joe de da soema, disi dem no wani moro, ma da mi srefi, disi dem no wani, mi tan koning na dem tapo.
We joe kan doe dem dasani, disi dem de soekoe; ma tog go potti alasani na dem fesi fosi, fa da njoe koning sa handri dem; taki gi dem boen-boen, meki dem sabi na fesi.
En djoesnoe Samuel go taki ala dem woortoe vo Masra gi dem, a taki krin gi dem, fa da njoe koning sa trobi dem, fa a sa teki dem manpikien, meki dem tron soldati vo hem, trawan a sa teki vo hem foetoeboi, trawan vo djari-man, trawan vo koetsiri, trawan vo wroko na hem gron; so srefi dem oeman-pikien a sa teki toe, meki dem doe ibriwan wroko gi hem. En dem pranasi nanga dem droifi-djari a sa teki, gi na dem amtenari vo hem; so srefi vo ala dem meti a sa teki hem procenti toe, meki dem si, taki, dem habi wan koning na dem tapo. Ma dan dem no moe kom na Masra kom klagi, bikasi dem srefi ben wani so.
We di Samuel potti ala dati na dem fesi so, meki dem membre bitem, san dem doe, en meki dem poeloe dati na dem hede, tog no wan vo dem gi hem jesi, ma dem alamal taki: No no, wi moese habi wan koning na wi tapo, leki ala tra kondre habi, disi kan tiri wi kondre, en disi kan komanderi wi, te wi go feti nanga trawan. We di Samuel si, dem no wani teki hem vermane, a no piki dem noti moro, ma a go haksi hem Masra wantron moro, sani vo doe nanga dem, en Masra taki gi hem, meki a pramisi dem, dati dem sa kisi wan koning. We nanga da antwoortoe dem tevrede, en dem alamal gowei baka, ibriwan na hem hoso. En pikinso moro na baka Gado srefi kom sori Samuel da soema toe, di a moe teki, potti na dem tapo vo koning.
1. We da tori vo da kroekoetoe-gado-popiki Dagon, disi Jehova ben pori so krin-krin gi dem Filistri, dati de sori wi, fa wan popiki de wan soso-sani. (1. Kor. 8, v. 4.) Koning David habi reti vo troe, di a taki: Sjem moe kisi ala dem soema, disi go dini dem soso-popiki, en disi soekoe helpi na dem kroekoetoe-gado! (Psalm 97, v. 7.)
2. Da tori vo dem pikien vo Samuel, di dem no ben teki dem tata maniri, dati de wan tranga waarskouwe vo ala dem pikien, disi habi boen tata en mama, meki dem no geersi dem pikien vo Samuel toe. Bikasi efi boen bribi-soema pikien doe ogri, alwasi dem tata nanga mama ben vermane dem so meni, dem sa habi wan moro hebi verantwoortoe na dem tapo, leki soso kondre-soema pikien, disi no ben kisi so boen vermane.
3. Dem pikien vo Israel ben denki, te dem habi wan koning, dan fosi dem sa finni wan reti boen liebi. Ma juisti nanga dati dem ben hindre Gado, vo a no kan doe dem ala da boen, disi a ben wani doe dem, efi dem ben meki hem wawan tan koning na dem tapo. We da so a kom alatem, te wan soema libi Gado, soekoe helpi na soso liebi-soema.
Wan soema vo Benjamin famili, disi dem kali Kis, wan knapoe soema, a ben habi wan manpikien, disi dem kali Saul, wan jonge knapoe soema toe, en wan langa soema vo troe, a ben langa wan boen aiti duim pasa ala tra mansoema; en mooi? a ben mooi toe vo troe; na heeli kondre so wan mooi soema no ben de moro, leki hem. We wan dei di Kis no ben kan finni dem boeriki vo hem na sabana, a seni hem pikien Saul nanga wan knegti vo hem go soekoe dem boeriki, en di dem ben soekoe dem na ala plesi dri heeli dei, sondro dem kan finni dem, bakatem Saul taki gi hem knegti: Betre wi go baka na hoso, bika di wi tan so langa, somtem mi tata kom verlegi vo wi, moro leki vo dem boeriki. Ma di dem ben de so klosibei na Rama, dedapee Samuel ben liebi, da knegti taki: We meki wi go fosi na ini da foto, go haksi da soema vo Gado; da wan boen soema, somtem hem sa taki gi wi, hoepee wi kan finni dem. Saul taki: We a boen, meki wi go.
En di dem doro na Rama, dem miti wan toe dri oeman na pasi, dem haksi dem, hoepee da loekoeman de liebi; bikasi da so dem ben kali dem profeti vo Gado fositem, ma bakatem dem no kali dem so moro. We dem oeman taki gi dem, efi dem moese taki nanga Samuel, dan dem moe waka hesi, somtem dem sa finni hem na hoso jete; bika djoesnoe a sa go na doro na da altari, vo meki hem ofrandi. We di dem waka pikinso jete, nomo Samuel kom miti dem na strati, a ben de go na hem altari. Ma Gado ben waarskouwe Samuel na fesi kaba, a ben taki gi hem: Tamara mi sa seni wan soema vo Benjamin famili kom na joe, da hem joe moe teki, potti vo koning na mi kondre Israel. We so hesi Samuel kom si dem toe soema na strati, djoesnoe Masra piki hem ageen na ini hem hatti, a taki: Joe si? dati de da soema, di mi ben taki gi joe, da hem moe tiri mi kondre.
We ala dati Saul nanga hem knegti kom moro klosibei na Samuel, en di Saul no ben sabi hem, a haksi hem, hoepee da loekoeman de liebi. Samuel taki: Da mi srefi, di joe soekoe, we kom go nanga mi na da pikin bergi, tidei oen moe njam nanga mi; tamara mamantem mi sa piki joe dasani, di joe kom haksi mi. Ma vo dem boeriki, di joe lasi, joe no ha vo broko hede moro, dem finni dem kaba; ma joe nanga joe heeli famili sa finni wan moro bigi-sani jete, leki dati; da moro beste-sani, disi de na Israel, joe sa kisi. Saul haksi hem: Hoe-soortoe taki dati, di joe taki so gi mi? Mi no de vo Benjamin famili? da moro pikin famili, di de na heeli Israel-kondre? We fa joe kan taki so gi mi, meki spotoe?
Ma Samuel teki dem ala toe, a tjari dem go na da hoso, dapee a ben meki wan trakteri gi dem gran-soema vo Rama, a potti Saul sidom na hede-sei. En dan a gi hem koki ordre, meki a tjari da moro beste piesi meti kom na ini, di a ben taki gi hem tra-dei, vo a moe kibri hem so langa; en di koki tjari hem kom, djoesnoe Samuel presenteri gi Saul, a taki gi hem; Joe si? da joe porsie dati, di mi ben kibri vo joe expresi, bika mi ben sabi, joe sa kom. Na baka di dem komopo na tafra, Samuel tjari Saul go na hem hoso na ini foto, a go sidom taki tori nanga hem na zoldro, en na dapee a pingi hem da tori moro krin jete, taki, hem sa tron koning vo Israel.
We dei-broko mamantem Samuel go wieki Saul bitem, a taki: Hopo, meki mi kan seni joe gowei! En Samuel srefi tjari dem hafoe-pasi. Ma di dem kom tee na sabana-sei, Samuel meki Saul tan pikinso, meki hem knegti waka go na fesi, en dan Samuel teki wan batra oli, a kanti da oli na Saul hede tapo, a bosi hem, a taki: Joe si? now joe kisi da blesi vo Masra, a potti joe vo hedeman na hem kondre. We mi sa gi joe wan toe dri marki jete, vo joe kan si, mi no holi joe vo spotoe. Te joe komopo diaso, joe kisi da plesi, dapee Rahel beri, reti na da plesi joe sa miti toe soema, disi sa verteli joe, taki, joe tata finni dem boeriki kaba, ma now a de toemoesi verlegi vo joe, di joe tan so langa. Na baka joe sa miti dri tra soema ageen na wan tra plesi, dem sa taki joe odi, haksi, fa joe tan, en dem sa gi joe toe brede vo njam. Te joe komopo dedapee go moro na fesi, dan joe sa si wan hipi soema kom miti joe nanga poukoe en nanga floiti en nanga harpoe, dem sa pre psalm, en klosibei na dem baka wan hipi profeti sa kom, singi dem profeti-singi. We so hesi joe sa jeri dati, nomo da Jeje vo Masra sa kisi joe, a sa meki joe kan moksi toe na ini dem profeti-singi, en sinsi da joeroe joe sa verandre, tee joe tron wan heeli tra soema.
We di Saul komopo na Samuel, Masra gi hem wan tra hatti wantem, en da srefi dei a kom si ala dem marki so, leki Samuel ben taki gi hem. Ma vooral di a kom miti dem profeti na pasi, djoesnoe da Jeje vo Gado teki hem, meki a moksi na ini dem singi, tee a bigin vo taki profeti-tori toe. En dati meki ala dem soema, disi ben sabi hem fosi, en disi kom si hem noja, dem verwondroe vo troe, dem taki: Sani pasa nanga da pikien vo Kis? Hoefasi, Saul da wan profeti toe? We sinsi da tem dem ben holi da taki; te wan soema sori moro koni, leki trawan ben verwakti, dan dem taki alatem: Hoefasi, Saul da wan profeti toe?
Ma di Saul nanga hem knegti doro na hoso, hem oom haksi hem, hoepee dem tan so langa. Saul taki: A no dem boeriki wi ben soekoe? En di wi no kan finni dem, wi go haksi Samuel. Hem oom taki: We sani Samuel taki gi oenoe? Saul taki: We, vo dem boeriki a taki gi wi, dati dem finni dem kaba. Ma da tra tori, disi Samuel ben taki gi Saul, vo dati Saul no pingi hem oom noti jete, tee wan toe dri dei moro na baka Samuel srefi meki heeli kondre kom makandra na Mizpa na tapo da bergi, dapee da Verbond-hoso vo Masra ben de, en dapee a ben meki Saul kom na fesi kaba, bifo dem trawan.
We di dem alamal ben de makandra dapee, Samuel bigin vo taki nanga dem, a potti alasani na dem fesi, fa Jehova srefi ben poeloe dem na Egipti-kondre en na ala dem koning ondro, disi ben trobi dem, en fa a ben loekoe dem so boen tee tidei, ma now di da tiri vo Masra no boen na dem moro, dem taki, dem moese habi wan koning na dem tapo: we meki dem alamal drifi kom dan na Masra fesi wan-wan, meki dem hiti doblo, vo si, hoesoema Masra wani, dem moe potti vo koning. We di dem hiti da doblo, fosi Masra sori dem da famili vo Benjamin, en na baka na ini da famili da kroboi-lot fadom na Saul, da pikien vo Kis. Ma di Saul no ben wani, dem moe taki, hem srefi ben soekoe da bigi, vo da hede a ben go kibri na baka dem wagi, meki dem no si hem. We di dem no kan finni hem dedapee, dem haksi Masra wantron moro, hoepee dem moe soekoe da soema; en Masra taki gi dem, da soema de kaba, a go kibri na mindri dem wagi. En djoesnoe dem djompo go teki hem, dem tjari hem kom, en Samuel presenteri hem gi ala dem foeloe soema, a taki: Oen si? dati de da soema, di Gado gi oen vo koning, wan mooi soema vo troe! En di dem si hem, da heeli kondre kom plisiri vo hem, dem alamal bari taki: Da koning moe de liebi!
Na baka Samuel seni dem alamal go baka na hoso. So srefi Saul gowei toe, en foeloe vo dem boen soema waka go nanga hem, feliciteri hem; ma som vo dem ogri soema meki spotoe nanga hem, dem taki, sani so wan soema sa helpi dem, en vo da hede dem no go feliciteri hem toe. Ma Saul doe, leki hem no jeri dati. Bikasi datem Saul ben de wan soema jete, disi no sabi bigi membre, en di Samuel no ben bedanki hem kroetoeman-wroko jete, vo da hede Saul ben loekoe hem srefi vo wan bigi ofciri soso, en so langa no wan feti ben hopo, a ben tan na hem tata hoso de loekoe hem wroko.
We da tem koning Nahas vo Ammon-kondre ben trobi da foto Jabes na Gilead-kondre toemoesi nanga feti, en di bakatem hangri kom moro dem soema na ini foto, dem taki, dem sa gi hem da foto abra, efi hem sa pramisi dem, dati hem no sa doe dem ogri. Ma da koning seni taki gi dem, hem no sa doe dem wan ogri, buiti a sa teki wan nefi, poeloe ibriwan soema hem reti hai, meki dem habi wan marki. Ma nanga foeloe begi dem gran-soema vo da foto kisi hem so fara, tee a gi dem wan wieki tem jete, meki dem si, efi dem kan finni soema vo helpi dem. We da so dem seni wan expresi boodskopoe go na da foto Gibea, dapee Saul ben de liebi, meki dem kre dem nootoe dapee, en di dem boodskopoe-man verteli ala dem tori gi dem soema vo Gibea, fa da ogri koning Nahas mishandri dem, dati meki dem alamal kisi wan toemoesi sari vo dem poti soema vo Jabes. Ala dati Saul komopo toe na hem gron, a haksi, sani dem soema de kre so, en di a jeri da tori na strati, djoesnoe da Jeje vo Gado kom naki hem hatti so tee a teki dem toe kow vo hem, a kapoe dem na piesi-piesi, en dan a seni dem piesi meti na heeli Israel-kondre rontoe, a seni waarskouwe ala soema, meki dem kom hesi kom na feti, en da soema, disi no wani waka go na Saul en na Samuel baka, kom na feti, a sa meki dem kapoe da soema kow so srefi na piesi-piesi, leki dem si dem piesi meti de.
We dati meki wan frede vo Masra kom kisi heeli Israel-kondre, en wantem dri-hondro nanga dritentin doezend soema kom makandra na Saul, dem go feti wan bigi feti nanga dem Ammonitri, dem fom dem so, tee baka-dina no wan vyanti ben de moro, hafoe dem ben kili, en hafoe ben teki pasi de ron. We di Saul ben winni da fosi feti vo hem so boen, dati meki dem Israel-soema kom na Samuel, dem taki, meki dem go kili dem ogri soema toe wantem, disi ben kosi Saul tra-dei, en disi no ben wani hem vo dem koning. Ma Saul taki: No no, tidei no wan soema moe dede, di Masra ben helpi wi so wan bigi helpi tidei, dati mi no wani.
Ma Samuel seni kali ala soema kom makandra na Gilgal, vo dem potti Saul vo vaste na hem koning-wroko, en di dem kaba nanga dati na baka dem meki dem ofrandi, vo taki Masra tangi, en Saul nanga heeli Israel-kondre plisiri toemoesi makandra dapee. Ma Samuel bedanki hem kroetoeman-wroko wantem, en da srefi okasi a teki toe, vo gi dem alamal publiki verantwoortoe, fa a ben doe hem wroko na dem mindri, a taki: Oen si? mi doe oen dasani, disi oen wani, mi potti wan koning na oen tapo noja. Ma mi haksi oen, diaso na Masra fesi srefi: Oen kan taki, mi ben doe wan soema kroekoetoe? mi ben teki wan soema kow, efi boeriki? Mi ben sori wan masra-fasi na oen tapo? mi ben trobi oenoe? Mi ben meki wan soema blindi mi hai nanga soso presenti? Tog oen alamal sabi mi; piki mi dan! Efi wan soema de, disi kan taki, mi ben teki wan presenti vo hem, mi sa gi hem baka wantem. Ma dem alamal taki: No no, wi no kan lei, joe no ben doe wan soema kroekoetoe, joe no ben trobi wi, en nooiti joe ben teki presenti toe. En Samuel taki: We Masra srefi de mi getuige.
Na baka Samuel bigin vo teki ala da boen vo Masra, potti na dem fesi, alasani disi Jehova ben doe dem sinsi dem komopo na Egipti tee tidei, fa a ben helpi dem alatem, meki dem kan liebi so switi na hem ondro. Ma nanga ala dati so hesi dem ben si da Ammonitri-koning de kom, djoesnoe dem ben wani wan koning toe, dem no tevrede moro nanga da tiri, disi Jehova srefi ben tiri dem, leki dem koning. En Samuel taki: We, now Gado gi oen wan koning, so leki oen ben wani; teki hem de! Ma loekoe boen, vo oen no libi Jehova, oen Gado, oenoe nanga da koning vo oenoe! Efi oen no harki hem, dan hem srefi sa hopo vo feti nanga oenoe, so leki a ben doe nanga dem tata vo oen toe.
Ma di Samuel si, na ini da bigi plisiri da vermane vo hem no go so reti na dem hatti jete, vo da hede a begi Gado na dem fesi srefi, vo a moe doe wan wonder-wroko na dem fesi dapee, meki dem kom si, troe-troe da wan bigi ogri na Gado hai, disi dem ben soekoe wan koning na dem tapo. En di Samuel begi da begi so, da srefi dei Masra meki wan bigi onweri hopo nanga wan toemoesi tranga areen, alwasi a ben de na bigi dre-tem, en dati meki dem alamal kom frede so, tee dem plisi Samuel, vo a begi Gado gi dem, vo a no moe kili dem wantem, dem bekenti, dem no ben doe reti, en buiti ala tra ogri, di dem doe kaba, dem potti da ogri na tapo jete, disi dem ben soekoe wan koning.
Samuel taki: We meki oen hatti kouroe dan! Ma loekoe boen, vo oen no doe ogri moro. Efi oen sa dini Jehova noja nanga oen heeli hatti, sondro oen libi hem baka, dan hem no sa libi oenoe toe; bikasi hem srefi ben teki oenoe vo hem kondre nanga hem fri wani, vo hem boen hatti soso. Ma vo mi perzon? mi no sa kaba vo begi Gado gi oen alatem, en vo leri oen da boen pasi, da reti hopo pasi, di oen moe waka.
1. So hesi Gado ben potti Saul na koning, djoesnoe a gi hem wan tra hatti toe, vo a kan doe hem wroko reti. We wi alamal habi wan bigi wroko toe vo doe; wi moe soekoe, vo wi kom na Gado-kondre. En vo da hede wi moe begi Masra toe, vo a gi wi wan njoe hatti. (Psalm 51, v. 12.)
2. Samuel ben de wan boen profet vo Masra troe, bika so langa a ben de na hem wroko, a ben doe hem pligti toemoesi boen; en na baka srefi, di a bedanki hem wroko, a no kaba jete, vo begi gi dem pikien vo Israel en vo leri dem. We efi wi habi boen leriman, disi sori wi da pasi vo Masra reti, dan wi moe taki Gado tangi vo dati, en wi moe doe so toe, leki dem vermane wi! -
(1. Sam. Kap. 13 tee Kap. 16.)
Da fosi jari, disi Saul ben de na hem koning-wroko, a ben holi hem srefi heeli boen, so langa a ben meki da boen Jeje vo Gado kan tiri hem; ma toe jari na baka nomo a kom kisi hei membre kaba, en dati meki a teki toe doezend soema vo dem Israel-soldati, di ben kom na da bigi feti na Jabes en disi ben tan nanga hem wan jari jete na Gilgal, a holi dem, meki dem tan klosibei nanga hem alatem vo hem eigen soldati, na plesi vo a seni dem alamal go baka na hoso so langa, tee wan feti sa hopo. Ma dati Saul ben doe vo bigi soso, vo dem soldati kan koiri na hem doro, meki parade gi hem, en vo heeli kondre moe si, hem da koning. So srefi a teki wan doezend soldati moro, gi na hem pikien Jonatan, vo hem prins moe habi hem eigen soldati toe, disi tan nanga hem alatem.
We di Jonatan ben de wan jonge knapoe soema, disi no sabi frede, wan dei a go teki hem soldati, a go feti nanga dem Filistri na wan soldati-postoe vo dem, disi ben de na tapo wan bergi, en a winni dem toe, tee a kili ala dem soldati vo da postoe. Ma di dem tra Filistri jeri dati, djoesnoe dem bari ala dem soldati kom makandra, vo go feti nanga Israel. Ma so srefi Saul no sidom soso toe, bika di a ben verwakti dati so, a ben meki dem blo dem feti-trompeti na heeli kondre, vo meki ala hem soldati kom makandra na Gilgal, holi dem srefi klari dapee. Bikasi datem di dem ben potti Saul vo koning, Samuel ben taki expresi gi hem, dati alatem te wan bigi wroko de vo doe na kondre, fosi Saul moe kom na Gilgal, wakti hem dapee sebi dei langa, vo hem kan haksi Gado gi hem, san a moe doe. We dati no ben de so toemoesi switi na Saul, disi Samuel moe tan, leki hem voogtoe, en disi hem srefi no habi magti alatem, vo doe san disi hem wani; ma tog vo dem tra soema hede helpi no de, a moese go dapee, doe hem pligti. Ma di a ben wakti da profet siksi dei kaba na Gilgal, en di na da sebi dei dem soldati vo hem go panja na mindri dem bigi stoon, vo di Samuel ben drai pikin langa vo kom, we dati meki a kom verfeeli Saul toe, a taki, hem no kan wakti Samuel moro, betre dem tjari dem meti kom gi hem wantem, hem srefi sa meki dem ofrandi na plesi vo Samuel. Ma nanga dati Saul ben sori Jehova wan bigi afrontoe, disi a meki hem srefi vo domine, sondro Masra ben potti hem na so wan wroko.
We pikin-moro Saul no kaba jete nanga dem ofrandi, ofoe Samuel srefi doro dapee toe, en so hesi Saul si da profet nomo, a djompo go miti hem hafoe-pasi, a ontvanga hem nanga respeki, a doe, leki hem srefi blyti, vo si hem. Ma di Samuel haksi hem vo dasani, di a doe, na plesi vo a bekenti hem zondoe, a taki, hem no kan helpi, hem drai langa nofo, bifo a go meki dem ofrandi; ma di a no ben sabi, efi Samuel sa kom jete, en di a ben si, dem soldati vo hem go panja, en di dem Filistri doro tee na Mikmas kaba, dati ben meki hem frede, somtem dem kan doro tee na Gilgal srefi, bifo hem begi Gado, vo a moe helpi hem; dati wawan ben meki hem doe so.
Ma Samuel no jeri na dati, a taki: No no, dati joe no ben doe boen kweti-kweti, nanga dati joe ben pasa joe Gado mofo toemoesi grofoe. Joe si? efi joe ben respeki joe Gado so, leki a fiti, a ben sa meki joe tan koning tee vo alatem, ma so leki joe de, a no kan gebruiki joe; Jehova wani wan soema, disi lobbi hem, en disi doe hem wani; ma dati joe no ben doe, en vo da hede a sa loekoe wan trawan, potti vo koning na hem kondre.
Ma Saul no teki dati vo wan reti hebi; kontrari, a libi Samuel soso, sondro a bekenti hem ogri, en sondro a begi hem, vo a haksi Gado moro gi hem, san a moe doe now; ma a teki dem siksi hondro soldati makandra, disi ben fika nanga hem jete, nanga di vo hem pikien Jonatan toe, a go meki hem kampoe na Gibea-Benjamin. Ma dem Filistri ben de na dem kampoe na Mikmas jete, dem ben habi dritentin doezend feti-wagi, nanga siksi doezend hasi, nanga so meni soldati, tee dem no kan teli dem srefi. We ala dem foeloe doezend soldati dem platie na dri bigi hipi, en ibriwan hipi dem seni aparti, meki dem go panja, pori heeli Israel-kondre.
Ma datem dem Israel-soema ben de na wan bigi verlegi, vo di dem no ben habi wan smeti, disi kan meki lanza nanga houroe gi dem; bikasi ala dem fotentin jari, disi dem Filistri ben de masra vo kondre, dem no ben permiteri no wan smeti-basi moro, vo hopo wan wroko-plesi, vo a wroko, no na heeli Israel-kondre; ma ala isri-sani, di dem moe habi, dem ben verpligti, vo go bai na dem Filistri-soema srefi; en now, di dem wani go feti nanga dem, no wan vo dem Israel-soldati ben habi wan lanza efi houroe na hem hanoe, buiti Saul nanga Jonatan, dem wawan ben habi.
We di dem ben de nanga da verlegi so, bika aladei dem Filistri kom moro klosibei, dem pasa Mikmas kaba, wan dei Jonatan, da pikien vo Saul, taki gi hem adjoedant: Kom meki wi go na da wakti-postoe vo dem Filistri jandaso, go feti nanga dem, somtem Masra sa helpi wi, vo wi kan winni dem; bikasi a no hebi na wi Gado, vo helpi wi, efi foeloe soema de go na feti, efi weiniki de go, dati da wan. We da so hem nanga hem adjoedant gowei, sondro hem tata ben sabi; bikasi Saul nanga dem soldati vo hem ben de na wan tra plesi. Ma di dem ala toe doro klosibei na da fosi wakti-postoe, tee dem vyanti kom si dem, djoesnoe dem Filistri bigin meki spot nanga dem, dem taki: Loekoe, dem djoe komopo na ini dem horo, dedapee dem ben kibri so langa! En dem soldati vo da postoe bari Jonatan nanga hem adjoedant, dem taki: A boen, kom dan, wi sa sori oenoe! Ma Jonatan nanga hem adjoedant no jeri na dati, dem klim hesi tee na tapo da bergi, dapee da postoe ben de, en na da wan plesi dem kili twenti soema wantem; bikasi di dem Filistri no ben verwakti, dati Jonatan sa doro so hesi na dem tapo, dati meki dem kom skreki so, tee dem befi, dem no sabi, sani dati. En no dem soldati vo da postoe wawan, ma ala dem patroeli toe, disi ben waka panja na kondre, en da heeli Filistri kampoe kom kisi da srefi frede, dem alamal bigin vo befi, sondro dem srefi sabi, sani doe dem.
We di Saul kom jeri da tori toe na hem kibri-plesi, fa ala dem Filistri kom broeja na ondro makandra, dati gi hem hatti, vo a kali ala hem soldati kom hesi makandra, a seni dem go feti na dem Filistri baka wantem, en Masra kom helpi Israel da srefi dei, tee dem jagi dem vyanti go farawei. Ma Saul trobi dem soldati vo hem onnoodiki, bika di a si, dasani de waka so boen, vo da hede a gi dem tranga ordre, a sweri srefi, a taki, no wan soema moese teki wan njanjam, potti na hem mofo, bifo neti, bifo hem poeloe hem hattibron na dem tapo boen-boen. We vo da hede dem no ben habi hatti toe, vo tesi wan piesi brede srefi; en alwasi dem ben de na wan boesi, dapee foeloe honi de, tog no wan vo dem dipi wan finga srefi na ini da honi, vo nati hem neki pikinso; bikasi dem alamal ben frede Saul toemoesi.
Ma Jonatan, di no ben sabi noti vo da sweri, disi hem tata ben sweri so, hem dipi hem tiki na ini da honi, potti na hem mofo, en dati meki hem hai kom krin baka, bika dem alamal ben weri vo troe. Ma wan tra soldati, disi si dati, hem go verteli Jonatan vo da sweri, disi hem tata ben sweri, taki, no wan soema moe njam wansani bifo neti, en juisti dati meki dem alamal kom zwaki so, tee pikin-moro dem flauw. Jonatan taki: No no, dati mi tata no doe boen; loekoe, fa mi hai krin, disi mi tesi da pikin honi nomo. We efi dem soldati alamal ben habi pasi, vo njam wansani tidei, dem ben kan jagi dem Filistri moro farawei srefi.
Ma di dem winni dem vyanti so fara kaba, na sabatem Saul meki dem alamal go sidom njam wansani, en dan a taki, betre dem go feti na dem Filistri baka wantem da heeli neti doro tee dei-broko, meki no wan soema vo dem vyanti libi abra moro. We dem soldati vo hem tevrede so, ma domine Ahia, hem taki, no no, dem moe haksi Gado fosi, efi hem tevrede toe. We di Saul go doe dati, Masra no piki hem da srefi dei, en nanga dati a kom sabi wantem, Gado habi wansani nanga dem vo mandi. Ma na plesi vo a soekoe da skulti na hem srefi, di a ben sweri da onnoodiki sweri, a go soekoe da foutoe na hem pikien Jonatan wawan, a meki trobi nanga hem, a taki: Bekenti mi, sani joe doe! Jonatan taki: Mi no doe wansani, leki wan pikin honi soso mi tesi; we dati de so wan bigi ogri dan? Saul taki: Ja, mi sweri vo Gado, joe moese dede! Ma dem tra Israel-soema, di dem jeri dati, dem alamal bari, dem taki: No no, Gado kibri wi! Jonatan no moese dede; no wan wiwiri srefi vo hem moese fadom na gron; bikasi hem wawan de da soema, disi Gado ben gi wi tidei, vo a helpi wi so wan bigi helpi. We da so Saul libi hem, en dem Filistri a libi toe vo da leisi, a no feti moro na dem baka.
Ma di Saul ben kom so wan bigi koning now, dati meki a go feti nanga ala hem vyanti na hem heeli buurti, vo taki, nanga Moab-kondre en nanga Ammon en nanga Edom, en nanga dem koning vo Zoba na Siria-kondre, en vooral nanga dem Filistri toe. Vo feti nanga dem tra kondre? dati wawan ben de hem wroko ala dem fotentin jari, di a ben de koning vo Israel-kondre; en na ala plesi, dapee a ben go, a ben doe ogri toe. Bikasi di a ben kisi hei membre, dati meki hem hatti no ben krin moro, vo dini hem Gado reti. Vo da Verbond-kisi a no ben habi respeki moro, en vo da santa leri-boekoe vo Masra a no ben ke toe (1. Kron. 11, v. 3.); ma dasani, disi ben boen na hem, dati wawan a ben doe, so leki wi kan si dati na ini dem Psalm vo David. Ma di a ben de so wan boen fetiman, en di Gado ben wani, Israel moe tron wan fri kondre baka, vo dati hede wawan a ben holi da pasiensi nanga Saul so meni jari, a meki a winni ala hem vyanti.
We na baka di Saul klari so fara, Masra seni Samuel go na hem, a gi hem ordre, meki a go feti nanga dem soema vo Amalek toe, meki a pori da heeli kondre vo dem, tee noti vo dem libi abra, meki a kili ala soema, man nanga oeman nanga pikien, tee dem pikien na bobi srefi, nanga dem kow nanga skapoe nanga kameli nanga boeriki nanga ala alasani vo dem. Bikasi Gado ben pramisi dem soema vo Amalek granwei kaba, dati hem sa poeloe dem krin-krin na grontapo vo ala da ogri, disi dem ben doe dem pikien vo Israel, sinsi dem komopo na Egipti tee tidei (2. Mos. Kap. 17, v 14.), en now da joeroe vo dem kisi, vo dem moe kisi dem strafoe baka.
We djoesnoe Saul komanderi dem soldati vo hem, a go feti nanga dem soema vo Amalek tee a kili ala soema vo dem; buiti da koning vo dem, disi dem kali Agag, hem dati a kisi liebi-liebi, en a no kili hem. So srefi a hati hem toe vo so meni mooi skapoe nanga kow, di a si dapee, en vo da hede a teki dem moro bestewan, kibri vo hem; ma dem mangriwan nanga dem malengriwan, dati wawan a taki, dem moe kili. We da srefi neti Masra kom na Samuel, a taki gi hem. A hati mi vo troe, disi mi ben potti Saul vo koning, bikasi a libi mi krin-krin, a no respeki mi woortoe moro. We di Samuel jeri so, dati hati hem toemoesi, en a kre na Masra da heeli neti doro. Ma dei-broko mamantem Samuel kisi njoesoe, dati Saul go na Karmel, a hopo wan mooi flagra vo hem dapee, meki ala soema kan si, hem winni da feti. We di Samuel kom na hem dapee, vo krasi hem na nem vo Masra, Saul ben de so asranti jete, vo a go miti da profet, a meki lei gi hem, a taki: Odi odi, mi lobbi Samuel! Joe si? mi doe mi wroko kaba, di Masra ben gi mi vo doe. Samuel taki: So? Ma hoe babari dati, di mi jeri? A tan na mi jesi, leki mi jeri skapoe nanga kow de bari. Saul taki: Dati da dem meti vo dem Amalekitri, di wi tjari kom de, dem moro beste skapoe nanga kow; bika dem soldati vo mi no ben wani kili dem, dem taki, betre wi tjari dem go, potti vo wan ofrandi gi Jehova; ma ala dem trawan wi ben kili.
Ma Samuel taki gi hem: Tan tiri, bika mi ha wan boodskopoe vo joe, di Masra ben gi mi di neti. Hoefasi, a no so a de? Datem joe ben habi wan saka-fasi jete, Masra ben hopo joe, potti joe vo koning na Israel-kondre? We vo san hede joe no kan harki hem noja, di a seni joe da boodskopoe, vo joe go kili ala dem ogri soema vo Amalek? Vo san hede joe moe doro na ini da kondre, leki wan foefoeroeman, teki sani, tjari gowei? Dati no boen na Masra kweti-kweti. Saul taki: We mi no ben harki Masra dan? Mi no ben go, dapee a ben seni mi? Mi no tjari da koning vo da kondre kom dia? En ala dem tra soema mi no kili? We disi dem soldati teki hafoe vo dem mooi fatoe skapoe en vo dem kow, tjari kom na Gilgal, a no vo meki wan ofrandi gi Jehova, joe Gado?
Samuel taki: Go vo joe nanga joe ofrandi! Joe denki, Masra de loekoe na dem ofrandi moro leki na soema hatti? Joe no sabi, gehoorzam dati moro betre, leki ala ofrandi? Ma te joe ongehoorzam na Gado, dati de so wan srefi zondoe, leki joe doe wan tofroe-wroko; en te joe sori tranga hai na Gado, dati de net so, leki joe doe wan afgodery-wroko. We di joe no wani jeri Masra mofo moro, vo da hede hem no wani joe toe moro, vo joe tan koning. Saul taki: Ja, mi doe ogri troe, disi mi ben pasa da ordre vo Masra, nanga joe woortoe toe, ma di mi ben frede dem soldati vo mi, dati wawan meki mi ben doe so. We gran-tangi, mi begi joe, pardon mi vo da ogri, en kom go nanga mi na Gilgal, meki mi kan begi Jehova toe dapee! Ma Samuel taki: No no, mi no de go nanga joe; bika di joe no wani jeri Masra mofo, vo da hede Masra no wani joe toe, vo joe tan koning na Israel; ma a sa go teki wan trawan, disi moro betre, leki joe, meki hem koning. Dasani disi Jehova taki, dati a no kan kenki, bikasi hem no de leki wan liebi-soema, disi wansani, di a taki, sa hati hem, vo a kenki hem baka.
Ma di Saul begi Samuel wantron moro, a bekenti gi hem, a taki: Ja mi doe da ogri troe, ma gran-tangi! no gi mi da sjem so publiki na ala soema hai, vo ala dem gran-soema vo mi kondre moe si, joe no respeki mi moro; kom waka go nanga mi, meki mi kan begi Jehova, joe Gado! We na baka Samuel doe hem da plisiri, a waka go nanga hem na Gilgal, en Saul doe hem gebed dapee. Ma ala dati Saul hatti ben falsi jete, bika da zondoe vo hem no ben hati hem, ma da sjem, disi Masra wani poeloe hem na koning, dati wawan ben hati hem.
We di Samuel ben de dapee jete na Gilgal, a seni teki da Amalekitri-koning Agag kom, meki hem kisi hem strafoe toe, so leki hem heeli kondre kisi kaba. Ma di dem soema tjari hem kom, da ogri koning Agag meki spotoe jete na Samuel fesi, a taki: Da so joe moe doe, vo meki dede no hati joe! Ma Samuel taki gi hem: A boen, so leki joe houroe ben kili so meni soema, so srefi houroe sa kili joe baka. En wantem Samuel go kili hem, a koti hem na piesi-piesi, na Masra fesi srefi na Gilgal. Na baka Samuel drai baka go na Rama, en Saul go vo hem na Gibea, dapee a ben habi hem koning-hoso. We sinsi datem Samuel no ben go na Saul moro, hem hai no si hem moro nooiti wantem; bikasi dem maniri vo Saul no ben boen na Samuel kweti-kweti, a ben kre vo hem reti-reti. So srefi Saul no go haksi Samuel wansani moro, a ben boen na hem srefi, disi da ouroe profet no kom lastiki hem moro.
Ma di Samuel ben de nanga da sari so vo Saul hede, bika a ben hati hem vo troe, disi Saul tron so wan ogri soema, wan dei Masra kom na hem, a taki: Hoe langa joe de kre vo Saul? Meki joe hatti kouroe. Mi no taki gi joe kaba, dati mi no wani hem moro, a no sa tan na koning? We teki joe batra, foeloe hem nanga oli, en go na Betlehem, na wan soema, disi dem kali Isai , hem habi aiti pikien! we wan vo dem pikien mi wani, vo a tron koning vo mi kondre. Samuel taki: Ma fa mi sa doe, vo go dapee? Te Saul jeri dati, a no sa kom kili mi? Masra taki: We teki wan jonge kow, tjari go na Betlehem, taki, joe wani meki wan ofrandi gi mi dapee. En te joe verzoekoe Isai nanga hem pikien, vo dem kom njam nanga joe, dan mi sa sori joe da soema, di joe moe teki, wye hem gi mi.
We Samuel doe so, leki hem Masra taki gi hem, a go meki da ofrandi-trakteri na Betlehem, a kali foeloe soema vo kom njam nanga hem, en Isai nanga dem pikien vo hem ben de na ini dem soema toe, di a ben verzoekoe. We di da famili vo Isai kom na ini da trakteri-kamera, en di Samuel loekoe da moro bigiwan vo dem pikien, hem hatti taki gi hem, somtem dati de da soema, di Masra wani, vo a kom koning. Ma Masra taki gi Samuel: Joe no moe loekoe na da bigi vo hem, a no disia mi wani. Liebi-soema de loekoe na sani, disi dem hai de si, ma Jehova de loekoe na soema hatti!
Na baka di dem komopo na tafra, Samuel meki Isai kali ala dem tra pikien vo hem kom na hem fesi wan-wan na baka makandra, ma da reti jonkman, disi Masra wani, hem no ben de na ini. We vo da hede Samuel haksi Isai, efi dati da ala hem pikien, en Isai taki: No no, wan de jete, da pikin-wan, ma dati de na sabana de loekoe skapoe. Samuel taki: We seni kali hem wantem, bika mi moese si hem! En so djoesnoe Isai seni teki hem, en di Samuel si da pikien, hem hatti kom lobbi hem wantem; bikasi David ben de wan mooi jonkman, en a ben habi mooi hai vo troe. We da srefi momenti Masra kom naki Samuel hatti toe, a taki, meki a wye hem wantem, bikasi dati de da soema, di hem wani. En Samuel poeloe hem oli-batra, a kanti na David hede, a blesi hem na mindri vo ala dem tra brara vo hem; en da srefi dei da Jeje vo Masra kom kisi David, a no libi hem moro. Na baka Samuel taki dem adjosi so langa, a go baka vo hem na Rama.
Ma Saul? Poti! di hem no ben jeri hem Gado moro, dati ben tjari hem so fara, tee bakatem da boen Jeje vo Gado libi hem krin-krin, a no kom na hem moro, en na plesi vo dati Masra meki wan ogri jeje kom trobi hem konsiensi toemoesi; bika hem srefi fili boen-boen, Gado libi hem noja, en dati meki da liebi vo hem kom verfeeli hem so, tee dem amtenari vo kondre kom frede vo hem, dem taki, somtem a kan lasi hem verstand srefi. We vo da hede dem go haksi hem wan dei, efi a no wani, dem go loekoe wan soema gi hem, disi sabi vo pre harpoe, dan alatem te dasani kom trobi hem ageen, da soema kan kom hesi, meki muziki gi hem, dati sa meki a kom geruste baka.
Saul taki: We a boen, go loekoe so wan soema gi mi, tjari hem kom! Ma wan vo dem piki hem wantem, a taki: Mi sabi so wan soema na Betlehem, disi sabi vo pre harpoe mooi, da wan pikien vo Isai, wan boen soema vo troe, en a habi man-hatti toe; efi koning wani teki hem na diensti, a sa de wan bekwaam soldati, bikasi a sabi maniri, en a mooi toe; joe kan si, Gado srefi de nanga hem.
We dati boen na Saul vo jeri, en djoesnoe a seni wan boodskopoe go na Isai, a seni taki gi hem, meki a seni hem pikien David kom na koning, da pikinwan, disi de loekoe skapoe. En Isai kali David kom na hoso, a seni hem go na koning, en di Saul si da jonkman, fa a mooi, hem hatti kom lobbi hem wantem, a teki hem vo hem adjoedant. Datem David ben ouroe omtrenti tin na feifi jari. We alatem te da ogri jeje kom trobi Saul ageen, dan David ben teki hem harpoe, pre gi Saul, bika dati meki Saul hatti kom kouroe baka, da ogri jeje libi hem vo wan piesi tem, en vo da hede bakatem, di wan feti hopo ageen, a bedanki David so langa, meki a go baka na hoso, loekoe hem skapoe.
1. We da tori vo Saul, disi a ben denki, efi a harki hem Gado hafoe-hafoe nomo, dan a doe hem pligti kaba, en disi juisti vo dati hede Gado no ben kan gebruiki hem moro, dati de sori wi, fa Masra de loekoe dati tee tidei jete, efi wan soema taki, hafoe hem sa doe Gado wani, en hafoe a sa doe hem eigen wani. So wan soema Gado no kan gebruiki na hem kondre, bika da soema srefi no sabi, san a wani. Wi no kan dini toe masra makandra. (Matt. 6, v. 24.)
2. Di Samuel ben de na Betlehem, loekoe dem pikien vo Isai, Gado taki gi hem: Liebi-soema de loekoe na sani, disi dem hai de si, ma Gado de loekoe na soema hatti; en di David ben lobbi hem Gado nanga hem heeli hatti, dati meki Masra teki hem vo koning na hem kondre, alwasi a ben de wan skapoe-herder soso. We dati de sori wi, fa ala mooi-mooi nanga ala goedoe nanga ala bigi vo grontapo no kan gi wi wan waarti na Gado hai. Disoema doe hem Gado wani, a waarti moro alasani.
3. Ma na Saul wi kan si, efi wan soema meki da boen Jeje vo Gado moe libi hem, dan djoesnoe da ogri jeje vo didiebri de teki da soema hatti abra, meki a no kan habi wan reti plisiri moro. En ala bigi, nanga ala plisiri-sani vo disi grontapo no kan meki so wan soema hatti kom geruste baka.
4. David ben de wan jonge boi jete, di a ben de loekoe hem tata skapoe, ma a no ben lobbi pasa hem tem soso na sabana nanga wildri, efi nanga slibi, kontrari, a ben sidom leri vo pre harpoe en vo meki switi psalm, en vo singi dem, meki hem hatti hopo, vo taki Gado tangi. We meki ala Kristen-soema moe geersi hem na ini vo dati, meki dem leri wan boen psalm toe na hede, vo dem kan hopo dem hatti nanga singi! Ma te wi singi wan psalm gi Masra, wi moe singi alatem nanga respeki en nanga fili; efi no so? Masra de loekoe dati, leki wi holi hem vo spotoe.
(1. Sam. Kap. 17 tee Kap. 20.)
David no ben tan langa jete na koning Saul hoso, ofoe dem Filistri komanderi ala dem soldati kom makandra ageen, dem tjari dem go na Juda-kondre, vo feti nanga dem pikien vo Israel; dem meki dem kampoe reti-mindri vo Soko en vo Aseka. So srefi Saul, di hem jeri dati, a kali ala hem soldati kom makandra toe na wan bigi sabana, disi dem kali Ela, en na dapee dem meki dem srefi klari, vo go feti nanga dem Filistri. We di dem dri bigi brara vo David ben go na da feti toe, dati meki David srefi libi Saul so langa, a go baka na hoso, vo loekoe hem tata skapoe na Betlehem.
Ma dem Filistri ben habi dem kampoe na wan pikin bergi foetoe na wan sei, en dem Israel-soema ben de na wan tra bergi na tra sei, dem ben de reti abra na abra, wan bigi sabana nomo ben de na dem mindri. We di dem ben de na dem kampoe de wakti makandra, bifo da feti bigin, wan bigi-bigi Filistri komopo na ini da kampoe, hem nem Goliat, a waka go tee reti-mindri vo dem toe kampoe; da soema ben langa twalf voet nanga dri duim. A ben weri wan bigi helm na hem hede, wan isriwan, nanga wan bigi pansri, wan kooproewan; so srefi dem kousoe na hem foetoe ben meki vo kooproe toe, en na hem skouroe a ben tjari wan bigi kooproe lanza. Da zabel vo hem ben bigi so, leki wan matta-tiki. En buiti dati a ben habi wan soema, disi tjari wan bigi blakri gi hem, wan isriwan. (Dem kali so wan blakri wan skild, en dem ouroetem-soldati, te dem de na feti, dem ben lobbi holi so wansani, potti na dem fesi, vo meki dem pyl, disi trawan soetoe na dem tapo, no kan doe dem ogri.)
We da so da bigi soema tanapoe dedapee, a bari dem Israel-soema, a kosi dem, a taki: Sani oen kom so hipi-hipi na feti, trobi oen srefi so? Oen si? mi da wan Filistri, en oenoe alamal de soema vo Saul. We soekoe wan soema vo oenoe, disi habi manhatti, seni hem kom na mi dia, vo a feti nanga mi, meki mi nanga hem koti da kroetoe, wi wawan; efi hem winni mi? dan wi alamal sa onderdaniki oenoe; ma efi mi winni hem? dan oenoe sa onderdaniki wi. Oen si? mi kosi oen alamal tidei, mi no ke vo oen Gado! Meki wan soema vo oen kom na mi dia, dan wi sa kaba da feti hesi! We di Saul nanga dem soema vo hem jeri da kosi-kosi vo da Filistri so, dem alamal kom frede vo troe, tee no wan soema habi hatti, vo go feti nanga hem; en dati meki da Filistri no kaba na dem baka, ma ibri mamantem nanga ibri bakadina a kom trobi dem nanga da kosi-kosi, wan heeli fotentin dei.
We di dasani kom drai so langa, bifo da ouroe tata Isai kan jeri wan njoesoe vo dem dri pikien vo hem, disi de na feti, dati meki a seni hem pikien David go loekoe dem brara vo hem, meki a haksi, fa dem tan, en meki a tjari wan pikin njanjam gi dem.
We da srefi joeroe, disi David doro na da kampoe, dem Filistri nanga dem pikien vo Israel ben hopo da feti-babari kaba, en djoesnoe dem ala toe hipi hopo vo go miti makandra go feti. We vo da hede David potti hem pakala hesi na sei, a ron go, vo a kan taki hem brara odi jete. Ma da srefi momenti, di a tanapoe de taki nanga dem, da bigi Filistri Goliat djompo kom na fesi ageen, a bigin kosi dem Israel-soema so srefi ageen, leki a ben doe alatem; en David srefi jeri dati.
We di koning Saul si, da bigi Filistri meki ala soema vo hem lasi hatti, tee no wan soema wani go feti nanga hem, bika dem frede hem toemoesi, we vo da hede Saul seni wan ofciri vo hem waka rontoe, vo a pramisi dem soldati vo hem, efi wan soema sa habi hatti, vo go kili da Filistri, dan koning sa meki da soema tron wan goedoeman, a sa gi hem da princesi, hem oeman-pikien, vo hem wefi, nanga nofo trasani moro a pramisi vo gi hem.
We di David jeri dati, a taki: Hoesoema dati? Sani da Filistri, da heiden-soema, de membre dan, disi a habi hatti, vo teki dem soema vo da liebi-liebi Gado, kosi dem so? Ma di da gran brara vo David jeri, hem pikin brara taki so, a gi hem wan verwyti vo dati, a taki: Sani meki joe kom diaso? Sani joe libi dem skapoe soso na sabana? Mi sabi joe heeli boen, joe de wan stoutoe boi, joe ha toemoesi bigi hatti; dati wawan meki joe kom dia, vo loekoe da feti. Ma David no ke vo dati, disi hem brara krasi hem so, bikasi Gado srefi ben naki hem hatti, taki, hem sa de da soema, disi sa poeloe da sjem na Israel tapo. We vo da hede a libi hem brara, a go hopo da srefi tori baka nanga dem tra soema, en di dem tjari da taki vo David tee na koning srefi, dati meki Saul seni kali hem wantem.
We so hesi David kom na Saul fesi nomo, a taki gi koning: No wan soema moe lasi hatti vo da Filistri hede, bika mi srefi sa go feti nanga hem. Saul taki: Fa joe sa man, vo go feti nanga da Filistri, di joe de wan jonge boi jete, joe no sabi vo feti; ma da Filistri, hem de wan soldati sinsi hem pikien-tem. David taki: Dati a no wansani; wan dei di mi ben loekoe mi tata skapoe na sabana, wan leeuw kom teki wan skapoe, tjari gowei, ma mi ron na hem baka, poeloe da skapoe na hem mofo, en di a kom na mi tapo, vo njam mi, mi fassi hem na hem mofo, mi naki hem tee a dede. Wan tra dei ageen wan beer kom, en mi kili hem so srefi toe. We da so mi sa doe da Filistri toe, meki a kaba vo kosi dem soema vo da liebi Gado. Da srefi Masra, disi ben helpi mi, vo da leeuw en da beer no ben kan doe mi ogri, hem sa sabi toe, vo poeloe mi na da Filistri hanoe.
Saul taki: We a boen, go feti nanga hem, Masra moe de nanga joe! En Saul poeloe hem eigen djakti, a weri gi David; so srefi a gi hem wan isri helm, weri na hem hede, nanga wan bigi pansri, wan kooproewan, vo weri. Ma di David gespi hem zabel na tapo da djakti, en di a proberi pikinso, efi a kan waka so, a taki na Saul: No no, so mi no kan waka, bika mi no njoesoe so, nooiti mi ben weri sosani na mi skin.
En djoesnoe a poeloe ala da feti-sani baka, a teki hem tiki, a go soekoe feifi glati stoon na ini riba, potti na ini hem zaka; en dan a teki da slingri vo hem, a go miti da Filistri. Ma di da Filistri koiri dapee, en di a si, David kom na hem, so wan jonge soema, a no teli hem vo noti, bika David no ben tan leki wan soldati. En vo da hede a loekoe dati vo wan sjem, vo hem go feti nanga so wan boi, a taki: Hoefasi, mi da wan dagoe dan, disi joe kom na mi nanga tiki? Kom dan! mi sweri vo mi Gado, mi sa masi joe, meki dem tingi-fowloe nanga tra meti kom njam joe skin.
David taki: Ja, joe de kom na mi nanga houroe en nanga lanza; ma mi de kom na joe nanga nem vo da Jehova Zebaot, disi de da Gado vo dem Israel-soldati, di joe kosi so. We tidei Jehova sa gi joe na mi hanoe, en mi sa fom joe, mi sa koti joe neki, meki dem tingi-fowloe nanga dem tra ogri meti kom njam oen alamal tidei, vo ala joe kondre-man sa si, taki, Israel habi wan Gado troe. En da heeli gemeente vo wi sa si toe, Jehova kan helpi wi sondro houroe en sondro lanza; bika da feti disia da wan feti, disi Masra srefi de feti, en hem sa meki wi winni oen toe.
We di Goliat drifi kom moro klosibei na David vo fadom na hem tapo, hesi David poeloe wan stoon na ini zaka, potti na hem slingri, en dan a fringi da stoon na da Filistri tapo; da stoon kisi hem reti na hem fesi-hede, a broko da fesi-hede tee da bigi soema fadom nanga fesi na gron. We da so David winni da Filistri nanga da soso slingri en nanga da stoon, a hiti hem na gron, a kili hem; en di a no habi houroe na hem hanoe, a djompo go teki di vo Goliat srefi, a koti hem neki.
Ma di dem tra Filistri si, da bigi-bigi soema vo dem dede, dem alamal teki ron, dem gowei. En dem Israel-soema hopo wan plisiri-babari, dem feti na dem Filistri baka faja-faja, dem jagi dem gowei tee na Ekron, en dem kili foeloe soema vo dem. Ma na baka, di dem libi dem, bifo dem gowei baka na hoso, dem go na da Filistri kampoe fosi, en alasani, di dem finni dapee, dem teki, tjari gowei. So srefi David teki da hede vo Goliat, a tjari hem go na Saul. Ma Saul taki: We jonkman, hoesoema da joe tata? David taki: Mi a no da pikien vo Isai, disi de liebi na Betlehem? We now Saul kom sabi hem baka, en da srefi dei a teki hem na hem diensti, a no meki David go baka srefi na hem tata hoso, ma a potti hem wantem vo ofciri. En prins Jonatan nanga David kom boen mati makandra, bika Jonatan ben lobbi David en David lobbi Jonatan; en vo da hede dem meki da verbond makandra, dati nooiti trawan sa vergiti trawan. So srefi Jonatan teki hem eigen ofciri-djakti, di hem ben weri alatem, a gi na David nanga dem tra ofciri-klosi toe, nanga zabel, nanga alasani, di a moe habi.
We da so David tron wan bigi ofciri, en nofo-tron Saul seni hem go na komando te dem Filistri hopo hede baka; en David holi hem srefi so boen alatem, vo heeli kondre kom lobbi hem, so srefi ala soema vo koning-hoso lobbi hem toe.
Ma na baka di da heeli feti nanga dem Filistri kaba, wan dei di David nanga Saul ben de na pasi, vo go baka na hoso, so meni vo dem Israel-oeman komopo na ala dem foto, dem go miti Saul, en nanga bigi plisiri dem singi koning, dem taki: Saul kili doezend soema, ma David kili tin-doezend! Ma di Saul jeri da singi waka so, a teki dati vo ogri, tee a kisi hatti-bron, a taki, dem pryze David moro leki hem, a mankeri nomo, vo dem teki hem, meki hem koning; en sinsi da dei Saul no lobbi David moro, alatem a tai fesi gi hem, a no kan si hem srefi na hem hai.
En moksi nanga da hatti-fasi da ogri jeje toe kom trobi hem baka ageen na hem hoso, tee a bigin vo taki profeti-tori srefi; ma a no taki wan reti tori, ala soortoe lau-lau-sani a taki soso, leki wan soema, di no de nanga hem boen verstand. We dati meki David teki hem harpoe, a go pre gi hem, so leki a ben doe tra jari, a taki, somtem dati sa meki a kom bedari baka. Ma di David sidom so de pre gi hem, Saul teki wan lanza, di a ben holi na hem hanoe, soetoe na David tapo, a taki na ini hem hatti, meki da lanza doro hem bele tee a kom fassi na ini da pranga na hem bakasei. Ma David komoto na hem pasi toe-tron, sondro Saul kan doe hem wan ogri.
1. We da tori de gi wi wan toe dri leri ageen. Datem di David ben go feti nanga da bigi soema Goliat, a ben de wan jonge soema jete; ma sani ben gi hem hatti, vo a doe so? Somtem a ben de wan stoutoe boi? No no, a no dati. Ma di a ben potti ala hem vertrouw na hem Gado, dati wawan ben meki a winni Goliat. We so srefi wi toe, nanga wi srefi tranga wi no kan doe wansani, ma nanga da tranga vo Masra wi kan doe ala boen-sani.
2. Goliat ben prodo vo troe nanga da langa skin vo hem, ma juisti dem bigi membre vo hem, en di a potti ala hem vertrouw na hem srefi wawan, dati meki da pikin David kom gi hem so bigi sjem. Koning Salomo ben koti wan odo, a taki: Joe wani kisi sjem? joe moe kisi hei membre fosi. (Kap. 16, v. 18.) En apostel Petrus taki: Gado no lobbi dem bigi-membre-soema, a no teli dem; ma dem soema, disi habi saka-fasi, da dem a de lobbi! (1. Petr. 5, v. 5.)
We sinsi da tem da konsiensi vo Saul kom trobi hem moro ogri, leki bifosi, en di a si, fa David holi hem srefi so boen alatem, en fa Gado nanga ala soema lobbi hem, dati meki a kom frede David toemoesi; en vo da hede a bedanki hem, poeloe hem na koning-hoso, meki a go liebi na wan tra hoso, hem wawan. En dan a prakseri wan tra triki ageen, vo kili David na wan koni-fasi, sondro trawan kan taki, da hem ben kili hem. We di a ben pramisi, taki, da soema, disi sa kili Goliat, hem sa kisi hem oeman-pikien vo hem wefi, en di a sabi, hem pikien Mikal srefi lobbi David toe, vo da hede a seni taki gi David, meki a kom noja, teki da pikien vo hem wefi. Ma David taki: No no, fa mi sa doe teki da princesi, di mi de wan poti soema vo so wan laage famili; mi no ha wansani, vo gi da missi wan presenti. Ma Saul seni piki hem baka, a taki, hem no soekoe wan tra presenti vo hem pikien, leki dati wawan, vo David go kili wan hondro Filistri gi hem, meki koning kan poeloe hem hattibron na dem Filistri tapo boen-boen. Ma Saul no ben doe dati vo dem Filistri hede, ma vo David hede; bika a ben denki, na ini da feti dem sa kili hem.
We di David kisi da boodskopoe vo Saul, a taki: We a boen, somtem Gado wani so, vo mi teki da pikien vo koning. En djoesnoe a teki hem soldati, a go feti nanga dem Filistri, a kili toe-hondro srefi; en vo da hede helpi no de, Saul ben verpligti vo gi hem da pikien, meki a go trouw nanga hem. Ma nanga ala dati Saul kom si krin-krin, taki, Gado lobbi David moro leki a lobbi hem, en di a si, hem pikien Mikal lobbi hem man toe, ala dati meki Saul kom frede David moro-moro, tee a no kan verdrage srefi, vo si hem na hem hai. We di a no kan kisi dati, vo a kili hem safri na wan koni-fasi, alwasi hoesani a ben proberi, bakatem a no kan kibri da vyanti moro, di ben de na ini hem hatti, ma a gi hem pikien Jonatan ordre, nanga dem tra ofciri toe, meki dem kili David gi hem. Ma di Jonatan ben lobbi David, a go waarskouwe hem wantem, a taki, hem papa Saul de soekoe vo kili hem; meki a go kibri na sabanasei, na so wan plesi so, dan hem sa begi hem papa tamara, vo a kom koiri nanga hem pikinso, en te dem kom klosibei na da plesi, dapee David sidom de kibri, dan hem sa bigin begi hem papa vo hem, vo a no moe kili hem, meki David srefi kan jeri, sani hem papa sa taki; en buiti dati hem srefi sa kom piki hem toe.
We David doe so, leki hem mati rai hem, en di Jonatan nanga hem papa Saul go koiri makandra de pasa da plesi, Jonatan teki hatti, vo haksi Saul vo David, a taki: Vo san hede mi papa wani kili David, tog a no doe joe wan ogri? Kontrari, a ben doe joe foeloe boen. A no hem de da soema, disi ben kili da Filistri tra dei, di Masra ben helpi wi so wan bigi helpi? A no joe srefi hai ben si, fa David no ben ke vo hem liebi srefi, nomo vo a helpi wi? Joe srefi no ben plisiri vo dati? We fa joe wani doe so wan bigi ogri now, kili so wan boen soema vo soso, sondro a doe joe wan ogri? Fa koning sa verantwoortoe dati?
We dem woortoe vo Jonatan kom wroko tranga na Saul konsiensi vo da leisi, a gi hem reti, en a sweri hem srefi, a taki, hem no sa kili David. We dati doe Jonatan wan bigi plisiri, en so djoesnoe a libi hem papa, a ron go kali hem mati David, a verteli hem alasani, disi hem papa taki, en dan a teki hem, tjari hem go na koning; en Saul teki hem toe, meki a liebi baka na koning-hoso leki fositem. Ma di dem Filistri no ben kaba jete vo kom trobi Israel, Saul seni David go na komando ageen, en David nanga dem soldati vo hem holi dem srefi so boen, tee dem winni dem Filistri; hafoe dem kili, en hafoe dem jagi gowei.
We nanga dati David kisi wan bigi nem ageen na kondre; ma juisti dati kom gi hem wan bigi trobi toe na koning hoso, bikasi di a hati Saul alatem, vo si, David kisi nem na kondre, dati meki da ogri djaloesoe kom wieki ageen na ini hem hatti, tee a soekoe wantron moro, vo a kili hem. En wan dei, di David sidom pre harpoe gi hem, Saul kisi da mal na hem hede ageen, a hiti hem lanza na David tapo vo kili hem; ma David skoifi safri, gowei, so dati da lanza go na ini pranga. We da srefi neti David komopo dapee, a ron go kibri na hem hoso. Ma Saul seni wan patroeli na hem baka, a gi dem tranga ordre, vo dem wakti hem hoso boen na neti, en dei-broko mamantem, te David hopo doro vo gowei, dem moe kili hem wantem.
We di David wefi Mikal kom jeri dati bitem, a waarskouwe hem man, a taki, efi a no go kibri hesi, di neti srefi, dan dei-broko mamantem dem sa kili hem.
Ma David potti ala hem vertrouw na hem boen Masra wawan, a begi hem Gado, a taki: Ke mi Gado! gran-tangi, helpi mi, meki dem vyanti vo mi no kan doe mi ogri! Poeloe mi na dem ogri soema hanoe, disi de soekoe mi broedoe! A no joe da Jehova? da Masra Zebaot? da Gado vo Israel? We na joe sei mi de go kibri! Joe da mi Helpiman. Mi hoopoe, joe sa meki mi singi joe, taki, joe de wan tranga Gado vo troe. Somtem tamara srefi mi sa pryze joe vo joe boen hatti, disi joe ben helpi mi, poeloe mi na ala mi verlegi. -- We da srefi neti jete Masra jeri da begi vo David, a meki hem wefi Mikal saka hem na abra fensre tee na ondro, meki a ron go kibri, sondro dem waktiman jeri wansani. Na baka Mikal teki wan popiki, disi bigi so leki wan liebi-soema, a potti dati lidom na David bedi, potti wan koensoe na ondro hem hede, en dan a tapo hem skin boen-boen nanga slibi-klosi.
We dei-broko mamantem, di Saul si, dem waktiman vo hem tan so langa, bifo dem kom piki hem, a seni tra soema go dapee, vo teki David. Ma di dem doro na David hoso, hem wefi taki, David de siki, a no kan kom. Ma Saul no jeri na dati, a seni dem go baka ageen, a taki, dem moese tjari hem kom djoesnoe, alwasi nanga hem bedi srefi, bikasi a moese dede. We di dem soema kom baka, vo teki da sikiman, now fosi dem si, David srefi no de na ini da bedi, ma da wan popiki soso. En di Saul jeri dati, a meki trobi nanga hem pikien Mikal, a taki: Fa joe kan kori mi so, meki mi vyanti ronwei? Mikal taki: Mi no kan helpi, bikasi David taki gi mi, mi moese libi hem, meki a gowei, anders mi srefi kan kom na wan ongeluk toe. We da so David ben finni tem da srefi neti, vo komopo na koning buurti, a ron go tee na Samuel na Rama, a verteli hem alasani, fa Saul ben doe nanga hem. En na baka dem ala toe waka go makandra tee na Najot, dati ben de wan buiti, dapee Samuel ben hopo wan profeti-skolo; dem denki, na dapee Saul no sa soekoe David moro. Ma di Saul ben habi hem spioni na heeli kondre, di ben sabi toe vo da komplotoe, dem go piki koning hesi, dem taki, David de na Najot, klosibei na Rama; en di Saul jeri dati, djoesnoe a seni wan patroeli go dapee, go teki David. We di dem soema vo Saul doro na Najot, da srefi joeroe Samuel ben de na hem wroko de holi skolo nanga dem disciple vo hem, a meki dem singi dem profeti-psalm makandra. We di da patroeli kom klosibei na da hoso, en di dem jeri da singi so, dasani kom switi na dem jesi, en da srefi momenti da Jeje vo Gado kom naki dem hatti, tee dem srefi bigin toe vo singi profeti-tori, moksi nanga dem trawan; en dati meki dem kom vergiti da boodskopoe krin-krin, disi koning ben seni dem. We di Saul si, dem no kom baka, a seni wan tra patroeli go dapee, ma so hesi dem doro na Najot, da Jeje vo dem profeti kom kisi dem so srefi toe, dem no go baka moro. So srefi di vo dri, dem no kom baka toe; bika da Jeje vo dem profeti kom naki dem hatti toe.
Na baka Saul srefi go na Rama en na Najot, vo soekoe Samuel nanga David; ma na pasi, bifo a doro jete, da Jeje vo Gado kom kisi hem toe, tee a bigin taki profeti-tori; en di a kom na Samuel fesi, a poeloe hem koning-klosi, en nanga bele na gron a singi dem profeti-psalm, moksi nanga dem trawan, tee ala soema kom verwondroe vo hem, dem taki: Hoefasi, Saul tron profeti toe? Somtem a drai hem liebi noja.
Ma ala dati Saul ben tan da srefi falsi soema jete, di a ben de alatem; en dati meki David no kan vertrouw hem moro, a libi hem dapee, a ron go safri na hem mati Jonatan, a haksi hem, a taki: Doe mi da plisiri, taki gi mi, hoe ogri mi ben doe joe papa, disi a no kan kaba na mi baka, ma doro nomo a de soekoe, vo a kili mi? Jonatan taki: No no, mi mati, Gado moe kibri mi papa, a no sa kili joe. Dati mi no kan bribi. Efi dati ben de na mi papa hatti, a ben sa taki gi mi, bikasi a no kibri wansani gi mi.
Ma David sweri gi hem, a taki: Ja vo troe-troe, a wani kili mi. Ma di joe papa sabi heeli boen, taki, joe lobbi mi, vo da hede a no ben piki joe.
Jonatan taki: We efi da so, sani mi kan doe dan, vo helpi joe? David taki: Meki mi gowei go kibri vo mi, en te joe papa kom baka na hoso, meki mi sabi, san a taki, efi hem hatti kom bedari baka nanga mi, ofoe san a de go doe. Jonatan taki: A boen, mi sa meki joe sabi. En da so dem ala toe potti mofo makandra, dem taki, meki David go kibri na sabanasei dri dei langa, en na ini dem dri dei Jonatan sa soekoe na wan koni-fasi vo kom sabi hem tata hatti moro krin, en dan a sa kom piki David baka. We di dem taki dem srefi adjosi, Jonatan troostoe David wantron moro, a taki, meki hem hatti kouroe, hem sa kom piki hem troe-troe, vo no wan ogri sa kisi hem; en Masra Gado srefi sa de nanga hem toe. So srefi Jonatan begi David wantem, vo bakatem a no moe vergiti hem nanga hem heeli famili; bikasi a ben de, leki wan soema ben taki gi Jonatan, taki, somtem Gado kan wani, David tron koning srefi.
We na ini dem dri dei Saul meki toe bigi trakteri gi dem gran-soema vo kondre, en a meki dem verzoekoe David toe, vo a kom njam nanga hem. We da fosi dei, di Saul si, David no kom na tafra, a doe, leki hem no si, a no taki noti jete, ma da tra dei, di a si, David mankeri ageen, a haksi Jonatan, vo san hede da pikien vo Isai no kom na tafra, bika da so Saul ben lobbi kali David alatem. Jonatan taki: A haksi mi pasi, vo a go loekoe hem famili na Betlehem. Ma dati meki Saul hatti kom bron nanga Jonatan, a bigin krasi hem, a taki: Joe ogri soema joe! Joe skoerkoe! Joe teki da pikien vo Isai, meki mati nanga hem! Joe denki, mi no sabi dati? Fa joe kan holi mati nanga so wan soema, disi de soekoe vo tapo joe, meki joe no kan kom koning na mi baka nooiti wantem? We seni soema go teki hem wantem, meki dem tjari hem kom na mi, bikasi da soema moese dede. Ma Jonatan haksi hem tata wantron moro, a taki: We vo sani hede David moe dede dan? Hoe reti ogri a doe dan? Ma Saul no piki hem, a tan, leki a kisi wan mal na hem hede; en sondro vo a taki wan woortoe a go teki wan lanza, vo kili hem eigen pikien srefi.
We now Jonatan kom si krin-krin, taki vo troe-troe hem tata pramisi, vo kili David, en vo da hede a ron komopo dedapee nanga hattibron, a no njam wansani moro da srefi dei; bikasi a hati hem toemoesi, disi hem tata wani kili David, sondro a ben doe wansani. We dei-broko mamantem a go na da plesi, dapee David sidom wakti hem na sabana, a taki gi hem, meki a go kibri hesi, bika da so da so hem tata ben taki gi hem. En djoesnoe dem taki dem srefi adjosi, dem brasa bosi makandra, en dem ala toe kre reti-reti. En Jonatan taki gi David: Waka boen, mi mati! Dasani, di wi ben pramisi makandra na nem vo Masra, dati moe tan so alatem. Masra moe de nanga joe en nanga mi, en nanga wi famili toe.
Jonatan nanga David ben de boen mati makandra. Alwasi Jonatan ben de wan prins, wan koning-pikien, tog a no ben sjem vo David, di ben de vo wan laagi famili; ma di dem ala toe ben de boen bribi-soema, disi lobbi dem Gado so, leki a fiti, dati meki dem lobbi dem srefi makandra toe, leki brara nanga brara. A troe, dem soso kondre-soema habi dem mati toe, dem kan lobbi makandra toe; ma da lobbi, disi dem boen Kristen-soema lobbi makandra, dati de moro switi.
(1. Sam. Kap. 21 tee Kap. 26.)
Di David no ben sabi wan plesi moro na hem eigen kondre, dapee a kan go kibri vo Saul, dati tjari hem na da prakseri, a taki, betre hem go tee na Filistri-kondre, somtem koning Akis sa teki hem. Ma tog di a no ben wani doe dati nanga hem eigen wani, sondro a haksi hem Gado bifosi, vo da hede a go na domine Ahimelek na Nobe, dapee da Verbond-hoso vo Masra ben de. We di a doro na Nobe, ongeluki a miti wan tra gran-soema vo Saul dedapee na domine hoso, da soema nem Doeg, en di David ben sabi hem vo wan falsi soema, dati meki a no kan verteli domine da tori so krin na da soema fesi, vo san hede hem ben libi Saul, en hoepee a wani go now. We vo da hede a taki, hem habi wan boodskopoe vo koning, wan kibri-tori, disi no wan soema moe sabi; en di koning ben seni hem da boodskopoe so faja-faja, dati meki a no ben finni tem srefi, vo teki wan njanjam na pasi; meki domine gi hem wan toe dri brede hesi, vo a kan gowei, doe hem boodskopoe.
We di Ahimelek no ben habi wan tra brede na hem hoso da srefi joeroe, leki dem kerki-brede wawan, a go teki dem, gi na David. So srefi a gi hem da bigi houroe vo Goliat toe, disi dem ben kibri dapee; en da so David teki hem pasi baka, a waka go tee na da foto Gat, dapee da Filistri-koning Akis ben de liebi. Ma dasani no ben waka boen gi hem dapee. Bikasi Saul ben seni waarskouwe dem Filistri safri, taki, te dem si so wan soema kom na dem kondre, so wan so, dem kan sabi wantem, dati a de David, da srefi soema, disi ben kili Goliat; meki dem loekoe boen nanga hem, bika efi dem no kili hem wantem, somtem a kan doe dem moro ogri ageen.
We vo da hede so hesi leki David doro na da kondre nomo, dem Filistri kisi hem wantem, dem tai hem, tjari go na koning Akis, dem taki: Joe si? Now wi kisi David, da srefi soema, disi dem Israel-soema ben singi hem tra-dei, di dem taki: Koning Saul kili wan -doezend soema, ma David kili tin -doezend. We di David jeri da taki na dem mofo, dati meki a skreki so tee a sori so na dem fesi leki a lasi hem verstand krin krin.
Ma di koning Akis si David na so wan fasi, a taki, da wan lauman, en a meki trobi srefi nanga dem skoutoe vo hem, a haksi dem, efi somtem dem denki, hem no habi lauman nofo jete na hem kondre, disi dem moe tjari so wan soema kom na hem; efi dem denki, te dem si wan lauman, disi lasi wan zin vo hem, dem moe tjari hem kom na koning fosi, meki a trobi koning. En djoesnoe a jagi hem komopo na hem fesi, meki a go vo hem.
Ma David taki hem Gado gran-tangi vo da helpi, di a ben helpi hem, en na baka a meki wan mooi singi vo da tori, a taki: Meki mi pryze Jehova! Meki mi gi hem bigi nem! Da tangi no moe kaba na mi mofo; mi no moe weri, vo singi hem! Oen kom, helpi mi vo pryze Masra! Meki wi ala taki Masra tangi! Mi ziel moe taki Masra tangi so tee dem mofina soema kom jeri, vo dem kan plisiri toe! Dem soema, disi de kom na hem, kom begi hem, Masra no meki dem kisi sjem. So srefi mi mofina soema toe, di mi ben kali Masra, a ben jeri mi, a poeloe mi na ala mi verlegi. Da Engel vo Masra de wakti dem soema, disi de frede hem, en a helpi dem. We kom dan, oen alamal, kom loekoe si, fa Masra switi! Boen vo da soema, disi potti vertrouw na hem. Dem soema, disi de soekoe Masra, no wan reti boen kan mankeri dem. Bikasi Masra hai de wakti dem soema vo hem, en hem jesi de jeri da kre vo dem. Masra de klosibei na dem soema, disi de nanga sari-hatti, en a de helpi dem soema, disi de nanga verlegi. We alatem te mi kom na wan frede, na mi Gado wawan mi sa potti ala mi vertrouw, mi no sa frede moro. Sani liebi-soema kan doe mi? Ke mi Masra, joe sabi, fa mi ben waka rontoe go kibri; joe ben si, fa mi ben kre tee watra ben ron na mi hai; mi bribi vaste, joe ben teli ibriwan dropoe watra, di mi ben kre. We joe da mi Gado, bika alatem te mi kali joe, joe de piki mi. Joe wawan ben kibri mi liebi, en vo da hede mi taki joe gran-tangi. (Psalm 34 & 56.) ( Psalm 34 & 56.)
We di da Filistri-koning Akis ben jagi David gowei, helpi no de, a ron go baka na Juda-kondre en na dapee a go kibri na ini wan bigi stoon-horo, disi dem kali Adullam. En di dem brara vo hem nanga da heeli famili vo hem tata kom jeri dati, dem alamal go na hem dapee; bika di Saul no ben kan finni David, dati meki a tron wan vyanti vo da heeli famili vo Isai, en vo da hede dem brara vo David kisi frede toe, dem taki, somtem koning kan kom kili dem ala makandra. So srefi nofo vo dem tra boen Israel-soema, dem potiwan, disi ben de na wan pina-liebi en nanga ala soortoe hebi en verdriti, vo di no wan soema ben helpi dem, te trawan doe dem kroekoetoe, dem alamal go dapee toe, moksi nanga David famili, tee dem kom fo-hondro soema omtrenti, en David tron hedeman vo dem.
Ma di dem no kan kibri langa dapee, bakatem David nanga ala dem poti soema, di ben holi nanga hem, dem libi da plesi safri, dem go na Mizpa na Moab-kondre, en David begi da koning vo da kondre, efi hem sa doe dem da plisiri, vo meki dem kan liebi na wan foto vo hem, so langa tee hem kom sabi, sani hem Gado wani doe nanga hem. En da koning gi dem wan pikin foto, vo dem liebi dapee. Ma dem no ben tan langa na da foto jete, ofoe Gado meki profet Gad kom waarskouwe David, taki, a no moe tan na da foto, ma na Juda-kondre a moe go baka; en djoesnoe David respeki da woortoe vo Masra, a drai baka wantem, sondro a frede wansani. Kontrari, a singi hem boen Masra ageen, a taki: Jehova srefi da mi lampoe, di moe sori mi pasi, hem da mi Helpiman! Soema mi sa frede dan? Alwasi mi tata en mi mama libi mi, tog Jehova no libi mi wawan. Wansani nomo mi begi mi Masra, dati wawan mi hangri, vo mi kan tan na mi Masra hoso mi heeli liebitem, en vo mi kan si mi switi Jehova na ini hem temple. Na dapee wawan mi hangri vo kibri na ondro da tenti vo hem. (Disi David ben singi so vo hem tata en mama, somtem dem ben fika na Moab-kondre, efi somtem dem ben dede, dati wi no kan sabi.)
We so hesi Saul jeri, David nanga dem soema vo hem kom baka na Juda-kondre, dati meki hem hatti kom bron njoe-njoe ageen, a taki, somtem dem gran-soema vo kondre de koenkroe nanga Jonatan en nanga David, somtem da dem de helpi hem, vo a kom baka. En wantem a kali dem alamal kom na hem fesi, a krasi dem vo dati, a taki, hem si krin-krin, dem koenkroe nanga David, dem alamal meki komplotoe makandra; somtem dem sa wani meki a tron koning srefi. We di Saul taki so nanga dem, no wan vo dem habi hatti, vo piki hem wan woortoe baka, bikasi dem si, a de nanga toemoesi hattibron. Buiti Doeg, da srefi falsi soema, disi David ben miti na Nobe da dei, di a ben de na pasi, vo go kibri na Filistri-kondre, hem wawan bigin verteli koning, a taki, na so wan dei hem ben si da pikien vo Isai kom na domine Ahimelek hoso na Nobe, en dapee domine srefi ben helpi hem, nanga dati, di a haksi Gado gi hem, san a moe doe, en di a gi hem njanjam na pasi; so srefi hem ben si toe, fa domine gi hem da houroe vo Goliat, meki a tjari gowei. Ma dati da falsi-hatti soema no verteli gi koning, taki, Ahimelek srefi no ben sabi, dati da kibri David de go kibri vo koning.
We di Saul jeri so wan njoesoe, hem hatti kom bron toemoesi nanga domine Ahimelek toe, en wantem a seni kali hem kom na hem, nanga ala dem tra domine toe vo hem famili, disi ben liebi nanga hem na Nobe, a meki trobi nanga hem, a taki: Hoefasi, fa joe kan habi hatti, vo meki barki nanga da pikien vo Isai? Joe no gi hem brede nanga wan houroe? Joe no helpi hem? Joe no gi hem tranga, vo a kom feti nanga mi, poeloe mi na koning, di joe ben haksi Gado gi hem? Mi sabi boen, fa joe nanga hem ben koenkroe makandra.
Ma Ahimelek piki hem, a taki: Ke, fa koning kan membre sosani! David no de na koning diensti? A no trouw nanga koning pikien srefi? A no hem de da moro vertrouw soema, di koning habi? We di a kom na mi, a taki, hem habi wan boodskopoe vo koning, mi no moe respeki hem? mi no moese helpi hem? A no tidei mi bigin, vo haksi Gado rai gi hem. We, ala dasani, di koning potti na mi tapo, mi no sabi wansani vo dati; koning kan bribi mi troe-troe.
Ma Saul no jeri na dati, a bari Ahimelek, a taki: Mi sa meki dem kili joe nanga ala soema vo joe tata famili! En wantem a komanderi dem soldati vo hem, a taki, meki dem go kili dem domine wantem, vo di dem no ben kom waarskouwe hem, taki, David ronwei. Ma di dem soldati frede, vo potti han na dem domine vo Masra, kili dem, vo da hede Saul taki gi Doeg, meki hem go kili dem. En wantem da ogri soema kili dem domine, dati aititentin na feifi soema lasi dem liebi da srefi dei.
Ma dati no ben nofo na Saul jete, en vo da hede a seni wan komando go na da domine-foto Nobe srefi, vo dem broko da heeli foto, a meki dem kili ala soema vo da foto, man nanga oeman nanga pikien, tee vo dem pikien na bobi srefi, nanga ala meti toe. Wan enkli soema nomo ben finni pasi, vo ron go kibri, dati da Abjatar, wan pikien vo Ahimelek srefi; we da hem teki da grandomine-hempi nanga da domine-wapoe toe, a ron go tee na David, a verteli hem da heeli tori, fa Saul ben kili ala dem domine vo Masra. En David taki: We mi ben frede, so wansani sa pasa; bika da dei, di mi miti da ogri soema na domine hoso, a ben de leki mi hatti taki gi mi, Doeg sa go tori mi na Saul. A hati mi vo troe, disi vo mi hede Saul ben moe kili ala dem soema vo joe tata famili. Ma san mi sa doe? We tan nanga mi dia, no frede, mi sa loekoe joe, vo no wan soema sa doe joe wan ogri. So langa dem no kom kili mi, dem no sa kili joe toe.
We pikinso moro na baka David kisi wan boodskopoe, a jeri, dem Filistri doro na da foto Kegila, dem kom, vo foefoeroe ala dem sani. En di David ben sabi na fesi, taki, iniwantem hem srefi sa tron koning vo Israel-kondre, vo da hede a meki domine Abjatar haksi Gado gi hem, efi Masra sa wani, hem go feti nanga dem Filistri? En Masra taki ja, meki a go, a sa winni dem Filistri, helpi da foto. Ma di dem tra soema ben frede pikinso, vo go na da feti, dati meki David haksi Gado wantron moro, en Masra pramisi hem ageen, taki, alasani sa waka boen, meki a go. We da so David teki ala dem mansoema makandra, di ben de nanga hem, a go feti wan bigi feti nanga dem Filistri, tee a winni dem, en dan a teki ala dem Filistri meti, tjari gowei.
Ma di Saul kom jeri, David de na Kegila na ini da foto ini, a taki: We dati boen, now mi sa kisi hem hesi; bikasi da foto habi bigi doro, di mi kan sloto onverwakti, meki a no kan komopo na ini. En djoesnoe Saul komanderi ala hem soldati, a seni dem go na Kegila, vo dem kisi David nanga ala dem tra soema, di de nanga hem. Ma bifo dem doro dapee, David ben kisi njoesoe kaba vo dasani, disi de na Saul hatti, en vo da hede a haksi hem Gado, efi troe-troe Saul sa kom soekoe hem dapee. En Masra taki: Ja, a sa kom. Toen David haksi Masra wantron moro, sani dem soema vo Kegila sa doe, te Saul kom, efi dem sa asisteri hem, ofoe somtem dem sa go helpi Saul, vo kisi hem. En Masra taki: Ja, dem sa helpi Saul, vo kisi oenoe.
We di David jeri so, a no lasi tem moro vo gowei, ma a teki dem siksi hondro soema, a waka go kibri na nofo plesi, tee bakatem dem kom na wan woestein, disi dem kali Sif, en na dapee dem tan na tapo wan bergi na mindri boesi; bikasi Saul no weri, vo soekoe David ala-dei, ma Gado wawan meki a no kan finni hem.
We di Jonatan jeri safri, hem mati David de na ini boesi, klosibei na da foto Sif, a go troostoe hem dapee, a taki: No frede, mati! Mi tata no sa finni joe dia. Joe sa si, Gado sa meki joe tron koning vo Israel, en dan joe moe teki mi na joe diensti. Mi papa Saul srefi sabi heeli boen, taki, a sa kom so. We da so dem ala toe pramisi dem srefi makandra, taki, te David tron koning, dan Jonatan sa de hem sekretarisi; dem meki da verbond na nem vo Masra, en dan Jonatan taki hem adjosi so langa, a gowei baka na hoso. Ma dati ben de da laatste leisi, disi dem toe mati ben si makandra, bika Jonatan dede na ini wan feti, bifo David tron koning.
Ma zoodra dem soema vo Sif jeri, David kom kibri na dem kondre, djoesnoe dem seni tori hem gi Saul, dem taki, da dem pligti, vo dem meki koning sabi dati; en efi somtem koning wani soekoe hem, dem sa helpi hem, vo kisi David. We dati ben de wan switi njoesoe vo Saul, a taki dem soema gran-tangi, disi dem doe hem da plisiri, vo meki a sabi dati. En wantem a hopo toe, a komanderi dem soldati vo hem, a go soekoe David na ini ala dem bigi stoon-horo na boesi. Ma David, di hem jeri dati, a begi hem Gado toemoesi, vo a moe helpi hem, poeloe hem na ini so wan pina-liebi; en a beloovoe hem toe, a taki, efi Gado sa sari vo hem, helpi hem di leisi ageen, dan hem sa taki hem tangi toemoesi vo hem boen hatti. (Psalm 54.) We da begi Masra teki nanga boen, a jeri hem wantem. Bikasi di Saul nanga hem soldati ben rontoe David kaba, tee a no si wan pasi moro, vo poeloe hem srefi na Saul hanoe, juisti da srefi joeroe Saul kisi wan boodskopoe, wan soema kom taki gi hem, dem Filistri doro na ini kondre, meki a kom hesi, feti nanga dem. -- We nanga dati Gado srefi dwingi Saul, vo libi David vo da leisi, bikasi vo hem kondre hede a ben verpligti, vo drai baka go tapo dem Filistri.
Ma so hesi a kaba nanga dem vyanti, wantem a teki dri-doezend soema ageen vo dem moro beste soldati, a tjari dem go, vo soekoe David na wan woestein, disi dem kali Engedi. Ma ala dati David nanga dem soema vo hem ben go kibri na ini wan bigi stoon-horo dapee, en David kre toemoesi na hem Gado, a begi hem so meni, vo a moe potti hem tranga han gi hem, helpi hem di leisi ageen, en hem boen-hatti Masra jeri hem toe, a meki dem soldati vo Saul pasa da horo soso, sondro dem denki, taki, David de na ini. Ma Saul srefi ben fika pikinso na baka, hem wawan, a go na ini da srefi horo, dapee David nanga dem soema vo hem ben sidom kibri; ma di dem sidom tee na bakasei, en di da horo ben doengroe, vo da hede Saul no ben kan si dem.
We dati ben de wan bigi tesi troe vo David, vo a helpi hem srefi. Bikasi di a si Saul de wawan, en di dem tra soema vo David steki hem, meki a go kili hem, dem taki: Joe si? Tidei Masra gi joe vyanti abra na joe hanoe, vo joe doe nanga hem san joe wani: dati meki David drifi go klosibei na Saul na bakasei, en safri a koti wan piesi vo da mantel, disi Saul ben weri. Ma da srefi momenti, di a doe so, hem hatti fom hem, a taki: No no, Gado kibri mi, vo mi no doe mi masra ogri, bikasi Saul da wan soema, disi Jehova srefi ben wye, potti vo koning! En di dem soema vo David ben tan klari kaba vo kom helpi hem, David tapo dem, vo dem no doe Saul ogri.
Ma na baka di Saul wieki, en di a komoto na ini da horo, gowei, David djompo safri na hem baka, a taki: Odi, mi masra koning! En di Saul drai hem fesi de loekoe hem, David hiti hem srefi na gron gi hem vo respeki hede, en dan a sori hem da piesi, disi a ben koti, poeloe na hem mantel, a taki: Joe si? Tidei Masra ben gi joe abra na mi hanoe dia na ini da horo. Dem ben steki mi vo troe, meki mi go kili joe, ma mi no ben wani, mi taki: No no, mi no sa doe mi masra ogri, bikasi Jehova srefi ben wye joe, potti joe vo koning. Loekoe mi papa, joe no si da piesi klosi, di mi holi na mi hanoe? a no de vo joe mantel? Mi no ben kan kili joe wantem, da srefi momenti, di mi koti da lapi, poeloe na joe mantel? We fa joe kan potti bribi dan na dem soema, disi taki, mi wani doe joe ogri? Joe no si jete, sosani no de na mi hatti kweti-kweti? We san joe de so na mi baka dan? san joe soekoe vo kili mi? Gado sa koti da kroetoe gi wi. Mi no sa go feti nanga joe, ma Jehova sa helpi mi, a sa poeloe mi na joe hanoe.
We di Saul jeri, David taki so nanga hem, a kom sjem vo troe, tee a kre srefi, a taki: Ke, mi pikien David, da joe tongo dati, di mi jeri? We joe de wan vertrouw soema troe, joe de wan moro boen soema, leki mi. Joe ben doe mi boen, ma mi ben doe joe ogri. Tidei fosi mi kom si dati, bika Masra srefi ben gi mi abra na joe hanoe, kaba joe no kili mi. Hoe tra soema sa doe so nanga hem vyanti, leki joe ben doe nanga mi? Meki Jehova moe pai joe da boen baka, di joe doe mi tidei! Mi srefi sabi heeli boen, joe sa tron koning vo Israel-kondre. We pramisi mi dan na nem vo Masra, en sweri gi mi, taki, joe no sa pai mi famili da ogri baka, di mi ben doe joe, en taki joe no sa kili dem vo mi hede. We David sweri gi hem, en Saul go baka na hoso. Ma dati no ben helpi David foeloe, a ben de nomo, vo a kan liebi wan pikin piesi tem nanga ruste.
We da srefi tem profet Samuel kom dede. A ben ouroe sebitentin jari, en heeli Israel-kondre kre vo hem, dem alamal kom makandra na Rama, dem beri hem na ini hem hoso srefi. Ma di David kisi njoesoe vo da dede vo Samuel, a kom frede Saul moro tranga leki bifosi, en vo da hede a komopo na Juda-kondre, a go liebi na wan bigi sabana, disi dem kali Paran, na dapee a ben pina toemoesi nanga hangri.
We wan dei a jeri, wan soema de meki wan bigi trakteri na hem pranasi na Karmel, da soema nem Nabal, en David seni begi hem, vo a gi hem pikin njanjam; bikasi hem nanga dem soema vo hem de pina toemoesi nanga hangri. Ma Nabal ben de wan gridiman, en vo da hede a seni piki David, hem no habi vo gi wan trawan hafoe. We dati meki David hatti kom bron toemoesi nanga Nabal, a pramisi hem, vo pai hem baka. Bikasi David ben de alatem wan boen buurman vo hem, en nofotron a ben asisteri hem srefi, te dem skapoe vo Nabal ben loekoe vo kisi wan ogri. Ma Gado srefi kom kibri David, vo dasani no go doro so, leki a ben pramisi. Bika so hesi Nabal wefi Abigail kom jeri dati, fa hem man ben handri David, a go wantem, taki nanga David, a begi hem toemoesi switi, vo a no moe mandi nanga hem; bikasi hem man, so leki a de, a no de nanga hem reti verstand. We dati meki David hatti kom kouroe baka, a teki dem presenti, disi Abigail tjari kom gi hem, en dan a seni hem gowei baka na hoso, a taki, hem no sa soekoe dati moro.
Toen na baka David komopo na Paran, a go liebi baka na Juda-kondre. Ma di dem soema na Sif jeri dati, wantem dem seni wan boodskopoe go na Saul, dem taki, David de dapee na tapo wan bergi. En alwasi fa Saul ben taki so switi nanga David tra-dei, tog so hesi a jeri dati nomo, wantem da ouroe vyanti-fasi wieki baka na ini hem hatti, a teki dri-doezend vo dem moro beste soldati vo hem, a tjari dem go na da plesi, dapee David ben de, vo go kisi hem. Ma di dem doro pikin laati dapee, a ben doengroe kaba, so tee dem no ben kan bigin wansani; en vo da hede Saul meki kampoe na tapo wan pikin bergi, vo pasa da neti dapee. Da kampoe vo Saul nanga di vo David ben de abra na abra; ma Saul no ben sabi dati, David wawan ben sabi.
We na mindri-neti David teki hem sisa-pikien Abisai, en dem ala toe waka safri, vo go loekoe da kampoe vo Saul. We di dem doro dedapee, dem si Saul lidom slibi na ondro hem tenti, en da bigi lanza vo hem a ben potti lidom na hem hede, klosibei na hem koensoe. So srefi dem si Abner, da komandanti vo Saul, nanga ala dem tra soldati lidom panja na gron de slibi. We vo da hede Abisai taki gi David: Meki mi go teki da lanza vo Saul, kili hem wantem! Ma David taki: No, no doe hem ogri! Efi joe go kili so wan gran-soema, joe srefi de go kisi wan ogri baka. So langa Gado srefi no poeloe hem na disi grontapo, Gado sa kibri mi, vo mi no meli hem, doe hem wan ogri. Ma da lanza vo hem nanga da watra-kan, di de na sei da koensoe, dati wawan wi sa teki, tjari go nanga wi. We dem doe so, en dan dem gowei safri, sondro wan soema si dem; bikasi Saul nanga ala dem soldati ben de na wan dipi slibi.
Dei-broko mamantem David go na wan pikin bergi tapo, reti abra vo da kampoe vo Saul, a bari Abner, a taki: Jere mi, Abner! Joe ben holi joe srefi so boen alatem, heeli Israel-kondre no habi wan moro knapoe ofciri, leki joe. We vo san hede joe no wakti joe masra, joe koning, moro betre? Joe si? di neti wan soema ben doro tee na ini da kampoe vo oenoe, a ben wani kili joe masra. No no! joe no doe joe wroko boen. Oen alamal verdini, vo dem kili oenoe, di oen no wakti oen koning moro betre. Loekoe si, da lanza vo koning nanga da watra-kan, di ben de na sei da koensoe vo hem, a de na wi dia.
We ala disi David bari Abner so, Saul srefi kom loekoe toe, san pasa; en di a jeri, fa David ben kan kili hem ageen, efi a ben wani, dati kom gi hem wan sjem, a taki: Ke, mi pikien David! a tan, leki da joe tongo mi de jeri. David taki: Ja, mi koning, da mi tongo srefi! We vo san hede koning de soekoe mi so nanga trobi? Hoe ogri mi doe dan? Efi Gado srefi de meki wan ogri geest kom trobi joe, we potti wan ofrandi gi Gado, vo da ogri geest no kom trobi joe moro. Ma efi liebi-soema de seni joe, vo joe soekoe mi so, Masra sa sabi vo finni dem. Bikasi dem de soekoe mi soso, vo jagi mi gowei, poeloe mi na mi kondre, meki mi go na wan heiden-kondre, dini tra gado. Di joe soekoe mi so, a tan leki da koning vo Israel no habi wan tra wroko moro, leki vo go feti nanga wan soso flei, en vo go honti wan bana-fowloe na sabana. Joe denki, dati sa gi joe wan bigi nem na tra soema?
We di David taki so, a potti alasani na hem fesi sondro wan asranti, dati meki Saul kom fili wan fomfom na ini hem hatti, a bekenti hem zondoe, a taki: Ke, mi pikien David! mi doe joe ogri troe, mi trobi joe soso, ma mi no sa doe moro; bika tidei mi srefi si, mi liebi ben de na joe hanoe, efi joe ben wani, joe ben kan kili mi, ma joe no wani doe mi ogri. Mi wawan de da ogri soema, mi srefi si, mi no ben doe reti, en dati hati mi vo troe; we doe mi da plisiri en kom nanga mi, liebi baka na mi hoso. Ma David taki, no no, hem no kan vertrouw hem moro, alwasi hoesan Saul taki, alwasi hoesan a pramisi, ala hem vertrouw de na hem Gado Jehova wawan. Na baka Saul taki hem adjosi, en sinsi da dei dem no si dem srefi moro.
1. We da heeli tori de sori wi, fa nooiti David ben soekoe wan tra helpi, leki di vo hem Gado wawan; en alatem, te a poeloe hem hatti gi Masra, te a kre hem nootoe gi hem, Masra no ben mankeri toe, vo helpi en vo troostoe hem. We meki wi doe so srefi toe, te wi kom na wan hebi, dan Masra sa jeri da poti begi vo wi so srefi toe.
2. David no ben wani pai ogri vo ogri baka, alwasi toe-tron a ben kisi Saul na hem hanoe, vo a ben kan kili hem; ma dati a ben libi abra na hem Gado. Apostel Paulus vermane dem bribi-soema na Rom, a taki: Oen lobbi brara vo mi, no soekoe vo helpi oen srefi, pai ogri vo ogri baka, ma te trawan doe oen ogri, libi dati abra na Gado! Bikasi Masra taki, dati da hem wroko, vo pai ogri baka. (Rom. 12, v. 19.)
3. Saul ben sabi heeli boen, taki, hem no doe reti nanga dati, disi a soekoe David, vo kili hem, ma ala dati a no kaba na hem baka. We efi wan soema doe wan ogri nanga hem srefi boen sabi, dati de ogri vo troe.
(1. Sam. Kap. 27 tee 2. Sam. Kap. 1.)
Di David no ben kan vertrouw Saul moro, alwasi a ben pramisi hem toetron kaba, taki, hem no sa soekoe hem moro, we dati meki a go kibri tee na Filistri-kondre, en koning Akis, disi ben jagi hem tra jari, teki hem baka di leisi, meki a go liebi na hem koning-foto Gat, hem nanga dem siksi-hondro soema, di ben de nanga hem. Ma na baka David begi hem, vo a gi dem wan tra pikin foto, en Akis gi dem da foto Ziklag, meki dem liebi dapee. We ala dem tin na siksi moen, di dem ben de na Ziklag, David go feti nanga dem soema vo Amalek en vo Kanaan, di ben liebi na dem buurti, en a kili dem alamal, so leki Gado ben gi da ordre na Josua tem kaba. Ma vo dati Akis no ben sabi noti, a ben denki alatem, David go feti nanga dem Israel-soema srefi. En di Akis srefi ben pramisi granwei kaba, vo go feti nanga Saul, vo da hede a komanderi David toe, meki hem nanga ala dem tra soema vo hem kom helpi hem.
We dati tjari David na wan bigi verlegi; bika efi a taki ja, dan a verpligti, vo go feti nanga hem eigen kondre srefi, en efi a taki no, dan a moe frede, koning Akis sa kom kili hem. Ma Gado skiki dati so, vo David srefi no ha vo go na ini da feti; bika dem tra Filistri granman no ben wani hem, en vo da hede Akis bedanke hem baka.
We di David kom na hoso baka na Ziklag, a si dem soema vo Amalek ben doro na ini da foto, foefoeroe ala dem oeman nanga dem pikien, so srefi dem ben potti faja na ini, pori da heeli foto. We dati hati David toemoesi, en dem alamal bigin kre so, tee dem no kan moro. Ma dem tra soema meki trobi nanga David srefi, dem taki, da hem skulti dati, vo disi a ben komanderi dem, meki dem go na da feti, en nanga da hattibron-fasi dem wani kili hem nanga stoon srefi. Ma di David kre da nootoe gi hem Gado, en di Masra meki domine Abjatar taki gi hem, vo a moe feti na dem foefoeroeman baka, hem nanga dem soldati vo hem, David go poeloe ala dem oeman nanga dem pikien baka na dem fetiman hanoe, tjari kom na hoso; en buiti dati a teki so meni skapoe nanga kow vo dem heiden-soema, tjari go nanga hem, vo wan boetoe, vo a pai dem da ogri baka pikinso, disi dem ben doe hem.
Ma toe-hondro vo dem soema, disi David ben komanderi, vo feti na dem foefoeroeman baka, dem ben fika na baka de wakti David na wan pikin kriki, bikasi dem ben weri, tee dem no kan waka moro. We di David nanga dem tra fo-hondro soema drai baka kom teki dem, som vo dem taki, dem toe-hondro soema no moe platie na ini dem skapoe nanga dem kow, di dem ben kisi, vo di dem no ben helpi dem vo feti. Ma David taki: No no, a no so oen moe handri dem brara vo oenoe. Da srefi porsie, disi oenoe kisi, di oen ben go na feti, da srefi porsie dem trawan moe kisi toe, disi ben tan wakti wi goedoe dia.
We ala disi David ben habi da trobi na Ziklag, dem Filistri ben meki dem srefi klari, vo go feti nanga Saul, dem meki wan bigi kampoe na Sunem. En Saul, disi ben habi hem kampoe na Gilboa, di hem si da bigi-bigi hipi vo dem Filistri, a kom frede vo troe, a no habi hatti srefi, vo go feti nanga dem; bikasi hem eigen konsiensi srefi ben trobi hem vo ala da ogri, di a ben doe. We na ini da verlegi, disi a no ben sabi reti, san a moese doe, bika sinsi da tem, disi a ben kili ala domine, en disi Abjatar ben ronwei nanga da gran-domine-hempi, Masra no ben piki Saul moro, no nanga drem, no nanga da domine-faja, no nanga wan profet, no na wan fasi, alwasi Saul ben haksi hem: we dati meki a go taki nanga dem amtenari vo hem, vo dem loekoe wan oeman gi hem, disi kisi winti, hem habi vo haksi hem wansani. Dem taki: We wi sabi wan oeman na Endor, disi de wan wintiman. Ma di Saul srefi ben jagi ala loekoeman en wintiman komopo na hem kondre, datem di hem hatti ben moro krin vo hem Gado jete, we vo da hede a verpligti now, vo poeloe hem koning-klosi, weri trawan, vo dem no sabi hem.
We di a kom na da oeman hoso da srefi neti, hem nanga wan toe dri mansoema moro, a taki gi da oeman, meki a dansi winti gi hem, vo a kan jeri, san da winti sa taki, en meki a koman-deri wan dede-soema jorka kom na hem djoesnoe de. Da oeman taki: Joe no sabi, sani Saul ben doe tra jari? fa a ben jagi ala wintiman en loekoeman komopo na hem kondre? Mi bribi, joe wani kori mi. Somtem joe kom seti wan trapoe gi mi, vo dem kili mi toe? Ma Saul taki: No no, mi sweri vo Gado, mi no kom seti trapoe gi joe, joe no sa kisi wan ogri. Toen da oeman haksi hem, a taki: We hoesoema mi sa meki kom na joe? En Saul taki: Da Samuel joe moe kali gi mi.
We da oeman doe so, a bigin meki hem flousoe, en dan a bari tranga, a taki: Ke, mi si wansani, wan jorka komopo na ondro gron! Saul taki: Hoe fasi a habi? Da oeman taki: Da wan ouroe soema, a weri wan langa hempi. We na dati Saul sabi wantem, da ouroe soema, disi da oeman de si, da Samuel srefi; en nanga bigi respeki a hiti hem srefi na gron gi hem. Ma Samuel haksi Saul, a taki: San joe de trobi mi so, meki mi kom diaso? Saul taki: Ke mi de nanga toe-moesi frede, bikasi dem Filistri kom feti nanga mi, en Gado libi mi krin-krin, granwei a no piki mi moro, no nanga drem en no nanga profeti toe; we vo da hede mi seni kali joe, vo joe sori mi, san mi moese doe.
Samuel taki: We di Gado libi joe kaba, a tron joe vyanti, san joe ha vo haksi mi dan? Masra no ben meki wi waarskouwe joe kaba, taki, hem sa poeloe joe na koning, potti David na joe plesi, vo di joe no ben wani gehoorzam hem? We dati a de go doe now. Tamara mamantem joe nanga dem pikien vo joe sa de nanga mi, bikasi dem Filistri sa winni da feti, dem sa kom masra vo ala joe soldati.
We di Saul jeri so wan taki, a skreki so, tee a fadom langa-langa na gron, bikasi a ben flauw reti-reti, vo di a no ben njam wansani wan heeli dei nanga wan heeli neti. We so hesi da oeman kom na ini, di a si Saul nanga da skreki so, djoesnoe a deki tafra gi hem, vo meki a njam pikin brede, bifo a go baka, ma Saul taki, hem no wani, tee bakatem dem tra soema, disi ben kom nanga hem, dem dwingi hem, vo a njam wansani, en da srefi neti a drai baka go na hem kampoe.
Dei-broko mamantem dem Filistri doro na hem tapo nanga feti, en di ala dem Israel-soldati teki ron wantem, dem Filistri feti na dem baka, dem kili dem alamal na tapo da bergi Gilboa. So srefi dem feti toe na Saul baka, dem kili ala dri pikien vo hem, Jonatan nanga dem toe brara vo hem. En di dem soetoe toemoesi pyl na Saul srefi tapo, dati meki a kom frede so, tee a taki gi hem adjoedanti, meki a hali hem houroe, kili hem wantem, vo dem heiden-soema no moe kili hem, meki spotoe nanga hem. Ma di da adjoe-danti frede, vo doe dati, Saul srefi teki hem lanza, a kili hem srefi. En di da adjoedanti si dati, a doe so srefi toe, a kili hem srefi, vo a dede nanga Saul makandra.
We da so koning Saul nanga dem dri pikien vo hem, nanga hem adjoedanti, nanga ala man-soema vo hem famili, dem alamal dede da srefi dei. Dei-broko mamantem dem Filistri kom poeloe dem soema klosi, disi ben dede na ini da feti, en di dem finni, Saul toe de na ini, djoesnoe dem koti hem hede, dem hanga hem na ini da kroe-koetoe-gado-temple vo dem, en da skin vo hem dem teki, spikri na wan bigi stoon-muur, meki a hanga dapee. Ma di dem soema vo da foto Jabes na Gilead jeri ala dem tori, en di dem kom membre da helpi, disi Saul ben helpi dem wan jari, we dati gi dem hatti, vo dem go poeloe da dede-skin vo Saul dapee na neti, nanga di vo hem pikien toe, dem beri dem klosibei na dem foto.
We da so Saul dede na ini hem zondoe, disi a no ben ke vo dasani, disi Gado ben taki gi hem, en disi a ben go haksi wan wintiman nanga wan dede-soema jorka, na plesi vo a soekoe hem Gado Jehova baka. We vo da hede Masra poeloe hem na grontapo, meki David tron koning na hem plesi.
Ma ala dati, di dem feti da feti so, David ben tan vo hem na Ziklag, sondro a ben sabi, sani pasa. Dri dei na baka fosi wan soldati vo Saul kom na hem dapee, a gi hem da njoesoe, taki, Saul no de moro, a dede kaba. We da tori ben pasa so: Di da soema kom na David fesi, a hiti hem srefi na gron gi hem nanga bigi respeki, en David haksi hem, hoepee a komopo? Da soema taki, na da bigi feti hem komopo. Toen David haksi hem ageen, fa da feti ben waka; en da soema bigin verteli hem da heeli tori, fa dem Israel-soema ben ronwei vo dem vyanti, en fa dem Filistri ben feti na dem baka, kili so meni vo dem, en Saul srefi nanga hem pikien Jonatan dede toe na ini da feti.
Ma David haksi da jonkman moro fini, di tjari da njoesoe kom gi hem, a taki: Hoesoema verteli joe, taki, Saul nanga hem pikien Jonatan no de moro? Da soema taki: Mi srefi hai ben si; bika di mi kom na da bergi Gilboa, mi miti Saul lidom na hem lanza tapo, en dem Filistri ben de na hem baka. Ma di a si mi, a kali mi kom na hem, a taki, meki mi kili hem. We di a verzoekoe mi dati, mi go teki hem lanza, mi kili hem; bika mi srefi si, so leki a ben de, a no kan liebi moro. Na baka mi teki hem koning-hatti, poeloe na hem hede, nanga ala tra mooi-mooi, di a ben weri na hem skin; joe si? mi tjari ala kom gi joe, mi masra. Ma da soema lei dati, bika a ben denki, somtem David sa gi hem wan bigi presenti, disi a tjari so wan njoesoe kom gi hem.
Ma da boodskopoe no ben plisiri na David kweti-kweti; kontrari, a kom na wan toemoesi sari vo dati, hem nanga ala dem tra soema, di de nanga hem, dem alamal kre so, tee dem pliti dem klosi vo sari hede, disi dem jeri so wan tori. En David krasi da jonkman, a taki: Fa joe no ben frede, vo kili so wan gran-soema vo Jehova! En da srefi momenti a komanderi wan vo dem jonge soldati vo hem, a taki, meki a kisi da soema wantem, fassi hem, vo a no ronwei go na dem Filistri; en wantem da soldati djompo kom, a naki hem, tee a dede. We da so da ogri soema kisi hem reti paiman, disi a verdini vo da takroe lei, di a kom lei gi David; en buiti dati da soema ben de vo Amalek, disi Gado ben taki gi dem pikien vo Israel, dem moe kili dem alamal, tee no wan soema libi abra moro.
Ma David kre reti-reti vo Saul en vo Jonatan en vo ala dem tra Israel-soema, a meki wan kre-singi srefi vo dem, a taki: Ke, a hati mi, disi dem gransoema vo Israel dede so na tapo da bergi! Dem moro beste ofciri no de moro. Meki dem Filistri no moe jeri dati nooiti, vo dem heiden-soema no holi wi vo spotoe. Troe, a hati mi vo joe, mi brara Jonatan; bikasi mi ben lobbi joe alatem, mi ben lobbi joe moro srefi, leki wan man kan lobbi hem wefi.
1. We da exemple vo David, disi a ben respeki Saul so, ala disi Saul ben doe hem so meni ogri, dati de leri wi da srefi sani, disi hem pikien Salomo taki na wan spreekwoortoe vo hem, di a taki: No lafoe joe vyanti, te joe si a fadom na wan ongeluk, bikasi Gado no lobbi so! (Kap. 24, v. 17 & 18.)
2. Disi Saul ben go na da oeman na Endor, en ala-sani, disi pasa hem dapee, wi no kan sabi, efi da kori soso da oeman ben kori hem, efi somtem didiebri srefi ben dwingi da oeman, vo a moese taki so. Ma dati wi kan sabi vaste, ala tofroe-wroko en ala taki vo dem winti-man en kartaman, dati de wan didiebri-wroko, noti moro. Gado Masra no kan verdragi dati. (5. Mos. Kap. 18, v. 10 tee 12.) We hem srefi moe kibri wi en ala soema, vo wi no bemoeje nanga sosani!
3. Da tori vo Saul de gi wi wan boen waarskouwe toe, di a sori wi, fa wan soema kan tjari hem srefi na broeja, efi a libi hem Gado. (Jerem. 17, v. 5.) So leki Saul no ben wani saka gi Jehova, begi hem pardon, ma na plesi vo dati a go haksi rai na da oeman, en na baka a soekoe vo kili hem srefi, we so srefi nofo soema doe tee tidei jete; so hesi dem konsiensi wieki pikinso, a bigin trobi dem vo ala da foeloe ogri, disi dem ben doe, dan a no boen na dem, vo bekenti dem zondoe gi Masra begi hem pardon; ma na plesi vo dati dem taki, betre dem kili dem srefi; en da so dem potti zondoe na zondoe tapo, tee bakatem dem no kan drai dem liebi moro.
4. Da falsi soema, disi ben tjari da boodskopoe kom na David, taki, da hem ben kili Saul, a ben membre, David sa gi hem wan bigi moni vo dati, ma na plesi vo dati da leiman kisi hem reti strafoe wantem, so leki a ben fiti hem. We da tori de gi wi wan boen waarskouwe toe, a sori wi, fa ala lei-taki de wan toemoesi takroe sani na Gado hai. En alwasi wan leiman kan poeloe hem srefi na liebi-soema strafoe, tog Gado sabi vo kisi hem; bikasi hem no kan verdragi dem falsi soema. (Psalm 5, v. 7.)
(2. Sam. Kap. 2 tee Kap. 10.)
(Datem omtrenti 2900 jari ben pasa, sinsi Gado ben meki grontapo. En a ben de omtrenti 1055 jari, bifo Kristus gebore.) Di David ben sabi granwei kaba, dati hem de da soema, disi Gado wani, a tron koning vo Israel na Saul baka, bikasi Masra ben meki profet Samuel wye hem kaba, di a ben de na hem tata hoso jete; we now di a jeri, Saul dede troe-troe, a sidom prakseri, san vo doe. En di David no ben lobbi doe wan sani, sondro vo haksi Gado bifosi, efi hem tevrede so, vo da hede a meki domine Abjatar weri hem domine-hempi, haksi Masra gi hem, efi a kan go liebi now na wan foto na Juda-kondre. En Masra taki ja, meki a go. Toen David haksi hem ageen, na hoe foto a moe go; en Masra taki, na Hebron. Bikasi datem Hebron ben de da koning-foto vo Juda-kondre, en ala dem ouroe-tem-gran-soema ben liebi dapee, dem beri dapee toe.
We da so David verhuizi, a go liebi na Hebron, hem nanga hem famili, nanga ala dem foeloe tra soema, disi ben de nanga hem fositem, en disi ben go abra jete bakatem, ala di a ben liebi na Ziklag. We dati doe dem soema vo Juda-kondre foeloe plisiri, bikasi David ben de wan soema vo da srefi famili, en heeli kondre ben lobbi hem. Vo da hede dem no drai langa toe, vo teki hem, dem kali ala mansoema kom makandra, dem potti hem vaste vo koning, meki a tiri dem kondre. We da so da liebi vo David kisi wan heeli verandre. Pikin-moro dri jari langa a ben pina toemoesi nanga ala soortoe hebi en verdriti, di Saul ben de soekoe vo kili hem. Ma now di hem srefi tron koning, en di a kom na wan boen liebi, now a habi vo wakti hem srefi wan tra fasi, vo a no kisi bigi membre.
Da fosi koning-wroko di a doe, dati ben de, vo seni taki dem soema vo Jabes gran-tangi, disi dem no ben vergiti da boen, disi Saul ben doe dem, en disi dem ben foefoeroe pasi, beri Saul nanga dem pikien vo hem makandra. So srefi a seni taki gi dem, dem no ha vo frede noti, alwasi Saul dede kaba; bikasi hem srefi tron koning vo Juda noja, en so leki Saul ben de wan boen buurman vo dem alatem, so srefi hem no sa mankeri toe, vo helpi dem, te wan tra kondre kom feti nanga dem.
Ma dem tra bigi famili vo Israel no ben teki David vo koning so wantem; bikasi nofo vo dem ouroe amtenari ben de jete, disi ben ogri so srefi, leki Saul; en vo dwingi? David no ben wani dwingi dem, vo dem teki hem toe, a taki, betre hem tan so langa, tee dem srefi kom verzoekoe hem. We wan pikien vo Saul ben de jete, hem nem Isboset, dati ben de na loo, vo tron koning na hem tata baka. Ma di a no ben de wan bekwaam soema, a ben dom pikinso, en di hem srefi ben sabi heeli boen, David de da soema, disi Gado wani, a tron koning, vo da hede hem no soekoe dati, a meki no wan pikin moeiti srefi, vo teki hem tata wroko abra.
Ma hem oom Abner, disi ben de wan gran ofciri vo Saul, hem dwingi Isboset nanga tranga, a teki hem, tjari go na Mahanaim, en na dapee a potti hem vo koning na heeli Israel-kondre tapo. Buiti da wan pikin kondre vo Juda, dati wawan ben, teki David vaste kaba. Ma Abner ben de wan falsi soema vo troe, en di Isboset srefi no ben bekwaam nofo, vo da hede Abner kori hem, a meki da onnoozloe koning doe alasani, disi hem wani. We alwasi Abner ben sabi toe, Gado wani, David moe tron koning vo heeli Israel-kondre, tog a seni kali ala dem soldati vo Isboset kom makandra, a tjari dem go na Gibeon, en na dapee a komanderi dem, vo dem go feti nanga David en nanga dem soema vo Juda famili, meki da kondre kom na hem ondro toe.
Ma Joab, da komandanti vo David, -- a ben de hem sisa pikien -- hem teki ala hem soldati toe, a go miti Abner, en dem feti wan bigi feti makandra, tee bakatem Joab kom masra vo da feti, en Abner srefi ben moese teki ron go kibri. Ma Joab brara Asahel, wan hesi soema, di ben kan ron leki wan dia, hem feti na Abner baka, vo kisi hem; ma Abner teki hem lanza, a soetoe hem nanga baka, en a kili hem. Na baka dem soldati vo Isboset go kibri wan piesi tem na Jordan sei, vo bro pikinso.
We di David ben pramisi Saul, taki hem no sa trobi hem famili, vo da hede hem wawan no ben sa soekoe da feti moro, efi da ogri Abner no ben steeki Isboset, taki, dem no moe kaba da feti so langa, tee dem poeloe David baka na koning, meki dem kom masra vo Juda-kondre toe. Ma alwasi Isboset hopo da feti njoe-njoe baka, so leki hem oom Abner ben rai hem, tog Gado meki a no kan winni wan feti moro, en nanga dati da kondre vo hem kom verzwaki moro-moro. Bikassi di a ben hati ala boen soema vo dem tra famili vo Israel disi dem moe feti so, brara nanga brara makandra dati meki nofo vo dem libi Isboset safri, dem go abra David. En buiti dati Abner nanga Isboset srefi kisi trobi makandra toe, vo di Abner ben teki wan vo dem oeman vo Saul vo hem wefi, en na ini da trobi Abner bedanke Isboset, a pramisi hem, taki, hem sa go abra toe na David, en dan a sa meki heeli Israel-kondre libi hem, potti David vo koning. We di Abner taki so, Isboset no piki hem wansani, bikasi hem srefi si, a moro betre vo hem, David habi vo komanderi na hem tapo, leki Abner moe tan hem voogtoe alatem.
We hesi Abner seni wan boodskopoe go na David, a seni begi hem, vo a meki fri nanga hem, dan hem sa kom teki diensti na David, en heeli Israel-kondre sa kom na hem baka, teki David vo koning. David seni piki hem, a taki: We, a boen, mi sa meki fri nanga joe, ma fosi joe moe seni mi wefi Mikal kom baka na mi. Da srefi boodskopoe David seni toe gi Isboset, en Isboset tevrede toe, a seni teki da oeman wantem.
We ala dati Abner ben seni kali ala gransoema vo heeli Israel-kondre kom makandra, a haksi dem, efi dem no membre, a sa boen, vo dem toe teki David vo dem koning, bika granwei Masra Jehova ben wani so kaba. En dem alamal taki, ja nanga ala plisiri dem sa teki David vo dem koning. Toen Abner srefi go loekoe David na Hebron, vo gi hem da njoesoe, en David ontvanga hem nanga ala respeki, a meki wan bigi trakteri gi hem, en dan a seni hem go baka, vo a meki ala Israel-soema kom makandra na Hebron.
Ma Joab, da komandanti vo David, hem no ben de na hoso da srefi joeroe, di Abner kom meki da fri nanga David, a ben de na wan bigi patroeli, vo jagi dem heiden-soema komopo na kondre, disi ben kom trobi dem toemoesi nanga foefoeroe; en Gado ben helpi hem toe, vo a broko da heeli kampoe vo dem, a tjari foeloe goedoe kom gi David, di a ben finni na da kampoe. Ma di Joab jeri, Abner ben de nanga David, en da so da so David ben ontvanga hem, dati meki hem kisi toemoesi hattibron, a go meki trobi nanga David, a taki: Fa joe kan doe so? mi jeri Abner kom na joe, kaba joe meki a gowei baka, sondro joe pai hem da ogri baka, disi a ben doe wi? Bikasi Joab ben holi Abner toemoesi na hatti jete, vo disi a ben kili hem brara Asahel; a no ben kan vergiti hem dati.
We di David no piki hem vo dati, Joab srefi pramisi Abner na ini hem hatti, taki, hem srefi sa pai hem. En so hesi a komopo na David, wantem a seni wan toe dri soldati gowei, meki dem kali Abner kom baka hesi, bikasi David wani taki nanga hem. Ma dati no ben troe, bikasi David no ben sabi noti vo dati. We di Abner kom baka na Hebron, Joab go teki hem hafoe-pasi, a tjari hem go na hem hoso, a doe, leki a habi wan kibri-tori, vo taki nanga hem. Ma so hesi dem doro na ini da kamera nomo, Joab teki hem houroe, a soetoe hem na ini Abner hatti, tee a dede wantem.
Ma di David jeri da tori, dasani hati hem vo troe; bikasi alwasi Abner ben doe ogri troe, disi a ben feti nanga David fositem, en alwasi a ben kili Joab brara na ini da feti, tog di David ben meki fri nanga hem kaba, a no ben fiti Joab moro, vo hem go kili Abner baka na so wan konkroe fasi; dati no ben mooi kweti-kweti. We vo da hede David kre vo Abner reti-reti, a meki dem beri hem nanga ala respeki, so leki a fiti so wan gran ofciri; en David srefi waka na da lyk baka, hem nanga ala dem tra granmasra vo kondre; en a kre vo hem so tee ala dem trawan bigin kre toe.
So srefi David no mankeri toe, vo taki na ala soema publiki, taki, hem no kan helpi, hem no ben seni Joab, vo go kili Abner. Kontrari, efi hem habi moro tranga na kondre kaba; efi hem no de so wan njoe-njoe koning jete, a sa strafoe Joab wantem; ma so leki hem de, efi a kili Joab, a moe frede; somtem dem tra soema kan meki wan oproeroe. Iniwantem Gado srefi sa sabi, vo finni Joab, pai hem da ogri baka. We nanga dati ala Israel-soema kom si, troe-troe David no kan helpi, hem no ben seni Joab, vo a kili Abner; ma so leki David ben holi hem srefi, dati ben switi na dem vo troe.
We now koning Isboset no ben habi wan reti soema moro, di kan helpi hem, bikasi pikin-moro ala dem granmasra vo kondre ben libi hem, dem go abra na David kaba; en wan bakadina di a lidom slibi na hem kamera, toe ofciri vo hem doro na hem tapo, dem kili hem. Na baka dem koti hem hede, dem tjari hem kom gi David na Hebron, dem taki: Joe si? wi tjari da hede vo joe vyanti Isboset kom gi joe, di ben soekoe, vo kili joe! Tidei Masra gi joe satisfaksi. Ma David no teki dati vo boen kweti-kweti, a krasi dem, a taki, nanga kiliman hem no ha wroko; bika no wan soema ben seni dem, vo dem go kili da pikien vo Saul. En wantem a komanderi hem soldati, vo dem kili dem toe soema wantem, en dan a meki dem hanga dem skin na wan publiki plesi, vo ala soema kan si, David no wani, dem moe trobi dem pikien vo Saul, en vo trawan no moe kili trawan na wan konkroe fasi.
Na baka Gado kom naki ala soema hatti na heeli kondre, vo ala dem tra famili vo Israel seni dem gransoema go na Hebron, vo begi David, meki a tron dem koning; bika tog dem alamal de brara nanga brara makandra, en dem srefi sabi heeli boen, taki, Gado wani, David moe tiri hem kondre. We vo da hede David meki dem sweri gi hem na Jehova fesi, en da srefi dei dem teki hem vo koning, meki a tiri heeli Israel-kondre. Na baka ala dem twalf bigi famili vo Israel seni foeloe soldati go na Hebron, vo dem sweri gi David, taki, dem sa onderdaniki hem. En dem soema vo Juda famili, di ben teki David granwei kaba, dem meki wan bigi trakteri gi dem tra brara vo dem, en dem ala plisiri makandra dri dei langa. We da so David tron koning vo heeli Israel-kondre, en dati ben boen na ala soema, bikasi heeli kondre ben lobbi hem. Datem David ben ouroe dritentin jari.
We di a ben habi ala hem soldati makandra so, a komanderi dem wantem, meki dem go na Jerusalem, jagi dem heiden-soema komoto dedapee. Bikasi da bigi fortresi, disi ben de na mindri Jerusalem na tapo da bergi Zion, dati dem Jebusitri no ben gi abra jete ala dem fo-hondro jari, sinsi dem pikien vo Israel ben doro na Kanaan. En di da foto ben tranga so tee, no wan vyanti ben man jete, vo doro na ini, dati meki dem Jebusitri no sabi wan frede moro; en di dem si, David de kom, dem taki, dati no wansani, dem Gado sa helpi dem. Ma di David nanga dem tra soema ben lobbi meki spotoe nanga dem soso-gado vo dem heiden-soema, somtem dem ben lobbi kali dem blindi gado, ofoe malengriwan, (Psalm 115, v. 7.) vo da hede di David doro dapee, vo teki da foto abra, dem Jebusitri na ini foto pai dem da spotoe baka, dem teki ala dem kroekoetoe-gado-popiki, potti na tapo da bigi stoon-muur, dem taki, bifo hem srefi doro na ini foto, meki a proberi, vo poeloe dem blindi soema nanga dem malengri dapee; efi a man vo doe dati, dan hem srefi kan kom toe. Ma dati no ben habi trobi toe, bikasi Joab feti hesi, vo klim tee na tapo, a poeloe ala dem popiki dedapee, en dan David meki hem srefi kom masra vo da foto, sondro a ben trobi hem foeloe.
We da srefi plesi na tapo da bergi Zion, dati David teki wantem, vo hem srefi liebi dapee vo vaste, en vo da hede dem lobbi kali Jerusalem da foto vo David. Ma na Hebron a ben tan so langa, tee da koning-hoso vo hem klari na Jerusalem.
We da srefi tem dem Filistri kom trobi David toe-tron nanga feti, ma di a ben gewenti alatem, vo haksi hem Gado fosi, san a moe doe, we vo da hede Masra helpi hem ala toe leisi, vo a winni dem Filistri, en dati meki ala dem tra kondre na buurti kisi respeki vo hem. Koning Hiram vo Tirus-kondre seni wan expresi boodskopoe srefi go na David, vo felisiteri hem en vo meki kompe nanga hem. So srefi Hiram seni foeloe cedroe-boom gi hem, disi ben gro na tapo da bergi Libanon, nanga bekwaam timre-basi nanga metselari toe, vo dem helpi David, vo meki hem hoso mooi.
Ma David ben pramisi Masra, taki, hem no sa go liebi na ini da njoe koning-hoso vo hem, a no sa go lidom slibi srefi na ini, so langa hem no loekoe wan plesi gi da santa kisi vo Masra, bikasi ala dem jari, disi Saul ben de na koning, no wan soema ben ke vo da verbond-kisi moro. We so hesi David klari nanga hem hoso nomo, a seni taki gi ala gransoema vo hem heeli kondre en gi ala dem domine en leviti, taki, hem de go teki da kisi vo Masra kom na Jerusalem, efi dem ha plisiri vo si dati, meki dem kom hesi makandra. We dati ben de wan switi njoesoe vo da heeli Israel-gemeente, en dem alamal taki, dati boen, dem lobbi so.
We di heeli Juda-kondre kom makandra na Jerusalem, David teki dritentin doezend mansoema, alamal jonge knapoe soema, a tjari dem go na Gibea, dapee da kisi vo Masra ben kibri vyftig jari na wan leviti hoso, disi dem kali Abinadab, vo sinsi dem Filistri ben tjari hem kom baka. En di David doro dapee, dem domine go poeloe da kisi na ini da soema hoso, dem lai hem na wan njoe-njoe wagi tapo, en dem toe pikien vo Abinadab, Usa nanga Ahio, dem teki dem kow, di hali da wagi, tjari dem da reti pasi. Ma David nanga ala dem tra Israel-soema waka go na fesi, dem meki muziki nanga poukoe en nanga trompeti en nanga harpoe en nanga fluiti, en ala dati dem singi switi psalm, dem plisiri vo troe na nem vo Masra. We di dem doro na Jerusalem, na strati dem kow kom skreki vo wansani, dem djompo na sei, en dati meki Usa go fassi da kisi, meki a no fadom. Ma dati a no ben doe reti, bikasi da wet vo Gado no ben gi dem soso leviti pasi, vo fassi da kisi srefi, ma a ben taki expresi, da soema, disi habi hatti, vo go meli hem, a moese dede. (4. Mose 4, v, 15.) En vo da hede Gado kom strafoe da soema wantem, a meki a fadom dede na gron klosibei na da kisi sei, vo ala dem trawan moe kisi respeki baka vo da verbond-kisi; bika so meni langa dem no ben ke vo hem moro.
We dati gi dem alamal wan toemoesi skreki, en David voornamentlyk kom na wan bigi sari vo dati, a spyti hem vo troe, a taki, hem frede, vo tjari da kisi vo Jehova kom na ini hem hoso, somtem Gado no wani so; en vo da hede David meki dem poeloe da kisi na strati, kibri hem so langa na ini wan soema hoso, disi dem kali Obed-Edom. Ma dri moen na baka, di David jeri, sinsi da kisi ben kom na da soema hoso, Masra ben blesi da hoso nanga da heeli famili vo Obed-Edom na wan aparti fasi, dati gi hem hatti, vo a teki da kisi kom, potti na ini hem foto. Bikasi a ben meki foeloe hoso vo hem kaba; en vo da kisi vo Gado wan hoso ben klari toe, dapee a moe tan.
Ma bifo David go teki da kisi, a kom membre da aboisi toe, disi dem ben meki tra-dei, en vo da hede a gi tranga ordre, a taki, dem no moe lai hem moro na wan wagi tapo, so leki dem ben doe tradei, ma dem leviti srefi moe hopo hem, tjari hem; bikasi dati de dem soema, di Masra ben potti na da wroko, vo dem tjari da kisi, en vo dem dini hem. We David kali ala domine nanga so meni leviti kom makandra, a meki dem wasi dem srefi, holi dem srefi klari, vo dem kan go teki da kisi nanga ala respeki. So srefi David potti dem singiman nanga dem domine, disi blo dem trompeti, nanga som tra soema, disi moe waka na da kisi sei, leki skoutoe, vo no wan soema moe drifi toemoesi klosibei, kisi wan onge-luk, so leki dasani ben pasa tra leisi. Da heeli sani ben tan, leki wan bigi beri. Di dem hopo da kisi, dem meki ofrandi gi Masra, en di dem saka hem baka, dem doe so srefi ageen.
David srefi ben poeloe hem koning-klosi so langa, a weri wan fini domine-hempi, leki ala dem tra leviti, en nanga bigi plisiri a waka go na da kisi fesi, a singi Jehova gran-tangi tee a djompo srefi. Ma di da kisi kom pasa hem hoso, hem wefi Mikal loekoe na abra fensre, en di a si, David de waka so, moksi nanga dem trawan, a fui hem na ini hem hatti, a taki, dati no fiti so wan bigi koning. We so hesi dem doro tee na tapo da bergi Zion, David meki dem potti da kisi na ini da mooi tenti, di a ben meki klari vo hem. Na baka a blesi da gemeente na nem vo Masra Zebaot, a meki dem potti brede nanga meti nanga wini, platie gi dem, leki wan liefdemaal, en dan dem alamal go baka na hoso nanga bigi plisiri en nanga kouroe hatti.
So srefi David, di a potti alasani reti kaba, a go vo hem na hoso, vo blesi hem famili toe. Ma hem wefi Mikal, da pikien vo Saul, kom miti David hafoe-pasi, a spotoe hem, a taki: Ke fa da koning vo Israel ben mooi tidei! Dem bakra-hoso-oeman vo mi ben si joe tidei, fa joe ben waka soso, no leki wan koning, ma leki dem moro laage soema vo kondre. Ma David gi hem wan verwyti, a taki: We, mi wani so. Meki mi plisiri na da bigi Masra fesi, disi ben teki mi, potti mi vo koning na hem kondre, na plesi vo joe tata! Mi wani vo kom moro laage na mi srefi hai, meki mi kisi wan nem na Masra. We vo da bigi membre hede en vo da spotoe, disi Mikal ben spotoe David, Masra srefi strafoe da oeman, a meki hem bele tapo, vo a no kan meki pikien.
Na baka David no lasi tem, vo potti dem leviti na dem wroko, meki dem dini Jehova na sei da santa kisi vo hem, a potti Assaf nanga dem brara vo hem, vo dem singi switi psalm gi Masra, en vo dem pryze Jehova ala dei nanga trompeti en nanga ala soortoe mooi psalm, di David nanga Assaf srefi ben meki. Bika Assaf ben de da hedeman vo ala dem tra singiman.
Ma da verbond-hoso srefi, di dem ben meki na pasi, na sei da bergi Sinai, dati David libi na Gibeon so langa, tee da njoe temple sa klari, di a ben prakseri vo meki na Jerusalem srefi. En vo da hede a meki grandomine Zadok nanga dem tra domine tan so langa na Gibeon, vo dini Jehova dapee nanga dem ofrandi ibri mamantem nanga ibri sabatem, so leki da wet-boekoe vo Masra leri dem.
We na baka di David ben liebi boen na hem koning-hoso, en di Gado ben meki no wan vo ala dem heiden-kondre na hem buurti kom trobi hem nanga feti wan toe dri jari langa, wan dei a kali profet Natan kom na hem, a taki gi hem: Joe si? mi de liebi na wan cedroe-hoso, ma da verbondkisi vo mi Gado Jehova de tan na ondro wan soso tenti. Mi no moe meki wan cedroe-hoso toe gi hem, meki Jehova kan liebi dapee na hem temple? Natan taki: We, a boen, go doe dasani, disi de na ini joe hatti, Gado sa de nanga joe.
Ma da srefi neti Gado Masra kom piki Natan, a taki gi hem: Go na mi foetoeboi David, taki gi hem, a no hem sa meki wan hoso gi mi, vo mi liebi na ini, bikasi nooiti wantem mi ben soekoe dati; ma di a de lobbi mi so nanga hem heeli hatti, mi sa meki wan hoso gi hem, dati sa tan tee vo teego. En te hem no de moro, te hem go slibi kaba, dan mi sa meki wan pikien vo hem tron koning, hem sa meki wan hoso gi mi, en mi sa meki da koning-kondre vo hem tan teego.
We di Natan kom verteli ala dati gi koning, David kom sjem vo troe vo da lobbi, disi hem boen Gado lobbi hem so, en sondro a kan piki da profet wan woortoe, a go wantem na ondro da tenti, dapee da verbond-kisi vo Masra de, a poeloe ala hem hatti gi Masra, a taki: Ke mi Masra Jehova! Soema da mi? en san da mi famili, disi joe ben helpi mi tee so fara? En dati no nofo jete? mi Gado, mi Masra! Joe pramisi mi moro foeloe jete? Joe taki farawei-tori srefi gi mi. Ma gran-tangi, mi Masra Jehova! da tori, di joe pingi gi mi, hoe-soortoe tori dati? da vo wan liebi-soema soso a de taki? En na mi joe potti joe hai, di joe taki tori vo so wan gran-soema? Ke, mi Masra! mi Gado! Sani David sa taki moro, di joe meki joe foetoe-boi bigi so? Joe srefi sabi joe foetoeboi. Efi joe no ha boen hatti so, joe no ben sa meki mi jeri so wan bigi tori. We dati de gi joe srefi wan bigi nem vo troe. Bika ala dem tori, disi wi jesi ben jeri, dem de meki wi si, troe so wan bigi Gado no de moro, buiti joe. Dasani disi joe ben doe nanga wi Israel-soema, di joe ben poeloe wi na Egipti, tjari wi kom dia, dati joe no ben doe nanga wan tra kondre.
We Masra, gran-tangi! Meki alasani kom so teego, leki joe ben pramisi joe foetoeboi nanga hem famili! Doe so, leki joe ben taki! Dati sa gi joe wan bigi nem. Ala kondre sa taki: Masra Zebaot, da Gado vo Israel, hem de wan bigi Gado troe. We mi Masra, mi Jehova, di joe ben plisi so, vo blesi da famili vo joe foetoeboi so, gran-tangi! doe wi moro boen, meki wi tan na joe fesi teego! A no so joe ben pramisi mi? We joe srefi sa blesi mi famili teego; bika da soema, di joe de blesi, hem habi blesi teego!
Na baka vo da tori David meki ondersoekoe, efi somtem wan soema vo Saul famili de jete; disi a kan teki, doe hem boen. En wan soema kom taki gi hem, wan pikien vo Jonatan de jete, dem kali hem Mefiboset, ma a laam, tee a no kan waka. Bika datem, disi Saul nanga Jonatan dede na feti, da pikien ben ouroe feifi jari, en di dem kisi da njoesoe, taki, Saul nanga Jonatan dede, da minna, disi ben loekoe da pikien, a kom frede so tee, a ronwei, libi da pikien soso, en da poti pikien fadom, a kisi wan mankeri na hem foetoe, tee a kom laam. We da srefi Mefiboset David seni teki wantem, meki a liebi na Jerusalem, en meki a kom njam na hem tafra aladei. Dati ben doe David foeloe plisiri, vo hem tata Jonatan hede.
1. We da tori vo Usa, disi ben fassi da santa verbond-kisi vo Masra, en disi fadom dede na gron wantem, dati de gi wi wan boen waarskouwe, meki no wan soema habi hatti, vo meki spotoe na kerki, vo kom na da santa tafra vo Masra, efi vo teki da santa doopoe, sondro wan reti respeki. Bikasi da soema, disi doe so, a de go kisi hem strafoe toe, alwasi a sa kisi hem, te a dede. (1. Kor. 11, v. 29.)
2. Disi Obed-Edom ben meki da kisi vo Gado tan so langa na ini hem hoso, vo da hede Masra ben meki ala hem wroko waka boen toemoesi. We so srefi tee tidei Gado de blesi ala dem soema, disi de lobbi lesi hem tori na dem hoso, en disi doe so toe, leki da tori taki.
3. David ben hangri toemoesi, vo meki wan kerki, wan temple gi hem Gado. We so srefi ala koning en ala gran-soema vo kondre moe loekoe dati toe vo dem pligti, vo dem meki kerki gi dem soema, di de na dem ondro, en vo dem helpi dem, meki dem tron boen Kristensma; dati sa meki dem onderdaniki dem gransoema toe.
4. Da plisiri, disi David ben plisiri da joeroe, di dem teki da kisi vo Masra kom, dati no ben de wan zondoe-plisiri, ma a ben de wan reti Gado plisiri, so leki apostel Paulus vermane dem bribi-soema na Filippi, di a taki: Oen plisiri nanga Masra alatem! (Fil. 4, v. 4.) Ma dati no moe meki wi taki, disi David ben de djompo so, dati de gi wi reti toe, vo go wildri en vo soekoe soso zondoe-plisiri.
5. Mikal ben taki, David no ben moese meki hem srefi familiari so, vo go singi Masra moksi nanga ala dem tra soema, hem bigi toemoesi vo dati. We nofo soema habi da srefi bigi membre tee tidei jete, dem taki, dem bigi toemoesi, dem no kan go sidom na kerki, moksi nanga ala dem laage soema. En dati meki Gado no kan teki dem toe na hem kondre, moksi nanga ala dem poti bribi-soema vo hem.
6. Da pramisi, disi Masra ben pramisi David vo da pikien, disi hem koning-kondre sa tan teego, dati ben taki vo wi Masra Jesus Kristus. En David srefi ben sabi dati toe, bika a ben meki foeloe psalm, disi taki vo da Messias, disi dem ouroe-tem bribi-soema ben verwakti. We di David ben taki hem Masra tangi so switi vo da Helpiman, di ben de vo kom, fa wi moe taki hem tangi noja, di wi sabi, da Helpiman kom kaba!
(2. Sam. Kap. 10 tee Kap. 13)
Na baka vo da tem, disi David ben doe da boen na Mefiboset, Nahas, da koning vo dem Amonitri, kom dede, en hem pikien Hanon tron koning na hem plesi. We di Nahas ben asisteri David wantron na wan feti, en di dem ben de boen buurti makandra alatem, David seni wan expresi boodskopoe go na Hanon, vo troostoe hem vo da dede vo hem tata. Ma di dem gransoema vo Amon-kondre si dem soema vo David kom, dem go steeki da jonge koning vo dem, dem taki, a no moe bribi dem soema vo David, bikasi David da wan falsi soema, en disi a seni dem soema kom na hem, dati a no vo troostoe hem, ma vo dem loekoe da kondre na wan koni-fasi, en vo a kom na baka, feti nanga dem, meki hem srefi masra vo dem kondre, so leki a ben doe nanga nofo tra kondre kaba.
We di koning Hanon bribi da opsteeki-taki vo dem soema, a go kisi dem gran-soema vo David wantem, a potti dem na binfoto, a meki profoos koti dem barba hafoe-pasi, so srefi a gi ordre, vo dem koti dem klosi hafoe-pasi, vo dem no kan tapo dem skin boen, en nanga so wan sjem-fasi a seni dem go baka na David. Ma dati no waka boen gi dem ogri soema. Da tem vo dem ben kom kaba, disi dem moe kisi dem strafoe vo ala da ogri, di dem doe. Bikasi dem ben de toemoesi takroe heiden-soema. Dem ben habi wan kroekoetoe gado, disi dem kali Molok; dati ben de wan bigi popiki, leki wan liebi-soema, wan isriwan; en te dem habi wan feesti-dei, dan dem ben lobbi letti wan faja na mindri dem toe foetoe vo hem, vo meki hem heeli skin kom faja, en dan dem teki dem jonge-jonge pikien, potti na da gado hanoe, vo dem rosi vo wan ofrandi vo Molok. En so soortoe ogri dem ben doe moro. We dati meki dem kom repi noja, vo Gado doe nanga dem, so leki a ben doe nanga dem soema vo Moab-kondre; en di dem ben doe da ogri na dem gran-soema vo David, nanga dati dem ben soekoe da strafoe gi dem srefi. Bikasi di dem ben sabi heeli boen, dem doe David ogri, en di dem ben habi reti vo frede, somtem David kan kom pai dem dasani baka, vo da hede dem go joeroe foeloe soldati na wan tra kondre, dem meki dem srefi klari, vo go feti nanga David.
We so hesi David kisi njoesoe vo dati, a seni hem gran-ofciri Joab nanga ala hem soldati go feti nanga dem Amonitri. Ma so leki dem heiden kom si dem Israel-soema nomo, dem seti ron kaba, en vo da hede Joab drai baka wantem go na Jerusalem. Na baka di dem Siria-soema teki hatti, vo kom trobi David ageen nanga feti, David srefi go miti dem, hem nanga ala hem soldati, en Gado helpi hem toe, meki a winni da feti, a kili foeloe soema vo dem. Ma na baka di a jeri, dem Amonitri go kibri na ini da bigi foto Rabba, David seni Joab go dapee nanga ala hem soldati, a komanderi dem, vo dem tapo da foto rontoe, meki no wan soema komopo na doro, tee hangri kom moro dem na ini foto; dati sa dwingi dem na bakatem, vo gi abra. Ma da leisi David srefi no go na da feti, a tan vo hem na Jerusalem.
We wan bakadina di a waka koiri na da bigi gadri, di ben de na tapo hem koning-hoso, a kom si wan oeman de wasi hem skin na wan tra plasi. En di da oeman ben mooi vo troe, David kom vergiti hem Gado so, tee a seni soema go haksi, hoe oeman dati. En dem kom piki hem baka, dem taki, da oeman da Batseba, da wefi vo hem ofciri Uria, di ben go nanga Joab na feti. David taki, we a boen, en wantem a seni soema go teki da oeman, tjari kom gi hem. En di a kom, David go lidom nanga hem, en dan a meki a go baka na hoso.
Ma na baka di da oeman kisi bele, a meki David kom sabi dati. En di David no wani, dasani moe kom na krin, a prakseri wan tra-sani, a seni kali Uria kom na Jerusalem, a doe, leki hem habi vo haksi hem wansani. Bika a ben membre, te da soema kom na Jerusalem, tog a sa go loekoe hem wefi toe, en dan no wan soema kan taki, da oeman ben de nanga tra man. We di Uria kom na koning, David haksi hem wan toe dri sani vo da feti, fa alasani de waka, en dan a taki gi hem, meki a go na hoso, taki hem wefi odi, meki dem wasi hem foetoe gi hem. Ma Uria, na plesi vo a go na hem hoso, a go lidom slibi na da bigi gadri vo koning-hoso, dapee ala dem foetoeboi vo David de lidom slibi.
We dei-broko mamantem di David jeri, Uria ben slibi na hem gadri, a haksi hem, vo san hede a no ben go na hem hoso, teki hem ruste. Uria taki: No no, fa mi kan doe so! Da kisi vo Jehova de slibi na ondro wan tenti, so srefi mi komandanti Joab nanga ala dem tra soldati de slibi na dem kampoe; fa mi sa go na mi hoso, go njam en dringi, slibi nanga mi wefi? Gado sa kibri mi. Na baka David meki Uria tan wan dei na Jerusalem jete, a meki a kom njam nanga hem, en a gi hem so meni wini vo dringi, tee a droengoe srefi. Ma Uria no go na hem hoso kweti-kweti, a tan doro na koning-hoso.
We na mamantem David go sidom skrifi wan brifi gi Joab, a gi hem ordre, taki, te da feti bigin, a moe komanderi Uria, meki hem waka go na fesi, en dan Joab nanga ala dem trawan moe drai baka, libi hem, vo dem vyanti kan kili hem hesi. Da brifi Uria srefi ben tjari go na Joab.
We di Joab hopo da brifi, a lesi hem, dasani kom switi na hem vo troe, bikasi a ben de wan falsi soema alatem, en di hem srefi ben kili Abner toe na so wan fasi, now a sabi, David no kan gi hem wan verwyti moro, alwasi hoe ogri a doe. We vo da hede Joab no lasi tem, vo doe so, leki hem koning skrifi gi hem, a komanderi Uria, vo a go wakti wan plesi klosibei na da foto muur, dapee a ben sabi, wan patroeli vo dem Amonitri lidom de kibri. En so hesi Uria kisi da plesi nomo, dem soema vo foto kom fadom na hem tapo, dem kili hem nanga wan toe dri soldati moro. En wantem Joab seni wan serjanti go na koning, vo meki David sabi, san pasa.
We di Batseba jeri, hem man Uria dede na feti, a weri blaka vo hem, ma so hesi da tem vo hem pasa nomo, disi a kaba nanga da rouw, David seni teki hem, potti hem na koning-hoso, a teki hem vo hem wefi, en Batseba meki wan pikien gi hem, wan manwan. Ma da doe vo David no ben boen na Gado hai, a ben de wan takroe en fistisani vo troe.
We da srefi joeroe Joab ben winni da foto Rabba hafoe-pasi kaba, en di a wani doe hem koning wan plisiri, a seni haksi David, efi somtem hem srefi sa wani kom teki da tra hafoe abra, vo ala soema moe taki, koning srefi ben winni da foto. We David doe so, a teki ala hem soldati, a waka go na Rabba, a feti nanga dem vyanti, tee a kom masra vo da heeli foto, en dan Joab go broko da plesi krin-krin. Na baka David kisi da koning vo da foto, a poeloe da mooi koning-kroon na hem hede, a potti na hem srefi hede; en foeloe tra goedoe, disi a finni dapee, a teki, tjari gowei vo hem. Ma dem soema, disi ben liebi na ini da foto, David strafoe dem na wan toemoesi krasifasi. We da so a doe nanga ala dem tra foto toe vo da kondre, en dan a drai baka go na Jerusalem leki wan bigi winniman.
Ma now da joeroe kisi toe, disi hem boen Masra no wani, da soso grontapo-bigi nanga da zondoe-plisiri vo oeman moe blindi hem hai moro langa. We vo da hede Masra seni profet Natan go na hem, vo a hopo hem hai. Da profet bigin taki nanga David na wan koni-fasi, a doe, leki a tjari wan klagi kom na koning, a taki: Toe soema ben de liebi na ini wan foto, wan da wan goedoeman, da trawan da wan poti soema. Da goedoeman ben habi foeloe skapoe nanga kow, ma da potiman no habi noti, leki wan enkli skapoe wawan, di a ben bai, en disi ben gro na hem ondro; da skapoe njoesoe hem masra so, tee na hem hanoe srefi a moe njam alatem, na hem beker a moe dringi, na hem foetoe a moe slibi; da soema ben holi da skapoe, leki hem eigen pikien srefi, en hem nanga hem pikien ben habi toemoesi plisiri nanga da meti. Ma jere, san pasa! Wan dei di da goedoeman kisi wan visiti, a wani meki wan trakteri; ma di a hati hem, vo teki wan vo dem foeloe skapoe en kow vo hem srefi, a seni teki da wan enkli skapoe vo da poti soema, a meki dem kili hem, boli gi hem mati, vo a njam.
We di David jeri da tori, hem hatti kom bron vo troe nanga da goedoeman, a taki: Da ogri soema, disi doe so, a moese dede djoesnoe, sondro pardon, en dan dem moe teki fo skapoe vo hem, gi na da potiman baka. Natan taki gi David: We da soema da joe srefi! Bika da so joe ben doe nanga Uria; en moro ogri srefi joe ben doe hem, di joe ben meki dem vyanti kili hem; nomo vo joe kan teki hem wefi. We jere dan, san Jehova, da Gado vo Israel, seni taki gi joe! A taki: Hoefasi, a no mi ben teki joe, potti joe vo koning na Israel-kondre? A no mi srefi ben helpi joe, poeloe joe na Saul hanoe? Mi no gi joe ala hem goedoe? nanga dem oeman vo hem? nanga hem heeli kondre? En joe no sabi, fa mi ben pramisi joe so wan toemoesi bigisani jete? We fa joe ben pasa mi mofo so grofoe dan, doe so wan bigi ogri? We di joe ben vergiti mi so, mi pramisi joe, troe joe sa kisi joe strafoe; mi srefi sa seni ala soortoe ongeluk kom na joe tapo. Dem vyanti vo joe no sa kaba na joe baka, dem sa trobi joe doro ; dem pikien vo joe sa gi joe foeloe sjem en verdriti, en wan soema vo joe eigen famili srefi sa teki dem oeman vo joe, pre nanga dem na joe hai srefi. Joe ben doe dasani kibri-fasi, ma da soema sa doe joe da sjem na publiki.
We now David hai kom krin, vo a si da zondoe vo hem, disi a ben vergiti hem Gado so, en nanga bigi sari a bekenti hem zondoe wantem gi Natan, a taki: Ke mi doe ogri troe na mi Masra, mi misi mi Gado! Natan taki: We di joe fili dati en di a de hati joe, Gado gi joe pardon kaba, joe no sa dede! Ma di joe ben gi dem vyanti vo Jehova reti, vo kosi da Gado vo Israel, te dem jeri, san joe doe, vo da hede da pikien, disi joe ben meki nanga Batseba, no sa liebi, ma dede a sa dede.
We pikin-moro Natan no komopo jete na David hoso, ofoe Masra meki da pikien kom siki wantem, en di da siki kom so tranga, tee a ben de vo dede srefi, dati meki David go hesi na ondro da tenti, dapee da kisi vo Masra de, en nanga fasten en nanga bele na gron en nanga foeloe krewatra na hai a begi hem Gado toemoesi vo da pikien, dei nanga neti a kre hem zondoe gi Masra, a tan nanga wan toemoesi jamer-fasi. Wan-wantron dem gran-soema vo kondre kom loekoe hem, dem taki, meki a hopo na gron, meki a kom njam pikinso, ma a no wani. We da so David pasa wan heeli wieki, sondro a njam wansani, en sondro a finni wan slibi, a no teki no wan troostoe toe na no wan soema. En dati meki bakatem, di da pikien kom dede, dem soema ben frede, vo go taki gi hem, dem taki, a sa skreki toemoesi, te a jeri dati; da sari sa moro hem. Ma di David si, dem habi wan tori makandra, di dem frede vo taki gi hem, hem srefi haksi dem, efi somtem da pikien dede kaba; en dem taki: Ja a dede. We so hesi David jeri dati nomo, a hopo na gron, a go wasi hem srefi, a weri krin klosi, en dan a go baka na ini da hoso vo Masra, a taki hem Gado gran-tangi vo da fomfom, di a ben gi hem; bikasi a ben fili hem srefi, leki wan pikien de fili, disi sabi, a kisi hem strafoe. Na baka a go na hem hoso ageen, a meki dem potti brede gi hem, a go sidom njam vo hem.
We di dem soema vo koning-hoso kom si da bigi verandre vo hem, fa hem hatti kouroe noja, dem verwondroe vo troe vo dati, en dem haksi hem, dem taki: Hoe-soortoe sani dati, di joe doe? So langa da pikien ben de na liebi jete, joe no ben wani njam noti, da kre joe ben kre doro nomo; kaba now, di da pikien dede , joe hopo, joe go sidom njam. David taki: We di da pikien ben de jete, mi ben kre troe; bika mi no ben kan sabi, efi Gado sa sari vo mi, meki da pikien tan nanga liebi. Ma now, di a dede kaba, san mi sa sidom jete, holi fasten? dati sa meki a kom na liebi baka? Wan dei mi sa go na mi pikien baka; ma da pikien , so leki a de, a no kan kom baka na mi dia. Da so David piki dem soema, vo di dem no habi verstand vo dasani, disi ben pasa na ini hem hatti; ma David wawan ben sabi, san a ben onderfindi na ini dem sebi dei, fa hem zondoe ben kwinsi hem, en fa hem Gado ben troostoe hem baka.
We na baka David go troostoe hem wefi Batseba toe, di ben de nanga da srefi sari; en wan jari moro na baka Batseba meki wan tra pikien moro, dati dem kali Salomo. Gado ben lobbi da pikien, en hem tata nanga mama meki foeloe moeiti troe, vo kweki hem wan boen fasi.
1. We da tori vo David, disi a ben fadom so wan bigi fadom, dati de gi wi foeloe waarskouwe en foeloe leri toe. Fosi wi de si, fa wi no moe potti wi hai na wansani, disi kan meki takroe tesi hopo na ini wi hatti. Bikasi wi hatti de leki wan foengoe; so hesi hai de si sani, djoesnoe hatti de go wani.
2. David ben de wan boen bribi-soema troe, wan soema, disi Gado ben lobbi alatem; ma tog so hesi a kaba, vo wakti hem srefi, da takroe plisiri kom moro hem, tee a potti ogri na ogri tapo. Fosi a doe da ogri nanga Urias wefi, en na baka a doe wansani, disi meki a tron wan kiliman srefi. We so fara didiebri kan tjari wi alamala, so hesi wi vergiti vo tan klosibei na Gado en vo wakti wi srefi hatti.
3. So langa David no ben wani sabi hem zondoe, en so langa a no bekenti hem toe, a no ben habi wan ruste na ini hem hatti, no na dei en no na neti toe! A ben de leki wan maka de soetoe hem doro na ini hem konsiensi; en alwasi hoesani a bigin, vo meki a kom vergiti hem sari, so leki a ben go winni da foto Rabba, tog nanga ala dati a no ben man, vo poeloe da maka baka, vo a no hati hem moro. Da so hem srefi bekenti toe na baka, di a taki: “So langa mi ben wani kibri mi zondoe, ala mi boonjon kom dre, bika joe hanoe, mi Masra, ben hebi na mi tapo.” (Psalm 32, v. 3 & 4.) Ma na baka, so hesi a saka gi hem Gado nomo, Masra gi hem pardon wantem. Bikasi a begi hem nanga toemoesi pasiensi en nanga foeloe watra na hai. (Psalm 51.) Salomo taki: Da soema, disi de soekoe, vo kibri hem zondoe nanga lei en nanga stry, a no sa man kibri hem; ma da soema, disi gi abra, bekenti hem? Masra sa sari vo hem. (Kap. 28, v. 13.)
4. Disi Gado ben seni profet Natan go na David, vo a hopo hem hai na so wan koni-fasi, vo David srefi moe taki hem vonisi, sondro hem srefi ben sabi; dati Gado ben doe vo helpi hem, meki a drai baka bitem; en David teki dati toe, a no mandi nanga Natan. We tee tidei srefi, efi Gado meki wan leriman, ofoe iniwan tra boen Kristen-soema kom krasi wi vo wan ogri, di wi doe, dati de vo helpi wi toe. Boen vo wi, efi wi teki so wan vermane!
5. Te wan pikien vo Gado fadom na ini wan zondoe, dati de moro ogri, leki wan tra soema doe so wan sani. Bikasi dati de meki dem soso spotoe-soema de lafoe, dem kosi da bribi vo wi, dem taki, ala dati da soso. We juisti vo dati hede te dem pikien vo Gado de misi wansani, Masra sa poeloe hai moro tranga gi dem, leki a doe gi dem tra soema, di no sabi hem.
(2 Sam. Kap. 13 tee Kap. 23.)
Di David ben fili na ini hem hatti, taki, hem Gado gi hem pardon vo hem zondoe, sinsi da tem hem hatti kom kouroe baka; en alwasi a ben sabi heeli boen, dasani disi Masra ben pramisi hem, dati no kan mankeri vo kom, tog a no verwakti dati nanga frede, ma nanga saka-fasi en nanga toemoesi respeki. We da fosi verdriti, di a kisi, dati ben de vo hem pikien srefi. Bikasi Amnon, da gran prins vo hem, dati ben doe wan toemoesi takroe wroko nanga hem kroekoetoe sisa Tamar; fosi a dwingi hem nanga tranga, vo a hoeroe nanga hem, en na baka, di a doe hem da sjem kaba, a jagi hem, vo a no kom na hem fesi moro. Ma wan tra pikien vo David, da reti brara vo Tamar, dem kali hem Absalom, di hem si hem sisa sidom so nanga da sari, en di a jeri, san pasa, a taki: A boen, meki a tan, mi sa pai hem. En sinsi da tem Absalom holi Amnon na hatti, tee a no taki wan woortoe moro nanga hem. So srefi koning David kisi wan toemoesi hattibron toe, di a jeri da tori.
Toe jari na baka nomo Absalom finni wan boen joeroe, vo doe dasani, disi ben de na hem hatti granwei kaba. Bikasi wan dei, di a meki wan bigi trakteri na wan tra foto, a verzoekoe ala hem brara, vo dem kom njam nanga hem, en na dapee a meki dem foetoeboi vo hem kili Amnon na tafra en na fesi vo ala dem tra koning-pikien. Ma di David jeri dati, a kom na wan toemoesi sari en jamer, hem nanga hem heeli famili, dem alamal kre vo troe; bikasi alwasi Amnon ben fiti troe, vo a moese dede, tog Absalom no ben de da soema, disi ben habi reti, vo hem kili hem. En di Absalom srefi ben sabi dati heeli boen, a ronwei wantem, a go kibri na ondro da koning vo Gesur, di ben de hem gran-tata vo mama sei, en na dapee a tan dri jari, so langa, tee hem tata hatti kom bedari baka pikinso; bikasi David no ben kan vergiti Amnon langatem. En buiti dati, na ini da sari, di a si, da ongeluk soekoe hem juisti so, leki profet Natan ben taki gi hem, dati ben meki a kom membre hem srefi zondoe baka toe; ala dati kom moksi makandra.
We di Absalom ben habi da takroe prakseri granwei na hem hede kaba, vo a wani poeloe hem tata srefi na koning, meki hem tron koning, dati gi hem hatti, vo a seni begi Joab, gran-tangi! meki a potti wan boen mofo gi hem na koning, vo hem tata gi hem pasi, vo a kan kom baka na Jerusalem. -- We alwasi fositem Joab nanga Absalom no ben de so toemoesi boen makandra, tog di Joab membre, somtem Absalom kan tron koning hesi, a doe hem da plisiri. En vo taki reti, a prakseri dati na wan toemoesi koni-fasi, vo a hali koning abra, meki a no kan taki, no. Bika di a sabi, wan oeman de na Tekoa, di koni, a meki da oeman kom na hem, a taki, meki a weri blaka, leki a de nanga dipi rouw, en meki a go na koning, begi hem wansani, meki a doe, leki a de nanga wan toemoesi hebi; en dan Joab taki alasani gi hem, fa a moe taki nanga koning.
We da oeman teki da boodskopoe, a seni haksi koning wantem, efi koning no sa gi hem permisi, vo a kan kom na koning, begi hem wansani. En di David gi hem pasi, a go na ini, a hiti hem srefi nanga bele na gron gi koning, a taki: Ke mi koning, helpi mi! David taki: We san doe joe? Da oeman taki: Ke, mi de wan weduwe, mi man dede! Toe manpikien mi ben habi, ma wan dei di dem de na firi, den kisi trobi makandra, en ongeluki da wan naki da trawan, tee a dede. We now da heeli famili vo mi kom trobi mi toemoesi, dem alamal taki, meki mi gi dem da tra pikien abra, vo dem kan kili hem baka, en da so dem wani poeloe ala troostoe krin-krin na mi hatti, vo mi lasi ala mi pikien.
We di David jeri da oeman taki so, a kisi wan sari vo hem, en a sweri hem, a taki, hem sa gi ordre wantem, vo no wan soema moe habi hatti, vo trobi hem pikien. Da oeman taki: Gran-tangi mi boen masra, mi koning! Ma tangi-tangi, koning no sa gi mi pasi, vo mi haksi wansani moro? David taki: Ja, meki mi jeri. Toen da oeman taki: We di koning habi so boen-hatti vo wan vreemde soema, di koning no sabi, fa koning no habi sari vo hem eigen pikien dan, vo gi hem pardon en vo teki hem baka? Mi frede, kondre srefi kan meki oproeroe, te dem jeri, koning gi tra soema pardon, kaba na hem eigen pikien a no wani gi pardon.
We now David kom kisi da tori, en a taki gi da oeman, troe-troe Joab ben koenkroe nanga hem, meki a kom haksi so wansani, en da oeman no stry toe, a taki ja. En di David ben frede da falsi Joab alatem, helpi no de, a seni kali hem, en a taki gi hem, meki a go na Gesur, go teki Absalom kom. We nanga bigi plisiri Joab teki da boodskopoe, en da so Absalom kom liebi baka na Jerusalem; ma na hem tata fesi a no kom wan toe jari langa, a liebi tiri vo hem na hem srefi hoso, sondro hem tata kom si hem, bikasi da so da ordre vo koning ben de. Ma ala dati, disi Absalom holi hem srefi tiri so fara, tog nanga koenkroe en nanga da switi taki, di a lobbi sidom taki tori nanga soema, a ben sabi, vo kisi ala soema na hem sei; en di a ben de so wan mooi jonkman, di kan prodo nanga hem skin, dati srefi helpi hem toe, vo heeli kondre kom lobbi hem, dem pryze hem vo troe.
Ma tog dasani, di a ben soekoe, vo poeloe hem tata, potti hem srefi vo koning, dati a no ben kan kisi, so langa David no gi hem pasi, vo a kom baka na koning-hoso; we vo da hede a seni begi Joab, meki a kom na hem, vo a kan seni hem na koning. Ma di Joab kom kisi dasani, disi de na Absalom hatti, a no go na hem, alwasi a seni kali hem vo toe-tron ageen, tee bakatem Absalom dwingi hem nanga tranga, meki a go begi koning gi hem, vo a kan kom baka na koning-hoso. En di Joab kom nanga da begi, David tevrede toe, a taki, meki Absalom kom. We di Absalom doro na hem tata fesi, a hiti hem srefi na gron gi hem, begi hem pardon. En di David si da pikien lidom so na hem fesi, a kisi wan zwaki vo hem, a hopo Absalom na gron, a bosi hem, en nanga dati a teki hem baka vo hem pikien.
We so hesi Absalom kisi hem plesi baka nomo, wantem a bigin, vo meki hem srefi bigi, a sori hem srefi publiki na hem tata hoso, a bai so meni wagi nanga hasi; so srefi hem tata gi hem vyftig soldati vo hem, di moe de nanga hem alatem, meki ala soema kan si, hem de da gran-prins vo koning. Ma nanga ala da bigi membre, di ben de na hem hatti troe, tog nanga hem maniri na dorosei, te a ben taki nanga soema, a no ben sori wan hei-fasi; kontrari, a no sjem vo no wan soema, vo taki tori nanga hem, dem moro laage soema srefi a taki odi, haksi fa dem tan. Ibri mamantem a lobbi go sidom na da bigi gadri vo koning-hoso, wakti dem soema, disi habi wan sani, vo taki nanga koning. En te wan soema kom nanga wan klagi, vo soekoe reti na koning, Absalom meki da soema verteli hem da heeli tori, en dan a taki: Ja, joe habi reti troe, ma mi no sabi, efi koning sa jeri joe. Ke mi wensi, mi tron hedeman vo kondre, vo mi kan helpi ibriwan soema, di de nanga wan klagi, meki a kisi hem reti! We nanga so wan falsi fasi Absalom soekoe vo foefoeroe ala Israel-soema hatti, en dati ben helpi hem toe, tee pikin-moro ala soema na heeli kondre ben wensi, meki David bedanki vo koning, meki Absalom go na hem plesi.
We di Absalom ben kisi dem soema so fara kaba, now a no sidom soso moro, ma wan dei a haksi hem tata pasi, efi hem no kan go na Hebron, meki wan ofrandi dapee gi Gado; bika da so hem ben pramisi Masra datem, di a ben de na Gesur jete na Siria-kondre. David taki: A boen so, mi pikien, go doe so, meki joe ofrandi. Ma Absalom ben seni hem spioni go panja kaba na heeli Israel-kondre, vo waarskouwe ala soema na fesi, taki, so hesi dem sa jeri dem bigi trompeti, dem alamal moe bari, taki, Absalom tron koning! So srefi Absalom ben teki toe-hondro soema vo Jerusalem srefi, di a ben verzoekoe, vo dem kom njam feesti-dei nanga hem na Hebron, ma dem no ben sabi noti vo dasani, disi de go pasa, buiti Ahitofel, da sekretarisi vo koning David, hem wawan ben sabi, bikasi a ben koenkroe alatem nanga Absalom. We da srefi joeroe, di Absalom bigin meki hem ofrandi, a gi ordre na Ahitofel, vo a meki sein na heeli kondre, meki dem blo dem trompeti na ala dem bigi foto; en so hesi dem soema vo kondre jeri dem trompeti nomo, wan bigi oproeroe hopo na heeli Israel-kondre, en ala soema teki pasi, dem go na Hebron, dapee Absalom de.
Ma di David kisi njoesoe vo dati, a skreki vo troe, en a kali ala dem soema kom makandra, di ben de nanga hem jete na Jerusalem, a taki: Kom go meki wi gowei hesi, bifo Absalom kom kili wi alamal; bika te a doro dia kaba, dan no wan vo wi kan ron go kibri moro! We da so David komopo na hem hoso, a gowei, hem nanga hem heeli famili, buiti tin oeman vo hem, di a libi dapee, meki dem wakti hem hoso. So srefi ala dem gransoema vo kondre nanga dem ofciri en soldati, nanga dem siksi-hondro tra soldati, disi da ofciri Itai ben teki na Geti-kondre, tjari kom na Jerusalem, dem alamal waka go nanga hem. Na baka grandomine Zadok kom toe nanga ala dem leviti, di de nanga hem, dem tjari da verbond-kisi vo Masra kom, dem wani gowei toe nanga David, ma David taki, meki dem tjari da kisi go baka, potti na hem plesi; bika efi Gado wani hem, hem srefi sa helpi hem toe, vo a kom baka, vo a kan si da kisi baka na ondro da tenti vo hem. Ma efi Gado no wani hem moro, pasiensi dan, meki Gado doe nanga hem, so leki fa a wani, hem tevrede.
We nanga so wan saka-fasi David komopo na Jerusalem, en nanga soso foetoe a pasa da kriki abra, disi dem kali kidron-kriki, a waka go tee na tapo da pikin bergi, di dem kali olyf-bergi, a teki wan doekoe, tapo hem fesi, a kre toemoesi. So srefi ala dem tra soema, di waka go nanga hem, dem alamal tapo dem fesi toe, dem kre nanga bigi sari.
A troe, David ben frede hem sekretarisi Ahitofel granwei kaba, bika a ben sabi hem alatem vo wan falsi soema, ma vo fassi? a no ben kan kisi wan reti sani, vo fassi hem, en vo da hede a no ben wani pori hem nem. Ma now David no kibri wansani moro, a poeloe alasani na doro, di de na ini hem hatti, a taki, Ahitofel de da soema, di meki da heeli oproeroe kom so fara, bikasi hem de helpi Absalom. En di David ben sabi heeli boen, Ahitofel da wan soema, di koni, dati meki a frede Ahitofel moro leki ala dem trawan; en vo da hede a begi hem Gado toemoesi, meki a helpi hem, vo Ahitofel moe rai Absalom wan verkeerti rai di leisi.
We Masra jeri da poti begi vo David wantem, bika di a waka go pikinso moro na fesi, wan ouroe kompe kom na hem dapee vo troostoe hem; da soema nem Husai . We so hesi David si da soema nomo, a ben de, leki hem hatti taki gi hem, somtem dati de wan soema, disi hem Gado seni gi hem vo a helpi hem. En vo da hede David begi Husai, vo a drai baka, a taki: Efi joe tan nanga mi, joe no kan helpi mi noti kweti-kweti; ma efi joe go baka na Jerusalem, teki diensti na Absalom, dan joe kan helpi mi foeloe, joe kan pori da heeli wroko vo Absalom krin-krin. Bika domine Zadok nanga domine Abjatar de dapee toe na foto; we alasani, disi joe jeri na koning-hoso, dati joe kan meki dem sabi, en dem kan seni dem pikien kom na mi, vo piki mi baka. Husai taki: We a boen, mi sa si, en wantem a drai baka go na Jerusalem, dapee Absalom kom hesi toe nanga Ahitofel nanga so meni trawan moro, en Absalom teki kondre abra.
Ma ala dati David kom na wan bigi verlegi vo hem famili hede, bika dem alamal waka na foetoe soso tee dem kom weri, en njanjam kom mankeri toe, sondro dem sabi, hoepee dem sa kisi trawan. We di a de nanga da verlegi so, a si wan soema tjari foeloe boeriki kom, dem lai nanga brede en nanga wini, nanga nofo tra njanjam moro. En di David haksi da soema, na hoepee a tjari dati go? da soema taki, ala dati da vo koning; dem boeriki? da vo rei; en da brede nanga wini? dati da vo njam en vo dringi na pasi. Ma dati a ben lei, bikasi da soema ben de wan knegti vo Mefiboset, en dem boeriki nanga da heeli lai vo dem ben de vo hem masra. Ma di David ben habi so tranga hangri, en di a no ben habi tem toe, vo ondersoekoe dati moro fini, a teki da presenti na da soema hanoe, a taki hem gran-tangi. Da soema nem Ziba.
1. We da heeli tori vo Absalom, fa a ben falsi gi hem tata en fa a ben trobi hem, dati de wan skreki-tori vo troe. Meki ala pikien teki wan waarskouwe na dati, vo dem gi dem tata en mama respeki! Meki dem membre, sani Salomo taki: Da soema, disi de trobi hem tata en disi de jagi hem mama, da wan takroe pikien, wan verfloektoe soema. (Kap. 19, v. 26.)
2. Da pina-liebi vo David de geersi di vo wi Masra Jesus toemoesi. So leki David ben pasa da pikin kidron-kriki abra nanga sari hatti, so srefi Jesus ben pasa da srefi kriki abra toe; en so leki David ben kre vo hem oproeroe-pikien Absalom, so srefi Masra Jesus ben kre toe vo wi oproeroe-pikien vo hem, a ben begi vo wi; en so leki Ahitofel ben falsi gi David, so srefi Judas ben falsi gi Masra Jesus toe.
Na baka di David ben waka moro na fesi, klosibei na da foto Bahurim, wan soema vo Saul famili kom miti hem dapee, da soema nem Simei, dati bigin kosi David toemoesi, a teki stoon, fringi na hem tapo; a taki: Go vo joe, joe kiliman! Joe didiebri! Joe si? now joe kisi joe paiman baka vo da ogri, di joe ben doe na Saul, disi joe ben poeloe hem na koning; mi lobbi so! Ma Abisai, wan vo dem soema, di de nanga David, di hem jeri da kosi-kosi so, hem hatti kom bron vo troe, a taki, hem sa go broko da soema neki. Ma David taki: No no, da kosi-kosi no kan fassi na mi skin; somtem Gado srefi ben seni hem, vo a kosi mi. Oen no si? mi eigen pikien srefi de soekoe vo kili mi, en tog mi moe holi pasiensi, we fa mi no sa ha pasiensi dan nanga so wan soema? Efi Gado wani so, pasiensi, meki a kosi mi! Somtem Masra wani, dasani moese kom mi abra so, vo a kan helpi mi baka, en vo mi kan taki hem tangi.
We na baka di David nanga hem famili go bro pikinso na da foto Bahurim, da srefi joeroe Absalom nanga Ahitofel nanga ala dem tra soema ben doro tee na Jerusalem, en vo da hede Husai go na Absalom wantem, a haksi hem, efi a no sa teki hem na hem diensti. Ma di Absalom jeri, Husai taki so, a verwondroe vo troe, a taki: So? da so joe de lobbi joe mati? Vo sani hede joe no ben gowei nanga joe mati? Husai taki: No, mi no kan go nanga hem, mi moese tan nanga da soema, di Gado Masra nanga ala soema vo Israel ben teki potti vo koning. Joe a no David pikien? We, so leki mi ben dini joe tata, da srefi soema mi sa de na joe fesi toe. Ma dati Husai taki nanga hem boen prakseri en nanga waarheid, bikasi alwasi a ben de na Absalom fesi, tog a ben tan na David diensti jete; ma di da taki ben dipi moro, leki Absalom ben membre, a denki, Husai taki dati vo hem , en vo da hede a teki hem na hem diensti.
Na baka Ahitofel kom na Absalom, a taki: Wi no moe drai langa, vo feti na David baka, vo a no finni tem, vo soekoe soldati makandra, kom feti nanga wi. We meki mi teki twalf doezend soema, jagi na hem baka, en efi mi kan kisi hem na neti te a lidom slibi, mi sa kili hem wawan, ma ala dem tra soema, di de nanga hem, mi sa teki, tjari kom na joe, vo meki da heeli feti kaba wantem. We da taki kom boen na Absalom en na ala dem tra gran-soema vo Israel. Ma tog, bifo Absalom seni Ahitofel gowei, a taki, hem sa haksi Husai toe fosi, san hem sa rai hem. We di Husai kom na ini koning kamera, en di Absalom verteli hem dasani, disi Ahitofel ben rai hem, vo doe, Husai taki: No no, dati no de wan boen rai, disi Ahitofel ben rai joe di leisi. Joe no sabi joe tata? da wan ouroe ofciri; en dem soldati vo hem, dem alamal de jonge knapoe soema, di habi manhatti, dem krasi, leki wan tigri, di lasi hem pikien. We efi joe go feti nanga hem so faja-faja, mi frede, dasani no de go waka boen gi joe; en efi da fosi leisi joe lasi wan toe dri soema nomo, dati kan meki ala joe soldati lasi hatti wantem, bikasi heeli Israel-kondre sabi joe tata, en dem sabi hem soldati toe. We efi mi sa rai joe, mi sa taki, betre joe doe dasani moro nanga bedari en nanga tem, vo joe kan kali heeli kondre kom makandra fosi; en vo joe finni tem, vo joe srefi kan go komanderi da feti. Dan a no sa trobi wi, vo kisi David nanga ala hem soema, alwasi hoepee dem sidom kibri; wi sa fadom na hem tapo, kili hem, en no wan soema sa ronwei.
We di Absalom jeri da rai ageen, dati kom moro boen na hem, leki dasani, disi Ahitofel ben rai hem. Ma Jehova srefi ben meki Husai moese taki so, vo da rai vo Ahitofel no moe go doro, en vo Absalom kisi hem strafoe. We vo da hede Husai no lasi tem, vo seni dem toe domine-pikien go na David safri, vo piki hem, fa alasani ben waka. So srefi a seni waarskouwe hem, vo a no moe meki kampoe na dem hopo sabana, ma a moe feti hesi, vo koti da bigi riba abra, go na tra sei vo Jordan, so langa dem no tapo pasi gi hem. Ma dem toe soema ben pina vo troe, bifo dem doro na David; bika Absalom ben kisi njoesoe kaba vo dati, en vo da hede a ben seni soema go na dem baka, go soekoe dem; ma tangi vo Gado dem no finni dem. We so hesi David kisi da boodskopoe nomo, a koti da riba abra wantem, hem nanga ala dem soema, disi de nanga hem, a go tan na da foto Mahanaim, en na dapee a wakti so langa, tee a si, fa hem Gado sa doe helpi hem. We ala di a de dapee de kibri vo Absalom, som gransoema vo da kondre, di ben lobbi David alatem, dem tjari ala soortoe njanjam kom gi hem, nanga alasani, di a habi vanoodoe, vo a kan pasa hem liebi. So srefi nofo knapoe soldati go na hem dapee, dem teki diensti na hem ondro, vo helpi hem.
We di Ahitofel si, da rai, disi hem ben rai Absalom, dati no ben go doro so, we dati gi hem toemoesi verdriti, en da liebi kom verfeeli hem so, tee a go na hem hoso, a hanga hem srefi. Bika fositem a ben de wan soema, disi de tiri heeli kondre, hem wawan; a ben gewenti so, te hem taki wansani, dem moe loekoe dati, leki Gado srefi de taki.
We da srefi tem Absalom ben meki heeli Israel-kondre sweri gi hem, teki hem vo dem koning. En so hesi a klari nanga dati, a teki wan toe dri doezend soema, a tjari dem go feti nanga hem tata David, en di a koti da bigi riba abra, a komanderi dem soldati vo hem, meki dem go rontoe da foto Mahanaim, dapee David de na ini.
We di dem soema vo David jeri dati, dem kom frede vo troe, dem taki, dati no sa waka boen. Ma David srefi no lasi hatti, a taki: Alwasi moro leki tin doezend soema kom feti nanga mi, tog na neti mi de go slibi vo mi nanga kouroe hatti, en dei-broko mamantem mi no frede jete; bikasi mi Gado Jehova de loekoe mi, hem da mi Helpiman.
Na baka David meki hem srefi klari toe, a komanderi dem soldati vo hem, meki dem go na feti, a taki, hem srefi sa go toe nanga dem. Ma di dem alamal begi hem so meni, dem taki, meki hem tan na hoso, vo a no kom na wan ongeluk, dem srefi sa holi dem srefi boen, dem no frede moro, we dati meki David seni hem komandanti Joab nanga Abisai nanga Itai go na da feti, meki dem komanderi dem soldati. En bifo dem gowei, a gi dem tranga ordre, a taki, meki dem loekoe boen nanga prins Absalom, vo dem no trobi hem perzon.
We nanga da ordre dem teki pasi na nem vo Masra, dem gowei, en na mindri dem bergi vo Efraim-kondre, dapee foeloe boesi ben de, dem soldati vo David kom miti wan bigi patroeli vo Absalom, dem feti wan bigi feti dapee, tee dem soema vo David kom masra vo da feti, dem fom di vo Absalom krin-krin; hafoe dem kili nanga houroe, en hafoe vo dem soengoe na ini dem bigi swampoe na boesi; bikasi da feti kom panja na da heeli kondre. We so hesi Absalom kisi njoesoe vo dati, wantem a komanderi da tra bigi hipi soldati vo hem, di ben de klosibei na da foto Mahanaim, a meki dem go helpi dem trawan; en hem srefi teki pasi toe, a rei go na fesi, hem wawan. Ma di da pikin hasi vo hem pasa klosibei na ondro wan bigi boom, nanga da toemoesi hesi ron vo hem da langa wiwiri vo Absalom kom fassi na wan bigi takki vo da boom, en dati meki da hasi djompo komopo na hem ondro, tee Absalom hanga soso na da boom, sondro a kan helpi hem srefi, bika hem foetoe no kan kisi gron. We di Joab jeri dati, a feti hesi go na da plesi, a teki dri lanza, soetoe dem na ini Absalom hatti, en da so a kili hem, ala di a de hanga so na da boom. Na baka a meki dem poeloe da dede-skin vo Absalom na da boom, hiti na ini wan horo, en dan dem potti wan bigi hipi stoon na hem tapo. We da so da heeli feti kaba wantem, bika dem Israel-soema, di ben holi nanga Absalom, dem alamal panja, ibriwan go na hem hoso, en dem soldati vo David no feti moro na dem baka.
Ma di David kom jeri, fa da feti ben waka, en di a jeri toe, hem pikien Absalom dede, dati meki a kom skreki vo troe, a go sloto hem srefi na ini hem kamera, a kre toemoesi vo hem, a taki: Ke mi pikien Absalom! Mi pikien, mi pikien! mi wensi, mi srefi ben dede na plesi vo joe! -- Bikasi dati ben hati David toemoesi, disi Absalom ben dede so na ini ala hem zondoe, sondro a ben soekoe pardon bifosi.
Na baka ala dem tra Israel-soema, disi ben holi nanga Absalom, dem kom kisi wan berouw vo da oproeroe, di dem ben meki gi David, en vo da hede dem taki, dem sa seni begi David, vo a kom baka, tiri dem kondre. We so hesi David jeri dati, a seni wan boodskopoe go na Jerusalem, a meki domine Zadok nanga Abjatar taki gi dem soema vo Juda famili, efi dem wani teki hem baka toe, dem no ha vo frede, bika hem no sa soekoe da ogri moro, di dem ben doe hem. So srefi a pramisi gi Amasa toe, -- dati da hem sisa pikien, di ben dini na Absalom ondro, leki komandanti, -- a seni taki gi hem, hem no ha vo frede toe, bika hem no sa poeloe hem baka na komandanti, ma a sa holi hem na plesi vo Joab. Bikasi Joab no ben waarti moro, a ben doe so meni ogri kaba, en buiti dati a ben meki hem srefi bigi toemoesi na kondre, vo da hede David ben soekoe, vo bedanki hem.
We di dem jeri so wan boodskopoe vo David, dem alamal blyti vo troe, dem seni begi hem, tangi-tangi, meki a kom baka hem nanga ala dem tra soema vo hem, en nanga bigi plisiri dem srefi go miti hem hafoe-pasi tee na Gilgal, vo helpi David, meki a kan koti Jordan abra hesi, hem nanga hem heeli koning-famili.
Ma Simei, da ogri soema, disi ben kosi David so tra-dei, di hem jeri, David go kom baka, a no lasi tem toe, vo go miti koning na pasi, en di a si hem, a hiti hem srefi na gron gi hem, a begi hem toemoesi, a taki: Gran-tangi mi masra, mi koning! no mandi mi, no holi mi na hatti vo da ogri, di mi ben doe joe da joeroe, di joe komopo na Jerusalem! Mi si troe-troe, taki, mi no ben doe reti, en vo da hede mi kom begi koning pardon. Ma Joab brara Abisai piki hem, a taki, Simei waarti, vo koning kili hem wantem. Ma David taki no no, di hem tron koning baka njoe-njoe, hem no wani bigin nanga strafoe wantem, en a taki gi Simei, hem no sa kili hem.
1. Di da ogri soema Simei kosi David so, David taki, pasiensi! somtem Gado srefi wani, dasani moese kom hem abra so, vo a kan sari hem baka. We so srefi wi moe taki toe, te trawan de trobi wi en te dem doe wi kroekoetoe; meki wi teki dati nanga so srefi saka-fasi toe, leki David, dati sa meki a pasa wi hesi.
2. Ahitofel ben wani doe David ogri, ma a doe hem srefi ogri. Liebi-soema de meki barki, ma Gado de meki sipi. Dem ogri soema no kan tan na Gado hai, nanga bigi skreki dem de go lasi. (Psalm 73, v. 19.)
3. So soortoe ogri soema, leki Absalom ben de, wi moe loekoe leki wan wipi, di Gado teki na hanoe, vo fom dem pikien vo hem. Ma te da wipi doe hem wroko kaba, dan a moe go na faja.
4. Gado Masra meki Absalom kisi hem strafoe boen-boen vo da ogri, disi a ben doe na hem tata, vo meki ala soema kisi wan waarskouwe. Bika ibriwan soema, disi kom pasa da plesi na ini da boesi, en disi si da bigi hipi stoon, dapee Absalom beri na ondro, dem stoon srefi ben meki a moese membre da woortoe vo Salomo, di a taki: Da soema, disi spotoe hem tata, en disi veragti hem mama, vo a no harki hem, a sa kisi hem strafoe so, vo dem tingi-fowloe na watra-sei kom poeloe hem hai, gi na dem pikien, vo dem njam. (Kap. 30, v. 17.)
5. Ke fa tata nanga mama habi zwaki vo dem pikien, alwasi dem pikien de stoutoe srefi! Dati wi kan si na David toe. Alwasi Absalom ben de wan toemoesi ogri soema, di ben meki oproeroe srefi gi hem tata, tog bakatem di a dede so wan ogri dede, dati hati da tata vo troe, a kre vo hem so, tee watra srefi go na hem hai.
(2. Sam. Kap. 24. - 1. Kon. Kap. 2, v. 11. - 1 Kron. Kap. 22 tee Kap. 30.)
Di heeli Israel-kondre ben kom pori toemoesi ala da tem, di Absalom ben meki da oproeroe, potti hem srefi vo koning; en di da ogri go doro jete, ala di dem ben teki David baka vo koning, Gado hatti kom bron nanga dem vo troe, so tee a ben moese strafoe dem, potti dem reti baka. En di David srefi kom vergiti hem Gado pikinso toe, a no begi so tranga moro, leki a ben doe datem, di a ben de na da pina-liebi, we helpi no ben de, Gado ben moese gi hem wan fomfom toe, vo hali hem kom baka klosibei na hem sei.
We di satan ben kom tori dem Israel-soema alatem na Gado fesi vo ala dem foeloe zondoe, di pasa na kondre, en di Jehova hatti srefi ben bron toe nanga Israel, dati meki satan kisi pasi, vo a kom tesi David, potti bigi membre na ini hem hatti, meki a go teli hem kondre.
We, wan dei so David seni kali hem komandanti Joab, a taki gi hem: Go waka mi heeli kondre rontoe, teli ala Israel-soema, vo mi sabi, hoemeni soema mi habi na mi kondre. Ma Joab, alwasi hem srefi no ben habi respeki vo Gado so meni, jete dasani kom gi hem wan pikin frede, hem hatti taki gi hem, dati no sa boen na Gado. En a potti ala na David fesi, a haksi hem, vo san hede koning wani trobi dem soema soso, tjari wan ongeluk kom na kondre? Somtem dati kan meki wan oproeroe hopo na kondre, tee Gado moese strafoe dem ageen. Ma koning no jeri na dati, a taki, hem wani so. We Joab teki pasi, hem nanga som tra gransoema moro, a waka heeli kondre doro, en di dem skrifi ala soema nem na wan bigi boekoe, na baka di dem teli dem, dem finni, da kondre vo Israel habi aiti-hondro-tron doezend bigi mansoema, disi kan go na feti, en di vo Juda , dati habi feifi-hondro-tron doezend. Ma dem toe pikin kondre vo Levi en vo Benjamin, dem dati Joab no teli; bikasi da wroko no ben boen na hem kweti-kweti, a verfeeli hem vo troe. En na Gado a no ben boen toe, disi David doe so.
We na baka di Joab kom piki koning, David hatti srefi fom hem toe vo dati, en a begi hem Gado, a taki: Ke mi Masra, mi doe ogri troe, da wan bigi zondoe, di mi doe! Ma gran-tangi, mi Masra, mi begi joe, gi mi pardon! Mi srefi si, troe-troe mi no doe reti.-- We dei-broko mamantem Masra seni profet Gad go na David, go haksi hem, a taki: Hoe strafoe joe wani mi strafoe joe? Dri soortoe strafoe mi potti na joe fesi, meki joe srefi teki, hoedisi joe wani. Hoefasi? joe wani sebi jari hangri-tem? ofoe joe wani, joe moese ronwei, kibri vo dem vyanti vo joe dri moen langa? ofoe joe wani, wan ogri siki kom na kondre, kili soema, dri dei langa? David taki gi da profet: Ke, mi frede vo troe! San mi sa taki? Meki Masra srefi gi wi da strafoe, disi fiti wi, bikasi tog hem boen-hatti sa sari wi baka. Mi no hangri, vo go na liebi-soema hanoe, vo dem moe strafoe mi.
We da so Masra seni wan ogri siki kom na heeli Israel-kondre, da siki kili sebitentin doezend soema. Na baka da Engel kom na Jerusalem toe, a flei na abra da bergi Moria, a holi wan soso houroe na hem hanoe, meki ala soema vo foto kan si hem. We da srefi joeroe David nanga so meni gransoema vo kondre ben de makandra na tapo da bergi Zion, dem begi Gado, meki a saka da strafoe gi dem. En di dem kom si da Engel so nanga da houroe na hem hanoe, dem alamal kom skreki so, tee dem hiti dem srefi nanga bele na gron gi Masra, nanga bigi sari. En David no kibri hem zondoe toe, ma a bekenti hem, a taki: Ke mi Masra, da mi de da soema, disi doe ogri mi wawan. Sani dem tra poti skapoe ben doe? We gran-tangi, mi Masra, mi begi joe, pardon mi, en saka da strafoe gi wi! A hati mi vo troe, disi mi ben doe dasani.
We di David begi da begi so, Masra kisi sari vo hem, a taki gi da Engel, meki a kaba now nanga da strafoe, di a de strafoe kondre. So srefi Gado seni taki gi David, meki a hopo wan altari gi Jehova na da srefi plesi, dapee dem ben si da Engel nanga da houroe de flei na tapo. We dati ben de reti na abra wan soema plasi, disi dem kali Arafna, en dati meki David go na hem, vo bai da hoso nanga da plasi. Da Arafna ben de wan heiden-koning fositem, ma a ben tron wan djoe. We di Arafna jeri, David wani meki wan altari dapee, a taki: Ja, nanga ala plisiri koning kan teki da plesi; hem srefi sa gi dem kow toe nanga da hoedoe nanga da areisi, nanga alasani, disi koning moe habi vo meki da ofrandi; hem wensi da ofrandi vo koning moe switi na Jehova. Ma David taki, no no, hem no kan teki tra soema goedoe, meki wan ofrandi gi Jehova; en vo da hede a gi da soema siksi-hondro piesi silver-moni, a pai hem kontanti. Na baka di da altari klari, en di David ben potti hem ofrandi na tapo nanga foeloe begi en tangi, Jehova kom piki hem wantem, a meki da faja vo hem komoto na tapo, fadom na ondro na da altari tapo. En da so David si, Gado teki da ofrandi vo hem nanga boen; so srefi da takroe siki kom saka wantem na heeli kondre.
We sinsi da tem David ben loekoe da plesi nanga bigi respeki, en te a ben habi vo begi wansani, ofoe vo taki Masra tangi, na da plesi wawan a ben lobbi go meki hem ofrandi. Bikasi datem da hoso vo Masra, disi Moses ben meki na pasi, vo dem dini Gado na ini, ben de na Gibeon jete. Ma David meki dem Israel-soema kom dini Gado na tapo da bergi Zion, efi Moria, na da srefi plesi, disi Masra srefi ben sori David, vo a moe meki wan altari gi hem; en David taki: Da diaso da hoso vo Jehova, wi Gado, moe de tee vo alatem, en na disi altari tapo Israel moe meki ofrandi alatem.
We datem David ben de na hem boen jari kaba, en di ouroe nanga siki kom moksi makandra, tee a de na datra hanoe srefi, dati meki Adonia, da gran-prins, da fosi pikien vo David, kom na da prakseri, a taki: Meki mi potti mi srefi vo koning bitem, bika mi tata kom grani kaba. Adonia ben sabi boen-boen, taki, hem brara Salomo de da soema, di Gado wani, a moe tron koning na hem tata baka; ma di Adonia ben de wan heimembre soema, di soekoe bigi vo grontapo, dati meki a soekoe vo poeloe hem brara, potti hem srefi. En dati no trobi hem toe, bikasi di da ouroe tata no ben wani bemoeje nanga dati moro, a meki prins Adonia doe, san a wani. So srefi Joab nanga domine Abjatar ben konkroe toe nanga Adonia, dem helpi hem safri, vo a kisi moro tranga na kondre, dem taki, a moe meki wan bigi trakteri, verzoekoe foeloe soema, en te ala dem gran-soema vo kondre sa de makandra, dan dem kan potti hem vo koning, sweri gi hem wantem.
Ma di profet Natan jeri dati, a ron hesi go na Batseba, da mama vo Salomo, vo waarskouwe hem, a taki: Hoefasi, joe no jeri, san pasa na kondre? Dem potti Adonia vo koning, sondro David sabi. We efi joe wani, dem no moe kom kili joe nanga joe pikien Salomo, mi sa gi joe wan boen rai: Go hesi na koning, verteli hem da heeli tori vo prins Adonia; en ala di joe de na koning jete, mi srefi sa kom toe na joe baka, vo helpi joe.
We Batseba doe so, a teki pasi, go na koning tee na ini da kamera, dapee a lidom siki. En di a kom na hem fesi, taki hem odi, nanga kni na gron srefi, David haksi hem, sani doe hem? Batseba taki: Ke mi masra, joe no ben pramisi mi, taki, mi pikien Salomo sa tron koning na joe baka? kaba now mi jeri, prins Adonia go teki kondre abra, sondro joe sabi wansani vo dati. A kili so meni kow kaba nanga skapoe, vo meki wan bigi trakteri; ala dem tra pikien vo koning a verzoekoe, vo kom na da tafra, nanga domine Abjatar toe, nanga Joab, buiti Salomo wawan a no verzoekoe. Ma mi masra, mi koning, so leki wi de, ala Israel-soema de wakti joe, dem hangri vo jeri, efi da troe, taki, joe srefi ben potti Adonia vo koning. En dati mi taki gi joe, efi joe no poeloe hem baka bitem, so langa joe de na liebi jete, bakatem dasani no de go waka boen gi mi nanga mi pikien.
We ala di Batseba de taki nanga koning jete, profet Natan kom na ini toe nanga da srefi tori en nanga da srefi begi, en dati meki David gi ordre wantem, vo dem kali ala dem granmasra vo kondre kom makandra na plein, nanga dem soldati toe, so srefi a meki dem blo dem bigi trompeti, vo bari ala tra soema vo heeli foto kom dapee, meki dem si, fa Salomo teki kondre abra. We, so hesi koning taki so, nomo dem teki Salomo, potti hem na koning hasi tapo, dem tjari hem go na wan bigi plein, en na dapee grandomine Zadok teki da santa oli-batra vo kerki, kanti na Salomo hede, a wye hem, meki a tron koning. Na baka dem tjari hem go tee na ini koning-hoso, di de na tapo da bergi Zion, en ala di dem waka dem strati doro, dem plisiri toemoesi, dem bari, taki: “Prins Salomo tron koning! -- Koning Salomo moe liebi langa!”
Ma prins Adonia nanga Joab nanga dem tra soema, di de nanga hem na da trakteri, di dem jeri dem trompeti nanga da babari, nanga alasani, di pasa, dem kom skreki vo troe, en ibriwan ron gowei na hoso. Buiti Adonia, dati djompo go kibri na da altari, di de na tapo da bergi Moria, en ala di a fassi da altari, a seni begi Salomo, tangi-tangi, meki a no kili hem. En Salomo seni taki gi hem, no no, meki hem hatti kouroe, so langa a sa holi hem srefi tiri na kondre, no wan soema sa trobi hem; ma so hesi a bigin wansani ageen, dan a moese dede wantem. Na baka Salomo seni teki Adonia, meki a kom na hem fesi, en di Adonia begi hem brara pardon nanga kni na gron, Salomo taki, meki a go baka na hem hoso.
Na baka vo dati ala dem ouroe amtenari vo David go loekoe David na hem siki-bedi, dem felisiteri hem, vo disi Gado meki a habi da plisiri, vo si, hem pikien Salomo kom na hem wroko, ala di hem de na liebi jete. En David srefi plisiri toe, nanga watra na hai a taki hem Gado doezend-tron gran-trangi, disi hem hai ben si dati jete, bifo hem go slibi.
We da plisiri, disi David ben fili na ini hem hatti, dati ben wroko so boen na hem skin toe, a helpi hem na ini da siki, tee a kom boen baka, en dati gi hem tranga na hem ouroe jari, vo a kan sori hem pikien na ala fasi, fa a moe doe, vo tiri hem kondre reti. So srefi di a ben prakseri alatem, vo meki wan temple gi Jehova, en di a ben potti so meni goutoe nanga silver nanga kooproe nanga isri nanga cedroe-hoedoe klari kaba, kibri na hem makzien, wan dei a kali Salomo kom na hem, a taki: Joe si, mi pikien? so meni jari mi ben loekoe kaba, vo meki wan hoso gi mi Gado Jehova, en granwei mi ben sa doe dati kaba, efi Masra no ben tapo mi, taki, a no mi moe doe dati, ma hem sa gi mi wan pikien, di mi moe kali Salomo, da hem sa teki da wroko na hanoe, meki da hoso. We mi pikien, Jehova sa de nanga joe, a sa helpi joe, vo joe kan doro da wroko nanga boen. Gado moe gi joe koni, vo joe kan tiri hem kondre reti! Ma loekoe boen; no vergiti da leri vo Jehova; bika so langa oen sa habi respeki vo da wet vo hem, di a ben gi na Moses, oen alamal sa liebi wan boen liebi na hem ondro. Mi wensi so. We vo da wroko joe no ha vo frede, joe kan seti hem nanga kouroe hatti; bika mi potti alasani klari kaba, goutoe nanga silver, nanga isri, nanga kooproe nanga ala soortoe hoedoe en stoon; en wrokoman no mankeri toe, foeloe timre-basi nanga metselari de na kondre, di sabi dem wroko. We, teki da wroko na hanoe dan, Masra sa de nanga joe! So srefi David vermane dem tra hedeman vo kondre, vo dem helpi hem pikien Salomo, a taki: Oen srefi si, fa Jehova ben helpi oen so fara, tee no wan fetiman kom trobi oen moro. We soekoe dan oen Gado Jehova noja nanga oen heeli hatti, en oen moe helpi toe, vo meki da santa hoso, vo dem kan teki da verbond-kisi vo Jehova nanga ala dem santa wroko-sani vo Gado, tjari kom na ini.
Na baka vo dati David seni kali ala dem hedeman vo Israel kom makandra ageen, nanga dem domine en leviti. Bika di a finni, dem soema vo Levi famili kom foeloe toemoesi, ala nanga ala dem meki dritentin na aiti doezend soema, dem ala no ben finni wroko na kerki, dati meki David teki hafoe vo dem, potti vo singiman na kerki, trawan vo dinari en trawan ageen a potti vo kroe-toeman en amtenari na kondre. Dem reti domine, di ben de vo Aaron famili srefi, dem dati a platie toe, a meki twenti na fo speli, vo dem dini Gado na ini hem temple, a taki, ibri wieki dem moe hiti lot, vo dem sabi, hoedisi Gado wani da wieki, vo a dini hem na kerki. Na baka ageen David kali dem toe pikien vo Assaf toe, da Heman nanga Jedutun, a gi dem da wroko, vo dem hopo da singi alatem na kerki, te dem singi dem profetisingi nanga dem tra psalm. So srefi a teki ala dem tra pikien vo Assaf toe, nanga dem pikien-pikien vo hem, a potti dem, meki dem helpi dem brara na ini da singi-wroko, trawan nanga muziki, trawan nanga singi. We da so David meki foeloe pikin verandre jete na kondre, bifo a dede, vo alasani moe de na wan boen fasi, vo hem pikien no ha trobi vo dati.
Ma na baka vo ala dem tori David seni kali ala dem hedeman vo heeli kondre kom makandra wantron moro na Jerusalem, nanga dem bigi amtenari toe, a taki ageen nanga dem vo da temple, fa hem ben membre vo dati, en fa Gado ben pramisi hem, taki, hem pikien Salomo sa meki da hoso gi hem, a gi dem wan kroboi vermane jete, a taki: We, joe gemeente vo Jehova, oen Israel-soema alamal, di oen tanapoe dia na Masra fesi, jere, san mi taki: Loekoe boen, vo oen no vergiti da wet vo Jehova, oen Gado, vo Masra no moe poeloe oen baka na da mooi kondre diaso; ma holi oen srefi boen, vo oenoe nanga dem pikien-pikien vo oenoe moe tan masra vo di kondre teego! En joe, mi pikien Salomo, meki joe sabi da Gado vo joe tata, en dini hem reti, nanga joe heeli hatti en nanga plisiri! Bika Jehova de loekoe na soema hatti, a sabi wi alamal doro-doro. We, efi joe soekoe hem? a sa meki joe finni hem; ma efi joe libi hem? a kan libi joe teego. No vergiti da hoso toe, di Masra wani, joe moe meki gi hem vo hem temple. Mi srefi sa gi joe wan modelli vo da hoso, vo joe sabi, fa joe moe wroko hem. We da so David marki da heeli temple-hoso gi hem piesi-piesi, a gi hem da langa nanga da bradi nanga da hei, nanga ala dem kerki-kamera; so srefi ala dem goutoe kandera nanga dem silver-pleti nanga ala-ala -sani David sori gi hem, a taki, reti so, leki hem gi hem da patron, da so alasani moe wroko.
Ma di David ben si, taki, da hoso sa kom na wan toemoesi bigi moni, a taki, somtem da moni, disi hem kibri, potti na sei kaba vo da wroko, a no de go kisi. We a teki vo di vo hem srefi, potti na tapo jete, en dati meki ala dem tra gransoema en goedoeman vo kondre doe so srefi toe, dem tjari foeloe goutoe nanga silver nanga dieri stoon nanga ala soortoe mooi-mooi kom makandra; vo boen-hatti dem doe dati, sondro wan dwingi, dem alamal plisiri vo troe, di dem si, taki, dasani kom so fara kaba.
Koning David srefi, di hem si ala da goedoe, disi dem soema ben tjari kom, sondro a ben haksi dati na dem, hem hatti njam pre so, tee a no kan helpi, a pryze hem Gado na fesi vo da heeli gemeente, a taki: Gran-tangi vo joe, Jehova! joe Gado vo wi tata Israel! Gran-tangi vo joe teego! Ala koning-kondre de vo joe, en ala tranga en ala bigi en ala glori de vo joe! Hemel en grontapo de vo joe! Joe wawan de da reti Koning, da bigi Gran-masra vo kondre! Ala tranga de na joe hanoe, en ala kondre moe saka gi joe. Joe wawan kan meki soema bigi; joe doe, san joe wani. We mi Gado, wi taki joe gran-tangi, wi mofo no bigi nofo, vo pryze joe reti! Bika san da mi! en san da mi kondre! Efi mi ben meki dem fom plakati, taki, ibriwan soema moese tjari sani: wi ben sa kisi so meni goutoe nanga silver makandra? nanga ala da tra goedoe? No, nanga dwingi wi no ben sa kisi so meni, leki wi kisi now, di wi meki ibriwan tjari so meni, leki hem hatti srefi de seni hem vo gi. We ala dasani, di wi ben tjari kom gi joe, a no na joe hanoe srefi wi ben kisi fositem? Bika wi, vo wi srefi, no habi wansani na disi grontapo, wi liebi srefi no de vo wi toe; ma joe ben gi wi alasani, di wi habi. Mi sabi, mi Gado, joe de loekoe na soema hatti, en te joe si wan krin hatti, dati joe lobbi. We nanga mi heeli hatti mi tjari ala dasani kom de, en a doe mi plisiri, di mi si, ala dem trawan tjari sani toe. Meki dem holi doro na so wan fasi! We Masra, helpi dem, meki dem hatti no soekoe wan tra Gado, buiti joe wawan. En mi begi joe vo mi pikien Salomo toe, gran-tangi! gi hem wan krin hatti, vo a holi tranga da leri vo joe, en vo a doro da wroko, di mi seti gi hem!
Na baka di David kaba vo begi, a taki, meki da heeli gemeente taki Gado tangi toe; en dem alamal doe so nanga bigi respeki, dem meki dem ofrandi gi Masra. So srefi dem taki koning David tangi toe, vo disi a gi dem wan tra koning baka na hem plesi; en ala dem hedeman vo kondre nanga dem amtenari, di de dapee, dem kom na Salomo, potti hanoe makandra, dem sweri gi hem, taki, dem sa dini hem nanga krin hatti.
We di David ben gi hem wroko abra so na Salomo, na baka a no bemoeje nanga wan tra wroko vo kondre moro; ma ala hem tem, di a habi, a teki vo prakseri da wet vo Masra, en vo meki psalm. En di hem srefi ben de wan profet, nofo vo dem psalm, di a meki, dem taki vo da Messias, disi Gado ben pramisi vo seni gi dem. Da kroboi psalm vo hem de taki so: Gran-tangi vo Gado Jehova, di doe so bigi wonder-wroko! Ala soema moe gi hem bigi nem, en ala kondre moe pryze hem!
Na baka di David si, da joeroe vo hem kom klosibei, vo a moe dede, a taki gi Salomo: Joe si? mi de go slibi noja, mi ziel de go ruste nanga dem tata vo mi. Holi joe srefi boen, no frede, ma waka da boen pasi vo Masra doro! -- We da so David go slibi nanga reti bribi, di a ben bribi na da Messias, disi ben de vo kom jete, en dem beri hem na tapo da bergi Zion. Sebitentin jari a ben ouroe, di a go slibi; a no ben hangri srefi, vo liebi moro langa. Sebi jari a ben de koning vo Juda-kondre wawan, na Hebron, ma dem dritentin na dri jari, di a ben liebi na Jerusalem, a ben de koning vo heeli Israel-kondre. Datem, di dem apostel vo Jesus ben de na Jerusalem, omtrenti wan doezend jari na baka, dem ben sabi da plesi jete, dapee dem beri David. (Apostel-tori 2, v.29.)
(1.Kon. Kap.2, v 12 tee Kap. 4, en Kap 10.)
So leke Salomo ben teki hem tata wroko abra, da joeroe heeli Israel-kondre ben de na wan toemoesi boen fasi, a ben de wan plisiri vo troe, vo si da kondre. En na dorosei no wan fetiman kom trobi dem Israel-soema moro; bika hafoe vo dem pikin koning na buurti David ben winni so fara, vo a meki dem pai hem wan hede-moni ibri jari, en dem trawan ben meki fri nanga hem.
Ma Adonia, da brara vo Salomo, di ben soekoe granwei kaba, vo meki hem srefi tron koning, hem no poeloe dati na hem hatti jete, alwasi fa a ben pramisi Salomo tra jari, taki, hem sa holi hem srefi tiri. Kontrari, so hesi da ouroe tata dede nomo, da membre kom hopo baka na ini hem hatti, a taki, somtem now a kan kisi dati moro hesi, vo a poeloe Salomo baka na koning. We a soekoe fosi, vo teki Abisag vo hem wefi; dati de da srefi oeman, disi ben loekoe David na ini da siki vo hem; bikasi Adonia ben sabi boen-boen, efi a kan kisi da oeman nomo vo hem wefi, a no sa trobi hem toe vo tron koning srefi. Ma di a no ben kan kisi dati, sondro koning Salomo gi hem permisi, a go na Batseba, Salomo mama, a begi hem so meni, vo a doe hem da plisiri, go potti wan boen mofo gi hem na Salomo, meki Salomo gi hem permisi, vo a kan teki da oeman. We di Batseba no membre wan ogri vo dati, a doe hem da plisiri, a go begi hem pikien, meki a gi Adonia pasi vo dati, vo hem hatti kan kouroe.
Ma Salomo, alwasi a ben de wan jonge soema jete, tog hem hai krin, moro leki di vo hem mama; bika so hesi a jeri da tori nomo, a si wantem, da so wansani Adonia de soekoe. We, a taki gi hem mama: Joe si? dasani di joe kom begi mi, dati de so srefi, leki joe taki gi mi, meki mi bedanki vo koning, meki mi teki mi kondre, gi na mi brara en na hem mati Abjatar nanga Joab; bikasi dem ala dri de konkroe makandra, dem de soekoe vo poeloe mi. Da fosi leisi, di a ben meki da oproeroe tra jari, mi ben gi hem pardon, vo di a ben pramisi, taki, hem sa holi hem srefi tiri na kondre; ma now, di a teki hatti, vo soekoe so wansani vo toetron ageen, helpi no de, a moese dede. We Salomo seni wan soema go na hem hoso, kili hem wantem.
Na baka Salomo kali grandomine Abjatar toe, a krasi hem vo da konkroe, di a ben konkroe nanga Adonia, a taki: A fiti joe, vo mi kili joe toe, ma di joe ben tjari da kisi vo Masra kom gi mi tata David, en di joe ben holi nanga hem alatem, mi no sa kili joe di leisi; ma na joe wroko mi sa poeloe joe, meki joe go liebi na joe pranasi na Anatot; ma loekoe boen, vo joe no kom na Jerusalem moro nooiti wantem! We da so da woortoe vo Masra kom reti, disi a ben pramisi gi domine Eli, taki, hem sa poeloe hem famili na domine, teki trawan, potti na da wroko.
Ma Joab, da falsi-hatti soema, di ben holi toe nanga Adonia, en disi ben kili toe soema kaba na wan konkroe-fasi, so hesi hem jeri, hoe strafoe Salomo ben strafoe Adonia, hem hatti srefi taki gi hem, taki, so wan strafoe de fiti hem srefi toe, en dati meki a kom frede so, tee a ron go kibri na ini da hoso vo Masra, a fassi da altari, so leki Adonia ben doe da tra leisi, di a ben seni begi hem brara pardon. Ma dati no helpi Joab noti, bika di a no ben wani komoto dedapee, Salomo no kan helpi, a seni wan soema go kili hem dapee reti na sei da altari. We da so Joab kisi hem paiman toe, disi ben fiti hem granwei kaba.
Ma wan tra soema moro ben de na kondre jete, wan ogri soema, disi Salomo ha vo frede toe, efi a no verzwaki hem bitem. Dati da Simei, da srefi ogri soema, disi ben kosi David so meni, datem di a ben gowei, kibri vo Absalom. We alwasi David srefi ben gi hem pardon kaba, di a ben begi hem so meni, tog di Salomo ben sabi heeli boen, na ini hem hatti ini Simei de da srefi ogri soema jete, di a ben de alatem, en iniwantem te a finni pasi nomo, a kan hopo baka, meki oproeroe ageen: we dati meki Salomo kali hem kom na hem fesi, a taki gi hem: Go meki wan hoso gi joe, diaso na Jerusalem, vo joe liebi na ini, bikasi diaso mi wani joe tan na ondro mi hai alatem; joe no ha no wan tra plesi vo go kweti-kweti! Efi joe teki hatti, vo komoto na ini foto, go na doro? alwasi tee na kombe nomo? helpi no de, joe moese dede! Simei taki: Ke mi masra, mi koning! Gran-tangi vo joe, disi joe habi so boen-hatti vo mi, disi joe no kili mi wantem! Troe-troe, mi sa holi mi srefi so, leki koning taki gi mi. We wan heeli piesi tem Simei liebi so tiri vo hem na Jerusalem, sondro a go na wan plesi; ma dri jari na baka a kom vergiti dasani, disi Salomo ben taki gi hem. Bika wan dei, di toe slavoe vo hem ben ronwei, a teki hem hasi, a rei go na dem baka, soekoe dem tee na Filistri-kondre; en di a kisi dem dapee, a tjari dem kom baka na Jerusalem. Ma di a ben pasa koning mofo so grofoe, dati meki Salomo no drai moro nanga hem, ma a seni kili hem wantem, so leki a ben pramisi hem dati na fesi.
We da so Salomo poeloe ala oproeroe-soema na hem kondre, en sinsi datem a ben loekoe hem koning-wroko, sondro wan soema kom trobi hem, a ben liebi wan switi liebi vo troe, hem nanga hem heeli kondre. En Gado blesi da tiri vo hem so, tee jari vo jari a kisi moro bigi tranga. Bika Salomo ben de wan soema, disi ben lobbi Jehova nanga hem heeli hatti; na ala-fasi a teki dem maniri vo hem tata, en a no mankeri toe, vo doe ala demsani, disi hem tata David ben taki gi hem.
We wan dei a kali ala gransoema vo kondre kom makandra na Gibeon, dedapee da verbond-hoso vo Masra ben de jete, disi Moses ben meki na pasi, a taki, di hem tron koning so njoe-njoe, hem hatti seni hem, vo holi wan aparti bigi begidei, vo Jehova kom blesi hem nanga hem heeli kondre. We ala di a de dapee na Gibeon, meki hem ofrandi na tapo da kooproe altari, di de na da verbond-hoso doro, wan neti di a lidom slibi, Jehova kom na hem na ini drem, a taki: Begi mi wansani! San joe wani, mi gi joe? Salomo taki: Ke mi Masra vo mi! Fa joe ha boen-hatti so! Sani mi sa taki! Joe srefi ben teki mi, potti mi vo koning na heeli Israel-kondre tapo; ma joe srefi sabi toe, fa mi jonge jete, mi wawan no sabi, vo tiri so wan bigi kondre vo joe; so leki mi de, mi no habi da koni vo kweki ala dem foeloe pikien vo joe, so leki a fiti. We, mi Gado Jehova, di joe srefi ben potti mi na so wan bigi wroko, gran-tangi! mi begi joe, doe mi dasani, disi joe ben pramisi mi tata David, en gi mi da reti koni, vo mi kan sabi, vo tiri ala dem foeloe soema vo joe nanga reti, en vo mi kan kroetoe wan reti kroetoe alatem. So srefi mi plisi joe toe, grantangi! gi mi wan hatti, disi krin vo harki joe mofo alatem; bika joe wawan kan meki mi sabi, san da boen en san da ogri, san disi reti, en san disi kroekoetoe. Efi joe no leri mi, fa mi sa man, vo tiri so wan bigi kondre?
We da begi, di Salomo begi hem Gado so, dati ben switi na Masra, tee a kom piki hem wantem, a taki: Joe si? Di joe hatti de so, vo joe no soekoe soso grontapo-bigi, joe no begi mi vo soso goedoe, ofoe vo wan langa liebi, ma so wan boen-sani joe begi mi: we joe sa kisi dasani, di joe begi; mi sa gi joe koni, vo joe tron so wan koning, leki no wan ben de bifosi joe, en no wan sa de so na joe baka. En mi sa gi joe da- sani na tapo toe, di joe no begi mi; mi sa gi joe foeloe goedoe, mi sa meki joe kisi wan bigi nem na ala kondre; en efi joe harki mi woortoe alatem, waka na mi pasi, so leki joe tata David ben waka, dan mi sa gi joe wan langa liebi toe na grontapo.
We da so Salomo komopo na Gibeon, a go baka na Jerusalem, en na dapee a holi wan feestidei moro, a meki foeloe ofrandi, vo taki hem Gado tangi; so srefi a meki wan bigi trakteri gi dem amtenari vo hem.
We ala di dem gransoema vo kondre de makandra jete na Jerusalem, da srefi joeroe toe hoeroe-oeman kom na koning fesi, dem ben kisi trobi vo dem pikien vo dem, kaba dem wani, koning srefi moe koti da kroetoe gi dem. Da wan oeman bigin taki: Ja mi koning, mi nanga da oeman ben liebi makandra na wan hoso, wi wawan.-- Ma now mi nanga hem no de moro, mi komopo.-- We, di mi ben de na hem hoso jete, wi ala toe ben de nanga bele, en mi fosi meki wan manpikien. We dri dei na baka hem kom meki toe, a meki wan manpikien so srefi. Ma na neti, di da oeman potti da njoenjoe pikien vo hem na hem bedi, meki a slibi na hem sei, da poti pikien kom rolo na hem ondro, sondro da mama sabi, en da so a masi da pikien tee a dede. We na mindrineti, di a si, hem pikien dede, a hopo safri, a kom poeloe mi pikien na mi sei, potti na hem bedi, en da dede pikien vo hem a teki, potti na mi sei, sondro mi fili wansani vo dati; bikasi mi ben de na wan dipi slibi. Ma dei-broko mamantem, bifo moesoe-dei, di mi wieki, mi teki mi pikien, vo gi hem bobi; ma di mi fili hem, mi si, da pikien dede, mi taki: Ke, san kom da pikien abra so hesi! We di mi loekoe da dede pikien moro klosibei, mi si, da no mi pikien dati, di mi ben meki.-- Ma ala di da fosi oeman de taki da tori so gi koning, da trawan kom bari toe na ini, a bigin vo stry, a taki: No no, dati a no troe, joe lei gi mi! Da liebiwan da vo mi, en da dedewan da vo joe! Ma da trawan, di ben taki fosi nanga koning, hem stry so srefi toe; ibriwan taki, da liebi pikien da vo hem.
We di Salomo no ben kan sabi, hoedisi vo dem toe oeman habi reti, bika getuigi no ben de, a taki: Hoe tori dati? trawan taki so, trawan taki so. We, tjari wan houroe kom, koti da liebi pikien reti mindri, platie gi dem toe oeman vo ibriwan kisi reti hafoe. -- We di da reti mama vo da pikien jeri so wan taki na koning mofo, dasani koti hem bele, a tan leki dem soetoe wan nefi na ini hem hatti, a bari,taki: Ke, mi masra, gran-tangi! mi plisi joe, no meki dem kili da pikien; betre da oeman holi hem; pasiensi! -- Bika da mama kisi wan toemoesi sari na ini hem hatti vo da poti pikien. Ma da tra oeman hatti tan leki wan stoon, a taki: No no, joe no sa kisi da pikien, en mi no wani hem toe, meki dem koti hem, platie! We da so da kroetoe koti mooi vo troe, bikasi na dati Salomo si wantem, hoe-disi de da reti mama vo da pikien; en a teki da pikien, gi na da reti mama.
We da tori disi, fa da jonge koning ben kroetoe dasani so mooi, dati kom panja na heeli Israel-kondre; en ala soema, di jeri da tori, dem pryze hem toemoesi, en dem kom frede hem toe, bika heeli kondre si, fa Gado srefi ben gi hem da Jeje so nanga da koni, meki a kan kroetoe so wan reti kroetoe.
En no na Israel-kondre wawan Salomo kisi so wan bigi nem, ma di a sabi vo meki foeloe odo, nanga ala soortoe mooi singi, dati meki hem nem kom hopo tee na ala dem tra kondre toe; bika ala soema si, Salomo da wan boen koning vo troe; hem sabi moro foeloe, leki ala tra soema; da koni vo hem bigi, moro leki di vo ala dem bigi-bigi koniman na Egipti-kondre. We dati meki nofo gransoema vo tra kondre, nanga nofo koning srefi vo farawei kondre kom na Jerusalem, kom loekoe Salomo, nomo vo dem kan si hem, en vo dem kan jeri da koni vo hem. So srefi Hiram, da koning vo Tirus, di hem jeri, Salomo tron koning na plesi vo hem tata, a seni soema go na Salomo, go felisiteri hem; bikasi Hiram nanga David ben de boen buurman makandra alatem.
Bakatem da tori vo Salomo doro tee na Arabia toe, da wan farawei kondre, en dati meki da koningin vo Seba, di da koni vo Salomo kom bari tee na hem kondre toe, a hangri vo si hem. We, a teki pasi, a go tee na Jerusalem, hem nanga nofo vo dem tra gransoema vo hem kondre. So srefi a meki dem lai foeloe goutoe na dem kameli tapo, nanga so meni pikin stoon, disi mooi en dieri, nanga ala soortoe specery-sani a teki tjari go nanga hem, vo gi Salomo presenti.
Ma bifo da missi doro tee na Salomo fesi, a taki na ini hem hatti, hem sa tesi hem fosi, fili hem pikinso, vo hem srefi si, efi troe-troe Salomo koni so, leki tra soema ben taki gi hem. We so hesi Salomo meki a kom na ini, da missi doe dasani, disi a ben prakseri na ini hem hatti, a bigin tesi hem alafasi, ala soortoe raitori a haksi hem, a soekoe hem fini-fini. Ma Salomo sabi vo piki hem alasani; alwasi hoe dangra-dangra-tori a gi hem vo poeloe, Salomo poeloe ala krin-krin, no wan kibri-tori ben dipi so, tee Salomo no kan sabi.
We na baka Salomo teki da missi, a tjari hem go rontoe, a sori hem ala mooi-mooi vo hem. En di da gran missi si dem mooi hoso vo hem, nanga ala dem mooi kamera, nanga hem makzien, nanga ala dem foeloe amtenari en foetoeboi vo hem, en fa dem weri mooi, we ala dati meki da missi kom verwondroe vo troe, a taki: Ke, joe habi alasani mooi toemoesi! Mi ben jeri vo joe tee na mi kondre, dem ben pryze joe gi mi, dem verteli mi so meni, tee mi no ben wani bribi srefi: ma now, di mi srefi hai kom si alasani, en di mi srefi jesi jeri da koni vo joe, mi no kan lei, joe sabi sani vo troe, moro leki mi ben membre, mi finni alasani moro mooi, leki mi ben jeri na mi kondre; dasani di dem ben taki gi mi, a no hafoe srefi vo ala dasani, disi mi srefi hai kom si noja, en disi mi jesi srefi de jeri. Boen vo dem soema vo joe, en vo dem foetoeboi vo joe, disi dem kan si joe, dem kan jeri joe ala-dei. Jehova da wan bigi Gado vo troe, en wan boen Gado; a de lobbi joe nanga joe heeli kondre; bika efi a no ben lobbi Israel, a no ben sa gi dem so wan boen koning. We na baka da missi seni go teki da goutoe nanga ala dem tra mooi-mooi, di a tjari, a gi dati na Salomo vo presenti. So srefi Salomo toe gi da missi foeloe tra presenti baka, en dan da missi taki hem adjosi, a gowei baka na hem kondre.
Da srefi tem dem sipi kom baka toe, disi Salomo nanga koning Hiram ben seni go na Ofir; dem tjari foeloe goutoe nanga silver kom, nanga mooi hoedoe, nanga dieri stoon, nanga azau-tifi, nanga keeskeesi, nanga mooi fowloe, nanga ala soortoe sani vo tra kondre. Da mooi hoedoe, dati Salomo teki, vo meki trapoe nanga pilari na ini temple en na hem koning-hoso. Ma dem azau-tifi, dati a teki, vo meki dem wroko mooi ivoroe sani, dem wroko wan troon vo hem, dati taki wan koning-stoeloe, kaba da troon dem tapo nanga krin goutoe soso. Bika silver, dati dem ben habi so meni datem, tee dem no ben teli hem srefi.
1. We da tori vo Salomo, di Gado kom na hem, taki, meki a begi hem wansani, hem sa gi hem, dati meki wi membre da woortoe vo Masra Jesus, di a taki: Alasani, disi oen sa begi na mi nem, mi sa gi oenoe. (Joh. 14, v. 13 & 14.) We di Gado ha boen-hatti so, vo gi wi, sani wi haksi, meki wi no moe lezi dan, vo kom begi hem!
2. Salomo no ben begi Masra wansani, leki wan gehoorzam hatti, dati wawan a begi hem. We dati meki Masra gi hem da tra goedoe na tapo, disi a no ben begi hem. Masra Jesus taki: Soekoe dati fosi, vo oen kom na Gado-kondre, en vo oen kisi da reti-fasi vo hem; ala da tra-sani, dati oen sa kisi na tapo! (Matt. 6, v. 33.)
3. Da koning-oeman vo Seba, di a ben jeri so meni tori vo Salomo, a waka so wan langa pasi tee na Jerusalem, vo hem srefi si, en vo a jeri, efi dasani de troe, disi trawan verteli hem. We so srefi wi moe doe nanga da tori vo Jesus toe; a no moe nofo na wi, vo wi jesi kom jeri dati, ma wi srefi moe teki pasi, kom na hem, vo wi kom sabi Masra moro krin, en vo wi srefi hatti kisi onderfindi vo dasani, di wi jeri. Dan wi sa verwondroe so srefi, leki da missi ben verwondroe, wi sa taki: Ke mi Masra, fa joe switi na mi hatti! Troe, mi ben jeri nofo tori vo joe, ma now mi si, dem no taki hafoe srefi gi mi. “A hati mi, mi sari troe, di mi ben drai vo kom na joe.”
4. Ma vo taki vo da soso glori en vo da soso bigi, disi Salomo ben bigi, dati wawan no ben kan meki a habi wan reti boen liebi, efi a no ben habi lobbi vo hem Gado. Ala mooi-mooi vo grontapo, disi liebi-soema-hanoe de meki, a no waarti, te joe loekoe dem bigi wonder-wroko vo Gado. Masra Jesus srefi taki: Loekoe dem blomiki na sabana, fa dem mooi! Salomo srefi nanga ala hem mooi-mooi, en nanga ala hem glori, a no ben weri so mooi, leki wan vo dem blomiki. (Matt. 6, v. 29.)
(1. Koning Kap. 5 tee Kap. 1.)
Di Salomo ben prakseri so meni langa kaba, vo meki wan temple gi Jehova, so leki a belovoe dati gi hem tata David; en di koning Hiram vo Tirus ben habi foeloe mooi hoedoe na hem kondre, we Salomo seni haksi hem, efi a no sa doe hem da plisiri, vo helpi hem nanga cedroe-hoedoe en nanga som tra soortoe hoedoe moro, so leki a ben helpi hem tata David toe, di a ben meki hem koning-hoso. So srefi a begi Hiram toe vo wroko-man, a taki: “Joe sa doe mi wan bigi plisiri, efi joe meki dem soema vo joe kondre go fala hoedoe gi mi, en vo dem kweri timre hem go mi; mi sa pai dem boen. Bika dem soema vo joe kondre de sabi da wroko moro betre, leki dem soema vo mi; ma vo helpi? mi sa seni soema toe, vo helpi dem. So srefi joe sa doe mi wan bigi plisiri toe, efi joe kan loekoe wan boen basi gi mi, disi sabi ala soortoe wroko, vo mi kan potti hem vo gran-basi na ala dem tra basi tapo, di mi habi dia na Jerusalem; da soema moe sabi vo wroko goutoe nanga silver nanga kooproe nanga ala sosani moro. Bikasi da Gado vo wi, da wan bigi Gado, a grani vo troe; kaba da hoso, di mi de go meki gi hem, dati moe fiti da grani vo hem. Mi no taki, mi sa man, vo meki so wan hoso, disi bigi nofo, vo teki so wan gran Gado; ke, ala hemel srefi no man vo teki hem, bika a bigi pasa! Ma da hoso, di mi de go meki, dati de vo begi, en vo dini hem.”
We di Hiram kisi da boodskopoe vo Salomo, nomo a seni brifi baka, a pramisi hem, taki, nanga ala plisiri hem sa helpi Salomo nanga ala dasani, di a begi hem; bika hem srefi ha respeki toe vo da Gado vo Israel; hem srefi si, taki, da Gado Jehova, di ben meki hemel en grontapo, hem lobbi dem Israel-soema; bika efi a no ben lobbi dem, a no ben sa gi David so wan pikien, potti na hem plesi.
En wantem koning Hiram kali Huram-Abiv kom, dati ben de da gran-basi na hem heeli kondre, a seni hem go na Salomo, vo meki a loekoe da heeli wroko gi hem. So srefi Hiram kali foeloe tra soema vo hem kom, a seni dem go na bergi Libanon, meki dem fala boom, kweri hoedoe, timre; en Salomo seni boen rantsoen gi dem, nanga foeloe doezend Israel-soema, vo helpi dem. -- Alasani waka prontoe so, leki Salomo nanga Hiram ben meki da kontraki makandra. Ma di da pasi ben langa, tee dem no man vo tjari da hoedoe go na Jerusalem nanga wagi, dem poeloe da hoedoe fosi na ini boesi, tjari go na zee-kanti, na dapee dem meki kokroko, tjari go na Joppe; en na Joppe dem lai hem na wagi, tjari go na Jerusalem. Ma dem tra vreemde soema, di ben liebi panja na heeli Israel-kondre, dem dati Salomo teki, meki dem kom helpi toe na da wroko; trawan a potti vo tjari sani, en trawan a seni go broko stoon na tapo da bergi Libanon. Bika di Salomo go meki da temple na tapo da bergi Moria, na da srefi plesi, dapee na ouroe-tem Abraham ben wani kili hem pikien Isaak vo wan ofrandi gi Gado, en disi David ben bai bakatem na Arafna; we bifo dem kan seti da wroko, vo meki da temple, fosi dem ben moe poeloe da hede vo da bergi, saka hem hafoe-pasi, tee a tron leki wan bigi plein na taposei. En di dem klari nanga dati, na baka dem ha toemoesi wroko ageen, vo beri bigi-bigi stoon-pilari na ini gron da heeli bergi rontoe, vo dem metselari kan meki da bigi stoon-foetoe vo da temple na dem ondro-pilari tapo. We dem pilari skin ben deki vo troe; soso grofoe stoon dem teki, koti fo-kanti, en ibri-wan pilari dem wroko vo wan piesi nomo. Dati ben de wan toemoesi bigi wroko, bifo dem kom klari so fara. Ma vo wrokoman? dem ben de so meni toe, tee ibri dei Salomo ben potti feifitentin doezend soema na da wroko en moro srefi. Dem pikin-basi wawan ben de dri-doezend soema, en dem gran-basi ben de dri-hondro.
We datem, di Salomo bigin vo meki da temple vo Masra, dati ben de na ini da jari, di meki fo-hondro nanga aititentin, sinsi dem pikien vo Israel komopo na Egipti, a ben go na ini fo jari, disi Salomo tron koning; en wan doezend jari a ben de na fesi omtrenti, bifo Kristus gebore. Da heeli temple-hoso, so leki dem wroko hem na tapo da bergi Moria, na dorosei dem meki hem nanga krin weti marmer-stoon, dem gi hem wan-hondro nanga twenti voetoe na langa, fotentin voetoe na bradi, en siksitentin voetoe na hei. So srefi Salomo meki wan bigi gadri da heeli temple rontoe, na dapee dem domine nanga dem leviti ben habi vo meki dem of-randi gi Masra; en na baka a meki wan tra gadri moro, da vo dem tra soso-soema, te dem kom na kerki; da gadri drifi moro na doro-sei, na plasi-sei. Ma na inisei Salomo meki da temple reti so, leki da verbond-hoso ben de, di Moses ben meki na pasi. Toe kamera a meki na ini, a platie dem nanga wan mooi bigi gardyn, di a hanga na ini; da gardyn ben bradi so, leki da temple srefi, en a langa toe tee na taposei a fassi, a langa na ondro tee a kisi na gron. We da kamera, di ben de na bakasei vo da bigi gardyn, en disi dem kali da Moro-santa-plesi, , dati ben habi fotentin voetoe na langa en na bradi en na hei; we na dapee Salomo potti toe Kerubim na ini; hoedoewan, kaba dem tapo dem nanga goutoe. (Wan kerub, dati dem de wan gran Engel vo Gado.) We dem toe kerubim Salomo potti tana-poe so, vo da verbond-kisi vo Masra ben kan go na ondro dem foetoe bakatem, te alasani klari; en dem bigi flei dem ben bradi so, tee dem flei-mofo miti makandra.
Ma da tra kamera na fesi-sei vo da bigi gardyn, di dem kali da Santa-plesi, dati ben langa aititentin voetoe, en na dapee dem potti da goutoe smoko-altari, nanga tin goutoe kandera-tiki, nanga tin tafra, vo potti dem toon-brede na tapo, nanga hondro goutoe wasi-beki. Ala pranga, di ben de na ini da heeli temple, nanga dem postoe en doro, alasani ben wroko mooi toemoesi; Engel nanga blo-miki nanga ala soortoe mooi-mooi ben koti na ini; en goutoe, dati dem teki foeloe-foeloe toe, bika alasani ben tapo nanga goutoe soso. Da bigi ga-dri srefi nanga da mooi hei toren, di de na tapo da temple, ala dati ben tapo toe nanga bigi goutoe plaati. So srefi ala dem kandera-tiki nanga dem lampoe nanga pleti nanga nefi nanga wasi-beki, ala dati ben de vo goutoe soso; ma dem tra wroko-sani, di dem ben moe habi, te dem meki ofrandi, dem ben teki fini kooproe, vo meki dem.
We da so da temple kom mooi vo troe, ala-fasi dem wroko hem mooi toemoesi, na heeli gron-tapo so wan mooi hoso no ben de moro. Sebi jari dem ben de wroko da temple. En di dem ben koti ala dem stoon reti kaba, bifo dem tjari dem kom na Jerusalem, dem no ben habi wan tra wroko moro, leki vo fiti dem makandra; en dati meki no wan soema jeri wan hamera-naki, efi wan byter srefi, bika alasani ben fiti kaba.
We na baka di da heeli temple-hoso ben klari, Salomo teki ala dem goutoe-sani en silver-sani, nanga so meni tra mooi-mooi en dieri-sani, disi hem tata David ben kibri potti na sei vo wan kerki-goedoe, a tjari dati go, potti na ini dem makzien na sei temple; dem makzien ben tan, leki wan soortoe kerki-kamera. En dan a kali ala gransoema en hedeman vo heeli Israel-kondre kom na Jerusalem, meki dem helpi vo wye da temple gi Jehova. So srefi a seni dem leviti go na Gibeon, vo broko da verbond-hoso dapee, di Moses ben meki na pasi, tjari kom na Jerusalem, nanga ala dem santa wroko-sani, di ben de na ini. We di dem kom doro na Jerusalem tee na tapo da bergi Zion, da srefi joeroe dem domine hopo da santa kisi toe na hem plesi, dem waka go na fesi, moksi nanga dem leviti; en da so dem tjari da verbond-kisi, nanga da hoso, nanga ala da wroko-sani makandra go na ini da njoe temple. Dem domine nanga dem leviti ben de tjari sani, en koning Salomo nanga da heeli gemeente vo Israel waka go na da kisi fesi; da heeli sani ben tan, leki wan bigi beri; bika soema ben kom foeloe toemoesi na Jerusalem da srefi dei. We da verbond- kisi, dati dem domine tjari go tee na ini da Moro-santa-plesi , na dapee dem saka hem, potti hem reti na ondro dem Kerubim flei. En ala da tem, disi da kisi go na ini temple, dem kili so meni skapoe nanga kow gi Masra; dem ofrandi go doro, tee vo dem hopo da kisi na hem plesi, so tee dem saka hem baka.
Ma di dem domine komoto baka na ini da Moro-santa-plesi, dem miti ala dem leviti nanga dem singiman tanapoe na abra altari, dem alamal weri krin weti domine-hempi; en so leki dem domine foetoe kisi da Santa-plesi nomo, dem leviti bigin vo blo dem trompeti, en dem singiman hopo wan mooi psalm, singi gi Jehova. So srefi dem domine moksi toe na ini, en dem alamal singi wan switi psalm makandra; da singi ben waka mooi vo troe, a ben tan, leki nanga wan tongo nomo dem alamal pryze Jehova, taki hem gran-tangi; a ben de wan plisiri troe, vo jeri da singi. En da srefi joeroe, ala di dem de na da singi so, na wan bro dem si wan krin wolkoe doro na ini da temple, da wolkoe kom foeloe da heeli temple-hoso; en da bigi glori vo Masra, di ben de na ini da wolkoe, dati kom blinkri so tee a blindi dem domine hai, dem no ben kan doe dem wroko srefi, so langa da wolkoe tan dapee.
We na baka Salomo go tanapoe na wan pikin preki-stoeloe, di dem potti na ini da bigi gadri vo temple, a preki wan mooi preki gi da heeli gemeente; a potti alasani na dem fesi, fa Jehova lobbi dem, disi a meki dem hai kom si dasani now, disi Gado ben pramisi gi hem tata David, di a ben taki gi hem, a no hem sa meki da temple, ma hem pikien, disi sa tron koning na hem baka, da hem sa meki da hoso gi Masra. Dan Salomo taki: We oen si? So leki Masra ben taki, da so a ben doe toe. Hem srefi ben helpi mi, a gi mi tranga, vo mi doro da wroko, so leki a de nojaso. Troe, Masra de holi sani a pramisi; bika hem srefi ben helpi mi, vo mi kan loekoe so wan boen plesi gi da kisi vo hem, di habi dem toe stoon-lei, en di tan leki getuigi vo da verbond, disi Masra ben meki nanga dem tata vo wi, datem di a poeloe dem na Egipti-kondre.
Na baka Salomo drai hem fesi, a loekoe da altari, en nanga kni na gron a langa hem hanoe, a blesi da heeli gemeente vo Israel; a vouw hem hanoe, loekoe na tapo, a begi Masra nanga tranga tongo, a taki: “Gran-tangi vo joe, Jehova, joe Gado vo Israel! No wan tra Gado bigi so, leki joe, no na hemel, en no na grontapo toe. Joe de so wan Gado troe, di soema kan potti vertrouw na joe, wan boen-hatti Gado vo ala dem soema, di de waka na joe fesi nanga dem heeli hatti. We joe ben doe sani joe ben pramisi gi mi tata David, bikasi dasani disi joe mofo ben taki gi hem, dati joe hanoe ben doro toe. We di joe ben pramisi hem toe, taki, dem pikien vo hem, tee vo pikien-pikien srefi, efi dem sa waka joe pasi, iniwantem, te wan koning kom dede, joe sa teki wan trawan baka vo hem famili, potti vo koning, we gran-tangi, mi Gado Jehova, mi begi joe, meki da woortoe kom reti toe, so leki joe ben pramisi gi mi tata David!
Ma vo da temple, di mi meki, fa mi sa man vo taki, Gado sa kom liebi na grontapo na liebi-soema mindri? Ke mi Gado, mi sabi, joe bigi so, tee ala dem hemel srefi no man vo teki joe! We da hoso, di mi meki dia, fa dati sa man dan, vo teki joe! No no, a no kan. Ma tog nanga ala bigi, di joe bigi, mi sabi, joe sa teki da poti begi, disi joe foetoeboi de begi joe tidei, en joe sa jeri da tangi toe, disi joe foetoeboi taki joe gran-tangi tidei. We mi Gado Jehova! Gran-tangi, potti joe hai alatem na da hoso disi, loekoe hem boen na dei en na neti; bikasi da plesi da vo joe , joe srefi ben taki, da dia soema moe kali joe nem, en da dia joe sa jeri dem. We mi Masra, mi plisi joe, alatem te mi srefi nanga dem Israel-soema vo joe sa kom diaso na disi plesi, begi joe wansani, dan tee na ini hemel srefi joe moe potti jesi na da djeme vo wi; en te joe jeri wi begi, dan joe moe piki wi toe.
So srefi te toe soema kom na trobi, kaba ge-tuige no de, disi kan taki, da so efi da so dasani de, we te dem tjari wan vo dem soema kom dia, vo a sweri wan sweri dia na ondro da altari vo joe, dan joe srefi moe koti da kroetoe, meki a kom na krin wantem, efi da soema sweri reti, efi a sweri kroekoetoe; vo da boen soema kisi hem reti, en vo da ogri soema kisi hem strafoe.
So srefi te dem Israel-soema vo joe no wani jeri joe moro, te dem pasa joe mofo, vo joe moe strafoe dem, hali dem jesi, somtem joe kan seni fetiman kom na kondre, pina dem, ofoe joe kan meki no wan areen fadom, ofoe joe kan meki wan tranga hangri-tem kom na kondre, ofoe ogri siki, ofoe iniwan tra hebi: we efi dan da ogri kom hati dem, efi dem drai baka kom na joe nanga wan reti berouw, begi joe pardon dia na ini da temple vo joe, dan joe moe teki da poti begi vo dem, jeri ibriwan so, leki joe sabi hem hatti.
En te wan vreemde soema komopo na tra kondre, kom begi joe dia, -- bika joe nem sa hopo tee na dem heiden-kondre srefi -- dan joe moe jeri da begi vo da vreemde soema toe tee na ini hemel, vo ala-ala kondre na heeli grontapo kom sabi joe, en vo dem hopo joe gran nem! Te joe srefi sa seni dem Israel-soema vo joe go feti nanga dem vyanti, en na pasi te dem drai dem fesi, vo loekoe na disi temple sei, vo begi joe, dan joe sa plisi vo jeri da begi vo dem, helpi dem, meki dem kisi dem reti! So srefi na baka-tem somtem dem kan doe wansani, disi meki joe hatti kom bron nanga dem, tee joe gi dem abra na dem vyanti, somtem joe kan meki dem heiden kom poeloe dem na di kondre diaso, tjari gowei na dem kondre; we efi dan na da farawei kondre srefi dem drai dem fesi,loekoe na disi temple, efi dem gi abra dem zondoe gi joe, begi joe pardon nanga dem heeli hatti, dan joe sa plisi, vo jeri da begi nanga da kre vo dem tee na ini hemel srefi, dapee joe de liebi; joe sa plisi vo helpi dem, seni dem kom baka na dem kondre! Ke mi Gado, gran-tangi! hiti wan hai gi mi dia, teki da begi vo mi; en potti jesi toe na da begi, disi heeli Israel-kondre de begi joe! Tidei joe moe doe dati, en alatem te dem kom begi joe diaso na disi plesi; bika joe srefi ben teki wi na grontapo, meki wi tron wan aparti kondre vo joe; en vo da hede joe poeloe wi na Egipti, tjari wi kom dia. We mi Gado Jehova, kom wi klosibei, kom liebi dia, joe nanga da santa kisi vo joe! Blesi dem domine vo joe, meki dem kom wan blesi vo trawan baka; en meki ala bribi-soema vo joe plisiri vo ala da boen, di joe doe dem! We mi Gado Jehova, no poeloe mi trowei nanga da begi vo mi, ma membre ala dem bigi pramisi, di joe ben pramisi gi mi tata David!”
We di Salomo kaba nanga da begi vo hem, a hopo hem kni na gron, a tanapoe, en na fesi vo da altari vo Masra a blesi da heeli gemeente vo Israel, a taki nanga tranga tongo: “We meki wi taki Jehova gran-tangi now, disi a ben helpi wi, vo wi ben kan meki alasani so, leki hem ben taki. Vo troe-troe, vo ala dem switi taki, di a ben meki hem foetoeboi Moses taki gi wi, no wan woortoe srefi de, disi wi kan taki, a no kom so; no, a gi wi ala krin-krin. We Jehova, wi Gado, moe tan nanga wi, so leki a ben de nanga dem ouroe tata vo wi! Hem srefi moe naki wi hatti, a moe gi wi tranga, vo wi waka na hem boen pasi, en vo wi no vergiti dem gebod nanga dem leri, disi a ben gi na dem tata vo wi. We mi srefi vermane oen toe, vo oen holi oen srefi nanga Jehova, wi Gado, nanga oen heeli hatti; en so leki wi dini hem tidei, da so wi moe dini hem alatem.”
We ala di Salomo vermane dem so jete, bifo a kaba srefi, da faja vo Gado komoto na tapo, a fadom na da altari tapo, njam ala dem ofrandi; en da srefi momenti da bigi glori vo Jehova kom foeloe da heeli temple, a meki dem domine no man vo go na ini srefi. En so leki da krin glori vo Masra ben hopo na ini sei vo da hoso, so srefi a ben hopo na doro sei toe, na tapo da hoso. We da heeli gemeente vo Israel, di dem si da faja, disi fadom, nanga da bigi glori vo Masra na tapo da hoso, dem alamal hiti dem srefi nanga bele na gron, anbegi Jehova nanga bigi respeki, dem taki hem gran-tangi vo hem boen-hatti, disi hem no weri, vo doe dem boen. Sebi dei langa dem ben wye da hoso nanga begi en nanga singi en nanga trakteri; en na baka dem teki sebi dei moro, njam da feesti-dei vo pina-hoso moksi; ala dei dem benhabi kerki dem toe wieki doro, dem singi mooi psalm vo troe, pryze Jehova nem. Koning Salomo srefi ben gi foeloe doezend kow nanga skapoe, di dem teki vo ala dem ofrandi en vo dem trakteri. We na baka vo dem toe wieki Salomo taki, a boen now, meki ibriwan go baka na hoso; en dem alamal taki hem bigi adjosi, dem go na dem hoso nanga kouroe hatti en nanga bigi plisiri, dem taki Masra gran-tangi vo ala da boen, disi a ben doe na David en na Salomo en na hem heeli Israel-kondre.
We da srefi tem Salomo kali ala dem domine kom makandra nanga dem leviti nanga dem singi-man toe, a meki wan vaste wet vo kerki, vo dem sabi, fa dem moe dini Gado ala dei nanga begi en nanga ofrandi; so srefi a potti ibriwan na hem vaste wroko, di a moe doe, te a habi speli na kerki. Alasani Salomo meki so, leki hem tata David ben taki gi hem. Na baka di a klari nanga da heeli wroko, wan neti Jehova kom na hem ageen, a piki hem na ini drem, a taki: Mi jeri da begi, disi joe ben begi mi, da joeroe di joe ben wye da temple gi mi, en efi joe sa waka mi pasi nanga krin hatti, so leki joe tata David ben waka mi pasi nanga krin hatti, en efi joe sa holi vo dini mi nanga joe heeli hatti, dan mi no sa mankeri, vo doe joe ala dasani, di joe begi mi. Ma efi joe nanga joe kondre libi mi? waka go na kroekoetoe gado baka, dini dem? dan mi sa libi oen toe, mi sa meki dem vyanti vo oenoe kom teki oenoe, tjari oen gowei na dem kondre; en da mooi temple dem sa broko, dem sa pori hem so, tee ala dem tra heiden, disi sa si hem, dem sa meki spo-toe vo hem, dem sa taki, trawan gi trawan: Joe si, fa Jehova strafoe da kondre diaso nanga da temple vo dem? Bika dem libi dem Gado Jehova, disi ben poeloe dem tata na Egipti, dem go dini tra gado, we da vo da hede a doe dem so, meki dem kom na ala da ongeluk.
1. We da tori vo da wye, disi Salomo ben wye da temple, en da begi, disi a begi hem Gado, dati de sori wi toe, fa wi ha vo loekoe wi kerki. Gado vo hem srefi, -- da troe-- a no habi so wan hoso vanoodoe na gron-tapo, vo a liebi na ini; ma wi soema habi so wan begi-hoso vanoodoe, dapee wi kan kom makandra, begi Gado, jeri hem tori, vo wi kom sabi hem.
2. Na ouroe-testamenti-tem da temple na Jerusalem wawan ben de da reti plesi, dapee soema ben moe go begi Gado. Ma now, so leki wi de, wi kan taki, da tem kom kaba, disi dem di soekoe Gado, kan finni hem na ala plesi. (Job, 4. v. 23.)
3. Te soema vo kondre de si, koning srefi no sjem, vo saka hem kni, begi Gado vo hem kondre, nanga so wan bigi respeki, leki Salomo ben doe na ala soema fesi: we so wan boen exemple kan meki heeli kondre kisi respeki toe vo Gado.
(1. Koning Kap. 11 & 12.)
So hesi Salomo klari nanga da temple, a bigin meki wan mooi bigi koning-hoso vo hem, nanga wan aparti plisiri-hoso, nanga wan toe dri buiti na kombe; ala dem hoso ben mooi vo troe, dem foeloe nanga goutoe en nanga ala soortoe mooi-mooi.
We vo da helpi, di koning Hiram vo Tirus ben helpi hem ala dem jari, Salomo wani gi hem twenti foto na Galilea-kondre, meki a teki dem vo wan paiman. Ma di koning Hiram go loekoe dem foto, a taki, dem no boen na hem, we dati meki Salomo ben moe pai hem nanga kontanti moni. Ma dati no ben de wansani, bika Salomo ben de wan goedoe-man vo troe, so wan bigi koning no ben de moro na heeli grontapo. Buiti hem srefi Israel-kondre, nofo vo dem pikin kondre na buurti ben de na hem ondro toe, di moe pai hem wan vaste moni ibri jari. En di no wan fetiman habi hatti, vo kom trobi hem, dati meki dem soema vo Israel en vo Juda-kondre liebi toemoesi boen na hem ondro; ibriwan habi hem pranasi nanga hem droifi-djari, noti mankeri dem.
We dati go doro so nofo jari, sondro Salomo ben doe wansani, disi no boen na hem Gado. Ma poti, bakatem di a no ben loekoe na hem srefi moro, safri-safri a meki da soso grontapo-bigi kom blindi hem hai, tee a taki: We meki mi liebi boen vo mi, meki mi habi mi plisiri! (Sal. 2, v. 1, 4 & 5.) So srefi a teki moro oeman vo hem, a kom lobbi dem heiden-oeman vo tra kondre srefi, disi Gado ben waarskouwe dem pikien vo Israel expresi, taki, dem no moe familiari nanga dem kweti-kweti, vo dem heiden no moe pori da bribi vo dem. We alwasi Salomo ben sabi dati heeli boen, tog hem hatti hanga toemoesi na dem oeman, en dati tjari hem na foeloe ogri. Fosi dem begi hem so meni, vo a doe dem da plisiri, meki ibriwan kan habi wan altari, ofoe wan kerki na kombe, vo dem kan dini dem gado dapee; en di dem kisi hem so fara nomo, na baka dem dwingi hem toe, vo hem srefi waka go nanga dem wan-wantron, dini dem kroekoetoe gado; te a tan a go dini Jehova na hem temple, en te a tan ageen a waka go nanga dem heiden-oeman vo hem. Ma so wan hafoe-hafoe fasi, disi Salomo no dini hem Gado wawan nanga hem heeli hatti, so leki hem tata David ben doe, dati no ben boen na Masra kweti-kweti. Bika toe-tron Masra srefi ben kom taki nanga hem, a ben waarskouwe hem so switi, meki a loekoe boen nanga dem kroekoetoe gado, vo a no go dini dem, en tog Salomo no ke vo dati moro.
We dati meki Gado hatti kom bron nanga hem vo troe, en a seni wan profet go na hem, meki a taki gi hem: Joe si? di mi finni joe nanga sosani, en di joe no doe so, leki mi ben taki gi joe, mi sa poeloe joe famili na koning, meki wan amtenari vo joe tron koning. Ma vo joe tata David hede, di ben dini mi so trouw alatem, mi no sa doe dati na joe liebitem, ma na joe pikien hanoe mi sa poeloe da kondre; mi no sa poeloe hem ala, ma hafoe mi sa poeloe hem. Da wan famili vo Juda en vo Benjamin wawan sa tan na hem ondro, vo da pramisi hede, di mi ben gi mi foetoeboi David, en vo Jerusalem hede, di mi ben teki, meki a moe de wan santa foto vo mi.
Ma di Salomo no teki dati vo wan hebi jete, en di a no saka reti gi hem Gado, begi hem pardon, Masra meki hafoe vo da strafoe kom moro hesi kaba, leki a ben pramisi hem. Bika wan prins vo Edom-kondre, di hem kali Hadad, nanga wan tra gransoema vo Damaskus, dem ala toe meki oproeroe, poeloe dem srefi na hem ondro, en dati meki a lasi dem toe mooi kondre Edom nanga Siria wantem. So srefi wan amtenari vo Salomo, di dem kali Jerobeam, wan knapoe soema, di Salomo srefi ben kweki, hem ben soekoe toe, vo poeloe Salomo, potti hem srefi vo koning. We wan dei, di Jerobeam komopo na Jerusalem, go na hem pranasi, profet Ahia vo Silo kom miti hem na pasi, a weri wan njoe-njoe profeti-mantel. En di a doro klosibei na hem fesi, a teki da mantel, a pliti hem na twalf piesi, a taki gi Jerobeam: Kom teki tin piesi vo joe! Bika Jehova taki, hem sa poeloe kondre hafoe na Salomo hanoe, platie hem; en so leki mi gi joe tin piesi vo mi mantel, da so Masra sa gi joe dem tin kondre vo Israel famili, vo joe tron koning vo dem. Buiti da pikin kondre vo Juda en vo Benjamin, dati wawan sa tan vo Salomo pikien, vo Jerusalem hede en vo da sweri hede, disi Masra ben sweri gi David vo da Messias. We efi joe sa doe alasani, disi hem taki gi joe? efi joe sa waka na mi pasi, so leki David ben waka na mi krin pasi, dan Masra sa de nanga joe, a sa meki joe tan koning vo Israel-kondre alatem. Bika Salomo nanga hem famili ben libi Jehova, go dini kroekoetoe gado, en vo dati hede Gado sa doe dem so.
We da tori, disi profet Ahia ben kom taki nanga Jerobeam na nem vo Masra, dati no tan langa, bifo Salomo kisi dati vo sabi toe, en na plesi vo a saka gi hem Gado, begi hem pardon, so leki hem tata David ben doe, a kisi hattibron na Jerobeam tapo, tee a soekoe vo kili hem srefi; en Jerobeam ben moe go kibri tee na Egipti, na dapee a tan so langa na koning hoso srefi, tee Salomo dede. We Salomo ben feti nanga Gado srefi, di a ben soekoe vo poeloe da strafoe baka, disi Masra srefi ben pramisi hem kaba. Fotentin jari langa Salomo ben de koning na Israel-kondre, en siksitentin jari a ben ouroe, di a dede, dem beri hem klosibei na hem tata David sei.
Wi no kan sabi reti, efi somtem bakatem Salomo ben drai baka, begi Jehova pardon. Ma te wi lesi dem boekoe, di a ben skrifi dem laatste jari vo hem, a tan so, leki a ben kisi tra membre pikinso, bifo a dede; bika na ini wan boekoe vo hem a de taki so: Mi ben de koning vo Israel-kondre, na Jerusalem mi ben liebi. Mi ben si alasani, disi soema doe, en disi pasa na grontapo; mi soekoe alasani fini, en nanga dipi koni mi prak-seri, fa alasani de waka; ma mi si, ala grontapo-sani da winti soso, a no kan gi soema wan reti plisiri. A troe, mi ben taki na mi srefi, mi bigi vo troe, mi grani en mi koni, moro ala tra soema, di ben de na Jerusalem bifo mi; bika mi ben pina toemoesi, vo leri sani en vo kisi koni, vo sabi alasani krin-krin, ma na baka mi kom si, ala dati da vo soso; bika moro wan soema sabi? moro broko hede a habi. We mi taki na mi hatti, meki mi loekoe wan tra fasi, vo meki mi hatti kouroe; mi go meki bigi hoso vo mi, nanga mooi plisiri-hoso, nanga mooi djari en pranasi, mi ben habi so meni foetoeboi, nanga so meni moni, nanga ala soortoe mooi sani. Alasani disi mi hai ben si? en disi mi hatti ben hangri? mi ben sabi vo kisi toe. Mi no ben poeloe wan enkli plisiri na mi hanoe. Ma sani ala dati ben helpi mi? Di mi loekoe ala mi wroko, en di mi membre ala da moeiti, di mi ben habi, mi si, ala dati da soso trobi soso, a no ben man, vo meki mi hatti kouroe.
We na baka vo Salomo da gran prins vo hem, Rehabeam, teki hem koning-wroko abra na Jerusalem, bika dem toe famili vo Juda en vo Benjamin no ben trobi vo teki hem wantem, vo a tiri dem kondre. Ma dem tra tin famili vo Israel no wani, wan pikien vo Salomo moe tron koning na dem tapo; bika granwei kaba da maniri vo Salomo no ben boen na dem moro; dem no habi no wan lobbi en no wan respeki vo hem, en ibri jari te dem pai hede-moni nanga dem tra belasti, di lanti moe kisi, dem ben doe dati nanga mandi-fasi. En buiti dati dem soema vo Efraim famili ben habi wan ouroe djaloesoe vo Juda famili, vo Jerusalem hede en vo da temple hede, di de na Juda-kondre, en vo disi Masra ben taki, wan soema vo Juda famili moe de koning vo Israel alatem.
We dati meki ala dem gransoema vo dem tin Israel-kondre kom makandra na Sikem, holi komparisi, efi dem sa teki da pikien vo Salomo toe, meki a tiri dem kondre, ofoe san vo doe. Sikem ben de wan foto vo Efraim famili. Ma so hesi Rehabeam jeri dati, nomo a teki pasi, a waka go na Sikem toe, hem nanga ala dem hedeman vo Juda-kondre; bika a taki, te dem si, hem srefi kom toe, somtem dati sa gi dem respeki, vo dem sa teki hem toe vo koning, sweri gi hem wantem. Ma bifo hem doro dedapee, dem trawan ben kali Jerobeam kaba, di ben komopo baka na Egipti, dem seni hem nanga wan toe dri hedeman moro go na koning Rehabeam, taki gi hem: Joe sabi? joe tata Salomo ben holi wi toemoesi na ondro dwingi, tee bakatem wi no ben man vo holi moro; we efi joe pramisi wi, taki, joe sa saka da liebi gi wi, poeloe da hebi hafoe, disi joe tata ben potti na wi tapo, dan wi sa sweri joe wantem taki, wi sa teki joe vo koning. We di dem kom na Rehabeam, en di dem taki so, a no piki dem wan reti piki, ma a taki, meki dem kom baka, wan tra dei hem sa piki dem.
We so hesi dem komopo nomo, Rehabeam kali ala dem ouroe hedeman vo kondre kom na hem, di ben sidom na kroetoe kaba na hem tata Salomo tem, a haksi dem, san vo doe? En dem alamal rai hem dem taki: Betre koning gi dem dasani, disi dem ben haksi; bikasi efi tidei koning taki switi nanga dem, dan dem sa saka gi koning alatem, leki boen vertrouw soema.
Ma di da jonge koning ben habi bigi membre, da rai vo dem ouroe bedari soema no ben boen na hem, a go haksi dem jonge soema, di de vo hem srefi speli, a taki, somtem dem sa rai hem wan tra fasi. En di a holi komparisi nanga dem, dem alamal taki, koning no moe frede dem soema, ma a moe sori dem, taki, dem no ha vo taki gi hem, fa hem moe doe. We te dem kom baka, a moe krasi dem, taki: San oen membre? Oen taki, mi tata ben holi oen tranga toemoesi na ondro dwingi? A boen, mi sa sori oenoe! Te mi hopo mi pikin finga nomo, oen sa frede mi moro kaba, leki oen ben frede mi tata, te a ben sori oen kofo srefi. Mi tata ben teki wipi, vo gi oen fom-fom, ma mi sa teki kroekoetoe-tere, vo wipi oenoe!
We dati ben switi na Rehabeam vo jeri, en di dem soema kom baka, kom harki, a piki dem so, leki dem jonge soema ben rai hem, kaba a jagi dem komoto na hem fesi, a taki, meki dem loekoe boen. Rehabeam ben membre, te a krasi dem so, dati sa meki dem kisi frede. Ma Gado meki dasani kom wroko wan tra-fasi na dem hatti, vo da taki moe kom reti, disi profet Ahia ben kom taki gi Jerobeam tra jari. Bikasi di dem tin famili vo Israel jeri da tranga mofo, disi da jonge koning Rehabeam seni gi dem, dem taki: “Hoe wroko wi habi nanga David dan? Wi no verpligti, vo dini da pikien vo Isai. We meki ala Israel-soema go baka na hoso; dem soema vo David famili kan doe, san dem wani!”
We di Rehabeam si, dasani waka so, a seni hem sekretarisi go na dem, vo meki dem kom bedari baka; ma dem no jeri na da sekretarisi, kontrari, na ini da oproeroe dem teki stoon, fringi na hem tapo, kili hem. En di Rehabeam si dati, hem srefi kisi frede toe, tee a meki dem span hasi na hem wagi, a feti hesi vo komopo na Sikem, a drai baka go na Jerusalem, hem nanga ala soema vo Juda famili. Ma dem tra tin famili vo Israel teki Jerobeam vo dem koning, meki a tiri dem kondre. We da so da bigi koning-kondre vo Salomo kom platie na toe piesi; di vo Juda en vo Benjamin famili, dati dem kali Juda-kondre, en di vo dem tin tra famili, dati dem kali Israel -kondre. Alasani kom pasa so, leki profet Ahia ben taki Jerobeam na fesi kaba.
Ma Rehabeam, so hesi a kom na Jerusalem, a seni kali wan hondro nanga aititentin doezend soema vo Juda en vo Benjamin famili kom makandra, a taki, meki dem go feti nanga dem oproeroe-soema, dwingi dem na hem ondro; bika Jerobeam no moe tan koning na dem tapo. Ma di dem wani go na da feti, nomo Gado meki profet Semaja kom tapo dem, a taki, Jehova no wani, dem go feti nanga dem soema vo Israel-kondre, bikasi dem de brara nanga brara makandra; meki dem alamal go baka na hoso, bika Gado srefi ben meki ala dati kom so. We dem soema vo Juda teki da woortoe vo Masra, dem drai baka go na hoso, sondro dem soekoe dem trawan moro nanga feti.
Ma Jerobeam, da njoe koning vo dem tin famili vo Israel, hem meki wan koning-hoso vo hem na Sikem. Ma di dem no ha kerki dapee, dati gi Jerobeam wan pikin frede, a taki, efi dem soema vo hem kondre sa go njam feesti-dei na Jerusalem, na da temple vo Jehova, somtem dati kan meki dem moksi baka nanga Juda-kondre, tee dem teki Rehabeam vo dem koning, en dan hem moe frede vo hem liebi, so tee bakatem dem kan kom kili hem. We da frede meki Jerobeam kom na da takroe prakseri, a taki, betre hem meki tra gado gi dem, di dem kan dini dem na dem kondre srefi, vo dem no ha vo go na Jerusalem moro. En so a teki goutoe, a meki toe pikin-kow gi dem, da wan a potti na Betel, da trawan a hopo na Dan; ibriwan kisi wan mooi temple vo hem nanga wan altari toe, dapee soema kan meki dem ofrandi. Na baka a seni taki gi ala soema vo hem heeli kondre, da pasi langa toemoesi, vo dem waka go na Jerusalem, dini Gado, dem no ha vo doe dati moro; bika dem gado, disi ben poeloe Israel na Egipti, tjari kom na Kanaan, dem de klosibei na dem eigen kondre srefi. Ma di Jerobeam no habi wan leviti na hem kondre, dati meki a ben moe teki tra soso soema vo dem moro laage famili, potti dem vo domine, kaba hem srefi doe da wroko vo grandomine. We da so Jerobeam pori hem kondre, tee pikin-moro ala soema tjari dem ofrandi go na dem pikin-kow, di hem srefi ben meki gi dem.
1. We da tori vo koning Salomo de gi wi wan bigi waarskouwe vo troe, a de sori wi, fa ala koni nanga ala onderfindi vo liebi-soema no kan helpi wi noti, efi wi no loekoe boen na wi srefi. So hesi wi meki da soso grontapo bigi kom blindi wi hai, nomo wi lasi da bribi nanga da lobbi vo Gado. Da so wi si na Salomo. Fa hem tata David nanga profet Natan ben leri hem so boen! En fa a ben teki da bribi vo Jehova so boen! Fa a ben begi Gado so switi, di a wye da temple! En fa a ben vermane dem tra Israel-soema so switi! -- Soema ben sa taki, bakatem na hem ouroe jari da srefi koning Salomo sa meki dem heiden-oeman vo hem blindi hem hai so, tee a waka go na dem baka, dini kroekoetoe-gado? We hem srefi waarskouwe wi bakatem, a taki: No potti vertrouw na joe srefi, en na da koni vo joe! Wan poti pikien, disi frede Gado, a waarti moro, leki wan ouroe koning, disi lau, tee a no sabi vo holi hem srefi. (Kap. 4, v. 13.)
2. Sani ala da soso bigi nanga ala dem plisiri-hoso ben helpi Salomo bakatem, di a fili, hem Gado no kan lobbi hem moro? Ala dati no ben kan troostoe hem, a no ben kan meki hem hatti kouroe. En bakatem di a dede, a no ben kan teki noti vo ala hem glori, tjari go na da tra liebi jandasei; ma soso-soso a ben moe gowei, libi alasani dia. We Johannes habi reti, di a taki: Grontapo de pasa, nanga ala hem plisiri; ma da soema, disi doe Gado wani, sa tan vo teego. (1. Joh. 2, v, 17.)
3. Da tori vo da jonge koning Rehabeam de sori wi, fa jonge soema kan doe dem srefi ogri, efi dem membre, dem sabi sani moro betre, leki dem bejari gransoema. A troe, efi ouroe soema no loekoe na dem srefi, dem kan pasa Gado mofo toe, so leki wi si dati na da ouroe koning Salomo; ma tog, di jonge soema no habi da onder-findi jete, a fiti dem, vo dem teki bejari soema rai.
(1. Kon. Kap. 13 tee Kap. 16. 2. Kron. Kap. 14 tee Kap. 17.)
So hesi Jerobeam ben klari nanga da kroe-koetoe-gado-altari na Betel, a kali ala soema vo hem kondre kom dapee, a taki: Tra moen dem soema vo Juda-kondre ben njam da feesti-dei vo pina-hoso na Jerusalem janda, we meki wi doe dati toe diaso na Betel. En dem alamal kom makandra dapee, dem kili so meni kow nanga tra meti, dem meki dem ofrandi na tapo da altari. Na baka Jerobeam go tanapoe na baka da altari, vo meki smoko, leki grandomine. Ma da srefi joeroe wan profet vo Juda-kondre doro dedapee, en na nem vo Jehova a bari da altari tranga, a taki: Joe altari, joe altari! Jere, san Jehova taki: Wan soema vo David famili sa hopo, a no de jete, ma a sa kom, dem sa kali hem Josia, da hem sa kili ala dem kroekoetoe-gado-apostroe, di meki smoko na joe tapo; kaba liebi-soema boonjon a sa teki, bron na joe tapo, leki ofrandi. We wan dri-hondro nanga feifitentin jari na baka dasani kom pasa reti so, leki da profet ben taki na fesi. (Nro. 63.) Na baka da profet loekoe da heeli gemeente, a taki: Oen sa kisi wan marki di djoesnoe de, vo oen si, Jehova srefi ben seni mi, vo taki so; da altari sa broko piesi-piesi diaso na oen hai, kaba da asesi, di de na hem tapo, sa panja fadom.
Ma di Jerobeam jeri da profet taki so, a kisi hattibron so tee a langa hem han na abra da altari, a bari dem soema, a taki: Kisi da soema gi mi! Ma ala di a langa hem hanoe so, nomo da han kom styfi, tee a no man vo hali hem baka. Kaba wantem da altari kom broko toe na piesi-piesi, en da asesi vo hem panja, so leki da profet ben gi dem da marki. We now Jerobeam kom skreki vo troe, a saka, a begi da profet: Tangi-tangi, begi Gado gi mi, vo a helpi mi, meki mi kan hali mi hanoe baka. We da profet begi Gado gi hem, kaba wantem da hanoe kom boen baka, leki a ben de bifosi. Na baka koning verzoekoe da profet, meki a kom na hem hoso, njam nanga hem, a taki, hem sa gi hem wan presenti. Ma da profet taki, hem no kan go nanga koning, hem no kan teki wansani toe; bika Jehova ben taki gi hem, meki a no njam noti na Betel, meki a no dringi watra toe: ma so hesi hem doe hem wroko, a moe drai baka wantem. We, da profet libi Jerobeam, a drai baka go na hem kondre; ma di a gowei. a teki wan tra pasi, leki di a ben waka kom. Bika disi Jerobeam ben verzoekoe hem, vo a kom njam nanga hem, somtem a ben wani doe hem ogri; ma di da profet no teki da verzoekoe, en di a waka wan tra pasi go na hoso, Gado ben poeloe hem na ini da ogri, disi ben kan kisi hem na Betel.
Ma poti vo hem, ala di a ben de na pasi srefi, wan tra tesi kom miti hem, en dati doe hem ogri vo troe. Bika wan enkli profet ben liebi na Betel, wan ouroe soema; we di hem pikien kom na hoso, verteli hem tata alasani, disi da profet vo Juda ben doe na Betel, en sani a ben taki nanga koning, dati meki da ouroe profet kom hangri, vo si da profet vo Juda, en vo taki nanga hem. We a meki dem tjari hem hasi kom, a feti hesi, rei na da profet baka, a kisi hem hesi toe, a miti hem na ondro wan bigi boom, dapee da profet sidom bro pikinso. We di a doro klosibei na hem, a haksi hem, efi hem de da soema vo Gado, di komopo na Juda-kondre. En di a taki ja, da hem, da trawan begi hem, meki a drai baka kom na hem hoso, njam brede. Ma da profet vo Juda taki, hem no kan doe dati, bika Masra ben taki gi hem, hem no moe njam noti na Betel, a no moe njam brede, a no moe dringi watra toe. Da ouroe profet taki: We mi a no wan profet toe, so boen leki joe? Masra srefi seni wan Engel kom na mi, a taki, meki mi go teki joe, tjari joe kom baka na mi hoso, vo joe njam pikin brede, dringi pikin watra. Efi da profet vo Juda ben koni, a ben moe sabi wantem, taki, da lei soso da ouroe profet de lei dati gi hem; ma somtem hem srefi no ben habi wan reti respeki vo Jehova, ofoe somtem a ben weri kaba, en dati meki a gi da ouroe profet jesi, a drai baka go nanga hem. Ma di a doe so, a doe wan bigi zondoe; bika fosi hem srefi mofo ben taki na ala soema jesi, Gado no wani, vo a njam wansani na Betel, en now a pasa da woortoe na ala soema hai. We efi Gado no ben doe wan aparti sani, no wan soema ben kan loekoe hem moro vo wan reti profet; kaba da floekoe, di a ben floekoe da altari, dem no ben kan bribi moro, taki na Jehova nem a ben doe dati. Ma Gado ben wani, vo dem soso Israel-soema moe kisi respeki vo hem, en vo dem toe profet finni tem toe, vo begi hem pardon vo da ogri, di dem doe. Bika da srefi joeroe, disi dem ala toe sidom na tafra de njam, Gado kom naki da ouroe profet hatti so, tee a bigin krasi da profet vo Juda, a taki: Jere, san Masra de taki gi joe! Disi joe no ben habi frede vo da woortoe vo hem, ma joe doe dasani, di a ben taki, joe no moese doe, joe no sa si joe hoso baka, ma na wan tra soso plesi dem sa beri joe. We di a taki so, a meki da profet vo Juda go sidom na hem hasi tapo, a seni hem gowei baka na hoso. -- Ma ala di da profet de na pasi, wan leeuw kom miti hem, a djompo na hem tapo, kili hem, kaba a tanapoe de na sei vo da dede-skin vo hem, sondro a doe da hasi wan ogri. We na baka wan toe dri soema kom pasa da plesi, dem si dasani, en di dem tjari da njoesoe kom na foto, taki, wan leeuw kili wan soema na pasi, da ouroe profet taki, troe-troe dati moe de da soema vo Gado, di ben pasa Masra woortoe, en vo dati hede a kisi da ogri. Kaba hesi da profet rei go na da plesi, a hopo da dede-skin, potti na hem hasi tapo, a tjari hem go na Betel, en na dapee a beri hem, a kre toemoesi vo hem, a taki: Ke mi brara, poti! fa joe kom na so wan ongeluk! En da ouroe profet taki gi dem pikien vo hem: Te mi srefi sa kom dede, oen moe beri mi na ini da srefi grebi toe, meki mi skin kan bro na da tra profeti sei; bika da floekoe, disi da profet ben floekoe da altari na nem vo Jehova, dati no sa mankeri vo kom; heeli kondre sa si.
We da waarskouwe vo da profet, nanga ala dem tra skreki-sani, di ben pasa na Betel, dati ben moe gi koning Jerobeam wan frede, meki a libi dem kroekoetoe-gado; ma dati no kom na Jerobeam hatti; kontrari, jari vo jari a go moro dipi na ini da takroe wroko, a pori ala soema, tee heeli kondre vo hem tron leki wan heiden-kondre. Kaba da ogri go doro so, tee vo ala dem tin na negi koning, di ben kom na hem baka, no wan ben de, disi ben soekoe Jehova, da reti Gado vo Israel baka nanga krin hatti. Ma da kroekoetoe-gado-wroko, disi Jerobeam ben hopo, dati go doro toe, tee pikin-moro dem tin famili vo Israel no sabi noti moro vo da Messias, disi Jehova ben pramisi dem.
We ala di dasani pasa so na Israel-kondre, Rehabeam, da pikien vo Salomo, ben loekoe hem koning-wroko heeli boen na Jerusalem, en dati meki ala dem domine en leviti vo dem tin tra famili komopo na Jerobeam ondro, dem go liebi na Juda-kondre. So srefi nofo vo dem tra boen soema, di no ben wani dini dem kroekoetoe-gado vo Jerobeam, dem waka na dem domine baka, dem go abra toe, liebi na Rehabeam ondro, kaba da so da pikin Juda-kondre kom moro bigi jari vo jari. Ma dati srefi kom tron wan trapoe gi Rehabeam toe, di meki a fadom. Bika di a si, hem kondre kom bigi so, dati meki hem srefi kisi bigi membre toe, kaba safri-safri a kom vergiti hem Gado, tee a teki foeloe oeman, en ala so soortoe heiden-maniri kom hopo tranga na heeli Juda-kondre toe. We dati meki Jehova hatti kom bron nanga dem, a meki koning Sisak vo Egipti kom feti nanga dem; da koning tjari so meni soldati kom na Juda-kondre, dem teki da heeli kondre so tee dem doro klosibei tee na Jerusalem srefi. Ma di ala dem gransoema vo Juda ben de makandra na Jerusalem nanga bigi sari, dem no sabi san vo doe, Masra seni profet Semaja kom na dem, taki: Oen si? oen ben libi mi; vo da hede mi libi oenoe baka, mi gi oen abra na koning Sisak hanoe. We da vermane kom wroko so boen na dem hatti, tee dem alamal saka dem srefi gi Jehova, en nanga bigi sari koning nanga ala dem hedeman kom kre vo dem zondoe; dem taki: Ja, Masra ha reti; a fiti wi so! Ma di Masra si, da ogri de hati dem, nomo a kisi wan sari vo dem, a taki, hem no sa pori dem so krin-krin, ma a sa meki da Egipti-koning pina dem pikinso, vo dem si, a no wan, vo dini Jehova, efi vo de na wan tra koning ondro. We di koning Sisak doro na ini Jerusalem, hem nanga ala hem soldati, a go poeloe ala goutoe nanga ala silver na ini temple en na ini koning-hoso, a teki ala vo hem, tjari gowei. Ma vo pori da foto srefi? efi vo pina dem soema? vo dati Gado no gi hem pasi, vo di dem soema ben habi berouw vo dem zondoe, en vo di wan toe dri boen soema ben de na kondre jete, di no ben bemoeje nanga da kroekoetoe-gado-wroko. Ma da drai, disi da frede wawan ben meki koning Rehabeam drai hem liebi, dati ben pasa hesi, bika a no ben ke vo soekoe Masra baka nanga krin hatti, ma zoodra da Egipti-koning libi hem nomo, a doe tra ogri ageen, en dati go doro so tee a dede. Tin na sebi jari a ben tiri Juda-kondre, en di a dede, dem beri hem na Jerusalem. Na hem baka hem pikien Abia tron koning vo Juda -kondre.
We da tori vo Jerobeam, disi Gado ben meki hem han kom styfi, ala di a langa da hanoe, vo meki dem kisi da profet, dati de meki wi membre da psalm, di taki: No trobi dem bribi-soema vo mi; no doe dem profet vo mi ogri! (Psalm 105, v. 15.)
Ma Jerobeam, da fosi koning vo Israel -kondre, ben habi wan pikien, di dem kali Abia. We da srefi tem di Jerobeam ben feti so, vo hopo dem kroekoetoe-gado-altari na hem kondre, da srefi pikien vo hem kom siki vo troe. En di da tata en mama ben hangri vo sabi, efi da pikien sa finni wan betre, ofoe somtem a sa dede, Jerobeam taki gi hem wefi, meki a poeloe hem mooi klosi, weri trawan, leki wan soso oeman, vo no wan soema kan si, taki, hem da koning wefi, meki a go na Silo, haksi profet Ahia, san hem membre vo da pikien. We da oeman doe so, a teki wan pikin presenti, a go na Silo, sondro wan soema sabi hem. Ma da ouroe profet, alwasi hem hai kom doengroe kaba, tee a no kan si wansani moro, tog a ben sabi na fesi kaba, taki, koning wefi de go kom haksi hem vo hem pikien; bikasi Gado srefi ben meki a kom sabi, en a taki toe gi hem, fa a moe piki hem.
We di da missi doro klosibei na da profet hoso, bifo a naki doro srefi, da ouroe profet, di a jeri da oeman foetoe, a kali hem, a taki: Kom na ini dan, missi! San hede joe no wani, mi sabi joe? We da mofo, di Masra gi mi, vo taki gi joe, a no sa switi na joe. Go piki Jerobeam, taki gi hem, da so Jehova seni taki gi hem: Joe si? mi ben teki joe, potti joe vo hedeman na mi kondre Israel. Mi ben poeloe da kondre na David famili, potti na joe hanoe. Ma joe no ben ha respeki vo mi woortoe so, leki mi foetoeboi David ben doe, di ben dini mi nanga hem heeli hatti; kontrari, joe doe ogri toemoesi pasamarki, di joe libi mi, joe go meki kroekoetoe-gado-popiki, dini dem; joe ogri moro leki ala dem trawan, di ben de bifo joe. We da so joe meki mi hatti kom bron nanga joe, tee mi pramisi joe, taki, joe sa kisi joe strafoe, mi sa poeloe joe heeli famili na grontapo, no wan soema vo joe sa libi abra moro, no wan dagoe srefi. Soema vo Jerobeam, di dede na foto? dagoe sa njam, en soema di dede na buiti? tingi-fowloe sa kom poeloe hem bele, panja. Da so Jehova taki.
Na baka profet Ahia pramisi da oeman, a taki: Joe si? te joe kom na hoso baka, da joeroe srefi, di joe foetoe sa kisi foto, nomo joe pikien sa dede, en dati sa de da wan soema vo Jerobeam famili, disi sa kisi wan reti beri jete, vo disi hem ben habi pikin respeki vo Masra, moro leki dem trawan. We di da profet taki so, nomo da missi go baka na hoso, kaba so leki hem foetoe kisi hem doro mofo nomo, da pikien tapo bro, a dede.
We di doro nomo dem toe kondre Juda nanga Israel ben de nanga trobi en feti trawan na trawan baka, Abia, da njoe koning vo Juda-kondre, taki, hem no lobbi so, hem sa meki dasani kaba wantem; en vo da hede a teki ala hem soldati makandra, a go feti nanga Jerobeam. Ma alwasi Jerobeam ben habi so meni soldati, toe-tron moro leki Abia, tog di Abia ben tjari dem domine vo Masra kom toe na da feti, en di a ben potti ala hem vertrouw na Jehova wawan, dati meki Abia kom masra vo da feti, a jagi dem trawan so, tee bakatem Jerobeam no ben habi hatti moro, vo kom feti nanga hem ageen. We toe jari na baka Jerobeam kom dede, en hem pikien Nadab tron koning na hem plesi.
Ma Abia, da koning vo Juda-kondre, di hem kom so wan bigi koning, hesi a kom vergiti Jehova toe. En di a no ben ke, vo poeloe dem kroekoetoe-gado baka, disi hem tata Rehabeam ben tjari kom na kondre, Masra meki a dede hesi, vo kondre no moe pori moro ogri. We hem pikien Assa, disi tron koning vo Juda-kondre na hem baka, hem ben de wan boen soema vo troe; a no ben doe wansani, disi no boen na Gado, ma alafasi a holi bribi so, leki David ben doe.
Ma na Israel-kondre alasani kom broeja toe-moesi datem. Bika koning Nadab ben de so wan srefi ogri soema, leki hem tata Jerobeam ben de; en dati meki wan tra ogri soema, di dem kali Baesa, kom meki oproeroe na kondre, en na ini da oproeroe a kili Nadab nanga da heeli famili vo Jerobeam, so leki profet Ahia ben taki gi Jerobeam na fesi kaba. Na baka Baesa potti hem srefi vo koning na Israel-kondre.
Ma na Juda -kondre alasani ben waka boen datem, bika koning Assa ben sabi, vo tiri hem kondre wan switi fasi. So hesi a teki abra nomo, a jagi ala dem takroe hoeroe-soema komoto na kondre wantem, a broko dem heiden-altari; en ala da kroekoetoe-gado-wroko, disi dem tra koning ben tjari kom na kondre, dati a poeloe krin-krin, kaba a seni plakati rontoe, meki ala soema moe jeri da santa leri-boekoe vo Jehova, en meki dem dini Gado nanga krin hatti.
Tin na fo jari Assa ben de koning kaba, sondro wan fetiman ben trobi hem. Ma bakatem wan blaka heiden-koning doro na ini Juda-kondre, a tjari doezend-tron doezend soldati kom feti nanga Assa. Da koning nem Sera. We di Assa nanga ala hem soldati go miti dem vyanti hafoe-pasi, vo jagi dem gowei baka, en di dem kom si dem blaka soldati, fa dem foeloe toemoesi, Assa bigin begi hem Gado, a taki: “Ke mi Masra Jehova, gran-tangi, kom helpi wi! Bika joe wawan kan helpi wi! Na joe wi potti wi vertrouw. Da bigi tranga vo joe moe helpi wi zwakawan. Da joe nem wi teki, da hem wawan gi wi hatti, vo go feti nanga dem foeloe soema. Bika joe da Jehova, wi Gado! Soema sa man vo feti nanga joe?” -- We ala di koning Assa begi da begi so, Masra meki dem vyanti kisi wan skreki, dem lasi hatti tee dem alamal teki pasi de ron; kaba Assa feti na dem baka, a jagi dem go panja na ala plesi, a teki ala dem goedoe, a drai baka go na Jerusalem.
Ma di a ben de na pasi jete, profet Asarja kom miti hem, a taki: Joe si? Koning Assa, nanga oen trawan alamala! Jehova de nanga oenoe, vo di oen holi oen srefi na hem; we alatem te oen soekoe hem? oen sa finni hem; ma efi oen libi hem, hem moe libi oen baka. Da so a ben doe wi alatem, dati oen srefi sabi. We, no lasi hatti; bika dati sa meki oen finni boen.
We di koning Assa jeri da vermane, dati gi hem hatti, vo a bigin wantron moro, vo poeloe ala heiden-sani moro krin na hem kondre, en dan a kali ala soema kom makandra na Jerusalem, vo holi wan bigi feesti-dei. En di dem kaba, vo meki ala dem ofrandi, na baka dem alamal meki da verbond makandra, dem sweri wan sweri srefi, taki, dem sa dini Jehova, da Gado vo dem tata, nanga dem heeli hatti; ma disoema no wani so, hem no moe tan na dem mindri. We di da mama vo koning srefi no wani poeloe hem kroekoetoe-gado jete, Assa go teki da takroe popiki vo hem nanga tranga, a koti hem piesi-piesi, kaba a hiti hem na ini faja; bika Assa ben holi hem bribi vo Jehova tranga vo troe.
Ma bakatem wan tra tesi kom miti Assa ageen. Disi so meni soema vo dem tin tra Israel-famili ben go abra na Juda-kondre, liebi na koning Assa ondro, vo dem kan dini da reti Gado na hem temple, we dati no ben boen na Baesa, da koning vo Israel -kondre, en dati meki a seni taki gi Assa, efi hem no seni dem ronweiman kom baka, nomo hem sa kom feti nanga hem. So srefi Baesa meki koning Benhadad vo Siria-kondre pramisi hem, taki, hem sa kom helpi hem na da feti.
We di-leisi Assa no holi hem bribi so boen, leki tra-dei; bika na plesi vo a potti ala hem vertrouw na Jehova wawan, a go soekoe helpi na wan liebi-soema, di a teki ala da goutoe nanga silver, di a ben kibri na ini temple, a seni dati go na da srefi Siria-koning, a taki, hem sa gi hem ala vo presenti, efi a kom helpi hem na ini da feti, na plesi vo a go helpi Baesa. Benhadad taki: We, a boen; mi sa kom. Kaba wantem da Siria-koning go feti nanga Baesa, a jagi hem so tee a no kan doe Assa wan ogri moro.
Ma da srefi joeroe profet Hanani kom na Assa, a krasi hem, a taki: Fa joe no ben potti joe vertrouw na Jehova, leki joe ben doe tra jari, di da blaka koning kom trobi joe? Joe ben membre, Masra no ben sa helpi joe di-leisi, efi joe ben begi hem? We disi joe go soekoe helpi na wan liebi-soema, dati joe no doe boen kweti-kweti; en mi pramisi joe na nem vo Masra, so langa Baesa de koning na Israel-kondre, alatem joe nanga hem sa de na feti makandra. Ma dati kom hati koning Assa toemoesi, a taki, da profet no ha noti vo taki gi hem, kaba a kom na hattibron so tee a teki da profet, a hiti hem na doengroe-hoso. En buiti dati Assa bigin trobi som tra soema moro, bika di a no ben frede Gado moro, dati meki a no ben frede toe, vo doe tra soema kroekoetoe. Ma bakatem a kom kisi takroe soro na ala toe foetoe, en di a no ben habi hatti moro, vo soekoe helpi na hem Gado, ma na datra wawan a soekoe dresi, dati meki da siki kom so ogri, tee a dede wan toemoesi ogri dede. Fotentin na wan jari a ben de koning vo Juda-kondre, en na hem baka hem pikien Josafat teki kondre abra. We Josafat ben de wan boen soema vo troe, a tiri hem kondre so mooi, en a holi hem bribi so boen, leki David; en di a dini hem Gado so nanga krin hatti, Masra blesi hem kondre, tee a tron wan bigi koning.
We di Josafat ben sabi, taki, so meni soema de na hem kondre, disi no sabi da Boekoe vo Gado so krin jete, a meki wan toe dri gransoema vo hem nanga foeloe domine teki da wet-boekoe vo Masra, a seni dem go waka heeli kondre rontoe, meki dem leri soema na ala dem foto vo Juda; en dati meki ala soema vo kondre kisi wan lobbi vo da njoe koning. Dem heiden-soema srefi, di ben liebi na buurti, dem kisi respeki toe vo hem, en nofo vo dem seni presenti kom gi hem.
Ma na Israel -kondre sani no ben waka boen kweti-kweti; alasani kom broeja vo troe. Bika so leki koning Baesa ben de wan ogri soema, di no ben wani sabi Jehova, so srefi ala dem tra koning, di ben kom na hem baka, ben de vo da srefi ogri speli toe. Hem pikien Ela ben de wan droengoeman, kaba wan dei, di a ben de na wan trakteri, Simri, wan bigi oficiri, kom kili hem nanga houroe, potti hem srefi vo koning. Ma wan sebi jari na baka Simri kisi hem paiman toe; bika wan tra bigi oficiri, di hem kali Amri, dati kom potti faja na ini koning-hoso, en na ini da faja koning Simri dede. We na baka, di Amri srefi tron koning vo Israel-kondre, a go meki wan bigi foto na tapo da bergi Samaria, kaba da foto a kali Samaria toe. We na dapee ala dem koning vo Israel go liebi bakatem; en so leki Jerusalem ben de da koning-foto na Juda -kondre, da so Samaria ben de da koning-foto na Israel -kondre.
Da srefi tem wan ogri soema vo Betel kom hopo, en nanga asranti a go meki da foto Jeriko baka, alwasi Masra ben taki krin-krin gi Josua, taki, nooiti wantem dem moe meki da foto baka. We di da soema no ke vo da woortoe vo Masra, helpi no ben de, a ben moese kisi da strafoe, disi Masra ben pramisi na Josua tem, taki, efi wan soema habi hatti, vo hopo Jeriko baka, a sa lasi toe pikien vo hem; en dati kom so toe.
Na baka di Amri dede, hem pikien Ahab tron koning vo Israel-kondre. Ma dati ben de wan toemoesi takroe soema, a doe ogri pasa-marki, moro leki Jerobeam nanga ala dem tra koning, di ben de bifo hem. En di a teki wan heiden-koning pikien vo hem wefi, a nem Isebel, da oeman tjari wan njoe gado moro kom na Israel-kondre, da gado nem Baal; kaba Ahab srefi no sjem, vo go dini da Baal toe, a meki wan aparti temple vo hem na Samaria. Ma hem wefi Isebel, hem ben de so tranga na ini da takroe bribi, tee a meki dem kili ala dem profet vo Masra, di ben de na kondre jete. So srefi a soekoe dem profeti-skolo toe, vo pori dem krin-krin. Ma wan klerki vo Ahab, hem nem Obadja, wan boen soema, di ben frede Gado, di hem si dasani, a go waarskouwe dem profet safri, kaba a teki wan hondro vo dem, a kibri dem na ini wan bigi stoon-horo; na dapee hem srefi ben loekoe njanjam gi dem, nanga watra toe.
1. Da tori vo da pikien Abia, di Masra ben poeloe na disi grontapo, vo a no moe leri ogri na hem tata hoso, dati de sori wi, fa Masra habi sari vo poti onnoozloe pikien. We, te wi si wan pikien dede, wi kan njam pre vo da pikien, disi Masra teki hem so hesi, kibri na hem sei teego, meki a no moe leri ogri dia na disi pori grontapo.
2. Da tori vo dem takroe koning en vo dem weiniki boen koning, dati de sori wi, fa a de fiti ala boen Kristen-soema, vo dem begi Gado alatem vo dem gran-soema vo kondre, vo a moe blesi dem, en vo a moe holi dem na reti bribi, meki dem kan tiri kondre reti, vo ala soema kan liebi boen na dem ondro.
(1 Kon. Kap. 17 & 18.)
Da srefi tem, disi koning Ahab nanga hem wefi Isebel ben pori heeli Israel-kondre nanga da kroekoetoe-gado-wroko, profet Elias vo Tisbe na Gilead-kondre kom waarskouwe Ahab wan dei, a taki gi hem: Mi pramisi joe na nem vo Masra Jehova na tapo, taki, joe sa si: no wan dow en no wan areen sa fadom, wan dri fo jari langa, tee vo mi taki, meki a fadom baka. We wantem Elias go begi wan begi na Masra, en tee vo da srefi joeroe no wan areen fadom moro heeli dri jari nanga siksi moen langa. (Jakobus 5, v. 17) Na baka Masra taki gi Elias, meki a go kibri na sei wan pikin kriki, di dem kali Krit , hem srefi sa meki dem raver tjari njanjam kom gi hem dapee. We Elias doe so, leki hem Masra taki gi hem, a go liebi klosibei na da kriki sei, en ibri mamantem nanga ibri sabatem dem raver tjari brede nanga meti kom gi hem, en da watra vo da kriki a teki, dringi.
We di no wan areen ben fadom moro so meni langa, dati tjari wan tranga hangritem kom na da heeli kondre; bika ala njanjam na dem pranasi kom pori, bifo a repi, en ala boom kom dede; so srefi dem sabana nanga dem peti nanga dem riba srefi kom dre so, tee no wan soema kan finni wan njanjam moro, en watra vo dringi ben dieri toe. A ben de wan jamer vo troe, vo jeri dem meti na ini boesi srefi de bari, dem waka rontoe, soekoe wan pikin njanjam, nanga pikin watra, vo nati dem neki, ma dem no kan finni. Liebi-soema nanga meti ben pina toemoesi nanga hangri en nanga drewatra, tee pikin-moro no wan soema ben kan holi liebi moro.
We di bakatem da kriki vo Elias kom dre toe, tee a no ben habi watra moro vo dringi, Masra kom taki gi hem, meki a go na Sarepta, da wan foto na Zidon-kondre, na dapee wan oeman, wan weduwe, sa loekoe njanjam gi hem.
We di Elias kom klosibei na da foto, a si wan oeman na sei pasi, di piki dre hoedoe; a bari da oeman, a taki: Tangi-tangi, gi mi pikin watra na wan kometje, vo mi dringi! Da oeman taki: Ja, mi sa go teki. Ma ala di a go teki watra, Elias bari na hem baka, a taki: Tangi-tangi, teki wan piesi brede toe, tjari kom gi mi! Da oeman taki: Ke, mi no ha wan soortoe brede na mi hoso; pikin blom nomo mi habi jete, so meni, leki mi kan holi na mi hanoe; nanga pikin oli toe de na ini batra jete. Mi da wan poti oeman, mi man dede, a libi wan man-pikien gi mi. We, joe no si? da hoedoe mi kom piki dia, vo mi kan meki pikin faja, teki da blom nanga da oli, rosi wan pikin brede, vo mi nanga mi pikien njam; na baka mi no sabi, pee mi sa kisi wan njanjam moro; wi ala toe sa dede nanga hangri.
Elias taki gi hem: No no mama, dati joe no ha vo frede. Go nomo rosi da brede, so leki joe taki, tjari kom gi mi fosi; na baka joe kan go rosi vo joe srefi toe, en vo joe pikien. Bika mi pramisi joe na nem vo Jehova, da Gado vo Israel; da pikin blom vo joe no sa kaba na ini bali, en da oli no sa kaba toe na ini da batra, so langa tee da dei kisi, disi Gado sa meki wan boen areen kom fadom na grontapo, meki sani kan gro baka. We da oeman bribi da woortoe vo Masra, a go doe, leki Elias taki gi hem; en da so da profet nanga da oeman nanga hem heeli famili njam makandra wan heeli piesi tem, sondro da blom nanga da oli kom kaba. Alasani kom reti so, leki Elias ben taki gi hem na nem vo Gado.
Ma bifo Elias komoto baka na da oeman hoso, da pikien vo da weduwe kom siki, tee a dede. We dati meki da poti mama kom membre, taki, somtem da profet finni wan foutoe na hem, disi meki a begi Gado gi hem, vo a moe strafoe hem, di a meki, hem pikien moe dede. We a haksi Elias nanga wan toemoesi sari-fesi, a taki: Hoe trobi mi nanga joe habi, disi so wansani moe kom mi abra? Da vo dati hede joe kom liebi na mi hoso, vo joe meki mi zondoe moe kom na krin, meki mi kisi so wan strafoe? Ma Elias no piki hem noti, ma a teki da pikien na da mama foetoe, tjari go na hem kamera, na dapee a potti hem na hem bedi tapo, a begi hem Gado vo da pikien, a taki: Ke mi Masra Jehova, mi plisi joe, gran-tangi! Sari vo da poti oeman, en meki da pikien zieli kom baka! We ala di Elias de bradi hem srefi so na abra da dede-skin de begi, dri-tron na baka makandra, Masra jeri da begi vo hem, kaba wantem a meki da pikien zieli kom baka. En Elias teki da pikien, tjari go na hem mama, a taki: Joe si? joe pikien kisi liebi baka. We dati meki da oeman plisiri so, tee a taki na Elias: Now mi si troe-troe, joe de wan soema vo Gado, en da woortoe vo Jehova, disi joe taki, a troe!
We di da bigi dre-tem ben holi dri jari kaba, sondro wan areen ben fadom, bakatem koning Ahab srefi kom saka pikinso, a si, dasani, disi profet Elias ben pramisi hem tra jari, a no ben de wan lei-tori; en dati meki a seni soekoe da profet, meki a kom koti da strafoe hafoe gi dem. Ma di Ahab no kan finni hem na heeli kondre, bakatem Gado srefi kom taki gi Elias, meki a go baka na Israel-kondre, vo Ahab kom si hem. We Elias doe so wantem, en di a de na pasi, a miti Obadja, da srefi boen klerki vo Ahab, disi ben kibri wan hondro profeti vo Masra tra jari na ini wan bigi horo, vo Ahab wefi Isebel no moe kisi dem, vo kili dem. Ma da joeroe, di Elias miti hem na pasi, Ahab srefi ben seni hem, vo a go soekoe wan toe dri stoon-horo, nomo vo a kan kisi pikin watra nanga grasi vo dem hasi en boeriki vo hem.
We di Elias si Obadja, a taki gi hem, meki a drai baka wantem, taki na koning, Elias de, a kom baka na hem kondre. Ma Obadja frede toe-moesi, vo tjari so wan njoesoe kom na koning, en nanga kni na gron a begi Elias, a taki: Ke mi masra, tangi-tangi, no seni mi vo taki so wan sani, bika koning soekoe joe so meni kaba. We so hesi mi sa kom piki hem, taki, joe dia, wantem a sa seni soema vo kisi joe, ma efi dan Masra seni joe gowei na wan tra plesi, meki Ahab no kan finni joe, san a sa doe nanga mi dan? a no kili a sa kili mi? Ma Elias taki: No no, no frede; mi sweri vo Masra Zebaot, taki, tidei srefi mi sa meki koning kom si mi. We di Obadja jeri so, a go wantem, meki hem masra sabi; kaba Ahab go na doro, go teki Elias hafoe-pasi. Ma di a kom klosibei na da profet, a haksi hem na wan krasi-fasi, a taki: So ? da joe da soema, disi tjari heeli Israel-kondre na so wan ongeluk? Elias taki: No, a no mi tjari kondre na ogri, ma da joe nanga joe tata famili meki alasani kom so, di oen poeloe dem gebod vo Masra, en di joe begi na dem Baal-popiki srefi. We kali heeli kondre kom makandra, meki ala soema kom na mi na tapo da bergi Karmel ; so srefi dem fo-hondro nanga feifitentin Baal-apostroe, nanga dem fo-hondro soso profet, di sidom alatem na Isebel tafra, njam nanga hem, dem alamal moe kom dapee toe!
Ahab, so leki a ben de fositem, a no ben sa jeri na da profet, ma di da tranga hangri-tem ben masi hem hatti pikinso, dati meki a doe so, leki Elias taki gi hem, a seni plakati na kondre wantem en na ala dem Baal-apostroe, vo dem moe kom makandra na tapo da bergi Karmel, na dapee Elias sa potti wan begi gi dem, meki Gado gi dem areen baka. --
We di dem alamal ben de makandra dapee, Elias hopo tanapoe na ala dem foeloe soema fesi, a taki: Hoefasi, oen Israel-soema! Hoe langa oen kanti-kanti na ala toe sei! A tan leki oen srefi no sabi, na hoe reti Gado oen sa bribi. Efi oen membre, taki Jehova de da reti Gado? we, teki hem dan, en dini hem! Ma efi oen membre, Baal de Gado? pasiensi, go dini hem! Ma no wan vo ala dem foeloe soema piki da profet wan woortoe, bika dem alamal ben de toemoesi tranga na ini da takroe bribi kaba. We dati meki Elias si krin-krin, Gado moe doe wan wonder-wroko na dem fesi, meki dem kom si, taki, troe-troe Jehova wawan, hem da Gado.
We a bigin wantron moro, a taki: Oen si? no wan profet vo Jehova de moro, leki mi wawan; ma dem Baal-apostroe? dem de fo-hondro nanga feifitentin soema. We, go teki toe kow, tjari kom dia; dan wi sa meki dem Baal-apostroe kili da wan, koti hem na piesi-piesi, potti na da hoedoe tapo, meki dem ofrandi gi Baal; ma dem no moe potti faja na ondro, vo letti da hoedoe. Na baka mi sa teki da tra kow, doe so srefi nanga hem, en mi no sa potti faja toe. We, dan oenoe moe kali da Gado vo oenoe , begi hem, kaba mi sa kali Jehova, begi hem. We, da Gado, disi sa seni hem faja kom, piki wi, hem dati de da reti Gado, da hem wi ala sa teki, dini. Dem alamal taki: A boen, meki wi doe so!
We helpi no ben de, dem Baal-profeti ben moese bigin wantem vo kili da kow, potti na tapo da altari da srefi mamantem, kaba dem bigin vo kali dem gado, dem bari hem tranga, dem taki: Baal! Baal! jere wi! Ma nanga ala babari, di dem bari doro tee dinatem, tog no wan Baal kom piki dem. Na baka Elias bigin vo meki spotoe nanga dem, a taki, dem moe bari moro tranga; somtem dem gado de sidom prakseri, ofoe somtem a de na wroko, somtem a no de na hoso toe, ofoe a de slibi; dem moe bari moro tranga, meki a kom na hai. We dem bigin vo bari moro tranga ageen, dem dansi da altari rontoe, dem teki nefi srefi, dem koti kraboe dem skin tee broedoe ron, dem membre, taki, somtem dati sa meki Baal kisi sari vo dem, vo a kom piki dem. Ma ala ben de vo soso, a no piki dem.
Na baka Elias kali ala soema kom na hem, a teki twalf stoon, so meni pikien leki Jakob ben habi, a hopo dem tanapoe, meki wan altari gi Jehova; en di a potti da hoedoe reti, a teki da tra kow, a kili hem, potti na da hoedoe tapo. So srefi a diki wan bigi gotro da heeli altari rontoe, a meki dem nati da meti nanga da hoedoe na tapo da altari, tee da heeli gotro na ondrosei kom foeloe nanga watra; bika dri-tron na baka makandra a meki dem hiti so meni watra na tapo, vo no wan soema moe taki, hem potti faja na ini da hoedoe. We di Elias klari so fara, a ben de da srefi joeroe, disi dem domine na Jerusalem ben meki dem ofrandi ibri baka-dina, a go tanapoe klosibei na da altari, a begi hem begi toe, a taki: Masra Jehova! Joe, di de da Gado vo Abraham en vo Isaak en vo Jakob, gran-tangi! meki ala soema kom si tidei, taki, joe wawan de da reti Gado vo Israel, en mi da joe foetoeboi! Meki dem si toe, taki, da joe ben seni mi, vo doe ala demsani, di mi doe! Gran-tangi Masra! mi plisi joe, jere da begi vo mi, en meki ala dem foeloe soema kom si, troe-troe, Jehova wawan de da reti Gado; dan bakatem dem sa gi joe pasi toe, vo joe kan naki dem hatti, meki dem soekoe joe baka.
We ala di Elias begi da begi so, bifo a kaba jete, da faja vo Masra komoto na hemel, fadom na tapo da altari, a njam da meti nanga da hoedoe nanga dem stoon srefi, nanga da doti; kaba da watra toe a lekki, di de na ini da gotro. We dati gi ala dem soema so wan skreki, tee dem alamal hiti dem srefi nanga bele na gron, en nanga bigi respeki dem taki: Jehova hem da Gado! Troe-troe Jehova hem da Gado! Elias taki: We, go kisi dem Baal-profeti wantem, dem alamala , meki no wan vo dem ronwei! We, dem kisi dem alamal, en Elias seni dem go na wan pikin riba, di dem kali Kison, na dapee a meki dem kili dem alamal, so leki a ben fiti dem, bika Jehova srefi ben taki, dem takroe koriman, disi de blindi trawan hai, vo dem dini kroekoetoe-gado, dem moese dede sondro pardon. (5. Mos. Kap. 13.)
Na baka Elias taki gi Ahab, meki a go sidom njam now, meki a dringi toe, bika hesi wan bigi areen de go kom. We ala di Ahab go vo hem, Elias klim go moro na taposei vo da bergi, na dapee a begi Masra ageen, vo a meki areen kom fadom baka. Ma hem foetoeboi a seni go na wan tra sei vo da bergi, meki a loekoe, efi a no kan si da lugti kom verandre pikinso na zout-watra-sei. En di da foetoeboi kom baka, taki, hem no si wansani, Elias seni hem go loekoe vo toe-tron en vo dri-tron, tee vo sebi-tron fosi a kom baka, a taki, now hem si wan pikin blaka wolkoe komopo na zee-kantisei, a pikin jete, leki wan soema hanoe. Elias taki: We ron hesi, go na Ahab, taki gi hem, meki a span hasi hesi-hesi, rei go na hoso, bifo da areen kom kisi hem. En Elias doe so srefi toe, a ron hesi tee a winni koning srefi, bika di da areen blaka so, Gado gi hem tranga na wan aparti fasi; en so hesi dem doro na Jesreel, nomo da winti tjari wan tranga areen kom, vo soema kisi watra vo dringi, en vo sani kan gro baka.
1. We da tori, fa nanga ala pori, disi dem Israel-soema ben pori, Gado no gi dem abra, ma a seni profet Elias go krasi dem, vermane dem, meki dem drai baka kom na hem, dati de sori wi, apostel Petrus habi reti, di a taki: Gado no wani, wan soema moe lasi, ma a wani, alamala moe drai baka kom na hem, begi hem pardon. (2. Petr. 3, v. 9.)
2. Apostel Jakobus taki: Da begi vo wan reti bribi-soema de wroko tranga vo troe, efi a begi nanga pasiensi! Elias ben de wan liebi-soema, so leki wi, ma a ben begi wan begi, meki no wan areen fadom, kaba da areen no fadom moro dri jari nanga siksi moen langa; na baka a begi wan begi ageen, kaba wantem hemel hopo, a gi da areen, meki sani kom gro baka na grontapo. (Jakobus 5, v. 16 tee 18.)
3. Masra Jesus taki: Na profet Elias tem, di kondre ben pina nanga hangri, foeloe weduwe ben de na Israel-kondre srefi; ma Gado no seni Elias go na no wan vo dem; na Sarepta wawan a seni hem go, na Zidon-kondre, na wan poti heiden weduwe. (Luk. 4, v. 25 & 26.) We da tori de sori wi, Gado no de loekoe na soema nem, ofoe na soema fesi, ma na soema hatti wawan a de loekoe. We, wan poti heiden-soema, di no habi okasi jete, vo kom sabi da reti Gado, efi hem soekoe vo dini Gado, so boen leki fa a sabi, Masra sa loekoe hem moro betre, leki a loekoe wan soso Kristen-soema, disi no doe so, leki fa a sabi. (Lukas 12, v. 47.)
4. Da poti oeman, ala di hem srefi no sabi moro, fa a sa doe pasa hem liebi, tog Gado taki, meki a gi Elias hafoe; en nanga Gado blesi dati srefi ben meki a kisi moro foeloe na bakatem, leki a ben habi fosi.
5. So leki profet Elias taki gi dem Israel-soema, dem no moe kanti-kanti moro na ala toe sei, ma meki dem taki wantem, hoe reti Gado dem wani dini; we so srefi Masra Jesus vermane wi toe, a taki: No wan soema kan dini toe masra makandra; disoema wani dini Gado? a no kan dini didiebri. (Matt. 6, v. 24.) Dem soema, disi de kanti-kanti so na ala toe sei jete, dem no ha wan boen liebi kweti-kweti; bika da ogri wroko de meki dem hatti no kan fili wan reti kouroe nooiti wantem.
(1 Kon. Kap. 19 tee Kap. 22.)
Di Ahab wefi Isebel kom jeri, fa Elias ben doe, en fa a ben kili dem Baal-apostroe vo hem, a seni wantem wan soema go na hem, go taki gi hem: Mi sweri vo dem gado vo mi, tamara na so wan joeroe mi sa doe joe so srefi, leki fa joe ben doe dem apostroe vo mi. We Elias feti hesi vo komoto dedapee, a go na Juda-kondre tee na da foto Berseba, a liebi hem foetoeboi dapee, ma hem srefi go waka doro wan heeli dei langa na da woestein-kondre, disi dem kali Paran , en di a weri, a go sidom na ondro wan boom, vo bro pikinso, a djeme tranga, a bari taki: Ke mi Gado! da liebi kom moro mi. Meki mi zieli go na joe! Meki mi dede, leki dem tata vo mi, mi no de moro betre leki dem! En di a taki so, slibi kom foefoeroe hem na ondro da boom.
We di a lidom de slibi, wan Engel vo Gado kom na hem, a fassi hem, a wieki hem, a taki: Elias! hopo hesi, go njam wansani. Ma di Elias drai hem fesi, a loekoe rontoe, a si wan brede nanga wan watra-kan de na hem hede-sei, disi da Engel ben potti gi hem. We, a njam da brede, a dringi da watra, a go lidom baka. Ma da Engel kom vo toe-tron, a fassi hem ageen, tee a wieki baka, a taki: Elias! hopo now, go njam en waka go, bika joe habi wan langa pasi vo waka jete.
We Elias hopo wantem, kaba da brede, di a njam, nanga da watra, di a dringi, dati gi hem so wan tranga, tee a waka da woestein doro, fotentin dei nanga fotentin neti, bifo a finni wan plesi, dapee soema ben liebi, tee a kisi na da bigi bergi Horeb, dedapee na ouroe-tem Moses toe ben pasa fotentin dei nanga fotentin neti, sondro a ben de njam wansani. We Elias go slibi dapee na ini wan bigi stoon-horo, kaba na neti a kom jeri da tongo vo Masra, disi kali hem, a taki: Sani joe doe dia, Elias? Elias taki: Ke mi ben pina so meni vo mi Gado Jehova Zebaot, bika dem pikien vo Israel libi joe verbond, dem broko ala joe altari, dem kili ala joe profeti. Mi wawan libi abra, ma dem de na mi baka, vo kili mi.
Masra taki: Komopo na ini joe horo, go na tapo da bergi, kom meki joe si! We, wan tranga winti hopo, da winti krasi, so tee a broko dem bergi nanga dem bigi stoon, ma Masra no ben de na ini da winti. Na baka vo da winti wan aardbefi kom, so tee gron kom seki tranga, ma Masra no ben de na ini da aardbefi. So srefi wan bigi onweri hopo na baka, ma Masra no ben de na ini da faja toe. Na baka wan safri switi winti hopo, di doro Elias hatti nanga wan switi kouroe. We di a fili, now Masra de, a teki hem mantel, en nanga bigi respeki a tapo hem fesi, a komopo na doro; kaba a jeri wan tongo, disi kali hem: Elias! sani joe doe dia? Elias piki hem, a taki ageen: Ke mi ben feti so meni vo mi Gado Jehova Zebaot, bika dem pikien vo Israel ben libi joe verbond, dem broko ala joe altari, dem kili ala joe profeti; kaba mi wawan libi abra, ma dem de na mi baka, vo kili mi. We hem boen Masra troostoe hem, a taki: No frede, go nomo baka na joe kondre, teki joe disciple Elisa , wye hem, meki hem kan tron profet na joe baka, te joe no de moro. Bika mi habi sebi doezend soema jete, disi no ben potti kni gi Baal, bosi hem.
We di Elias kom baka na Israel-kondre, vo soekoe Elisa, a finni hem na hem pranasi, dapee a ben de wroko na gron. En Elias go hiti hem profeti mantel gi Elisa, meki a kom na hem baka. We da so Elias teki Elisa, a wye hem wantem, so leki Masra ben taki, kaba Elisa go nomo libi hem firi-wroko wantem, a go na hoso, taki hem tata nanga hem mama adjosi, a waka go na Elias baka, a tron hem disciple.
We ala da tem, disi Elias no ben de na kondre, koning Ahab hatti no kom verandre jete. A troe, sinsi a ben si da wonder-wroko vo Elias na tapo da bergi Karmel, a ben gi dem profet vo Jehova pasi wan-wantron, vo dem kom na hem, vermane hem; en wan toe leisi srefi a ben harki Masra toe, di a ben de na wan bigi feti nanga Benhadad, da koning vo Siria-kondre. Ma vo dini hem Gado reti, so leki a fiti? dati no ben de na hem hatti. Te a tan, a gi dem profet vo Masra jesi pikinso, ma te a tan a jagi dem baka; bika di a harki toemoesi na hem wefi Isebel, dati tjari hem na foeloe ogri.
Da reti koning-hoso, dapee a ben de liebi, dati ben de na Samaria, da koning-foto vo Israel-kondre. Ma a ben habi wan tra hoso moro na da foto Jesreel, dapee a ben go liebi wan-wantron, vo pasa wan toe moen vo hem plisiri. We di da djari vo hem no bigi nofo na baka da hoso, wan dei a go haksi hem buurman Nabot, di ben habi wan mooi droifi-djari, a taki: Gi mi joe droifi-djari, mi sa teki hem vo meki wan plisiri-djari, bika a de fiti mi toemoesi boen, di a de so klosibei na mi hoso. Mi sa gi joe wan tra droifi-djari, disi moro betre; ma efi joe wani, mi kan pai joe toe nanga kontanti moni, so meni leki a waarti.
Ma Nabot no wani doe dati, a taki: Gado kibri mi, vo mi no gi joe da piesi doti, disi ben de alatem vo mi tata famili, sinsi langa jari! Bikasi Nabot ben loekoe na da wet vo Masra, disi taki, no wan soema moe teki wan hoso efi djari, disi ben de vo hem tata famili, go seli. (3. Mos. Kap. 25, v. 13-23.) Somtem Nabot ben de wan vo dem sebi doezend soema toe, disi no ben potti kni gi Baal.
We di Nabot taki so, dati kom hati Ahab toemoesi; en alwasi a no wani dwingi hem nanga tranga, tog di a no kan kisi dasani, di a wani, a no sabi, sani vo doe, en nanga bigi hattibron a go na hem hoso, lidom na hem bedi; dasani moro hem so, tee a no man srefi, vo teki wan njanjam. We di hem wefi Isebel si hem so, a haksi hem, san doe hem? kaba Ahab verteli hem da heeli tori, fa Nabot no wani seli da droifi-djari gi hem. Isebel taki: Joe si? da soema no wani gi joe respeki; ma now joe moese sori hem, taki, joe da koning vo kondre. A boen, meki joe hatti kouroe, mi sa meki joe kisi da djari.
We hesi Isebel go sidom skrifi wan brifi gi dem masra vo kroetoe na da foto Jesreel, a taki, meki dem steki wan toe dri soema, meki dem tjari Nabot go na kroetoe, meki dem potti lei na hem tapo, taki, Nabot ben kosi Gado, a ben kosi koning toe, kaba kroetoe moe gi hem vonisi, kili hem nanga stoon wantem. Isebel ben meki da brifi so, vo dem soema moe membre, hem doe dati nanga wani vo koning, en vo da hede a lakki hem nanga koning zegel srefi, ma Ahab no ben sabi noti vo dasani, disi hem wefi doe.
We di dem gransoema vo da foto kisi da brifi, nomo dem doe so, dem teki Nabot, dem kili hem wantem, kaba dem seni taki gi Isebel, Nabot no de moro, dem kili hem kaba. We so hesi Isebel kom jeri dati, nomo a go taki gi Ahab, meki hem hatti kouroe, bika Nabot no de moro, a dede kaba; meki koning go teki da djari now, di Nabot no ben wani gi hem. We Ahab hopo hesi, a go teki da djari abra wantem.
We ala di a de dapee na ini da djari, profet Elias kom krasi hem, en na nem vo Masra Jehova a pramisi hem, a taki: Joe si? di joe bigin trobi dem pikien vo Israel ageen, tee joe kili soema srefi, joe sa kisi joe paiman. Da plesi, dapee dem dagoe ben lekki da broedoe vo Nabot tra-dei, na da srefi plesi dem sa kom lekki joe broedoe toe. Di joe no wani kaba vo doe ogri, Masra sa poeloe joe heeli famili na grontapo, so leki a ben doe nanga Jerobeam famili toe; vo joe tranga-hatti hede Masra sa doe joe so, di joe no ke vo jeri hem kweti-kweti. Kaba joe wefi Isebel skin, dati dem dagoe sa njam na ini foto Jesreel.
We di Ahab jeri so wan tori na da profet mofo, a skreki vo troe, tee a pliti hem klosi, a go weri wan zaka na hem skin, a holi wan bigi fasten, en dei nanga neti a begi Gado, meki a saka da strafoe gi hem. Ma alwasi Gado ben sabi heeli boen, a no da ogri-doe de hati Ahab so meni, ma da frede wawan meki a begi hem so tranga: jete di a saka gi Jehova, en di a meki heeli kondre kom si, taki, hem habi frede vo da reti Israel-Gado, we Masra jeri da begi vo hem, a taki na Elias, hem sa saka da strafoe gi Ahab, a sa meki a no moe kom na hem liebitem; ma na baka, te hem pikien sa tron koning, dan fosi dasani sa kom.
We dri jari na baka Ahab kisi trobi nanga Benhadad, da koning vo Siria-kondre, vo wan toe dri foto hede, disi Benhadad no ben wani gi Ahab baka; en alwasi Gado meki profet Mika kom waarskouwe hem na fesi, taki, dasani no sa go waka boen gi hem, tog hem no jeri na dati, ma nanga tranga a go feti nanga Benhadad; en koning Josafat vo Juda-kondre kom helpi hem, bika datem Ahab nanga Josafat ben de kompe makandra. Ma di Ahab ben sabi, Benhadad gi ala hem ofciri ordre, taki, dem no ha vo feti nanga dem Israel-soldati, ma da koning wawan dem moe soekoe vo kili, vo da hede Ahab poeloe hem koning-klosi, weri wan soso-klosi, vo no wan soema moe sabi hem. Ma dati no ben helpi hem; bikasi na ini da feti wan Siria-soldati teki hem boo, a soetoe wan pyl soso-soso, kaba sondro da soema srefi sabi, da pyl go reti na ini Ahab skin, a soetoe hem so tee a dede na ini hem wagi; en dati meki da heeli feti kaba wantem. Na baka dem tjari hem go na hem foto Samaria, en na dapee dem beri hem. We di da heeli wagi vo hem morsoe nanga broedoe, dem soldati tjari hem go na wan watra, vo wasi hem, kaba da so da woortoe vo Masra kom reti; bika di dem wasi da wagi vo koning, dem dagoe djompo kom lekki hem broedoe.
We di Josafat komopo na da feti, kom baka na Jerusalem, profet Jehu kom miti hem hafoe-pasi, a krasi hem na nem vo Masra, a taki: Fa joe meki mati nanga so wan ogri soema, go helpi hem? Joe si? efi Gado no ben helpi joe, joe srefi ben kan kisi wan ogri toe na ini da feti. We koning Josafat teki da vermane nanga boen, en di a si, da kroekoetoe-gado-wroko kom hopo baka na hem kondre, ala di hem no ben de na hoso, hem srefi teki pasi, a waka heeli kondre rontoe, poeloe ala heiden-wroko, meki kondre dini Jehova baka, so leki a fiti. So srefi a potti granmasra vo kroetoe na ala dem bigi foto, di ben moe potti hai, vo alasani waka reti na kondre; en a vermane dem kroetoeman, a taki: Loekoe oen wroko boen! Bika oen no ha vo frede liebi-soema, ma Gado oen moese frede; en te oen sidom na kroetoe, oen moe sabi, taki, hem srefi de na oen mindri toe. We, membre dati, en loekoe boen, vo oen kroetoe wan reti kroetoe; bika Masra no de loekoe na soema bigi, en nanga presenti soema no kan blindi hem hai toe, meki a doe trawan kroekoetoe.
1. We da tori, fa Gado ben troostoe profet Elias, taki, hem habi sebi-doezend soema jete, disi no ben potti kni gi Baal, dati moe troostoe ala boen leriman tee tidei jete. Te dem si, so weiniki soema vo dem gemeente teki da reti kristen-bribi, ma pikin-moro ala habi da nem soso, sondro dem sori kristen- maniri toe, dan dem leriman moe troostoe dem srefi toe, taki: Somtem Masra habi moro foeloe boen skapoe na ini hem pen, leki wi srefi membre. Profet Jesajas taki: Mi ben membre, taki, ala mi wroko da vo soso; ma tog da wroko, di mi doe, a no mi wroko dati, ma na mi Gado wroko mi de. (Jesajas 49, v. 4.)
2. Da tori vo Nabot de sori wi, fa ogri soema de feti, vo helpi makandra. Da takroe heiden-oeman Isebel, nanga dem gran-soema vo Jesreel, nanga dem falsi getuige, dem alamal ben potti han makandra, vo helpi da ogri koning Ahab, meki a kisi hem wani. Ma Jesajas taki: Heloe vo dem soema, disi de meki barki makandra, vo doe ogri. (Jesajas 5, v. 18.)
3. Gado no ben mankeri, vo naki Ahab hatti, en vo waarskouwe hem so meni, ma jete Ahab no kaba, vo doe ogri; nanga ala hem boen sabi a holi da takroe liebi doro, tee a dede. We tee tidei jete joe kan si soema vo da srefi speli. So langa dem de nanga wan hebi, dem kom bedari pikinso; ma so hesi dasani kom pasa dem, nomo dem vergiti alasani baka, di dem ben pramisi Masra, dem no membre noti moro.
4. Disi da Siria-soldati ben soetoe da pyl so, sondro a wani teki wan reti marki, wi no kan taki, da soso-soso a ben go na ini Ahab skin, kili hem. No, Gado no meki wan sani kom pasa vo soso; ma alasani, disi hem doe, a sabi toe, vo san hede a moese kom so. We Ahab ben moese kisi hem paiman vo ala da foeloe ogri, di a ben doe.
(2. Kon. Kap. 1 & 2 & Kap. 22.)
Na baka vo koning Ahab hem pikien Ahasja tron koning vo Israel-kondre. Ma dati ben de wan ogri soema toe, wan takroe soema, so leki hem tata Ahab en leki hem mama Isebel.
We datem koning Josafat vo Juda-kondre ben meki wan toe dri sipi klari, vo seni dem go na Tarsis en na Ofir, vo bai sani, seli sani; en di da jonge Israel-koning Ahasja kom jeri dati, a seni haksi hem, efi hem no kan meki kompani nanga hem, en Josafat taki ja. Ma di Gado no wani, da boen koning Josafat moe habi wroko nanga Ahasja, a meki ala dem kompani-sipi lasi na ini wan bigi storm, kaba a seni wan profet go krasi Josafat vo da mati-fasi, di a ben habi nanga da ogri koning Ahasja. Na baka Ahasja wani hopo da srefi kompani-fasi wantron moro, ma Josafat taki no, hem no wani.
We wan dei Ahasja kisi wan ogri na hem koning-hoso na Samaria, bika di a naki foetoe, fadom na gron, ala hem skin kom broko, tee a siki reti-reti. We di a hangri vo sabi, efi a sa finni wan betre, ofoe somtem a sa dede na ini da siki, a seni haksi da gado vo Ekron, di dem kali Baal-Sebub , fa da siki vo hem sa waka? Ma ala di dem soema ben de na pasi jete, vo go na Ekron, profet Elias kom krasi dem na nem vo Jehova, a taki: San oen go haksi Baal-Sebub na Ekron? Israel no habi Gado dan? We go baka, taki na koning, a no sa finni betre, ma na ini da siki a sa dede, vo di a ben seni haksi wan kroekoetoe gado; da so Jehova seni taki gi hem.
We di dem soema kom na koning, piki hem baka, koning haksi dem, hoesoema dati, disi taki so gi dem, en hoe klosi a weri. Dem taki, da soema weri wan meti-boeba na hem skin, a tai na hem bele nanga wan leeri banti. We di Ahasja jeri dati, a taki: Now mi sabi kaba, da Elias! En wantem a seni wan ofciri vo hem nanga feifitentin soldati, meki dem go kisi Elias, tjari kom na hem. Ma di da patroeli kom na da plesi, dem si Elias sidom na tapo wan bergi, en sondro vo gi hem respeki, da ofciri bari hem, a taki: Joe soema vo Gado! Koning taki, joe moe saka. Elias piki hem, a taki: Efi mi da wan soema vo Gado, we meki da faja vo hem komopo na tapo, kili joe nanga ala joe soldati! We, so Elias taki, so da faja fadom kaba, kili dem. Na baka Ahasja seni wan tra komando ageen, vo teki Elias; ma di da ofciri kom na hem nanga da srefi asranti taki, da faja vo Gado kom kili hem nanga hem soldati so srefi toe. Na baka koning seni wan tra ofciri ageen, di meki dri, ma hem kom na wan heeli tra fasi; bika di a doro klosibei na da profeti, a begi hem nanga toemoesi respeki en nanga kni na gron, a taki: Tangi-tangi, joe soema vo Gado, no meki mi nanga mi soldati kisi wan ogri! We di da soema begi hem so, wan Engel vo Masra kom taki gi Elias, meki a go nanga da ofciri, bika a no ha vo frede wansani. Da so Elias hopo wantem, a go nanga hem tee na ini da kamera, dapee koning lidom de siki, a taki gi hem: Joe si? di joe ben seni soema go na Ekron, vo haksi Baal-Sebub, leki Israel no habi Gado, di soema kan haksi, joe no sa hopo baka, ma da dede joe sa dede. - We so leki da profet taki gi hem, da so a kom toe; en di Ahasja no habi pikien, hem brara Joram tron koning na hem baka; ma hem no ben de wan boen soema toe kweti-kweti.
We na baka di Elias sabi, da joeroe vo hem kisi, disi hem boen Masra sa poeloe hem na grontapo, teki hem na hemel liebi-liebi, a teki hem disciple Elisa, a komopo na Gilgal, a waka go nanga hem tee na Betel; ma a no meki wan soema sabi, san de go pasa. Ma dem disciple vo da profetiskolo janda, dem haksi hem disciple Elisa safri, efi hem sabi kaba, taki, Gado sa teki hem masra tidei, poeloe na hem sei. Elisa taki: Ai mi sabi, ma oen no moe taki. Na baka, di Elias gowei, a taki hem disciple adjosi, a taki: Betre joe tan dia vo joe, bika Masra seni mi go na Jeriko. Ma Elisa kre, a taki: No no, mi masra, mi no kan tan dia, libi joe; en da so dem ala toe waka makandra go na Jeriko. Na dapee dem disciple vo da profeti-skolo haksi Elisa da srefi tori toe, kaba Elisa piki dem so srefi, leki a ben piki dem trawan na Betel. Na baka, di dem kisi da riba Jordan, Elias teki hem mantel, a domloe hem, naki na ini da riba, kaba wantem da watra platie, a meki wan dre pasi, tee dem ala toe pasa da riba abra sondro dem nati foetoe.
We di dem kisi sjoro na abrasei, Elias taki gi hem disciple Elisa, meki a begi hem wansani, vo a kan gi hem wan presenti, bifo a komopo na hem sei. Elisa taki: Ke, tangi-tangi, meki mi kisi hafoe vo da Jeje vo joe, meki mi kisi toe porsie vo hem! Elias taki: Joe begi mi wan bigi sani troe; ma efi Gado wani, joe sa kisi. We mi sa gi joe wan marki, vo joe sabi: Efi joe hai si mi, te mi gowei, dan joe kan sabi, joe sa kisi dasani, di joe begi mi; ma efi joe no si mi, dan joe sabi, joe no de go kisi.
We di dem waka so, taki tori makandra, wan faja-wagi nanga faja-hasi kom platie dem ala toe makandra, da wagi teki Elias, en wantem wan tranga winti hopo, a tjari hem go na tapo tee na ini hemel. Ma hem disciple tanapoe de loekoe, a bari hem, a taki: Ke, mi tata! mi tata! a hati mi vo joe; joe ben helpi Israel moro foeloe, leki ala feti-wagi nanga ala soldati. We di a taki so, wantem Elias lasi na hem hai, tee a no si hem moro. Na baka a hopo da mantel vo Elias, di ben fadom, a teki hem, naki na ini da riba, en da so da watra hopo so wan srefi pasi ageen, leki bifo, meki Elisa pasa da riba abra nanga dre foetoe.
We dem disciple vo da profeti-skolo na Jeriko, disi ben potti Elias na pasi, dem tanapoe dedapee na sjoro-sei de wakti dem; en di dem si da wonder-wroko vo Elisa, fa a pasa da riba abra so, dem taki: Loekoe si, da jeje vo Elias kom na Elisa tapo noja! Kaba dem alamal go miti hem, dem hiti dem srefi na gron gi hem, gi hem respeki. So srefi dem tra soema vo Jeriko, dem kom toe na hem, dem taki: Masra, joe si? da foto vo wi dia da wan mooi plesi vo troe, vo soema liebi; ma da watra no boen, kaba da doti vo wi kondre, a no boen toe vo plani sani. Elisa taki: Dati no wansani. Go teki wan njoe kometje, potti zoutoe na ini, tjari kom gi mi! We dem doe dati wantem, en Elisa teki da zoutoe, a go hiti hem na ini da bigi watra-horo, dapee heeli foto go kisi watra, a taki: Jere, san Jehova taki: Mi meki da watra kom boen baka, a no sa doe soema ogri moro! Kaba wantem da watra kom switi.
1. We da tori vo profet Elias, fa a ben feti so trouw vo hem Gado, tee a meki faja srefi fadom, kili dem takroe soema, dati de sori wi da ouroe-testamenti maniri. Bika datem Jehova srefi no ben kan potti soema na respeki wan tra fasi, leki nanga frede en nanga skreki. Ma da tem vo njoe testamenti habi wan tra fasi. Bika wi Masra Jesus, alwasi wan-wantron a ben krasi dem falsi-hatti-soema toe, tog doro a ben lobbi gi soema vermane nanga safri hatti en nanga lobbi-fasi, moro leki nanga krasi en nanga skreki. We a de fiti wi toe, vo trawan vermane trawan nanga pasiensi en nanga lobbi. (Lukas 9, v. 54 & 55.) Ma te wan toe-fesi-soema kom na wi, vo kori wi nanga lei-taki, a fiti wi toe vo krasi hem, so leki wi Masra Jesus ben doe nanga dem Fariseman.
2. Elisa ben lobbi hem masra toemoesi, en dati meki a begi hem, vo a libi toe porsie gi hem vo da jeje, di a ben habi. We, efi Gado gi wi leriman, di sori wi da boen pasi vo Masra, dan wi moe begi Masra toe, vo a teki da jeje vo dem, gi wi hafoe toe. Da so apostel Paulus vermane wi toe, a taki: Membre dem leriman vo oenoe, en loekoe na da dede vo dem; feti vo oen kisi da srefi bribi vo dem toe! (Ebr. 13, v. 7.)
3. Enok nanga Elias ben de fesiman vo wi Masra Jesus, bikasi liebi-liebi dem ben go na hemel. We wi alamal, efi wi holi bribi, wi sa go toe na hem baka . Bika na da kroboi-dei vo kondre dem wolkoe sa kom teki wi, tjari wi go miti Masra na tapo, en dan wi sa tan nanga hem teego. (1. Tess. 4, v. 17.)
(2. Kon. Kap. 2, v. 23 tee Kap. 4.)
Di Elisa komopo na Jeriko, go na Betel, wan dei di a no farawei vo Betel moro, so meni pikin boi komopo na ini foto, dem kom dreigi hem, dem kosi hem, dem bari hem, taki: Joe pili-hede, kom dia! Ma Elisa drai hem fesi, a krasi dem, a taki: Loekoe boen oen stoutoe pikien! Masra de go strafoe oen! Kaba wantem toe beer djompo komopo na ini boesi, dem kili fotentin na toe vo dem boi. (Wan beer, da wan krasi boesi-meti, leki tigri.) Dan Elisa komoto dedapee, a go na da bergi Karmel; en na baka a go na Samaria, dapee koning Joram ben de liebi.
We da srefi koning Joram no ben de wan boen soema toe; ma jete a no ben de so toemoesi ogri, leki hem tata Ahab nanga hem mama Isebel, bika a poeloe da Baal popiki baka, disi Ahab ben hopo na kondre. Ma dem kow, disi Jerobeam ben hopo, dem dati a no poeloe; kontrari, hem srefi dini dem toe.
Ala da tem koning Josafat vo Juda-kondre holi hem srefi heeli boen, a no bemoeje nanga wan kroekoetoe-gado-wroko; ma da wan foutoe a doe, a meki koning Joram hali hem abra ageen, vo a kom helpi hem na wan feti, di Joram go feti nanga da koning vo Moab-kondre. En alwasi vo Josafat hede Masra meki dem winni da feti, tog a no ben fiti Josafat, vo kom so familiari nanga koning Joram. Bikasi di wan pikien vo Josafat ben trouw kaba nanga wan sisa vo Joram, di ben de wan pikien vo Ahab srefi, dati meki ala dem takroe maniri vo Ahab go abra toe na da njoe koning-famili vo Juda, en dati gi Josafat srefi foeloe verdriti na bakatem; bika zoodra da pikien tron koning srefi, heeli Juda-kondre kom broeja toemoesi, so leki Israel-kondre.
Da srefi tem profet Elisa waka rontoe, loekoe dem profeti-skolo, disi Elias ben hopo na Israel-kondre. We wan dei wan poti oeman kom na hem, wan profeti-weduwe, a bari hem, a taki: Ke, mi masra, mi man dede, a libi mi nanga paiman; ma a no ben kan helpi, bika joe srefi sabi, a ben de wan boen soema, di ben frede Gado. We now da masra kom trobi mi vo da paiman, a taki, hem sa teki dem toe pikien vo mi, seli dem vo katibo. Elisa taki: Sani, mi sa doe vo helpi joe? San joe habi na hoso jete? Da oeman taki: Noti mi habi, leki wan djogo nanga oli. Elisa taki: We a boen, go haksi ala soema na joe buurti, efi dem no kan leni joe soso djogo; teki so meni, leki joe kan kisi makandra. En dan go sidom na ini joe hoso, teki joe oli-djogo, kanti na ini dem tra soso djogo, tee dem alamal foeloe. We da oeman doe so, a go sidom kanti da oli, en dem pikien vo hem a teki, meki dem kisi dem soso djogo gi hem, potti baka na sei; en nanga Gado blesi da oli ron doro, tee ala dem djogo foeloe tee na tapo; dan fosi a kaba vo ron. Na baka Elisa taki gi da oeman, meki a go seli da oli, poeloe hem paiman; kaba da tra moni, disi libi abra, dati a moe kibri vo hem nanga hem pikien, vo dem habi wansani na hanoe, vo pasa dem liebi.
We di Elisa ben teki da wroko, vo loekoe dem profeti-skolo, di ben panja na kondre, dati meki doro nomo a ben de na pasi de waka rontoe. Wan dei a kom na da foto Sunem , na dapee wan gran missi verzoekoe hem, meki a kom na ini, njam nanga hem. We Elisa doe so, en te a ben waka da srefi pasi ageen, a lobbi go taki da missi odi. Di da missi si, Elisa da wan boen soema, wan dei, di a sidom taki tori nanga hem man, a taki: Da soema, di lobbi pasa diaso, da wan santa soema vo Gado. We meki wi gi hem wan pikin kamera na zoldro, potti wan bedi na ini, nanga wan tafra nanga stoeloe nanga wan kandera, vo a kan slibi na wi hoso, te a kom baka. Hem masra taki, a boen, meki wi doe so. Kaba da tra leisi, di Elisa kom baka, a go slibi na ini da kamera, hem nanga hem disciple, so leki dem verzoekoe hem. Da disciple nem Gehazi.
Dei-broko mamantem Elisa taki gi hem disciple, meki a go taki da missi gran-tangi vo hem boen-hatti, en meki a haksi hem toe, efi dem no kan doe hem wan plisiri baka; somtem dem kan potti wan boen mofo gi hem na koning, ofoe na iniwan tra gransoema vo kondre. Da missi taki: No no, mi no ha noti, vo oen begi koning gi mi; bika mi de liebi tiri na mi kondre, tangi vo Gado no wan soema de trobi mi. Di Gehazi kom piki hem masra baka, Elisa taki: We san mi sa doe dan? Tog mi hangri, vo doe da missi wan plisiri baka. We Gehazi taki, da missi no ha pikien; efi hem masra kan begi Gado gi hem, vo a kisi wan pikien, troe-troe dati sa doe da missi wan bigi plisiri. We, Elisa meki da missi kom na zoldro, en na hem kamera doro a pramisi hem, taki, na so wan joeroe tra jari a sa habi wan pikien, vo brasa. Da oeman taki: Gran-tangi! joe de wan soema vo Gado; joe no sa kori mi. A no tan langa toe, bifo da oeman kisi bele, kaba da srefi tem, disi Elisa ben taki gi hem, a meki wan pikien.
Ma na baka wan bigi tesi kom miti da oeman. Bika di da pikien kom bigi, wan dei a go na doro, go loekoe hem tata na firi; en na pasi a kisi wan tranga hede-hati, tee hem tata meki hem foetoeboi tjari da pikien go baka na hoso na hem mama. We da mama teki da pikien, potti na hem foetoe tapo, a holi hem tee dinatem, dan a dede. Na baka da poti mama tjari da dede pikien go na zoldro na ini da pikin kamera vo Elisa, en sondro a piki wan soema, a potti hem na da profeti bedi tapo, a seni wan soema go na hem masra, a taki: Seni hesi wan boi kom na mi nanga wan boeriki; mi moe feti, vo rei go na da profet. We di da boeriki kom, a go sidom na hem tapo, a rei hesi tee na bergi Karmel.
Di da profet kom si da missi farawei, a taki gi hem disciple Gehazi: Joe si? da missi de na pasi de kom! Djompo hesi, go miti hem hafoe-pasi, haksi hem, fa hem nanga hem masra tan, nanga hem pikien? Ma da missi kom toe na Elisa srefi, a saka kni na gron, a brasa hem foetoe. We Gehazi wani troesoe hem na sei, ma Elisa taki gi hem: No trobi da missi, bika mi si, a de nanga bigi sari. Mi no sabi, vo sani hede; Gado no taki gi mi jete. We da missi hopo hem mofo, a taki: Masra kan taki, da mi begi masra vo wan pikien? A no so mi ben taki, masra no moe kori mi?
Now Elisa kom sabi wantem, da pikien dede. We a taki gi hem disciple Gehazi: Kom teki mi tiki na joe hanoe, waka go nanga da missi! En te joe kom na hem hoso, teki da tiki, potti hem na da pikien fesi tapo. Ma loekoe boen, te joe miti soema na pasi, no taki dem odi, no tanapoe taki tori. Ma di da missi no potti so meni vertrouw na da disciple, leki na da profet srefi, a begi Elisa, tangi-tangi, meki hem srefi kom loekoe da pikien toe. We Elisa doe hem da plisiri, a waka go nanga hem.
Ma Gehazi waka na fesi, a kisi da hoso moro hesi; en di a kom na da kamera, a doe nanga da pikien, so leki hem masra ben taki gi hem. Ma di a no habi da tranga bribi nanga da jeje so, leki Elisa, dati meki hem no kan wieki da pikien, meki a kisi liebi baka, alwasi hoesan a doe nanga hem. Na baka di Elisa srefi kom, a sloto da kamera doro, en nanga foeloe begi a go lidom potti hem mofo na da pikien mofo tapo, toe-tron na baka makandra, vo meki da pikien skin kom waram. We nanga da waram da pikien zieli kom baka, tee a bigin hali wan wan bro; en di a hali da bro sebi-tron, nomo a hopo ala toe hai vo hem. Kaba Elisa kali da mama kom na ini, a taki: Teki joe pikien de! We, di da missi si, hem pikien de liebi baka, a plisiri so tee a taki da profet gran-tangi; kaba a teki da pikien, saka na ondro.
We da srefi tem heeli Israel-kondre ben pina nanga hangri dri jari kaba, en vo da hede Elisa, di a taki da missi adjosi, a waarskouwe hem, a taki, meki a verhuizi go na wan tra kondre so langa, tee da hangri-tem saka; bika so leki dem de, da hangri-tem sa holi wan fo jari jete na Israel-kondre. We da oeman doe so, a go liebi tee na Filistri-kondre, hem nanga hem heeli famili; en na dapee a tan so langa, tee dem sebi jari hangri-tem ben pasa.
Ma Elisa srefi go na Gilgal so langa, a loekoe da profeti-skolo janda; bika da skolo ben habi wan hondro disciple omtrenti, en nofotron dem ben pina toe nanga hangri, tee wan toe dri leisi Elisa ben moese helpi dem, di a doe wan wonder-wroko srefi, meki dem kisi njanjam. Wan dei a taki na koki, meki a boli wan groentoe gi dem; en di dem no habi wan soortoe wiwiri na djari moro, dem seni wan soema go soekoe ala soortoe wiwiri na boesi. We da soema finni wan soortoe wiwiri toe, disi dem kali kolokwinta, en di a tjari dem kom na hoso, a koti dem, boli na ini patoe, moksi nanga da tra groentoe; bika dem no sabi, taki, a no boen vo njam, dem meki soema misliki, en dem gi bele-hati toe. We di koki poeloe da njanjam, so hesi dem disciple tesi da groentoe nomo, dem alamal bigin vo kre, dem taki: Ke, joe soema vo Gado, da wisi, di de na ini patoe, a de go kili wi alamal! Ma Elisa teki pikin blom, hiti na ini patoe; en dati meki da njanjam kom boen, vo a no kan doe soema ogri moro.
Wan tra leisi wan boen-hatti Israel-soema tjari twenti karoe-brede kom gi Elisa nanga wan toe dri bosoe areisi, bikasi dati ben de da fosi njanjam, disi hem gron ben meki da srefi jari. We di Elisa taki gi hem disciple, meki a teki dasani, platie gi dem disciple na profeti-skolo, vo dem njam, da disciple taki: Fa mi sa doe platie so wan pikinsani, meki wan hondro soema kisi hafoe? a no sa sari. Ma Elisa taki: Joe no jeri, mi taki, joe moe gi dem, meki dem njam? Bika Masra Jehova taki, dem sa njam nofo, tee dem sa libi abra srefi. We nomo da disciple platie gi dem, kaba dem alamal njam nofo, tee hafoe libi abra srefi, so leki Masra ben taki.
Na baka di dem profeti-disciple kom moro foeloe na da skolo, dem alamal kom na Elisa, dem taki: Joe si? da hoso, dapee wi nanga joe de liebi makandra, a kom pikin kaba, a no kan teki wi ala moro. Betre wi de go meki wan njoewan na Jordan sei, vo joe leri wi janda. Elisa taki: A boen, oen kan go. Ma di dem begi hem, vo hem srefi moe kom toe nanga dem, a doe dem da plisiri toe, en da so dem alamal gowei, timre da hoedoe. We di dem de na da wroko, wan soema go fala wan boom klosibei na riba; en di da aksi vo hem fadom na ini watra, a kre, a ron go na Elisa, a bari taki: Ke mi masra! da aksi lasi; kaba a no de vo mi; na leni mi ben leni hem! Elisa meki da soema sori hem da plesi, dapee da aksi fadom. We, a koti wan piesi hoedoe, a hiti hem na ini watra, kaba da aksi komopo wantem, a drifi na watra tapo. Elisa taki gi da soema: Go kisi hem poeloe! We da so da soema langa hem hanoe, a kisi hem aksi baka.
1. We da tori de gi wi wan toe dri leri ageen. Disi dem boi vo Betel ben ogri so, dati wi no ha vo verwondroe. Bika sinsi koning Jerobeam tem dem soema vo Betel ben pori toemoesi na ini da kroekoetoe-gado-wroko. Te jonge soema si wan takroe maniri na bigi soema, dem lobbi teki da maniri toe.
2. Efi wan soema trobi trawan, holi trawan vo spotoe, dati de wan bigi-bigi zondoe. Da wet vo Gado taki: Te joe si wan soema nanga weti wiwiri, joe moe hopo tanapoe